ପାଠ ୧୦

ପରମେଶ୍ୱର ଘୃଣା କରୁଥିବା କାର୍ଯ୍ୟ

ପରମେଶ୍ୱର ଘୃଣା କରୁଥିବା ବିଷୟଗୁଡ଼ିକୁ ଆପଣ କିପରି ଅନୁଭବ କରିବା ଉଚିତ ? (୧)

କେଉଁ ପ୍ରକାରର ଯୌନ ବ୍ୟବହାରଗୁଡ଼ିକ ଅପରାଧ ଅଟେ ? (୨)

ଜଣେ ଖ୍ରୀଷ୍ଟିୟାନଙ୍କ ପାଇଁ ମିଥ୍ୟା ? (୩) ଜୁଆଖେଳ ? (୩)ଚୋରୀ ? (୩) ହିଂସା ? (୪) ପ୍ରେତାତ୍ମବାଦ ?(୫) ମାତାଳାମି ? (୬) ପ୍ରଭୃତି ବିଷୟରେ କିପରି ଦୃଷ୍ଟିକୋଣ ହେବା ଉଚିତ ?

ଜଣେ ବ୍ୟକ୍ତି କୁଅଭ୍ୟାସରୁ କିପରି ମୁକ୍ତ ହୋଇ ପାରିବ ? (୭)

୧. ପରମେଶ୍ୱରଙ୍କ ସେବକମାନେ ଉତ୍ତମ କଥାକୁ ଭଲ ପାଆନ୍ତି । କିନ୍ତୁ ସେମାନେ ଖରାପ କଥାକୁ ଘୃଣା କରିବା ମଧ୍ୟ ଶିଖିବା ଉଚିତ । (ଗୀତସଂହିତା ୯୭:୧୦) ଏହାର ଅର୍ଥ ହେଉଛି ସେସବୁ କାର୍ଯ୍ୟରୁ ଦୂରରେ ରହିବା ଉଚିତ, ଯାହାକୁ ପରମେଶ୍ୱର ଘୃଣା କରନ୍ତି । ଏହି କାର୍ଯ୍ୟଗୁଡ଼ିକ କʼଣ ?

୨. ବ୍ୟଭିଚାର: ବିବାହ-ପୂର୍ବ-ମୈଥୁନ, ପରସ୍ତ୍ରୀଗମନ, ପାଶବିକ ଯୌନ, ନିଷିଦ୍ଧ ଯୌନ ସଂପର୍କ ଓ ସମଲିଙ୍ଗକାମୁକତା ପ୍ରଭୃତି ପରମେଶ୍ୱରଙ୍କ ବିରୁଦ୍ଧରେ ଗୁରୁତର ପାପ ଅଟେ । (ଲେବିୟ ୧୮:୬; ରୋମୀୟ ୧:୨୬, ୨୭; ୧ କରିନ୍ଥୀୟ ୬:୯, ୧୦) ଅବିବାହିତ ନାରୀପୁରୁଷ ଯଦି ଏକାଠି ବାସକରନ୍ତି ତେବେ ସେମାନେ ଭିନ୍ନ ରହିବା କିମ୍ବା ଆଇନ୍‌ଗତ ବିବାହ କରିନେବା ଉଚିତ ।—ଏବ୍ରୀ ୧୩:୪.

୩. ମିଥ୍ୟା, ଜୁଆଖେଳ, ଚୋରୀ: ଯିହୋବା ପରମେଶ୍ୱର ମିଥ୍ୟା କହନ୍ତି ନାହିଁ । (ତିତସ ୧:୨) ଯେଉଁ ବ୍ୟକ୍ତି ତାଙ୍କ ଆଶୀର୍ବାଦ ଚାହେଁ ସେ ମିଥ୍ୟାଠାରୁ ଦୂରେଇଯିବା ଉଚିତ । (ହିତୋପଦେଶ ୬:୧୬-୧୯; କଲସୀୟ ୩:୯, ୧୦) ପ୍ରତ୍ୟେକ ପ୍ରକାରର ଜୁଆଖେଳ, ଲୋଭରୁ ଦୂଷିତ ହୁଏ । ତେଣୁ ଖ୍ରୀଷ୍ଟିୟାନମାନେ ଲୋଟେରୀ, ଘୋଡ଼ାଦୌଡ଼ ଓ ବିଙ୍ଗୋ ପ୍ରଭୃତି କୌଣସି ପ୍ରକାର ଜୁଆଖେଳରେ ଭାଗ ନିଅନ୍ତି ନାହିଁ । (ଏଫିସୀୟ ୫:୩-୫) ଖ୍ରୀଷ୍ଟିୟାନମାନେ ଚୋରୀ  କରନ୍ତି ନାହିଁ । ସେମାନେ ଚୋରା ସମ୍ପତ୍ତିକୁ ଜାଣିବୁଝି କିଣନ୍ତି ନାହିଁ କିମ୍ବା ବିନା ଅନୁମତିର ଜିନିଷ ନିଅନ୍ତି ନାହିଁ ।—ଯାତ୍ରା ପୁସ୍ତକ ୨୦:୧୫; ଏଫିସୀୟ ୪:୨୮.

୪. କ୍ରୋଧ, ହିଂସା: ଅନିୟନ୍ତ୍ରିତ କ୍ରୋଧ, ହିଂସା ଆଡ଼କୁ ନେଇପାରେ । (ଆଦି ପୁସ୍ତକ ୪:୫-୮) ଜଣେ ହିଂସ୍ର ପ୍ରକୃତିର ବ୍ୟକ୍ତି ପରମେଶ୍ୱରଙ୍କ ମିତ୍ର ହୋଇ ପାରିବ ନାହିଁ । (ଗୀତସଂହିତା ୧୧:୫; ହିତୋପଦେଶ ୨୨:୨୪, ୨୫) ପ୍ରତିଶୋଧ ନେବା କିମ୍ବା ଅନ୍ୟ ବ୍ୟକ୍ତି ଆମ ପ୍ରତି ଅନ୍ୟାୟ ଆଚରଣ କଲେ ଦୁଷ୍ଟତାର ସହିତ ପ୍ରତିବଦଳା କରିବା ଭୁଲ ଅଟେ ।—ହିତୋପଦେଶ ୨୪:୨୯; ରୋମୀୟ ୧୨:୧୭-୨୧.

୫. ଗାରିଡ଼ି ମନ୍ତ୍ର ଓ ପ୍ରେତାତ୍ମବାଦ: କେହି କେହି ରୋଗ ଭଲ କରିବା ପାଇଁ ପ୍ରେତାତ୍ମାମାନଙ୍କ ଶକ୍ତିର ସାହାଯ୍ୟ ଲୋଡ଼ନ୍ତି । ଅନ୍ୟ ବ୍ୟକ୍ତି ନିଜର ଶତ୍ରୁମାନଙ୍କୁ ଅସୁସ୍ଥ କରିବା କିମ୍ବା ମାରିବା ପାଇଁ ମନ୍ତ୍ର କରିଥାନ୍ତି । ଏସବୁ କାର୍ଯ୍ୟ ପଛରେ ଶୟତାନର ଶକ୍ତି ରହିଛି । ତେଣୁ ଖ୍ରୀଷ୍ଟିୟାନମାନେ ଏଥି ମଧ୍ୟରୁ କୌଣସିରେ ଭାଗ ନେବା ଉଚିତ ନୁହେଁ । (ଦ୍ୱିତୀୟ ବିବରଣ ୧୮:୯-୧୩) ଆମେ ଯଦି ଯିହୋବାଙ୍କ ନିକଟରେ ରହିବା, ଗୁଣୀଗାରିଡ଼ିରୁ ଉତ୍ତମ ସୁରକ୍ଷା ପାଇବା ।—ହିତୋପଦେଶ ୧୮:୧୦.

୬. ମାତାଳାମି: ଅଳ୍ପ ମଦ, ବିୟର, କିମ୍ବା ଏନ୍ୟ ପ୍ରକାର ମଦ୍ୟପାନ କରିବା ଭୁଲ ନୁହେଁ । (ଗୀତସଂହିତା ୧୦୪:୧୫; ୧ ତୀମଥି ୫:୨୩) କିନ୍ତୁ ଅତ୍ୟଧିକ ମଦ୍ୟପାନ କିମ୍ବା ମାତାଲ ହେବା ପରମେଶ୍ୱରଙ୍କ ଦୃଷ୍ଟିରେ ମନ୍ଦକାର୍ଯ୍ୟ ଅଟେ । (୧ କରିନ୍ଥୀୟ ୫:୧୧-୧୩; ୧ ତୀମଥି ୩:୮) ଅତ୍ୟଧିକ ମଦ୍ୟପାନ ଆପଣଙ୍କ ସ୍ୱାସ୍ଥ୍ୟ ହାନି କରିପାରେ ଓ ପରିବାର ଭାଙ୍ଗି ଦେଇ ପାରେ । ଏହା ଅନ୍ୟ ପ୍ରଲୋଭନ ଆଡ଼କୁ ମଧ୍ୟ ଅତି ଶୀଘ୍ର ନେଇଯାଇପାରେ ।—ହିତୋପଦେଶ ୨୩:୨୦, ୨୧, ୨୯-୩୫.

୭. ପରମେଶ୍ୱର ଯେଉଁସବୁ କାର୍ଯ୍ୟକୁ କୁକର୍ମ କହନ୍ତି ସେଥିରେ ଅଭ୍ୟସ୍ତ ବ୍ୟକ୍ତି “ପରମେଶ୍ୱରଙ୍କ ରାଜ୍ୟର ଉତ୍ତାରାଧିକାରୀ ହେବେ ନାହିଁ” । (ଗାଲାତୀୟ ୫:୧୯-୨୧) ଯଦି ଆପଣ ପ୍ରକୃତରେ ପରମେଶ୍ୱରଙ୍କୁ ଭକ୍ତି କରନ୍ତି ଓ ତାଙ୍କୁ ସନ୍ତୁଷ୍ଟ କରିବାକୁ ଚାହାଁନ୍ତି ତେବେ, ଆପଣ ଏସବୁ କାର୍ଯ୍ୟରୁ ମୁକ୍ତ ହୁଅନ୍ତୁ । (୧ ଯୋହନ ୫:୩) ପରମେଶ୍ୱରଙ୍କ ଦୃଷ୍ଟିରେ ଯାହା ମନ୍ଦ ସେସବୁକୁ ଘୃଣା କରିବା ଶିଖନ୍ତୁ । (ରୋମୀୟ ୧୨:୯) ଏମିତି ଲୋକମାନଙ୍କ ସହିତ ବନ୍ଧୁତା କରନ୍ତୁ, ଯେଉଁମାନଙ୍କ ସ୍ୱଭାବ ଧର୍ମପରାୟଣ ଅଟେ । (ହିତୋପଦେଶ ୧୩:୨୦) ପରିପକ୍ୱ ଖ୍ରୀଷ୍ଟିୟାନ ସାଥୀମାନେ ଏ ଦିଗରେ ସାହାଯ୍ୟର ଉତ୍ସଭାବରେ ପ୍ରମାଣିତ ହୋଇ ପାରନ୍ତି । (ଯାକୁବ ୫:୧୪) ସର୍ବୋପରି ପ୍ରାର୍ଥନା ମାଧ୍ୟମରେ ପରମେଶ୍ୱରଙ୍କ ସାହାଯ୍ୟ ଉପରେ ହିଁ ନିର୍ଭର କରନ୍ତୁ ।—ଫିଲିପ୍‌ପୀୟ ୪:୬, ୭, ୧୩.

[୨୦, ୨୧ ପୃଷ୍ଠାରେ ଚିତ୍ର]

ପରମେଶ୍ୱର ମାତାଳାମି, ଚୋରୀ, ଜୁଆଖେଳ ଓ ହିଂସା ଭଳିଆ କାର୍ଯ୍ୟକୁ ଘୃଣା କରନ୍ତି