ବାଇବଲର ଶେଷ ପୁସ୍ତକ ଯାହାକୁ ପ୍ରକାଶିତ ବାକ୍ୟ କୁହାଯାଏ, ଏହା ସମସ୍ତ ମାନବଜାତିଙ୍କ ପାଇଁ ଏକ ଆଶାର କିରଣ ଦେଇଥାଏ । ଏହା ପ୍ରେରିତ ଯୋହନଙ୍କ ଦ୍ୱାରା ଲିଖିତ, ଏଥିରେ ଅନେକ ଦର୍ଶନର ଲେଖା ରହିଛି ଯାହା ଯିହୋବାଙ୍କ ଉଦ୍ଦେଶ୍ୟର ପରିପୂର୍ଣ୍ଣତାର ମାଧ୍ୟମରେ ଚୁଡ଼ାନ୍ତ ପର୍ଯ୍ୟାୟରେ ପହଞ୍ଚାଇବ ।

ପ୍ରଥମ ଦର୍ଶନରେ ଆମେ ଦେଖିବାକୁ ପାଉ, ପୁନରୁତ୍‌ଥିତ ଯୀଶୁ କେତେକ ମଣ୍ଡଳୀକୁ ପ୍ରଶଂସା ଓ ସଂଶୋଧନ କରିଛନ୍ତି । ପର ଦର୍ଶନଟି ଆମକୁ ଈଶ୍ୱରଙ୍କ ସ୍ୱର୍ଗୀୟ ସିଂହାସନ ନିକଟକୁ ନେଇଯାଏ, ଯେଉଁଠାରେ ଆମେ ଦେଖିବାକୁ ପାଉ ଯେ ଅନେକ ଆତ୍ମିକ ପ୍ରାଣୀ ତାହାଙ୍କ ପ୍ରଶଂସା କରନ୍ତି ।

ଈଶ୍ୱରଙ୍କ ଉଦ୍ଦେଶ୍ୟ ଯେତେ ପୂର୍ଣ୍ଣହେବାରେ ଲାଗିଛି, ମେଷଶାବକ ଅର୍ଥାତ୍‌ ଯୀଶୁଖ୍ରୀଷ୍ଟ ଗୋଟିଏ ପୁସ୍ତକ ପ୍ରାପ୍ତକରନ୍ତି ଯାହା ସପ୍ତ ମୁଦ୍ରାରେ ମୁଦ୍ରାଙ୍କିତ । ପ୍ରଥମ ଚାରିଗୋଟି ମୁଦ୍ରା ଖୋଲା ଗଲାପରେ, ଜଗତର ଦୃଶ୍ୟପଟରେ କିଛି ଲାକ୍ଷଣିକ ଅଶ୍ୱାରୋହୀ ଦେଖାଗଲେ । ଏମାନଙ୍କ ମଧ୍ୟରୁ ପ୍ରଥମ ଜଣକ ହେଲେ ଯୀଶୁ ଯିଏ କି ରାଜମୁକୁଟରେ ବିଭୂଷିତ ହୋଇ ଶୁକ୍ଲବର୍ଣ୍ଣର ଅଶ୍ୱ ଆରୋହଣ କରିଥିଲେ । ଏହାର ପର ଅଶ୍ୱାରୋହୀମାନେ ଭିନ୍ନ ଭିନ୍ନ ବର୍ଣ୍ଣର ଅଶ୍ୱରେ ସବାରି ହୋଇ ଆସନ୍ତି ଯାହା ଲାକ୍ଷଣିକଭାବେ ଯୁଦ୍ଧ, ଦୁର୍ଭିକ୍ଷ ଓ ମହାମାରୀକୁ ବୁଝାଏ । ଏସବୁ ଅନ୍ତିମ ଦିନରେ ଏହି ବିଧିବ୍ୟବସ୍ଥାର ଶେଷ ସମୟରେ ଦେଖାଯିବ । ସପ୍ତମ ମୁଦ୍ରା ଖୋଲାଗଲା ପରେ ସାତଟି ତୁରୀଧ୍ୱନୀ ବାଜି ଉଠେ ଯାହା ଲାକ୍ଷଣିକଭାବେ ଈଶ୍ୱରଙ୍କ ମହାବିଚାରର ଘୋଷଣା କରେ । ଏହାର ପରିଣାମସ୍ୱରୂପ, ସାତଟି ଲାକ୍ଷଣିକ ମାହାମାରୀ ବା ଈଶ୍ୱରଙ୍କ କ୍ରୋଧ ପ୍ରକାଶ ପାଏ ।

ଈଶ୍ୱରଙ୍କ ରାଜ୍ୟ ଏକ ନବଜାତ ଶିଶୁ ପୁତ୍ର ସନ୍ତାନ ସଦୃଶ, ଯାହା ସ୍ୱର୍ଗରେ ସ୍ଥାପନ କରାଯାଇଛି । ଯୁଦ୍ଧ ହେଲା ଏବଂ ଶୟତାନ ଓ ତାର ଦୁଷ୍ଟଦୂତଙ୍କୁ ସ୍ୱର୍ଗରୁ ପୃଥିବୀରେ ନିକ୍ଷେପ କରାଗଲା । ଏହି ସମୟରେ ଏକ ଉଚ୍ଚ ସ୍ୱର ଶୁଣାଗଲା “ହାୟ, ପୃଥିବୀ” । ସମୟ ଅତି ଅଳ୍ପ ବୋଲି ଜାଣି ଦିଆବଳ ମହାକ୍ରୋଧରେ କ୍ରୋଧିତ ।—ପ୍ରକାଶିତ ବାକ୍ୟ ୧୨:୧୨.

ଯୋହନ ଯୀଶୁଙ୍କୁ ସ୍ୱର୍ଗରେ ଜଣେ ମେଷଶାବକ ରୂପେ ଦେଖନ୍ତି ଯାହାଙ୍କ ସଙ୍ଗେ ୧,୪୪,୦୦୦ ଜଣ ଥିଲେ ସେମାନଙ୍କୁ ପୃଥିବୀରୁ ମାନବଜାତି ମଧ୍ୟରୁ ବାଛି ନିଆଯାଇଛି । ଏମାନେ ଯୀଶୁଙ୍କ ସହ ‘ରାଜାରୂପେ ଶାସନ କରିବେ’ । ପ୍ରକାଶିତ ବାକ୍ୟ ଜଣାଏ ସେହି ବଂଶର ଗୌଣ ଭାଗର ମୋଟ ସଂଖ୍ୟା ହେଲା ୧,୪୪,୦୦୦ଜଣ ।—ପ୍ରକାଶିତ ବାକ୍ୟ ୧୪:୧; ୨୦:୬.

ପୃଥିବୀର ସମସ୍ତ ଶାସକମାନେ ହର୍ମିଗିଦ୍ଦୋନ୍‌ରେ ଏକତ୍ରିତ ହେଲେ ଯାହାକୁ “ଈଶ୍ୱରଙ୍କ ମହାଦିନର ଯୁଦ୍ଧ” କୁହାଯାଏ । ସେମାନେ ଶୁକ୍ଲବର୍ଣ୍ଣ ଅଶ୍ୱାରୋହୀ ଯୀଶୁଙ୍କ ସଙ୍ଗରେ ଯୁଦ୍ଧକଲେ ଯିଏକି ସ୍ୱର୍ଗୀୟ ସେନାବାହିନୀର ନେତୃତ୍ୱ ନେଉଥିଲେ । ଏହି ପୃଥିବୀର ସମସ୍ତ ଶାସକଙ୍କୁ ଧ୍ୱଂସ କରାଗଲା । ଶୟତାନକୁ ବାନ୍ଧି ଦିଆଗଲା ତତ୍ପରେ ଯୀଶୁ ଓ ୧,୪୪,୦୦୦ ଜଣ ପୃଥିବୀ ଉପରେ “ଏକ ସହସ୍ର ବର୍ଷ” ଶାସନ କଲେ । ଏହି ଏକ ହଜାର ବର୍ଷ ପରେ, ଶୟତାନକୁ ବିନାଶ କରାଗଲା ।—ପ୍ରକାଶିତ ବାକ୍ୟ ୧୬:୧୪; ୨୦:୪.

ଖ୍ରୀଷ୍ଟ ଓ ତାହାଙ୍କ ସହ ଶାସକଙ୍କ ଏକ ହଜାର ବର୍ଷ ଶାସନ, ଆଜ୍ଞାକାରୀମାନଙ୍କ ନିମନ୍ତେ କି ଅର୍ଥ ରଖେ ? ଏ ବିଷୟରେ ଯୋହନ ଲେଖନ୍ତି:“[ଯିହୋବା] ସ୍ୱୟଂ ସେମାନଙ୍କ ସଙ୍ଗରେ ରହିବେ ଓ ସେମାନଙ୍କ ଚକ୍ଷୁରୁ ସମସ୍ତ ଅଶ୍ରୁଜଳ ପୋଛିଦେବେ; ମୃତ୍ୟୁ ଆଉ ଘଟିବ ନାହିଁ; ଶୋକ କି କ୍ରନ୍ଦନ କି ବ୍ୟଥା ଆଉ ହେବ ନାହିଁ; କାରଣ ପୂର୍ବ ବିଷୟସବୁ ଲୋପ ପାଇଅଛି ।” (ପ୍ରକାଶିତ ବାକ୍ୟ ୨୧:୪) ହଁ, ପୃଥିବୀ ପୁଣିଥରେ ପାରାଦୀଶରେ ବଦଳି ଯିବ !

ପ୍ରକାଶିତ ବାକ୍ୟ ଏହିଭାବେ ବାଇବଲର ବାର୍ତ୍ତାକୁ ସମାପ୍ତ କରେ । ମସୀହଙ୍କ ରାଜ୍ୟ ଦ୍ୱାରା ଯିହୋବାଙ୍କ ନାମକୁ ପବିତ୍ର କରାଯିବ ଓ ଚୀରକାଳ ନିମନ୍ତେ ତାହାଙ୍କ ସାର୍ବଭୌମତ୍ୱର ସତ୍ୟତା ପ୍ରମାଣିତ ହେବ !

—ଏହା ପ୍ରକାଶିତ ବାକ୍ୟ ଉପରେ ଆଧାରିତ ।