ଦାନିଏଲ, ଯିଏ କି ଜଣେ ଅତି ସଚ୍ଚୋଟ ଯୁବକ ଥିଲା ତାହାଙ୍କୁ ଯିରୁଶାଲମର ଧ୍ୱଂସ ହେବା ପୂର୍ବେ ବାବିଲକୁ ବନ୍ଦୀ କରି ନିଆ ଯାଇଥିଲା । ସେ ଓ କେତେକ ଯିହୂଦୀ, ଯାହାକୁ ପରିତ୍ୟକ୍ତ ଯିହୂଦା ରାଜ୍ୟରୁ ବନ୍ଦୀକରି ନିଆଯାଇଥିଲା, ସେମାନେ ତାହାଙ୍କ ବନ୍ଦୀ ହାକିମମାନଙ୍କଠାରୁ କିଛି ଅଧିକ ସ୍ୱାଧୀନ ପାଇଥିଲେ । ବାବିଲରେ ବହୁତ ବର୍ଷ କଟେଇବା ପରେ ଦାନିଏଲଙ୍କୁ ଈଶ୍ୱର ବହୁତ ଆଶୀର୍ବାଦ କରିଥିଲେ, ଏପରି କି ତାହାଙ୍କୁ ସିଂହ ଗାତରୁ ମୃତ୍ୟୁମୁଖରୁ ଉଦ୍ଧାର କରିଥିଲେ ଏବଂ ଭବିଷ୍ୟତ ବିଷୟରେ ଜାଣିବା ପାଇଁ କିଛି ଝଲକ ଦେଇଥିଲେ । ଦାନିଏଲଙ୍କ ପ୍ରସିଦ୍ଧ ଭବିଷ୍ୟତବାଣୀ ହେଲା ମସୀହ ଓ ତାହାଙ୍କ ଶାସନ ।

ଦାନିଏଲ ଜାଣିପାରିଥିଲେ ମସୀହଙ୍କ କେବେ ଆଗମନ ହେବ । ଦାନିଏଲଙ୍କୁ କୁହାଯାଇଥିଲା ଯେ ଈଶ୍ୱରଙ୍କ ଲୋକଙ୍କର, “ଅଧିପତି ଅଭିଷିକ୍ତ ବ୍ୟକ୍ତିଙ୍କ” ଆଗମନ କେବେ ହେବ ? ଏହା ଥିଲା ଯିରୁଶାଲମ ପ୍ରାଚୀରର ପୁନଃସ୍ଥାପନ ଓ ନିର୍ମାଣ କରିବା ପାଇଁ ଆଦେଶ ଦେବାର ଠିକ୍‌ ୬୯ ସପ୍ତାହ ବର୍ଷ ପରେ । ସାଧାରଣତଃ ଏକ ସପ୍ତାହରେ ସାତ ଦିନ ହୋଇଥାଏ; ଯଦି ଏକ ଦିନକୁ ଏକ ବର୍ଷ ବୋଲି ଧରି ନିଆଯାଏ ତେବେ ଏକ ସପ୍ତାହ ହେବ ସାତ ବର୍ଷ । ଏହି ଆଦେଶଟି ଦାନିଏଲଙ୍କ ସମୟଠାରୁ ବହୁବର୍ଷ ପରେ ଅର୍ଥାତ୍‌ ଖ୍ରୀଷ୍ଟପୂର୍ବ ୪୫୫ରେ ଦିଆଯାଇଥିଲା । ସେହି ବର୍ଷରୁ ଆରମ୍ଭ କରି ଯଦି ଆମେ ୬୯ ସପ୍ତାହ ବର୍ଷ ବା ୪୮୩ବର୍ଷ ଗଣିବା ତେବେ ଏହାର ସମାପ୍ତି ୨୯ଖ୍ରୀଷ୍ଟାଦ୍ଦରେ ହୁଏ । ଏହି ପୁସ୍ତିକାର ପର ପୃଷ୍ଠାଗୁଡ଼ିକରେ ଆମେ ଦେଖିବା ଯେ ସେହି ବର୍ଷରେ କʼଣ ସବୁ ଘଟିଥିଲା । ଦାନିଏଲ ପୂର୍ବରୁ ଏହା ମଧ୍ୟ ଦେଖିଥିଲେ ମସୀହଙ୍କୁ ପାପର ପ୍ରାୟଶ୍ଚିତ ନିମନ୍ତେ “ଉଚ୍ଛିନ୍ନ” ବା ହତ୍ୟା କରା ଯିବ ।—ଦାନିଏଲ ୯:୨୪-୨୬.

ମସୀହ ସ୍ୱର୍ଗରେ ରାଜା ହେବେ । ଦାନିଏଲ ଗୋଟିଏ ଅସାଧାରଣ ସ୍ୱର୍ଗର ଦର୍ଶନ ଦେଖିଲେ ଯେଉଁଠାରେ ସ୍ୱୟଂ ଯିହୋବାଙ୍କ ସିଂହାସନ ନିକଟରେ ମସୀହ “ମନୁଷ୍ୟପୁତ୍ର ନ୍ୟାୟ ଏକ ପୁରୁଷ” ଉପସ୍ଥିତ ହେଲେ । ଯିହୋବା ତାହାଙ୍କୁ “କର୍ତ୍ତୃତ୍ୱ, ମହିମା ଓ ରାଜ୍ୟ” ଦେଲେ । ତାହାଙ୍କ ରାଜ୍ୟ ଚୀରକାଳ ସ୍ଥାୟୀ ହେବ । ଏହା ବ୍ୟତୀତ ଦାନିଏଲ ମସୀହଙ୍କ ରାଜ୍ୟ ବିଷୟକ ଆଉ କେତେକ ରୋମାଞ୍ଚକ ତଥ୍ୟ ଜାଣିବାକୁ ପାଇଲେ, ଯେ ରାଜା ନିଜ ସହ ଆଉ ଅନ୍ୟ କେତେକଙ୍କୁ ଶାସନ ଭାର ଦେବେ ଯାହାକୁ “ସର୍ବୋପରିସ୍ଥଙ୍କର ପବିତ୍ର ଲୋକ” କୁହାଯାଏ ।—ଦାନିଏଲ ୭:୧୩, ୧୪, ୨୭.

ସେହି ରାଜ୍ୟ ଏହି ପୃଥିବୀର ସମସ୍ତ ରାଜ୍ୟଗୁଡ଼ିକୁ ଧ୍ୱଂସ କରିବ । ଈଶ୍ୱର ଦାନିଏଲଙ୍କୁ ଗୋଟିଏ ସ୍ୱପ୍ନର ଅର୍ଥ କହିବାର କ୍ଷମତା ଦେଇଥିଲେ ଯାହାକି ବାବିଲର ରାଜା ନବୂଖଦ୍‌ନିତ୍ସରଙ୍କୁ ବ୍ୟତିବ୍ୟସ୍ତ କରିଥିଲା । ରାଜା ଗୋଟିଏ ବିରାଟ ମୂର୍ତ୍ତି ଦେଖିଲେ ତାର ମସ୍ତକ ଶୁଦ୍ଧ ସୁବର୍ଣ୍ଣରେ, ଛାତି ଓ ବାହୁ ଦ୍ୱୟ ରୁପାରେ, ପେଟ ଓ ଜଙ୍ଘ ପିତଳରେ, ଗୋଡ଼ଗୁଡ଼ିକ ଲୁହାରେ ଏବଂ ପାଦ ଦୁଇଟିର କିଛି ଅଂଶ ଲୁହା ଓ କିଛି ଅଂଶ ମାଟିରେ ନିର୍ମିତ ହୋଇଥିଲା । ପାହାଡ଼ରୁ କଟା ଯାଇଥିବା ଗୋଟିଏ ପଥର ଖଣ୍ଡ ଆସି ସେହି ମୂର୍ତ୍ତିର ପାଦରେ ଆଘାତ କଲା ଏବଂ ତାହା ଖଣ୍ଡବିଖଣ୍ଡ ହୋଇ ଚୂରମାର ହେଲା । ଦାନିଏଲ ସେହି ମୂର୍ତ୍ତିର ଅଂଶଗୁଡ଼ିକ ବିଷୟରେ କହିଲେ ଯେ ଏହା ଗୋଟିଏ ପରେ ଗୋଟିଏ ଉଠି ଆସିବା ବିଶ୍ୱଶକ୍ତିଗୁଡ଼ିକୁ ବୁଝାଏ ଯାହା ସ୍ୱର୍ଣ୍ଣ ମସ୍ତକ ବାବିଲରୁ ଆରମ୍ଭ ହୋଇଥିଲା । ଦାନିଏଲ ଏହା ମଧ୍ୟ ଜାଣି ପାରିଥିଲେ ଯେ ଏହି ଦୁଷ୍ଟ ସଂସାରର ଶାସନକାଳରେ ଶେଷ ବିଶ୍ୱଶକ୍ତିର ଶାସନ ସମୟରେ ଈଶ୍ୱରଙ୍କ ରାଜ୍ୟ ହସ୍ତକ୍ଷେପ କରିବ । ଏହା ପୃଥିବୀର ସମସ୍ତ ମାନବ ସରକାର ଗୁଡ଼ିକକୁ ଧ୍ୱଂସ କରିବ । ତାʼପରେ ଏହା ଚୀରକାଳ ପାଇଁ ଶାସନ କରିବ ।—ଦାନିଏଲ, ଅଧ୍ୟାୟ ୨.

ବହୁବର୍ଷ ବଞ୍ଚିବା ଫଳରେ ଦାନିଏଲ ବାବିଲର ପତନ ଦେଖିଥିଲେ । ଭବିଷ୍ୟତବକ୍ତା କହିବା ଅନୁସାରେ କୋରସ ରାଜା ସେହି ନଗରକୁ ପରାଜୟ କରିଥିଲେ । କଛି ସମୟ ପରେ, ଭବିଷ୍ୟତବାଣୀ ଅନୁଯାଇ ଠିକ୍‌ ୭୦ବର୍ଷ ସେମାନଙ୍କ ଜନ୍ମଭୂମି ପରିତ୍ୟକ୍ତ ରହିବା ପରେ ଯିହୂଦୀମାନେ ମୁକ୍ତି ପାଇଲେ । ବିଶ୍ୱସ୍ତ ଅଧ୍ୟକ୍ଷ, ଯାଜକ ଏବଂ ଭାବବାଦୀଙ୍କ ଅନୁଶାସନ ଯୋଗୁଁ ଯିହୂଦୀମାନେ ଶେଷରେ ଯିରୁଶାଲମକୁ ପୁନଃନିର୍ମାଣ କଲେ ଏବଂ ଯିହୋବାଙ୍କ ମନ୍ଦିରର ପୁନଃସ୍ଥାପନ କରିଥିଲେ । କିନ୍ତୁ ୪୮୩ବର୍ଷ ପରେ କʼଣ ହେବ ?

—ଏହା ଦାନିଏଲ ପୁସ୍ତକ ଉପରେ ଆଧାରିତ ।