କʼଣ ଆପଣଙ୍କୁ ପ୍ରତିଦିନ ଜୀବନରେ ବହୁତ ସଂଘର୍ଷ କରିବାକୁ ପଡ଼େ ? କʼଣ ଆପଣ ଜଣେ ପିତା ଅଟନ୍ତି ଏବଂ ଆପଣଙ୍କୁ ଏକା ସାଙ୍ଗରେ ଅନେକ ଦାୟିତ୍ୱ ତୁଲାଇବାକୁ ପଡ଼େ ? କʼଣ ଆପଣଙ୍କୁ ଏକୁଟିଆ ଘର ଚଳାଇବାକୁ ପଡ଼େ ? ନିଜ ପରିବାରର ଭରଣପୋଷଣ କରିବା ପାଇଁ ବହୁତ ପରିଶ୍ରମ କରିବାକୁ ପଡ଼େ ? କʼଣ ଆପଣଙ୍କୁ ସ୍କୁଲରେ ପିଲାମାନେ ହଇରାଣ କରନ୍ତି, ଡରାନ୍ତି ଓ ଧମକାନ୍ତି ? କʼଣ ଆପଣଙ୍କ ଦେହ ଠିକ୍‌ ରହେ ନାହିଁ, କିମ୍ବା ବୃଦ୍ଧାବସ୍ଥା ଯୋଗୁଁ ଆପଣଙ୍କୁ ଅନେକ ସମସ୍ୟାର ସାମନା କରିବାକୁ ପଡ଼େ ? ସମସ୍ତଙ୍କ ଜୀବନରେ କୌଣସି ନା କୌଣସି ସମସ୍ୟା ରହିଛି । ଆଉ ଏପରି ଅନେକ ଭାଇଭଉଣୀ ଅଛନ୍ତି, ଯେଉଁମାନଙ୍କ ଜୀବନରେ ଗୋଟିଏ ନୁହେଁ ବହୁତ ସମସ୍ୟା ରହିଛି । କିନ୍ତୁ ଆମେ ଜାଣୁ ଯେ ଖୁବ୍‌ ଶୀଘ୍ର ଏହି ସମସ୍ତ ସମସ୍ୟାରୁ ମୁକ୍ତି ପାଇବା ।—୨କରି ୪:୧୬-୧୮.

ସେହି ସମୟ ଆସିବା ପର୍ଯ୍ୟନ୍ତ ଆମକୁ ଏଥିରୁ ସାନ୍ତ୍ୱନା ମିଳେ ଯେ ଯିହୋବା ଆମ ସମସ୍ୟାଗୁଡ଼ିକ ଜାଣନ୍ତି । ସେ ଦେଖନ୍ତି ଯେ ଆମେ କିପରି ଧୈର୍ଯ୍ୟ ଧରୁଛୁ ଏବଂ ତାହାଙ୍କ ବିଶ୍ୱସ୍ତ ରହୁଛୁ । ଆଉ ସେ ଭବିଷ୍ୟତରେ ଆମକୁ ଅନେକ ଆଶିଷ ଦେବେ । (ଯିରି ୨୯:୧୧, ୧୨) ଯୀଶୁ ମଧ୍ୟ ଆମ ପ୍ରତ୍ୟେକଙ୍କର ସମସ୍ୟାଗୁଡ଼ିକୁ ଜାଣନ୍ତି । ସେ ପ୍ରତିଜ୍ଞା କରିଛନ୍ତି, “ମୁଁ ତୁମ୍ଭମାନଙ୍କ ସଙ୍ଗେ ସଙ୍ଗେ ଅଛି ।” (ମାଥି ୨୮:୨୦) ତେଣୁ ନିଜ ଦାୟିତ୍ୱଗୁଡ଼ିକ ତୁଲାଇବା ସମୟରେ ଆମେ ଭରସା ରଖିପାରିବା ଯେ ଯୀଶୁ ଆମକୁ ନିଶ୍ଚୟ ସାହାଯ୍ୟ କରିବେ । ଆମେ ସମୟ ବାହାର କରି ଚିନ୍ତନ କରିବା ଉଚିତ୍‌ ଯେ ଖୁବ୍‌ ଶୀଘ୍ର ଈଶ୍ୱରଙ୍କ ରାଜ୍ୟରେ ଆମକୁ ମୁକ୍ତି ମିଳିବ । ତେବେଯାଇ ଆମର ପୂରା ଭରସା ହେବ ଯେ ଆମ ଆଶା ନିଶ୍ଚୟ ପୂରଣ ହେବ । କେବଳ ଏତିକି ନୁହେଁ, ଚିନ୍ତନ କଲେ ଆମକୁ ନିଜ ସମସ୍ୟାଗୁଡ଼ିକୁ ସହିବା ପାଇଁ ମଧ୍ୟ ସାହସ ମିଳେ ।—ରୋମୀ ୮:୧୯-୨୧.

ଯେବେ ଝଡ଼ ଭଳି ସମସ୍ୟା ଆସେ, ନିଜ ଧ୍ୟାନ ଯୀଶୁଙ୍କ ଉପରେ କେନ୍ଦ୍ରିତ କରନ୍ତୁ !—ଭବିଷ୍ୟତରେ ଈଶ୍ୱରଙ୍କ ରାଜ୍ୟରୁ ମିଳିବାକୁ ଯାଉଥିବା ଆଶିଷ ନାମକ ଭିଡିଓ ଦେଖନ୍ତୁ । ତାʼପରେ ଏ ପ୍ରଶ୍ନଗୁଡ଼ିକର ଉତ୍ତର ଦିଅନ୍ତୁ:

• ମଣିଷଜାତି ଈଶ୍ୱରଙ୍କଠାରୁ କିପରି ଦୂରେଇ ଗଲେ ? ଏହାର କʼଣ ପରିଣାମ ହେଲା ?

• ଯେଉଁମାନେ ଯିହୋବାଙ୍କ ଆଜ୍ଞା ପାଳନ କରନ୍ତି, ସେମାନଙ୍କୁ ଭବିଷ୍ୟତରେ କʼଣ ମିଳିବ ?

• କାହା ଯୋଗୁଁ ଆମକୁ ଏପରି ଭବିଷ୍ୟତ ମିଳିବ ?

• ଆପଣ ନୂତନ ପୃଥିବୀରେ ବିଶେଷ କରି କେଉଁ ଆଶିଷ ପାଇବା ପାଇଁ ଅପେକ୍ଷା କରିଛନ୍ତି ?