ଏହା କାହିଁକି ମହତ୍ତ୍ୱପୂର୍ଣ୍ଣ: ପ୍ରେରିତ ପାଉଲ ନିଜ ଖ୍ରୀଷ୍ଟିୟାନ ଭାଇଭଉଣୀମାନଙ୍କ ସାହସ ବାନ୍ଧିବା ପାଇଁ ୧୪ଟି ଚିଠି ଲେଖିଥିଲେ । ସେମଧ୍ୟରୁ ଗୋଟିଏ ହେଉଛି, ପ୍ରଥମ କରିନ୍ଥୀୟ ନାମକ ବହି । ଯେତେବେଳେ ଆମେ କୌଣସି ଚିଠି ଲେଖୁ, ସେଥିରେ ଆମେ ବୁଝିବିଚାରି ଭଲ ଶବ୍ଦ ଲେଖିବା ଉଚିତ୍‌ । ଫଳରେ ଯାହାଙ୍କ ପାଖକୁ ଆମେ ଚିଠି ଲେଖୁଛୁ, ସେ ତାକୁ ବାରମ୍ବାର ପଢ଼ିପାରିବେ । ଚିଠି ଲେଖି ଆମେ ନିଜ ସମ୍ପର୍କୀୟ ଓ ଚିହ୍ନା ପରିଚିତ ଲୋକଙ୍କୁ ସାକ୍ଷ୍ୟ ଦେଇପାରିବା । ଆମେ ଏପରି ଲୋକଙ୍କୁ ମଧ୍ୟ ଚିଠି ଲେଖିପାରିବା, ଯେଉଁମାନଙ୍କୁ ଭେଟିବା ସମ୍ଭବ ହୋଇ ନ ଥାଏ । ଉଦାହରଣ ପାଇଁ— ଯେଉଁମାନେ ଆମ ବାର୍ତ୍ତାରେ ଆଗ୍ରହ ଦେଖାଇଛନ୍ତି, କିନ୍ତୁ ଘରେ ପ୍ରାୟ ନ ଥାʼନ୍ତି । ତାʼ ଛଡ଼ା, ଯେଉଁମାନେ କଡ଼ା ସୁରକ୍ଷା ଥିବା ଆପାର୍ଟମେଣ୍ଟରେ ରହନ୍ତି, କିମ୍ବା ଏପରି କଲୋନୀରେ ରହନ୍ତି, ଯେଉଁଠାରେ ଯିବା ପାଇଁ ଅନୁମତି ମିଳେ ନାହିଁ । କିମ୍ବା ଦୂରଦୂରାନ୍ତ ଅଞ୍ଚଳରେ ରହୁଥିବା ଲୋକମାନେ ମଧ୍ୟ । ଚିଠି ଲେଖିବା ସମୟରେ ଆମେ କେଉଁ କଥାଗୁଡ଼ିକୁ ମନେ ରଖିବା ଉଚିତ୍‌, ବିଶେଷ କରି ଅଜଣା ବ୍ୟକ୍ତିମାନଙ୍କୁ ଲେଖିବା ସମୟରେ?

ଏହା କିପରି କରିପାରିବା:

• ଆପଣ ତାଙ୍କୁ ଭେଟିଥିଲେ ଯାହା କୁହନ୍ତେ, ଚିଠିରେ ତାହା ହିଁ ଲେଖନ୍ତୁ । ଆରମ୍ଭରେ ହିଁ ନିଜ ପରିଚୟ ଦିଅନ୍ତୁ ଏବଂ ସ୍ପଷ୍ଟ ଭାବେ ଜଣାନ୍ତୁ ଯେ ଆପଣ କାହିଁକି ଚିଠି ଲେଖୁଛନ୍ତି । ତାʼପରେ ଆପଣ ଏକ ପ୍ରଶ୍ନ ପଚାରିପାରନ୍ତି, ଯାହାଫଳରେ ଚିଠିକୁ ପଢ଼ୁଥିବା ବ୍ୟକ୍ତି ଜଣକ ଚିନ୍ତା କରିବାକୁ ବାଧ୍ୟ ହେବେ । ତାʼପରେ ଆପଣ ଆମ ୱେବସାଇଟ୍‌ ବିଷୟରେ ଉଲ୍ଲେଖ କରିପାରିବେ । ପବିତ୍ର ଶାସ୍ତ୍ରର ଅନଲାଇନ୍‌ କୋର୍ସ (ଓଡ଼ିଆରେ ଉପଲବ୍ଧ ନାହିଁ) କିମ୍ବା ଘରେ ବାଇବଲ ଅଧ୍ୟୟନ କରିବାର ବ୍ୟବସ୍ଥା ବିଷୟରେ ଜଣାଇପାରିବେ । ଆପଣ ଅଧ୍ୟୟନରେ ବ୍ୟବହୃତ ହେଉଥିବା କୌଣସି ପ୍ରକାଶନରେ ଥିବା କିଛି ଅଧ୍ୟାୟର ଶୀର୍ଷକ ଲେଖିପାରିବେ । ଲଫାପାରେ ଆପଣ ସମ୍ପର୍କ କାର୍ଡ଼, କୌଣସି ନିମନ୍ତ୍ରଣ ପତ୍ର, କିମ୍ବା କୌଣସି ଟ୍ରାକ୍ଟ ମଧ୍ୟ ରଖିପାରିବେ

• ସଂକ୍ଷେପରେ ଲେଖନ୍ତୁ । ଏତେ ଲମ୍ବା ଚଉଡ଼ା ଲେଖନ୍ତୁ ନାହିଁ, ଯାହାଫଳରେ ବ୍ୟକ୍ତି ଜଣକ ପଢ଼ି ପଢ଼ି ଥକିଯିବେ ।—ଚିଠିର ନମୁନା ଦେଖନ୍ତୁ

• ଚିଠିଟିକୁ ପଠାଇବା ପୂର୍ବରୁ ଭଲ ଭାବେ ପଢ଼ନ୍ତୁ, ଯାହାଫଳରେ କିଛି ଭୁଲ୍‌ ରହିବ ନାହିଁ ଏବଂ ଆପଣଙ୍କ ଲେଖା ପରିଷ୍କାର ରହିବ । ବୁଝିବିଚାରି ଭଲ କଥା ଲେଖନ୍ତୁ, ଯାହାଫଳରେ ବ୍ୟକ୍ତି ଜଣକ ବୁଝିପାରିବେ ଯେ ଆପଣ ତାଙ୍କର ମଙ୍ଗଳ ଚାହାନ୍ତି । ଧ୍ୟାନରେ ରଖନ୍ତୁ ଯେ ଆପଣ ଏମିତି କିଛି ଲେଖିବେ ନାହିଁ, ଯାହା ତାଙ୍କ ଭାବନାକୁ କଷ୍ଟ ଦେବ । ଲଫାପା ଉପରେ ଯେତେ ଟଙ୍କାର ଡାକ ଟିକଟ ଲାଗେ, ସେତେ ନିଶ୍ଚୟ ଲଗାନ୍ତୁ