ଯେତେବେଳେ ଆମେ କାହାରିକୁ ଶିଖାଇବା ସମୟରେ ଭିଡିଓ କିମ୍ବା ଚିତ୍ର ଇତ୍ୟାଦି ଦେଖାଉ, ତାଙ୍କ ଆଗ୍ରହ ସୃଷ୍ଟି ହୁଏ, ସେ ଆମ କଥା ସହଜରେ ବୁଝିପାରନ୍ତି ଏବଂ ତାହା ମନେ ରଖିପାରନ୍ତି । ଆମ ମହାନ ଉପଦେଶକ ଯିହୋବା ମଧ୍ୟ ନିଜ ସେବକମାନଙ୍କୁ କିଛି ମହତ୍ତ୍ୱପୂର୍ଣ୍ଣ କଥା ଶିଖାଇବା ପାଇଁ ସୃଷ୍ଟି ଓ ଅନ୍ୟ ଜିନିଷଗୁଡ଼ିକ ଦେଖାଇଥିଲେ । (ଆଦି ୧୫:୫; ଯିରି ୧୮:୧-୬) ମହାନ ଶିକ୍ଷକ ଯୀଶୁ ମଧ୍ୟ ଏପରି କରିଥିଲେ । (ମାଥି ୧୮:୨-୬; ୨୨:୧୯-୨୧) ଗତ କିଛି ବର୍ଷରେ ପ୍ରମାଣିତ ହୋଇଛି ଯେ ଭିଡିଓ ଅଧିକ ଫଳପ୍ରଦ ହୋଇଥାଏ । କʼଣ ଆପଣ ନିଜ ବାଇବଲ ବିଦ୍ୟାର୍ଥୀମାନଙ୍କୁ ଶିଖାଇବା ସମୟରେ ଭିଡିଓ ଦେଖାନ୍ତି?

ପରମେଶ୍ୱରଙ୍କ ତରଫରୁ ଖୁସିର ଖବର! ପୁସ୍ତିକାରୁ ଅଧ୍ୟୟନ କରିବା ସମୟରେ ବିଦ୍ୟାର୍ଥୀଙ୍କୁ ଦେଖାଇବା ପାଇଁ ଦଶଟି ଭିଡିଓ ପ୍ରସ୍ତୁତ କରାଯାଇଛି । ପୁସ୍ତିକାରେ ମୋଟା ଅକ୍ଷରେ ଦିଆଯାଇଥିବା ପ୍ରଶ୍ନ ହିଁ ଅଧିକାଂଶ ଭିଡିଓର ନାମ ଅଟେ । ଡିଜିଟାଲ୍‌ ଫର୍ମାଟ୍‌ରେ ଉପଲବ୍ଧ ପୁସ୍ତିକାରେ ଭିଡିଓଗୁଡ଼ିକର ଲିଙ୍କ୍‌ ମଧ୍ୟ ଦିଆଯାଇଛି, ଯାହାଫଳରେ ଆମର ମନେ ରହିବ ଯେ କେଉଁ ଭିଡିଓଟିକୁ କେଉଁ ସମୟରେ ଦେଖାଇବା । ଶିକ୍ଷା ଉପକରଣ ବକ୍ସରେ ଦିଆଯାଇଥିବା ଅନ୍ୟ ପ୍ରକାଶନଗୁଡ଼ିକରୁ ଅଧ୍ୟୟନ କରିବା ସମୟରେ ଆମେ ଅନ୍ୟ ଭିଡିଓଗୁଡ଼ିକ ଦେଖାଇପାରିବା ।

ଆପଣ ନିଜ ବିଦ୍ୟାର୍ଥୀଙ୍କୁ ଆଉ କେବେ କେବେ ଭିଡିଓ ଦେଖାଇପାରିବେ? ଯେତେବେଳେ ତାଙ୍କୁ ବାଇବଲର କୌଣସି ବିଷୟ ବୁଝିବାରେ କଷ୍ଟ ହୁଏ କିମ୍ବା ସେ କୌଣସି ସମସ୍ୟାର ସାମନା କରନ୍ତି, ସେତେବେଳେ ଆପଣ jw.org® ଓ JW ପ୍ରସାରଣ® ଯାଇ ଦେଖିପାରିବେ ଯେ ତାଙ୍କ ପରିସ୍ଥିତି ସହ ଜଡ଼ିତ କୌଣସି ଭିଡିଓ ଅଛି କି ନାହିଁ । ତାʼପରେ ହୁଏତ ଦୁହେଁ ମିଶି ଭିଡିଓ ଦେଖିପାରିବେ ଏବଂ ତାʼ ଉପରେ ଆଲୋଚନା କରିପାରିବେ ।

ପ୍ରତି ମାସ ଯେତେବେଳେ ନୂଆ ଭିଡିଓ ମୁକ୍ତିଲାଭ ହୁଏ, ସେଗୁଡ଼ିକୁ ଦେଖିବା ସମୟରେ ଭାବନ୍ତୁ ଯେ ଆପଣ ଅନ୍ୟମାନଙ୍କୁ ଶିଖାଇବା ସମୟରେ କେତେବେଳେ ସେହି ଭିଡିଓଗୁଡ଼ିକୁ ଦେଖାଇପାରିବେ ।