МӔ ФИДӔ Артур Гест ӕригонӕй дӕр адтӕй, Хуцауӕй ка тарстӕй, уӕхӕн адӕймаг. Фӕндадтӕй ӕй методистити саугин исун. Фал ӕ фӕндӕ раййивта, Йегови Ӕвдесӕнти хӕццӕ ку базонгӕ ’й ӕма син сӕ литературӕ кӕсун ку райдӕдта, уӕд. 1914 анзи 17 анздзудӕй донаргъуд райста. Фиццаг дуйнеуон тугъди рӕстӕг ӕй ӕфсадмӕ байагурдтонцӕ. Фал мӕ фидӕ ӕ къохмӕ тохӕндзаумау есун не ’сарази ӕй, ӕма ’й уой туххӕй 10 мӕйемӕ исбадун кодтонцӕ ахӕстдони горӕт Кингстони (провинци Онтарио, Канадӕ). Ку ’й исуӕгъдӕ кодтонцӕ, уӕд ӕнхӕстрӕстӕг лӕггадӕ кӕнун райдӕдта киунугутӕ хӕссӕгӕй (уӕди рӕстӕги уотӕ худтонцӕ пионерти).

1926 анзи ракурдта Хейзл Уилкинсони. Уой мадӕ ба рӕстдзийнадӕ базудта 1908 анзи. 1931 анзи 24 апрели райгурдтӕн ӕз. Ӕз син адтӕн цуппар сувӕллонемӕй дуккаг. Нӕ бийнонтӕн Йеговӕн лӕггадӕ кӕнунӕй ӕхсидзгӕдӕр гъуддаг н’ адтӕй. Мӕ фидӕ Библийӕн устур аргъ ке кодта, уой фӕрци мах дӕр Хуцауи Дзурд бауарзтан. Ӕнӕгъӕнӕ бийнонтӕй хӕдзарӕй-хӕдзарӕмӕ игъосун кӕнунмӕ арӕх цудан (Гъуд. 20:20).

1939 анзи райдӕдта Дуккаг дуйнеуон тугъд, ӕма иннӕ анз Канади Йегови Ӕвдесӕнтӕн игъосун кӕнуни барӕ нӕбал лӕвардтонцӕ. Скъолати скъоладзаутӕ турусайӕн табу кодтонцӕ ӕма гимн зардтонцӕ. Мӕн ӕма мӕ хестӕр хуӕрӕ Доротий еци рӕстӕг къласӕй рауадзиуонцӕ. Еу хатт ба мин ахургӕнӕг иннети рази федистӕ кӕнун райдӕдта, цӕмӕй фефсӕрми адтайнӕ. Урокти фӕсте ба мӕбӕл ме ’мкъласонтӕй цалдӕр сӕхе ниццавтонцӕ ӕма мӕ зӕнхӕбӕл фӕхъхъан кодтонцӕ. Фал мӕ еци цау никки хъӕбӕрдӕр баразӕнгард кодта фиццагидӕр Хуцаумӕ игъосун, адӕнмӕ нӕ, фал (Гъуд. 5:29).

1942 анзи июли, 11 анзи мӕбӕл ку цудӕй, уӕд донаргъуд райстон ферми донӕйдзаг тӕгӕнай. Каникулти рӕстӕги мӕ зӕрдӕмӕ хъӕбӕр цудӕй ӕнхусгӕнӕг пионерӕй лӕггадӕ кӕнун. Еу анз ба ӕз, удта ма ӕртӕ ӕнсувӕри рандӕ ан Онтариой цӕгатӕрдӕмӕ ӕма уоми гъӕдӕфадгутӕн игъосун кодтан.

 1949 анзи 1 маййи райдӕдтон пионерӕй лӕггадӕ кӕнун. Еци рӕстӕги филиали цидӕр аразтонцӕ ӕма мӕмӕ уордӕмӕ фӕккӕсунмӕ фӕдздзурдтонцӕ. Уотемӕй 1949 анзи 1 декабрӕй Канади филиали лӕггадӕ кӕнун райдӕдтон. Косгӕ си типографий кодтон ӕма мӕ исахур кодтонцӕ мухургӕнӕн станокки хӕццӕ архайун. Цалдӕр къуӕрей дӕргъи кустон ӕхсӕви смени. Уӕд мухур кодтан буклет, Канади Йегови Ӕвдесӕнти куд ӕфхуардтонцӕ, уой фӕдбӕл.

Фӕстӕдӕр игъосун кӕнунбӕл дзуаппдӕттӕг хайади ку лӕггадӕ кодтон, уӕд мин загътонцӕ, цӕмӕй, Квебекмӕ игъосун кӕнунмӕ ка цудӕй, еци пионерти хӕццӕ радзурдтайнӕ. Уоми Йегови Ӕвдесӕнти нихмӕ уӕлдай хъӕбӕрдӕр цудӕнцӕ. Уордӕмӕ цӕугӕй еци пионертӕ филиалбӕл ӕрбаздахтӕнцӕ. Сӕ астӕу адтӕй Мери Зазула, Эдмонтонӕй (провинци Альбертӕ). Ӕ ниййергутӕ православон динбӕл федар хуӕст адтӕнцӕ. Мери ӕма ӕ хестӕр ӕнсувӕр Джо нӕ бакумдтонцӕ Библий ахур ниууадзун, ӕма сӕ уой туххӕй сӕ ниййергутӕ хӕдзарӕй ратардтонцӕ. 1951 анзи Мери ӕма Джо донаргъуд райстонцӕ, анзи ’рдӕги фӕсте ба пионертӕй лӕггадӕ кӕнун райдӕдтонцӕ. Нӕ дзубандий рӕстӕг хъӕбӕр бадес кодтон, Мери Йегови куд хъӕбӕр уарзуй, уобӕл. Ӕма мӕхецӕн загътон: «Мӕ зӕрдӕмӕ хъӕбӕр ка нӕ цӕуй, уӕхӕн менеугутӕ имӕ ку нӕ разинна, уӕд ӕй коргӕ кӕндзӕн». Ӕма фараст мӕйей фӕсте, 1954 анзи 30 январи нӕ цард байеу кодтан. Къуӕрей фӕсте ба нӕ фӕххудтонцӕ, районон цӕстӕдаргути кӕми цӕттӕ кодтонцӕ, еци скъоламӕ. Ӕма уой фӕсте дууӕ анзей дӕргъи бӕрӕг кодтан, Онтариой цӕгатӕрдиги ци ӕмбурдтӕ адтӕй, уони.

Игъосун кӕнуни гъуддаг ӕгас дуйнебӕл никки устурдӕр къахдзӕфтӕй размӕ цудӕй ӕма гъудӕй фулдӕр миссионертӕ. Мах дӕр расагъӕс кодтан, кӕд Канади зумӕги къӕс-къӕс уазалтӕн, сӕрди ба дуней саскъитӕн бухсӕн, уӕд цийфӕнди зиндзийнӕдтӕн дӕр ниббухсдзиан, кумӕфӕндий нӕ ма рарветонцӕ, уӕддӕр. 1956 анзи июли каст фӕцан Галаади скъолай 27 къласс, ноябри ба адтан, миссионертӕй нӕ кумӕ иснисан кодтонцӕ, уоми, Бразилий.

Мах ӕрцудан Бразилий филиалмӕ ӕма португайлаг ӕвзаг ахур кӕнун райдӕдтан. Еу цалдӕр сӕйраг дзурдбасти, удта журнал еу минутмӕ раттӕн куд ес, уой ку исахур кодтан, уӕд игъосун кӕнунмӕ рацудан. Мах бадзубанди кодтан, адӕймаг нӕмӕ ку байгъоса, уӕд ин Библийӕй Хуцауи Паддзахади арфӕдзийнӕдти туххӕй стих ке бакӕсдзиан. Тӕккӕ фиццаг бон нӕбӕл рамбалдӕй, хъӕбӕр лӕмбунӕг нӕмӕ ка байгъуста, уӕхӕн силгоймаг. Ӕма ин ӕз дӕр кӕсун райдӕдтон Раргомадӕ 21:3, 4. Каст ӕй куддӕр фӕдтӕн, уотӕ ба мӕ сӕр разилдӕй ӕма дӕлгоммӕ рахаудтӕн! Уӕхӕн тӕвдӕ ӕма уомӕл климӕтбӕл ахур н’ адтӕн, ӕма мин е хъӕбӕр устур фӕлварӕн иссӕй.

Мах лӕггадӕ кодтан горӕт Кампуси. Нур си 15 ӕмбурди ес, фал сӕмӕ ку ӕрцудан, уӕдта си  адтӕй ӕрмӕстдӕр еунӕг хецӕн къуар ӕма миссионерти хӕдзарӕ. Еци хӕдзари цардӕй цуппар хуӕри: Эстер Трейси, Рамонӕ Бауэр, Луизӕ Шварц ӕма Лоррейн Брукс (нур Уоллен). Миссионерти хӕдзари хъӕппӕлтӕ ӕхснунмӕ ӕнхус кодтон, удта син хуӕруйнаг искӕнунмӕ согтӕ ӕрцӕттӕ кӕнинӕ. Еухатт авдисӕри изӕрӕй «Гъӕуайгӕнӕн мӕсуги» ахури фӕсте нӕмӕ еу дессаги иуазӕг фӕззиндтӕй. Бонидӕргъи нӕбӕл ци хабӕрттӕ ӕрцудӕй, уонӕбӕл цалинмӕ дзубанди кодтан, уӕдмӕ мӕ бийнойнаг ӕхе диванбӕл рауагъта. Ӕ сӕрбӕл ку исхуӕстӕй, удта ӕ бунӕй кӕцӕйдӕр хелагӕ ралӕстӕй. Гъема нӕ хӕдзари цъӕхахст не ’рсабур ӕй, цалинмӕ ’й нӕ ниммардтон, уӕдмӕ!

Еу анзи дӕргъи ахур кодтан португайлаг ӕвзаг, фӕстӕдӕр ба мӕ иснисан кодтонцӕ районон цӕстӕдарӕгӕй. Кумӕ нӕ рарвистонцӕ, уоми хумӕтӕг, гъӕуккаг цард кодтан. Рохс нӕмӕ н’ адтӕй, хусгӕ кодтан тӕнӕг гобӕнттӕбӕл, ӕмбурдтӕмӕ ба бӕхуӕрдунбӕл цудан. Еу хатт поездбӕл рандӕ ан еу минкъий хуӕнхаг горӕти игъосун кӕнунмӕ, ӕма си цӕрунмӕ еу къомнӕт байхуӕрстан. Филиал нӕмӕ ӕрбарвиста 800 журнали, ӕма нин почтӕмӕ цалдӕр хатти цӕугӕ рауадӕй.

1962 анзи ӕгас Бразилибӕл дӕр рацудӕнцӕ скъолатӕ бӕрнон ӕнсувӕртӕн ӕма миссионертӕй ка лӕггадӕ кодта, еци хуӕртӕн. Мӕнӕн баихӕс кодтонцӕ анзи ’рдӕги дӕргъи еци скъолатӕ кӕцидӕр горӕтти уадзун: Манауси, Белени, Форталези, Ресифи ӕма Салвадори. Манауси мин баихӕс кодтонцӕ зундгонд оперон театри Облӕстон конгресс рауадзун. Сӕх-сӕх уарунти фӕсте си дон ниуазунмӕ нӕ бӕзтӕй. Уомӕй уӕлдай ма си н’ адтӕй, конгресмӕ ка ’рбацудӕй, етӕ кӕми ракомидзаг кодтайуонцӕ, уӕхӕн бунат (уӕди рӕстӕг конгресмӕ ка ’рбацӕуидӕ, уонӕн хуӕруйнаг кодтонцӕ). Ӕз дӕр ӕнхусмӕ ӕфсӕддонтӕмӕ фӕдздзурдтон ӕма си еу хӕларзӕрдӕ офицер ӕгасей фагӕ дӕр дон ӕрбахъӕртун кодта. Удта ма ӕ салдӕттӕн загъта, цӕмӕй нин дууӕ устур пъалатки ӕрӕвардтайуонцӕ. Уоми нӕ бон адтӕй хуӕруйнаг цӕттӕ кӕнун дӕр ӕма рӕфтад кӕнун дӕр.

Цалинмӕ ӕндӕр горӕти уинӕ, уӕдмӕ Мери игъосун кодта, Бразилимӕ косунмӕ ка ’рбацӕуидӕ, еци португайлӕгтӕн сӕ кустуӕтти. Фал сӕмӕ ӕхцайӕй уӕлдай нецӕй мӕтӕ адтӕй, ӕма ин Библий туххӕй радзубанди кӕнун неке хӕццӕ бантӕстӕй. Вефили ка лӕггадӕ кодта, уонӕй кӕмӕндӕрти уотӕ дӕр загъта: «Тӕккӕ минкъийдӕр мӕ Португалий цӕрун фӕндадтайдӕ». Фал нӕмӕ минкъий фӕстӕдӕр финстӕг ӕрбарвистонцӕ, ӕма си финст адтӕй, Португалимӕ нӕ ке ӕрветунцӕ. Мери уӕлгоммӕ куд нӕ рахаудтӕй! Еци бӕсти нин игъосун кӕнуни барӕ н’ адтӕй, фал уӕддӕр исарази ан.

1964 анзи августи ӕрцудан Португалий сӕйраг горӕт Лиссабонмӕ. Не ’нсувӕртӕн берӕ зиндзийнӕдтӕ ӕвзарун кодта, Португалий сосӕггай ка архайдта, еци полици. Уомӕ гӕсгӕ  бунӕттон ӕнсувӕртӕн нӕхе не ’сгъӕр кодтан. Цалинмӕ нин визитӕ кодтонцӕ, уӕдмӕ цардан минкъий гостиници, визитӕ ку райстан, уӕдта квартири цӕрун райдӕдтан. Кӕдӕй-уӕдӕй 1965 анзи январи филиали ӕнсувӕртӕн нӕхе исгъӕр кодтан. Фондз мӕйей фӕсте гъеуӕд ӕмбурдмӕ фиццаг хатт фӕццудан, ӕма нӕ цийнӕн кӕрон дӕр н’ адтӕй!

Уой фӕсте ӕй базудтан, полиций косгутӕ не ’нсувӕрти хӕдзӕрттӕ алли бон дӕр ке къахтонцӕ. Нӕ залтӕ дӕр ӕхгӕд адтӕнцӕ ӕма ӕмбурдтӕ ӕнсувӕрти хӕдзӕртти уагътонцӕ. Сӕдӕгай хуӕртӕ ӕма ӕнсувӕрти полицимӕ кодтонцӕ, цӕмӕй сӕ ӕрфарстайуонцӕ. Уоми сӕ хӕццӕ фӕлмӕн дзурд нӕ кодтонцӕ. Фӕндадтӕй сӕ, ӕмбурдтӕ ка уагъта, еци бӕрнон ӕнсувӕртӕ ка адтӕнцӕ ӕма кӕмӕй адтӕнцӕ, уой базонун. Ӕма уомӕ гӕсгӕ ӕнсувӕртӕ кӕрӕдземӕ ӕрмӕстдӕр сӕ нӕмттӕй дзурдтонцӕ, зӕгъӕн, ӕнсувӕр Жозе кенӕ Паулу, ӕма мах дӕр уотӕ кодтан.

Нӕ устурдӕр сагъӕс адтӕй, не ’нсувӕртӕн ӕууӕндундзийнадӕ федаргӕнӕн хуӕруйнаг куд исамал кӕнӕн, е. Мерийӕн баихӕс кодтонцӕ «Гъӕуайгӕнӕн мӕсуг»-и ахургӕнӕн статьятӕ ӕма ӕндӕр публикацитӕ мухур кӕнунмӕ мимеографӕн трафареттӕ кӕнун.

1966 анзи июни Лиссабони, «Фейжо» ка хундтӕй, еци ӕмбурди ци 49 адӕймаги адтӕй, уонӕн тӕрхон кодтонцӕ, кедӕр хӕдзари си ӕмбурд ке рауагътонцӕ, уой туххӕй. Ӕз еци хуӕртӕ ӕма ӕнсувӕрти тӕрхонмӕ цӕттӕ кодтон ӕма син фарстатӕ лӕвардтон, цума прокурор дӕн, уотӕ. Мах ӕй лӕдӕрдтан, тӕрхони ке фӕххуӕрд уодзиан, уой, фал ӕй зудтан, е нин дзӕбӕх фадуат ке ӕй хуарз хабар фегъосун кӕнунмӕ. Тӕрхони рӕстӕг нӕ адвокат ӕ дзубандий кӕрон нифсгунӕй ӕрхаста, фиццаг ӕноси ка цардӕй, еци нӕлгоймаг Гамалиили дзурдтӕ (Гъуд. 5:33–39). Еци гъуддаг хъӕбӕр рагъӕр ӕй. Хуӕртӕ ӕма ӕнсувӕрти се ’гасей дӕр исбадун кодтонцӕ 45 суткемӕй фондз мӕйи ма ’рдӕги уӕнгӕ. Еци нифсгун адвокат ба Библи ахур кӕнун райдӕдта ӕма сауӕнгӕ ӕ мӕлӕти уӕнгӕ дӕр ӕмбурдтӕмӕ цудӕй.

1966 анзи декабри мӕ иснисан кодтонцӕ филиали цӕстӕдарӕгӕй, ӕма юридикон гъуддӕгти хӕццӕ берӕ фӕййархайдтон. Мах хъӕбӕр архайдтан, цӕмӕй Йегови Ӕвдесӕнтӕн сӕребарӕй лӕггадӕ кӕнуни барӕ равардтайуонцӕ (Фил. 1:7). Ӕма нин кӕдӕй-уӕдӕй 1974 анзи 18 декабри закъонмӕ гӕсгӕ еци барӕ равардтонцӕ. Еци хабари фӕдбӕл нин горӕт Портуй ӕма Лиссабони дӕр рацудӕй сӕрмагонд фембӕлд. Ӕдеугурӕй си адтӕй 46 870 адӕймаги. Сӕйраг хайадӕй ба нӕмӕ ӕрцудӕнцӕ ӕнсувӕртӕ Нейтан Норр ӕма Фредерик Френц.

Уой фӕсте ба Йегови фӕрци нӕ бон адтӕй хуарз хабар игъосун кӕнун, португайлаг ӕвзагбӕл кӕми дзурдтонцӕ, еци сакъадӕхтӕбӕл. Уонӕмӕ хаудтӕнцӕ Азойраг, Мадейрӕ, Кабо-Вердей, Сан-Томей ӕма Принсипий сакъадӕхтӕ. Еци  бӕстити Йегови Ӕвдесӕнти нимӕдзӕ фулдӕр ке кодта, уомӕ гӕсгӕ нӕ багъудӕй нӕ филиал фӕуустурдӕр кӕнун. 1988 анзи 23 апрели филиали нӕуӕг бӕстихӕйттӕ Йеговӕн иснивонд кодтан, ӕма нӕмӕ уой фӕдбӕл радзубандий хӕццӕ ӕрцудӕй ӕнсувӕр Милтон Хеншель. Еци фембӕлди адтӕй 45 522 адӕймаги. Еци устур бӕрӕгбонмӕ ӕрцудӕнцӕ, Португалий миссионертӕй ка лӕггадӕ кодта еци хуӕртӕ ӕма ӕнсувӕртӕ. Адтӕнцӕ 20 адӕймаги.

Берӕ ӕнзти дӕргъи лимӕн кодтан, Хуцаубӕл еузӕрдон ка адтӕй, уӕхӕн ӕнсувӕрти хӕццӕ. Е дессаги рӕстӕг адтӕй. Еухатт Теодор Ярачӕн ӕнхус кодтон, аллихузи бӕсти филиалтӕ ку бӕрӕг кодта, уӕд. Ӕма си еу цӕбӕлдӕр исахур дӕн. Ци филиалтӕ бӕрӕг кодтан, уонӕй сӕ еу зин уавӕри бахаудтӕй, ӕма филиали комитети ӕнсувӕртӕ, сӕ бон ци адтӕй, уой бакодтонцӕ. Куд тухстӕнцӕ, уомӕ кӕсгӕй син ӕнсувӕр Ярач загъта: «Гъенур ба гъуддаг Хуцауи бӕрагӕ уагътӕ». Еухатт ба ӕз ӕма Мери Бруклини ку адтан, уӕд еу изӕр Фредерик Френц ӕма ӕндӕр ӕнсувӕрти хӕццӕ бадтан. Нӕ бадт фӕуунтӕбӕл адтӕй, уотемӕй ма ӕнсувӕр Френцӕн загътонцӕ, радзорай, уойбӕрцӕ ӕнзтӕ Йеговӕн лӕггадӕ кӕнгӕй цӕбӕл исахур дӕ, зӕгъгӕ. Ӕнсувӕр Френц загъта: «Фиццагидӕр уобӕл, ӕма царди цийфӕнди ма ӕрцӕуа, уӕддӕр цӕмӕй Йегови организаци макӕд ниууадзон. Ӕндӕр некӕци организаци ӕнхӕст кӕнуй, Киристе ӕ фӕдбӕлдзӕугутӕн ке бафӕдзахста, еци гъуддаг – Хуцауи Паддзахади туххӕй хуарз хабар игъосун кӕнун».

Ӕз ӕма Мери дӕр уотӕ архайдтан. Хъӕбӕр ӕхцӕуӕн нин ӕй, аллихузи филиалтӕ куд бӕрӕг кодтан, еци рӕстӕг имисун. Хуарз фадуӕттӕ нин адтӕй, каргун хуӕртӕ ӕма ӕнсувӕртӕн ӕвдесун, сӕ лӕггадӕн син цӕхуӕн устур аргъ кӕнӕн, уой, ӕма сӕ разӕнгард кӕнун, цӕмӕй идарддӕр дӕр Йеговӕн лӕггадӕ кӕнонцӕ.

Ӕнзтӕ кӕбӕлти ратахтӕнцӕ, е бӕрӕг дӕр нӕй, ӕма нур нӕ дууебӕл дӕр 80 анземӕй фулдӕр цӕуй. Мерий е ’нӕнездзийнадӕ арӕх фӕттухсун кӕнуй (2 Кор. 12:9). Фал зиндзийнӕдти не ’ууӕндундзийнадӕ федардӕр кӕнуй ӕма нӕ никки хъӕбӕрдӕр фӕндуй Йеговӕн идарддӕр дӕр еузӕрдонӕй лӕггадӕ кӕнун. Фӕстӕмӕ ракӕсгӕй нӕ бон ӕй федарӕй зӕгъун, Йегови ’стур хуарзӕнхӕ нӕхебӕл еу ӕма дууӕ хатти ке нӕ бавзурстан *.