1937 анзи 26 мартъий Сиднеййи ӕрдӕмӕ (Австрали) сабургай цудӕй ругӕйдзаг машинӕ ӕма си бадтӕй дууӕ нӕлгоймаги. Анзи размӕ Сиднейӕй рацудӕнцӕ, ӕма уӕдӕй ардӕмӕ Австралий ци нӕ къумӕй нӕ ракастӕнцӕ, уӕхӕн нӕбал байзадӕй. Нӕдтӕбӕл фӕццудӕнцӕ еу 19 000 километри. Еци нӕлгоймӕгтӕ ӕрдзи рӕсугъддзийнӕдтӕ фӕууинунмӕ кенӕ нӕуӕг бунӕттӕ басгарунмӕ нӕ цудӕнцӕ. Етӕ адтӕнцӕ дууӕ зингзӕрдӕ пионери, Артур Уиллис ӕма Билл Ньюлендс. Фӕндадтӕй сӕ, Австралий ӕнӕкӕрон будурти хецӕнтӕй ци адӕни къуӕрттӕ цардӕй, уонӕн Хуцауи Паддзахади хабар фегъосун кӕнун.

1920 ӕнзти кӕрон Библиртасгути * минкъий къуар фулдӕр игъосун кодтонцӕ, Австралий билгӕрӕнтти ци горӕттӕ ес, уоми. Фал Австралий фулдӕр хай ӕй хорсугъд ӕдзӕрӕг будур, ӕма си цӕргутӕ берӕ нӕййес. Ӕ территори ӕй Еугонд Штатти территорий ӕмбесӕй фулдӕр. Ӕнсувӕртӕ ’й лӕдӕрдтӕнцӕ, Киристей фӕдзӕхст ке гъӕуама ӕнхӕст кӕнонцӕ ӕма хуарз хабар «сауӕнгӕ зӕнхи кӕрӕнттӕмӕ дӕр» ке гъӕуама фегъосун кӕнонцӕ. Уомӕ хаудтӕй Австрали дӕр (Гъуд. 1:8). Е ӕнцон гъуддаг н’ адтӕй. Цума син цӕй фӕрци бантӕстӕй? Етӕ федарӕй ӕууӕндтӕнцӕ, Йеговӕ син сӕ хъиамӕттӕн ке райарфӕ кӕндзӕй, ӕма цӕттӕ адтӕнцӕ, сӕ бон ци ӕй, уой бакӕнунмӕ.

1929 анзи Квинсленди ӕма цӕгат Австралий ӕмбурдтӕ цалдӕр машини уотӕ исаразтонцӕ, цӕмӕй сӕбӕл идард рауӕнтӕмӕ цӕуӕн адтайдӕ. Шофертӕ адтӕнцӕ, зин уавӕрти бафӕразун ке бон адтайдӕ ӕма, ести, уӕд машинӕ ка барӕвдзӕ кодтайдӕ, уӕхӕн пионертӕ. Еци пионертӕ, хуарз хабар кӕми некӕд фегъустонцӕ, берӕ уӕхӕн рауӕнти адтӕнцӕ.

Машинттӕ кӕмӕ н’ адтӕй, еци пионертӕ ба Австралий идард къумтӕмӕ велосипедтӕбӕл цудӕнцӕ. 1932 анзи 23 анздзуд ӕнсувӕр Беннет Брикелл горӕт Рокгемптонӕй (штат Квинслед), фондз мӕйи дӕргъи зилдӕй, еци штатӕн и цӕгат фарс ци идард гъӕутӕ адтӕй, уонӕбӕл. Ӕ велосипедбӕл ци нӕ ниццурхта, уӕхӕн нӕбал байзадӕй: гъӕццӕлттӕ, хъӕппӕлтӕ,  хуӕруйнаг ӕма дуйне киунугутӕ. Ӕ цӕлхитӕ ку байехсудӕнцӕ, уӕддӕр не рлӕудтӕй, уомӕн ӕма ӕ зӕрдӕ дардта, Йеговӕ ин ке банхус кӕндзӕй. Фӕстаг 320 километри ӕ велосипед ӕ разӕй тардта, уотемӕй цудӕй, раздӕр адӕн фур ӕдонугӕй кӕми рамӕлиуонцӕ, уӕхӕн рауӕнти. Уой фӕсте 30 анзей дӕргъи ӕнсувӕр Брикелл ӕгас Австралибӕл дӕр ӕрзилдӕй. Сӕдӕгай мин километртӕ рацудӕй велосипедбӕл, мотоциклбӕл кенӕ машинӕбӕл. Аборигентӕн хуарз хабар фиццаг е фегъосун кодта. Уомӕй уӕлдай ма ӕнхус кодта нӕуӕг ӕмбурдтӕ аразунмӕ, удта бунӕттон цӕргути цӕсти дӕр хъӕбӕр кадгин адтӕй.

Австралий, иннӕ бӕстити хӕццӕ рабаргӕй, берӕ адӕн нӕ цӕруй. Уӕлдайдӕр ба кӕрон дӕр кӕмӕн нӕййес, еци сор будурти уойбӕрцӕ цӕрӕг кӕцӕй уодзӕй. Фал Йегови лӕггадгӕнгутӕ сӕ рази нисан исӕвардтонцӕ, цӕмӕй рӕстдзийнадӕ бахъӕртун кӕнонцӕ, идард рауӕнти ка цӕруй, уонӕмӕ дӕр.

Пионертӕ Стьюарт Келти ӕма Уильям Торрингтонӕн дӕр сӕ нисан е адтӕй. 1933 анзи, цӕмӕй Австралий тӕккӕ астӕу минкъий горӕт Алис-Спрингсмӕ бахаудтайуонцӕ, уой туххӕй сӕ гъудӕй ӕдзӕрӕг будур Симпсонбӕл цӕун. Сӕ машинӕ ку басастӕй, уӕд ӕй ниууагътонцӕ ӕма идарддӕр цудӕнцӕ. Ӕнсувӕр Келтибӕл гъӕдин къах адтӕй, ӕма уомӕ гӕсгӕ теуабӕл цудӕй. Еци пионерти хъиамӕттӕ дзӕгъӕли нӕ фӕцӕнцӕ. Ӕфсӕннади станций, Уильям Крик ка хундтӕй, уоми, рамбалдӕнцӕ гостиници хецаубӕл, Чарлз Бернхардт, зӕгъгӕ. Фӕстӕдӕр еци лӕг рӕстдзийнадӕ ӕ зӕрдӕмӕ райста, ӕ гостиницӕ рауӕйӕ кодта ӕма 15 анзей дӕргъи еунӕгӕй пионерӕй лӕггадӕ кодта, Австралий тӕккӕ сордӕр ӕма бацӕуӕн кумӕ н’ адтӕй, уӕхӕн бунӕтти.

Ке зӕгъун ӕй гъӕуй, уӕхӕн зиндзийнӕдтӕ бафӕразунмӕ нифс ӕма лӕгдзийнадӕ гъудӕй. Еухатт, райдайӕни ке кой кодтан, еци ӕнсувӕрти, Артур Уиллис ӕма Билл Ньюлендси, дууӕ къуӕрей багъудӕй, цӕмӕй 32 километри рацудайуонцӕ, уомӕн ӕма хъӕбӕр уарунти туххӕй ӕдзӕрӕг будурӕй цъимара рауадӕй. Еуӕй-еухатт хори тъӕппи сӕ хед калгӕй сӕ машинӕ къохӕй тардтонцӕ устур зменси къубуртӕбӕл. Рахезун сӕ гъудӕй доргун кӕмтти ӕма, ка ниссор ӕй, уӕхӕн цӕугӕдӕттӕбӕл. Сӕ машинӕ ку бӕсӕттидӕ, уотӕ ба арӕх рауаидӕ, уӕдта цалдӕр бони къахӕй цудӕнцӕ, хӕстӕгдӕр ка адтӕй, еци горӕтмӕ ӕма цалдӕргай къуӕретӕ ӕнгъӕлмӕ кастӕнцӕ, цалинмӕ син запчаститӕ не ’рбарветонцӕ, уӕдмӕ. Фал уӕхӕн зиндзийнӕдтӕ ӕвзаргӕй дӕр сӕ къохтӕ не ’руагътонцӕ. Фӕстӕдӕр Артур Уиллис «Сугъзӕрийнӕ ӕнос»-и ци дзурдтӕ адтӕй, уони минкъий ӕндӕрхузи загъта: «Е ’вдесӕнтӕн ӕгӕр даргъ кенӕ бацӕуӕн кӕбӕл нӕ уа, уӕхӕн нӕдтӕ нӕййес».

Берӕ ӕнзти дӕргъи пионерӕй ка фӕллӕггадӕ кодта, еу уӕхӕн ӕнсувӕр Чарлз Харрис загъта: «Австралий идард рауӕнти зин уавӕрти лӕггадӕ кӕнгӕй Йеговӕмӕ никки хъӕбӕрдӕр бахӕстӕг дӕн». Удта ма загъта: «Куд минкъийдӕр дзаумӕуттӕ дӕмӕ уа, уотӕ дӕ цард дӕр ӕнцондӕр уодзӕй. Кӕд Йесо еуӕй-еухатт цӕттӕ адтӕй стъалути бунмӕ ниххуссунмӕ дӕр, уӕд мах дӕр ӕхсӕвӕ ӕндегӕй байзайдзиан, ку багъӕуа, уӕд». Уӕхӕн гъудибӕл хуӕст адтӕнцӕ берӕ ӕндӕр пионертӕ дӕр. Еци адӕн сӕ хъауритӕ ке не ’вгъау кодтонцӕ, уой фӕрци хуарз хабар Австралий идард къумти дӕр игъустгонд ӕрцудӕй ӕма беретӕ рӕстдзийнадӕ базудтонцӕ.