1–3. а) Хуцауи лӕггадгӕнгутӕ фиццагидӕр цӕбӕл гъӕуама архайонцӕ? б) Нӕуӕг ӕвзаг ка ахур кӕнуй, етӕ цӕхуӕн зиндзийнӕдтӕбӕл исӕмбӕлунцӕ, ӕма цӕхуӕн фарстатӕмӕ ӕркӕсдзиан? (Кӕсӕ хузӕмӕ статьяй райдайӕни.)

АБОНИ милиуангай Йегови Ӕвдесӕнтӕ архайунцӕ, цӕмӕй «алли адӕнӕн, алли муггагӕн, алли ӕвзагӕн ӕма алли адӕнихаттӕн» хуарз хабар игъосун кӕнонцӕ, ӕма уотемӕй ӕнхӕст кӕнуй Библий пахампарадӕ (Рарг. 14:6). Ка ’й зонуй, ду дӕр ӕндӕр ӕвзаг ахур кӕнис. Еуӕй-еуетӕ лӕггадӕ кӕнунцӕ миссионертӕй кенӕ, игъосунгӕнгутӕ кӕми нӕ фагӕ кӕнуй, уӕхӕн бӕстити. Иннетӕ ба, кӕми цӕрунцӕ, уоми ӕндӕр ӕвзагбӕл дзорӕг ӕмбурди лӕггадӕ кӕнун райдӕдтонцӕ.

² Хуцауи лӕггадгӕнгутӕй алкедӕр фиццагидӕр гъӕуама ӕхе, удта ӕ бийнонти ӕууӕндундзийнадӕ федар кӕна (Матф. 5:3). Фал нин еуӕй-еухатт уойбӕрцӕ гъуддӕгтӕ фӕууй, ӕма нин ӕнцон нӕ фӕууй Библи арф ӕртасунмӕ рӕстӕг иссерун. Ӕндӕр ӕвзагбӕл дзорӕг ӕмбурдмӕ ка рахизтӕй, уонӕн ба ма фӕззиннуй ӕндӕр зиндзийнӕдтӕ дӕр.

³ Уӕхӕн ӕмбурдмӕ ка рахизтӕй, уони фӕгъгъӕуй нӕуӕг ӕвзаг  ахур кӕнун, удта ма «Хуцауи арф зунд» ӕртасунмӕ дӕр рӕстӕг ерун (1 Кор. 2:10). Фал ӕмбурди ци фӕдздзорунцӕ, уой дзӕбӕх ку нӕма лӕдӕронцӕ, уӕдта куд? Кенӕ уӕхӕн уавӕрти ниййергутӕн цӕмӕн гъӕуй сӕ гъос дарун, Хуцауи Дзурд сӕ сувӕллӕнтти зӕрдитӕмӕ куд гъаруй, уомӕ?

4. Не ’ууӕндундзийнадӕн тӕссаг цӕмӕй уодзӕй? Ӕрхӕссӕ цӕветтон.

⁴ Библи ӕндӕр ӕвзагбӕл ку ’ртасӕн ӕма ’й кӕронмӕ ку нӕ лӕдӕрӕн, уӕд тӕссаг уодзӕй, не ’ууӕндундзийнадӕ ку ’рлӕмӕгъ уа, уомӕй. Нееми Йерусалиммӕ ку ӕрӕздахтӕй, уӕд фӕууидта, еуӕй-еу сувӕллӕнттӕ дзиуиттаг ӕвзаг ке нӕбал зудтонцӕ. (Бакӕсӕ Нееми 13:23, 24.) Еци сувӕллӕнттӕ Хуцауи Дзурд ке нӕ лӕдӕрдтӕнцӕ, уой туххӕй Хуцауӕй дӕр ӕма ӕ адӕнӕй дӕр раидард ӕнцӕ (Неем. 8:2, 8).

5, 6. Ӕндӕр ӕвзагбӕл дзорӕг ӕмбурди лӕггадӕ кӕнгӕй еуӕй-еу ниййергутӕ ци балӕдӕрдтӕнцӕ? Уотӕ цӕмӕн рауайуй?

⁵ Ӕндӕр ӕвзагбӕл кӕми дзорунцӕ, уӕхӕн ӕмбурди лӕггадӕ кӕнгӕй, еуӕй-еу ниййергутӕ балӕдӕрдтӕнцӕ, сӕ сувӕллӕнттӕ Хуцауи гъуддӕгти ке ӕруазал ӕнцӕ. Сувӕллӕнттӕ нӕуӕг ӕвзаг дзӕбӕх ке нӕ фӕллӕдӕрунцӕ, уомӕ гӕсгӕ ӕмбурди ци фегъосунцӕ, е сӕ зӕрдӕмӕ нӕбал фӕгъгъаруй. Ӕ бийнонти хӕццӕ Хонсар Америкӕй Австралимӕ ка ралигъдӕй, еу уӕхӕн ӕнсувӕр, Педро, ¹ зӕгъуй: «Ӕмбурди ци фегъосӕн, е гъӕуама нӕ зӕрдӕмӕ арф гъара ӕма нӕ гъуддӕгтӕмӕ разӕнгард кӕна» (Лук. 24:32).

⁶ Ӕндӕр ӕвзагбӕл ци фӕккӕсӕн, е нӕ зӕрдӕмӕ уотӕ арф нӕ багъаруй, нӕхе ӕвзагбӕл нӕмӕ куд багъаруй, уотӕ. Удта ма нин ӕндӕр ӕвзагбӕл дзорун ӕнцон ке нӕ фӕууй, уомӕ гӕсгӕ, ӕвӕдзи, бафӕллайӕн ӕма нӕ лӕггадӕй нӕ зӕрдӕ нӕбал фӕррохс кӕнуй. Мадта кӕд ӕндӕр ӕвзагбӕл кӕми дзорунцӕ, уӕхӕн ӕмбурди зӕрдиагӕй лӕггадӕ кӕнӕн, уӕддӕр гъӕуама не ’ууӕндундзийнадӕ гъӕуай кӕнӕн (Матф. 4:4).

7. Вавилойнӕгтӕ куд архайдтонцӕ, цӕмӕй Данели сӕ дин ӕма се ’гъдӕуттӕбӕл фӕццӕфсун кодтайуонцӕ?

⁷ Данел ӕма е ’мбӕлттӕ Вавилони уацармӕ ку бахаудтӕнцӕ, уӕд Вавилойнӕгтӕ архайдтонцӕ, цӕмӕй сӕ сӕ дин ӕма се ’гъдӕуттӕбӕл фӕццӕфсун кодтайуонцӕ. Цума куд? Ахур сӕ кодтонцӕ «халдейагау финсун ӕма дзорун», удта син равардтонцӕ вавилойнаг нӕмттӕ (Дан. 1:3–7). Данели нӕуӕг ном баст адтӕй вавилойнӕгти сӕйраг хуцауи номи хӕццӕ, Бел, зӕгъгӕ. Паддзах Навуходоносори, ӕвӕдзи, фӕндадтӕй, цӕмӕй Данел уотӕ сагъӕс кӕнун райдӕдтайдӕ, цума вавилойнӕгти хуцау, Йеговӕ Хуцауӕй хъаурӕгиндӕр ӕй (Дан. 4:8).

8. Данел е ’ууӕндундзийнадӕ куд багъӕуай кодта?

⁸ Вавилони Данели бон адтӕй паддзахи фингӕй хуӕрун. Фал Данел «ӕхецӕн федарӕй загъта», Хуцауи закъон ке нӕ фехалдзӕй (Дан. 1:8). «Киунугутӕ», гъома Финстадӕ ӕхе ӕвзагбӕл ке ӕртаста, уой фӕрци ӕндӕр бӕсти цӕргӕй е ’ууӕндундзийнадӕ багъӕуай кодта (Дан. 9:2). Вавилони 70 анзи ку фӕццардӕй, уӕддӕр ма ’й зудтонцӕ ӕ дзиуиттаг ном Данелӕй (Дан. 5:13).

9. 119-аг псалом ка ниффинста, уомӕн Хуцауи Дзурд куд банхус кодта?

⁹ 119-аг псалом ка ниффинста, уомӕн паддзахи фӕсдзӕуинттӕ ӕ нихмӕ цудӕнцӕ. Фал ин Хуцауи Дзурд федар фӕллӕуунмӕ хъауритӕ лӕвардта, ӕма уой фӕрци иннети хузӕн не ’ссӕй (Пс. 119:23, 61). Еци псаломфинсӕг Хуцауи дзурдтӕ ӕ зӕрди арф ниввардта. (Бакӕсӕ Псалом 119:11, 46.)

10, 11. а) Хуцауи Дзурд ӕртасгӕй нӕ нисан ци гъӕуама уа? б) Еци нисан нӕ къохи цӕй фӕрци бафтуйдзӕй? Ӕрхӕссӕ цӕветтон.

¹⁰ Кӕд нӕбӕл ӕмбурди берӕ ихӕстӕ ес, удта ма косгӕ дӕр кӕнӕн, уӕддӕр гъӕуама рӕстӕг  хецӕн кӕнӕн Библи ӕртасунӕн ӕма бийнонти ахурӕн (Еф. 5:15, 16). Фал айдагъ уобӕл гъӕуама ма архайӕн, цӕмӕй фулдӕр ӕрмӕг бакӕсӕн кенӕ ӕмбурдмӕ дзуапп бацӕттӕ кӕнӕн. Фиццагидӕр гъӕуама архайӕн, цӕмӕй Хуцауи Дзурд нӕ зӕрдӕмӕ багъара ӕма нин не ’ууӕндундзийнадӕ бафедар кӕна.

¹¹ Цӕмӕй нӕ нисӕнттӕ нӕ къохи бафтуйонцӕ, уой туххӕй гъӕуама лӕдӕргӕй архайӕн. Библи ӕртасгӕй гъӕуама айдагъ уобӕл ма сагъӕс кӕнӕн, ӕма си иннетӕн ци пайда уодзӕй, фал нӕхецӕн ци пайда уодзӕй, уобӕл дӕр (Фил. 1:9, 10). Игъосун кӕнунмӕ, ӕмбурдмӕ кенӕ радзубанди цӕттӕ кӕнгӕй ести ку фӕккӕсӕн, уӕд си арӕхдӕр нӕхуӕдтӕ цӕбӕл ахур кӕнӕн, уобӕл нӕ фӕссагъӕс кӕнӕн. Зӕгъӕн, пъовӕр ӕ хуӕруйнагӕй ӕвзаргӕ ракӕнуй, цалинмӕ ’й фингӕбӕл нӕма ӕрӕвӕрунцӕ, уӕдмӕ. Фал е уобӕл дзорӕг нӕй, ӕма ’й еци минкъий комидзӕгтӕй уӕлдай хуӕрун нӕбал гъӕуй. Цӕмӕй ӕнӕнез уа, уой туххӕй гъӕуама ӕхецӕн дӕр хуӕруйнаг искӕна. Уотӕ мах дӕр, цӕмӕй не ’ууӕндундзийнади гъуддаги «ӕнӕнез» уӕн, уой туххӕй гъӕуама нӕхе ӕфсадӕн, нӕхецӕн пайда ка уодзӕй, уӕхӕн «хуӕруйнагӕй».

12, 13. Библи хе ’взагбӕл ӕртасун пайда цӕмӕн ӕй?

¹² Ӕндӕр ӕвзагбӕл дзорӕг ӕмбурди ка лӕггадӕ кӕнуй, уонӕй беретӕ загътонцӕ, Библи сӕхе ӕвзагбӕл ке фертасунцӕ, е син хъӕбӕр устур пайда ке ӕй (Гъуд. 2:8). Миссионертӕ дӕр фӕззӕгъунцӕ, сӕ бон ке н’ адтайдӕ идарддӕр лӕггадӕ кӕнун, ӕрмӕстдӕр ӕмбурди ци фегъосунцӕ, уой фагӕбӕл ку нимадтайуонцӕ, уӕд.

¹³ Ален аст анзей бӕрцӕ персайнаг ӕвзаг ахур кӕнуй ӕма уотӕ загъта: «Ӕмбурдтӕмӕ мӕхе персайнаг ӕвзагбӕл ку фӕццӕттӕ кӕнун, уӕд мӕ гъудитӕ фулдӕр фӕуунцӕ, се ’взаг син куд лӕдӕрун, уобӕл. Уой туххӕй, ци фӕккӕсун, е мӕ зӕрдӕмӕ дзӕбӕх нӕ фӕгъгъаруй. Уомӕ гӕсгӕ рӕстӕг рахецӕн кӕнун,  цӕмӕй Библи ӕма ӕндӕр публикацитӕ мӕхе ӕвзагбӕл кӕсон».

14. Ниййергутӕ сӕ гъос цӕмӕ гъӕуама даронцӕ ӕма цӕмӕн?

¹⁴ Киристон ниййергутӕ уӕхӕн ӕмбурди лӕггадӕ кӕнгӕй гъӕуама сӕ гъос даронцӕ, рӕстдзийнадӕ сӕ сувӕллони зунд ӕма зӕрдӕмӕ куд гъаруй, уомӕ. Серж ӕма Мюриэл, ӕндӕр ӕвзагбӕл кӕми дзорунцӕ, уӕхӕн ӕмбурди ӕртӕ анземӕй фулдӕр ку фӕллӕггадӕ кодтонцӕ, уӕд лӕдӕрун райдӕдтонцӕ, сӕ 17-анздзуд фурт игъосун кӕнунмӕ ӕма ӕмбурдтӕмӕ уотӕ зӕрдиагӕй ке нӕбал цудӕй. Мюриэл зӕгъуй: «Ӕндӕр ӕвзагбӕл игъосун кӕнун ӕй ке гъудӕй, уобӕл мӕстгун кодта. Уотемӕй ба раздӕр нӕхе ӕвзагбӕл игъосун кӕнун уарзта». Серж ба зӕгъуй: «Нӕ фуртӕн уой туххӕй е ’ууӕндундзийнадӕ ке лӕмӕгъ кӕнуй, уой ку балӕдӕрдтан, уӕд фӕстӕмӕ нӕхе ӕмбурдмӕ раздахтан».

15. а) Ниййергутӕн ци банхус кӕндзӕй, сӕхе ӕвзагбӕл кӕми дзорунцӕ, еци ӕмбурдмӕ раздӕхонцӕ ӕви нӕ, уой ниллух кӕнун? б) Дуккаг закъон 6:5–7 стихти цӕхуӕн фӕдзӕхст ес?

¹⁵ Уӕ сувӕллӕнттӕ хуӕздӕр ке лӕдӕрунцӕ, еци ӕвзагбӕл дзорӕг ӕмбурдмӕ раздӕхайтӕ ӕви нӕ, уой ниллух кӕнунмӕ уин ци банхус кӕндзӕй? Гъӕуама расагъӕс кӕнайтӕ, ӕцӕгӕйдӕр уин уойбӕрцӕ рӕстӕг ӕма хъауритӕ ес, цӕмӕй уӕ сувӕллӕнтти ӕууӕндундзийнадӕ дӕр федар кӕнайтӕ ӕма ма сӕ хӕццӕ ӕндӕр ӕвзаг дӕр ахур кӕнайтӕ. Удта уӕ гъос даретӕ, уӕ сувӕллӕнтти игъосун кӕнун, ӕмбурдтӕмӕ цӕун кенӕ ӕндӕр ӕвзагбӕл дзорӕг ӕмбурди лӕггадӕ кӕнун зӕрдиагӕй фӕндуй ӕви нӕ, уомӕ. Кӕд аци гъуддӕгтӕй уӕ зӕрдӕ естӕмӕ дзоруй, уӕд, гӕнӕн ес, ӕма исфӕндӕ кӕнайтӕ, уӕхе ӕвзагбӕл кӕми дзорунцӕ, еци ӕмбурдмӕ раздӕхун. Фӕстӕдӕр ба сувӕллӕнттӕ рӕстдзийнади надбӕл ку фӕффедардӕр уонцӕ, уӕд уӕ бон уодзӕй нӕуӕгӕй ӕндӕр ӕвзагбӕл дзорӕг ӕмбурди лӕггадӕ кӕнун. (Бакӕсӕ Дуккаг закъон 6:5–7.)

16, 17. Еуӕй-еу ниййергутӕ ӕндӕр ӕвзагбӕл дзорӕг ӕмбурди лӕггадӕ кӕнгӕй сӕ сувӕллӕнттӕн Хуцауи Дзурд куд амонунцӕ?

¹⁶ Иннердиги ба, еуӕй-еу ниййергутӕ иссирдтонцӕ фадуӕттӕ, цӕмӕй сӕ сувӕллӕнттӕн сӕхе ӕвзагбӕл Хуцауи Дзурд дӕр амононцӕ ӕма ӕндӕр ӕвзагбӕл кӕми дзорунцӕ, уӕхӕн ӕмбурдмӕ кенӕ къуармӕ дӕр цӕуонцӕ. Шарльӕн ес ӕртӕ кизги, кӕстӕрбӕл си цӕуй 9 анзи хестӕрбӕл ба 13. Аци бийнонтӕ ӕнцӕ, лингалӕ ӕвзагбӕл кӕми дзорунцӕ, уӕхӕн къуари. Шарль загъта: «Мах унаффӕ рахастан, кизгутти хӕццӕ Библи нӕхе ӕвзагбӕл ке ахур кӕндзиан, удта бийнонти ахур дӕр нӕхе ӕвзагбӕл ке уадздзиан. Фал цӕмӕй сувӕллӕнттӕн ӕвзаг ахур кӕнун сӕ зӕрдӕмӕ цӕуа, уой туххӕй ӕмбурдтӕмӕ дзуӕппитӕ кенӕ, игъосун кӕнгӕй ци дзордзиан, уой фӕццӕттӕ кӕнӕн лингалӕ ӕвзагбӕл, удта еци ӕвзагбӕл ести гъӕститӕй дӕр фӕгъгъазӕн».

¹⁷ Кевинӕн ба ес дууӕ кизги, еуебӕл си цӕуй 5 анзи, иннебӕл ба – 8. Уой бийнонтӕ дӕр ӕнцӕ ӕндӕр ӕвзагбӕл кӕми дзорунцӕ, уӕхӕн ӕмбурди. Кевин хъӕбӕр архайуй, цӕмӕй сувӕллӕнттӕн рӕстдзийнадӕ амона, уомӕн ӕма еци ӕмбурди ӕвзаг дзӕбӕх нӕма лӕдӕрунцӕ. Кевин загъта: «Мӕ бийнойнаг ӕма ӕз нӕ кизгуттӕн Хуцауи Дзурд фӕййамонӕн нӕхе ӕвзагбӕл. Уомӕй уӕлдай ма унаффӕ рахастан, мӕйӕ еу хатт французаг ӕмбурдмӕ ке цӕудзиан, удта нӕхе ӕвзагбӕл конгресс ку уа, уӕд отпуск ке есдзиан ӕма уордӕмӕ ке цӕудзиан».

18. а) Ромӕгтӕмӕ 15:1, 2 ци унаффӕ ес, е дин куд банхус кӕндзӕй балӕдӕрун, дӕ сувӕллонӕн хуӕздӕр ци уодзӕй, уой? б) Еуӕй-еу ниййергутӕ уой туххӕй ци зӕгъунцӕ?

¹⁸ Алли бийнонтӕ дӕр гъӕуама сӕхуӕдтӕ ниллух кӕнонцӕ, сӕ сувӕллӕнтти ӕууӕндундзийнадӕн ци хуӕздӕр уодзӕй, уой ² (Гал. 6:5). Мюриэл, раздӕр ке кой кодтан, е загъта, ӕ цардӕмбали хӕццӕ сӕ хъӕбӕр ке фӕндадтӕй ӕндӕр  ӕвзагбӕл дзорӕг ӕмбурди лӕггадӕ кӕнун, фал сӕ фурти туххӕй рахизтӕнцӕ сӕхе ӕвзагбӕл кӕми дзорунцӕ, еци ӕмбурдмӕ. (Бакӕсӕ Ромӕгтӕмӕ 15:1, 2.) Абони ’й Серж лӕдӕруй, раст унаффӕ ке рахаста ӕма зӕгъуй: «Фӕстӕмӕ французаг ӕмбурдмӕ ку рахизтан, уӕд нӕ биццеу къахдзӕфтӕ кӕнун райдӕдта, донаргъуд райста ӕма нур пионерӕй лӕггадӕ кӕнуй. Нур ба ма уобӕл дӕр сагъӕс кӕнуй, цӕмӕй, ӕндӕр ӕвзагбӕл кӕми дзорунцӕ, уӕхӕн ӕмбурдмӕ рахеза!»

19, 20. Нӕ бон куд ӕй ӕвдесун, Хуцауи Дзурдӕн ке аргъ кӕнӕн?

¹⁹ Йеговӕ ӕгас адӕни дӕр уарзуй, ӕма уой туххӕй батухстӕй, цӕмӕй Библи сӕдӕгай ӕвзӕгтӕмӕ тӕлмацгонд цӕуа ӕма рӕстдзийнадӕ ци ӕй, уой «аллихузи адӕн дӕр дзӕбӕх базононцӕ» (1 Тим. 2:4). Йеговӕ ’й зонуй, Библи, хуӕздӕр ке лӕдӕрӕн, еци ӕвзагбӕл ку кӕсӕн, уӕд имӕ ке хӕстӕгдӕр кӕндзиан.

²⁰ Мах гъӕуама зӕрдиагӕй архайӕн, цӕмӕй Йеговӕмӕ хӕстӕгдӕр кӕнӕн. Уой туххӕй нӕ гъӕуй ӕдзох Библи ӕртасун, хуӕздӕр ке лӕдӕрӕн, еци ӕвзагбӕл. Нӕ зӕрдӕмӕ хъӕбӕрдӕр ка гъаруй, еци ӕвзагбӕл Библи ӕдзох ку ӕртасӕн, уӕд нӕхе ӕууӕндундзийнадӕ дӕр ӕма нӕ бийнонти ӕууӕндундзийнадӕ дӕр федар уодзӕй, удта бӕрӕг уодзӕй, Хуцауи Дзурдӕн ӕцӕгӕйдӕр ке аргъ кӕнӕн, е (Пс. 119:11).