1. Цӕмӕй Хуцауи зундӕй исхайгин уӕн, уой туххӕй нӕ ци кӕнун гъӕуй ӕма нин е ци пайда ӕрхӕсдзӕй?

ЙЕГОВӔ устур зунди хецау ӕй ӕма еци зундӕй иннетӕн дӕр рӕдауӕй хай кӕнуй. Иакови 1:5 финст ӕй: «Кӕд ескӕмӕ зунд фагӕ нӕййес, уӕд корӕд Хуцауӕй,– уомӕн ӕма е алкӕмӕндӕр дӕттуй рӕдауӕй ӕма ӕнӕ уайдзӕфӕй». Цӕмӕй еци зундӕй исхайгин уӕн, уой туххӕй гъӕуама Хуцауи зундамундмӕ игъосӕн. Уотемӕй нӕхе рӕдуд къахдзӕфтӕй багъӕуай кӕндзиан ӕма Йеговӕмӕ никки хӕстӕгдӕр исуодзиан (Ӕмб. 2:10–12). Уомӕй уӕлдай ма нин уодзӕй дессаги нифс ӕносон цардӕй (Иуд. 21).

2. Хуцауи зундамундтӕ пайда ке ’нцӕ, уой кӕд балӕдӕрдзиан?

² Еуӕй-еухатт нин зундамундмӕ байгъосун зин фӕууй, уомӕн ӕма ӕнӕнхӕст ан кенӕ нӕ уотӕ исгъомбӕл кодтонцӕ. Фал Хуцауи зундамундтӕ ци пайда хӕссунцӕ, уой нӕхебӕл ку бавзарӕн, гъе уӕд ӕй балӕдӕрӕн, Йеговӕ нӕ ӕцӕгӕйдӕр куд уарзуй, уой. Ӕмбесӕндти 3:11, 12 финст ӕй: «Мӕ фурт, Йеговӕ дин зунд ку амона, уӕд уобӕл дӕ къох ма ракъуӕрӕ... уомӕн ӕмӕ Йеговӕ, ке уарзуй, уайдзӕф дӕр уомӕн бакӕнуй». Мадта гъӕуама макӕд иронх кӕнӕн,  Йегови зӕрдӕ нин ӕрмӕстдӕр хуарз ке зӕгъуй. (Бакӕсӕ Дзиуиттӕгтӕмӕ 12:5–11.) Йеговӕ нӕ ке ’скодта, уомӕ гӕсгӕ уомӕй хуӕздӕр неке зонуй, зунд байамонун нин куд гъӕуй, ӕма е хуӕздӕр кӕд уодзӕй, уой. Аци статьяй равзардзиан, зундамунди хӕццӕ баст ка ӕй, цуппар уӕхӕн гъуддаги: 1) хебӕлхуӕцундзийнадӕ, 2) ниййергути зундамунд, 3) ӕмбурди зундамунд, 4) зундамундӕй фулдӕр маст ка ’рхӕссуй, уӕхӕн цидӕр.

3. Сувӕллон хебӕл хуӕцун куд исахур уодзӕй? Ӕрхӕссӕ цӕветтон.

³ Хебӕл хуӕцун ка зонуй, уӕхӕн адӕймагӕн ӕ гъуддӕгтӕ ӕма ӕ сагъӕстӕбӕл ӕ барӕ цӕуй. Еци менеуӕг адӕймаг ӕ мади губунӕй нӕ рахӕссуй, гъӕуама ибӕл архайгӕ кӕна. Зӕгъӕн, сувӕллон велосипедбӕл ку фӕййахур кӕнуй, уӕд бал ибӕл фиццӕгти ӕ ниййергутӕй еске фӕххуӕцуй, цӕмӕй ма рахауа. Фал еу минкъий ку райахур уй, уӕд ӕй ниййерӕг цалдӕр секунди фӕууӕгъдӕ кӕнуй, удта ’й фӕстӕмӕ райахӕссуй. Дзӕбӕх ибӕл ку исахур уй, уӕдта ’й еугур уагъд ракӕнуй. Уотӕ ниййергутӕ сӕ сувӕллӕнтти фӕразонӕй, «Йеговӕ куд амонуй, уотӕ» ку ахур кӕнонцӕ ӕма сӕ «ӕ зундбӕл» ку аразонцӕ, уӕд уой фӕрци сувӕллӕнттӕ хебӕл хуӕцун ӕма зундӕй архайун исахур уодзӕнцӕ (Еф. 6:4).

4, 5. а) Хебӕлхуӕцундзийнадӕ ӕхсидзгӕ менеуӕг цӕмӕн ӕй? б) Кӕд хатгай фӕррӕдуйӕн, уӕддӕр нӕ нифс цӕмӕн гъӕуама ма сӕтта?

⁴ Йегови устурӕй ка базудта, уонӕй ба ци ес зӕгъӕн? Цӕхуӕндӕр гъуддӕгти хебӕл хуӕцун ке зонунцӕ, е уобӕл дзорӕг нӕма ’й, ӕма фӕлтӕрдгун киристӕнттӕ ’нцӕ. Киристон фӕлтӕрдгун исуй ӕ «уодигъӕдӕ нӕуӕгмӕ ӕййевун» ӕма Йесой фӕнзун ку райдайуй, уӕд (Еф. 4:23, 24). Ӕма нин еци гъуддаги хебӕлхуӕцундзийнадӕ устур ӕнхус уодзӕй, цӕмӕй «ӕнӕхуцау гъуддӕгтӕй ӕма зӕнхон монцтӕй идард ледзӕн ӕма аци дуйней уӕн лӕдӕргӕ, цӕрӕн рӕстӕй ӕма Хуцаубӕл еузӕрдонӕй» (Тит. 2:12).

⁵ Фал не ’гасӕйдӕр тӕрегъӕдгун ан (Еккл. 7:20). Мадта ескӕми ку фӕррӕдуйӕн, уӕд е цума уобӕл дзорӕг уодзӕй, ӕма нин хебӕлхуӕцундзийнадӕ нӕ фагӕ кӕнуй кенӕ нӕмӕ уогӕ дӕр нӕййес? Нӕъ. Ӕмбесӕндти 24:16 финст ӕй: «Рӕстгӕнӕг авд хатти ку рахауа, уӕддӕр исистдзӕй». Цума цӕй фӕрци «исистдзӕй»? Ӕхе хъаури нӕ, фал Хуцауи сугъдӕг хъаури фӕрци. (Бакӕсӕ Филиппӕгтӕмӕ 4:13.) Хебӕлхуӕцундзийнадӕ дӕр, Хуцауи сугъдӕг хъаурӕй ка цӕуй, еци менеугутӕй сӕ еу ӕй.

6. Хуцауи Дзурд хуӕздӕр ӕртасунмӕ нин ци банхус кӕндзӕй? (Кӕсӕ хузӕмӕ статьяй райдайӕни.)

⁶ Хуцаумӕ ку ковӕн, удта Библи ку ахур кӕнӕн ӕма ибӕл ку сагъӕс кӕнӕн, уӕд нин е банхус кӕндзӕй нӕхебӕл хуӕцун. Фал дин, зӕгъӕн, Библи ӕртасун зин ӕй, кенӕ ахур кӕнун ӕппундӕр нӕ уарзис, уӕдта? Дӕ къохтӕ ма уадзӕ. Йеговӕн барӕ ку раттай, уӕд дин банхус кӕндзӕй, цӕмӕй Хуцауи Дзурд дӕхе зӕрдӕ агора (1 Пет. 2:2). Йеговӕй ӕнхус корӕ, цӕмӕй дӕ бон уа дӕхебӕл фӕхъхъӕбӕрдӕр ун, ӕма Библи ӕртасунмӕ рӕстӕг иссерун. Ка ’й зонуй дин фиццӕгти ӕнцондӕр уодзӕй минкъийгай ахур кӕнун, зӕгъӕн, еу цалдӕр минутти дӕргъи. Фӕстӕдӕр ба дин Библи ахур кӕнун никки ӕнцондӕр уодзӕй ӕма дин фулдӕр цийнӕдзийнадӕ хӕсдзӕй. Уой фӕсте ба дӕхуӕдӕг  зӕрдиагӕй ӕнгъӕлмӕ кӕсдзӕнӕ, сабур бунати Йегови дессаги гъудитӕбӕл расагъӕс кӕнун бабӕй дӕ бон кӕд уодзӕй, уомӕ (1 Тим. 4:15).

7. Хебӕл хуӕцун ку зонӕн, уӕд нин е куд банхус кӕндзӕй, цӕмӕй Хуцауи гъуддаги нӕ нисӕнттӕ нӕ къохи ӕфтуйонцӕ?

⁷ Хебӕл хуӕцун ку зонӕн, уӕд ма нин е банхус кӕндзӕй Хуцауи гъуддаги нӕ рази нисӕнттӕ ӕвӕрун. Зӕгъӕн, бийнонтӕ кӕмӕн ес, уӕхӕн ӕнсувӕр балӕдӕрдтӕй, зингзӕрдӕй ке нӕбал лӕггадӕ кӕнуй ӕма ӕхецӕн нисан исӕвардта, пионерӕй лӕггадӕ кӕнун ке райдайдзӕй. Уомӕ гӕсгӕ пионерӕй лӕггадӕ кӕнуни туххӕй аллихузи статьятӕ кӕсун райдӕдта ӕма уой туххӕй Йеговӕмӕ фулдӕр кувта. Уой фӕрци Йегови хӕццӕ ӕ лимӕндзийнадӕ никки федардӕр иссӕй, ӕма ӕй никки хъӕбӕрдӕр бафӕндадтӕй пионерӕй лӕггадӕ кӕнун. Уомӕй уӕлдай ма рӕстӕгӕй-рӕстӕгмӕ ӕнхусгӕнӕг пионерӕй дӕр ралӕггадӕ кӕнидӕ. Цума ин ци бантӕстӕй? Кӕд ин цӕхуӕндӕр зиндзийнӕдтӕ адтӕй, уӕддӕр нӕ бауагъта, цӕмӕй ӕй ести бахъор кодтайдӕ, ӕма фӕстӕдӕр пионерӕй лӕггадӕ кӕнун райдӕдта.

8–10. Ниййергутӕн ци банхус кӕндзӕй сӕ сувӕллони уотӕ исгъомбӕл кӕнун, цӕмӕй Йегови лӕггадгӕнӕг исуа? Ӕрхӕссӕ цӕветтон.

⁸ Йеговӕ ниййергутӕн баихӕс кодта, цӕмӕй сӕ сувӕллӕнти гъомбӕл кӕнонцӕ. Библий финст ес: «Уӕ сувӕллӕнтти... гъомбӕл кӕнтӕ, Йеговӕ куд амонуй, уотӕ» (Еф. 6:4). Фал аци дуйней цӕргӕй е ӕнцон нӕй (2 Тим. 3:1–5). Сувӕллон ку райгуруй, уӕд ӕй нӕма фӕллӕдӕруй хуарз ӕма лӕгъуз ци ӕй, уой, удта ин е ’фсарӕ дӕр нецима фӕдздзоруй. Уомӕ гӕсгӕ ӕй гъӕуй ахур кӕнун (Ром. 2:14, 15). Еу Библиртасӕг куд загъта, уомӕ гӕсгӕ дзурдбаст «гъомбӕл кӕнтӕ» ци грекъаг дзурдӕй ратӕлмац кодтонцӕ, е ма нисан кӕнуй «сувӕллони ахур кӕнун» дӕр, цӕмӕй си рауайа, ӕ гъуддӕгтӕбӕл дзуапп дӕттун ка зонуй, уӕхӕн адӕймаг.

⁹ Ниййергутӕ сӕ сувӕллонӕн фӕлмӕнӕй зунд ку амононцӕ, уӕд ӕй е дӕр уиндзӕй, тухсгӕ ибӕл ке кӕнунцӕ. Уомӕй уӕлдай ма ӕй лӕдӕрдзӕй, алци кӕнуни барӕ ин ке нӕййес, удта царди алли къахдзӕфӕн дӕр фӕстеугутӕ ке фӕууй. Мадта киристон ниййергутӕн хъӕбӕр ӕхсидзгӕ ӕй сӕ зӕрдӕ Йеговӕбӕл дарун. Сувӕллони гъомбӕл кӕнуни ӕгъдӕуттӕ еу адӕнихаттӕй иннемӕ хецӕн кӕнунцӕ. Фал ниййергутӕ сӕ зӕрдӕ гъӕуама аци дуйней зундбӕл ма даронцӕ. Йеговӕ куд амонуй, уотӕ сӕ ку гъомбӕл кӕнонцӕ, уӕд ӕй федарӕй зондзӕнцӕ, алцидӕр раст ке кӕнунцӕ.

¹⁰ Нӕ зӕрдӕбӕл ӕрлӕуун кӕнӕн Ноййи хабар. Йеговӕ ин науӕ искӕнун ку баихӕс кодта, уӕд Ной уӕхӕн куститӕн неци зудта. Фал ӕ зӕрдӕ, Йеговӕбӕл бадардта ӕма ин е «куддӕриддӕр загъта, гъе уотӕ бакодта» (Райд. 6:22). Уой фӕрци ӕхуӕдӕг дӕр фӕййервазтӕй ӕма ӕ бийнонти дӕр фӕййервӕзун кодта. Уомӕй уӕлдай ма Ной хуарз ниййерӕг адтӕй, уомӕн ӕма ӕ зӕрдӕ Хуцауи зундбӕл дардта. Ной ӕ сувӕллӕнтти ахур кодта ӕма син ӕхуӕдӕг дӕр фӕнзуйнаг адтӕй. Ӕма е ба ӕнцон н’ адтӕй, уомӕн ӕма Дони хъиамӕти размӕ дуйне хъӕбӕр фехалдӕй (Райд. 6:5).

11. Ниййергутӕ сувӕллӕнтти гъомбӕл кӕнгӕй сӕ хъауритӕбӕл цӕмӕннӕ гъӕуама ауӕрдонцӕ?

¹¹ Кӕд ду дӕр ниййерӕг дӕ, уӕд дин ци банхус кӕндзӕй, Хуцау «куддӕриддӕр зӕгъуй, гъе уотӕ» архайун. Йеговӕмӕ игъосӕ. Сувӕллӕнтти гъомбӕл кӕнунмӕ нин ӕ Дзурди ӕма ӕ организаций фӕрци ци унаффитӕ дӕттуй, уонӕй пайда кӕнӕ. Уотӕ ку архайай, уӕд ди фӕстӕдӕр дӕ сувӕллӕнттӕ боз уодзӕнцӕ. Еу ӕнсувӕр зӕгъуй: «Мӕ ниййергутӕй хъӕбӕр боз дӕн, куд мӕ исгъомбӕл кодтонцӕ, уой туххӕй. Цӕмӕй мин мӕ зӕрдӕмӕ над иссирдтайуонцӕ, уой туххӕй, сӕ бон цидӕриддӕр адтӕй, уой кодтонцӕ. Хуцауи гъуддаги мин цидӕриддӕр бантӕстӕй, етӕ мин, зӕгъӕн ес, ӕма уони фӕрци бантӕстӕнцӕ». Фал ниййергутӕ кудфӕнди ма архайонцӕ, уӕддӕр еуӕй-еу сувӕллӕнттӕ Йегови ниууадзунцӕ. Фал кӕд дӕ бон цидӕриддӕр адтӕй, уой кодтай, цӕмӕй дӕ сувӕллон рӕстдзийнадӕ бауарза, уӕд дӕхе ма фудгин кӕнӕ. Дӕ нифс ма басӕттӕд. Ка ’й зонуй дин еу бон фӕстӕмӕ Йеговӕмӕ раздӕхдзӕй.

12, 13. а) Ниййергути бон куд ӕй ӕвдесун, Хуцауи разамундмӕ ке игъосунцӕ, сӕ фурти кенӕ сӕ кизги ӕмбурдӕй ку рацох кӕнонцӕ, уӕд? б) Еу бийнонтӕн ци пайда ӕрхаста, Йеговӕмӕ ке байгъустонцӕ, е?

¹² Ниййерӕгӕн тӕккӕ устурдӕр фӕлварӕнтӕй сӕ еу ӕй, ӕ сувӕллони ин ӕмбурдӕй ку рацох кӕнунцӕ. Ӕмбурдӕй ке рацох  кодтонцӕ ӕма хӕдзарӕй ка рандӕ ’й, еу уӕхӕн хуӕрӕн ӕ мадӕ зӕгъуй: «Нӕ литератури агурдтон, мӕ кизгӕ ӕма мӕ кизги кизги хӕццӕ рӕстӕг ӕрветунмӕ мин рӕуонӕн ка фӕцайдӕ, уӕхӕн гъудитӕ». Ӕхуӕдӕг куд зӕгъуй, уомӕ гӕсгӕ ин ӕ лӕг фӕлмӕнӕй балӕдӕрун кодта, сӕ кизгӕ уони бӕрагӕ ке нӕбал ӕй ӕма Йеговӕбӕл еузӕрдон ке гъӕуама уонцӕ.

¹³ Цалдӕр анзей фӕсте сӕ кизгӕ нӕуӕгӕй Йегови Ӕвдесӕн иссӕй. Ӕ мадӕ зӕгъуй: «Нур мӕмӕ мӕ кизгӕ алли бон дӕр телефонӕй радзоруй кенӕ мӕмӕ рафинсуй! Удта ни хъӕбӕр боз ӕй, Хуцаумӕ ке байгъустан, уой туххӕй. Нур ӕ хӕццӕ хъӕбӕр дзӕбӕх цӕрӕн». Кӕд дӕуӕн дӕр дӕ фурти кенӕ дӕ кизги ӕмбурдӕй рацох кодтонцӕ, уӕд дӕ зӕрдӕбӕл дардзӕнӕ Ӕмбесӕндти 3:5, 6 финст дзурдтӕ: «Дӕ зӕрдӕ ӕгасӕйдӕр дарӕ Йеговӕбӕл ӕма дӕхе зундӕй нифсгун ма уо»? Ма иронх кӕнӕ: Йегови амундтӕ еугурӕйдӕр е ’нӕкӕрон зунд ӕма уарзтбӕл дзорӕг ӕнцӕ. Е ӕ Фурти ӕгас адӕни туххӕй дӕр равардта, ӕма дӕу сувӕллон дӕр уонӕмӕ хауй. Удта ’й нӕ фӕндуй, цӕмӕй еске рамӕла. (Бакӕсӕ 2 Петури 3:9.) Мадта ӕппундӕр ма гурусхӕ кӕнтӕ, Йегови зундамунд ӕма ӕ унаффитӕ алкӕддӕр раст ке фӕуунцӕ. Йеговӕмӕ игъосетӕ, зин уин ку уа, уӕддӕр, ӕма ин ӕ разамунди нихмӕ макӕд цотӕ.

14. Йеговӕ нин «ӕууӕнкгун... хӕдзаргӕси» фӕрци ци разамунд дӕттуй, е нин ци пайда хӕссуй?

¹⁴ Йеговӕ зӕрдӕ байвардта, киристон ӕмбурдбӕл ке тухсдзӕй, ке ’й гъӕуай кӕндзӕй ӕма ин разамунд ке дӕтдзӕй. Ӕма уой туххӕй Йеговӕ аллихузи мадзӕлттӕй пайда кӕнуй. Зӕгъӕн, ӕмбурд ӕ Фурти барӕ бакодта, е ба «ӕууӕнкгун... хӕдзаргӕси» исӕвардта, цӕмӕй нин ӕууӕндундзийнадӕ федаргӕнӕн хуӕруйнаг афойнадӕбӕл лӕвӕрд цӕуа (Лук. 12:42). Еци «хӕдзаргӕс» нин зунд амонуй, гъома нин хуарз разамунд дӕттуй. Ескӕд дин уотӕ адтӕй, ӕма дӕ цӕхуӕндӕр радзубанди кенӕ нӕ брошюритӕй цӕхуӕндӕр статья баразӕнгард кодта дӕ сагъӕстӕ кенӕ дӕ гъуддӕгтӕ раййевунмӕ? Кӕд еци ӕййивддзийнӕдтӕ искодтай, уӕд е уобӕл дзорӕг ӕй, ӕма Хуцауи зундамундмӕ байгъустай (Ӕмб. 2:1–5).

15, 16. а) Хестӕр нӕлгоймӕгтӕ ци куст кӕнунцӕ, е нин пайда кӕд ӕрхӕсдзӕй? б) Нӕ бон ци ӕй кӕнун, цӕмӕй хестӕр нӕлгоймӕгтӕ сӕ ихӕстӕ зӕрдиагӕй ӕнхӕст кӕнонцӕ?

¹⁵ Киристе ма ӕмбурди исӕвардта хестӕр нӕлгоймӕгти. Библи сӕ хонуй «лӕвӕрттӕ» (Еф. 4:8, 11–13). Хестӕр нӕлгоймӕгтӕ ци куст кӕнунцӕ, е нин пайда кӕд ӕрхӕсдзӕй? Се ’ууӕндундзийнадӕ ӕма син сӕ хуарз гъуддӕгтӕ ку фӕнзӕн, удта нин Библийӕй ци унаффитӕ раттунцӕ, уонӕмӕ ку игъосӕн, уӕд. (Бакӕсӕ Дзиуиттӕгтӕмӕ 13:7, 17.) Хестӕр нӕлгоймӕгтӕ нӕ берӕ уарзунцӕ ӕма сӕ уотӕ фӕндуй, цӕмӕй не ’ууӕндундзийнадӕ федарӕй-федардӕр кӕна. Зӕгъӕн, кадӕр ӕмбурдтӕ цох кӕнун ке райдӕдта кенӕ зингзӕрдӕй ке нӕбал лӕггадӕ кӕнуй, уой ку балӕдӕрунцӕ, уӕд имӕ еци фӕдӕй се ’нхуси къох бадарунцӕ. Ба имӕ игъосунцӕ, удта ин ӕ нифс бафедар кӕнунцӕ ӕма ин Библийӕй дзӕбӕх унаффӕ раттунцӕ. Ду ба син се ’нхусмӕ цӕхуӕн цӕстӕй кӕсис? Лӕдӕрис ӕй, еци ӕнхус Йегови уарзондзийнадӕбӕл дзорӕг ке ӕй?

¹⁶ Хестӕр нӕлгоймӕгтӕн ескӕмӕн унаффӕ раттун алкӕд ӕнцон нӕ фӕууй. Расагъӕс кӕнӕ, пахампар Нафанӕн куд зин адтайдӕ Давиди хӕццӕ радзорун, ӕ уӕззау  тӕрегъӕд басосӕг кӕнунмӕ ку гъавта, уӕд (2 Сам. 12:1–14). Апостол Павели дӕр федардзийнадӕ гъудӕй, цӕмӕй Петурӕн, 12 апостолемӕй еуемӕн, бауайдзӕф кодтайдӕ, дзиуиттаг ка н’ адтӕй, еци киристӕнттӕй ӕхе еуварс ке дардта, уой туххӕй (Гал. 2:11–14). Мадта дӕ бон ци ӕй кӕнун, цӕмӕй уе ’мбурди хестӕр нӕлгоймӕгтӕн сӕ ихӕстӕ ӕнхӕст кӕнун ӕнцондӕр уа? Сӕрниллӕг ӕма боз уо, удта дӕхе уотӕ ма дарӕ, цӕмӕй дӕмӕ бацӕун дӕр ма ’ндеуонцӕ. Банхус кӕнунмӕ дин ке гъавунцӕ, е Йегови уарзондзийнадӕбӕл дзорӕг ке ӕй, уой ма иронх кӕнӕ. Е дӕуӕн дӕр пайда ӕрхӕсдзӕй ӕма етӕ дӕр сӕ ихӕс зӕрдиагӕй ӕнхӕст кӕндзӕнцӕ.

17. Хестӕр нӕлгоймӕгтӕ еу хуӕрӕн куд банхус кодтонцӕ?

¹⁷ Еу хуӕрӕн Йегови уарзун ӕнцон н’ адтӕй, кӕддӕр ибӕл ци хабар ӕрцудӕй, уой туххӕй. Еци хуӕрӕ радзурдта: «Лӕдӕрдтӕн ӕй, хестӕр нӕлгоймӕгти хӕццӕ радзорун мӕ ке гъӕуй, ӕма сӕмӕ бацудтӕн. Етӕ мӕ уайдзӕфти буни нӕ фӕккодтонцӕ, фал мин мӕ нифс бафедар кодтонцӕ. Ӕмбурди фӕсте син кӕд берӕ гъуддӕгтӕ фӕууидӕ, уӕддӕр мӕмӕ бацӕуиуонцӕ ӕма мӕ рафӕрсиуонцӕ, куд дӕ, зӕгъгӕ. Мӕ раздӕриккон хабӕртти туххӕй мӕмӕ уотӕ кастӕй ӕма Йегови уарзти аккаг нӕ дӕн. Фал мин Йеговӕ ӕмбурди ӕма хестӕр нӕлгоймӕгти фӕрци еу хаттӕй-иннӕ хатмӕ ӕвдиста, ке мӕ уарзуй, уой. Нур ба Хуцаумӕ уой туххӕй фӕкковун, цӕмӕй си макӕдбал раидард уон».

18, 19. Адӕймагӕн зундамундӕй устурдӕр маст ци ’рхӕссуй? Ӕрхӕссӕ цӕветтон.

¹⁸ Зундамунд еуӕй-еухатт маст дӕр ӕрхӕссуй. Фал адӕймаг зундамундмӕ ку нӕ байгъосуй, уӕд ин ӕцӕг маст ба е ӕрхӕссуй (Дзиуит. 12:11). Ӕркӕсӕн Каини ӕма Седекий хабӕрттӕмӕ. Хуцау ӕй ку фӕууидта, Каин е ’нсувӕрӕй е ’сӕфт ке уинуй ӕма ’й марунмӕ ке гъавуй, уӕд ин загъта: «Цӕбӕл исмӕстгун дӕ ӕма дӕхе цӕбӕл ниттар кодтай? Хуарздзийнадӕ кӕнун ку райдайай, уӕд дӕ не ’сбӕрзонд кӕндзӕн? Фал хуарздзийнадӕ кӕнун ку нӕ райдайай, уӕд тӕрегъӕд дӕ къӕсӕрбӕл ӕй ӕма дӕ ӕрахӕссунмӕ гъавуй. Фал ибӕл ду фӕууӕлахез уодзӕнӕ?» (Райд. 4:6, 7). Каин Йегови зундамундмӕ нӕ байгъуста ӕма е ’нсувӕри рамардта. Ӕма уой туххӕй е ’гас цард дӕр фӕгъгъезӕмарӕ кодта (Райд. 4:11, 12). Каин Йеговӕмӕ ку байгъустайдӕ, уӕд ӕхе уӕхӕн масти хай нӕ бакодтайдӕ.

¹⁹ Паддзах Седеки фудзӕрдӕ адӕймаг адтӕй, удта алкӕддӕр еске зундӕй архайдта. Ӕ рӕстӕги Йерусалим хъӕбӕр лӕгъуз уавӕри адтӕй. Пахампар Йереми Седекий еу ӕма дууӕ хатти нӕ бафӕдзахста, цӕмӕй ӕ фудгъуддӕгтӕ ниууагътайдӕ. Фал паддзах еци зундамундмӕ нӕ байгъуста, ӕма ’й е фидбилизмӕ ӕркодта (Йер. 52:8–11). Йегови ба нӕ фӕндуй, цӕмӕй махбӕл дӕр уӕхӕн хабар ӕрцӕуа! (Бакӕсӕ Исай 48:17, 18.)

20. Хуцауи зундамундмӕ ка игъосуй ӕма ка не ’гъосуй, уонӕмӕ ци ӕнгъӕлмӕ кӕсуй?

²⁰ Аци дуйней беретӕ Хуцауи зундамундмӕ нӕ игъосунцӕ, ӕ уагӕвӕрдтӕмӕ гӕсгӕ ин ка цӕруй, уонӕбӕл ба ма ходгӕ дӕр фӕккӕнунцӕ. Фал тагъд рӕстӕги, Хуцауи зундамундтӕ ка нецӕмӕ даруй, етӕ устур масти хай бауодзӕнцӕ (Ӕмб. 1:24–31). Гъӕйдӕ мадта алкӕддӕр «игъосӕн зундамундмӕ, ӕма исуӕн зундгин». Ӕмбесӕндти 4:13 финст ӕй: «Зундамундбӕл федар хуӕцӕ, ма ’й исуадзӕ. Гъӕуай ӕй кӕнӕ, уомӕн ӕма дӕ цард уомӕй кӕнгӕ ’й».