1, 2. а) Еуӕй-еу ниййергутӕ куд фӕуунцӕ, сӕ сувӕллони донаргъуд райсун ку фӕффӕндуй, уӕд? б) Донаргъуд ка фӕййесуй, уони цӕмӕн фӕффӕрсунцӕ, сӕхе Йеговӕн иснивонд кодтонцӕ ӕви нӕ, уобӕл? (Кӕсӕ хузӕмӕ статьяй райдайӕни.)

МАРИЙИ ниййергутӕ кастӕнцӕ, се ’ригон кизгӕ, донаргъуд ка есдзӕй, уони хӕццӕ куд лӕууй, уомӕ. Донаргъуди фӕдбӕл радзубанди кӕмӕ адтӕй, еци ӕнсувӕр дууӕ фарстай равардта, ӕма сӕбӕл Марийӕ дӕр гъӕрӕй, удта бӕлвурдӕй исдзуапп кодта. Минкъий фӕстӕдӕр ба донаргъуд дӕр райста.

² Марийӕ ӕ цард Йеговӕн ке иснивонд кодта ӕма донаргъуд ке райста, уой туххӕй си ӕ ниййергутӕ хъӕбӕр сӕрустур адтӕнцӕ. Фал уой разӕй ӕ мадӕ еу минкъий тухсгӕ дӕр кодта, уомӕн ӕма сагъӕс кодта: «Цума ин донаргъуд есунмӕ ӕгӕр раги нӕма ӕй? Лӕдӕруй ӕй, цард Йеговӕн иснивонд кӕнун цӕйбӕрцӕбӕл ӕхсидзгӕ къахдзӕф ӕй, уой? Еу минкъий ма ку бахеза, уӕд хуӕздӕр нӕ уодзӕй?» Аци фарстатӕ берӕ ниййергути фӕттухсун  кӕнунцӕ, сӕ сувӕллон донаргъуд райсунвӕндӕ ку искӕнуй, уӕд (Еккл. 5:5). Алли киристонӕн дӕр ӕхе Йеговӕн иснивонд кӕнун ӕма донаргъуд райсун тӕккӕ ӕхсидзгӕдӕр къахдзӕф ӕй ӕ царди. (Кӕсӕ рамкӕ « Дӕ цард Йеговӕн иснивонд кодтай?».)

3, 4. а) Донаргъуд райсун куд ӕхсидзгӕ гъуддаг ӕй, уой апостол Петур куд балӕдӕрун кодта? б) Петур донаргъуд цӕмӕн рабарста, Ной ке аразта, еци науи хӕццӕ?

³ Апостол Петур донаргъуд рабарста, Ной ци науӕ аразта, уой хӕццӕ. Петур загъта: «Уотӕ ӕй донаргъуд дӕр, нур уӕ е ервӕзун кӕнуй». (Бакӕсӕ 1 Петури 3:20, 21.) Еци науӕ хуарз ӕвдесӕн адтӕй, Ноййи ӕцӕгӕйдӕр Хуцауи фӕндон ӕнхӕст кӕнун ке фӕндадтӕй, уомӕн. Ной кӕронмӕ дӕр исӕнхӕст кодта, Йеговӕ ин цидӕриддӕр баихӕс кодта, уой. Уӕхӕн федар ӕууӕндундзийнадӕ имӕ ке адтӕй, уой туххӕй ин Йеговӕ ӕхе дӕр ӕма ӕ бийнонти дӕр Дони хъиамӕти фӕййервӕзун кодта. Цума Петур аци цӕветтонӕй ци зӕгъуйнаг адтӕй?

⁴ Ной Хуцаубӕл федарӕй ке ӕууӕндтӕй, уомӕн хуарз ӕвдесӕн адтӕй, ци науӕ исаразта, е. Уотӕ донаргъуд дӕр хуарз ӕвдесуй, адӕймаг Киристей нивондбӕл ке ӕууӕндуй ӕма ӕ цард Хуцауӕн ке иснивонд кодта, уой. Ноййи хузӕн, донаргъуд ка есуй, етӕ дӕр Хуцауӕн коммӕгӕс ӕнцӕ ӕма ӕнхӕст кӕнунцӕ, ке син баихӕс кодта, еци куст. Ӕма Йеговӕ Дони хъиамӕти рӕстӕг Ноййи куд фӕййервӕзун кодта, уотӕ ӕ еузӕрдон донаргъуд лӕггадгӕнгути дӕр фӕййервӕзун кӕндзӕй, аци фуддуйнейӕн ӕ кӕрон ку ’рцӕуа, уӕд (Мар. 13:10; Рарг. 7:9, 10). Айдагъ уомӕй дӕр бӕрӕг ӕй, нӕ цард Йеговӕн  иснивонд кӕнун ӕма донаргъуд райсун куд ӕхсидзгӕ ӕй, е. Мадта донаргъуд райсунмӕ ка нӕ хӕлӕф кӕнуй, е, зӕгъӕн ес, ӕма ӕхе ӕносон царди нифсӕй ӕнӕхай кӕнуй.

5. Аци статьяй цӕмӕ ӕркӕсдзиан?

⁵ Мах базудтан, донаргъуд райсун цӕхуӕн ӕхсидзгӕ къахдзӕф ӕй, уой. Фал ма нӕ гъӕуй аци ӕртӕ фарстай равзарун: Библий донаргъуди туххӕй ци финст ес? Донаргъуд райсуни размӕ адӕймаг ци гъӕуама бакӕна? Нӕ сувӕллӕнтти кенӕ ӕндӕр адӕни хӕццӕ Библи ахур кӕнгӕй нӕ зӕрдӕбӕл цӕмӕн гъӕуама дарӕн, донаргъуд райсун куд ӕхсидзгӕ гъуддаг ӕй, уой?

6, 7. а) Адӕн Иоанмӕ донаргъуд есунмӕ цӕмӕн цудӕнцӕ? б) Иннети донаргъудӕй ке донаргъуд хецӕн кодта ӕма цӕмӕн?

⁶ Донаргъуди туххӕй Библий фиццаг хатт кӕсӕн, Аргъауӕг Иоанни кой кӕми цӕуй, уоми (Матф. 3:1–6). Цума имӕ адӕн донаргъуд райсунмӕ цӕмӕн цудӕнцӕ? Уомӕн ӕма сӕ уотемӕй фӕндадтӕй бавдесун, Моисеййи закъон ке ихалдтонцӕ, уобӕл фӕсмон ке кӕнунцӕ, уой. Фал дессаг е ӕй, ӕма тӕккӕ ӕхсидзгӕдӕр донаргъуд фӕсмони хӕццӕ баст н’ адтӕй. Иоанмӕ уӕхӕн кадӕ ӕрхаудтӕй, ӕма донаргъуд лӕвардта ӕнхӕст адӕймагӕн – Хуцауи Фуртӕн (Матф. 3:13–17). Йесо тӕрегъӕдгун адӕймаг н’ адтӕй ӕма ’й фӕсмон кӕнун дӕр нецӕбӕл гъудӕй (1 Пет. 2:22). Мадта уӕд донаргъуд цӕмӕн райста? Уомӕй бавдиста, Хуцауи фӕндон ӕнхӕст кӕнунмӕ цӕттӕ ке адтӕй, уой (Дзиуит. 10:7).

⁷ Йесо зӕнхӕбӕл ку лӕггадӕ кодта, уӕд ӕ ахуркӕнуйнӕгтӕ дӕр иннетӕн донаргъуд дӕттун райдӕдтонцӕ (Иоан. 3:22; 4:1, 2). Ӕма гъе уӕд дӕр адӕн донаргъуд истонцӕ, Моисеййи закъони нихмӕ сӕ тӕрегъӕдтӕбӕл фӕсмон ке кодтонцӕ, уой туххӕй. Фал Киристе ку рамардӕй ӕма ку райгас ӕй, уӕд уой фӕсте ӕ фӕдбӕл цӕун ке фӕндадтӕй, етӕ донаргъуд ӕндӕр цӕйдӕр туххӕй истонцӕ.

8. а) Киристе ку райгас ӕй, уӕд ӕ фӕдбӕлдзӕугутӕн ци бафӕдзахста? б) Киристонӕн донаргъуд райсун ӕнӕмӕнгӕ гъуддаг цӕмӕн ӕй?

⁸ Нӕ эри 33 анзи Йесо ку райгас ӕй, уомӕй минкъий фӕстӕдӕр 500 фулдӕр адӕймагемӕ фӕззиндтӕй. Сӕ астӕу адтӕй силгоймӕгтӕ, нӕлгоймӕгтӕ ӕма ма, ка ’й зонуй, сувӕллӕнттӕ дӕр. Ӕма син, ӕвӕдзи, гъе уӕд загъта: «Цотӕ ӕма мин ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ. Дӕттетӕ син донаргъуд Фидӕ, Фурт ӕма сугъдӕг хъаури номӕй. Ӕма сӕ ахур кӕнтӕ, ӕз уин цидӕриддӕр ниффӕдзахстон, уой ӕнхӕст кӕнун» (Матф. 28:19, 20; 1 Кор. 15:6). Йесо ӕ фӕдбӕлдзӕугутӕн бафӕдзахста ахуркӕнуйнӕгтӕ цӕттӕ кӕнун. Удта ма син балӕдӕрун кодта, ӕ фӕдбӕл цӕун ке фӕндуй, гъома ӕхебӕл «е ’фсойнӕ» исӕвӕрун, еци адӕймаг донаргъуд ке гъӕуама райса (Матф. 11:29, 30). Цӕмӕй нӕ лӕггадӕй Хуцауи зӕрдӕ рохс кӕнӕн, уой туххӕй ӕй гъӕуама лӕдӕрӕн, Хуцау ӕ фӕндон Киристей фӕрци ке ӕнхӕст кӕнуй, уой. Ӕма уӕд нӕ бон донаргъуд райсун дӕр уодзӕй. Хуцауи цӕсти ӕрмӕстдӕр уӕхӕн донаргъуд нимад цӕуй. Библи хуарз ӕвдесуй, Киристей фӕдбӕлдзӕугутӕ ’й хуарз ке лӕдӕрдтӕнцӕ, донаргъуд райсун  цӕхуӕн ӕхсидзгӕ гъуддаг ӕй, уой. Етӕ рӕстӕг нӕ ивазтонцӕ, удта уотӕ нӕ сагъӕс кодтонцӕ, донаргъуд райсунмӕ афонӕ нӕма ’й, зӕгъгӕ (Гъуд. 2:41; 9:18; 16:14, 15, 32, 33).

9, 10. Ефиопаг хецау ӕма апостол Павели хабарӕй донаргъуди туххӕй ци ес базонӕн?

⁹ Бакӕсӕ Гъуддӕгтӕ 8:35, 36. Ӕркӕсӕн, дзиуиттаг дин ка райста, еци ефиопаг хецауи хабармӕ. Йерусалими ковӕндонӕй сӕхемӕ ку цудӕй, уӕд имӕ Йегови изӕд Филиппи рарвиста. Ӕма ибӕл Филипп ку рамбалдӕй, уӕд ин райдӕдта «Йесой туххӕй хуарз хабар лӕдӕрун кӕнун». Ефиопаг хецау еци хабармӕ ци цӕстӕй ракастӕй? Ци базудта, уой ӕ зӕрдӕмӕ райста, ӕма ’й бафӕндадтӕй, Йеговӕ киристӕнттӕмӕ цӕмӕ ӕнгъӕлмӕ кӕсуй, уой ӕнхӕст кӕнун. Ӕма уомӕ гӕсгӕ еци фӕдбӕл донаргъуд райста.

¹⁰ Нур ба ӕркӕсӕн еу дзиуиттаг нӕлгоймаг Савли хабармӕ. Рагидзаманти дзиуиттӕгтӕ Хуцауӕй ӕвзурст адӕн адтӕнцӕ, фал сӕ Йеговӕ ӕ адӕнбӕл нӕбал нимадта, уомӕн ӕма ин ӕ дзурд нецӕмӕ дардтонцӕ. Савл ба ма уӕддӕр федарӕй ӕууӕндтӕй, Хуцауӕн раст куд ӕй, уотӕ ӕрмӕстдӕр дзиуиттӕгтӕ ке лӕггадӕ кӕнунцӕ ӕма уомӕ гӕсгӕ киристӕнтти хъӕбӕр ӕфхуардта. Фал имӕ еухатт Киристе еци гъуддаги туххӕй ӕхуӕдӕг уӕлӕрвтӕй ӕрдзурдта. Цума уой фӕсте Савл куд бакодта? Киристей ахуркӕнуйнаг Ананий ӕнхусбӕл зӕрдиагӕй исарази ӕй, уой фӕсте ба, Библий куд финст ӕй, уомӕ гӕсгӕ, «исистадӕй ӕма донаргъуд райста» (Гъуд. 9:17, 18; Гал. 1:14). Еци дзиуиттаг нӕлгоймаги фӕстӕдӕр худтонцӕ апостол Павел. Павел ӕй куддӕр балӕдӕрдтӕй, Йеговӕ ӕ фӕндон Киристей фӕрци ке ӕнхӕст кӕнуй, уотӕ ӕнӕ ракӕнӕ-бакӕнӕй донаргъуд райста. (Бакӕсӕ Гъуддӕгтӕ 22:12–16.)

11. а) Библи ка фӕййахур кӕнуй, уони донаргъуд райсун цӕмӕн бафӕндуй? б) Донаргъуд ка есуй, уонӕмӕ кӕсгӕй цӕбӕл фӕссагъӕс кӕнӕн?

¹¹ Абони дӕр Библи ка ахур кӕнуй, уонӕй беретӕн,– ӕригӕнттӕн ӕма каргунтӕн дӕр,– сӕ хабар уотӕ ’й. Библий рӕстдзийнадӕ ку базонунцӕ, уӕд сӕ бафӕндуй сӕ цард Йеговӕн иснивонд кӕнун ӕма донаргъуд райсун. Районон ӕма регионалон конгрессти алкӕддӕр донаргъуди фӕдбӕл радзубанди фӕууй. Йегови Ӕвдесӕнти цийнӕн кӕрон дӕр нӕ фӕууй, Библи ке хӕццӕ ахур кӕнунцӕ, уони зӕрдитӕмӕ рӕстдзийнадӕ ку багъаруй ӕма сӕ донаргъуд райсун ку бафӕндуй, уӕд. Ниййергутӕ дӕр хъӕбӕр фӕццийнӕ кӕнунцӕ, сӕ сувӕллӕнттӕ уӕхӕн къахдзӕф ку искӕнунцӕ, уӕд. 2017 лӕггади анзи донаргъуд райстонцӕ 284 000 адӕймагемӕй фулдӕр, ӕма уотемӕй бавдистонцӕ, сӕ цард Йеговӕн ке иснивонд кодтонцӕ (Гъуд. 13:48). Еци адӕн ӕй хуарз балӕдӕрдтӕнцӕ, киристонӕн донаргъуд райсун цӕхуӕн ӕхсидзгӕ къахдзӕф ӕй, уой. Фал цӕмӕй донаргъуд райстайуонцӕ, уой туххӕй сӕ ци гъудӕй бакӕнун?

12. Библи ка ахур кӕнуй, етӕ донаргъуд райсуни размӕ ци гъӕуама бакӕнонцӕ?

¹² Донаргъуд райсуни размӕ бал Библи ка ахур кӕнуй, етӕ гъӕуама базононцӕ Хуцауи ӕма имӕ ци фӕндтӕ ес, уой туххӕй, удта ма адӕни фӕййервӕзун кӕнунмӕ ци бакодта, уой туххӕй  дӕр (1 Тим. 2:3–6). Уой фӕсте ба гъӕуама байархайонцӕ, цӕмӕй сӕмӕ федар ӕууӕндундзийнадӕ фӕззинна. Е син банхус кӕндзӕй сӕ лӕгъуз гъуддӕгтӕ ниууадзун ӕма Хуцауи раст уагӕвӕрдтӕмӕ гӕсгӕ цӕрун (Гъуд. 3:19). Е ба хъӕбӕр ӕхсидзгӕ гъуддаг ӕй, уомӕн ӕма адӕймаг, Хуцау е ’сӕфт кӕмӕй уинуй, еци гъуддӕгтӕ ку нӕ ниууадза, уӕд ӕй Хуцау нӕ банимайдзӕй, ӕхе ин ка иснивонд кодта, уӕхӕн адӕймагбӕл (1 Кор. 6:9, 10). Фал ма си Йегови раст уагӕвӕрдтӕбӕл хуӕцунӕй уӕлдай никкидӕр цидӕр гъӕуй. Ӕхе Йеговӕн иснивонд кӕнун ке фӕндуй, етӕ гъӕуама ӕмбурдтӕмӕ цӕуонцӕ ӕма Библий рӕстдзийнадӕ иннетӕн дӕр амононцӕ. Йесо загъта, аци куст ӕрмӕстдӕр е ’цӕг фӕдбӕлдзӕугутӕ ке кӕндзӕнцӕ (Гъуд. 1:8). Ӕма кӕд адӕймаг аци гъуддӕгтӕ еугурейдӕр кӕнуй, уӕд ӕ бон ӕй Йеговӕмӕ исковун ӕма ин ӕхе иснивонд кӕнун, уой фӕсте ба донаргъуд райсун.

13. Иннети хӕццӕ Библи ахур кӕнгӕй, нӕ зӕрдӕбӕл цӕмӕн гъӕуама дарӕн, донаргъуд райсун куд ӕхсидзгӕ ӕй, уой?

¹³ Уӕлдӕр ке ранимадтан, еци гъуддӕгти нӕ сувӕллӕнттӕн, удта Библи ке хӕццӕ ахур кӕнӕн, уонӕн ку ӕнхус кӕнӕн, уӕд гъӕуама нӕ зӕрдӕбӕл дарӕн, цӕмӕй Киристей фӕдбӕлдзӕугутӕ исуонцӕ, уой туххӕй сӕ ӕнӕмӕнгӕй донаргъуд райсун ке гъӕуй. Уой ку не ’ронх кӕнӕн, уӕд нин ӕнцондӕр уодзӕй, ку багъӕуа, уӕд сӕ хӕццӕ донаргъуди туххӕй радзорун. Мах хъӕбӕр фӕндуй, цӕмӕй нӕ сувӕллӕнттӕ ӕма Библи ке хӕццӕ ахур кӕнӕн, уонӕн се ’ууӕндундзийнадӕ ирӕза ӕма донаргъуд райсонцӕ!

14. Иннетӕн донаргъуд тухӕй цӕмӕннӕ есун кӕнӕн?

 ¹⁴ Ке зӕгъун ӕй гъӕуй, уӕхӕн барӕ некӕмӕн ес, цӕмӕй ӕ сувӕллонӕн кенӕ Библи ке хӕццӕ ахур кӕнуй, уомӕн тухӕй дӕр донаргъуд есун кӕна. Йеговӕ ӕхуӕдӕг дӕр тухӕ некӕмӕн кӕнуй (1 Иоан. 4:8). Мах бон син ӕй ӕрмӕстдӕр лӕдӕрун кӕнун, Хуцаумӕ хӕстӕг кӕнун ӕхсидзгӕ цӕмӕн ӕй, уой. Гъема рӕстдзийнадӕ адӕймаги зӕрдӕмӕ ку багъара, уӕд ӕхе бафӕнддзӕй Хуцауи уагӕвӕрдтӕмӕ гӕсгӕ цӕрун ӕма донаргъуд райсун (2 Кор. 5:14, 15).

15, 16. а) Адӕймаг донаргъуд цӕхуӕндӕр бӕлвурд кари гъӕуама райса? Ба ’й лӕдӕрун кӕнӕ. б) Кӕд адӕймаг раздӕр ӕндӕр дини донаргъуд райста, уӕддӕр ӕй нӕуӕгӕй райсун цӕмӕн гъӕуй?

¹⁵ Донаргъуд райсунмӕ адӕймаги цӕхуӕндӕр карӕмӕ исхъӕртун нӕ гъӕуй. Адӕн аллихузи ’нцӕ, ӕма еуӕй-еуетӕ рӕстдзийнади надбӕл иннетӕй тагъддӕр ӕрфедар унцӕ. Беретӕ донаргъуд ӕригонӕй райсунцӕ ӕма берӕ ӕнзти дӕргъи Йеговӕн еузӕрдонӕй фӕллӕггадӕ кӕнунцӕ. Иннетӕ ба рӕстдзийнадӕ зӕрӕрдӕмӕ базонунцӕ. Кӕбӕлдӕрти ба си 100 анземӕй дӕр фулдӕр фӕццӕуй!

¹⁶ Библи ка ахур кодта, еу уӕхӕн каргун силгоймаг ӕндӕр динти цалдӕр хатти донаргъуд райста. Ӕма уомӕ гӕсгӕ, ӕ хӕццӕ ка ахур кодта, еци хуӕри бафарста, нӕуӕгӕй ӕй донаргъуд есун ӕнӕмӕнгӕй гъӕуй ӕви нӕ, уобӕл. Еци хуӕрӕ ин ӕ фарстабӕл дзуапп бавдиста Библий. Ӕма ’й уӕд силгоймаг балӕдӕрдтӕй, еци къахдзӕф искӕнун ӕнӕмӕнгӕ гъуддаг ке ӕй, уой, ӕма минкъий фӕстӕдӕр донаргъуд райста, кӕд ибӕл 70 анземӕй фулдӕр цудӕй, уӕддӕр. Аци хабар нин цӕбӕл дзорӕг ӕй? Донаргъуд Йегови цӕсти нимад уодзӕй, ӕ фӕндон цӕй медӕги ӕй, уой адӕймаг бӕлвурдӕй ку зона, уӕд. Мадта кӕд ӕндӕр дини донаргъуд адтан, уӕддӕр гъӕуама нӕуӕгӕй донаргъуд райсӕн, куд Йегови Ӕвдесӕнтӕ, уотӕ. (Бакӕсӕ Гъуддӕгтӕ 19:3–5.)

17. Адӕймаг ӕ донаргъуди бон цӕбӕл гъӕуама расагъӕс кӕна?

¹⁷ Донаргъуди бон устур цийни бон ӕй. Фал ма еци бон адӕймаг гъӕуама лӕмбунӕг расагъӕс кӕна, ӕхе Йеговӕн иснивонд кӕнун ӕма донаргъуд райсун цӕбӕл дзорӕг ӕй, уобӕл. Хуцауӕн ци дзурд равардтай, уомӕ гӕсгӕ цӕрун ӕнцон нӕ уодзӕй. Киристей фӕдбӕлдзӕугутӕ гъӕуама «сӕхецӕн мабал цӕронцӕ, фал уони туххӕй ка рамардӕй ӕма ка райгас ӕй, уомӕн» (2 Кор. 5:15; Матф. 16:24).

18. Иннӕ статьяй цӕмӕ ӕркӕсдзиан?

¹⁸ Куд ӕй фӕууидтан, уотемӕй донаргъуд райсай ӕви нӕ, уой ниллух кӕнун хумӕтӕг гъуддаг нӕй. Марийи мади дӕр уой туххӕй тухсун кодтонцӕ, райдайӕни ке ранимадтан, еци фарстатӕ. Кӕд ду дӕр ниййерӕг дӕ, уӕд дӕхе бафӕрсӕ: «Мӕ сувӕллон ӕцӕгӕйдӕр цӕттӕ ӕй донаргъуд райсунмӕ? Йегови хуарз зонуй, цӕмӕй ин ӕхе иснивонд кӕна? Донаргъуд райсуни разӕй ин хуӕздӕр нӕ уайдӕ ахур фӕуун ӕма хуарз куст иссерун? Донаргъуди фӕсте ести уӕззау тӕрегъӕд ку искӕна, уӕдта?» Аци фарстатӕбӕл дзурд цӕудзӕй иннӕ статьяй, ӕма базондзиан, киристон ниййергути бон куд ӕй донаргъудмӕ раст цӕстӕй кӕсун.