1. Зунд амонуни туххӕй Библий ци финст ес?

ЗУНД байамонун ин гъӕуй, зӕгъгӕ, ку фегъосай, уӕд цӕбӕл расагъӕс кӕндзӕнӕ? Библи куд зӕгъуй, уомӕ гӕсгӕ зундамундмӕ игъосун хуарз ӕй. Арӕх си еци дзурд баст фӕууй курухон зунд, уарзондзийнадӕ ӕма царди хӕццӕ (Ӕмб. 1:2–7; 4:11–13). Цӕмӕн? Уомӕн ӕма нин Хуцау зунд ку фӕййамонуй, уӕд е уобӕл дзорӕг фӕууй, ӕма нӕ уарзуй, удта нин ӕ зӕрдӕ ӕносон цард зӕгъуй (Дзиуит. 12:6). Зунд амонгӕй еуӕй-еухатт ӕфхуӕргӕ дӕр бакӕнуй, фал е пайдайӕй ӕндӕр зиан некӕд ӕрхӕссуй. Дзурдбаст «зунд амонун» фиццагидӕр нисан кӕнуй еске ахур кӕнун кенӕ ’й раст надбӕл аразун, зӕгъӕн, ниййерӕг ӕ сувӕллонӕн зунд куд фӕййамонуй, уотӕ.

2, 3. Зундамундмӕ ци хауй? (Кӕсӕ хузӕмӕ статьяй райдайӕни.)

² Дӕ цӕститӕбӕл рауайун кӕнӕ: минкъий биццеу, Джон, зӕгъгӕ, хӕдзари медӕг къозойӕй гъазуй. Ӕ мадӕ ӕй ӕрлӕуун кодта ӕма ин зӕгъуй: «Ӕз дин уотӕ нӕ загътон, хӕдзари си ма гъазӕ! Нуртӕккӕ ести басӕтдзӕнӕ». Фал биццеу ӕ мадӕмӕ нӕ байгъуста, ӕма еу афони  ӕ къозо вазӕбӕл исуадӕй ӕма вазӕ листӕг пурхӕ фӕцӕй. Цума мадӕ ци кӕндзӕй? Ӕвӕдзи, ӕ биццеуи хӕццӕ лӕмбунӕг радзордзӕй ӕма ин балӕдӕрун кӕндзӕй ӕхе лӕгъуз ке бадардта. Уомӕй уӕлдай ма ин балӕдӕрун кӕндзӕй, ниййергутӕмӕ игъосун цӕмӕн гъӕуй, удта ин цидӕр кӕнун ке нӕ фӕууадзунцӕ, е дӕр естӕй туххӕй ке фӕууй. Ӕма цӕмӕй ӕ фуд балӕдӕра, уой туххӕй бал ин ӕ къозо байсдзӕй. Ке зӕгъун ӕй гъӕуй, е Джонийӕн ӕхцӕуӕн нӕ уодзӕй, фал ӕй балӕдӕрдзӕй, ӕгоммӕгӕсдзийнадӕн фӕстеугутӕ ке фӕууй.

³ Киристӕнттӕ ке ан, уомӕ гӕсгӕ Хуцауи бийнонтӕмӕ хауӕн (1 Тим. 3:15). Мадта нӕ уӕларвон Фидӕ Йеговӕн ес уӕхӕн барӕ, цӕмӕй нин, раст ци ӕй ӕма ци нӕй, уой амона, кӕми фӕррӕдуйӕн, уоми ба нӕ фӕлмӕнӕй бараст кӕна. Нӕ рӕдудтитӕ нӕ цӕмӕ ӕркӕнунцӕ, уой уингӕй ба хуӕздӕр лӕдӕрдзиан, нӕ уӕларвон Фидӕмӕ игъосун куд ӕхсидзгӕ ’й, уой (Гал. 6:7). Хуцау нӕ берӕ уарзуй ӕма ’й нӕ фӕндуй, цӕмӕй гъезӕмарӕ кӕнӕн (1 Пет. 5:6, 7).

4. а) Йеговӕ цӕхуӕн зундамундӕн арфӕ кӕнуй? б) Аци статьяй дзурд цӕбӕл цӕудзӕй?

⁴ Библий уагӕвӕрдтӕбӕл арӕзт зундамунд сувӕллонӕн кенӕ, Библи ка ахур кӕнуй, уомӕн банхус кӕндзӕй, цӕмӕй Киристей фӕдбӕлдзӕуӕг исуа. Библий фӕрци нӕ бон ӕй, нӕ ахуркӕнуйнӕгти «раст зундбӕл аразун» ӕма син ӕнхус кӕнун, цӕмӕй, Киристе ци байамудта, уой лӕдӕронцӕ ӕма нин «цидӕриддӕр бафӕдзахста, уой ӕнхӕст кӕнонцӕ» (2 Тим. 3:16; Матф. 28:19, 20). Еци гъуддагӕн Йеговӕ арфӕ кӕнуй, уомӕн ӕма уой фӕрци, Библи ка ахур кӕнуй, уони бон дӕр ӕй ахуркӕнуйнӕгтӕ цӕттӕ кӕнун. (Бакӕсӕ Титмӕ 2:11–14.) Гъӕйдӕ мадта равзарӕн ӕртӕ ӕхсидзгӕ фарстай: 1) Хуцау зунд ку фӕййамонуй, уӕд е ӕ уарзондзийнадӕбӕл дзорӕг цӕмӕн фӕууй? 2) Хуцау ке бараст кӕнидӕ, уони хабӕрттӕ нӕ цӕбӕл ахур кӕнунцӕ? 3) Иннетӕн зунд ку фӕййамонӕн, уӕд нӕ бон куд ӕй Йеговӕ ӕма Йесой хузӕн архайун?

5. Хуцау зунд ку фӕййамонуй, уӕд е ӕ уарзондзийнадӕбӕл дзорӕг цӕмӕн фӕууй?

⁵ Йеговӕ нӕ берӕ уарзуй, ӕма нин зунд дӕр уомӕн фӕййамонуй. Удта нӕ ахур кӕнуй ӕма нӕ раст надбӕл аразуй. Уотӕ ’й фӕндуй, цӕмӕй имӕ хӕстӕг кӕнӕн, ӕма ӕносон цардмӕ ка кӕнуй, еци надбӕл цӕуӕн (1 Иоан. 4:16). Йеговӕ ӕ лӕггадгӕнгутӕн ӕфхуӕрӕн дзурдтӕ некӕд фӕккӕнуй ӕма сӕ ӕгадӕ бунати некӕд февӕруй, фал син  фиццагидӕр сӕ хуарз менеугутӕ уинуй ӕма син ци сӕребарӕдзийнадӕ ес, уомӕн аргъ кӕнуй (Ӕмб. 12:18). Лӕдӕрис ӕй, Йеговӕ нӕ Библи ӕма нӕ литератури фӕрци, удта нӕ ниййергути ӕма хестӕр нӕлгоймӕгти фӕрци ку бараст кӕнуй, уӕд е ӕ уарзондзийнадӕбӕл дзорӕг ке фӕууй. Еуӕй-еухатт рӕдуд къахдзӕф ку искӕнӕн, ӕма нӕ хестӕр нӕлгоймӕгтӕ фӕлмӕнӕй ку бараст кӕнунцӕ, уӕд уомӕй Йегови хузӕн уарзондзийнадӕ февдесунцӕ (Гал. 6:1).

6. Ӕмбурди еске ӕ ихӕстӕй ку исесунцӕ, кенӕ ’й ӕмбурдӕй ку рацох кӕнунцӕ, уӕд е дӕр Хуцауи уарзондзийнадӕбӕл дзорӕг цӕмӕн фӕууй?

⁶ Зунд байамонунмӕ айдагъ унаффӕ раттун нӕ хауй. Киристон уӕззау тӕрегъӕд ку искӕна, уӕд ӕй ӕмбурди ӕ ихӕстӕй исесдзӕнцӕ. Фал е дӕр Йегови уарзондзийнадӕбӕл дзорӕг ӕй. Уотемӕй адӕймаг балӕдӕрдзӕй Библи ӕртасунмӕ, арф сагъӕс кӕнунмӕ ӕма ковунмӕ рӕстӕг хецӕн кӕнун куд ӕхсидзгӕ ӕй, уой. Ӕма ин е банхус кӕндзӕй, цӕмӕй рӕстдзийнади надбӕл нӕуӕгӕй ӕрфедар уа (Пс. 19:7). Рӕстӕг ку рацӕуа, уӕд ин, ка ’й зонуй, ӕмбурди нӕуӕг ихӕстӕ дӕр ратдзӕнцӕ. Сауӕнгӕ ма адӕймаги ӕмбурдӕй ку рацох кӕнунцӕ, уӕд, е дӕр Хуцауи уарзондзийнадӕбӕл дзорӕг фӕууй, уомӕн ӕма уотемӕй Йеговӕ е ’мбурд гъӕуай кӕнуй, зиан ин ка ’рхӕсдзӕй, еци зундахастӕй (1 Кор. 5:6, 7, 11). Ӕмбурдӕй ке рацох кодтонцӕ, уомӕн е ӕхецӕн дӕр пайда ӕй, уомӕн ӕма уотемӕй балӕдӕрдзӕй, цӕхуӕн тӕрегъӕд искодта, уой, ӕма, ка ’й зонуй, фӕстӕмӕ дӕр раздӕхдзӕй (Гъуд. 3:19).

7. Севнӕ ка адтӕй ӕма имӕ цӕхуӕн лӕгъуз менеуӕг фӕззиндтӕй?

⁷ Зундамунд куд ӕхсидзгӕ ӕй, уой цӕмӕй балӕдӕрӕн, уой туххӕй ӕркӕсӕн, Йеговӕ ке бараст кодта, дууӕ уӕхӕн адӕймаги хабармӕ. Сӕ еу адтӕй  Севнӕ. Е цардӕй паддзах Езекий рӕстӕги. Иннӕ ба ӕй, мах рӕстӕги ка цӕруй, уӕхӕн ӕнсувӕр, Грэм, зӕгъгӕ. Севнӕ адтӕй «паддзахи хӕдзари унаффӕгӕнӕг» ӕма ин адтӕй устур бартӕ (Ис. 22:15). Фал гъигагӕн Севнӕ ӕ сӕр бӕрзӕндти хӕссун райдӕдта ӕма ӕй уотӕ фӕндадтӕй, цӕмӕй ин кадӕ кодтайуонцӕ. Ӕхецӕн ма гъӕздуг дзӕппазӕ дӕр искӕнун кодта, удта «кадгин бӕхуӕрдунтӕбӕл» зилдӕй (Ис. 22:16–18).

8. Йеговӕ Севни куд бараст кодта, ӕма Севнӕ ӕхе куд бадардта?

⁸ Севнӕ ӕхецӕн кадӕ ке агурдта, уомӕ гӕсгӕ ин Хуцау ӕ бунат Елиакимӕн равардта (Ис. 22:19–21). Еци хабар ӕрцудӕй, Ассирий паддзах Сеннахирим Йерусалим байахӕссунвӕндӕ ку кодта, уӕд. Фӕстӕдӕр сӕмӕ Сеннахирим ӕ минӕвӕртти къуар, удта устур ӕфсад рарвиста, цӕмӕй дзиуиттӕгти фӕттӕрсун кодтайдӕ, ӕма Езеки ӕхе ассирийӕгти къохмӕ равардтайдӕ (2 Пад. 18:17–25). Минӕвӕртти хӕццӕ радзорунмӕ рарвистонцӕ Елиакими, ӕ хӕццӕ ба ма дууӕ адӕймаги. Сӕ еу адтӕй Севнӕ. Еци рӕстӕг секретарӕй лӕггадӕ кодта. Уомӕй бӕрӕг ӕй, Севнӕ ӕ зӕрди маст ке нӕ дардта, фал сӕрниллӕгӕй ниллӕгдӕр бунатбӕл исарази ӕй. Ӕркӕсӕн, Севни хабарӕй цӕхуӕн ӕртӕ гъуддагебӕл ахур кӕнӕн, уомӕ.

9–11. а) Севни хабарӕй цӕбӕл ахур кӕнӕн? б) Йеговӕ Севни куд бараст кодта, уой туххӕй ци гъуди кӕнис?

⁹ Фиццаг: Севни ӕ бунатӕй ке исистонцӕ, е хуарз ӕвдесуй, аци дзурдтӕ раст ке ’нцӕ: «Адӕймаг сӕрбӕрзонд ку исуй, уӕд ӕрцӕуй е ’сӕфт» (Ӕмб. 16:18). Ка ’й зонуй, дӕуӕн дӕр ӕмбурди цӕхуӕндӕр кадгин ихӕстӕ ес ӕма дӕ хуӕртӕ ӕма ӕнсувӕртӕ нимайунцӕ. Кӕд уотӕ ’й, уӕд архайис, цӕмӕй идарддӕр дӕр сӕрниллӕг уай? Цӕмӕдӕр хуарз ке арӕхсис ӕма дин цидӕр хуарз ке ӕнтӕсуй, е дин Йегови фӕрци ке ӕй, уой нӕ иронх кӕнис? (1 Кор. 4:7). Апостол Павел киристӕнтти фӕдзахста: «Алкӕмӕндӕр [уи] дзорун: ци айтӕ, уӕхецӕй уомӕй фулдӕр ӕнгъӕл ма уотӕ, фал уи алкедӕр сагъӕс кӕнӕд... цӕмӕй лӕдӕргӕ уайтӕ» (Ром. 12:3).

¹⁰ Дуккаг: Йеговӕ Севни ке бараст кодта, е уобӕл дзорӕг ӕй, ӕма ибӕл Йеговӕ ӕ къох нӕ ракъуӕрдта, уӕддӕр си неци рауайдзӕй, зӕгъгӕ (Ӕмб. 3:11, 12). Ӕмбурди ӕ кадгин ихӕстӕ ка фесафта, уонӕн Севни хабар хуарз цӕветтон ӕй. Мӕстгун кӕнуни бӕсти гъӕуама идарддӕр дӕр Йегови гъуддаги нӕ бон цидӕриддӕр ӕй, уой кӕнӕн ӕма ин ӕ зундамунд ӕ уарзондзийнадӕбӕл нимайӕн. Сӕрниллӕг ку уӕн, уӕд ни Йеговӕ уотӕ некӕд расагъӕс кӕндзӕй, амӕй неци рауайдзӕй, зӕгъгӕ. (Бакӕсӕ 1 Петури 5:6, 7.) Йегови къохти фӕлмӕн ӕргъи хузӕн, гъома сӕрниллӕг ку уӕн, уӕд нин ӕ зундамундтӕ пайда хӕсдзӕнцӕ.

¹¹ Ӕртиккаг: Йеговӕ Севни куд бараст кодта, уомӕй хуарз цӕветтон ниууагъта ниййергутӕн ӕма ӕмбурди цӕстӕдаргутӕн. Йеговӕ тӕрегъӕдӕй е ’сӕфт уинуй, фал тӕрегъӕд ка искӕнуй, еци адӕймагбӕл ба батухсуй. Е адӕймагмӕ хуарзӕй ци ес, уой уинуй. Кӕд ниййерӕг кенӕ хестӕр нӕлгоймаг дӕ ӕма дӕ еске бараст кӕнун гъӕуй, уӕд Йегови фӕнздзӕнӕ? (Иуд. 22, 23).

12–14. а) Еуӕй-еуетӕ Йегови зундамундмӕ цӕхуӕн цӕстӕй ракӕсунцӕ? б) Еу ӕнсувӕр Хуцауи Дзурди фӕрци ӕ зундахаст куд раййивта, ӕма ин е цӕхуӕн арфӕдзийнӕдтӕ ӕрхаста?

 ¹² Гъигагӕн, еуӕй-еуетӕн, ке сӕ бараст кодтонцӕ, е гъе уотӕ зин фӕууй, ӕма Хуцауӕй, удта ӕмбурдӕй раидард унцӕ (Дзиуит. 3:12, 13). Цума е уобӕл дзорӕг ӕй, ӕма син нецӕмӕйбал ес банхус кӕнӕн? Нӕъ. Ӕркӕсӕн, ӕмбурдӕй ке рацох кодтонцӕ, еци ӕнсувӕр Грэми хабармӕ. Рӕстӕг рацудӕй, ӕма Грэм нӕуӕгӕй Йегови Ӕвдесӕн иссӕй, фал фӕстӕдӕр ба ӕмбурдтӕ ниууагъта, удта игъосун кӕнунмӕ дӕр нӕбал цудӕй. Цалдӕр анзей фӕсте Грэм еу хестӕр нӕлгоймагӕн загъта, цӕмӕй ӕ хӕццӕ Библи ахур кӕнун райдӕдтайдӕ. Еци хестӕр нӕлгоймаг раздӕр дӕр архайдта, цӕмӕй ӕ хӕццӕ балимӕн адтайдӕ.

¹³ Еци хестӕр нӕлгоймаг зӕгъуй: «Грэми хъор кодта ӕ сӕрбӕрзонддзийнадӕ. Ӕмбурдӕй ӕй ке рацох кодтонцӕ, уой туххӕй хестӕр нӕлгоймӕгти кой кодта, уомӕн ӕма имӕ сӕ унаффӕ раст нӕ кастӕй. Уомӕ гӕсгӕ цалдӕр хатти Библий ахури радзурдтан, сӕрбӕрзонддзийнадӕ ци ӕй ӕма цӕмӕ ӕркӕнуй, уой туххӕй. Грэм Хуцауи Дзурди фӕрци ӕхемӕ еуварсӕй ӕркастӕй ӕма ци фӕууидта, е ӕ зӕрдӕмӕ хъӕбӕр нӕ фӕццудӕй. Ба ’й лӕдӕрдтӕй, „гъӕдӕ“ ӕхе цӕсти ке адтӕй, гъома ’й ӕ сӕрбӕрзонддзийнадӕ ке нихъхъӕрӕу кодта, удта ӕнсувӕрти нихмӕ ке дзурдта, уомӕй дӕр ӕхуӕдӕг раст ке н’ адтӕй, ӕма еци фӕдӕй ӕхебӕл архайун райдӕдта. Ӕмбурдтӕ нӕбал цох кодта, Хуцауи Дзурд лӕмбунӕг ӕртасун райдӕдта ӕма алли бон дӕр Йеговӕмӕ кувта. Уомӕй уӕлдай ма, ӕ бийнойнаги ӕма ӕ сувӕллӕнтти цийнӕн, бийнонти ахур уадзун дӕр райдӕдта» (Лук. 6:41, 42; Иак. 1:23–25).

¹⁴ Идарддӕр еци хестӕр нӕлгоймаг зӕгъуй: «Еухатт мин Грэм ци загъта, уой хуарз нигъгъуди кодтон. Ӕз, дан, рӕстдзийнадӕ рагӕй зонун, пионерӕй дӕр ма дан лӕггадӕ кӕнун. Фал, дан, ӕрмӕстдӕр гъе нур ӕй мӕ бон зӕгъун, Йегови ӕцӕгӕйдӕр ке уарзун. Берӕ рӕстӕг нӕ рацудӕй, ӕма Грэмӕн баихӕс кодтонцӕ ӕмбурди микрофон хӕссун, ӕма еци ихӕслӕвӕрдӕн устур аргъ кӕнуй. Грэми хабар мӕнӕн дӕр уобӕл дзорӕг ӕй, ӕма адӕймаг ӕхе Хуцауи рази ку ӕрниллӕг кӕна, ӕма зундамундмӕ ку байгъоса, уӕд берӕ арфӕдзийнӕдтӕй ке исхайгин уодзӕй».

15. Цӕмӕй нин адӕймаг нӕ унаффӕмӕ байгъоса, уой туххӕй нӕхе ци кӕнун гъӕуй?

¹⁵ Цӕмӕй ди хуарз ахургӕнӕг рауайа, уой туххӕй гъӕуама дӕхуӕдӕг дӕр хуарз ахуркӕнуйнаг уай (1 Тим. 4:15, 16). Мадта Йеговӕ зунд амонуни барӕ кӕмӕн равардта, етӕ фиццагидӕр гъӕуама сӕхуӕдтӕ игъосонцӕ ӕ разамундмӕ. Хуӕртӕ ӕма ӕнсувӕртӕ уой ку уинонцӕ, уӕд дӕ нимайдзӕнцӕ ӕма син ӕнцондӕр уодзӕй дӕ унаффӕмӕ байгъосун. Ӕркӕсӕн Киристей цӕветтонмӕ.

16. Киристе иннети куд ахур кодта ӕма син зунд куд амудта, уомӕй цӕбӕл ахур кӕнӕн?

¹⁶ Йесо Киристе алкӕддӕр ӕ Фидӕмӕ игъуста, ӕнцон ку н’ адтӕй, уӕддӕр (Матф. 26:39). Ӕ игъосгутӕн алкӕддӕр зӕгъидӕ, ӕ зунд ӕма ӕ ахурӕдтӕ Хуцауӕй ке адтӕнцӕ (Иоан. 5:19, 30).  Йесо алкӕддӕр кодта Хуцау ин ци дзурдта, уой, ӕма уомӕ гӕсгӕ адтӕй хуарз ахургӕнӕг ӕма имӕ хуарззӕрдӕ адӕн цудӕнцӕ. (Бакӕсӕ Лукай 4:22.) Лӕмӕгъ ӕма зӕрдӕсаст адӕймаги фӕлмӕн дзурдӕй бафедар кӕнидӕ (Матф. 12:20). Ӕ апостолти дӕр фӕлмӕнӕй бараст кӕнидӕ, сауӕнгӕ ма си ка уӕлдӕр ӕй, уой туххӕй ку буцӕу кодтонцӕ, уӕддӕр (Мар. 9:33–37; Лук. 22:24–27).

17. Хестӕр нӕлгоймӕгтӕ Хуцауи дзогӕн хуарз фиййӕуттӕ цӕхуӕн менеугути фӕрци уодзӕнцӕ?

¹⁷ Хестӕр нӕлгоймӕгтӕ, бараст кӕнун ке гъӕуй, уомӕн Библийӕй унаффӕ ку дӕттонцӕ, уӕд гъӕуама Киристей фӕнзонцӕ. Уотемӕй бавдесдзӕнцӕ, Хуцауи ӕма Киристей разамундмӕ гӕсгӕ архайун сӕ ке фӕндуй. Апостол Петур финста: «Хуцауи дзогӕ, уӕ барӕ уин ке бакодтонцӕ, еци дзогӕ, хезетӕ тухӕй кӕнӕгау нӕ, фал ӕнӕзийнадӕй, уӕхецӕн си ести испайда кӕнуни туххӕй нӕ, фал зӕрдиагӕй. Хуцауи бунтӕн уӕхе хецау ма кӕнтӕ, фал дзогӕн фӕнзуйнаг уотӕ» (1 Пет. 5:2–4). Хестӕр нӕлгоймӕгтӕ Хуцауи ӕма Киристей разамундмӕ гӕсгӕ ку архайонцӕ, уӕд е сӕхецӕн дӕр пайда ӕрхӕсдзӕй ӕма, сӕ цӕстӕ кӕмӕ дарунцӕ, уонӕн дӕр (Ис. 32:1, 2, 17, 18).

18. а) Йеговӕ ниййергутӕн ци баихӕс кодта? б) Йеговӕ ниййергутӕн куд ӕнхус кӕнуй сӕ ихӕстӕ ӕнхӕст кӕнун?

¹⁸ Бийнонти туххӕй ба ци ес зӕгъӕн? Йеговӕ бийнонти хестӕртӕн зӕгъуй: «Уӕ сувӕллӕнтти ма мӕстгун кӕнтӕ, фал сӕ гъомбӕл кӕнтӕ, Йеговӕ куд амонуй, уотӕ, ӕма сӕ ӕ зундбӕл аразетӕ» (Еф. 6:4). Цума сувӕллони раст зундбӕл аразун цӕйбӕрцӕбӕл ӕхсидзгӕ гъуддаг ӕй? Ӕмбесӕндти 19:18 финст ӕй: «Дӕ фурти бафхуӕрисӕ, цалинмӕ нӕ байрӕгӕмӕ ’й, уӕдмӕ. Ӕ мӕлӕтмӕ ин ма бабӕллӕ». Сувӕллони гъомбӕл кӕнуни ихӕс Йеговӕ ниййергутӕбӕл исӕвардта. Ӕма сӕ ихӕс ку нӕ ӕнхӕст кӕнонцӕ, уӕд дзуапп Хуцауи рази дӕтдзӕнцӕ! (1 Сам. 3:12–14). Уой туххӕй син Йеговӕ фагӕ зунд ӕма хъауритӕ ратдзӕй, сӕрниллӕгӕй си ку коронцӕ, удта ин ӕ Дзурд ӕма ӕ сугъдӕг хъаури разамундӕй ку архайонцӕ, уӕд. (Бакӕсӕ Иакови 1:5.)

19, 20. а) Хуцауи зундамундтӕмӕ ку игъосӕн, уӕд нин е цӕхуӕн пайда ӕрхӕсдзӕй? б) Иннӕ статьяй цӕмӕ ӕркӕсдзиан?

¹⁹ Йегови зундамундмӕ ку игъосӕн, удта еске бараст кӕнун ку гъӕуа, уӕд Йеговӕ ӕма Киристей хузӕн ку архайӕн, уӕд берӕ арфӕдзийнӕдтӕй исхайгин уодзиан. Нӕ бийнонти астӕу ӕма ӕмбурди уодзӕй фарнӕ, уарзондзийнадӕ ӕма ӕдасдзийнадӕ (Пс. 72:7). Йегови зундамундтӕ нӕ цӕттӕ кӕнунцӕ, кӕрӕдзей хӕццӕ фӕрнӕй ӕма еу бийнонти хузӕн кӕми цӕрдзиан, еци цардмӕ – нӕ уӕларвон Фидӕ Йеговӕ ке ӕрцӕттӕ кодта, еци цардмӕ. (Бакӕсӕ Исай 11:9.) Уой ку некӕд иронх кӕнӕн, уӕд Хуцауи зундамундтӕмӕ раст цӕстӕй кӕсдзиан ӕма нин алкӕддӕр ӕ уарзондзийнадӕбӕл дзорӕг уодзӕнцӕ.

²⁰ Иннӕ статьяй никки фулдӕр базондзиан, бийнонти медӕг дӕр ӕма ӕмбурди дӕр зундамундмӕ ци хауй, уой, удта хебӕл хуӕцун нӕ бон куд ӕй, уой туххӕй дӕр. Уомӕй уӕлдай ма базондзиан, цийфӕнди карз зундамундӕй дӕр фулдӕр маст ци ӕрхӕссуй, уой.