1. Киристон ниййергути ци фӕффӕндуй базонун, цалинмӕ сӕ сувӕллон донаргъуд нӕма райста, уӕдмӕ?

ЕУ ХУӔРӔ, Блоссом Брандт, радзурдта, донаргъуд куд иста, еци хабар: «Мӕ мадӕ ма мӕ фидӕн цалдӕр мӕйи фӕдздзурдтон, донаргъуд райсун мӕ ке фӕндуй. Етӕ дӕр мӕ хӕццӕ уой туххӕй арӕх дзурдтонцӕ. Цӕхуӕн ӕхсидзгӕ къахдзӕф кӕнун, уой лӕдӕрун ӕви нӕ, уой базонун сӕ фӕндадтӕй. Гъема 1934 анзи 31 декабри кӕддӕр-некӕддӕр донаргъуд райстон». Абони дӕр ниййергути фӕндуй сӕ сувӕллӕнттӕн банхус кӕнун раст унаффитӕ хӕссун. Етӕ ’й лӕдӕрунцӕ, сӕ сувӕллони донаргъуд райсун ку фӕндӕуа, етӕ ба ин уотӕ ку дзоронцӕ, раги ма дин ӕй, зӕгъгӕ, уӕд рӕстдзийнади надбӕл ӕрлӕмӕгъ уодзӕй (Иак. 4:17). Фал цалинмӕ сувӕллон донаргъуд нӕма райста, уӕдмӕти ниййергути фӕффӕндуй базонун, сӕ сувӕллон Киристей фӕдбӕл цӕунмӕ цӕттӕ ӕй ӕви нӕ, уой, ӕма е зундбӕл дзорӕг ӕй.

2. а) Еуӕй-еу районон цӕстӕдаргутӕ ци балӕдӕрдтӕнцӕ? б) Аци статьяй цӕмӕ ӕркӕсдзиан?

 ² Еуӕй-еу районон цӕстӕдаргутӕ куд зӕгъунцӕ, уомӕ гӕсгӕ, 20 анзей уӕнгӕ кӕбӕл цӕуй, еци ӕригӕнттӕй беретӕ донаргъуд райсунмӕ тагъд нӕ кӕнунцӕ, кӕд рӕстдзийнади исгъомбӕл ӕнцӕ, уӕддӕр. Еци ӕригӕнттӕй сӕ фулдӕр ӕмбурдтӕмӕ дӕр цӕунцӕ, игъосун кӕнуни гъуддаги дӕр архайунцӕ, удта сӕхе Йегови Ӕвдесӕнтӕбӕл фӕннимайунцӕ, фал цӕмӕдӕр гӕсгӕ ба сӕ цард Йеговӕн нӕ нивонд кӕнунцӕ ӕма донаргъуд нӕ есунцӕ. Еуӕй-еухатт е фӕууй, сӕ ниййергути цӕсти цӕттӕ ке нӕма фӕуунцӕ, уой туххӕй. Аци статьяй ӕркӕсдзиан, ниййергутӕ сӕ сувӕллӕнтти донаргъуд райсунмӕ цӕмӕннӕ фӕрразӕнгард кӕнунцӕ, цуппар уӕхӕн гъуддагемӕ.

3. Блоссоми ниййергутӕ цӕбӕл тухстӕнцӕ?

³ Минкъий раздӕр ке кой кодтан, еци Блоссоми ниййергутӕ дӕр сагъӕс кодтонцӕ: «Цума нӕ кизгӕ еци кари ӕй, цӕмӕй ӕй лӕдӕра, донаргъуд цӕхуӕн ӕхсидзгӕ къахдзӕф ӕй, уой?» Ниййергути бон куд ӕй балӕдӕрун, сӕ сувӕллон ӕ цард Йеговӕн иснивонд кӕнунмӕ цӕттӕ ӕй ӕви нӕ, уой?

4. Матфеййи 28:19, 20 ци фӕдзӕхст ес, е ниййергутӕн куд банхус кӕндзӕй?

⁴ Бакӕсӕ Матфеййи 28:19, 20. Библий некӕми финст ес, адӕймаг донаргъуд цидӕр бӕлвурд кари ке гъӕуама райса. Фал хуарз ниййергутӕ лӕмбунӕг фӕссагъӕс кӕнунцӕ, ахуркӕнуйнӕгтӕ цӕттӕ кӕнунмӕ ци хауй, уобӕл. Матфеййи 28:19 дзурдбаст «цӕттӕ кӕнтӕ ахуркӕнуйнӕгтӕ» ци грекъаг дзурдӕй ратӕлмац кодтонцӕ, е амонуй, адӕймаги ахур кӕнгӕй нин бӕлвурд нисан ке гъӕуама уа, гъома ’й бацӕттӕ кӕнун, цӕмӕй Киристей фӕдбӕлдзӕуӕг исуа. Аци сӕри иннӕ стихтӕй бӕрӕг ӕй, Киристе цӕбӕл ахур кодта, уой ка лӕдӕруй ӕма имӕ игъосун ке фӕндуй, етӕ ке ’нцӕ ӕ фӕдбӕлдзӕугутӕ. Мадта ма сувӕллӕнттӕ минкъий ку фӕуунцӕ, уӕд ниййергутӕн сӕ нисан гъӕуама уа, сӕ сувӕллӕнттӕн ӕнхус кӕнун, цӕмӕй уой фӕсте сӕ цард Йеговӕн иснивонд кӕнонцӕ ӕма Киристей фӕдбӕлдзӕугутӕ исуонцӕ. Ке зӕгъун ӕй гъӕуй, минкъий сувӕллӕнттӕн сӕ бон донаргъуд райсун нӕй, уомӕн ӕма уойбӕрцӕ нӕма фӕллӕдӕрунцӕ. Фал Библи куд зӕгъуй, уомӕ гӕсгӕ сувӕллӕнтти бон дӕр ӕй рӕстдзийнадӕ уарзун ӕма ’й лӕдӕрун.

5, 6. а) Тимофей донаргъуд кӕд райста, уой туххӕй Библийӕй ци ес базонӕн? б) Лӕдӕргӕ ниййергутӕ сӕ сувӕллӕнттӕн рӕстдзийнади надбӕл размӕ цӕун куд ӕнхус кӕнунцӕ?

⁵ Тимофей ӕ цард Йегови гъуддагӕн раттун ку исфӕндӕ кодта, уӕд ма ӕригон адтӕй. Апостол Павел куд загъта, уомӕ гӕсгӕ Тимофей Хуцауи Дзурди рӕстдзийнадӕ ӕ «минкъийӕй фӕстӕмӕ» зудта. Ӕ фидӕ Йегови лӕггадгӕнӕг н’ адтӕй, фал ин ӕ мадӕ, удта нана банхус кодтонцӕ Хуцауи Дзурд бауарзун. Ӕма уой фӕрци Тимофеййӕн е ’ууӕндундзийнадӕ хъӕбӕр федар адтӕй (2 Тим. 1:5; 3:14, 15). 20 анзи дӕр ибӕл нӕма цудӕй, уотемӕй ин ӕмбурди ӕхсидзгӕ гъуддӕгтӕ баихӕс кодтонцӕ (Гъуд. 16:1–3).

⁶ Ке зӕгъун ӕй гъӕуй, сувӕллӕнттӕ аллихузи фӕуунцӕ ӕма цидӕртӕ лӕдӕрун еци еу кари нӕ райдайунцӕ.  Еуӕй-еуетӕ сувӕллӕнттӕ уогӕй дӕр рӕстдзийнадӕ фӕллӕдӕрунцӕ, сӕ бон фӕууй раст унаффитӕ хӕссун, удта сӕ донаргъуд райсун дӕр фӕффӕндуй. Иннетӕ ба, ка ’й зонуй, уонӕй хестӕр дӕр уонцӕ, фал донаргъуд райсунмӕ ба цӕттӕ нӕма фӕуунцӕ. Зундгин ниййергутӕ сӕ сувӕллонӕн тухӕй дӕр донаргъуд нӕ есун кӕндзӕнцӕ, фал ин ӕнхус кӕндзӕнцӕ, цӕмӕй ӕхуӕдӕг еци гъуддаги къахдзӕфтӕ кӕна. Ниййергутӕн устур ӕнхус уодзӕнцӕ Ӕмбесӕндти 27:11 финст дзурдтӕ. (Ба ’й кӕсӕ.) Фал сӕ нисан ци ӕй, уой гъӕуама ма иронх кӕнонцӕ – сувӕллонӕн ӕнхус кӕнун, цӕмӕй Киристей фӕдбӕлдзӕуӕг исуа. Гъӕуама расагъӕс кӕнонцӕ: «Мӕ сувӕллонмӕ фагӕ зонундзийнӕдтӕ ес, цӕмӕй Хуцауӕн нивонддзурд ратта ӕма донаргъуд райса?»

7. Донаргъуд райсун ке фӕндуй, уони ӕнӕмӕнгӕ гъӕуй Библи листӕг хабӕртти уӕнгӕ дӕр зонун? Ба ’й лӕдӕрун кӕнӕ.

⁷ Ниййергутӕ сӕ сувӕллӕнтти ку фӕййахур кӕнунцӕ, уӕд сӕ фӕффӕндуй, цӕмӕй рӕстдзийнадӕ хуарз лӕдӕронцӕ. Еци зонундзийнӕдти фӕрци сӕ уой фӕсте, гӕнӕн ес, ӕма бафӕндӕуа сӕ цард Хуцауӕн иснивонд кӕнун. Фал е уобӕл дзорӕг нӕй, ӕма донаргъуд райсуни размӕ, сувӕллон Библий еугур листӕг хабӕрттӕ дӕр гъӕуама зона. Киристей фӕдбӕлдзӕугутӕ ма донаргъуди фӕсте дӕр фӕййархайунцӕ фулдӕр базонунбӕл. (Бакӕсӕ Колоссӕгтӕмӕ 1:9, 10.) Мадта уӕд донаргъуд райсунмӕ цӕйбӕрцӕ зонундзийнӕдтӕ гъӕуй?

8, 9. Филиппти ахӕстдонгӕсбӕл цӕхуӕн хабар ӕрцудӕй ӕма еци хабарӕй мах цӕбӕл ахур кӕнӕн?

⁸ Мах рӕстӕги ниййергутӕн фӕнзуйнаг ӕнцӕ рагидзаманти ка цардӕй, еци бийнонтӕ (Гъуд. 16:25–33). Нӕ эри еу 50 анзи, Павел ӕ дуккаг балций адтӕй горӕт Филиппти. Уоми ин ӕхе, удта е ’мбал Сили ӕнӕфудӕй бафхуардтонцӕ ӕма сӕ ахӕстдонӕмӕ багӕлстонцӕ. Еци ӕхсӕвӕ зӕнхӕ хъӕбӕр базмалдӕй ӕма ахӕстдони дуӕрттӕ еугурӕйдӕр фегон ӕнцӕ. Ахӕстдонгӕс ба уотӕ бангъӕл адтӕй, ӕма еугур ахӕститӕ дӕр ралигъдӕнцӕ ӕма ӕхе марунмӕ гъавта. Фал ӕй Павел бауорӕдта. Фӕстӕдӕр Павел ӕма Силӕн фадуат фӕцӕй, еци ахӕстдонгӕсӕн ӕма ӕ бийнонтӕн хуарз хабар радзорун. Йесой туххӕй ци базудтонцӕ, е сӕ зӕрдӕмӕ багъардта ӕма еци фӕдбӕл донаргъуд райстонцӕ. Аци хабарӕй цӕбӕл ахур кӕнӕн?

⁹ Еци ахӕстдонгӕс раздӕр, ӕвӕдзи, ромаг ӕфсӕддон адтӕй ӕма Финстади хӕццӕ зонгӕ н’ адтӕй. Мадта цӕмӕй киристон иссайдӕ, уой туххӕй гъӕуама базудтайдӕ Библий сӕйраг ахурӕдтӕ, удта гъӕуама балӕдӕрдтайдӕ, Йеговӕ ӕ лӕггадгӕнгутӕмӕ цӕмӕ ӕнгъӕлмӕ кӕсуй, уой ӕма ’й бафӕндадтайдӕ Киристей фӕдзӕхститӕ ӕнхӕст кӕнун. Берӕ нӕ рацудӕй ӕма ’й еци зонундзийнӕдтӕ баразӕнгард кодтонцӕ донаргъуд райсунмӕ. Дзурд дӕр ибӕл нӕййес, донаргъуди фӕсте дӕр ма фулдӕр базонунбӕл ке архайдта. Мадта дин дӕ сувӕллон ку зӕгъа, Йегови ке уарзуй ӕма ’й ӕхе Хуцауӕн иснивонд кӕнун, удта донаргъуд райсун ке фӕндуй, уӕд куд бакӕндзӕнӕ? Дӕ бон ин  ӕй зӕгъун, цӕмӕй хестӕр нӕлгоймӕгтӕмӕ бацӕуа. Етӕ ӕ хӕццӕ радзубанди кӕндзӕнцӕ ӕма зӕгъдзӕнцӕ, донаргъуд райсунмӕ цӕттӕ ӕй ӕви нӕ, уой *. Иннӕ донаргъуд киристӕнтти хузӕн уомӕн дӕр Йегови туххӕй ӕ зонундзийнӕдтӕ алкӕддӕр фулдӕрӕй-фулдӕр кӕндзӕнцӕ, сауӕнгӕ ӕносмӕ дӕр (Ром. 11:33, 34).

10, 11. а) Еуӕй-еу ниййергутӕ куд фӕссагъӕс кӕнунцӕ? б) Сувӕллонӕн ӕцӕгӕйдӕр хуарз кӕд уодзӕй?

¹⁰ Еуӕй-еу ниййергути гъудимӕ гӕсгӕ бал хуӕздӕр адтайдӕ, цӕмӕй сувӕллон скъолай фӕсте естӕбӕл исахур кӕна ӕма хуарз куст иссера, уой фӕсте ба донаргъуд дӕр райса. Дзурд дӕр ибӕл нӕййес, алли ниййерӕг дӕр ӕ сувӕллони хуарздзийнадӕбӕл ке тухсуй. Фал цума уой фӕрци сувӕллон ӕцӕгӕйдӕр ӕнтӕстгун исуодзӕй? Уӕхӕн унаффӕ рахӕссун Библимӕ гӕсгӕ раст уодзӕй? Йеговӕ нӕ цӕмӕ разӕнгард кӕнуй? (Бакӕсӕ Екклесиаст 12:1.)

¹¹ Аци дуйне ӕма ӕ гъуддӕгтӕ Хуцауи фӕндони ӕма уагӕвӕрдти нихмӕ ке ’нцӕ, уой гъӕуама ма иронх кӕнӕн (Иак. 4:7, 8; 1 Иоан. 2:15–17; 5:19). Сувӕллонӕн Йегови хӕццӕ федар лимӕндзийнадӕ ку уа, уӕд ин Сайтанӕй, аци дуйнейӕй ӕма ӕ зундахастӕй тӕссаг нӕ уодзӕй. Ниййергутӕ фиццаг бунати ахур ӕма хуарз куст ку ӕвӕронцӕ, уӕд сувӕллон дӕр уотӕ сагъӕс кӕнун райдайдзӕй, цума аци дуйней гъуддӕгтӕ, Йегови рази син ци ном уодзӕй, уомӕй хестӕр ӕнцӕ. Е ба тӕссаг ӕй. Ниййергутӕ, ӕцӕгӕйдӕр уӕ фӕндуй, цӕмӕй уӕ сувӕллонӕн аци дуйне амона, куд цӕргӕ ин ӕй, уой? Ӕцӕг амондгун ӕма ӕнтӕстгун уодзӕнцӕ, сӕ царди фиццаг бунати Йегови ку ӕвӕронцӕ, ӕрмӕстдӕр уӕд. (Бакӕсӕ Псалом 1:2, 3.)

12. Еуӕй-еу ниййергути цӕмӕннӕ фӕффӕндуй, цӕмӕй сӕ сувӕллон донаргъуд райса?

¹² Еу хуӕри нӕ фӕндадтӕй, цӕмӕй ӕ кизгӕ донаргъуд райстайдӕ ӕма еци гъуддаг уотӕ балӕдӕрун кодта: «Раст зӕгъгӕй, ӕмбурдӕй ӕй ку рацох кӕнонцӕ,  уомӕй тарстӕн». Еци хуӕри хузӕн ма еуӕй-еу ниййергутӕмӕ дӕр хуӕздӕр фӕккӕсуй бахезун, цӕмӕй сувӕллон фӕуустурдӕр уа, ӕма ӕхе рӕдуд къахдзӕфтӕй гъӕуай кӕнун зона (Райд. 8:21; Ӕмб. 22:15). Уотӕ сӕмӕ фӕккӕсуй, ӕма донаргъуд ку нӕ уонцӕ, уӕд сӕ сӕ рӕдудбӕл дзуапп дӕттун нӕ гъӕудзӕй. Фал цума уотӕ сагъӕс кӕнун раст ӕй? (Иак. 1:22).

13. Адӕймаг донаргъуд ку нӕ уа, уӕд е уобӕл дзорӕг ӕй, ӕма ибӕл Йегови рази неци ихӕс ес? Ба ’й лӕдӕрун кӕнӕ.

¹³ Ке зӕгъун ӕй гъӕуй, ниййергути уотӕ нӕ фӕндуй, цӕмӕй сӕ сувӕллон цӕттӕ нӕ ’й, уотемӕй донаргъуд райса. Фал, цалинмӕ донаргъуд нӕ райста, уӕдмӕ ибӕл Йегови рази неци ихӕс ес, зӕгъгӕ, уотӕ сагъӕс кӕнун дӕр раст нӕй. Сувӕллон Хуцауи рази ихӕсгин исуй, Йегови цӕсти раст ци ӕй ӕма ци нӕй, уой ку базонуй, уӕд. (Бакӕсӕ Иакови 4:17.) Лӕдӕргӕ ниййергутӕ сӕ сувӕллони нифс нӕ сӕтдзӕнцӕ, донаргъуд райсун ӕй ку фӕндӕуа, уӕд. Сауӕнгӕ ма минкъий ку фӕууй, гъе уӕд ӕй райдайунцӕ ахур кӕнун, Йегови раст уагӕвӕрдтӕмӕ гӕсгӕ цӕрун (Лук. 6:40). Сувӕллон Йегови ку уарза, уӕд ӕхе уӕззау тӕрегъӕдтӕй гъӕуай кӕндзӕй, уомӕн ӕма ’й фӕнддзӕй, Йегови цӕсти раст куд ӕй, уотӕ архайун (Ис. 35:8).

14. Хестӕр нӕлгоймӕгти бон куд ӕй ниййергутӕн банхус кӕнун?

¹⁴ Хестӕр нӕлгоймӕгти бон дӕр ӕй ниййергутӕн банхус кӕнун ӕма сувӕллӕнтти разӕнгард кӕнун, цӕмӕй Хуцауи гъуддаги сӕ рази нисӕнттӕ ӕвӕронцӕ. Еу хуӕрӕ радзурдта, еу ӕхсӕз анзи ибӕл ку цудӕй, уӕд ӕнсувӕр Рассел ӕ хӕццӕ куд дзубанди кодта, уой. Еци хуӕрӕ загъта: «Мӕ хӕццӕ еу 15 минутти фӕдздзурдта, Хуцауи гъуддӕгти мин цӕхуӕн нисӕнттӕ ес, уобӕл». Цума еци дзубанди ӕ цардбӕл ескуд рабӕрӕг ӕй? Фӕстӕдӕр еци хуӕрӕ пионерӕй лӕггадӕ кӕнун  райдӕдта ӕма 70 анзи фӕллӕггадӕ кодта! Ӕцӕгӕйдӕр, сувӕллӕнтти Хуцауи гъуддаги архайунмӕ ку разӕнгард кӕнӕн, уӕд, ка ’й зонуй, уой фӕсте цӕрӕнбонти дӕр Хуцауӕн лӕггадӕ кӕндзӕнцӕ (Ӕмб. 25:11). Хестӕр нӕлгоймӕгтӕн ма сӕ бон ӕй, ӕмбурдтӕ кӕми фӕууадзӕн, еци бунати, ниййергутӕн дӕр ӕма сувӕллӕнттӕн дӕр ести куст баихӕс кӕнун.

15. Ӕмбурди хуӕртӕ ӕма ӕнсувӕрти бон куд ӕй ӕригӕнттӕн ӕнхус кӕнун?

¹⁵ Иннӕ хуӕртӕ ӕма ӕнсувӕрти бон ба куд ӕй ӕригӕнттӕн ӕнхус кӕнун? Сӕ бон ӕй ӕвдесун, сӕ зӕрдӕ син хуарз ке зӕгъуй, уой. Зӕгъӕн, сӕ бон ӕй лӕмбунӕг кӕсун, сувӕллон Йеговӕмӕ ке хӕстӕг кӕнуй, е цӕмӕй бӕрӕг фӕууй, уомӕ. Ӕмбурди дзуӕппитӕ фӕддӕттуй кенӕ ихӕслӕвӕрдтӕ фӕццӕттӕ кӕнуй? Скъолай игъосун кӕнуй, кенӕ ин лӕгъуз ести ку фӕккӕнун кӕнунцӕ, уӕд раст куд ӕй, уотӕ бакӕнуй? Кӕд гъо, уӕд ӕй зӕрдиагӕй растауисӕ! Нӕ бон ӕй уӕхӕн нисан исӕвӕрун, цӕмӕй ӕмбурди разӕй дӕр ӕма ӕмбурди фӕсте дӕр рӕстӕг иссерӕн ӕригӕнтти хӕццӕ радзубанди кӕнунмӕ. Уотӕ ку архайӕн, уӕд ӕй сувӕллӕнттӕ лӕдӕрдзӕнцӕ, етӕ дӕр Хуцауи «устур ӕмбурдмӕ» ке хаунцӕ, уой (Пс. 35:18).

16, 17. а) Сувӕллонӕн донаргъуд райсун ӕхсидзгӕ цӕмӕн ӕй? б) Ниййергутӕн тӕккӕ устурдӕр цийнӕ ци ӕрхӕсдзӕй? (Кӕсӕ хузӕмӕ статьяй райдайӕни.)

¹⁶ Хуцау ниййергутӕн сӕ барӕ ке бакодта, еци кадгин ихӕстӕй сӕ еу ӕй, сувӕллонӕн ӕнхус кӕнун, цӕмӕй Йегови бауарза (Еф. 6:4; Пс. 127:3). Рагидзаманти дзиуиттаг сувӕллӕнттӕ сӕ райгурцӕй дӕр Хуцауӕн нивондгонд адтӕнцӕ, фал абони ба уотӕ нӕбал ӕй. Ниййергутӕ Йегови ӕма рӕстдзийнадӕ ке уарзунцӕ, е уобӕл дзорӕг нӕй, ӕма сӕ сувӕллон дӕр уотӕ уодзӕй. Ниййергутӕн сӕ нисан гъӕуама уа, сувӕллонӕн ӕ райгурцӕй фӕстӕмӕ ӕнхус кӕнун, цӕмӕй е дӕр Киристей ахуркӕнуйнаг исуа, ӕхе Хуцауӕн иснивонд кӕна ӕма донаргъуд райса. Уомӕй ӕхсидзгӕдӕр неци ес! Сувӕллон ӕхе Хуцауӕн ку иснивонд кӕна, донаргъуд ку райса ӕма Йеговӕн еузӕрдонӕй ку лӕггадӕ кӕна, уӕд ӕ бон исуодзӕй устур бӕллӕхи сӕрти рахезун (Матф. 24:13).

¹⁷ Блоссом Брандт донаргъуд райсун ку исфӕндӕ кодта, уӕд ӕ ниййергути фӕндадтӕй балӕдӕрун, царди тӕккӕ ӕхсидзгӕдӕр къахдзӕф искӕнунмӕ цӕттӕ ӕй ӕви нӕ, уой. Ӕма, цӕттӕ ке ӕй, уой ку балӕдӕрдтӕнцӕ, уӕд ин банхус кодтонцӕ, цӕмӕй ӕ нисан ӕ къохи бафтудайдӕ. Блоссом радзурдта, донаргъуд ци бон гъӕуама райстайдӕ, уой размӕ еци изӕр ӕ фидӕ куд бакодта, уой туххӕй: «Загъта нин, цӕмӕй еугурӕйдӕр нӕ уӕргутӕбӕл ӕрлӕудтайанӕ, уой фӕсте ба Хуцаумӕ искувта. Йеговӕн загъта, хъӕбӕр амондгун ке ӕй, ӕ минкъий кизгӕ ин ӕхе иснивонд кӕнун ке исфӕндӕ кодта, уой туххӕй». Еци хабарбӕл 60 анземӕй фулдӕр ку рацудӕй, уӕд Блоссом загъта: «Цӕйбӕрцӕфӕнди мӕбӕл ма цӕуа, уӕддӕр еци изӕр некӕд байронх уодзӕн!» Ниййергутӕ, Хуцау уин уӕхӕн арфӕ ракӕнӕд, цӕмӕй сумах дӕр уӕхебӕл бавзарайтӕ, сувӕллон ӕхе Йеговӕн ку иснивонд кӕнуй ӕма донаргъуд ку райсуй, уӕд е ци устур цийнӕ ӕй, уой!