1. Фиццаг ӕноси киристӕнттӕ цӕхуӕн зиндзийнӕдтӕбӕл ӕмбалдӕнцӕ?

НӔ ЭРИ еу 62–64 ӕнзти апостол Петур финста «Понтмӕ, Галатимӕ, Каппадокимӕ, Азимӕ ӕма Вифинимӕ ка фӕллигъдӕй ӕма еци рауӕнти рӕстӕгмӕ ка цардӕй», уонӕмӕ (1 Пет. 1:1). Еци хуӕртӕ ӕма ӕнсувӕртӕ аллихузи рауӕнтӕй адтӕнцӕ. Етӕ «фӕлварӕнти арти» бахаудтӕнцӕ, гъома карз ӕфхуӕрд ӕййафтонцӕ ӕма сӕ гъудӕй бафедар кӕнун. Уомӕй уӕлдай ма хъӕбӕр уӕззау рӕстӕгути цардӕнцӕ. Петур финста: «Тагъд алцӕмӕндӕр ӕрцӕудзӕй кӕрон». Йерусалими исӕфтмӕ 10 анзи дӕр нӕбал байзадӕй. Цума еци зин рӕстӕгути киристӕнттӕн федар фӕллӕуунмӕ ци банхус кодтайдӕ? (1 Пет. 4:4, 7, 12).

2, 3. Петур ӕнсувӕрти иуазӕгуарзондзийнадӕмӕ цӕмӕн разӕнгард кодта? (Кӕсӕ хузӕмӕ статьяй райдайӕни.)

² Петур син ци унаффитӕ лӕвардта, уонӕй сӕ еу адтӕй, «уӕ кӕрӕдзей... баиуазӕг кӕнтӕ», зӕгъгӕ (1 Пет. 4:9). Дзурд «иуазӕгуарзон» ци грекъаг дзурдӕй ратӕлмац кодтонцӕ,  е комкоммӕ нисан кӕнуй «ӕнӕзонгӕ адӕймагӕн хуарздзийнадӕ кӕнун». Фал Петур хуӕртӕ ӕма ӕнсувӕрти «кӕрӕдзей» баиуазӕг кӕнунмӕ разӕнгард кодта, кӕд кӕрӕдзей хуарз зудтонцӕ, уӕддӕр. Уотӕ архайун сӕ цӕмӕн гъудӕй?

³ Уой фӕрци кӕрӕдземӕ ӕнгомдӕр кодтайуонцӕ. Дӕуӕй ба ци ес зӕгъӕн? Ескӕд дӕ еске ӕхемӕ иуазӕгуати фӕххудта? Ӕхцӕуӕн дин н’ адтӕй, рӕстӕг еумӕ ке ӕрвистайтӕ? Хуӕртӕ ӕма ӕнсувӕрти хуӕздӕр базонунмӕ хуарз мадзал ӕй, иуазӕгуати сӕ хонун. Петури рӕстӕги ка цардӕй, еци киристӕнтти кӕрӕдземӕ ӕнгомдӕр кӕнун гъудӕй, уомӕн ӕма уавӕртӕ фуддӕрӕй-фуддӕр кодтонцӕ. Аци «фӕстаг бӕнтти» дӕр хабар уотӕ ӕй (2 Тим. 3:1).

4. Аци статьяй цӕхуӕн фарстатӕмӕ ӕркӕсдзиан?

⁴ Хуӕртӕ ӕма ӕнсувӕрти баиуазӕг кӕнунмӕ нин цӕхуӕн фадуӕттӕ ес? Иннети баиуазӕг кӕнунмӕ нӕ ци фӕкъкъулумпи кӕнуй ӕма нӕ бон ци ӕй бакӕнун? Нӕ бон ци ӕй кӕнун, цӕмӕй хуарз иуазгутӕ уӕн?

5. Иуазӕгуарзон ке ан, уой нӕ бон куд ӕй ӕмбурди ӕвдесун?

⁵ Ӕмбурди. Йеговӕ ӕма нӕ ӕ организаци ӕмбурди баиуазӕг кодтонцӕ. Ӕма мах дӕр фӕндуй ӕмбурдмӕ ка ӕрбацӕуй, уонӕн зӕрдиагӕй расалам кӕнун, уӕлдайдӕр ба фиццаг хатт ка ӕрбацудӕй, уонӕн (Ром. 15:7). Етӕ дӕр Йегови иуазгутӕ ’нцӕ, ӕма сӕмӕ гъӕуама куд гъӕуй, уотӕ фӕккӕсӕн, цийфӕнди кондӕй ма ӕрбацӕуонцӕ, уӕддӕр (Иак. 2:1–4). Адӕймаг еунӕгӕй ку ӕрбацӕуа, уӕд ӕ фарсмӕ исбадӕ. Еу минкъий ин, программӕ куд цӕуй, уой ку бӕлӕдӕрун кӕнай, удта ин стихтӕ дӕр ку игон кӕнай, уӕд ин ӕхцӕуӕн уодзӕй. Е хуарз фадуат ӕй, иуазӕгуарзон ке ан, уой бавдесунмӕ (Ром. 12:13).

6. Иуазӕгуати ке гъӕуама хонӕн?

⁶ Хӕдзари. Рагидзаманти иуазӕгуарзон адӕймаг ӕ иуазгути зӕрдиагӕй фӕххинцидӕ. Уотемӕй ӕ иуазӕгӕн ӕвдиста, ӕ хӕццӕ ’й фӕрнӕй ӕма лимӕнӕй цӕрун ке фӕндуй (Райд. 18:1–8; Тӕрх. 13:15; Лук. 24:28–30). Мах бон ба ке ӕй баиуазӕг кӕнун? Фиццагидӕр не ’мбурди хуӕртӕ ӕма ӕнсувӕрти. Аци дуйней цард фуддӕрӕй-фуддӕр ке кӕнуй, уомӕ гӕсгӕ гъӕуама нӕ фарнӕ гъӕуай кӕнӕн ӕма нӕ лимӕндзийнадӕ федардӕр кӕнӕн. 2011 анзи Разамонӕг совети унаффӕмӕ гӕсгӕ, Еугонд Штатти Вефили ахургӕнӕн брошюрӕ ӕмбурдемӕй ци рӕстӕг фӕййахур кӕниуонцӕ, еци рӕстӕг 18:45 раййивтонцӕ 18:15. Цума цӕмӕн? Куд фегъосун кодтонцӕ, уомӕ гӕсгӕ Вефили ка лӕггадӕ кӕнуй, уонӕн ӕнцондӕр уодзӕй кӕрӕдзей баиуазӕг кӕнун, раздӕр ку уӕгъдӕ кӕнонцӕ, уӕд. Иннӕ филиалтӕ дӕр уонӕмӕ гӕсгӕ сӕ рӕстӕг раййивтонцӕ. Уой фӕрци Вефили бийнонтӕ кӕрӕдземӕ фенгомдӕр ӕнцӕ.

7, 8. Нӕ бон куд ӕй, не ’мбурдмӕ ка ӕрбацӕуй, еци ӕнсувӕрти баиуазӕг кӕнун?

⁷ Не ’мбурдмӕ радзубандий хӕццӕ ӕнсувӕр ку ӕрбацӕуй кенӕ нӕ районон цӕстӕдарӕг ку фӕббӕрӕг кӕнуй, кенӕ ба нӕмӕ филиалӕй ӕнсувӕр ку ӕрбацӕуй, уӕд нин хуарз фадуат фӕззиннуй иуазӕгуарзон ке ан, уой бавдесунмӕ. (Бакӕсӕ 3 Иоанни 5–8.) Зӕгъӕн, нӕ бон сӕ ӕй рӕфтад искӕнунмӕ ӕрбахонун.

⁸ Еугонд Штаттӕй еу хуӕрӕ загъта: «Берӕ ӕнзти дӕргъи мӕ сӕрихецауи хӕццӕ иуазӕгуати ӕрбахонианӕ, радзубандий хӕццӕ нӕмӕ ка ӕрцӕуидӕ, еци ӕнсувӕрти ӕма сӕ бийнойнӕгти. Гъема алли хатт дӕр рӕстӕг дзӕбӕх игъӕлдзӕгӕй рарветианӕ, сӕйрагидӕр ба уӕхӕн фембӕлдти фӕрци не ’ууӕндундзийнадӕ бафедар уидӕ. Некӕд  рафӕсмон кодтан, ке сӕ баиуазӕг кӕнианӕ, уобӕл».

9, 10. а) Хуӕртӕ ӕма ӕнсувӕртӕй цӕйбӕрцӕдӕр рӕстӕгмӕ баиуазӕг кӕнун ке багъӕуй? б) Минкъий хӕдзарӕ кӕмӕн ес, уони бон дӕр ӕй фенхус кӕнун? Ӕрхӕссӕ цӕветтон.

⁹ Хуӕртӕ ӕма ӕнсувӕрти цӕрӕнбунат ку гъӕуа. Рагидзаманти хӕдзарӕмӕ иуазӕг ку ӕрбацӕуидӕ, уӕд ин хӕдзари хецау ӕхсӕвеуатӕй байзайунмӕ бунат искӕнидӕ (Иов 31:32; Филим. 22). Мах дӕр гъӕуама уотӕ архайӕн. Районон цӕстӕдаргутӕ ӕмбурд ку фӕббӕрӕг кӕнунцӕ, уӕд сӕ арӕх багъӕуй, кӕми байзайонцӕ, уӕхӕн бунат. Е хауй, нӕ организаций скъолати ка фӕййахур кӕнуй кенӕ арӕзтадон кустити ка фӕййархайуй, уонӕмӕ дӕр. Ӕрдзон бӕллӕхи фӕсте ӕнӕхӕдзарӕ ка байзадӕй, уонӕй ба ци ес зӕгъӕн? Уони дӕр цӕйбӕрцӕдӕр рӕстӕгмӕ цӕрӕнбунат фӕгъгъӕуй, цалинмӕ син сӕ хӕдзӕрттӕ рӕвдзӕ кӕнунцӕ, уӕдмӕ. Гъӕуама нӕмӕ уотӕ ма кӕса, ӕма ӕрмӕстдӕр устур хӕдзӕрттӕ кӕмӕн ес, уони бон ӕй еске баиуазӕг кӕнун. Етӕ дӕр, ӕвӕдзи, ку багъӕуидӕ, уӕд еу ӕма дууӕ хатти нӕ равардтонцӕ цӕрӕнбунат. Фал дӕу бон ба н’ адтайдӕ, адӕймаги баиуазӕг кӕнун, кӕд дин минкъий хӕдзарӕ ес, уӕддӕр?

¹⁰ Хонсар Корейӕй еу ӕнсувӕр арӕх ӕримисуй, нӕ организаций скъолати ка ахур кодта, уони куд баиуазӕг кӕнидӕ, уой. Е зӕгъуй: «Фиццӕгти мӕ нифс нӕ хастон еске ӕрбахонунмӕ, уомӕн ӕма мин бийнойнаг гъе уӕд фӕззиндтӕй, удта минкъий хӕдзари цардан. Фал нӕмӕ еци хуӕртӕ ӕма ӕнсувӕртӕ ку байзайиуонцӕ, уӕд нӕ рӕстӕг хъӕбӕр игъӕлдзӕгӕй рарветианӕ. Уонӕмӕ кӕсгӕй мӕ бийнойнаги хӕццӕ уидтан, Хуцауи гъуддаги фулдӕр кӕнунбӕл ка фӕййархайуй, еци бийнонтӕ куд амондгун фӕуунцӕ, уой».

11. Не ’мбурди нӕуӕг хуӕртӕ ӕма ӕнсувӕртӕмӕ иуазӕгуарзон цӕмӕн гъӕуама уӕн?

¹¹ Ӕмбурди нӕуӕг хуӕртӕ ӕма ӕнсувӕртӕ. Ка ’й зонуй, уе ’мбурдмӕ рахизтӕнцӕ нӕуӕг хуӕртӕ ӕма ӕнсувӕртӕ кенӕ ба ӕнӕгъӕнӕ бийнонтӕ дӕр. Кадӕртӕ си, ӕвӕдзи, рахизтӕнцӕ, уе ’мбурди ӕнхус ке гъудӕй, уомӕ гӕсгӕ. Кӕд пионертӕ ’нцӕ, уӕдта сӕ, ӕвӕдзи, сумах ӕмбурдмӕ иснисан кодтонцӕ. Еци хуӕртӕ ӕма ӕнсувӕртӕ устур ӕййивддзийнӕдтӕ искодтонцӕ. Уомӕй уӕлдай ма гъӕуама исахур уонцӕ нӕуӕг бунатбӕл, ӕндӕр ӕгъдӕуттӕбӕл ӕма нӕуӕг ӕмбурдбӕл. Удта ма сӕ, ка ’й зонуй, нӕуӕг ӕвзаг ахур кӕнун дӕр багъӕуа. Уӕхӕн хуӕртӕ ӕма ӕнсувӕрти чай рацумунмӕ кенӕ рӕфтад искӕнунмӕ ку ӕрбахонай кенӕ еумӕ ескумӕ ку фӕццӕуайтӕ, уӕд син хъӕбӕр банхус кӕндзӕнӕ нӕуӕг ӕмбӕлттӕ иссерун ӕма ӕндӕр уавӕртӕбӕл исахур ун.

12. Еске баиуазӕг кӕнунмӕ берӕ цӕттӕ кӕнун ке нӕ гъӕуй, е цӕхуӕн хабарӕй бӕрӕг ӕй?

¹² Иуазӕг ӕрбахонунмӕ ӕгӕр берӕ цидӕртӕ цӕттӕ кӕнун нӕ гъӕуй. (Бакӕсӕ Лукай 10:41, 42.) Еу ӕнсувӕр радзурдта, ӕ бийнойнаги хӕццӕ миссионертӕй лӕггадӕ кӕнун ку райдӕдтонцӕ, уӕд сӕбӕл ци хабар ӕрцудӕй, уой: «Нӕ дууӕ дӕр ӕригон ӕма ӕвӕлтӕрд адтан, удта нӕ хӕдзарӕбӕл хъӕбӕр ӕрхун кодтан. Еу изӕр мӕ бийнойнаг уотӕ ӕрӕнкъард ӕй ӕма ’й мӕ бон некуд адтӕй баигъӕлдзӕг кӕнун. Еу аст сахаттебӕл ба нӕмӕ кадӕр ӕрбахуаста. Е адтӕй, Библи ка ахур кодта, еу уӕхӕн силгоймаг, ӕ къохи ба – ӕртӕ апельсини. Нӕуӕг миссионерти хӕццӕ базонгӕ унмӕ ӕрбацудӕй. Мах дӕр ӕй медӕмӕ ӕрбахудтан ӕма ин дон февардтан. Уой фӕсте ба чай ӕма тӕвдӕ шоколад искодтан. Мах уӕд суахили ӕвзаг нӕма зудтан ӕма е дӕр англисагау нӕ дзурдта, фал еци хабари фӕрци  бунӕттон ӕнсувӕрти хӕццӕ лимӕн кӕнун райдӕдтан ӕма нӕ цийнӕн кӕрон дӕр н’ адтӕй».

13. Иуазӕгуарзон ун хуарз цӕмӕн ӕй?

¹³ Кӕд дин еске баиуазӕг кӕнун зин ӕй, уӕд, зӕгъӕн ес, ӕма дӕхе цох кӕнис, еумӕ ци игъӕлдзӕг рӕстӕг рарветдзиайтӕ, уомӕй. Удта дин фадуат дӕр нӕ уодзӕй, ӕносмӕ лимӕнӕй ке хӕццӕ цӕрдзӕнӕ, уӕхӕн ӕмбӕлттӕ иссерунмӕ. Уомӕй уӕлдай ма иуазӕгуарзон адӕймаг ӕхемӕ еунӕг некӕд фӕккӕсуй. Мадта уӕд еуӕй-еуетӕн еске баиуазӕг кӕнун зин цӕмӕн фӕууй? Цалдӕр гъуддагей туххӕй.

14. Уотӕ нӕмӕ ку кӕса, ӕма нӕ иуазгутӕ хонунмӕ кенӕ иуазӕгуати цӕунмӕ нӕ евдӕлуй, уӕд нӕ бон ци ӕй бакӕнун?

¹⁴ Рӕстӕг ӕма хъауритӕ. Йегови адӕн хъӕбӕр ӕнӕвдӕлон ӕнцӕ, удта син берӕ гъуддӕгтӕ ес. Уомӕ гӕсгӕ еуӕй-еуетӕмӕ уотӕ фӕккӕсуй, ӕма син рӕстӕг ӕма хъауритӕ нӕ фагӕ кӕнуй, цӕмӕй ма иуазгути дӕр хононцӕ. Кӕд ду дӕр уотӕ сагъӕс кӕнис, уӕд дӕ графикмӕ нӕуӕгӕй ӕркӕсӕ, ӕма си ести раййевӕ, цӕмӕй дӕ бон уа иуазгути хонун. Е ӕхсидзгӕ гъуддаг ӕй, уомӕн ӕма нӕ уомӕ Библи разӕнгард кӕнуй (Дзиуит. 13:2). Гъӕуама ин рӕстӕг хецӕн кӕнӕн. Фал уой туххӕй ба уотӕ ӕхсидзгӕ ка нӕй, еци гъуддӕгтӕ фӕмминкъийдӕр кӕнун гъӕудзӕй.

15. Еуӕй-еуетӕ иуазгутӕ ӕрбахонунмӕ сӕ нифс цӕмӕннӕ фӕххӕссунцӕ?

¹⁵ Дӕ нифс ку нӕ хӕссай. Хатгай ба нӕ иуазгутӕ ӕрбахонун дӕр фӕффӕндуй, фал нӕ нифс нӕ фӕххӕссӕн. Еуӕй-еуетӕ ӕфсӕрми фӕккӕнунцӕ ӕма фӕттухсунцӕ, цӕбӕл дзоронцӕ, е син ку нӕ уа ӕма иуазгутӕн ӕнкъард ку уа. Иннетӕ ба мӕгурдӕр цард ке кӕнунцӕ, уомӕ гӕсгӕ сӕ нифс нӕ фӕххӕссунцӕ еске ӕрбахонунмӕ. Фал сӕйраг е нӕй, цӕмӕй хӕдзарӕ гъӕздуг уа. Кӕдзос ӕма дӕмӕ ӕфснайд ку уа, дӕхуӕдӕг ба хӕларзӕрдӕ ку уай, уӕд дӕ иуазгутӕн хъӕбӕр ӕхцӕуӕн уодзӕй.

16, 17. Еске баиуазӕг кӕнунмӕ дӕ нифс ку нӕ хӕссай, уӕд дӕ бон ци ӕй бакӕнун?

¹⁶ Ӕвӕдзи, иуазгутӕ ку ’рбахонис, уӕд фӕттухсис. Фал уотӕ айдагъ дӕумӕ нӕ фӕууй. Британийӕй еу хестӕр нӕлгоймаг зӕгъуй: «Цийфӕндий адӕймаг дӕр иуазгутӕ хезгӕй кӕмидӕр истухсуй. Фал уой фӕсте ба еци тухст цийнӕдзийнадӕмӕ рахезуй. Игъосун кӕнгӕй дӕр арӕх уотӕ фӕууй. Фиццаг тухсгӕ фӕккӕнӕн, фал уой фӕсте ба еци тухстӕй фӕд дӕр нӕбал байзайуй ӕма хӕдзарӕмӕ цийнӕгӕнгӕй раздӕхӕн. Мӕн зӕрдӕмӕ хъӕбӕр цӕуй уотид кофе цумгӕй дӕр иуазгути хӕццӕ дзубандитӕ кӕнун». Иронх ди ма уӕд, сӕйрагидӕр адӕймаги банимайун ке ӕй (Фил. 2:4). Беретӕ уарзунцӕ сӕ царди хабӕрттӕ радзорун ӕма еумӕ ку ӕмбурд кӕнӕн, уӕд нин е хуарз фадуат уодзӕй нӕ хуӕртӕ ӕма ӕнсувӕрти хуӕздӕр базонун. Иннӕ хестӕр нӕлгоймаг ба загъта: «Не ’мбурдӕй еске ку ӕрбахонун, уӕд сӕ никки хӕстӕгдӕр базонун ӕма сӕ никки хуӕздӕр лӕдӕрун райдайун. Уӕлдай хъӕбӕрдӕр ба мӕ зӕрдӕмӕ цӕуй, хуӕртӕ ӕма ӕнсувӕртӕ рӕстдзийнадӕ куд базудтонцӕ, еци хабӕрттӕмӕ игъосун». Дӕ иуазгутӕмӕ лӕмбунӕг ӕма хӕларзӕрдӕ ку уай, уӕд алкӕмӕндӕр хуарз уодзӕй.

¹⁷ Еу пионер хуӕрӕ, нӕ организаций скъолати ка ахур кодта, уони арӕх баиуазӕг кӕнидӕ ӕма зӕгъуй: «Фиццаг тухсгӕ кодтон, уомӕн ӕма хъӕбӕр хумӕтӕг цард кӕнун, ци мебель мӕмӕ ес, е дӕр кедӕр зӕронд мебель ӕй. Фал мӕ еухатт ба еу хуӕрӕ ӕрсабур кодта. Ӕ сӕрихецауи хӕццӕ ӕмбурдтӕ  ку бӕрӕг кодтонцӕ, уӕд сӕ зӕрдӕмӕ хъӕбӕр цудӕй, хумӕтӕг цард ка кодта, фал уони хузӕн нисӕнттӕ кӕмӕ адтӕй, уӕхӕн хуӕртӕ ӕма ӕнсувӕртӕмӕ ӕрлӕуун. Ӕма мин ӕ дзубандитӕ мӕ зӕрди ӕрӕфтудтонцӕ, мӕ мадӕ арӕх ке фӕдздзоридӕ, еци дзурдтӕ: „Нард гал уӕмӕ уа, ӕма кӕрӕдземӕй уе ’сӕфт уинайтӕ, уой бӕсти уӕмӕ халсартӕй хуӕруйнаг уӕд, ӕма кӕрӕдзей уарзетӕ“» (Ӕмб. 15:17). Хуӕртӕ ӕма ӕнсувӕрти баиуазӕг кӕнунмӕ дӕ уарзондзийнадӕ ку разӕнгард кӕна, уӕд мацӕбӕл тухсӕ.

18, 19. Иуазӕгуарзон ку уӕн, уӕд нин е куд банхус кӕндзӕй иннетӕмӕ хуарз зӕрдӕ дарун?

¹⁸ Иннетӕмӕ ци зӕрдӕ дарис. Ка ’й зонуй, де ’мбурди ес, дӕ зӕрдӕмӕ ка нӕ цӕуй, кенӕ мӕстгун кӕмӕ фӕккӕнис, уӕхӕн еске. Еци маст дӕ зӕрдӕй рандӕ кӕнунбӕл ку нӕ байархайай, уӕд дин ӕхегъӕди ба нӕ рандӕ уодзӕй. Ӕвӕдзи, фӕйнӕхузи ке айтӕ, уомӕ гӕсгӕ уӕ нифс нӕ хӕссетӕ кӕрӕдзей иуазӕгуати ӕрбахонунмӕ. Кенӕ ба ибӕл, ӕвӕдзи, кӕддӕр дӕ зӕрдӕ естӕбӕл рахудтӕй.

¹⁹ Библи куд зӕгъуй, уомӕ гӕсгӕ ма сауӕнгӕ де ’знаги хӕццӕ дӕр дӕ бон ӕй бафедаун, иуазӕгуарзон ку уай, уӕд. (Бакӕсӕ Ӕмбесӕндтӕ 25:21, 22.) Иуазӕгмӕ дзӕбӕх ку фӕккӕсай, уӕд дӕхе зӕрдӕй дӕр маст рандӕ уодзӕй, ӕма ӕ хӕццӕ федаун райдайдзӕнӕ. Уӕд ӕй базондзӕнӕ, Йеговӕ ин рӕстдзийнадӕ ку райгон кодта, уӕд имӕ цӕхуӕн хуарз менеугутӕ фӕууидта, уой (Иоан. 6:44). Уой ӕнгъӕл ка н’ адтӕй ӕма ӕй иуазӕгуати ӕрбахондзӕнӕ, уӕхӕн  адӕймаги ку ӕрбахонай, уӕд, ка ’й зонуй, ӕ хӕццӕ хуарз ӕмбӕлттӕ дӕр исуодзиайтӕ. Уӕхӕн гъуддӕгтӕмӕ нӕ ӕцӕг уарзондзийнадӕ разӕнгард кӕнуй ӕви нӕ, уой куд ес исбӕрӕг кӕнӕн? Еу унаффӕ финст ӕй Филиппӕгтӕмӕ 2:3: «Уотӕ сӕрниллӕг ӕма иннети уӕхецӕй уӕлдӕр ӕвӕретӕ». Мадта гъӕуама фулдӕр сагъӕс кӕнӕн, нӕ хуӕртӕ ӕма не ’нсувӕртӕ махӕй цӕмӕй хуӕздӕр ӕнцӕ, уобӕл. Ка ’й зонуй, еуӕй-еуетӕн киристон менеугутӕ ӕвдесун хуӕздӕр фӕууайуй, зӕгъӕн, кадӕр хъӕбӕр нифсхаст ӕй кенӕ берӕфӕразон, кадӕр ба федар ӕууӕндундзийнади хецау ӕй. Нӕ хуӕртӕ ӕма не ’нсувӕртӕн фулдӕр сӕ хуарз менеугутӕбӕл ку сагъӕс кӕнӕн, уӕд сӕ фулдӕр уарздзиан ӕма сӕ иуазӕгуати зӕрдиагӕй хондзиан.

20. Иуазӕгуати нӕ ка хонуй, уомӕй боз цӕмӕн гъӕуама уӕн ӕма уой нӕ бон куд ӕй бавдесун?

²⁰ Псаломзаргӕнӕг Давид загъта: «О Йеговӕ, ке баиуазӕг кӕндзӕнӕ дӕ цатури?» (Псалом 15:1). Уой фӕсте ба Давид ранимадта, Йегови ӕ иуазгутӕмӕ цӕхуӕн менеугутӕ фӕндадтайдӕ уинун, уой. Еу менеуӕг ӕй уӕхӕн: «Ӕ сомийӕй ӕхецӕн зӕран ку уа, уӕд дӕр ӕ дзурд не ’ййевуй» (Пс. 15:4). Еске нӕ иуазӕгуати ку хона, ӕма син зӕрдӕ ку байвӕрӕн ке сӕмӕ ӕрбацӕудзиан, уӕд нӕ дзурд гъӕуама исӕнхӕст кӕнӕн, ести устур гъуддаг нӕбӕл ма ’рцӕуӕд, ӕндӕра. Хӕдзари хецау, ка ’й зонуй, еститӕ цӕттӕ кӕнун райдӕдта, ӕма ку не ’рбацӕуӕн, уӕд ӕ хъиамӕттӕ фӕдздзӕгъӕли уодзӕнцӕ (Матф. 5:37). Фӕууй уотӕ дӕр, ӕма кедӕр хуӕздӕр рауӕнмӕ ке худтонцӕ, уомӕ гӕсгӕ, фиццаг кӕмӕ цӕуйнаг адтӕй, уонӕн зӕгъидӕ, ке ин нӕ рауайдзӕй ӕрбацӕун. Фал цума е ӕгъдау ӕма уарзондзийнадӕбӕл дзорӕг ӕй? Кафӕнди нӕ ма хона, уӕддӕр гъӕуама еци адӕймагӕй боз уӕн (Лук. 10:7). Уотӕ ку рауайа, ӕма дин ӕцӕгӕйдӕр нӕбал ес фӕццӕуӕн, уӕд ӕй адӕймагӕн рагацау фегъосун кӕнӕ.

21. Цӕмӕй хуарз иуазӕг уай, уой туххӕй дӕ зӕрдӕбӕл ци гъӕуама дарай?

²¹ Бунӕттон ӕгъдӕуттӕ дӕр гъӕуама ма иронх кӕнӕн. Кӕцидӕр адӕнмӕ ӕгъдау уотӕ ӕй, ӕма сӕмӕ кӕдфӕндидӕр ку ’рбацӕуай, уӕддӕр дӕ баиуазӕг кӕндзӕнцӕ. Кӕмидӕр ба хуӕздӕр уодзӕй рагацау бадзубанди кӕнун. Еуӕй-еу адӕнмӕ иуазӕгӕн хуӕздӕрӕй сӕмӕ ци ес, уой ӕрӕвӕрунцӕ, иннетӕмӕ ба иуазӕг дӕр ӕма бийнонтӕ дӕр еци еу хуӕруйнаг фӕххуӕрунцӕ. Кӕцидӕр рауӕнти иуазӕгӕн ревӕд къохӕй ӕрбацӕун нӕ федауй. Иннетӕмӕ ба хӕдзари хецауи нӕ фӕффӕндуй, цӕмӕй ӕ иуазгутӕ сӕхе тухсун кӕнонцӕ. Кӕмидӕр ба ӕгъдау уотӕ ’й, ӕма дӕ иуазӕгуати ку хононцӕ, уӕд уайтагъд райарази ун ходуйнаг ӕй, иннӕ рауӕнти ба «нӕъ» зӕгъун нӕ федауй. Кудфӕнди ма уа, уӕддӕр гъӕуама алкӕддӕр архайӕн, цӕмӕй хӕдзари хецау ма рӕфӕсмон кӕна, ке нӕ ӕрбахудта, уобӕл.

22. Хуӕртӕ ӕма ӕнсувӕрти баиуазӕг кӕнун ӕхсидзгӕ цӕмӕн ӕй?

²² Петур загъта: «Тагъд алцӕмӕндӕр ӕрцӕудзӕй кӕрон» (1 Пет. 4:7). Ӕма еци рӕстӕг нур никки хӕстӕгдӕр ӕй. Тагъд райдайдзӕй, дуйнебӕл ка некӕдма адтӕй, уӕхӕн устур бӕллӕх. Аци дуйней цард фуддӕрӕй-фуддӕр кӕнуй ӕма гъӕуама нӕ хуӕртӕ ӕма не ’нсуӕвӕрти хӕццӕ никки ӕнгомдӕр уӕн. Петури унаффӕмӕ гӕсгӕ, «уӕ кӕрӕдзей... баиуазӕг кӕнтӕ», зӕгъгӕ, нур куд ӕхсидзгӕ ӕй архайун, уотӕ некӕдма (1 Пет. 4:9). Мадта ни алкедӕр гъӕуама иуазӕгуарзон уа – е нин цийнӕдзийнадӕ хӕсдзӕй нур дӕр ӕма ӕносмӕ дӕр!