1, 2. Йеговӕ рӕдау Хуцау ке ӕй, е цӕмӕй бӕрӕг ӕй?

ЙЕГОВӔ рӕдау Хуцау ӕй. Цидӕриддӕр нӕмӕ ес, етӕ нин уой лӕвӕрттӕ ’нцӕ. Зӕнхи гъӕздугдзийнӕдтӕ еугурӕйдӕр Йегови ’нцӕ, ӕма си уотӕ пайда кӕнуй, цӕмӕй зӕнхӕбӕл цард уа (Пс. 104:13–15; Аг. 2:8). Библий финст ес, Йеговӕ зӕнхи гъӕздугдзийнӕдтӕй ӕ адӕни туххӕй дессаги хузи куд пайда кодта, уӕхӕн хабӕрттӕ.

² Зӕгъӕн, израилӕгтӕ 40 анзей дӕргъи ӕдзӕрӕг будури ку адтӕнцӕ, уӕд син Йеговӕ маннӕ ӕма дон лӕвардта (Рац. 16:35). Адӕн «неци гъӕуагӕ адтӕнцӕ» (Неем. 9:20, 21). Фӕстӕдӕр ба Йеговӕ Елисеййи фӕрци седзӕргӕс силгоймагӕн дессаги хузи банхус кодта, ӕма ӕ гъосини ци сойнӕ байзадӕй, е нӕ минкъийдӕр кодта. Уотемӕй еци силгоймагӕн ӕ бон иссӕй е ’фстӕуттӕ бафедун ӕма ма сӕмӕ ӕ фурти хӕццӕ цӕруни фагӕ дӕр байзадӕй (2 Пад. 4:1–7). Йесо дӕр Йегови хъаури фӕрци дессаги хузи адӕнӕн хуӕруйнаг лӕвардта, еухатт ба ма  ӕ ахуркӕнуйнӕгтӕй еуемӕн ӕхца дӕр равардта (Матф. 15:35–38; 17:27).

3. Аци статьяй цӕхуӕн фарстатӕмӕ ӕркӕсдзиан?

³ Зӕнхи гъӕздугдзийнӕдтӕ еугурӕйдӕр Йегови къохи ке ’нцӕ, уомӕ гӕсгӕ си ӕ бон ӕй уотӕ пайда кӕнун, цӕмӕй, ке сфӕлдиста, етӕ маци гъӕуагӕ уонцӕ. Фал уӕддӕр ӕ лӕггадгӕнгути разӕнгард кӕнуй, цӕмӕй ин ӕ организацийӕн, сӕ бон цӕмӕй ӕй, уомӕй ӕнхус кӕнонцӕ (Рац. 36:3–7; бакӕсӕ Ӕмбесӕндтӕ 3:9). Йегови цӕмӕн фӕндуй, цӕмӕй ин, хуӕздӕрӕй нӕмӕ ци ес, уой дӕттӕн? Рагидзаманти Йегови лӕггадгӕнгутӕ нисайнӕгтӕй куд ӕнхус кодтонцӕ, ӕ номӕй ка архайдта, уонӕн? Абони Хуцауи организаци нисайнӕгтӕй куд пайда кӕнуй? Аци фарстатӕбӕл дзуапп базондзиан аци статьяй.

4. Йегови гъуддагӕн ку фенхус кӕнӕн, уӕд уомӕй ци ’вдесӕн?

⁴ Хуӕздӕрӕй нӕмӕ ци ес, уой Йеговӕн не ’вгъау кӕнӕн, уомӕн ӕма ’й уарзӕн ӕма ин аргъ кӕнӕн. Йеговӕ нин цӕйбӕрцӕ хуарздзийнӕдтӕ искодта, уобӕл ку фӕссагъӕс кӕнӕн, уӕд си ӕ рӕдаудзийнади туххӕй никки хъӕбӕрдӕр боз фӕууӕн. Зӕгъӕн, паддзах Давид, ковӕндонӕ кӕнунмӕ цитӕ гъудӕй, уой адӕнӕн ку дзурдта, уӕд загъта, цидӕриддӕр нӕмӕ ес, е Йеговӕй ке цӕуй, ӕма ин кӕд ести дӕттӕн, уӕддӕр нин ӕхуӕдӕг ци равардта, уой. (Бакӕсӕ 1 Анзфинстити 29:11–14.)

5. Библи нин куд ӕвдесуй, Хуцауи гъуддагӕн нӕ нисайнӕгтӕй ке ӕнхус кӕнӕн, е дӕр нӕ лӕггадӕмӕ ке хауй?

⁵ Йеговӕн, ци нӕмӕ ес, уой ке дӕттӕн, е ма нӕ лӕггадӕмӕ дӕр хауй. Апостол Иоанн ци цӕстӕбӕлуайӕн фӕууидта, уоми Йегови уӕларвон лӕггадгӕнгутӕ дзурдтонцӕ: «О Йеговӕ, нӕ Хуцау, ду дӕ кадӕ ӕма намуси аккаг, уомӕн ӕма ду дӕ устур хъаури хецау, ӕма алцидӕр ду сфӕлдистай ӕма алцидӕр дӕ фӕндонмӕ гӕсгӕ ӕй ӕма фӕззиндтӕй» (Рарг. 4:11). Ӕцӕгӕйдӕр, еугур кадӕ ӕма намус дӕр Йеговӕн ӕмбӕлуй, ӕма ин гъӕуама, хуӕздӕрӕй нӕмӕ ци ес, уой ма ’вгъау кӕнӕн. Йеговӕ Моисеййи фӕрци израилӕгтӕн бафӕдзахста, цӕмӕй анзи медӕг ӕртӕ бӕрӕгбони бӕрӕг кодтайуонцӕ. Ӕрмӕст син загъд адтӕй: «Йегови размӕ ревӕд къохӕй маке ӕрбацӕуӕд». Ӕма нисайнӕгтӕ ке ӕрбахӕссиуонцӕ, е дӕр сӕ лӕггадӕмӕ хаудтӕй (Дук. з. 16:16). Абони дӕр уотӕ ’й. Хуцауи гъуддагӕн нӕ нисайнӕгтӕй ке ӕнхус кӕнӕн, е дӕр нӕ лӕггадӕмӕ хауй. Ӕма уомӕй ӕвдесӕн, еци кустӕн устур аргъ ке кӕнӕн, уой.

6. Ци нӕмӕ ес, уомӕй иннетӕн ку хай кӕнӕн, уӕд нин е ци пайда ӕрхӕсдзӕй? (Кӕсӕ хузӕмӕ статьяй райдайӕни.)

⁶ Ци нӕмӕ ес, уомӕй иннетӕн ку хай кӕнӕн, уӕд е нӕхецӕн дӕр пайда хӕсдзӕй. (Бакӕсӕ Ӕмбесӕндтӕ 29:21.) Зӕгъӕн, сувӕллон фембурд кодта, ӕ ниййергутӕ ин ке февӕриуонцӕ, еци ӕхцатӕ. Уой фӕсте ба син еци ӕхцайӕй цидӕр балхӕдта. Ниййергутӕн е кунӕг ӕхцӕуӕн нӕ уодзӕй! Кенӕ ба, зӕгъӕн, ӕ ниййергути хӕццӕ ка цӕруй, уӕхӕн ӕригон пионер сӕмӕ ӕхцайӕй фӕккастӕй, цӕмӕй хӕдзари хӕрзтӕ бафедонцӕ. Кӕд ӕ ниййергутӕ еци ӕнхусмӕ не ’нгъӕлмӕ кастӕнцӕ, уӕддӕр си, ӕвӕдзи, ӕхца райсдзӕнцӕ, уомӕн ӕма  уотемӕй сӕ сувӕллонӕн ӕ бон уодзӕй бавдесун, сӕ хуарздзийнӕдти туххӕй син арфӕ ке кӕнуй, уой. Уотӕ ’й Йеговӕ дӕр зонуй, хуӕздӕрӕй нӕмӕ ци ес, уой ин ку дӕттӕн, уӕд е нӕхе пайдайӕн ке уодзӕй.

7, 8. Рагидзаманти Йегови адӕн нисайнӕгтӕй куд ӕнхус кодтонцӕ а) ести бӕлвурд гъуддагӕн? б) Хуцауи гъуддаги ка архайдта, уонӕн?

⁷ Библийӕй бӕрӕг ӕй, рагидзаманти лӕггадгӕнгутӕ Хуцауи гъуддагӕн нисайнӕгтӕ ке лӕвардтонцӕ. Хатгай ба сӕ лӕвардтонцӕ цидӕр бӕлвурд гъуддагӕн. Зӕгъӕн, еухатт Моисей израилӕгти баразӕнгард кодта, цӕмӕй Хуцауи цатур исаразунмӕ нисайнӕгтӕ равардтайуонцӕ. Паддзах Давид ба адӕнӕн загъта, цӕмӕй нисайнӕгтӕй банхус кодтайуонцӕ ковӕндонӕ исаразунмӕ (Рац. 35:5; 1 Анз. 29:5–9). Паддзах Иоаси рӕстӕги дӕр саугинтӕ адӕни нисайнӕгти фӕрци ковӕндонӕ барӕвдзӕ кодтонцӕ (2 Пад. 12:4, 5). Фиццаг ӕноси ӕмбурдтӕ дӕр уотӕ архайдтонцӕ. Зӕгъӕн, еу рӕстӕги Иудейи стонг дзаман ку искодта, уӕд киристӕнттӕ «баунаффӕ кодтонцӕ, алкедӕр си, ӕ бон цӕйбӕрцӕ ӕй, уойбӕрцӕ ке ратдзӕй», цӕмӕй уоми ка цардӕй, еци ӕнсувӕртӕн банхус кодтайуонцӕ (Гъуд. 11:27–30).

⁸ Йегови адӕн ма ӕхцайӕй ӕнхус кодтонцӕ, разамунд син ка лӕвардта, уонӕн, дӕр. Зӕгъӕн, Моисеййи закъонмӕ гӕсгӕ левиттӕн иннӕ муггӕгтӕй уӕлдай хай лӕвӕрд н’ адтӕй. Фал син израилӕгтӕ сӕ есбонӕй дӕсӕймаг хай ке лӕвардтонцӕ, уой фӕрци сӕ бон адтӕй се ’гас хъауритӕ дӕр Хуцауи цатури лӕггадӕ кӕнунмӕ исаразун (Ним. 18:21). Фиццаг ӕноси дӕр израилаг силгоймӕгтӕй кадӕртӕ уӕхӕн рӕдау адтӕнцӕ, ӕма Йесо, удта ӕ апостолтӕн, «ци сӕмӕ адтӕй, уой не ’вгъау кодтонцӕ, ӕма син уотемӕй лӕггадӕ кодтонцӕ» (Лук. 8:1–3).

9. Рагидзаманти адӕн нисайнагӕн ке лӕвардтонцӕ, е сӕхемӕ кӕцӕй ӕфтудӕй?

⁹ Фал цума адӕн нисайнагӕн ке лӕвардтонцӕ, е сӕхемӕ ба кӕцӕй ӕфтудӕй? Зӕгъӕн, израилӕгтӕ ӕдзӕрӕг будури ку адтӕнцӕ, уӕд Хуцауи цатур исаразтонцӕ, ӕвӕдзи, Египетӕй ке рахстонцӕ, еци гъӕздугдзийнӕдти фӕрци (Рац. 3:21, 22; 35:22–24). Фиццаг ӕноси ба еуӕй-еу киристӕнттӕ сӕ есбон, зӕгъӕн, сӕ зӕнхитӕ кенӕ хӕдзӕрттӕ рауӕйӕ кодтонцӕ, ӕма еци ӕхца апостолтӕмӕ ӕрбахастонцӕ. Апостолтӕ ба еци ӕхца, ӕнхусгъӕуагӕ ка адтӕй, уонӕбӕл байурстонцӕ (Гъуд. 4:34, 35). Иннетӕ ба рӕстӕгӕй-рӕстӕгмӕ сӕ ’хцӕйӕй цӕйбӕрцӕдӕр рахецӕн кӕниуонцӕ ӕма уой нисайнагӕн раттиуонцӕ (1 Кор. 16:2). Уотемӕй еугурӕйдӕр, гъӕздугутӕ дӕр ӕма мӕгуртӕ дӕр, Хуцауи гъуддагӕн ӕнхус кодтонцӕ (Лук. 21:1–4).

10, 11. а) Нӕ бон куд ӕй Хуцауи рагон лӕггадгӕнгути хузӕн рӕдау ун? б) Дӕ бон Паддзахади гъуддагӕн ӕнхус кӕнун ке ӕй, уомӕ цӕхуӕн цӕстӕй кӕсис?

¹⁰ Мах рӕстӕги дӕр фӕууй уотӕ, ӕма цӕхуӕндӕр бӕлвурд гъуддаги фӕгъгъӕуй нисайнӕгтӕй банхус кӕнун. Зӕгъӕн, уе ’мбурд испълан кодта нӕуӕг зал исаразун кенӕ ба кӕми ӕмбурд кӕнтӕ, еци бунат барӕвдзӕ кӕнун.  Ка ’й зонуй, филиал цидӕр арӕзтадон куститӕ кӕнуй кенӕ регионалон конгресс уодзӕй, кенӕ ба кӕмидӕр ӕрдзон бӕллӕх ӕрцудӕй ӕма ӕхцайӕй фӕккӕсун гъӕуй. Нӕ нисайнӕгтӕй ма ӕнхус кӕнӕн Йегови Ӕвдесӕнти сӕйраг хайадӕн, удта нин ӕнӕгъӕнӕ зӕнхӕбӕл ци филиалтӕ ес, уонӕн дӕр, цӕмӕй сӕ куст размӕ цӕуа. Уомӕй уӕлдай ма нӕ нисайнӕгти фӕрци ӕнхус кӕнӕн миссионертӕн, сӕрмагонд пионертӕн ӕма цӕуӕг цӕстӕдаргутӕн. Удта ма, ӕвӕдзи, уе ’мбурд резолюцимӕ гӕсгӕ филиалмӕ цӕйбӕрцӕдӕр ӕхца ферветуй, цӕмӕй аллихузи бӕстити нӕ хуӕртӕ ӕма не ’нсувӕртӕн Конгрессти залтӕ ӕма ӕнӕуой залтӕ арӕзт цӕуонцӕ.

¹¹ Алке бон дӕр ни ӕй аци фӕстаг бӕнтти Хуцауи гъуддагӕн, ци нӕмӕ ес, уомӕй ӕнхус кӕнун. Нисайнаг ка равардта, уой арӕхдӕр неке фӕззонуй. Ӕмбурди нисайнагдони цӕйбӕрцӕ ниггӕлстан, уой алкӕмӕн дзоргӕ нӕ рацӕуӕн. Фал нӕмӕ уотӕ ку кӕса, ӕма нӕ нисайнаг уӕхӕн минкъий ӕй, ӕма бӕрӕг дӕр некӕми фӕууодзӕй, уӕдта? Гъуддаг уой медӕги ӕй, ӕма организаций ци ӕхца ӕрӕмбурд уй, етӕ фулдӕр уӕхӕн минкъий нисайнӕгти фӕрци ӕрӕмбурд унцӕ. Мӕгур уавӕрти ка цӕруй, уӕхӕн хуӕртӕ ӕма ӕнсувӕртӕ ӕнцӕ фиццаг ӕноси Македоний киристӕнтти хузӕн. Еци киристӕнттӕ «кӕд хъӕбӕр мӕгур» адтӕнцӕ, уӕддӕр ӕнсувӕртӕн балигъстӕ кодтонцӕ, зӕгъгӕ, нӕ уой аккаг искӕнтӕ, цӕмӕй мах дӕр ести раттӕн. Ӕма кӕнгӕ дӕр уотӕ бакодтонцӕ (2 Кор. 8:1–4).

12. Нӕ организаци куд архайуй, цӕмӕй нисайнӕгтӕй раст пайда кӕна?

¹² Разамонӕг совет нӕ организаций нисайнӕгтӕй куд пайда кӕнуй, еци гъуддаги ӕй ӕууӕнкгун ӕма зундгин (Матф. 24:45). Ӕхца цӕхуӕн гъуддӕгтӕбӕл бахарз кӕндзӕнцӕ, уой испълан кӕнуни размӕ еци ӕнсувӕртӕ Хуцаумӕ исковунцӕ, цӕмӕй син раст унаффӕ рахӕссунмӕ банхус кӕна (Лук. 14:28). Рагидзаманти нисайнӕгтӕбӕл дзуапп ка лӕвардта, еци нӕлгоймӕгтӕ лӕмбунӕг кастӕнцӕ, цӕмӕй ӕхца харзгонд цудайуонцӕ, адӕн сӕ ци гъуддагӕн равардтонцӕ, уобӕл, гъома Хуцауи гъуддагбӕл. Зӕгъӕн, Ездрӕ Йерусалиммӕ ӕ хӕццӕ раласта, Персий паддзах ин нисайнагӕн ке равардта, еци хӕзнатӕ – сугъзӕрийнӕ, ӕвзестӕ ӕма ӕндӕр хъазар дзаумӕттӕ. Сӕ аргъ абониккон ӕхцатӕй нимайгӕй адтӕй 100 милиуан доллӕремӕй фулдӕр. Ездрӕ еци нисайнаг нимадта, Йеговӕн ке искодтонцӕ, уӕхӕн лӕварбӕл. Ӕма сӕ над даргъ ке адтӕй, удта син абӕргутӕй тӕссаг ке адтӕй, уомӕ гӕсгӕ Ездрӕ алцидӕр бакодта, цӕмӕй еци хӕзнатӕй маци фӕгъгъудайдӕ (Езд. 8:24–34). Апостол Павел ба еухатт ӕхца ӕрӕмбурд кодта, цӕмӕй Иудейи цӕрӕг киристӕнттӕн банхус кодтайдӕ. Павел ӕхуӕдӕг, удта ин еци ӕхца кумӕ гъудӕй, уордӕмӕ бахъӕртун кӕнунмӕ ка ӕнхус кодта, еци ӕнсувӕртӕ дӕр «архайдтонцӕ алцидӕр ӕнӕзӕрдихудтӕй кӕнун, ӕма айдагъ Йегови рази нӕ, фал адӕни рази дӕр». (Бакӕсӕ 2 Коринфӕгтӕмӕ 8:18–21.) Ездрӕ ӕма Павели хузӕн нӕ организаци дӕр ӕхцай хӕццӕ баст гъуддӕгти рӕстӕй фӕййархайуй.

13. Нӕ организаций ӕрӕги цӕхуӕндӕр ӕййивддзийнӕдтӕ цӕмӕн ӕрцудӕй?

¹³ Йеговӕн фулдӕр лӕггадӕ кӕнун ке  фӕндуй, еци бийнонти, ка ’й зонуй, багъӕуа, се ’хца куд харз кӕнунцӕ, еци гъуддаги цидӕртӕ раййевун ӕма ма, ка ’й зонуй, сӕ цард фӕххумӕтӕг кӕнун дӕр. Ӕма нӕ организаций гъуддаг дӕр уотӕ ’й. Фӕстаг ӕнзти нӕ организаци берӕ гъуддӕгтӕ пълан кодта. Фал хатгай, нӕ хӕрзтӕ нисайнӕгтӕй фӕффулдӕр уиуонцӕ. Уомӕ гӕсгӕ нур нӕ организаци архайуй, цӕмӕй ӕ хӕрзтӕ фӕмминкъийдӕр кӕна ӕма си уой туххӕй цӕхуӕндӕр ӕййивддзийнӕдтӕ ӕрцудӕй. Уой фӕрци, рӕдауӕй ке дӕттетӕ, еци нисайнӕгтӕ, куд хуӕздӕр ӕй, уотӕ харзгонд цӕунцӕ.

14–16. а) Рӕдауӕй ци нисайнӕгтӕ фӕддӕттис, етӕ цӕхуӕн гъуддӕгтӕбӕл цӕунцӕ? б) Хуцауи организаци нин ци дӕттуй, е дӕуӕн ци пайда хӕссуй?

¹⁴ Йеговӕн берӕ ӕнзти дӕргъи ка лӕггадӕ кӕнуй, уонӕй беретӕ фӕззӕгъунцӕ, нӕ организаци нин абони цӕйбӕрцӕ лӕвӕрттӕ кӕнуй, уойбӕрцӕ некӕдма. Ӕма ӕцӕгӕйдӕр уотӕ ’й! Нуртӕккӕ нин ес нӕхе сайт, удта интернет-телеуинунадӕ. Берӕ ӕвзӕгтӕбӕл рацудӕй «Библи – Нӕуӕг дуйней тӕлмац». 2014 ӕма 2015 анзи ба 14 горӕтеми, тӕккӕ устурдӕр стадионтӕй кӕцидӕрти, рауагътан, ӕртӕ бони ка цудӕй, уӕхӕн ӕхсӕнадӕмон конгресстӕ, «Фиццагидӕр агоретӕ Хуцауи Паддзахадӕ!», зӕгъгӕ. Еци конгрессти ка адтӕй, уонӕн сӕ цийнӕн кӕрон дӕр н’ адтӕй!

¹⁵ Берӕ хуӕртӕ ӕма ӕнсувӕртӕ боз ӕнцӕ, Йегови организаци нин ци дӕттуй, уомӕй. Зӕгъӕн, Азий ка лӕггадӕ кӕнуй, еу уӕхӕн бийнонтӕ нӕ интернет-телеуинунади туххӕй ниффинстонцӕ: «Мах иснисан кодтонцӕ еу минкъий горӕтмӕ. Ӕма нӕмӕ хатгай уотӕ фӕккӕсуй, цума еунӕгӕй байзадан, райронх ни уй, Йегови гъуддаг ӕнӕгъӕнӕ зӕнхӕбӕл дӕр ке цӕуй. Фал нӕ интернет-телеуинунади программитӕмӕ ку фӕккӕсӕн, уӕд ӕй фӕууинӕн,  ӕгас зӕнхӕбӕл дӕр нин ци берӕ хуӕртӕ ӕма ӕнсувӕртӕ ес, уой. Бунӕттон хуӕртӕ ӕма ӕнсувӕртӕн дӕр нӕ телеуинунадӕ сӕ зӕрдӕмӕ хъӕбӕр цӕуй. Арӕх фӕззӕгъунцӕ, зӕгъгӕ, алли мӕйӕ дӕр нӕуӕг программӕмӕ ку бакӕсӕн, уӕд нӕмӕ уотӕ фӕккӕсуй, цума Разамонӕг совети ӕнсувӕртӕ нӕ фарсмӕ ’нцӕ. Нур никки сӕрустурдӕр ӕнцӕ, Хуцауи организаций ке ’нцӕ, уой туххӕй».

¹⁶ Нур ӕгас зӕнхӕбӕл дӕр арӕзт кенӕ рӕвдзӕгонд цӕуй еу 2 500 зали. Гондураси еу ӕмбурди хуӕртӕ ӕма ӕнсувӕртӕ сӕ нӕуӕг зали ӕмбурд кӕнун ку райдӕдтонцӕ, уӕд ниффинстонцӕ: «Мах хъӕбӕр амондгун ан, Йегови устур бийнонтӕй ке ан ӕма нин ӕгас зӕнхӕбӕл дӕр хуӕртӕ ӕма ӕнсувӕртӕ ке ес. Уони фӕрци нӕмӕ, нур кӕми цӕрӕн, уоми нӕхе зал ес». Беретӕ ма уӕхӕн арфи дзурдтӕ ниффинсунцӕ, се ’взагбӕл Библи кенӕ нӕ публикацитӕй ескӕци ку рацӕуй, кенӕ ба ӕрдзон бӕллӕхи фӕсте нӕ организаций ӕнхус сӕхебӕл ку бавзарунцӕ, уӕд. Удта ма нӕмӕ арфи дзурдтӕ ӕрбарветунцӕ, берӕ адӕн кӕми фӕууй, уӕхӕн рауӕнти игъосун кӕнун цӕхуӕн тиллӕг хӕссуй, уой ӕхебӕл ка бавзурста, етӕ дӕр.

17. Цӕмӕй бӕрӕг ӕй, нӕ организаций куст Йегови ӕнхуси фӕрци ке цӕуй?

¹⁷ Йегови Ӕвдесӕн ка нӕй, уонӕй беретӕмӕ дессаг фӕккӕсуй, нӕ организацийӕн айдагъ нисайнӕгти фӕрци уойбӕрцӕ куд ӕнтӕсуй, е. Еу устур компаний хецау нин нӕ типографитӕй еуей ку фӕууидта, уӕд си не ’руагӕс кодта, еугурӕй дӕр си барвӕндӕй ке косунцӕ, удта еци куст нисайнӕгти фӕрци ке цӕуй ӕма ӕхца ке некӕмӕй корӕн, е. Уомӕн, дан, гӕнӕн нӕййес. Ӕма раст загъта! Мах ӕй зонӕн, уӕхӕн устур куст ӕрмӕстдӕр Йегови ӕнхуси фӕрци ке цӕуй (Иов 42:2).

18. а) Хуцауи Паддзахади гъуддагӕн ке ӕнхус кӕнӕн, е нин цӕхуӕн арфӕдзийнӕдтӕ хӕссуй? б) Нӕ бон куд ӕй нӕ сувӕллӕнтти, удта нӕугути рӕдаудзийнадӕмӕ разӕнгард кӕнун?

¹⁸ Хуцауи Паддзахади гъуддагӕн ӕнхус кӕнун нӕ бон ке ӕй, уой мах устур кадӕбӕл нимайӕн. Ӕма нин Йеговӕ зӕрдӕ ӕвӕруй, уой туххӕй нин арфӕ ке кӕндзӕй (Мал. 3:10). Хуцау загъта, рӕдауӕй ка дӕттуй, етӕ хуарздзийнӕдтӕй ке бафсӕддзӕнцӕ. (Бакӕсӕ Ӕмбесӕндтӕ 11:24, 25.) Уомӕй уӕлдай ма рӕдау ку уӕн, уӕд амондгундӕр уодзиан, уомӕн ӕма «райсунӕй раттун амондгундӕр гъуддаг ӕй» (Гъуд. 20:35). Нӕ дзурдтӕй, удта нӕ гъуддӕгтӕй нӕ бон ӕй нӕ сувӕллӕнтти, удта ӕмбурдтӕмӕ ӕрӕги цӕун ка райдӕдта, уони разӕнгард кӕнун, цӕмӕй Хуцауи гъуддагӕн рӕдауӕй ӕнхус кӕнонцӕ. Ӕма уӕд берӕ арфӕдзийнӕдтӕй исхайгин уодзӕнцӕ.

19. Аци статья дӕ цӕмӕ баразӕнгард кодта?

¹⁹ Цидӕриддӕр нӕмӕ ес, етӕ еугурӕйдӕр Хуцауи лӕвар ӕнцӕ, ӕма ин уомӕй ку фӕххай кӕнӕн, уӕд бавдесӕн, уарзгӕ ’й ке кӕнӕн ӕма си боз ке ан (1 Анз. 29:17). Израилӕгтӕ ковӕндонӕ искӕнунмӕ нисайнӕгтӕ ку лӕвардтонцӕ, уӕд «цийнӕ кодтонцӕ, Йеговӕн лӕвӕрттӕ ке хастонцӕ, уобӕл, уомӕн ӕма сӕ хастонцӕ зӕрдиагӕй» (1 Анз. 29:9). Гъӕйдӕ мадта мах дӕр идарддӕр Йеговӕн цийнӕгӕнгӕй дӕттӕн, ӕхуӕдӕг нин рӕдауӕй ци дӕттуй, уомӕй.