1, 2. 2018 анзи не ’гасейдӕр цӕхуӕн хабар байеу кӕндзӕй ӕма цӕмӕн? (Кӕсӕ хузӕмӕ статьяй райдайӕни.)

2018 анзи 31 мартъий ӕгас зӕнхӕбӕл дӕр милиуангай адӕн бӕрӕг кӕндзӕнцӕ, анзмӕ еунӕг хатт ка фӕууй, уӕхӕн хабар. Хорнигулди фӕсте Йегови Ӕвдесӕнтӕ, сӕ хӕццӕ ба ма Хуцауи туххӕй фулдӕр базонун ке фӕндуй, еци адӕн дӕр, еумӕ бӕрӕг кӕндзӕнцӕ Киристей мӕлӕт Имисӕн изӕр. Алли анз дӕр еци хабар адӕни куд байеу кӕнуй, уотӕ сӕ еунӕг хабар дӕр нӕ байеу кӕнуй!

² Расагъӕс кӕнӕ, еци бон Йеговӕ ӕма Йесо куд фӕццийнӕ кӕнуцӕ, ӕгас зӕнхӕбӕл дӕр милиуангай адӕн, хор кӕми куд нигулгӕ цӕуй, уотӕ еци ӕхсидзгӕ хабар исбӕрӕг кӕнунмӕ куд ӕрӕмбурд унцӕ, уомӕ кӕсгӕй. Апостол Иоанн ниффинста, цӕстӕбӕлуайӕни ци фӕууидта, уой: «Фӕууидтон хъӕбӕр берӕ адӕн – банимайун дӕр сӕ неке бон адтӕй – еугур адӕнтӕй, муггӕгтӕй, адӕнихӕттитӕй ӕма ӕвзӕгтӕй. [...] Ӕма гъӕрӕй дзурдтонцӕ: „Нӕ ервӕзунгӕнгутӕ ӕнцӕ нӕ Хуцау – паддзахбадӕнбӕл ка бадуй, е, ӕма Уӕриккӕ!“» (Рарг. 7:9, 10). Ӕма ӕцӕгӕйдӕр дессаг ӕй, алли анз дӕр Имисӕн изӕри рӕстӕг уойбӕрцӕ  адӕн Йегови ӕма Йесой искадгин кӕнунмӕ ке ӕрӕмбурд унцӕ, е!

3. Аци статьяй дзуапп цӕхуӕн фарстатӕбӕл базондзиан?

³ Аци статьяй дзуапп базондзиан цуппар фарстайебӕл: 1) Мӕ бон куд ӕй мӕхе Имисӕн изӕрмӕ бацӕттӕ кӕнун, цӕмӕй мин ӕцӕгӕйдӕр пайда ӕрхӕсса? 2) Имисӕн изӕр Хуцауи адӕни куд еу кӕнуй? 3) Мӕ бон куд ӕй, Хуцауи адӕни астӕу ци еудзийнадӕ ес, уой гъӕуай кӕнун? 4) Ескӕд Имисӕн изӕр фӕстаг хатт бӕрӕг кӕндзиан? Кӕд гъо, уӕд е кӕд уодзӕй?

4. Имисӕн изӕрмӕ ӕрбацӕун ӕхсидзгӕ цӕмӕн ӕй?

⁴ Имисӕн изӕрмӕ ӕрбацӕун ӕхсидзгӕ цӕмӕн ӕй? Еу гъуддаг уой медӕги ӕй, ӕма ӕмбурдтӕмӕ цӕун, нӕ лӕггадӕмӕ ка хауй, уӕхӕн гъуддӕгтӕй сӕ еу ӕй. Ке зӕгъун ӕй гъӕуй, Йеговӕ дӕр ӕма ’й Йесо дӕр уинунцӕ, еци ӕхсидзгӕ фембӕлдмӕ ӕрбацӕунбӕл ка байархайдта, уони. Ӕма мах дӕр фӕндуй, цӕмӕй, гӕнӕн уогӕй, аци анз дӕр Имисӕн изӕрмӕ ӕрбацӕуӕн ӕма Йегови, удта Йесой зӕрдӕ барохс кӕнӕн. Ӕмбурдтӕн ӕцӕгӕйдӕр ке аргъ кӕнӕн, е нӕ гъуддӕгтӕй дӕр бӕрӕг ку уа, уӕд уотемӕй Йеговӕн фадуат дӕтдзиан, цӕмӕй нин ӕ «зӕрдӕбӕлдарӕн киунуги» кенӕ «царди киунуги», нӕ нӕмттӕ ниффинса. Еци киунуги финст цӕунцӕ, Йеговӕ ӕносон цард раттуйнаг кӕмӕн ӕй, уони нӕмттӕ (Мал. 3:16; Рарг. 20:15).

5. Имисӕн изӕри размӕ нӕ бон ци ӕй кӕнун, цӕмӕй исбӕлвурд кӕнӕн, «ӕууӕндундзийнади федар ан ӕви нӕ»?

⁵ Хуарз адтайдӕ Имисӕн изӕри размӕ еци бӕнтти минкъий фулдӕр рӕстӕг рахецӕн кӕнун, цӕмӕй Йеговӕмӕ исковӕн ӕма лӕмбунӕг расагъӕс кӕнӕн, ӕ хӕццӕ нин ци лимӕндзийнадӕ ес, е цӕйбӕрцӕбӕл федар ӕй, уобӕл. (Бакӕсӕ 2 Коринфӕгтӕмӕ 13:5.) Апостол Павел финста: «Уӕ зӕрдитӕмӕ никкӕсетӕ, ӕууӕндундзийнади федар айтӕ ӕви нӕ». Цума уомӕн куд ес гӕнӕн? Дӕхе бафӕрсӕ: «Нӕ организаци, Йеговӕ ӕ фӕндон ке фӕрци исӕнхӕст кӕндзӕй, еци организаци ке ӕй, уобӕл ӕцӕгӕйдӕр ӕууӕндун? Цӕмӕй хуарз хабар игъосун кӕнон ӕма адӕни ахур кӕнон, уой туххӕй мӕ бон цидӕриддӕр ӕй, уой кӕнун? Мӕ гъуддӕгтӕй бӕрӕг ӕй, фӕстаг бӕнтти ке цӕрӕн ӕма тагъд Сайтани дуйнейӕн ӕ кӕрон ке ӕрцӕудзӕй, уой ке лӕдӕрун? Донаргъуд ку райстон, уӕд Йеговӕ ӕма Киристебӕл куд федарӕй ӕууӕндтӕн, уотӕ федарӕй сӕбӕл абони дӕр ӕууӕндун?» (Матф. 24:14; 2 Тим. 3:1; Дзиуит. 3:14). Аци фарстатӕбӕл ку расагъӕс кӕнӕн, уӕд «исбӕлвурд кӕндзиан» нӕ зӕрди ци ес, уой.

6. а) Ӕносон цардӕй цӕй фӕрци исхайгин уодзиан? б) Алли анз дӕр еу хестӕр нӕлгоймаг ӕхе Имисӕн изӕрмӕ куд фӕццӕттӕ кӕнуй ӕма дӕу бон дӕр куд ӕй уотӕ архайун?

⁶ Нӕ бон куд ӕй нӕхе Имисӕн изӕрмӕ бацӕттӕ кӕнун? Зӕгъӕн, нӕ бон ӕй, еци хабар куд ӕхсидзгӕ ӕй, уой туххӕй финст кӕми ес, еци статьятӕ бакӕсун ӕма сӕбӕл лӕмбунӕг расагъӕс кӕнун. (Бакӕсӕ Иоанни 3:16; 17:3.) Цӕмӕй ӕносон цардӕй исхайгин уӕн, уой туххӕй гъӕуй Йегови «базонун» ӕма ин ӕ Фурт, Йесо Киристебӕл «ӕууӕндун». Мадта нӕ бон ӕй, Йеговӕ ӕма Йесомӕ ке фӕрци бахӕстӕг уодзиан, уӕхӕн ӕрмӕг ӕртасун. Рагӕйдӕр хестӕр нӕлгоймагӕй ка лӕггадӕ кӕнуй, еу уӕхӕн ӕнсувӕр берӕ ӕнзти дӕргъи ӕмбурд  кӕнуй, Имисӕн изӕри туххӕй, удта Йеговӕ ӕма Йесой уарзондзийнади туххӕй дзурд кӕми цӕуй, уӕхӕн статьятӕ «Гъӕуайгӕнӕн мӕсугӕй». Ӕма сӕ Имисӕн изӕри размӕ цалдӕр къуӕрей дӕргъи нӕуӕгӕй фӕккӕсуй ӕма фӕссагъӕс кӕнуй, еци хабар бӕрӕг кӕнун куд ӕхсидзгӕ ӕй, уобӕл. Еуӕй-еухатт сӕбӕл еу кенӕ дууӕ статьяй бафтауй. Уомӕй уӕлдай ма фӕккӕсуй, Имисӕн изӕри размӕ Библийӕй кӕсуйнаг ка фӕууй, уой дӕр. Ӕхуӕдӕг куд загъта, уомӕ гӕсгӕ сӕ кӕд алли анз дӕр фӕккӕсуй, уӕддӕр си алли хатт дӕр ӕхецӕн нӕуӕг ести иссеруй. Сӕйрагидӕр ба е ӕй, ӕма уой фӕрци Йегови ӕма Йесой никки хъӕбӕрдӕр уарзун райдӕдта ӕма еци уарзондзийнадӕ анзӕй-анзмӕ федардӕргӕнгӕ цӕуй. Ду дӕр уотӕ лӕмбунӕг ку ӕртасай, уӕд дӕуӕн дӕр дӕ уарзондзийнадӕ федардӕр кӕндзӕй, удта никки хъӕбӕрдӕр аргъ кӕндзӕнӕ, Йеговӕ ӕма Йесо мах туххӕй ци искодтонцӕ, уомӕн. Ӕма дин уой фӕрци Имисӕн изӕр фулдӕр пайда ӕрхӕсдзӕй!

7. а) Йесо Имисӕн изӕрӕн бундор ку ӕрӕвардта, уӕд Хуцаумӕ цӕй туххӕй искувта? б) Йеговӕ Йесой кувд ке фегъуста, е цӕмӕй бӕрӕг ӕй?

⁷ Йесо Имисӕн изӕрӕн бундор ку ӕрӕвардта, уӕд Хуцаумӕ искувта, цӕмӕй ӕ фӕдбӕлдзӕугутӕн сӕ астӕу адтайдӕ, ӕ Фиди хӕццӕ ин ци еудзийнадӕ ес, уӕхӕн еудзийнадӕ. (Бакӕсӕ Иоанни 17:20, 21.) Дзурд дӕр ибӕл нӕййес, Йеговӕ ӕ хъазар Фурти кувд фегъуста ӕма абони милиуангай адӕн ӕууӕндунцӕ, Йеговӕ Йесой зӕнхӕмӕ ке рарвиста, уобӕл. Удта Хуцауи адӕни астӕу ес, Йесо ӕ кувди ке кой кодта, еци еудзийнадӕ дӕр. Ӕма еци еудзийнадӕ сӕ фембӕлдти хуарз фӕззиннуй, уӕлдайдӕр ба – Имисӕн изӕри рӕстӕг. Еци бон ӕнӕгъӕнӕ зӕнхӕбӕл дӕр алли бӕстити ӕрӕмбурд унцӕ милиуангай адӕн аллихузи адӕнихӕттитӕй. Еуӕй-еу рауӕнти ба ма адӕнмӕ дессаг дӕр фӕккӕсуй, аллихузи адӕнихӕттитӕй ка ӕй, еци адӕн дини хӕццӕ баст хабари еумӕ ке ӕрӕмбурд унцӕ. Кӕмӕдӕрти ба е раст дӕр нӕ фӕккӕсуй. Фал Йеговӕ ӕма Йесо ба еци гъуддагмӕ ӕндӕрхузи цӕстӕй кӕсунцӕ. Уонӕн ӕхцӕуӕн фӕууй, Имисӕн изӕри рӕстӕг уӕхӕн еудзийнадӕ ке февдесӕн, е!

8. Пахампар Йезекил, Йегови адӕни астӕу ци еудзийнадӕ уодзӕй, уой туххӕй ци загъта?

⁸ Махмӕ, Йегови адӕнмӕ, дессаг нӕ кӕсуй, нӕ астӕу уӕхӕн еудзийнадӕ ке ес, е. Уотӕ ке уодзӕй, уой Йеговӕ берӕ раздӕр фегъосун кодта. Пахампар Йезекилӕн загъта, цӕмӕй дууӕ лӕдзӕги райстайдӕ, еу «Иудӕн», иннӕ ба – «Иосифӕн», ӕма сӕ уой фӕсте ба байеу кодтайдӕ, еу лӕдзӕг си куд рауадайдӕ, уотӕ. (Бакӕсӕ Йезекил 37:15–17.) Брошюри «Агорӕ Хуцауи Паддзахадӕ, мулк нӕ, фал» (bw572-OSS) рубрики «Кӕсгути фарстатӕ» финст адтӕй: «Йеговӕ пахампар Йезекилӕн загъта, цӕмӕй фегъосун кодтайдӕ, израилӕгтӕ Зӕрдӕвӕрд зӕнхӕмӕ ке ӕрӕздӕхдзӕнцӕ ӕма нӕуӕгӕй еу адӕн ке исуодзӕнцӕ. Аци пахампарадӕ ма амонуй, фӕстаг бӕнтти Хуцауӕн ка лӕггадӕ кӕндзӕй, етӕ еу адӕн ке исуодзӕнцӕ, уомӕ дӕр».

9. Йезекили пахампарадӕ ке ӕнхӕст кӕнуй, е алли анз дӕр Имисӕн изӕри рӕстӕг куд фӕззиннуй?

⁹ 1919 анзӕй фӕстӕмӕ Йеговӕ райдӕдта исӕрст киристӕнттӕн разамунд дӕттун. Етӕ адтӕнцӕ, «Иудӕн» ка адтӕй, еци лӕдзӕг кӕмӕ амудта, етӕ. Хуцау сӕ байеу кодта ӕма иссӕнцӕ  «еу адӕн». Фал фӕстӕдӕр фулдӕр кӕнун райдӕдтонцӕ, зӕнхӕбӕл ӕносмӕ цӕруни нифс кӕмӕн адтӕй, етӕ. Еци адӕнмӕ ба амудта, «Иосифӕн» ка адтӕй, еци лӕдзӕг. Йеговӕ зӕрдӕ байвардта, еци дууӕ лӕдзӕги ке байеу уодзӕнцӕ ӕма ӕ къохи «еу лӕдзӕг» ке исуодзӕнцӕ (Йез. 37:19). Ӕма ӕцӕгӕйдӕр, исӕрст киристӕнтти, удта «ӕндӕр фусти» байеу кодта, ӕма иссӕнцӕ «еу дзогӕ» (Иоан. 10:16; Зах. 8:23). Абони еци дууӕ къуари ӕмвӕндӕй архайунцӕ ӕма Йеговӕн еумӕ лӕггадӕ кӕнунцӕ. Уонӕн ес еу Паддзах, Йезекили пахампаради Хуцау «мӕ лӕггадгӕнӕг Давид» ке исхудта, е – Йесо Киристе (Йез. 37:24, 25). Алли анз дӕр исӕрст киристӕнттӕ ӕма ӕндӕр фустӕ Имисӕн изӕри рӕстӕг еумӕ ку ӕрӕмбурд унцӕ, уӕд рабӕрӕг уй, сӕ астӕу, Йезекил ӕ пахампаради ци еудзийнади кой кодта, еци еудзийнадӕ ке ес. Фал ни алке бон дӕр ци ӕй кӕнун, цӕмӕй еци еудзийнадӕ гъӕуай кӕнӕн?

10. Нӕ бон куд ӕй нӕ астӕу ци еудзийнадӕ ес, уой гъӕуай кӕнун?

¹⁰ Нӕ бон куд ӕй нӕ еудзийнадӕ гъӕуай кӕнун? Фиццаг: архайӕ, цӕмӕй сӕрниллӕг уай. Йесо зӕнхӕбӕл ку адтӕй, уӕд ӕ фӕдбӕлдзӕугутӕн дзурдта, сӕрниллӕг ке гъӕуама уонцӕ (Матф. 23:12). Сӕрниллӕг ку уӕн, уӕд аци дуйней адӕни хузӕн нӕхе иннетӕй уӕлдӕр  нӕ ивӕрдзиан. Еци менеуӕг нӕмӕ ку уа, уӕд ӕмбурди ӕхемӕ разамунд ка есуй, еци ӕнсувӕрти нимайдзиан ӕма сӕмӕ игъосдзиан. Ӕма уотемӕй ӕмбурди уодзӕй еудзийнадӕ. Фиццагидӕр ба Хуцауи зӕрдӕ рохс кӕндзиан, уомӕн ӕма Йеговӕ «сӕрбӕрзонд адӕнӕн сӕ нихмӕ ӕй, сӕрниллӕгтӕн ба хай кӕнуй е ’стур хуарзӕнхӕй» (1 Пет. 5:5).

11. Имисӕн изӕри нисӕнттӕ цӕмӕ амонунцӕ, уобӕл ку сагъӕс кӕнӕн, уӕд нин е куд банхус кӕндзӕй нӕ еудзийнадӕбӕл архайун?

¹¹ Дуккаг: Имисӕн изӕри размӕ, уӕлдайдӕр ба еци ӕхсидзгӕ фембӕлдмӕ ку ӕрбацӕуӕн, уӕд гъӕуама лӕмбунӕг расагъӕс кӕнӕн, къӕхигӕнӕ дзол ӕма сурх сӕнӕ цӕмӕ амонунцӕ, уобӕл (1 Кор. 11:23–25). Дзол амонуй Йесой ӕнӕтӕрегъӕд бауӕрмӕ, мах туххӕй нивонди ке ӕрхаста, еци бауӕрмӕ. Сӕнӕ ба амонуй, мах туххӕй ке никкалдта, еци тогмӕ. Фал еци нисӕнттӕ цӕмӕ амонунцӕ, уой ӕнӕуой лӕдӕрун фагӕ нӕй. Гъӕуама нӕ зӕрдӕбӕл дарӕн, еци нивонд ци устур уарзондзийнадӕбӕл дзорӕг ӕй, уой. Йеговӕ ӕ уарзондзийнадӕ бавдиста, мах туххӕй ӕ Фурти ке нӕ бавгъау кодта, уомӕй. Йесо ба ӕ уарзондзийнадӕ бавдиста, мах туххӕй ӕ цард раттунмӕ цӕттӕ ке адтӕй, уомӕй. Ци уарзондзийнадӕ нӕмӕ бавдистонцӕ, уобӕл ку сагъӕс кӕнӕн, уӕд сӕ мах дӕр уарздзиан. Йегови ке уарзӕн, уой фӕрци кӕрӕдзебӕл федар тӕгтӕй баст ан ӕма нӕ астӕу ес еудзийнадӕ.

12. Йесо ци хабар радзурдта, уомӕй куд зиннуй, Йегови уотӕ ке фӕндуй, цӕмӕй кӕрӕдземӕн хатир кӕнӕн?

¹² Ӕртиккаг: гъӕуама кӕрӕдземӕн хатир кӕнӕн. Уотемӕй ӕвдесдзиан, Йеговӕ нин Киристей нивонди фӕрци нӕ тӕрегъӕдтӕ ке хатир кӕнуй, уомӕн устур аргъ ке кӕнӕн, уой. Кӕрӕдземӕн хатир кӕнун куд ӕхсидзгӕ ӕй, уой балӕдӕрун кӕнунмӕ Йесо радзурдта паддзах ӕма ӕ цагъарти хабар. Дӕ хуарзӕнхӕй, бакӕсӕ Матфеййи 18:23–34 уой фӕсте ба дӕхе бафӕрсӕ: «Йесо куд ахур кӕнуй, уомӕ гӕсгӕ архайун мӕ фӕндуй? Мӕ хуӕртӕ ӕма ме ’нсувӕртӕмӕ фӕразон фӕуун, удта сӕ балӕдӕрунбӕл фӕййархайун? Еске мин мӕ зӕрдихудти ку бацӕуа, уӕд ин ниххатир кӕнунмӕ цӕттӕ уодзӕн?» Ке зӕгъун ӕй гъӕуй, тӕрегъӕдтӕ дӕр аллихузи фӕуунцӕ: еуетӕ си ӕнцондӕр ниххатир кӕнӕн ӕнцӕ, иннетӕ ба – зиндӕр. Фал Йесой хабарӕй бӕрӕг ӕй, Йегови уотӕ ке фӕндуй, цӕмӕй кӕрӕдземӕн хатир кӕнӕн. (Бакӕсӕ Матфеййи 18:35.) Йесо куд загъта, уомӕ гӕсгӕ ниххатир кӕнун ке ӕнгъезуй, уӕхӕн рӕдудтитӕ не ’нсувӕртӕн ку нӕ хатир кӕнӕн, уӕд нин Йеговӕ дӕр нӕ хатир кӕндзӕй. Уобӕл лӕмбунӕг расагъӕс кӕнун гъӕуй. Цӕмӕй нӕ астӕу ци еудзийнадӕ ес, уой багъӕуай кӕнӕн, уой туххӕй гъуама кӕрӕдземӕн хатир кӕнӕн, Йесо нӕ куд ахур кодта, уотӕ.

13. Фарнӕбӕл ку архайӕн, уӕд уотемӕй нӕ еудзийнадӕ куд гъӕуай кӕнӕн?

¹³ Кӕрӕдземӕн ку хатир кӕнӕн, уӕд е уобӕл дзорӕг уодзӕй, ӕма фарнӕмӕ турнӕн. Апостол Павел уӕхӕн унаффӕ равардта: «Зӕрдиагӕй архайетӕ, Хуцауи сугъдӕг хъаурӕ ке дӕттуй, еци еудзийнади цӕрунбӕл ӕма кӕрӕдзебӕл баст уотӕ фарни тӕгтӕй» (Еф. 4:3). Имисӕн изӕри рӕстӕг, уӕлдайдӕр ба еци изӕр, лӕмбунӕг расагъӕс кӕнӕ, иннетӕмӕ цӕхуӕн зӕрдӕ дарис, уобӕл. Дӕхе бафӕрсӕ: «Хатир кӕнун ка зонуй, уӕхӕн адӕймагӕй ма зонунцӕ? Фарнӕ ӕма еудзийнадӕбӕл ӕгас хъауритӕй ка архайуй, уӕхӕн адӕймаг мӕ исхонӕн ес?» Аци фарстатӕ хъӕбӕр ӕхсидзгӕ ’нцӕ,  ӕма сӕбӕл хуарз уайдӕ аци анз Имисӕн изӕри рӕстӕг лӕмбунӕг расагъӕс кӕнун.

14. Уотӕ зӕгъӕн кӕд уодзӕй, ӕма «уарзондзийнади фӕрци кӕрӕдземӕн барӕн»?

¹⁴ Цуппӕрӕймаг: гъӕуама нӕ хуӕртӕ ӕма не ’нсувӕрти уарзӕн, Йеговӕ сӕ куд уарзуй, уотӕ (1 Иоан. 4:8). Уотӕ гъӕуама макӕд дзорӕн: «Мӕ хуӕртӕ ӕма ме ’нсувӕрти уарзун, е мӕ ихӕс ке ӕй, ӕрмӕстӕдӕр уой туххӕй». Уӕхӕн зундбӕл хуӕст ку уӕн, уӕд Павели унаффӕмӕ гӕсгӕ нӕ архайдзиан, «уарзондзийнади фӕрци кӕрӕдземӕн баретӕ», зӕгъгӕ (Еф. 4:2). Павел уотид нӕ загъта, «кӕрӕдземӕн баретӕ», зӕгъгӕ, фал, дан, «уарзондзийнади фӕрци». Еци дууӕ гъуддаги кӕрӕдземӕй хецӕн кӕнунцӕ. Не ’мбурдти аллихузи адӕн ес, ӕма сӕ еугурейдӕр Йеговӕ ӕрбакодта (Иоан. 6:44). Уомӕ гӕсгӕ федарӕй зӕгъӕн ес, ӕма си алке дӕр хецӕнӕй цӕйдӕр туххӕй уарзуй. Ӕма сӕ кӕд Йеговӕ уарзуй, уӕд мах ба уотӕ куд гъӕуама сагъӕс кӕнӕн, ӕма нӕ уарзти аккаг нӕ ’нцӕ? Мадта гъӕуама нӕ хуӕртӕ ӕма не ’нсувӕрти, Йеговӕ нин куддӕриддӕр фӕдзӕхсуй, уотӕ уарзӕн (1 Иоан. 4:20, 21).

15. Кӕцӕй ӕй зонӕн, ескӕд фӕстаг Имисӕн изӕр ке бӕрӕг кӕндзиан?

¹⁵ Уодзӕй уӕхӕн рӕстӕг, ӕма Имисӕн изӕр фӕстаг хатт бӕрӕг кӕндзиан. Кӕцӕй ӕй зонӕн? Ӕ фиццаг финстӕги коринфӕгтӕмӕ Павел исӕрст киристӕнттӕмӕ ниффинста, алли анз дӕр Имисӕн изӕр ку фӕббӕрӕг кӕнунцӕ, уӕд ке «фегъосун кӕнунцӕ нӕ Хецауи мӕлӕти туххӕй, цалинмӕ не ’рцӕуа, уӕдмӕ» (1 Кор. 11:26). Аци рауӕн Павел ци ӕрцуди кой кодта, уой туххӕй Йесо ӕхуӕдӕг дӕр дзурдта, фӕстаг бӕнтти кой ку кодта, уӕд. Йесо устур бӕллӕхи туххӕй ку дзурдта, уӕд загъта: «Адӕймаги Фурти бӕрӕггӕнӕн фӕззиндзӕй арвбӕл, ӕма зӕнхӕбӕл еугур адӕнтӕ дӕр нигъгъарӕнгӕ кӕндзӕнцӕ ӕма сӕ реу ниххуайдзӕнцӕ, ӕма фӕууиндзӕнцӕ Адӕймаги Фурти уӕларвон мегътӕбӕл хъаурӕ ӕма устур кади хӕццӕ ӕрцӕугӕ. Уадиндзӕ гъӕрӕй ку ниууаса, уӕд е [Йесо] ӕ изӕдти рарветдзӕй, ӕма ин е ’взурст адӕни ӕрӕмбурд кӕндзӕнцӕ цӕгат ӕма хонсарӕй, скӕсӕн ӕма нигулӕнӕй, арвӕн ӕ еу кӕронӕй – иннӕ кӕронмӕ» (Матф. 24:29–31). Йесо «е ’взурст адӕни ӕрӕмбурд кӕндзӕй», исӕрст киристӕнттӕй ма зӕнхӕбӕл ка уа, етӕ еугурӕйдӕр сӕ уӕларвон хуӕрзеуӕг ку райсонцӕ, уӕд. Еци хабар ӕрцӕудзӕй, устур бӕллӕхи рӕстӕг, фал Армагеддони тугъд куд нӕма райдайа, уӕд. Еци тугъди рӕстӕг Йесо ӕ 144 000 ӕмпаддзахей хӕццӕ зӕнхон паддзӕхти хӕццӕ истохдзӕй ӕма сӕбӕл фӕууӕлахез уодзӕй (Рарг. 17:12–14). Мадта Йесо исӕрст киристӕнтти ӕрӕмбурд кӕнунмӕ ку ’рцӕуа, еци хабари размӕ ци Имисӕн изӕр исбӕрӕг кӕндзиан, е уодзӕй фӕстаг Имисӕн изӕр.

16. Цӕмӕн дӕ фӕндуй аци анз Имисӕн изӕрмӕ ӕрбацӕун?

¹⁶ Мадта байархайетӕ, цӕмӕй 2018 анзи 31 мартъий ка уодзӕй, еци Имисӕн изӕрмӕ ӕрбацӕуайтӕ. Удта Йеговӕй ӕнхус коретӕ, цӕмӕй ӕ адӕни астӕу ци еудзийнадӕ ес, уой гъӕуай кӕнайтӕ. (Бакӕсӕ Псалом 133:1.) Иронх уи ма уӕд, уӕхӕн рӕстӕг ке ӕрцӕудзӕй, ӕма Имисӕн изӕр фӕстаг хатт исбӕрӕг кӕндзиан. Нур ба бал байархайӕн, цӕмӕй Имисӕн изӕрмӕ ӕрбацӕуӕн ӕма, Хуцауи адӕни астӕу ци еудзийнадӕ ес, уомӕн аргъ кӕнӕн.