1, 2. Абони Хуцауи адӕнӕн тӕссаг цӕмӕй ӕй? (Кӕсӕ хузӕмӕ статьяй райдайӕни.)

БЕРӔ дохтиртӕ фӕдздзӕбӕх кӕнунцӕ, хуӕцгӕ незӕй ка сӕйуй, уӕхӕн адӕни. Хъӕбӕр сӕ фӕффӕндуй син банхус кӕнун. Фал гъӕуама сӕхуӕдтӕ дӕр сӕхе гъӕуай кӕнонцӕ, цӕмӕй сӕбӕл сӕ сӕйгити нез ма бафтуйа. Абони Йегови лӕггадгӕнгутӕ дӕр раст гъе уӕхӕн уавӕри ’нцӕ. Беретӕ ни цӕргӕ дӕр, удта косгӕ дӕр кӕнунцӕ, аци дуйней зундбӕл хуӕст ка ӕй, уӕхӕн адӕни хӕццӕ, ӕма нин тӕссаг ӕй уони зунд махбӕл дӕр ку бацӕфса, уомӕй. Уӕхӕн уавӕри нин ӕнцон нӕ уодзӕй нӕхе багъӕуай кӕнун.

² Аци фӕстаг бӕнтти, Хуцауи ка нӕ уарзуй, еци адӕн ин ӕ раст уагӕвӕрдтӕ ӕппундӕр нецӕмӕ дарунцӕ. Апостол Павел ӕ дуккаг финстӕги Тимофеймӕ ниффинста, Хуцауи ка нӕ зонуй, уонӕмӕ ци лӕгъуз менеугутӕ уодзӕй, уой туххӕй. Павел загъта, кӕрон куд хӕстӕгдӕр кӕна, уотӕ уӕхӕн адӕн фулдӕрӕй-фулдӕр ке кӕндзӕнцӕ. (Бакӕсӕ 2 Тимофеймӕ 3:1–5, 13.) Ӕма кӕд еци менеугутӕмӕ хъӕбӕр лӕгъуз цӕстӕй кӕсӕн, уӕддӕр е уобӕл дзорӕг нӕй, ӕма нин уӕхӕн адӕни зундахастӕй фегъӕстӕ унӕй тӕссаг  нӕй (Ӕмб. 13:20). Цума аци дуйней адӕни, удта Йегови лӕггадгӕнгути менеугутӕ цӕмӕй хецӕн кӕнунцӕ? Ӕма нӕ бон ци ӕй кӕнун, цӕмӕй уӕхӕн адӕнӕн Хуцауи базонунмӕ ӕнхус кӕнгӕй нӕхуӕдтӕ дӕр сӕ зундахастӕй ма фегъӕстӕ уӕн? Мадта ӕркӕсӕн аци фарстатӕмӕ.

3. 2 Тимофеймӕ 3:2–5 цӕхуӕн адӕни кой цӕуй?

³ Павел загъта, зӕгъгӕ, «фӕстаг бӕнтти искӕндзӕй хъӕбӕр уӕззау рӕстӕг». Уой фӕсте ба ранимадта, еци рӕстӕг беретӕмӕ ка уодзӕй, 19 уӕхӕн лӕгъуз менеуӕги. Уӕхӕн менеугути туххӕй ма Павел финста ӕ финстӕги Ромӕгтӕмӕ 1:29–31. Фал Тимофеймӕ финстӕги ци менеугути кой кодта, етӕ фулдӕр ӕнцӕ, удта си кӕцидӕртӕ Киристон Грекъаг Финстити ӕндӕр некӕмибал ӕмбӕлунцӕ. Фал уой дӕр зӕгъун гъӕуй, ӕма уӕхӕн менеугутӕ еугур адӕнмӕ нӕййес. Киристӕнтти кой ку кӕнӕн, уӕд уонӕмӕ бустӕги ӕндӕрхузи менеугутӕ ес. (Бакӕсӕ Малахи 3:18.)

4. Ӕ сӕр бӕрзӕндти ка хӕссуй, еци адӕн цӕхуӕн фӕуунцӕ?

⁴ Павел уотӕ ку загъта, адӕнӕй беретӕ хеуарзон ӕма ӕхцауарзагӕ уодзӕнцӕ, зӕгъгӕ, уӕд ма уотӕ дӕр загъта, хестауагӕ ӕма сӕрбӕрзонд ке уодзӕнцӕ, удта сӕ сӕр бӕрзӕндти ке хӕсдзӕнцӕ. Уӕхӕн адӕнмӕ уотӕ фӕккӕсуй, ӕма иннетӕй хуӕздӕр ӕнцӕ, уомӕн ӕма рӕсугъд ӕнцӕ, цӕмӕдӕр дзӕбӕх арӕхсунцӕ, ӕнцӕ гъӕздуг кенӕ ба цидӕр устур бунат ахӕссунцӕ. Уотӕ сӕ фӕффӕндуй, цӕмӕй син иннетӕ кадӕ кӕнонцӕ. Еу ахургонд сӕрбӕрзонд адӕни туххӕй ниффинста: «Сӕ зӕрдити ес „минкъий ковӕндонӕ“, ӕма еци ковӕндони сӕхецӕн фӕкковунцӕ». Сӕрбӕрзонддзийнадӕ уӕхӕн лӕгъуз менеуӕг ӕй, ӕма ’й сӕрбӕрзонд адӕн сӕхуӕдтӕ дӕр иннетӕмӕ нӕ уодӕнсунцӕ.

5. Хуцауи еузӕрдон лӕггадгӕнгутӕй кадӕртӕ сӕрбӕрзонд куд иссӕнцӕ?

⁵ Йеговӕ сӕрбӕрзонддзийнадӕй е ’сӕфт уинуй. Уомӕн «хъал цӕститӕ» ӕнадӕ ’нцӕ (Ӕмб. 6:16, 17). Сӕрбӕрзонд адӕймаг Хуцаумӕ некӕд бахӕстӕг уодзӕй (Пс. 10:4). Еци менеуӕг тӕккӕ фиццаг Сайтанмӕ фӕззиндтӕй (1 Тим. 3:6). Гъигагӕн, Хуцауи еузӕрдон лӕггадгӕнгутӕмӕ дӕр сӕрбӕрзонддзийнадӕ фӕззиннидӕ. Зӕгъӕн, Иуди паддзах Ози берӕ ӕнзти дӕргъи Йеговӕн еузӕрдонӕй лӕггадӕ кодта, фал ӕ хъаурӕ ку исберӕ ’й, уӕдта «ӕ зӕрдӕ исхъал ӕй, ӕма ӕхе бабун кодта. Ӕ Хуцау Йегови рази искодта тӕрегъӕд, Йегови ковӕндонӕмӕ бацудӕй, цӕмӕй бодсодзӕн нивондхӕссӕнбӕл бодӕ иссугътайдӕ». Фӕстӕдӕр ба паддзах Езеки дӕр ӕ зӕрди сӕрбӕрзонддзийнадӕн бунат искодта, кӕд цубур рӕстӕгмӕ, уӕддӕр (2 Анз. 26:16; 32:25, 26).

6. Уотӕ зӕгъӕн цӕмӕн ес, ӕма Давиди бон дӕр адтӕй сӕрбӕрзонд исун, фал уотӕ цӕмӕннӕ рауадӕй?

⁶ Еуӕй-еуетӕ сӕрбӕрзонд исунцӕ, зундгонд, хъаурӕгин, бакастӕй рӕсугъд кенӕ зарунмӕ дӕсни ке ’нцӕ, кенӕ ба син цидӕр устур бунат ке ес, уой туххӕй. Паддзах Давид еци искурдиӕдтӕй еуемӕй дӕр цох н’ адтӕй, фал уӕддӕр алкӕддӕр адтӕй сӕрниллӕг. Зӕгъӕн, Голиафи ку рамардта ӕма ин уой туххӕй паддзах Саул ӕ кизги ку лӕвардта, уӕд Давид загъта: «Ка дӕн ӕз ӕма ка ’нцӕ Израили мӕ хеуӕнттӕ, мӕ фиди хӕдзарвӕндаг, цӕмӕй паддзахи сиахс исуон?»  (1 Сам. 18:18). Цума Давидӕн ци ӕнхус кодта, ӕхе сӕрбӕрзонддзийнадӕй гъӕуай кӕнун? Ци искурдиӕттӕй ӕма кадгин ихӕстӕй хайгин адтӕй, етӕ ин, ӕхе имӕ ка ӕрниллӕг кодта ӕма имӕ е ’ргом ка раздахта, еци Хуцау Йеговӕй ке адтӕнцӕ, уой лӕдӕрдтӕй (Пс. 113:5–8). Давид некӕд иронх кодта, хуарзӕй имӕ цидӕриддӕр ес, етӕ ин Йеговӕй ке адтӕнцӕ. (Рабарӕ 1 Коринфӕгтӕмӕ 4:7.)

7. Ци нин банхус кӕндзӕй сӕрниллӕг ун?

⁷ Давиди хузӕн абони Йегови лӕггадгӕнгутӕ дӕр архайунцӕ, цӕмӕй сӕрниллӕг уонцӕ. Мах ӕй зонӕн, Йеговӕ – Дун-дуйней тӕккӕ хъаурӕгиндӕр ка ӕй, е – ӕхуӕдӕг дӕр сӕрниллӕг ке ӕй (Пс. 18:35). Уомӕ гӕсгӕ нӕ фӕндуй аци дзурдтӕмӕ гӕсгӕ архайун: «Уӕ зӕрдитӕмӕ арф есетӕ кӕрӕдзей зин, уотӕ хӕларзӕрдӕ, сӕрниллӕг, фӕлмӕн ӕма берӕфӕразон» (Кол. 3:12). Уомӕй уӕлдай ма уой дӕр зонӕн, ӕма уарзондзийнадӕ «ӕхе не стауй» ӕма «ӕ сӕр бӕрзӕндти нӕ хӕссуй» (1 Кор. 13:4). Иннетӕ нин нӕ сӕрниллӕгдзийнадӕ ку уинонцӕ, уӕд уони дӕр, ка ’й зонуй, бафӕнддзӕй Йегови базонун. Зӕгъӕн, Йегови Ӕвдесӕн ка нӕй, еци нӕлгоймӕгтӕй кадӕртӕ, сӕ бийнойнӕгтӕ сӕхе куд дарунцӕ, уой уингӕй Йегови ӕмбӕлттӕ исунцӕ. Раст гъе уотӕ, Хуцауи лӕггадгӕнгути сӕрниллӕгдзийнадӕ уингӕй, ка ’й зонуй, иннӕ адӕни дӕр бафӕнддзӕй Йегови базонун ӕма ин лӕггадӕ кӕнун (1 Пет. 3:1).

8. а) Сувӕллӕнттӕ дзурдмӕ ке нӕ фегъосунцӕ, уомӕ абони еуӕй-еуетӕ цӕхуӕн цӕстӕй кӕсунцӕ? б) Библий сувӕллӕнттӕн цӕхуӕн фӕдзӕхст ес?

⁸ Апостол Павел ниффинста, фӕстаг бӕнтти адӕн кӕрӕдземӕ цӕхуӕн зӕрдӕ дардзӕнцӕ, уой туххӕй. Зӕгъӕн, сувӕллӕнттӕ сӕ ниййергутӕмӕ нӕ игъосдзӕнцӕ. Абони беретӕмӕ уотӕ кӕсуй, ӕма, уоми лӕгъузӕй неци ес, ӕма е бӕрӕг ӕй еуӕй-еу киунугутӕй, кинотӕй ӕма телепередачитӕй. Фал ӕцӕгӕй ба сувӕллон дзурдмӕ ку нӕ фегъосуй, уӕд уой туххӕй бийнонти фарнӕ ихӕлгӕ кӕнуй. Ӕма е иннӕ адӕнбӕл дӕр ӕнӕфӕззингӕ нӕ фӕууй. Гъуддаг уотӕ ке ӕй, уой адӕн рагӕй фӕстӕмӕ дӕр лӕдӕрдтӕнцӕ. Зӕгъӕн, рагон Греций уӕхӕн ӕгъдау адтӕй, ӕма ӕ ниййерӕги ка ниццавтайтӕ, уобӕл бахъоди кодтайуонцӕ. Роми закъонмӕ гӕсгӕ ба адӕймаг ӕ фидӕмӕ ӕ къох ку исесидӕ, уӕд е нимад адтӕй уӕззау фундракӕндбӕл, ӕма ин уой туххӕй лӕгмари тӕрхон рахӕссиуонцӕ. Дзиуиттаг Финстити дӕр ӕма Киристон Грекъаг Финстити дӕр уӕхӕн фӕдзӕхст ес, цӕмӕй сувӕллӕнттӕ сӕ ниййергутӕн кадӕ кӕнонцӕ (Рац. 20:12; Еф. 6:1–3).

9. Сувӕллӕттӕн ци банхус кӕндзӕй, цӕмӕй сӕ ниййергути дзурдмӕ игъосонцӕ?

⁹ Сувӕллӕнттӕн ци банхус кӕндзӕй, цӕмӕй аци дуйней зундахастӕй ма фегъӕстӕ уонцӕ ӕма ӕгоммӕгӕс ма исуонцӕ? Сӕ ниййергутӕ син хуарзӕй ци кӕнунцӕ, уобӕл ку сагъӕс кӕнонцӕ, уӕд си боз уодзӕнцӕ ӕма син сӕ дзурдмӕ дӕр игъосдзӕнцӕ. Удта ма гъӕуама сӕ зӕрдӕбӕл даронцӕ, нӕ уӕларвон Фидӕ Йегови дӕр уотӕ ке фӕндуй. Ӕригӕнттӕ сӕ ниййергути хуарзи кой се ’нгӕртти астӕу ку кӕнонцӕ, уӕд етӕ дӕр сӕ ниййергутӕн кадӕ кӕндзӕнцӕ. Ке зӕгъун ӕй гъӕуй, ниййергути фудӕй бийнонти астӕу уарзондзийнадӕ ку нӕ уа, уӕд сӕмӕ сувӕллӕнттӕ дӕр нӕ игъосдзӕнцӕ. Фал сӕ  сӕ ниййергутӕ ӕцӕгӕй ке уарзунцӕ, уой ку уинонцӕ, уӕдта син сӕ дзурдмӕ игъосдзӕнцӕ, ӕнцон ку нӕ уа, уӕддӕр. Еу ӕригон ӕнсувӕр, Остин, зӕгъгӕ, дзоруй: «Мӕ ниййергутӕмӕ байгъосун мин алкӕд ӕнцон нӕ уидӕ, фал мин ци дзурдтонцӕ, е алкӕддӕр раст адтӕй, удта мин лӕдӕрун кодтонцӕ, цидӕр мин цӕмӕн уадзунцӕ, цидӕр ба цӕмӕннӕ уадзунцӕ, уой. Удта мӕ хӕццӕ ӕргом дзурдтонцӕ. Уотемӕй мин сӕ дзурдмӕ игъосун ӕнцондӕр адтӕй. Уидтон ӕй, мӕ хуарзбӕл мин ке тухсунцӕ ӕма мӕ фӕндадтӕй, цӕмӕй син сӕ зӕрдӕ рохс кодтайнӕ».

10, 11. а) Адӕни астӕу уарзондзийнадӕ ке нӕййес, е цӕхуӕн лӕгъуз менеугутӕй бӕрӕг ӕй? б) Ӕцӕг киристӕнттӕ ци уарзондзийнадӕ ӕвдесунцӕ, уой туххӕй ци ес зӕгъӕн?

¹⁰ Павел ма никкидӕр ци лӕгъуз менеугутӕ ранимадта, уонӕй дӕр бӕрӕг ӕй, фӕстаг бӕнтти адӕн кӕрӕдзей ке нӕ уарздзӕнцӕ. Сувӕллӕнттӕ сӕ ниййергутӕмӕ ке нӕ игъосдзӕнцӕ, уой туххӕй ку загъта, уӕд ма загъта, адӕн хуарздзийнадӕн аргъ кӕнун ке нӕ зондзӕнцӕ ӕма мӕнгард ке уодзӕнцӕ. Удта ма, дан, уодзӕнцӕ зиндзурд, гъома иннети хӕццӕ нӕ федаудзӕнцӕ. Уомӕй уӕлдай ма Хуцауи фаудзӕнцӕ ӕма кӕрӕдзебӕл гадзирахаттӕй цӕудзӕнцӕ. Иннети фудкой кӕндзӕнцӕ, гъома кӕрӕдзей номбӕл цъифӕ калдзӕнцӕ *.

¹¹ Йегови лӕггадгӕнгутӕ аци дуйней адӕнӕн сӕ фулдӕрӕй хъӕбӕр хецӕн кӕнунцӕ, уомӕн ӕма иннети ӕцӕг уарзтӕй уарзунцӕ. Ӕма уотӕ алкӕддӕр адтӕй. Киристей ку бафарстонцӕ, Моисеййи закъони фӕдзӕхститӕй тӕккӕ сӕйрагдӕр кӕци ӕй, уӕд загъта, фиццаг ке ӕй Хуцауи уарзун, дуккаг ба – иннети уарзун. (Матф. 22:38, 39). Киристе кодта, грекъагау ага́пе ка хуннуй, еци уарзондзийнади кой. Йесо ма ӕ ахуркӕнуйнӕгтӕн загъта, ӕцӕг киристӕнттӕ еци менеуӕгӕй бӕрӕг ке уодзӕнцӕ. (Бакӕсӕ Иоанни 13:34, 35.) Еци уарзондзийнадӕ ма сауӕнгӕ се ’знӕгтӕмӕ дӕр ӕвдесдзӕнцӕ (Матф. 5:43, 44).

12. Йесой уарзондзийнадӕ цӕхуӕн гъуддӕгтӕй бӕрӕг адтӕй?

¹² Йесо адӕни ке уарзуй, уой ӕ гъуддӕгтӕй бавдиста. Е еу горӕтӕй иннемӕ цудӕй ӕма адӕнӕн Хуцауи Паддзахади туххӕй хуарз хабар дзурдта. Хъӕрӕути, къулухти, къурути ӕма хъотургинти дзӕбӕх кодта, сауӕнгӕ ма мӕрдти дӕр игас кодта (Лук. 7:22). Йесо ма ӕ цард дӕр адӕни туххӕй равардта, кӕд си беретӕ се ’сӕфт уидтонцӕ, уӕддӕр. Йесо уӕхӕн уарзондзийнадӕ ке бавдиста, уомӕй ӕ уӕларвон Фиди бафӕнзта. Ӕма Йегови Ӕвдесӕнтӕ дӕр ӕгас зӕнхӕбӕл Киристей хузӕн иннети уарзунцӕ.

13. Нӕ уарзондзийнадӕ уингӕй иннети ци бафӕндуй?

¹³ Адӕн ӕй ку уинонцӕ, ке сӕ уарзӕн, уӕд сӕ, ка ’й зонуй, бафӕнддзӕй нӕ уӕларвон Фиди базонун. Зӕгъӕн, Таиланди еу нӕлгоймаг нӕ регионалон конгресмӕ ку ’рбацудӕй, уӕд нӕ хуӕртӕ ӕма ӕнсувӕрти астӕу ци уарзондзийнадӕ фӕууидта, е ӕ зӕрдӕмӕ хъӕбӕр фӕццудӕй. Сӕхемӕ ку ’рбаздахтӕй, уӕд Йегови Ӕвдесӕнтӕн загъта, цӕмӕй имӕ къуӕре дууӕ хатти Библи ахур кӕнунмӕ цудайуонцӕ. Еци нӕлгоймаг ӕ хӕстӕгутӕй алкӕмӕндӕр Йегови туххӕй радзурдта. Конгрессӕй ӕхсӕз мӕйемӕй ӕндӕр нӕ рацудӕй,  уотемӕй ин ӕмбурди адтӕй фиццаг ихӕслӕвӕрд, Библийӕй скъуддзаг бакӕсун. Мах ба архайӕн, иннетӕмӕ нӕ уарзондзийнадӕ ӕвдесун? Дӕхе бафӕрсӕ: «Мӕ бийнонтӕн, удта ӕмбурди ӕма игъосун кӕнгӕй иннетӕн зӕрдиагӕй фенхус кӕнун? Архайун, цӕмӕй иннетӕмӕ Йегови цӕстӕй кӕсон?»

14, 15. Аци фӕстаг бӕнтти ма беретӕмӕ цӕхуӕн лӕгъуз менеугутӕ ес, фал еуӕй-еуетӕ хуӕздӕрӕрдӕмӕ цӕй фӕрци раййивтонцӕ?

¹⁴ Аци фӕстаг бӕнтти ма адӕнмӕ ес, нӕхе кӕмӕй гъӕуама хезӕн, ӕндӕр уӕхӕн менеугутӕ дӕр. Зӕгъӕн, беретӕ хуарздзийнадӕ нӕ уарзунцӕ, сауӕнгӕ ма хуарз ци ӕй, уомӕй дӕр се ’сӕфт уинунцӕ. Хебӕл хуӕцун нӕ зонунцӕ ӕма ӕнцӕ ӕнӕхатир. Кадӕртӕ ӕнцӕ хевӕндӕ, ӕма сӕ миутӕ иннетӕбӕл куд фӕззиндзӕнцӕ, уой мӕтӕ сӕмӕ ӕппундӕр нӕййес.

¹⁵ Уӕхӕн лӕгъуз менеугутӕ кӕмӕ адтӕй, уонӕй беретӕ хъӕбӕр раййивтонцӕ. Ӕма уотӕ ке уодзӕй, уой туххӕй Библий дӕр финст адтӕй. (Бакӕсӕ Исаййи 11:6, 7.) Аци пахампарадӕмӕ гӕсгӕ аллихузи гъӕддаг сирдтӕ, зӕгъӕн, берӕгътӕ ӕма домбӕйттӕ гъӕуама уӕриккитӕ ӕма уӕсити хӕццӕ еумӕ хизтайуонцӕ. Цума уомӕн цӕй фӕрци адтӕй гӕнӕн? Пахампаради загъд адтӕй: «Уомӕн ӕма зӕнхӕ байдзаг уодзӕй зонундзийнӕдтӕй Йегови туххӕй» (Ис. 11:9). Фал сирдти бон Йегови базонун нӕй. Мадта аци пахампарадӕ, нӕуӕг дуйней адӕн ӕма сирдти астӕу  фарнӕ ке уодзӕй, ӕрмӕстдӕр уомӕ нӕ амонуй, фал ма, адӕнӕй беретӕн сӕ уодигъӕдӕ куд ӕййевдзӕй, уомӕ дӕр.

16. Библи беретӕн куд банхус кӕнуй сӕ уодигъӕдӕ раййевун?

¹⁶ Нӕ хуӕртӕ ӕма не ’нсувӕртӕй беретӕ раздӕр хъӕбӕр ӕнӕхатир адтӕнцӕ, раст берӕгъти хузӕн. Фал нур ба иннети хӕццӕ фӕрнӕй цӕрунцӕ. Еци киристӕнттӕй еуӕй-еуети туххӕй бакӕсӕн ес, на иуарунмӕ брошюри ци рубрикӕ фӕууй, «Библи ӕййевуй адӕймаги цард», зӕгъгӕ, уоми. Аци дуйней адӕнӕй беретӕ сӕхе уотӕ ӕвдесунцӕ, цума Хуцауӕн ковӕг адӕн ӕнцӕ, фал сӕ цардӕй ба е бӕрӕг нӕй. Йегови ка базудта ӕма ин лӕггадӕ кӕнун ка райдӕдта, етӕ ба уӕхӕн адӕнӕй хъӕбӕр хецӕн кӕнунцӕ. Кӕд раздӕр ӕнӕхатир адтӕнцӕ, уӕддӕр нур сӕ «уодигъӕдӕ нӕуӕгмӕ раййивтонцӕ – еци уодигъӕдӕ конд ӕй Хуцауи фӕндонмӕ гӕсгӕ ӕма ӕцӕг рӕстдзийнадӕ ӕма еузӕрдондзийнадӕмӕ гӕсгӕ» (Еф. 4:23, 24). Хуцауи ка базонуй, етӕ ’й балӕдӕрунцӕ, адӕймаги ӕ закъӕнттӕмӕ гӕсгӕ цӕрун ке гъӕуй. Ӕма сӕ бафӕндуй сӕ царди цидӕртӕ раййевун. Уомӕ хауй, цӕбӕл ӕууӕндунцӕ, е, удта сӕ зундахаст ӕма сӕ гъуддӕгтӕ дӕр. Е ӕнцон нӕй, фал Йегови зӕрдӕ рохс кӕнун ке фӕндуй, уонӕн Йеговӕ ӕ сугъдӕг хъаури фӕрци банхус кӕнуй.

17. Нӕ бон куд ӕй адӕни лӕгъуз менеугутӕ фӕнзунӕй нӕхе багъӕуай кӕнун?

¹⁷ Аци дуйнейӕн ӕ кӕрон куд хӕстӕгдӕр кӕнуй, уотӕ никки хъӕбӕрдӕр зиннуй, Хуцауӕн ка лӕггадӕ кӕнуй ӕма ка нӕ лӕггадӕ кӕнуй, етӕ кӕрӕдземӕй куд хецӕн кӕнунцӕ, е. Мах, куд Хуцауи лӕггадгӕнгутӕ, уотӕ гъӕуама нӕхе гъӕуай кӕнӕн, цӕмӕй аци дуйней зундахастӕй ма фегъӕстӕ уӕн. Уомӕ гӕсгӕ ба нӕ фӕндуй, цӕмӕй 2 Тимофеймӕ 3:2–5 ци фӕдзӕхст ес, уомӕ гӕсгӕ архайӕн ӕма си ци адӕни туххӕй финст ес, уонӕмӕ хӕстӕг дӕр ма цӕуӕн. Ке зӕгъун ӕй гъӕуй, аци дуйней цӕргӕй, уомӕн дӕр нӕййес гӕнӕн, цӕмӕй сӕбӕл ӕппундӕр ма ’мбӕлӕн, уомӕн ӕма нӕ кустмӕ дӕр цӕун фӕгъгъӕуй, скъоламӕ дӕр, кедӕрти хӕццӕ ба еу хӕдзари дӕр цӕрӕн. Фал уӕддӕр нӕ бон ӕй нӕхе сӕ зундахастӕй багъӕуай кӕнун. Е нӕ къохи бафтуйдзӕй, не ’ууӕндундзийнадӕ ку федар кӕнӕн, уӕд. Уой туххӕй ба гъӕуй Библи лӕмбунӕг ӕртасун ӕма Йеговӕн ка лӕггадӕ кӕнуй, уонӕбӕл нӕхе бӕттун.

18. Нӕхе куд дарӕн ӕма ци дзорӕн, е иннети куд баразӕнгард кӕндзӕй Йегови базонунмӕ?

¹⁸ Уомӕй уӕлдай ма гъӕуама архайӕн, цӕмӕй иннетӕн дӕр Йегови базонунмӕ банхус кӕнӕн. Мадта хуарз хабар игъосун кӕнунмӕ дӕр гъӕуама фадуӕттӕ агорӕн, удта Йеговӕй корӕн, цӕмӕй, кӕд ӕма ци дзорун гъӕуй, уой зонӕн. Гъӕуама ’й иннетӕ базононцӕ Йегови Ӕвдесӕнтӕ ке ан. Уотемӕй, нӕхе куд дарӕн, уомӕй кадӕ Хуцауӕн хӕсдзиан, нӕхецӕн нӕ, фал. Йеговӕ нӕ ахур кӕнуй, «цӕмӕй ӕнӕхуцау гъуддӕгтӕй ӕма зӕнхон монцтӕй идард ледзӕн ӕма аци дуйней уӕн лӕдӕргӕ, цӕрӕн рӕстӕй ӕма Хуцаубӕл еузӕрдонӕй» (Тит. 2:11–14). Мадта Хуцауи ку фӕнзӕн ӕма нин ци дзоруй, уой ку кӕнӕн, уӕд уой иннетӕ дӕр уиндзӕнцӕ, ӕма си, ка ’й зонуй, еске уотӕ дӕр зӕгъдзӕй: «Мах дӕр уӕ хӕццӕ цӕуӕн, уомӕн ӕма фегъустан, Хуцау уӕ хӕццӕ ке ӕй» (Зах. 8:23).