1, 2. а) Хуцауи лӕггадгӕнгутӕмӕ цӕхуӕн хуӕрзеуӕг ӕнгъӕлмӕ кӕсуй? б) Нӕ бон ци ӕй кӕнун, цӕмӕй нӕмӕ ци хуӕрзеуӕг ӕнгъӕлмӕ кӕсуй, уой ма иронх кӕнӕн? (Кӕсӕ хузӕмӕ статьяй райдайӕни.)

ИСӔРСТ киристӕнттӕн дессаги нифс ес. Уонӕмӕ ӕнгъӕлмӕ кӕсуй уӕларвон цард. Павел еци нифс исхудта «Хуцауи хуӕрзеуӕг» (Фил. 3:14). Етӕ Йесо Киристей хӕццӕ ӕ уӕларвон Паддзахади уодзӕнцӕ паддзӕхтӕ ӕма сӕ куст уодзӕй адӕнӕн ӕнхус кӕнун, цӕмӕй ӕнхӕст исуонцӕ (Рарг. 20:6). Дессаги нифс син ес! Ӕндӕр фустӕ ба ӕнгъӕлмӕ кӕсунцӕ ӕндӕрхузи хуӕрзеуӕгмӕ. Йеговӕ син зӕрдӕ байвардта ӕносмӕ дзенети зӕнхӕбӕл ке цӕрдзӕнцӕ, ӕма син уӕхӕн нифс ке ес, уой фӕрци ӕцӕг амондгун ӕнцӕ (2 Пет. 3:13).

² Цӕмӕй исӕрст киристӕнттӕ Хуцаубӕл еузӕрдонӕй байзадайуонцӕ ӕма сӕ хуӕрзеуӕг райстайуонцӕ, уой туххӕй сӕ Павел разӕнгард кодта: «Уӕ гъудитӕ уӕнтӕ, уӕлӕрвти ци ес, уобӕл» (Кол. 3:2). Етӕ гъӕуама ма иронх кодтайуонцӕ, уӕлӕрвти сӕмӕ цӕхуӕн хуӕрзеуӕг ӕнгъӕлмӕ кӕсуй, уой (Кол. 1:4, 5). Йегови арфӕдзийнӕдтӕбӕл ку  сагъӕс кӕнӕн, уӕд мах дӕр некӕд иронх кӕндзиан, ци хуӕрзеуӕг нӕмӕ ӕнгъӕлмӕ кӕсуй, уой, уӕлдай нӕй, уӕларвон нифс нин ес ӕви зӕнхон (1 Кор. 9:24).

3. Павел киристӕнтти цӕмӕй фӕдзахста?

³ Павел ма киристӕнтти фӕдзахста, сӕ хуӕрзеуӕг фесафунӕй дӕр син тӕссаг ке ӕй. Зӕгъӕн, колоссӕгтӕмӕ финста мӕнгӕ киристӕнтти туххӕй. Уони гъудимӕ гӕсгӕ, цӕмӕй Хуцауи зӕрдӕ рохс кӕнай, уой туххӕй Киристебӕл ӕууӕндун нӕ, фал Моисеййи закъон ӕнхӕст кӕнун гъудӕй (Кол. 2:16–18). Уомӕй уӕлдай ма Павел финста, абони мах дӕр нӕ хуӕрзеуӕг райсунмӕ ка бахъор кӕндзӕй, уӕхӕн гъуддӕгти туххӕй. Е балӕдӕрун кодта, ӕнӕгъдау фӕндти хӕццӕ тох кӕнун нӕ бон куд ӕй, уой, удта не ’нсувӕрти хӕццӕ кенӕ нӕ бийнонти медӕг кӕрӕдзей ку нӕ лӕдӕрӕн, уӕд куд кӕнгӕ ’й, уой дӕр. Мадта ӕркӕсӕн, Павел колоссӕгтӕмӕ финстӕги ци унаффитӕ равардта, уонӕй цалдӕремӕ.

4. Уомӕн куд ес гӕнӕн, цӕмӕй ӕнӕгъдау фӕндти туххӕй нӕ хуӕрзеуӕгӕй фенӕхай уӕн?

⁴ Павел ӕнсувӕртӕн сӕ дессаги нифс сӕ зӕрдӕбӕл ку ӕрлӕуун кодта, уӕд ма син ниффинста: «Мадта ниммаретӕ уӕ зӕнхон бауӕри фӕндтӕ: хӕтундзийнадӕ, цъумур миутӕ, монцӕй содзун, фидбилиз фӕндтӕ, удта зудӕ кӕнун» (Кол. 3:5). Ӕнӕгъдау фӕндтӕ хъӕбӕр тухгин фӕуунцӕ. Уони туххӕй, гӕнӕн ес, ӕма адӕймаг Хуцауӕй раидард уа ӕма ин федӕнӕй ци дессаги нифс ес, уой дӕр фесафа. Ӕнӕгъдау гъуддаг ка бакодта, ӕма уой фӕсте фӕстӕмӕ ӕмбурдмӕ ка раздахтӕй, еу уӕхӕн ӕнсувӕр загъта: «Еци фӕндтӕн гъеуӕхӕн устур хъаурӕ адтӕй, ӕма ма мӕхе ӕрӕгиау ӕрлӕдӕрдтӕн, раййевун мӕ бон ку нецибал адтӕй, уӕд».

5. Тӕссаг уавӕри ку уӕн, уӕд нӕ бон куд ӕй нӕхе багъӕуай кӕнун?

⁵ Еуӕй-еу уавӕрти уӕлдай лӕмбунӕгдӕр гъӕуама уӕн, цӕмӕй Йегови раст уагӕвӕрдти сӕрти ма рахезӕн. Зӕгъӕн, кизгӕ ӕма лӕхъуӕн ӕмбӕлун ку райдайунцӕ, уӕд гъӕуама рагацау радзубанди кӕнонцӕ, цӕмӕй адӕн кӕми нӕ уа, уоми дууемӕй ма изайонцӕ. Удта ма гъӕуама радзоронцӕ, хъуритӕ ӕма бати туххӕй ци гъуди кӕнунцӕ, уобӕл дӕр (Ӕмб. 22:3). Ӕндӕр тӕссаг уавӕр ба ӕй, киристон ӕ кусти фӕдбӕл ӕндӕр горӕтмӕ кенӕ бӕстӕмӕ ку рандӕ уа, кенӕ нӕлгоймагӕн е ’мкосӕг силгоймаг ку уа, силгоймагӕн ба – нӕлгоймаг (Ӕмб. 2:10–12, 16). Уӕхӕн уавӕри ку бахауай, уӕд фиццагидӕр зӕгъӕ, Йегови Ӕвдесӕн ке дӕ. Уӕздан уо ӕма дӕ зӕрдӕбӕл дарӕ, гацца миутӕ хуарзӕй ке нецӕмӕ ӕркӕнунцӕ. Тӕссаг ма нин фӕууй, ӕнкъард ку фӕууӕн кенӕ нӕмӕ уотӕ ку фӕккӕсуй, ӕма неке гъӕуӕн, уӕд. Уӕхӕн уавӕри нӕ фӕнддзӕй, цӕмӕй нӕ фарсмӕ уа, ка нӕ уарза ӕма нин аргъ ка кӕна, уӕхӕн адӕймаг. Уотемӕй ба нин, гӕнӕн ес, ӕма кефӕнди рӕвдуд дӕр ӕхцӕуӕн уа. Уӕхӕн сагъӕстӕ дӕмӕ ку фӕззинна, уӕд ӕнхус корӕ Йеговӕй, удта хуӕртӕ ӕма ӕнсувӕртӕй, цӕмӕй дӕ хуӕрзеуӕгӕй ма фенӕхай уай. (Бакӕсӕ Псалом 34:18; Ӕмбесӕндтӕ 13:20.)

6. Ерхӕфсӕнтӕ ӕвзаргӕй нӕ зӕрдӕбӕл ци гъӕуама дарӕн?

⁶ Ӕнӕгъдау фӕндтӕ «ниммарун» нин ӕнцондӕр уодзӕй, нӕхе ихӕлд ерхӕфсӕнтӕй ку гъӕуай кӕнӕн, уӕд. Аци дуйней ерхӕфсӕнтӕн сӕ фулдӕр рабарӕн ес Содом ӕма Гоморри хӕццӕ (Иуд. 7). Берӕ  киунугути, киноти ӕма передачити ихӕлд гъуддӕгтӕ уотӕ февдесунцӕ, цума си лӕгъузӕй неци ес, цӕхуӕн фӕстеугутӕмӕ ӕркӕнунцӕ, уой кой ба неке фӕккӕнуй. Цӕхуӕн киунугутӕ ӕма кинотӕмӕ кӕсӕн, удта цӕхуӕн зартӕмӕ игъосӕн, уомӕ нӕ гъос ку нӕ дарӕн, уӕд ӕнӕгъдау фӕндтӕбӕл нецихузи фӕууӕлахез уодзиан. Уомӕ гӕсгӕ гъӕуама ӕвзарӕн, нӕ хуӕрзеуӕгӕй нӕ ка нӕ фенӕхай кӕндзӕй, уӕхӕн ерхӕфсӕнтӕ (Ӕмб. 4:23).

7. Ӕмбурди еуӕй-еухатт цӕхуӕн зиндзийнӕдтӕ фӕззиннуй?

⁷ Не ’мбурдтӕ мах хъӕбӕр устур арфӕдзийнадӕбӕл нимайӕн. Уоми фӕййахур кӕнӕн Библи ӕма кӕрӕдзей федар кӕнӕн. Ӕма уой фӕрци нӕ иронх кӕнӕн, ци хуӕрзеуӕг нӕмӕ ӕнгъӕлмӕ кӕсуй, уой. Фал еуӕй-еухатт кӕрӕдзей ке нӕ балӕдӕрӕн, уой туххӕй нӕ астӕу зӕрдихудтӕ дӕр рауайуй. Ӕма бафедаунбӕл ку нӕ байархайӕн, уӕд, гӕнӕн ес, ӕма нӕ зӕрди маст ниббада. (Бакӕсӕ 1 Петури 3:8, 9.)

8, 9. а) Нӕ хуӕрзеуӕг райсунмӕ нин цӕхуӕн менеугутӕ банхус кӕндзӕнцӕ? б) Еске нин нӕ зӕрдӕ ку раходун кӕна, уӕд нӕ еудзийнадӕ цӕй фӕрци багъӕуай кӕндзиан?

⁸ Нӕ бон ци ӕй кӕнун, цӕмӕй зӕрдихудти туххӕй нӕ хуӕрзеуӕгӕй ма фенӕхай уӕн? Павел колоссӕгтӕмӕ финста: «Хуцауи ӕвзурститӕн, ӕ кӕдзос ӕма ӕ уарзон адӕнӕн, куд ӕмбӕлуй, уотӕ уӕ зӕрдӕмӕ арф есетӕ кӕрӕдзей зин, уотӕ хӕларзӕрдӕ, сӕрниллӕг, фӕлмӕн ӕма берӕфӕразон. Еске уин естӕмӕй уӕ зӕрдӕ ку фӕхходун кӕна, уӕддӕр кӕрӕдземӕн бухсетӕ ӕма зӕрдӕй хатир кӕнтӕ. Йеговӕ уин зӕрдӕй куд ниххатир кодта, сумах дӕр гъӕуама кӕрӕдземӕн уотӕ хатир кӕнайтӕ. Фал ма уӕмӕ уомӕй уӕлдай уӕд уарзондзийнадӕ, уомӕн ӕма уой хузӕн неци еу кӕнуй ӕма неци бӕттуй кӕрӕдзебӕл» (Кол. 3:12–14).

⁹ Уарзондзийнадӕ ӕма нӕмӕ хӕларзӕрдӕдзийнадӕ ку уа, уӕд нин иннетӕн хатир кӕнун ӕнцондӕр уодзӕй. Еске нин нӕ зӕрдӕ естӕмӕй ку фӕхходун кӕна, уӕд нӕ бон ӕй ӕргъуди кӕнун, нӕхецӕн нин ести уӕхӕн гъуддаг куд ниххатир кодтонцӕ, уой. Кунӕг боз н’ адтан сӕ уарзондзийнадӕ ӕма хӕларзӕрдӕдзийнади туххӕй. (Бакӕсӕ Екклесиаст 7:21, 22.) Никки хъӕбӕрдӕр ба боз ан Киристей хӕларзӕрдӕдзийнади туххӕй, Хуцауи лӕггадгӕнгутӕй еу адӕн ке искодта, уой туххӕй (Кол. 3:15). Ӕгасӕйдӕр еци-еу Хуцауӕн ковӕн, удта еци-еу хабар игъосун кӕнӕн ӕма еци-еу зиндзийнӕдтӕбӕл ӕмбӕлӕн. Кӕрӕдзей ку уарзӕн ӕма кӕрӕдземӕн хӕларзӕрдӕй ку хатир кӕнӕн, уӕд нӕ еудзийнадӕ федар кӕндзӕй ӕма нӕ бон уодзӕй нӕ хуӕрзеуӕгмӕ ӕнгъӕлмӕ кӕсун.

10, 11. а) Соцъа кӕнун тӕссаг цӕмӕн ӕй? б) Нӕ бон ци ӕй кӕнун, цӕмӕй соцъагӕнагӕ ма исуӕн ӕма нӕ хуӕрзеуӕгӕй ма фенӕхай уӕн?

¹⁰ Нӕ хуӕрзеуӕг фесафунӕй ма нин тӕссаг уодзӕй, соцъагӕнагӕ ку уӕн, уӕд дӕр. Еци менеуӕг куд тӕссаг ӕй, е бӕрӕг ӕй Библий финст хабӕрттӕй. Зӕгъӕн, Каин е ’нсувӕр Авельмӕ соцъа кӕнун райдӕдта ӕма ӕй рамардта. Корей, Дафан ӕма Авирон ба Моисеййи нихмӕ рацудӕнцӕ, соцъа кӕнун ке райдӕдтонцӕ, уой туххӕй. Паддзах Саул дӕр соцъа кӕнун ке райдӕдта, уой туххӕй Давиди марунмӕ агурдта. Хуцауи Дзурди раст финст ӕй: «Соцъа ӕма хъур-хъур кӕми ес, уоми нӕдӕр уагӕ ес, нӕдӕр ӕгъдау, ес си алли лӕгъуздзийнадӕ» (Иак. 3:16).

 ¹¹ Иннети ку уарзӕн ӕма хӕларзӕрдӕ ку уӕн, уӕд соцъайӕн нӕ зӕрди бунат нӕбал уодзӕй. Библий финст ес: «Уарзондзийнадӕ берӕ фӕразуй ӕма ӕй хӕларзӕрдӕ. Уарзондзийнадӕ соцъа нӕ кӕнуй» (1 Кор. 13:4). Цӕмӕй соцъагӕнагӕ ма исуӕн ӕма еци менеуӕг нӕ зӕрди арф уедӕгтӕ ма рауадза, уой туххӕй гъӕуама архайӕн гъуддагмӕ Йегови цӕстӕй кӕсун. Нӕ хуӕртӕ ӕма ӕнсувӕртӕмӕ гъӕуама уӕхӕн цӕстӕй кӕсӕн, цума еу бауӕр ан, гъома киристон ӕмбурд. Библи зӕгъуй: «Бауӕри иуӕнгтӕй еу ку искадгин уй, уӕд иннӕ иуӕнгтӕ дӕр ӕ хӕццӕ фӕццийнӕ кӕнунцӕ» (1 Кор. 12:16–18, 26). Мадта не ’нсувӕрбӕл ести хуарз хабар ку ’рцӕуа, уӕд имӕ соцъа нӕ кӕндзиан, фал ӕ хӕццӕ цийнӕ кӕндзиан. Еци гъуддаги нин фӕнзуйнаг ӕй, Саули фурт Ионафан. Ӕ бӕсти Давиди паддзахӕй ку равзурстонцӕ, уӕд Ионафан соцъа кӕнун нӕ райдӕдта. Сауӕнгӕ ма зин рӕстӕгути дӕр ӕ фарсмӕ балӕууидӕ ӕма ’й бафедар кӕнидӕ (1 Сам. 23:16–18). Цума мах бон ба нӕй Ионафани хузӕн уарзондзийнадӕ ӕма хӕларзӕрдӕдзийнадӕ ӕвдесун?

12. Бийнонтӕн хуӕрзеуӕг райсунмӕ Библийӕй цӕхуӕн унаффитӕ банхус кӕндзӕнцӕ?

¹² Бийнонти медӕг алкедӕр Библий уагӕвӕрдтӕмӕ гӕсгӕ ку архайа, уӕд сӕ астӕу уодзӕй фарнӕ ӕма уодзӕнцӕ амондгун. Ӕма уӕд ӕмбурд бийнонтӕй дӕр хуӕрзеуӕг райсдзӕнцӕ. Павел киристон бийнонтӕн еу зундгин унаффӕ равардта: «Уоститӕ, уӕ лӕгти коммӕ кӕсетӕ, уомӕн ӕма Киристей фӕдбӕлдзӕугутӕн уотӕ ӕмбӕлуй. Сумах ба, лӕгтӕ, алкӕддӕр  уарзетӕ уӕ уостити ӕма сӕмӕ карз ма уотӕ. Сувӕллӕнттӕ, алли гъуддаги дӕр уӕ ниййергутӕмӕ игъосетӕ, уомӕн ӕма е цӕуй нӕ Хецауи зӕрдӕмӕ. Фидтӕлтӕ, уӕ сувӕллӕнтти ма мӕстгун кӕнтӕ, цӕмӕй сӕхемӕ ма нийгъосонцӕ» (Кол. 3:18–21). Цума дӕу бийнонтӕн ба аци унаффитӕ ести пайда ӕрхӕсдзӕнцӕ?

13. Хуӕрӕн ӕ бон ци ӕй кӕнун, цӕмӕй ӕ сӕрихецау дӕр Йеговӕн лӕггадӕ кӕнун райдайа?

¹³ Ка ’й зонуй, хуӕрӕн ӕ сӕрихецау Йеговӕн нӕ лӕггадӕ кӕнуй. Хуӕрӕмӕ уотӕ ку кӕса, ӕма ин ӕ сӕрихецау, куд гъӕуй, уотӕ хуарз нӕй, уӕд ци гъӕуама кӕна? Ку имӕ мӕстгун кӕна ӕма ин алли хатт дӕр уайдзӕфтӕ ку кӕна, уӕд уомӕй ести фӕххуӕздӕр уодзӕй? Сауӕнгӕ ма ӕхе куд фӕндадтӕй, уотӕ ку рауайа, уӕд дӕр е ӕ сӕрихецауӕн банхус кӕндзӕй рӕстдзийнадӕ базонун? Ӕвӕдзи, нӕ. Фал хуӕрӕ ӕ сӕрихецауи ку нимайа, уӕд сӕ бийнонти уодзӕй фулдӕр фарнӕ ӕма уотемӕй Йеговӕн дӕр кадӕ хӕсдзӕй. Ӕхе куд даруй, уомӕй дӕр, ка ’й зонуй, ӕ сӕрихецауӕн банхус кӕндзӕй, цӕмӕй Йеговӕн лӕггадӕ кӕнун райдайа, ӕма уӕд дууемӕй дӕр хуӕрзеуӕгӕй исхайгин уодзӕнцӕ. (Бакӕсӕ 1 Петури 3:1, 2.)

14. Киристон лӕг ци гъӕуама кӕна, ӕ бийнойнаг ӕй, куд ӕмбӕлуй, уотӕ ку нӕ нимайа, уӕд?

¹⁴ Фал ӕнсувӕрӕн ӕ бийнойнаг Йеговӕн ку нӕ лӕггадӕ кӕна, удта имӕ уотӕ ку кӕса, ӕма ӕй куд ӕмбӕлуй, уотӕ нӕ нимайуй, уӕдта? Цума ин уосӕ фулдӕр аргъ кӕндзӕй, ӕнсувӕр ибӕл гъӕртӕ ку кӕна ӕма ин уотемӕй ку лӕдӕрун кӕна, хӕдзари хецау ка ӕй, уой? Зинтӕй. Хуцауи фӕндуй, цӕмӕй бийнонти хестӕртӕ Киристей фӕнзонцӕ ӕма сӕ бийнойнӕгти уарзонцӕ (Еф. 5:23). Киристе – ӕмбурди хестӕр,  алкӕддӕр фӕразонӕй ӕма уарзгӕй фӕййархайуй (Лук. 9:46–48). Ду дӕр уотӕ ку архайай, уӕд дӕмӕ, ка ’й зонуй, дӕ бийнойнаг дӕр ӕрбайеу уодзӕй, ӕма ӕцӕг Хуцауӕн еумӕ лӕггадӕ кӕндзиайтӕ.

15. Киристон лӕг ӕ бийнойнаги ке уарзуй, уой ӕ бон куд ӕй бавдесун?

¹⁵ Йеговӕ лӕгтӕн зӕгъуй: «Алкӕддӕр уарзетӕ уӕ уостити ӕма сӕмӕ карз ма уотӕ» (Кол. 3:19). Лӕг ӕ бийнойнаги ку уарза, уӕд имӕ лӕмбунӕг игъосдзӕй ӕма ин ӕ гъудийӕн аргъ кӕндзӕй (1 Пет. 3:7). Ке зӕгъун ӕй гъӕуй, е уобӕл дзорӕг нӕй ӕма ин ӕ алли дзурд дӕр ӕнхӕст кӕндзӕй, фал уӕддӕр ӕ бийнойнагмӕ ку байгъоса, уӕд ин е раст унаффӕ рахӕссунмӕ банхус кӕндзӕй (Ӕмб. 15:22). Ӕ бийнойнаги ка уарзуй, уӕхӕн лӕг ӕхецӕн тухӕй дӕр кадӕ нӕ агордзӕй, фал гъуддагӕй бавдесдзӕй, уой аккаг ке ӕй, цӕмӕй ӕй ӕ уосӕ нимайа. Бийнонти хестӕр ӕ бийнойнаги ӕма ӕ сувӕллӕнтти ку фӕууарзуй, уӕд уӕхӕн бийнонтӕ амондгундӕр фӕуунцӕ ӕма Йеговӕн лӕггадӕ кӕнгӕй сӕ хуӕрзеуӕг райсунбӕл еумӕйагӕй фӕййархайунцӕ.

16, 17. Ӕригӕнттӕн ци банхус кӕндзӕй сӕ ниййергути хӕццӕ федаун?

¹⁶ Кӕд ӕригон дӕ, уӕд дӕмӕ, ка ’й зонуй, уотӕ кӕсуй, ӕма дӕ дӕ ниййергутӕ нӕ лӕдӕрунцӕ кенӕ ди ӕгӕр берӕ цидӕртӕ агорунцӕ. Уой туххӕй, гӕнӕн ес, ӕма дӕ Йеговӕн дӕ цард иснивонд кӕнун ӕма ин лӕггадӕ кӕнун дӕр ма бафӕндӕуа. Фал Йегови ку ниууадзай, уӕд ӕй тагъд балӕдӕрдзӕнӕ, дӕ ниййергутӕй, удта ӕмбурди хуӕртӕ ӕма ӕнсувӕртӕй дӕ фулдӕр ке неке уарзта, уой.

¹⁷ Фал дин дӕ ниййергутӕ зунд ку некӕд амудтайуонцӕ, уӕдта? Уӕд дӕмӕ, ӕвӕдзи, уотӕ кастайдӕ ӕма сӕмӕ дӕу сагъӕс ӕппундӕр нӕййес (Дзиуит. 12:8). Фал дин, ка ’й зонуй, дӕ ниййергутӕ зунд куд амонунцӕ, е дӕ зӕрдӕмӕ нӕ цӕуй. Мӕстгун ма кӕнӕ, фал уотӕ цӕмӕн кӕнунцӕ кенӕ дзорунцӕ, уой балӕдӕрунбӕл байархайӕ. Тухсгӕ ма кӕнӕ ӕма дин ци дзорунцӕ, уобӕл дӕ зӕрдӕ ма ходӕт. Хуцауи Дзурди финст ес: «Дзорунмӕ тагъд ка нӕ кӕнуй, уомӕ ес ӕцӕг зонундзийнӕдтӕ, ӕма арфуинӕг адӕймаг хебӕл хуӕцун зонуй» (Ӕмб. 17:27). Дӕхецӕн нисан исӕвӕрӕ, унаффӕмӕ байгъосун ӕма си зундӕн ести райсун ке бон ӕй, уӕхӕн фӕлтӕрдгун адӕймаг ке исуодзӕнӕ ӕма дин еци унаффӕ куд лӕвӕрд ӕрцудӕй, уомӕ ке нӕ кӕсдзӕнӕ (Ӕмб. 1:8). Макӕд иронх кӕнӕ, дӕ ниййергутӕ Йеговӕн ке лӕггадӕ кӕнунцӕ, е хъӕбӕр устур арфӕдзийнадӕ ке ӕй. Уонӕй хъӕбӕрдӕр неке фӕндуй, цӕмӕй дӕ хуӕрзеуӕг райсай ӕма ӕносмӕ цӕрай.

18. Не ’ргом нӕ хуӕрзеуӕгмӕ ’здӕхт цӕмӕн гъӕуама уа?

¹⁸ Уӕларвон нифс нин ес, ӕви зӕнхон, уӕддӕр ни алкедӕр ӕнгъӕлмӕ кӕсуй дессаги федӕнмӕ. Ӕма е аргъау нӕй. Уӕхӕн цардӕй нин зӕрдӕ байвардта Дун-дуйней Сфӕлдесӕг. Библи зӕгъуй: «Зӕнхӕ байдзаг уодзӕй зонундзийнӕдтӕй Йегови туххӕй» (Ис. 11:9). Зӕнхӕбӕл цӕрӕг адӕни Йеговӕ ӕхуӕдӕг ахур кӕндзӕй. Ӕма еци хуӕрзеуӕг уой аккаг ӕй, цӕмӕй нӕ бон цидӕриддӕр ӕй, уой кӕнӕн. Гъӕйдӕ мадта, макӕд иронх кӕнӕн Йегови зӕрдӕвӕрдтӕ, ӕма нӕмӕ ци хуӕрзеуӕг ӕнгъӕлмӕ кӕсуй, уомӕй нӕ маке ӕма маци фенӕхай кӕнӕд!