1. Ӕнӕнхӕст ке ан, уой туххӕй беретӕмӕ цӕхуӕн гъудитӕ фӕззиннуй?

«МӔНӔ ци мӕгур дӕн!» (Ром. 7:24). Аци дзурдтӕ загъта апостол Павел ӕма абони дӕр Хуцауи еузӕрдон лӕггадгӕнгутӕй беретӕ фӕззӕгъунцӕ уотӕ. Цума цӕмӕн? Ӕнӕнхӕст ке ан, уомӕ гӕсгӕ нин алкӕд нӕ фӕууайуй нӕ гъуддӕгтӕй Йегови зӕрдӕ рохс кӕнун ӕма уой туххӕй нӕхемӕ нийгъосӕн. Уӕззау тӕрегъӕд ка искодта, уонӕй ба ма еуӕй-еуетӕмӕ уотӕ дӕр фӕккӕсуй, ӕма син Йеговӕ некӕд ниххатир кӕндзӕй.

2. а) Псалом 34:22 куд зиннуй, Хуцауи лӕггадгӕнгутӕн сӕ тӕрегъӕдтӕбӕл ӕгӕр маст кӕнун ке нӕ гъӕуй? б) Аци статьяй цӕмӕ ӕркӕсдзиан? (Кӕсӕ рамкӕ « Еци хабӕрттӕй цӕбӕлдӕр ахур кӕнӕн ӕви цӕмӕдӕр амонунцӕ?».)

² Библи куд зӕгъуй, уомӕ гӕсгӕ ӕхе Йегови иуазӕг ка бакодта, уони сӕ цӕсгон алкӕд нӕ хуӕрдзӕй. (Бакӕсӕ Псалом 34:22.) Цума нӕ бон куд ӕй нӕхе Йегови иуазӕг бакӕнун? Ци гъӕуама кӕнӕн, цӕмӕй нин Йеговӕ нӕ терегъӕд ниххатир кӕна? Аци фарстатӕбӕл дзуапп базондзиан, рагидзаманти израилӕгтӕн римӕхсӕн горӕтти туххӕй ци закъон лӕвӕрд адтӕй, уомӕй. Кадӕр зӕгъдзӕй, зӕгъгӕ, е Моисеййи закъонмӕ хаудтӕй, уомӕн ба нӕ эри 33 анзи Фӕндзайӕймаг бон ӕ хъаурӕ фесавдӕй. Фал гъӕуама ма иронх  кӕнӕн, еци закъон Йеговӕй лӕвӕрд ке адтӕй. Мадта си римӕхсӕн горӕтти туххӕй ци финст ес, уомӕ ку ’ркӕсӕн, уӕд берӕ цидӕртӕ базондзиан, Йеговӕ тӕрегъӕдмӕ, удта тӕрегъӕд ка искодта ӕма фӕсмон ка кӕнуй, уонӕмӕ цӕхуӕн цӕстӕй кӕсуй, уой туххӕй. Фиццаг бал нӕ зӕрдӕбӕл ӕрлӕуун кӕнӕн, еци горӕттӕ цӕмӕн гъудӕнцӕ, уой.

3. Израилӕгтӕмӕ еу адӕймаг инней ку рамардтайдӕ, уӕд ин ци гъӕуама бакодтайуонцӕ?

³ Рагон Израили рӕстӕги адӕймаги рамарун Йегови цӕсти хъӕбӕр устур тӕрегъӕд адтӕй. Еу адӕймаг инней ку рамардтайдӕ, уӕд ин ӕхе дӕр гъӕуама рамардтайдӕ «тогесӕг», гъома ке рамардтонцӕ, уой хӕстӕгдӕр хеуон (Ним. 35:19). Уотемӕй ӕ цардӕй бафистайдӕ, ци тог никкалдта, уобӕл. Адӕймаги ка рамардта, уомӕн еци фӕдбӕл ку не ’стӕрхон кодтайуонцӕ, уӕд зӕрдӕвӕрд зӕнхӕ кӕдзосбӕл нимад нӕбал адтайдӕ. Йеговӕ ӕ адӕнӕн бафӕдзахста: «Ци зӕнхӕбӕл цӕретӕ, уой ма ницъцъумур кӕнтӕ, уомӕн ӕма зӕнхӕ цъумур кӕнуй [адӕймаги] тогӕй» (Ним. 35:33, 34).

4. Адӕймаги ӕнӕбари ка рамардта, уой ци кӕнун гъудӕй?

⁴ Ӕма адӕймаги ӕнӕбари ка рамардта, уомӕн ба ци кӕнгӕ адтӕй? Моисеййи закъонмӕ гӕсгӕ, уой дӕр дзуапп дӕттун гъудӕй (Райд. 9:5). Фал Йеговӕ фӕлмӕнзӕрдӕ Хуцау ке ӕй, уомӕ гӕсгӕ уӕхӕн адӕймагӕн барӕ лӕвардта римӕхсӕн горӕттӕй еуемӕ ледзун, цӕмӕй ӕй тогесӕг ма рамардтайдӕ. Уӕхӕн адӕймаг еци горӕти гъӕуама цардайдӕ, цалинмӕ хестӕр саугин нӕ рамардайдӕ, уӕдмӕ (Ним. 35:15, 28).

5. Уотӕ зӕгъӕн цӕмӕн ес, ӕма нин римӕхсӕн горӕтти туххӕй закъон банхус кӕндзӕй Йегови хуӕздӕр базонун?

⁵ Римӕхсӕн горӕттӕ адӕн не ’ргъуди кодтонцӕ. Йеговӕ Йесо Навинӕн бафӕдзахста: «Уӕхецӕн рахецӕн кӕнтӕ... римӕхсӕн горӕттӕ». Еци горӕттӕ табуйагбӕл нимад адтӕнцӕ (Йес. Н. 20:1, 2, 7, 8). Йеговӕ сӕ ӕхуӕдӕг равзурста бӕлвурд гъуддагӕн. Ӕма римӕхсӕн горӕтти туххӕй ци закъон равардта, уобӕл лӕмбунӕгдӕр  ку расагъӕс кӕнӕн, уӕд ӕй хуӕздӕр балӕдӕрдзиан, Йеговӕ куд хатир кӕнуй, уой. Уомӕй уӕлдай ма базондзиан, нӕ бон ци ӕй кӕнун, цӕмӕй Йеговӕ нӕ римӕхсӕн бунат исуа.

6, 7. а) Адӕймаги ӕнӕбари ка рамардта, уой гъуддагмӕ хестӕр лӕгтӕ куд ӕркӕсиуонцӕ? (Кӕсӕ хузӕмӕ статьяй райдайӕни.) б) Хестӕр лӕгти хӕццӕ радзорун зундбӕл дзорӕг цӕмӕн адтӕй?

⁶ Еу адӕймаг инней ӕнӕбари ку рамардтайдӕ, уӕд ӕй гъудӕй римӕхсӕн горӕтмӕ ледзун ӕма «ци рцудӕй, уой горӕти хестӕр лӕгтӕн радзорун». Уоми ин цӕрӕн бунат равардтайуонцӕ (Йес. Н. 20:4). Цӕйбӕрцӕдӕр рӕстӕги фӕсте ӕй рарветиуонцӕ, адӕймаги кӕми рамардта, еци горӕти хестӕр лӕгтӕмӕ ӕма ин етӕ ӕ гъуддаги фӕдбӕл унаффӕ рахӕссиуонцӕ. (Бакӕсӕ Нимӕдзтӕ 35:24, 25.) Ӕма ӕцӕгӕйдӕр ӕнӕбари ке рамардта, уой ку исбӕрӕг кӕниуонцӕ, уӕд ӕ бон адтӕй фӕстӕмӕ римӕхсӕн горӕтмӕ раздӕхун.

⁷ Уӕхӕн адӕймаги хестӕр лӕгти хӕццӕ радзорун цӕмӕн гъудӕй? Уомӕн ӕма уонӕн сӕ ихӕс адтӕй Хуцауи адӕни астӕу кӕдзосдзийнадӕ гъӕуай кӕнун. Ӕма адӕймаги ка рамардта, е сӕ хӕццӕ ку радзурдтайдӕ, уӕд ӕ бон адтӕй испайда кӕнун, Йеговӕ ин фӕййервӕзунмӕ ци фадуат дӕттуй, уомӕй. Еу библиртасӕг куд финста, уомӕ гӕсгӕ, маргӕ ка ракодта, еци адӕймаг хестӕр лӕгтӕн ку неци загътайдӕ, уӕд «ӕ цард тӕссаг уавӕри гӕлста». Еци ахургонд ма финста: «Еци адӕймагӕн ӕ тог ӕхе сӕрбӕл адтайдӕ, уомӕн ӕма Хуцау ци римӕхсӕн бунӕттӕ рахецӕн кодта, уонӕй не ’спайда кодта». Адӕймаги ӕнӕбари ка рамардта, уой бон адтӕй мӕлӕти тӕрхонӕй фӕййервӕзун, фал ӕй уой туххӕй гъудӕй ӕнхус байагорун ӕма ин куд зӕгъунцӕ, уотӕ бакӕнун. Гъудӕй ӕй римӕхсӕн горӕттӕй еуемӕ ледзун кенӕ ба ин тогесӕг ӕхе рамардтайдӕ.

8, 9. Тӕрегъӕд ка ракодта, е хестӕр нӕлгоймӕгтӕмӕ ӕнхусмӕ цӕмӕн гъӕуама бацӕуа?

⁸ Абони дӕр уӕззау тӕрегъӕд ка искодта, етӕ гъӕуама хестӕр нӕлгоймӕгтӕмӕ бацӕуонцӕ. Е ӕхсидзгӕ цӕмӕн ӕй? Фиццагидӕр уомӕн, ӕма Йеговӕ уонӕн баихӕс кодта, уӕхӕн гъуддӕгтӕ ӕвзарун (Иак. 5:14–16). Дуккаги ба хестӕр нӕлгоймӕгтӕ, тӕрегъӕд ка ракодта, уомӕн банхус кӕнунцӕ, цӕмӕй ин нӕуӕгӕй Йегови хӕццӕ фарнӕ уа ӕма уӕхӕн рӕдуд мабал ӕруадза (Гал. 6:1; Дзиуит. 12:11). Ӕртиккаг ба е ӕй, ӕма хестӕр нӕлгоймӕгтӕ фӕлтӕрдгун ӕнсувӕртӕ ’нцӕ ӕма ’й зонунцӕ, тӕрегъӕд ка ракодта, уомӕн банхус кӕнун куд ӕнгъезуй, уой, цӕмӕй ӕхе ӕгӕр мабал хуӕра. Йеговӕ еци нӕлгоймӕгти рабарста, «сӕх-сӕх уарунӕй дӕхе кӕми баримӕхсай», уӕхӕн бунати хӕццӕ (Ис. 32:1, 2). Ӕцӕгӕйдӕр, хестӕр нӕлгоймӕгтӕ ӕнцӕ нӕ фӕлмӕнзӕрдӕ Хуцау Йегови лӕвар.

⁹ Йегови лӕггадгӕнгутӕй беретӕ сӕхебӕл бавзурстонцӕ, хестӕр нӕлгоймӕгти хӕццӕ ку радзурдтонцӕ, уӕд син дзӕвгарӕ ӕнцондӕр ке фӕцӕй. Зӕгъӕн, еу ӕнсувӕр Дэниел уӕззау тӕрегъӕд искодта, фал ӕй цалдӕр мӕйи дӕргъи хестӕр нӕлгоймӕгтӕн радзорун не ’ндиудта. «Уойбӕрцӕ рӕстӕг ку рацудӕй,– зӕгъуй Дэниел,– уӕд мӕмӕ уотӕ кастӕй, цума мин хестӕр нӕлгоймӕгтӕ нӕбал банхус кӕндзӕнцӕ. Фал уӕддӕр катай кодтон ӕма ӕнгъӕлмӕ кастӕн мӕ рӕдудбӕл мӕ дзуапп дӕттун кӕд багъӕудзӕй, уомӕ. Мӕ кувд алкӕддӕр райдайинӕ, Йеговӕй хатир ке курдтон, уомӕй». Фӕстагмӕ Дэниел хестӕр нӕлгоймӕгтӕмӕ бацудӕй ӕма  син алцидӕр радзурдта. Ӕма ин куд фенцондӕр ӕй, уой туххӕй загъта: «Ке зӕгъун ӕй гъӕуй, хестӕр нӕлгоймӕгтӕмӕ бацӕун ӕнцон н’ адтӕй, фал сӕ хӕццӕ ку радзурдтон, уӕд цума мӕ рагъӕй устур уаргъ рахаудтӕй! Кӕдӕй-уӕдӕй мӕ бон иссӕй Йеговӕмӕ сӕребарӕй ковун». Нур Дэниелӕн Хуцауи рази кӕдзос цӕсгон ес, ӕрӕги ба ма ’й кӕстӕреуӕггӕнӕг ӕнсувӕрӕй дӕр иснисан кодтонцӕ.

10. Адӕймаги ӕнӕбари ка рамардта, е ци гъӕуама бакодтайдӕ, цӕмӕй ӕ тӕрегъӕд хатиргонд ӕрцудайдӕ?

¹⁰ Адӕймаги ӕнӕбари ка рамардта, уой ӕвӕстиатӕй гъудӕй римӕхсӕн горӕтмӕ ледзун. (Бакӕсӕ Йесо Навин 20:4.) Мӕлӕтӕй фӕййервӕзун ӕ бон адтӕй, ӕрмӕстдӕр еци горӕтмӕ ку фӕллигъдайдӕ ӕма си хестӕр саугини мӕлӕтмӕ ку фӕццардайдӕ, уӕд. Уой туххӕй ӕй ӕхе берӕ цӕмӕйдӕрти гъудӕй фӕццох кӕнун. Гъӕуама ниууагътайдӕ ӕ хӕдзарӕ ӕма ӕ куст, удта ин ӕндӕр рауӕнтӕмӕ дӕр сӕребарӕй цӕуӕн нӕбал адтайдӕ * (Ним. 35:25). Фал уӕхӕн ӕййивддзийнӕдтӕ дзӕгъӕли н’ адтӕнцӕ. Уомӕн ӕма римӕхсӕн горӕтӕй ку рандӕ адтайдӕ, уӕд уотӕ уадӕй, ӕма имӕ гъаргӕ дӕр нӕ кӕнуй, адӕймаги тог ке никкалдта, е. Удта ин тӕссаг адтайдӕ, тогесӕг ӕй ке рамардзӕй, уомӕй.

11. Ӕ тӕрегъӕдбӕл ка ӕрфӕсмон кодта, уӕхӕн адӕймаги бон куд ӕй бавдесун, Йеговӕ ин ке ниххатир кодта, уой туххӕй си боз ке ӕй, уой?

¹¹ Уотӕ абони дӕр, ӕ рӕдудбӕл ка фӕсмон кӕнуй, уӕхӕн адӕймагӕн цӕмӕй Хуцау ниххатир кӕна, уой туххӕй ӕй ести кӕнун гъӕуй. Гъӕуама ӕ тӕрегъӕдгун гъуддӕгтӕ ниууадза. Уомӕ хаунцӕ уӕззау тӕрегъӕдмӕ ка ’ркӕнуй, еци гъуддӕгтӕ еугурӕйдӕр. Ӕ тӕрегъӕдбӕл ка фӕсмон кодта, еци коринфӕгтӕ куд архайдтонцӕ, уой туххӕй апостол Павел финста: «Хуцауи зӕрдӕмӕ куд цӕуй, уотӕ ке ӕрӕнкъард айтӕ, уой фӕрци куд зӕрдиагӕй райдӕдтайтӕ архайун, уӕ ном куд искӕдзос кодтайтӕ, куд хъӕбӕр исмӕстгун айтӕ ӕма уи Хуцауи рази ци тас бацудӕй, куд хъӕбӕр уӕ бафӕндадтӕй ӕрфӕсмон кӕнун, уӕ зӕрдити зинг куд иссугъдӕй ӕма гъуддаг куд исраст кодтайтӕ!» (2 Кор. 7:10, 11). Мадта нӕ бон цидӕриддӕр ӕй, уой ку кӕнӕн, цӕмӕй мабал фӕррӕдуйӕн, уӕд Йеговӕн бавдесдзиан, нӕ рӕдудмӕ цийфӕнди цӕстӕй ке нӕ кӕсӕн, удта уотӕ ке нӕ сагъӕс кӕнӕн, ӕма нин уотемӕй дӕр ниххатир кӕндзӕй.

12. Киристони ӕхе цӕмӕйти гъӕудзӕй фӕццох кӕнун, цӕмӕй ин Йеговӕ идарддӕр дӕр хатир кӕна?

¹² Киристони ма ӕхе цӕмӕйти гъӕудзӕй фӕццох кӕнун, цӕмӕй ин Йеговӕ идарддӕр дӕр хатир кӕна? Гъӕуама ӕхе еуварс дара, тӕрегъӕдмӕ ’й ка ӕркӕндзӕй, еци гъуддӕгтӕй, ӕ зӕрдӕмӕ хъӕбӕр ку цӕуонцӕ, уӕддӕр (Матф. 18:8, 9). Зӕгъӕн, де ’мбӕлттӕ дин, Йегови зӕрдӕмӕ ка нӕ цӕуй, уӕхӕн гъуддӕгтӕ ку кӕнун кӕнонцӕ, уӕд ма идарддӕр сӕ хӕццӕ лимӕн кӕндзӕнӕ? Ниуӕзтӕн бӕрцӕ ке нӕ зонис, уой ку лӕдӕрай, уӕд, кӕми ниррасуг уодзӕнӕ, уӕхӕн рауӕнтӕй дӕхе еуварс дардзӕнӕ? Кенӕ ӕнӕгъдау фӕндти хӕццӕ ку тох кӕнай, уӕд дӕхе еуварс дардзӕнӕ, ӕнӕгъдау сагъӕстӕ дӕмӕ ке туххӕй фӕззиндзӕй, уӕхӕн кинотӕй, сайттӕй ӕма гъуддӕгтӕй? Дӕ зӕрдӕбӕл дарӕ, Йегови закъӕнттӕ ӕнхӕст кӕнуни туххӕй дӕхе цӕмӕйфӕнди ма фӕццох кӕнай, е дзӕгъӕли  ке некӕд уодзӕй. Йеговӕ дӕ ке ниууагъта, уой лӕдӕрунӕй фуддӕр неци ес. Фал Йегови ӕновуд уарзт дӕхебӕл ку ӕвзарай, уӕдта дӕуӕй амондгундӕр адӕймаг нӕ уодзӕй (Ис. 54:7, 8).

13. Римӕхсӕн горӕти ӕдас ӕма амондгун цард кӕнӕн цӕмӕн адтӕй?

¹³ Римӕхсӕн горӕти ледзӕггагӕн тӕссаг нецӕмӕй адтӕй, уомӕн ӕма Йеговӕ ӕхуӕдӕг загъта: «Еци горӕттӕ уин уодзӕнцӕ тогесгутӕй баримӕхсунмӕ» (Йес. Н. 20:2, 3). Йегови нӕ фӕндадтӕй, цӕмӕй адӕймагӕн еци-еу гъуддаги туххӕй нӕуӕгӕй тӕрхон кодтайуонцӕ. Уомӕй уӕлдай ма тогесӕгӕн дӕр барӕ н’ адтӕй еци горӕтмӕ бацӕун ӕма ӕ тоггини рамарун. Мадта цалинмӕ ледзӕггаг еци горӕти адтӕй, уӕдмӕти ’й, зӕгъӕн ес, ӕма Йеговӕ гъӕуай кодта. Римӕхсӕн горӕт ахӕстдони хузӕн н’ адтӕй, уоми адӕймаги бон адтӕй косун, иннетӕн ӕнхус кӕнун ӕма Йеговӕн лӕггадӕ кӕнун. Еу загъдӕй си адӕн неци гъӕуагӕ адтӕнцӕ ӕма сӕ бон адтӕй амондгун цард кӕнун.

14. Ӕ тӕрегъӕдбӕл ка фӕсмон кӕнуй, еци киристони бон федарӕй ӕууӕндун цӕбӕл ӕй?

¹⁴ Еуӕй-еухатт уӕззау тӕрегъӕд ка искодта ӕма ибӕл ка ӕрфӕсмон кодта, уӕхӕн киристӕнтти сӕ цӕсгон хъӕбӕр фӕххуӕруй. Уотӕ дӕр ма сӕмӕ фӕккӕсуй, ӕма сӕбӕл Йегови цӕсти ӕносмӕ цъумур фӕд байзайдзӕй. Кӕд ду дӕр уотӕ сагъӕс кӕнис, уӕд ӕй зонӕ: Йеговӕ ку ниххатир кӕнуй, уӕд ӕцӕгӕй ниххатир кӕнуй. Ӕма дӕ дӕхе фудгинбӕл нимайун нӕбал  гъӕуй. Раздӕр ке кой кодтан, еци ӕнсувӕр, Дэниел, уой ӕхебӕл бавзурста. Хестӕр нӕлгоймӕгтӕ ’й ку бараст кодтонцӕ ӕма ин ку банхус кодтонцӕ, уӕд ӕй ӕ цӕсгон нӕбал хуардта, ӕма ин дзӕвгарӕ фенцондӕр ӕй. Дэниел зӕгъуй: «Кӕддӕр-некӕддӕр исуолӕфтӕн. Хуцау куд зӕгъуй, уотӕ ку бакодтон, уӕд мӕ мӕ цӕсгон нӕбал хуардта. Хуцау мин мӕ тӕрегъӕд ниххатир кодта. Йеговӕ зӕрдӕ куд байвардта, уотӕ нин нӕ уаргъ райсуй, ӕма ’й хъӕбӕр идардмӕ фехсуй, цӕмӕй ӕй уингӕ дӕр макӕдбал фӕккӕнӕн». Римӕхсӕн горӕти адӕймаги тӕрсун нӕбал гъудӕй, мастесӕг ӕй ке рамардзӕй, уомӕй. Уотӕ мах дӕр: Йеговӕ нин нӕ тӕрегъӕд ку ниххатир кӕна, уӕд нӕ тӕрсун нӕ гъӕуй, ескӕд нин еци гъуддаг нӕ цӕстӕмӕ ке бадардзӕй кенӕ ни дзуапп ке байагордзӕй, уомӕй. (Бакӕсӕ Псалом 103:8–12.)

15, 16. Киристе нӕ Хестӕр саугин ке ӕй ӕма нӕ ӕ тогӕй ке балхӕдта, е нин федар нифс куд дӕттуй, Йеговӕ нӕмӕ фӕлмӕнзӕрдӕ ке уодзӕй?

¹⁵ Йеговӕ нӕмӕ фӕлмӕнзӕрдӕ ке уодзӕй, уобӕл мах израилӕгтӕй хъӕбӕрдӕр гъӕуама ӕууӕндӕн. Апостол Павел хъӕбӕр маст кодта, Йегови зӕрдӕ ин, куд ӕй фӕндадтӕй, уотӕ рохс кӕнун ке нӕ уадӕй, уой туххӕй ӕма загъта: «Ӕз арфӕ кӕнун Хуцауӕн... нӕ Хецау Йесо Киристей фӕрци!» (Ром. 7:25). Цума ’й уомӕй ци зӕгъун фӕндадтӕй? Павел тӕрегъӕдгун фӕндти хӕццӕ тох кодта, удта кӕд ӕ тӕрегъӕдтӕбӕл ӕрфӕсмон кодта, уӕддӕр ӕй ӕ цӕсгон хуардта. Фал е федарӕй ӕууӕндтӕй, Йеговӕ ин Йесо Киристей фӕрци ӕ тӕрегъӕдтӕ ке ниххатир кодта, уобӕл. Киристе нӕ ӕ тогӕй ке балхӕдта, уой фӕрци нин Хуцауи рази кӕдзос цӕсгон ес, нӕ зӕрди ба фарнӕ (Дзиуит. 9:13, 14). Киристе нӕ Хестӕр саугин ке ӕй, уомӕ гӕсгӕ, «Хуцаумӕ уой фӕрци ка хӕстӕг кӕнуй, уони ӕ бон ӕй кӕронмӕ дӕр фӕййервӕзун кӕнун, уомӕн ӕма алкӕддӕр уодӕгас ӕй ӕма ӕ бон ӕй уони туххӕй Хуцауӕн лигъстӕ кӕнун» (Дзиуит. 7:24, 25). Рагон Израили Хестӕр саугин адӕнӕн сӕ зӕрдӕбӕл лӕуун кодта, Йеговӕ син сӕ тӕрегъӕдтӕ ке ниххатир кодта. Нӕ Хестӕр саугин, Йесо Киристе ба нин никки устурдӕр нифс дӕттуй, Хуцау нӕмӕ «багъӕуагӕ сахат фӕлмӕнзӕрдӕ» ке уодзӕй ӕма нин «е ’стур хуарзӕнхӕй» ке бахай кӕндзӕй (Дзиуит. 4:15, 16).

¹⁶ Мадта цӕмӕй Йеговӕ нӕ римӕхсӕн бунат уа, уой туххӕй гъӕуама Киристей нивондбӕл ӕууӕндӕн. Ӕ цард ӕгас адӕни туххӕй ке равардта, айдагъ уобӕл ӕууӕндун фагӕ нӕй. Гъӕуама ӕууӕндай Киристе дӕу туххӕй ке рамардӕй (Гал. 2:20, 21). Федарӕй ӕууӕндӕ Киристей нивонди фӕрци, Хуцау дӕу тӕрегъӕдтӕ ке ниххатир кӕндзӕй, ӕма еци нивонди фӕрци дӕуӕн ӕносон царди нифс ке фӕззиндтӕй. Киристей нивонд ӕй Хуцау дӕуӕн ке искодта, еци лӕвар.

17. Цӕмӕн ес зӕгъӕн, ӕма Йеговӕ дӕ римӕхсӕн бунат уа, уомӕй хуӕздӕр неци ес?

¹⁷ Римӕхсӕн горӕтти туххӕй ци закъон адтӕй, е нин ӕвдесуй, Йеговӕ куд фӕлмӕнзӕрдӕ Хуцау ӕй, уой. Еци закъонӕй бӕрӕг ӕй, Йегови цӕсти цард табуйаг ке ӕй. Уомӕй уӕлдай ма нин ӕвдесуй хестӕр нӕлгоймӕгтӕ нин куд ӕнхус кӕнунцӕ, удта адӕймаг ӕцӕгӕй фӕсмон кӕнуй ӕви нӕ, е цӕмӕй бӕрӕг фӕууй ӕма Йеговӕ куд зӕрдиагӕй хатир кӕнуй, уой. Мадта архайис, цӕмӕй Йеговӕ дӕ римӕхсӕн бунат уа? Хуцау дӕ гъӕуай кӕна, уомӕй хуӕздӕр неци ес! (Пс. 91:1, 2). Йеговӕ раст ӕма фӕлмӕнзӕрдӕ Хуцау ӕй, ӕма иннӕ статьяй дзурд цӕудзӕй римӕхсӕн горӕтти туххӕй закъон нин куд ӕнхус кӕнуй Йегови фӕнзун.