1. Аци дуйней адӕни зундахаст нӕбӕл еуӕй-еухатт куд рабӕрӕг уй?

ХУЦАУИ Дзурдӕй ци базонӕн, уой ӕнхӕст кӕнун зин цӕмӕн фӕууй? Еу гъуддаг уой медӕги ӕй, ӕма раст ци ӕй, уой кӕнунмӕ сӕрниллӕгдзийнадӕ гъӕуй. Аци фӕстаг бӕнтти цӕргӕй ба е ӕнцон нӕй, уомӕн ӕма нӕ алливарс адӕн ӕнцӕ «хеуарзон, ӕхцауарзагӕ, хестауагӕ, сӕрбӕрзонд», удта хебӕлхуӕцун дӕр нӕ зонунцӕ (2 Тим. 3:1–3). Хуцауи лӕггадгӕнгутӕ ке ан, уомӕ гӕсгӕ ’й зонӕн, аци гъуддӕгтӕ хуарз ке нӕ ’нцӕ, уой, фал нӕмӕ, ӕвӕдзи, еуӕй-еухатт уотӕ фӕккӕсуй, ӕма уӕхӕн адӕнӕн ӕнтӕсгӕ дӕр фулдӕр кӕнуй ӕма амондгундӕр етӕ фӕуунцӕ (Пс. 37:1; 73:3). Ӕвӕдзи, фӕссагъӕс кӕнӕн: «Цума иннети хуарзбӕл тухсун ести пайда хӕссуй? Сӕрниллӕг ку уон, уӕд ма мӕ адӕн нимайдзӕнцӕ?» (Лук. 9:48) Аци дуйней адӕн куд сагъӕс кӕнунцӕ, мах дӕр уотӕ сагъӕс кӕнун ку райдайӕн, уӕд нин хуӕртӕ ӕма ӕнсувӕрти хӕццӕ лимӕнӕй цӕрун зин уодзӕй, удта бӕрӕг нӕбал уодзӕй, ӕцӕг киристӕнттӕ ке ан, е дӕр. Фал рагидзаманти ка цардӕй, еци еузӕрдон лӕггадгӕнгути хабӕрттӕ ку ӕртасӕн ӕма сӕ ку фӕнзӕн, уӕд нин е устур пайда ӕрхӕсдзӕй.

2. Хуцауи еузӕрдон лӕггадгӕнгути хабӕрттӕ кӕсун нин ци пайда ӕрхӕсдзӕй?

 ² Рагидзаманти ка цардӕй, еци еузӕрдон лӕггадгӕнгутӕ Хуцауи ӕмбӕлттӕ цӕй фӕрци иссӕнцӕ? Ӕ зӕрдӕ ин куд рохс кодтонцӕ? Удта син Хуцауи фӕндон кӕронмӕ исӕнхӕст кӕнунмӕ хъауритӕ кӕцӕй адтӕй? Библий уӕхӕн хабӕрттӕ ку фӕккӕсӕн ӕма сӕбӕл ку фӕссагъӕс кӕнӕн, уӕд не ’ууӕндундзийнадӕ бафедар уй.

3, 4. а) Хуцау нӕ цӕй фӕрци ахур кӕнуй? б) Не ’ууӕндундзийнадӕ федар кӕнунмӕ ма нӕ зонундзийнӕдтӕй уӕлдай ци гъӕуй?

³ Йеговӕ нӕ цох нӕ уадзуй, не ’ууӕндундзийнадӕ федар кӕнунмӕ нӕ цидӕриддӕр гъӕуй, уомӕй. Хуцау нин унаффитӕ дӕттуй ӕма нӕ ахур кӕнуй Библий, публикацити, нӕ сайти, интернет-телеуинунади программити, удта ӕмбурдтӕ ӕма конгрессти фӕрци. Фал ӕй Киристе куд балӕдӕрун кодта, уомӕ гӕсгӕ ба ма нӕ зонундзийнӕдтӕй уӕлдай никкидӕр цидӕр гъӕуй. Йесо загъта: «Мӕнӕн мӕ хуӕруйнаг ӕй, ка мӕ рарвиста, уомӕн ӕ фӕндон ӕнхӕст кӕнун ӕма ин ӕ гъуддаг кӕронмӕ рахъӕртун кӕнун» (Иоан. 4:34).

⁴ Хуцауи фӕндон ӕнхӕст кӕнун Киристейӕн адтӕй хуӕруйнаги хузӕн. Пайда хуӕруйнӕгтӕ хуӕрунӕй бауӕр куд федар кӕнуй, уотӕ Хуцауи фӕндон ӕнхӕст кӕнунӕй дӕр, не ’ууӕндундзийнадӕ федар кӕнуй. Зӕгъӕн, хатгай игъосун кӕнуни фембӕлдмӕ фӕлладӕй рандӕ уӕн, фал игъосун кӕнуни фӕсте ба хӕдзарӕмӕ цийнӕгӕнгӕй фездӕхӕн ӕма нӕмӕ хъауритӕ дӕр фӕззиннуй.

5. Зундӕй архайун ци пайда хӕссуй?

⁵ Йеговӕ нин ци баихӕс кодта, уой сӕрниллӕгӕй ку фенхӕст кӕнӕн, уӕд уотемӕй зундгиндӕр кӕнӕн (Пс. 107:43). Ӕма еци зунд цийфӕнди хъиамӕти аргъ дӕр ӕй. Библи куд зӕгъуй, уомӕ гӕсгӕ ’й «нецӕй хӕццӕ ес рабарӕн... Ка ибӕл ниххуӕцуй, уонӕн ӕй царди бӕласӕ, ӕма ибӕл федар ка хуӕцуй, уони исхондзӕнцӕ амондгун» (Ӕмб. 3:13–18). Йесо дзурдта: «Кӕд уой зонетӕ ӕма уотӕ кӕнтӕ, уӕд амондгун айтӕ» (Иоан. 13:17). Мадта Киристей ахуркӕнуйнӕгтӕ амондгун адтайуонцӕ, цалинмӕ ин ӕ амундтӕ ӕнхӕст кодтайуонцӕ, уӕдмӕ. Ӕма син е еу бони гъуддаг н ’адтӕй, фал гъӕуама сӕ царди над иссайдӕ.

6. Йеговӕ нӕ цӕбӕл ахур кӕнуй, уомӕй идарддӕр дӕр цӕмӕн гъӕуама пайда кӕнӕн?

⁶ Мах дӕр гъӕуама, рӕстдзийнади надбӕл цӕугӕй ци базонӕн, уомӕй идарддӕр дӕр нӕ царди пайда кӕнӕн. Цӕветтонӕн ӕрхӕссӕн дохтири. Ес имӕ косӕндзаумӕуттӕ ӕма зонундзийнӕдтӕ. Фал ин етӕ ӕ кусти пайда уодзӕнцӕ, ку си пайда кӕна, ӕрмӕстдӕр уӕд. Ка ’й зонуй, еци дохтир фиццаг анз нӕ косуй ӕма хъӕбӕр исдӕсни ӕй, фал ӕй кӕд фӕндуй, цӕмӕй идарддӕр дӕр хуарз дохтир уа ӕма ӕ кустӕй ӕ зӕрдӕ рохс кӕна, уой туххӕй гъӕуама ӕ зонундзийнӕдтӕй пайда кӕна. Уотӕ мах дӕр, рӕстдзийнадӕ ку базудтан, уӕд хъӕбӕр амондгун адтан, уомӕн ӕма Библий ци бакастан, уомӕй пайда кодтан. Фал цӕмӕй идарддӕр дӕр амондгун уӕн, уой туххӕй гъӕуама алли бон дӕр пайда кӕнӕн, Йеговӕ нӕ цӕбӕл ахур кӕнуй, уомӕй.

7. Библий хабӕрттӕ нин пайда кӕд ӕрхӕсдзӕнцӕ?

⁷ Аци статьяй базондзиан, сӕрниллӕг ун цӕхуӕн цуппар гъуддагеми зин фӕууй, уой, удта рагидзаманти ка цардӕй, еци еузӕрдон лӕггадгӕнгутӕ сӕрниллӕгдзийнадӕ куд ӕвдистонцӕ, уой дӕр. Фал еци хабӕрттӕ уотид бакӕсун фагӕ нӕй. Гъӕуй ма расагъӕс кӕнун, царди нӕ кӕми багъӕудзӕнцӕ, уобӕл дӕр.

8, 9. Гъуддӕгти 14:8–15 Павели сӕрниллӕгдзийнади туххӕй ци базудтан? (Кӕсӕ хузӕмӕ статьяй райдайӕни.)

⁸ Хуцауи «фӕндуй, цӕмӕй аллихузи адӕн, рӕстдзийнадӕ ци ӕй, уой базононцӕ» (1 Тим. 2:4). Ду ба цӕхуӕн цӕстӕй кӕсис, рӕстдзийнадӕ ка нӕма базудта, еци адӕнмӕ? Апостол Павел игъосун кодта дзиуиттӕгтӕн, Йегови ӕнӕуой дӕр ка зудта, еци адӕнӕн. Фал ма уонӕй уӕлдай, мӕнгӕ хуцӕуттӕн ка кувта, уонӕн дӕр игъосун кодта. Зӕгъӕн ес, ӕма уотемӕй ӕ сӕрниллӕгдзийнадӕ фӕлвӕрд цудӕй. Цума куд?

⁹ Павел фиццаг хатт ку адтӕй игъосун кӕнуни балций, уӕд Варнави хӕццӕ горӕт Листри адтӕнцӕ. Ци ликаойнӕгтӕ си цардӕй, етӕ Павел ӕма Варнави сӕ хуцӕуттӕбӕл банимадтонцӕ ӕма си сӕ еуей исхудтонцӕ Зевс, инней ба – Гермес. Цума Павел ӕма Варнавӕн е ӕхцӕуӕн адтӕй? Уотӕ сӕмӕ кастӕй, ӕма фӕстаг дууӕ горӕтеми ци ӕфхуӕрд баййафтонцӕ, уой фӕсте син уӕхӕн кадӕ дӕр ӕмбӕлуй? Кенӕ ба цума уотӕ расагъӕс кодтонцӕ, ӕма син нур фадуат фӕззиндтӕй фулдӕр адӕнӕн хуарз хабар фегъосун кӕнунмӕ? Нӕъ! Етӕ нигъгъӕр кодтонцӕ: «Ци косетӕ? Мах дӕр сумах хузӕн адӕймӕгтӕй ӕндӕр неци ан!» (Гъуд. 14:8–15).

10. Павел ӕма Варнавӕ сӕхе ликаойнӕгтӕй уӕлдӕр цӕмӕннӕ нимадтонцӕ?

¹⁰ Павел ӕма Варнавӕ уотӕ ку загътонцӕ, мах дӕр сумах хузӕн адӕн ан, зӕгъгӕ, уӕд, етӕ дӕр ӕнӕнхӕст ке ’нцӕ, уой кой кодтонцӕ. Фал е уобӕл дзорӕг н’ адтӕй, ӕма етӕ дӕр ликаойнӕгти хузӕн мӕнгӕ хуцӕуттӕн кувтонцӕ. Павел ӕма Варнавӕ Хуцауӕй ӕрвист миссионертӕ адтӕнцӕ (Гъуд. 13:2). Етӕ Хуцауи сугъдӕг хъаурӕй исӕрст ӕрцудӕнцӕ ӕма син адтӕй дессаги нифс. Фал уой туххӕй сӕхе иннетӕй уӕлдӕр нӕ нимадтонцӕ. Етӕ ’й лӕдӕрдтӕнцӕ, еци адӕн хуарз хабар сӕ зӕрдӕмӕ ку райсонцӕ, уӕд етӕ дӕр уӕларвон царди нифсӕй ке исхайгин уодзӕнцӕ.

11. Игъосун кӕнгӕй нӕ бон куд ӕй Павели хузӕн сӕрниллӕг ун?

¹¹ Мах ӕркастан, нӕ сӕрниллӕгдзийнадӕн тӕссаг ке туххӕй фӕууй, еци гъуддӕгтӕй еуемӕ. Павели хузӕн махмӕ дӕр уотӕ некӕд фӕккӕсуй, ӕма Хуцау игъосун кӕнуни гъуддаг махӕн ке баихӕс кодта кенӕ е ’нхуси фӕрци цидӕр гъуддӕгтӕ ке искодтан, уой туххӕй иннетӕй хуӕздӕр ан. Нӕ бон ӕй нӕхемӕ уӕхӕн фарста раттун: «Мӕ территорий адӕнмӕ цӕхуӕн цӕстӕй кӕсун? Ӕндӕр адӕнихаттӕй ка ӕй, уонӕмӕ ӕнӕнвӕрсон каст нӕ фӕккӕнун?» Ӕгас зӕнхӕбӕл дӕр Йегови Ӕвдесӕнтӕ агорунцӕ, хуарз хабармӕ ка байгъосдзӕй, уӕхӕн адӕни. Кадӕртӕ ба ма исахур кӕнунцӕ, иннӕ адӕн ӕнӕнвӕрсон каст кӕмӕ кӕнунцӕ, уӕхӕн адӕнихатти ӕвзаг ӕма ӕгъдӕуттӕ. Фал сӕмӕ уотӕ некӕд фӕккӕсуй, ӕма кӕмӕн игъосун кӕнунцӕ, уонӕй хуӕздӕр ӕнцӕ. Етӕ ’й лӕдӕрунцӕ, алли адӕймагӕн дӕр ке гъӕуама банхус кӕнонцӕ Паддзахади хабар ӕ зӕрдӕмӕ райсун.

12. Епафрас иннетӕбӕл ке тухстӕй, уой куд ӕвдиста?

¹² Сӕрниллӕг ке ан, е ма бӕрӕг уодзӕй, «мах хузӕн хъазар ӕууӕндундзийнадӕй ка исхайгин ӕй», еци хуӕртӕ ӕма ӕнсувӕрти туххӕй ку ковӕн, уӕд (2 Пет. 1:1). Уотӕ кодта Епафрас. Библий ӕ кой ӕрмӕстдӕр ӕртӕ хатти ес. Павел Роми ӕ хӕдзари ахӕст ку адтӕй, уӕд колоссӕгтӕмӕ Епафраси туххӕй финста: «Е алкӕддӕр зӕрдиагӕй фӕкковуй сумах туххӕй» (Кол. 4:12). Епафрас ӕнсувӕрти хуарз зудта ӕма сӕбӕл зӕрдиагӕй тухстӕй. Ӕхе уавӕр дӕр хуӕздӕр н’ адтӕй,  уомӕн ӕма си Павел загъта, зӕгъгӕ, е дӕр «мӕн хузӕн ахӕст» ӕй (Филим. 23). Фал уотемӕй дӕр иннети сагъӕс кодта ӕма син ӕ бон цӕмӕй адтӕй, уомӕй ӕнхус кодта. Е хуӕртӕ ӕма ӕнсувӕрти туххӕй кувта, сӕ нӕмттӕ син дзурдта, уотемӕй. Мах бон дӕр ӕй иннети туххӕй уотӕ ковун, уомӕн ӕма уӕхӕн кувдтитӕн устур хъаурӕ ес (2 Кор. 1:11; Иак. 5:16).

13. Нӕ бон куд ӕй иннети туххӕй ковгӕй Епафраси фӕнзун?

¹³ Расагъӕс кӕнӕ, ке туххӕй дӕ бон ӕй ковун, ӕма син сӕ нӕмттӕ кувди медӕг дзорӕ. Зӕгъӕн, дӕ бон ӕй ковун де ’мбӕлтти туххӕй кенӕ уе ’мбурди бийнонтӕй зиндзийнӕдтӕбӕл ка ӕмбӕлуй, уони туххӕй. Ка ’й зонуй сӕ гъӕуй ӕхсидзгӕ унаффӕ рахӕссун кенӕ ести фӕлварӕнтӕбӕл ӕмбӕлунцӕ. Дӕ бон ма ӕй, сӕ нӕмттӕ нӕ сайти финст кӕмӕн ӕнцӕ, еци ӕнсувӕрти туххӕй дӕр ковун. Никкидӕр ма дӕ бон ӕй ковун, ӕ хеуӕнттӕй еске кӕмӕн рамардӕй кенӕ ӕрӕги бӕллӕхтӕ ӕма тугъд ка бавзурста, уони туххӕй, кенӕ ба ӕндӕр зиндзийнӕдтӕ ка ӕвзаруй, уони туххӕй дӕр. Нӕ кувдтитӕ берӕ хуӕртӕ ӕма ӕнсувӕрти гъӕунцӕ. Ӕма уони туххӕй ку фӕкковӕн, уӕд ӕй февдесӕн, айдагъ нӕхе сагъӕс нӕ, фал иннети сагъӕс дӕр ке кӕнӕн (Фил. 2:4). Йеговӕ уӕхӕн кувдтитӕ игъосуй.

14. Цӕмӕн ес зӕгъӕн, ӕма Йеговӕй хуӕздӕр игъосӕг нӕййес?

¹⁴ Сӕрниллӕг ке ан, е ма бӕрӕг уодзӕй, хуарз игъосгутӕ ку уӕн, уомӕй дӕр. Иакови 1:19 финст ӕй: «Алли адӕймаг дӕр гъӕуама рӕвдзӕ уа байгъосунмӕ». Йеговӕй хуӕздӕр игъосӕг нӕййес (Райд. 18:32; Йес. Н. 10:14). Зӕгъӕн, дӕ бон ӕй бакӕсун, Рацуди 32:11–14 ци дзубанди финст ес, уой. (Ба ’й кӕсӕ.) Кӕд Моисей ци дзурдта, е уотӕ ӕхсидзгӕ н’ адтӕй, уӕддӕр ин Йеговӕ барӕ равардта, цӕмӕй ӕ гъуди загътайдӕ. Дӕу бон ба иссайдӕ ескӕмӕ гъе уотӕ лӕмбунӕг байгъосун ӕма кӕд раздӕр фӕррӕдуйидӕ,  уӕддӕр, е куд зӕгъуй, уотӕ бакӕнун? Уомӕй уӕлдай ма Йеговӕ лӕмбунӕг игъосуй, ка ибӕл ӕууӕндуй, уӕхӕн адӕни кувдтитӕмӕ.

15. Нӕ бон куд ӕй иннетӕн кадӕ кӕнун, Йеговӕ син куд кадӕ кӕнуй, уотӕ?

¹⁵ Дӕхе бафӕрсӕ: «Кӕд Йеговӕ ӕхе уотӕ ӕрниллӕг кӕнуй, цӕмӕй адӕни кувдтитӕмӕ игъоса, зӕгъӕн, Аврааммӕ, Рахильмӕ, Моисеймӕ, Йесо Навинмӕ, Маноймӕ, Илийамӕ ӕма Езекимӕ куд игъуста, уотӕ, уӕд ӕз ба хуӕртӕ ӕма ӕнсувӕртӕн минкъийдӕр кадӕ куд гъӕуама кӕнон? Ӕз дӕр син сӕ гъудимӕ гъӕуама ма байгъосон, гӕнӕн ку уа, удта куд зӕгъунцӕ, уотӕ ма бакӕнон? Ӕмбурди кенӕ бийнонти медӕг кӕмӕн ӕй мӕ бон банхус кӕнун? Ци кӕнун, цӕмӕй еци гъуддаги ӕнтӕстгундӕр уон?» (Райд. 30:6; Тӕрх. 13:9; 1 Пад. 17:22; 2 Анз. 30:20).

16. Паддзах Давид ӕхе куд бадардта, Шимей ӕй ӕлгъетун ку райдӕдта, уӕд?

¹⁶ Сӕрниллӕг ку уӕн, уӕд ма нин хебӕл хуӕцун дӕр ӕнцондӕр уодзӕй (Еф. 4:2). Хуарз цӕветтон финст ӕрцудӕй 2 Самуили 16:5–13 (Ба ’й кӕсӕ.) Паддзах Саули хеуон, Шимей, Давид ӕма ӕ лӕггадгӕнгутӕбӕл дортӕ ӕхсун райдӕдта, удта сӕ ӕлгъиста. Шимеййи басабур кӕнунмӕ Давидмӕ фагӕ хъаурӕ адтӕй, фал ӕхебӕл фӕххуӕстӕй ӕма имӕ дзоргӕ дӕр не ’скодта. Цума Давидӕн ци банхус кодта ӕхебӕл фӕххуӕцун? Уой базонӕн ес ӕртиккаг псаломӕй.

17. Давид ӕхебӕл цӕй фӕрци фӕххуӕстӕй ӕма ’й нӕ бон куд ӕй фӕнзун?

¹⁷ Давид ӕртиккаг псалом ниффинста, ӕ фурт Авессалом ӕй марунмӕ ку агурдта, уӕд. Еци рӕстӕг ба ма ’й Шимей дӕр ӕлгъетун райдӕдта ӕма ибӕл дорадзагъд искодта. Фал Давидмӕ уойбӕрцӕ хъаурӕ разиндтӕй, ӕма имӕ неци исдзурдта. Цума кӕцӕй? Псалом 3:4 финст ӕнцӕ ӕ дзурдтӕ: «Ӕз гъӕр кӕндзӕн Йеговӕмӕ, ӕма мин е дзуапп ратдзӕй ӕ сугъдӕг хонхӕй». Мах дӕр ӕфхуӕрд ку феййафӕн, уӕд гъӕуама Йеговӕмӕ ковӕн, Давид куд кувта, уотӕ, цӕмӕй нин бафӕразунмӕ ӕ сугъдӕг хъаурӕ ратта. Еске дӕ ку ’фхуӕра, уӕд дӕ бон н’ адтайдӕ дӕхебӕл минкъий фулдӕр фӕххуӕцун кенӕ фулдӕр хатир кӕнун? Федарӕй ӕй зонис, Йеговӕ дӕбӕл зиндзийнӕдти рӕстӕг ке батухсдзӕй, ке дин банхус кӕндзӕй ӕма дин ке арфӕ кӕндзӕй?

18. Дӕ бон куд ӕй Йегови разамундмӕ гӕсгӕ архайун ӕма дин е цӕхуӕн пайда ӕрхӕсдзӕй?

¹⁸ Алли гъуддаги дӕр раст куд ӕй, уотӕ ку архайӕн, уӕд зундгиндӕр кӕндзиан ӕма нин Йеговӕ арфӕ кӕндзӕй. Ӕмбесӕндти 4:7 финст ӕй: «Зунд ӕй тӕккӕ сӕйрагдӕр». Кӕд адӕймагмӕ зунд зонундзийнӕдтӕй фӕззиннуй, уӕддӕр уотӕ зӕгъӕн нӕййес, ӕма си уомӕй ӕндӕр неци гъӕуй. Зунд бӕрӕг фӕууй, ци унаффитӕ фӕххӕссӕн, уомӕй. Зӕгъӕн, мулдзугути дӕр ӕнгъезуй зундгин исхонун, сӕхецӕн зумӕгмӕ хуӕруйнаг ке бацӕттӕ кӕнунцӕ, уой туххӕй (Ӕмб. 30:24, 25). Киристе Хуцауи зундӕй хайгин адтӕй, ӕма алкӕддӕр ӕ гъуддӕгтӕй ӕ Фиди зӕрдӕ рохс кодта (1 Кор. 1:24; Иоан. 8:29). Хуцау нин райарфӕ кӕндзӕй, идарддӕр дӕр сӕрниллӕг ку уӕн, удта раст унаффитӕ хӕссунмӕ зундӕй ку архайӕн, уӕд. (Бакӕсӕ Матфеййи 7:21–23.) Мадта идарддӕр дӕр архайӕ, цӕмӕй ӕмбурди иннетӕн дӕ сӕрниллӕгдзийнадӕй фӕнзуйнаг уай. Цӕмӕй дӕ бон уа, раст куд ӕй, уотӕ архайун, уой туххӕй рӕстӕг ӕма фӕразондзийнадӕ гъӕуй. Фал сӕрниллӕгдзийнадӕ кӕнуй амондгун цардмӕ нур дӕр ӕма ӕносмӕ дӕр.