1. Ӕ мӕлӕти размӕ, еци изӕр Йесо ӕ ахуркӕнуйнӕгти хӕццӕ цӕхуӕн ӕхсидзгӕ гъуддагбӕл дзурдта?

Ӕ МӔЛӔТИ размӕ, еци изӕр Йесо ӕ ахуркӕнуйнӕгтӕн уарзондзийнади кой 30 хатти искодта. Удта ма син загъта, гъӕуама «уӕ кӕрӕдзей уарзайтӕ», зӕгъгӕ (Иоан. 15:12, 17). Сӕ уарзондзийнадӕй гъӕуама адӕни астӕу бӕрӕг адтайуонцӕ, цӕмӕй ӕй адӕн зудтайуонцӕ, ӕцӕгӕйдӕр Киристей фӕдбӕлдзӕугутӕ ке ’нцӕ, уой (Иоан. 13:34, 35). Йесо ци уарзондзийнади кой кодта, е уотид ӕнкъарӕн нӕй. Уӕхӕн уарзондзийнадӕ адӕймагӕн бӕрӕг фӕууй ӕ уодуӕлдай гъуддӕгтӕй. Йесо загъта: «Уомӕй устурдӕр уарзондзийнадӕ нӕййес, ӕма еске е ’мбӕлтти сӕрбӕл ӕ уод ку ратта. Ци уин фӕдзӕхсун, уой кӕд ӕнхӕст кӕнтӕ, уӕд айтӕ ме ’мбӕлттӕ» (Иоан. 15:13, 14).

2. а) Хуцауи лӕггадгӕнгутӕ иннӕ адӕнӕй цӕмӕй хецӕн кӕнунцӕ? б) Аци статьяй цӕхуӕн фарстатӕмӕ ӕркӕсдзиан?

² Абони дӕр Йегови лӕггадгӕнгути зонунцӕ, кӕрӕдзей куд уодуӕлдай уарзтӕй уарзунцӕ ӕма сӕ астӕу ци еудзийнадӕ ес, уомӕй (1 Иоан. 3:10, 11) Ӕгас зӕнхӕбӕл  дӕр Хуцауи лӕггадгӕнгути астӕу ӕцӕг уарзондзийнадӕ ес, цийфӕнди адӕнихаттӕй ма уонцӕ ӕма цийфӕнди ӕвзагбӕл ма дзоронцӕ, уӕддӕр. Фал цума абони иннети уарзун уӕлдай ӕхсидзгӕдӕр цӕмӕн ӕй? Йеговӕ ӕма нӕ Йесо ке уарзунцӕ, е нӕ куд федар кӕнуй? Нӕ бон куд ӕй иннетӕн уодӕнцойнӕ хӕссун ӕма сӕ федар кӕнун? (1 Кор. 8:1).

3. Аци уӕззау рӕстӕг адӕнбӕл куд бӕрӕг кӕнуй?

³ Мах цӕрӕн «хъӕбӕр уӕззау рӕстӕги» ӕма нӕ цард идзаг ӕй «маст ӕма фудӕбонӕй» (2 Тим. 3:1–5; Пс. 90:10). Уой туххӕй беретӕ сӕ къохтӕ ӕруадзунцӕ. Алли анз дӕр сӕхе рамарунцӕ 800 000 адӕймагемӕй фулдӕр, ӕндӕр загъдӕй алли 40 сикъунди дӕр еу адӕймаг. Гъигагӕн, нӕ хуӕртӕ ӕма ӕнсувӕртӕй дӕр еуӕй-еуӕтӕ сӕхемӕ сӕ къох исесунцӕ.

4. Йегови лӕггадгӕнгутӕй ӕхецӕн мӕлӕт ка агурдта?

⁴ Рагидзаманти Йегови еузӕрдон лӕггадгӕнгутӕй дӕр еуӕй-еуетӕ уӕхӕн зиндзийнӕдти бафтуиуонцӕ, ӕма сӕхецӕн мӕлӕт агурдтонцӕ. Зӕгъӕн, Иов ӕ фур ристӕй дзурдта: «Мӕ цард мӕ уодӕн фенадӕ ’й» (Иов 7:16; 14:13). Ионӕ Хуцауи фӕндон ку исӕнхӕст кодта ӕма гъуддаг, е куд ӕнгъӕл адтӕй, уотӕ ку нӕ рауадӕй, уӕд гъе уотӕ маст кодта, ӕма Хуцаумӕ искувта: «Корӕг [ди] дӕн, Йеговӕ, райсӕ мин мӕ цард, уомӕн ӕма мин цардӕй мӕлӕт хуӕздӕр ӕй» (Ионӕ 4:3). Еу рӕстӕг пахампар Илийайӕн дӕр ӕ нифс басастӕй ӕма Хуцауӕй мӕлӕт корун райдӕдта: «Мӕ бон нӕбал ӕй! О Йеговӕ, райсӕ мин мӕ цард» (1 Пад. 19:4). Фал Йеговӕн еци еузӕрдон лӕггадгӕнгутӕ хъазар адтӕнцӕ, ӕма ’й нӕ фӕндадтӕй, цӕмӕй си еске рамӕла. Уӕхӕн сагъӕстӕ сӕмӕ ке уидӕ, уой туххӕй син уайдзӕф нӕ кодта, фал син банхус кодта ӕма сӕ бафедар кодта, цӕмӕй ин идарддӕр дӕр еузӕрдонӕй лӕггадӕ кодтайуонцӕ.

5. Хуӕртӕ ӕма ӕнсувӕрти абони уӕлдай хъӕбӕрдӕр уарзун цӕмӕн гъӕуй?

⁵ Абони нӕ хуӕртӕ ӕма ӕнсувӕртӕй беретӕ алли бон дӕр зиндзийнӕдти хӕццӕ тох кӕнунцӕ, ӕма сӕ уӕлдай хъӕбӕрдӕр гъӕуй, ке сӕ уарзунцӕ, уой лӕдӕрун. Еуӕй-еуетӕбӕл сӕ дини туххӕй ходгӕ фӕккӕнунцӕ, иннетӕ ба уой туххӕй ӕфхуӕрд ӕййафунцӕ. Кӕмӕндӕрти ба кусти сӕ фудкой кӕнунцӕ кенӕ ба сӕбӕл иннети ахъелунцӕ. Кадӕртӕ ба бафӕллайунцӕ, берӕ косгӕ син ке фӕууй кенӕ зин кусти ке фӕккосунцӕ, уой туххӕй. Беретӕ ба сӕ бийнонти зиндзийнӕдтӕй бафӕллайунцӕ, зӕгъӕн, Ӕвдесӕн ка нӕй, уӕхӕн цардӕмбали ӕфхуӕрӕн дзубандитӕй. Уой туххӕй арӕх сӕхемӕ нецӕййаг ӕркӕсунцӕ ӕма сӕмӕ хъауритӕ нӕбал байзайуй. Цума сӕ ке бон ӕй бафедар кӕнун?

6. Хуцауи уарзондзийнадӕ ӕ лӕггадгӕнгути куд федар кӕнуй?

⁶ Йеговӕ ӕ лӕггадгӕнгути уарзуй ӕма син зӕрдӕ ӕвӕруй, ӕносмӕ дӕр сӕ ке уарздзӕй. Расагъӕс кӕнӕ, израилӕгтӕн сӕ нифс куд бафедар адтайдӕ, Йеговӕ син уотӕ ку загъта: «Хъазар мин ке дӕ, уой туххӕй кадгин дӕ мӕ цӕсти, ӕма дӕ хъӕбӕр уарзун...  Ма тӕрсӕ, ӕз дӕ хӕццӕ дӕн» (Ис. 43:4, 5). Мах ӕй зонӕн, Йегови цӕсти ни алкӕмӕндӕр устур аргъ ке ес. Библий Йегови туххӕй финст ӕй: «Е ӕй хъаурӕгин Хуцау, ӕма дӕ фӕййервӕзун кӕндзӕй. Дӕумӕ кӕсгӕй ӕ зӕрдӕ цийнӕ кӕндзӕй» (Соф. 3:16, 17).

7. Йегови уарзт мади уарзти хӕццӕ рабарӕн цӕмӕн ес? (Кӕсӕ хузӕмӕ статьяй райдайӕни.)

⁷ Йеговӕ ӕ адӕнӕн зӕрдӕ ӕвӕруй, цийфӕнди зиндзийнӕдтӕбӕл ма исӕмбӕлонцӕ, уӕддӕр сӕ ке нӕ ниууадздзӕй. Библий финст ӕй: «Сумах хӕсдзӕнцӕ сӕ гъӕбеси. Сӕ гъӕбеси уӕ исбадун кӕндзӕнцӕ ӕма уӕбӕл цийнитӕ кӕндзӕнцӕ. Адӕймагӕн ӕ мадӕ ӕ зӕрдӕ куд сабур кӕна, уотӕ уин ӕз дӕр уӕ зӕрдӕ сабур кӕндзӕн» (Ис. 66:12, 13). Дӕ цӕститӕбӕл рауайун кӕнӕ, мадӕ ӕ суввӕллони ӕхемӕ куд ӕрбалхъевуй кенӕ ’й ӕ гъӕбесмӕ куд исесуй ӕма ибӕл куд фӕццийнитӕ кӕнуй. Аци дзурдтӕй Йегови фӕндадтӕй бавдесун, ӕ еузӕрдон лӕггадгӕнгути куд берӕ уарзуй, уой. Мӕкӕд гурусхӕ кӕнӕ, Йегови цӕсти дин устур аргъ ке ес, уобӕл (Йер. 31:3).

8, 9. Киристей уарзт нӕ куд федар кӕнуй?

⁸ Йеговӕ нӕ ке уарзуй, е ма цӕмӕй бӕрӕг ӕй? Иоанни 3:16 финст ӕй: «Хуцау дуйне уотӕ хъӕбӕр уарзуй, ӕма ӕ еунӕг Фурти равардта, цӕмӕй ибӕл ка ӕууӕндуй, е ма фесӕфа, фал ӕносон цардӕй хайгин уа». Киристей нивонд ма ӕвдесуй, Йесо нӕ ӕхуӕдӕг куд уарзуй, уой дӕр, ӕма уой ке зонӕн, е дӕр нӕ федар кӕнуй. Библи куд зӕгъуй, уомӕ гӕсгӕ нӕ Киристей уарзтӕй нӕдӕр мӕститӕ, нӕдӕр зиндзийнӕдтӕ рахецӕн кӕндзӕнцӕ (Ромӕгтӕмӕ 8:35, 38, 39).

 ⁹ Еуӕй-еухатт нӕмӕ зиндзийнӕдти рӕстӕг хъауритӕ нӕбал байзайуй кенӕ нин Йеговӕн лӕггадӕ кӕнун цийнӕдзийнадӕ нӕбал фӕххӕссуй. Фал нӕ Киристе куд уарзуй, уобӕл ку сагъӕс кӕнӕн, уӕд нин е хъауритӕ дӕтдзӕй. (Бакӕсӕ 2 Коринфӕгтӕмӕ 5:14, 15.) Киристей уарзондзийнади фӕрци нӕ фӕнддзӕй идарддӕр цӕрун ӕма Йеговӕн лӕггадӕ кӕнун. Ӕма уой фӕрци нӕ къохтӕ не ’руадзӕн, ӕрдзон бӕллӕх ку ’рцӕуй, ӕфхуӕрд ку феййафӕн, естӕбӕл ку фӕффудӕнгъӕл уӕн кенӕ нин тухст сагъӕстӕ ӕнцойнӕ ку нӕ фӕддӕттунцӕ, уӕд.

10, 11. Нифссаст ка ӕй, уони федар кӕнун ке ихӕс ӕй? Ба ’й лӕдӕрун кӕнӕ.

¹⁰ Йеговӕ ма нӕ федар кӕнуй не ’мбурдти фӕрци дӕр. Ӕма си уой туххӕй боз ке ан, уой ӕвдесдзиан, нӕ хуӕртӕ ӕма не ’нсувӕрти ку уарзӕн, уӕд. Удта нӕ бон цидӕриддӕр ӕй, уой кӕнӕн, цӕмӕй ӕй зононцӕ, Йеговӕ син ке аргъ кӕнуй ӕма сӕ ке уарзуй, уой (1 Иоан. 4:19–21). Апостол Павел киристӕнтти разӕнгард кодта: «Мадта нур куд кӕнтӕ, уотӕ идарддӕр дӕр уӕ кӕрӕдзей нифсбӕл нифс ӕфтауетӕ ӕма кӕрӕдзей федар кӕнтӕ» (1 Фес. 5:11). Ӕмбурди айдагъ хестӕр нӕлгоймӕгти бон нӕй иннети федар кӕнун, фал алке бон дӕр. (Бакӕсӕ Ромӕгтӕмӕ 15:1, 2.)

¹¹ Ӕхемӕ ка нийгъуста, уони еуӕй-еухатт дохтирти ӕнхус дӕр багъӕуй (Лук. 5:31). Хестӕр нӕлгоймӕгтӕ ӕма иннӕ хуӕртӕ ӕма ӕнсувӕртӕ ’й лӕдӕрунцӕ, дохтиртӕ кенӕ психологтӕ ке нӕ ’нцӕ, уой. Фал уӕддӕр сӕ бон  ӕй, нифссаст ка ӕй, уони федар кӕнун. Библий финст ӕй: «Нифссаст ка ӕй, уони дзурдӕй рӕвдауетӕ, лӕмӕгъти федар кӕнтӕ, алке хӕццӕ дӕр уотӕ берӕфӕразон» (1 Фес. 5:14). Ӕ къохтӕ ка ӕруагъта, уони хӕццӕ дзоргӕй гъӕуама фӕразон уӕн, ӕма архайӕн, цӕмӕй сӕ балӕдӕрӕн ӕма син сӕ нифс бафедар кӕнӕн. Ду ба архайис иннети бафедар кӕнунбӕл? Кӕд гъо, уӕд ма никкидӕр дӕ бон ци ӕй кӕнун, цӕмӕй син банхус кӕнай?

12. Радзорӕ, ӕмбурди кедӕр куд бафедар кодтонцӕ, уӕхӕн хабар.

¹² Лӕгъуз сагъӕсти хӕццӕ ка тох кӕнуй, уони ба нӕ бон куд ӕй нӕ уарзондзийнадӕй бафедар кӕнун? Европӕй еу хуӕрӕ зӕгъуй: «Хатгай мӕ мӕ цард нӕбал фӕгъгъӕуй. Фал мӕ ӕмбурди хуӕртӕ ӕма ӕнсувӕртӕ хъӕбӕр федар кӕнунцӕ. Етӕ мин ку н’ адтайуонцӕ, уӕд мӕ зиани хабар раги райгъустайдӕ. Хуӕртӕ ӕма ӕнсувӕртӕ алкӕддӕр мӕ фарсмӕ фӕуунцӕ ӕма мӕбӕл зӕрдиагӕй тухсунцӕ. Депресси мӕмӕ ке ес, уой беретӕ нӕ зонунцӕ, фал, ести уӕд, алкӕддӕр мӕ фарсмӕ ӕрбалӕуунцӕ. Еу бийнонтӕ ба мин ниййергути хузӕн иссӕнцӕ. Етӕ мин хъӕбӕр ӕнхус кӕнунцӕ ӕма сӕмӕ мӕ бон ӕй цийфӕнди афони дӕр бадзорун». Ке зӕгъун ӕй гъӕуй, ӕмбурди алке бон нӕ фӕууй уотӕ ӕнхус кӕнун. Фал хуӕртӕ ӕма ӕнсувӕрти федар кӕнун ба ни алке бон дӕр ӕй *.

13. Еске бафедар кӕнун нӕ ку фӕндӕуа, уӕд нӕ зӕрдӕбӕл ци гъӕуама дарӕн?

¹³ Игъосун зонӕ (Иак. 1:19). Нӕ уарзондзийнадӕ бӕрӕг уодзӕй, лӕмбунӕг байгъосун ку зонӕн, уӕд. Уӕхӕн фарстатӕ имӕ дӕттӕ, цӕмӕй дӕ бон уа балӕдӕрун, цӕбӕл тухсуй, уой. Ӕма ибӕл зӕрдиагӕй ке тухсис, е дӕ цӕсгонӕй дӕр бӕрӕг уодзӕй. Ести дин ку дзора, уӕд ин ӕ дзурд ӕрдӕгбӕл ма къуӕрӕ, фӕразон уо. Игъосун ку зонай, уӕд хуӕздӕр балӕдӕрдзӕнӕ, адӕймаги зӕрди ци ес, уой ӕма ин дӕ бон уодзӕй банхус кӕнун. Уотемӕй уомӕн дӕр ӕнцондӕр уодзӕй дӕумӕ байгъосун. Адӕймаг ӕй ку уина, зӕрдиагӕй ибӕл ке тухсис, уой, уӕд ин устур уодӕнцойнӕ ӕрхӕсдзӕнӕ.

14. Уайдзӕфтӕ кӕнунӕй нӕхе цӕмӕн гъӕуама хезӕн?

¹⁴ Уайдзӕф кӕнунмӕ ма тагъд кӕнӕ. Депресси кӕмӕ ес, уӕхӕн адӕймагӕн ӕнӕргъудийӕй ести ку зӕгъай, уӕд ӕ уавӕр никки фуддӕр фӕууодзӕй, ӕма ин банхус кӕнун дӕр нӕбал рауайдзӕй. Библи зӕгъуй: «Ӕнӕргъуди адӕймагӕн ӕ дзурдтӕ ӕнцӕ карди цӕфи хузӕн, зундгини ӕвзаг ба ӕй ӕвдадзи хуасӕ» (Ӕмб. 12:18). Ке зӕгъун ӕй гъӕуй, барӕй адӕймаги нӕ дзурдтӕй нӕ фӕрресун кӕндзиан, фал уотӕ рауайдзӕй, ци дзорӕн, уобӕл ку нӕ сагъӕс кӕнӕн, уӕд. Цӕмӕй адӕймаги бафедар кӕнай, уой туххӕй ӕй гъӕуама лӕдӕра, ӕцӕгӕйдӕр ибӕл ке тухсис (Матф. 7:12).

15. Хуӕртӕ ӕма ӕнсувӕрти бафедар кӕнунмӕ ма нин ци банхус кӕндзӕй?

¹⁵ Федар кӕнӕ Хуцауи Дзурди фӕрци.  (Бакӕсӕ Ромӕгтӕмӕ 15:4, 5.) Библи нин балӕвар кодта, «федардзийнадӕ ӕма уодӕнцойнӕ ка дӕттуй, еци Хуцау». Уомӕй уӕлдай ма нин ӕртасунмӕ дӕр хуарз ӕрмӕг ес, зӕгъӕн, «Индекс публикаций Сторожевой Башни» ӕма «Путеводитель по публикациям Свидетелей Иеговы». Уони фӕрци иссердзиан, нӕ хуӕртӕ ма не ’нсувӕрти бафедар кӕнунмӕ нин ка банхус кӕндзӕй, уӕхӕн стихтӕ ӕма публикацитӕ.

16. Нифссаст адӕймаги бафедар кӕнунмӕ нин цӕхуӕн менеугутӕ банхус кӕндзӕнцӕ?

¹⁶ Лӕмбунӕг ӕма хӕларзӕрдӕ уо. Йеговӕ ӕй «тӕрегъӕдгӕнагӕ Фидӕ ӕма уодӕнцойнӕдӕттӕг Хуцау». (Бакӕсӕ 2 Коринфӕгтӕмӕ 1:3–6; Лук. 1:78; Ром. 15:13.) Павел дӕр хуарз цӕветтон ниууагъта, уомӕн ӕма еци гъуддаги Йегови фӕнзта. Еухатт Павел загъта: «Фал уӕ мах рӕвдудтан, дзедзедарӕг мадӕ ӕ бӕдоли куд фӕррӕвдауй, уотӕ. Уотӕ хъӕбӕр уӕ уарзӕн, ӕма айдагъ уомӕ н’ адтан цӕттӕ, цӕмӕй уин Хуцауи хуарз хабар фегъосун кодтайанӕ, фал ма цӕттӕ адтан сумахӕн нӕ уодтӕ раттунмӕ дӕр, уомӕн ӕма нӕ зӕрдитӕн иссайтӕ хъазар» (1 Фес. 2:7, 8). Мах дӕр Йегови хузӕн лӕмбунӕг ӕма хӕларзӕрдӕ ку уӕн, уӕд, ка ’й зонуй, не ’нхус ескӕмӕн ӕ кувдбӕл дзуапп разиндзӕй.

17. Цӕмӕй нӕ бон уа иннети нифс федар кӕнун, уой туххӕй сӕмӕ ци зӕрдӕ гъӕуама дарӕн?

¹⁷ Еугурӕйдӕр ӕнӕнхӕст ке ан, уой ма иронх кӕнӕ. Хуӕртӕ ӕма ӕнсувӕртӕй ӕнхӕстдзийнадӕ ку агорай, уӕд фӕффудӕнгъӕл уодзӕнӕ (Еккл. 7:21, 22). Иронх ди ма уӕд, Йеговӕ ни, нӕ бон ци ӕй, уомӕй фулдӕр ке нӕ агоруй. Мадта гъӕуама иннетӕмӕ раст цӕстӕй кӕсӕн (Еф. 4:2, 32). Хуӕртӕ ӕма ӕнсувӕрти иннети хӕццӕ некӕд бардзиан, цӕмӕй сӕмӕ уотӕ ма фӕккӕса ӕма сӕ лӕггади иннетӕй минкъийдӕр кӕнунцӕ. Уой бӕсти сӕ зӕрдиагӕй ӕстаудзиан, сӕ бон ци ӕй, уой ке кӕнунцӕ, уой туххӕй. Уотемӕй син банхус кӕндзиан Йеговӕн цийнӕгӕнгӕй лӕггадӕ кӕнун (Гал. 6:4).

18. Кӕрӕдзей нифс федар кӕнунмӕ нӕ ци разӕнгард кӕнуй?

¹⁸ Алкӕмӕндӕр ни Йеговӕ ӕма Киристе устур аргъ кӕнунцӕ (Гал. 2:20). Нӕ хуӕртӕ ӕма ӕнсувӕрти ке уарзӕн, уомӕ гӕсгӕ нӕ фӕндуй, цӕмӕй ӕй уинонцӕ, ке сӕбӕл тухсӕн, уой. «Гъӕйдӕ мадта тундзӕн, фарнӕ ци хӕссуй ӕма кӕрӕдзей цӕй фӕрци ес бафедар кӕнӕн, уомӕ» (Ром. 14:19). Мах хъӕбӕр ӕнгъӕлмӕ кӕсӕн, тухст сагъӕстӕн сӕ кой дӕр кӕми нӕбал уодзӕй, еци цардмӕ дзенети. Уоми нӕбал уодзӕй незтӕ, тугъд, ӕфхуӕрд ӕма бийнонти хӕлхъойтӕ, удта си фудӕнгъӕл дӕр нецӕмӕй фӕууодзиан. Адам нӕ ци тӕрегъӕди хай бакодта, еци тӕрегъӕди туххӕй некебал мӕлдзӕй. Киристей минанзон хецаудзийнади кӕронмӕ ӕгас адӕн дӕр исуодзӕнцӕ ӕнхӕст. Ӕма фӕстаг фӕлварӕни еузӕрдонӕй ка байзайа, етӕ исуодзӕнцӕ Хуцауи сувӕллӕнттӕ ӕма син лӕвӕрд ӕрцӕудзӕй «дессаги сӕребарӕдзийнадӕ» (Ром. 8:21). Нур ба бал нӕ гъӕуй архайун, цӕмӕй кӕрӕдзей нифс федар кӕнӕн ӕма кӕрӕдземӕн ӕнхус кӕнӕн еци дессаги цард фӕууинунмӕ!