РӔСТӔГ базонун дӕ ку фӕгъгъӕуй, уӕд ци бакӕнис? Ӕвӕдзи, сахатмӕ ӕркӕсис. Еске дӕ ку бафӕрса, цал сахатти ’й, зӕгъгӕ, уӕдта куд зӕгъдзӕнӕ? Цалдӕр хузи дӕ бон ӕй зӕгъун.

Зӕгъӕн, сахатбӕл 1:40 ку уа, уӕд ӕй куд зӕгъдзӕнӕ? Еу зӕгъдзӕй, нур ӕй 1:40, зӕгъгӕ, иннӕ ба 13:40, кадӕр ба зӕгъдзӕй инсӕй минутти гъӕуаггин дууӕ.

Библи кӕсгӕй, ӕвӕдзи, фӕссагъӕс кӕнис, цума еци дзаманти рӕстӕг куд нимадтонцӕ, уобӕл. Дзиуиттаг финстити рамбӕлуй дзурдтӕ «сӕумӕ», «рӕфтӕ» ӕма «изӕрӕрдӕмӕ» (Райд. 8:11; 19:27; 43:16; Дук. з. 28:29; 1 Пад. 18:26). Фал си бӕлвурд рӕстӕги кой дӕр фӕццӕуй.

Рагон Израили горӕтти адтӕй гъӕуайгӕнгутӕ. Етӕ адӕни сабурдзийнадӕ гъӕуай кодтонцӕ, уӕлдайдӕр ба ӕхсӕвигӕнтти. Берӕ ӕности дӕргъи израилӕгтӕ ӕхсӕвӕ дех кодтонцӕ ӕртӕ хаййебӕл ӕма сӕ худтонцӕ гъӕуайгӕнӕн афӕнттӕ (Пс. 63:6). Зӕгъӕн, Тӕрхонгӕнгути 7:19 финст ӕй: «Ӕхсӕви дуккаг гъӕуайгӕнӕн афонӕ». Киристе зӕнхӕмӕ ку ’рцудӕй, уӕди рӕстӕгмӕ ба дзиуиттӕгтӕ дӕр грекъӕгтӕ ӕма ромӕгти ӕгъдаумӕ гӕсгӕ ӕхсӕвӕ цуппар гъӕуайгӕнӕн афонебӕл дех кӕнун райдӕдтонцӕ.

Дзурдбаст «гъӕуайгӕнӕн афонӕ» арӕх ӕмбӕлуй Евангелити. Зӕгъӕн, Йесо Киристе донбӕл лодкамӕ ку цудӕй, уӕд е адтӕй цуппӕрӕймаг гъӕуайгӕнӕн афони, гъома боницъӕхти (Матф. 14:25). Киристе ӕ фӕсномуг дзурдтӕй еуеми загъта: «Хӕдзари хецау, давӕг сӕмӕ ӕхсӕвӕ ци афони бацӕудзӕй, уой ку зонидӕ, уӕд ӕ цӕститӕ цъундӕ дӕр не ’ркӕнидӕ ӕма ’й ӕ хӕдзарӕмӕ бабурун нӕ бауадзидӕ» (Матф. 24:43).

Киристе ӕ ахуркӕнуйнӕгтӕн уотӕ ку загъта, «ма бафунӕй уотӕ, уомӕн ӕма ’й нӕ зонетӕ, кӕд ӕрцӕудзӕй хӕдзари хецау: изӕрӕй, ӕмбесӕхсӕвӕ, кӕркуасӕнти ӕви боницъӕхӕй», зӕгъгӕ, уӕд цуппар гъӕуайгӕнӕн афоней кой кодта (Мар. 13:35; феп.). Фиццаг гъӕуайгӕнӕн афонӕ ӕй «изӕр» – хорнигулдӕй изӕри фараст сахаттей уӕнгӕ. Дуккаг гъӕуайгӕнӕн афонӕ ба ӕй «ӕмбесӕхсӕвӕ» – фараст сахаттемӕй, ӕмбесӕхсӕвӕмӕ. Ӕртиккаг гъӕуайгӕнӕн афонӕ – «кӕркуасӕнтӕ» – адтӕй ӕмбесӕхсӕвӕй ӕхсӕвӕ еу ӕртӕ сахаттемӕ. Киристей ци ӕхсӕвӕ ниййахӕстонцӕ, еци ӕхсӕвӕ уасӕнгӕ, ӕвӕдзи, ӕртиккаг гъӕуайгӕнӕн афони ниууаста (Мар. 14:72). Цуппӕрӕймаг гъӕуайгӕнӕн афонӕ, кенӕ «боницъӕхтӕ» ба адтӕй ӕхсӕвӕ ӕртӕ сахаттемӕй хорискастмӕ.

Библи ку финстонцӕ, уӕд адӕнмӕ сахӕттӕ н’ адтӕй, фал уӕддӕр рӕстӕг сӕхе цӕхуӕндӕр ӕгъдаумӕ гӕсгӕ нимадтонцӕ.