1, 2. а) Уотӕ зӕгъӕн цӕмӕн ес, ӕма ӕригӕнтти бон ӕй Сайтанбӕл, удта лӕгъуз изӕдтӕбӕл фӕууӕлахез ун? (Кӕсӕ хузӕмӕ статьяй райдайӕни.) б) Аци статьяй цӕмӕ ӕркӕсдзиан?

АПОСТОЛ Павел киристӕнтти рабарста ӕфсӕддонти хӕццӕ. Мах дӕр, зӕгъӕн ес, ӕма тохгӕ кӕнӕн. Ке зӕгъун ӕй гъӕуй мах адӕни нихмӕ нӕ тохӕн, фал Сайтани ӕма ӕ фӕдбӕл ка рацудӕй, еци изӕдти нихмӕ. Етӕ мингай ӕнзти дӕргъи тохунцӕ, ӕма еци гъуддаги хъӕбӕр исдӕсни ’нцӕ. Уомӕ гӕсгӕ дӕмӕ, ӕвӕдзи, уотӕ дӕр фӕккӕсуй, ӕма еци тугъди рамолӕн нӕййес, уӕлдайдӕр ба ӕригонӕн. Цума адӕймаги бон ӕй уӕхӕн хъаурӕгин знаги нихмӕ фӕллӕуун? Ӕй, ӕма беретӕн е уайгӕ дӕр кӕнуй! Цӕй фӕрци? Йеговӕ син ци хъаурӕ дӕттуй, уой фӕрци. Уомӕй уӕлдай ма фӕлтӕрдгун ӕфсӕддонти хузӕн, етӕ дӕр сӕхе «исефтонг кодтонцӕ, Хуцау цидӕриддӕр тохӕндзаумӕуттӕ дӕттуй, уонӕй». (Бакӕсӕ Ефесӕгтӕмӕ 6:10–12.)

² Павел аци цӕветтон ку ’рхаста, уӕд, ӕвӕдзи, ромаг ӕфсӕддони тохӕндзаумӕуттӕбӕл расагъӕс кодта (Гъуд. 28:16). Аци статьяй Павели цӕветтонмӕ лӕмбунӕгдӕр  ӕркӕсдзиан. Удта ма базондзиан, Хуцау ке дӕттуй, еци «тохӕндзаумӕуттӕ» дарун ӕнцон цӕмӕннӕ фӕууй ӕма цӕхуӕн пайда хӕссунцӕ, уой туххӕй еуӕй-еу ӕригӕнттӕ ци зӕгъунцӕ, уой дӕр.

3, 4. Хуцауи Дзурди рӕстдзийнадӕ ромаг ӕфсӕддони рони хӕццӕ рабарӕн цӕмӕн ес?

³ Бакӕсӕ Ефесӕгтӕмӕ 6:14. Ромаг ӕфсӕддонбӕл ци ронӕ фӕууидӕ, е конд адтӕй тӕнӕг ӕфсӕйнаг гӕппӕлтӕй, цӕмӕй ин ӕ астӕу гъӕуай кодтайдӕ, удта ибӕл цӕмӕй ӕ уӕззау згъӕрхӕдонӕ дӕр ӕнгом бадтайдӕ. Ронӕбӕл ма ӕфсӕйнаг цӕгтӕ дӕр адтӕй хъӕма ӕма кард ӕрауиндзунмӕ. Ӕфсӕддонӕн ӕ ронӕ ӕнгом ӕлвӕст ку уидӕ, уӕд тугъдмӕ нифсгундӕр цуд кодта.

⁴ Еци рони хузӕн, Хуцауи Дзурди рӕстдзийнадӕ мах дӕр мӕнгӕ дини ахурӕдтӕй гъӕуай кӕнуй (Иоан. 8:31, 32; 1 Иоан. 4:1). Ӕма рӕстдзийнадӕ куд фулдӕр уарзӕн, уотӕ нин Хуцауи уагӕвӕрдтӕмӕ гӕсгӕ цӕрун ӕнцондӕр уодзӕй, гъома «рӕстдзийнади згъӕрхӕдонӕ» дарун (Пс. 111:7, 8; 1 Иоан. 5:3). Уомӕй уӕлдай ма рӕстдзийнадӕ хуӕздӕр ку лӕдӕрӕн, уӕд нин не знӕгти нихмӕ лӕуун дӕр ӕнцондӕр уодзӕй (1 Пет. 3:15).

5. Алкӕддӕр ӕцӕг ци ӕй, уой дзорун цӕмӕн гъӕуй?

⁵ Библий рӕстдзийнадӕ нӕ зӕрдӕмӕ ку багъардта, уӕд нӕ е баразӕнгард кодта, ци базудтан, уомӕ гӕсгӕ нӕ цард аразун, удта алкӕддӕр, ӕцӕг ци ӕй, уой дзорун. Хуцауи ка уарзуй, етӕ сайгӕ цӕмӕннӕ фӕккӕнунцӕ? Уомӕн ӕма мӕнгӕттӕ дзорун Сайтани сӕйраг мадзӕлттӕй сӕ еу ӕй. Адӕймаг сайгӕ ку кӕна, уӕд уомӕй ӕхецӕн фуддӕр кӕнуй, удта ибӕл ка ӕууӕндуй, уомӕн дӕр (Иоан. 8:44). Мадта кӕд ӕнӕнхӕст ан, уӕддӕр гъӕуама сайгӕ макӕд кӕнӕн (Еф. 4:25). Е ӕнцон нӕй. 18-анздзуд Абигейл зӕгъуй: «Еуӕй-еухатт мӕмӕ уотӕ фӕккӕсуй, ӕма ӕцӕгӕй ци адтӕй, уой радзорун неци уотӕ хуарз уодзӕй, уӕлдайдӕр ба дӕмӕ уой туххӕй ке ӕрхаудзӕй, уой ку зонай, уӕд». Фал Абигейл уӕддӕр сайгӕ некӕд фӕккӕнуй. Цума цӕмӕн? Ӕхуӕдӕг ӕй уотӕ балӕдӕрун кодта: «Алкӕддӕр ӕцӕгӕй ци адтӕй, уой ке фӕдздзорун, уой фӕрци мӕ Хуцауи рази мӕ цӕсгон нӕ хуӕруй. Уомӕй уӕлдай ма ’й мӕ ниййергутӕ ӕма ме ’мбӕлттӕ дӕр зонунцӕ, ӕууӕндӕн мӕбӕл ке ес, уой». 23-анздзуд Викторийӕ ба зӕгъуй: «Алкӕддӕр раст ци ӕй, уой ку дзорай ӕма ци уагӕвӕрдтӕмӕ гӕсгӕ цӕрис, уони сӕрти ку нӕ хезай, уӕд дӕбӕл иннетӕ, ӕвӕдзи, гириз дӕр кӕндзӕнцӕ. Фал дӕ е уӕддӕр берӕ хуарздзийнӕдтӕмӕ ӕркӕндзӕй: фӕннифсгундӕр уодзӕнӕ, Йегови хӕццӕ дӕ лимӕндзийнадӕ фӕффедардӕр уодзӕй, удта дӕ ка уарзуй, етӕ дин никки устурдӕр аргъ кӕндзӕнцӕ». Мадта ’й, ӕвӕдзи, балӕдӕрдтӕ, алкӕддӕр ӕцӕгдзийнади «ронӕ» дарун ӕхсидзгӕ цӕмӕн ӕй, уой.

6, 7. Рӕстдзийнадӕ згъӕрхӕдони хӕццӕ рабӕрӕн цӕмӕн ес?

⁶ Ромаг ӕфсӕддонтӕ ке дардтонцӕ, еци згъӕрхӕдонӕ конд адтӕй, цӕхгӕрмӕ ка цудӕй, уӕхӕн ӕфсӕйнаг гӕппӕлтӕй. Еци гӕппӕлтӕ кӕрӕдзебӕл федаргонд адтӕнцӕ гӕрзитӕй, удта  ӕфсӕйнаг ӕфтауӕнтӕй, ӕма уой фӕрци згъӕрхӕдонӕ бауӕрбӕл ӕнгом бадтӕй. Ӕфсӕддони усхъитӕбӕл ба никки фулдӕр ӕфсӕйнаг гӕппӕлтӕ адтӕй ӕма федаргонд адтӕнцӕ гӕрзитӕбӕл. Еци згъӕрхӕдони ӕфсӕддонӕн ӕнцон змӕлӕн н’ адтӕй, удта ’й арӕх кӕсун гъудӕй, ести си фефтудӕй ӕви нӕ, уомӕ. Фал ин згъӕрхӕдонӕ ӕ зӕрдӕ ӕма бауӕри ӕндӕр иуӕнгтӕ знаги фӕттӕй ӕма хъӕмай цӕфтӕй гъӕуай кодта.

⁷ Йегови раст уагӕвӕрдтӕ дӕр нин еци згъӕрхӕдони хузӕн нӕ «зӕрдӕ» гъӕуай кӕнунцӕ (Ӕмб. 4:23). Ромаг ӕфсӕддон ӕ згъӕрхӕдонӕ, рӕуӕгдӕр ӕфсӕйнагӕй конд ка адтӕй, уӕхӕнбӕл некӕд баййивтайдӕ. Уотӕ мах дӕр Йегови раст уагӕвӕрдтӕ гъӕуама макӕд ӕййевӕн, нӕхемӕ растдӕр ци кӕсуй, уобӕл. Махмӕ уойбӕрцӕ зунд нӕййес, цӕмӕй нӕ бон уа нӕ зӕрдӕ багъӕуай кӕнун (Ӕмб. 3:5, 6). Мадта гъӕуама нӕ «згъӕрхӕдонӕмӕ» арӕхдӕр кӕсӕн, идарддӕр дӕр нин нӕ зӕрдӕ гъӕуай кӕнуй ӕви нӕ, уомӕ.

8. Йегови раст уагӕвӕрдтӕмӕ гӕсгӕ цӕрун цӕмӕн гъӕуй?

⁸ Ӕвӕдзи дӕмӕ хатгай уотӕ фӕккӕсуй, ӕма Хуцауи уагӕвӕрдтӕмӕ гӕсгӕ цӕрун зин ӕй, уомӕн ӕма дӕ бон нӕй, ци дӕ фӕндуй, уой кӕнун. 21-анздзуд Данел зӕгъуй: «Библий уагӕвӕрдтӕмӕ гӕсгӕ ке цӕрун, уой туххӕй мӕбӕл мӕ ахургӕнгутӕ ӕма ме ’мкъласонтӕ ходгӕ кӕниуонцӕ. Ӕма еу рӕстӕг мӕ нифс басастӕй». Цума ин ци банхус кодта? Данел зӕгъуй: «Ба ’й лӕдӕрдтӕн, Хуцауи уагӕвӕрдтӕмӕ гӕсгӕ цӕрун хуӕздӕр цӕмӕн ӕй, уой. Ме ’мбӕлттӕ ке худтон, уонӕй еуӕй-еуетӕ иссӕнцӕ наркомантӕ, иннетӕ ба ахур ниууахтонцӕ. Сӕхуӕдтӕ сӕхе цард куд фехалдтонцӕ, уомӕ хъӕбӕр зин кӕсӕн адтӕй. Мах ба Йеговӕ ӕцӕгӕйдӕр гъӕуай кӕнуй». 15-анздзуд Медисон ба радзурдта: «Йегови раст уагӕвӕрдтӕмӕ гӕсгӕ цӕрун ӕма иннетӕ ци кӕнунцӕ, уой ма кӕнун мин ӕнцон нӕй. Зӕгъӕн ес, ӕма мӕхе хӕццӕ тохгӕ кӕнун». Цума уомӕн ба ци ӕнхус кӕнуй? Медисон зӕгъуй: «Ӕз архайун, цӕмӕй ӕй ма иронх кӕнон, Йегови ном ке хӕссун, уой. Ци фӕлварӕнти бахаун, етӕ ба ӕнцӕ, Сайтан мӕбӕл ке фехсуй, еци фӕттӕ. Ӕма еци тохи ку фӕууӕлахез ун, уӕд ма никкидӕр фӕннифсгундӕр ун».

9–11. а) Киристӕнттӕ цӕхуӕн «къахидарӕс» дарунцӕ? б) Хуарз хабар игъосун кӕнун нин ӕнцондӕр цӕй фӕрци уодзӕй?

⁹ Бакӕсӕ Ефесӕгтӕмӕ 6:15. Ромаг ӕфсӕддонбӕл къахидарӕс ку н’ адтайдӕ, уӕд тохунмӕ, зӕгъӕн ес, ӕма цӕттӕ н’ адтӕй. Еци дзабуртӕ хъӕбӕр федар адтӕнцӕ, уомӕн ӕма сӕ бунтӕ ӕртӕдагъӕй худ царӕй конд адтӕнцӕ. Удта си ӕнцонцӕуӕн адтӕй.

¹⁰ Хуарз дзабурти фӕрци ромаг ӕфсӕддони бон адтӕй тугъдмӕ рацӕун. Мах дӕр фарни хабар ку фӕххӕссӕн, уӕд, зӕгъӕн ес, ӕма нӕ къӕхтӕбӕл уӕхӕн дзабуртӕ искӕнӕн (Ис. 52:7; Ром. 10:15). Фал хатгай хуарз хабар игъосун кӕнунмӕ устур нифс фӕгъгъӕуй. 20-анздзуд Бо зӕгъуй: «Раздӕр ме ’мкъласонти хӕццӕ Библий туххӕй дзорунмӕ мӕ нифс нӕ хастон. Ӕвӕдзи, ӕфсӕрми кодтон. Фал ӕй нур ба лӕдӕрун, ӕфсӕрми кӕнун си ӕппундӕр ке нӕ гъудӕй. Ӕма нур ме ’нгӕрти  хӕццӕ Хуцауи туххӕй хъӕбӕр зӕрдиагӕй фӕдздзорун».

¹¹ Берӕ ӕригӕнттӕ куд зӕгъунцӕ, уомӕ гӕсгӕ син игъосун кӕнун ӕнцондӕр фӕууй, рагацау сӕхе ку бацӕттӕ кӕнунцӕ, уӕд. Дӕ бон ци ӕй кӕнун, цӕмӕй ести, уӕд цӕттӕ уай? 16-анздзуд хуӕрӕ Джулийӕ зӕгъуй: «Мӕ сумки алкӕддӕр ести публикацитӕ дарун. Удта ме ’мкъласонтӕ ци гъуди кӕнунцӕ ӕма цӕбӕл ӕууӕндунцӕ, уой ку фӕдздзорунцӕ, уӕд сӕмӕ лӕмбунӕг байгъосун, уой фӕсте ба расагъӕс кӕнун, мӕ бон син банхус кӕнун куд ӕй, уобӕл. Цӕттӕ ку фӕуун, уӕд мин ӕнцондӕр фӕууй, сӕ зӕрдӕмӕ ка багъардзӕй, уӕхӕн гъудитӕ радзорун». 23-анздзуд Макензи ба зӕгъуй: «Де ’нгӕрттӕмӕ хӕларзӕрдӕ ку уай ӕма сӕмӕ лӕмбунӕг ку игъосай, уӕд ӕй балӕдӕрдзӕнӕ, ци сӕ тухсун кӕнуй, уой. Ӕз архайун, цӕмӕй мин ӕнӕкастӕй ма изайонцӕ, нӕ организаци ӕригӕнттӕн цидӕриддӕр ӕрмӕг уадзуй, етӕ. Уой фӕрци багъӕуаги мӕ бон фӕууй, хуӕздӕр ка рафедаудзӕй, уӕхӕн стих бакӕсун кенӕ ба син нӕ сайти ести ӕрмӕг бавдесун». Куд ӕй уинӕн, уотемӕй  игъосун кӕнунмӕ дӕр куд хуӕздӕр бацӕттӕ кӕнай, уотӕ дӕбӕл дӕ «къахидарӕс» дӕр хуӕздӕр баддзӕй.

12, 13. Сайтан нӕбӕл ци «содзгӕ фӕттӕ» ӕхсуй, етӕ ци ’нцӕ?

¹² Бакӕсӕ Ефесӕгтӕмӕ 6:16. Ромаг ӕфсӕддони «устур уарт» цуппӕрдегъон адтӕй ӕма ’й усхъитӕй уӕргути уӕнгӕ ӕмбарзта. Еци уарт ӕй знаги цӕфтӕй ӕма фӕттӕй гъӕуай кодта.

¹³ Сайтан нӕбӕл ке ӕхсуй, еци «содзгӕ фӕттӕ» ци ’нцӕ? Зӕгъӕн, Сайтан архайуй, цӕмӕй уотӕ сагъӕс кӕнун райдайӕн, цума нӕ Йеговӕ нӕ уарзуй ӕма имӕ мах мӕтӕ нӕййес. 19-анздзуд Идӕ зӕгъуй: «Арӕх мӕмӕ уотӕ фӕккӕсуй, цума ми Йеговӕ хъӕбӕр идард ӕй ӕма ’й нӕ фӕндуй, цӕмӕй е ’мбал уон». Цума ин уӕхӕн гъудити хӕццӕ тох кӕнунмӕ ци ӕнхус кӕнуй? Идӕ зӕгъуй: «Ӕмбурдтӕ мин ме ’ууӕндундзийнадӕ федар кӕнунмӕ хъӕбӕр ӕнхус кӕнунцӕ. Раздӕр ӕмбурди ӕппундӕр некуд архайдтон, дзуапп дӕр некӕд дӕдтинӕ. Уотӕ мӕмӕ кастӕй, ӕма ӕз ци гъуди кӕнун, е ӕппундӕр неке гъӕуй. Фал нур ба алли ӕмбурдмӕ дӕр мӕхе фӕццӕттӕ кӕнун ӕма архайун, цӕмӕй еу ӕртӕ хатти уӕддӕр дзуапп раттон. Е ӕнцон нӕй, фал дзуапп ку раттун, уӕд мин ӕхцӕуӕндӕр фӕууй. Хуӕртӕ ӕма ӕнсувӕртӕ дӕр мӕ хъӕбӕр бафедар кӕнунцӕ. Гъема ӕмбурди фӕсте нӕхемӕ ку фӕццӕун, уӕд ӕппундӕр нӕбал фӕггурусхӕ кӕнун, Йеговӕ мӕ ке уарзуй, уобӕл».

14. Иди хабар нин цӕбӕл дзорӕг ӕй?

¹⁴ Ромаг ӕфсӕддони уарти конд цӕхуӕн адтӕй, уӕхӕнӕй лӕудтӕй, фал не ’ууӕндундзийнадӕй ба уотӕ зӕгъӕн нӕййес, ӕма е Иди хабарӕй хуарз зиннуй. Не ’ууӕндундзийнадӕ кенӕ федардӕр кӕндзӕй, кенӕ лӕмӕгъдӕр, нӕхуӕдтӕ ибӕл куд архайӕн, уомӕ гӕсгӕ (Матф. 14:31; 2 Фес. 1:3). Мадта нӕ цӕмӕй не ’ууӕндундзийнади уарт гъӕуай кӕна, уой туххӕй ӕй гъӕуама федардӕр кӕнӕн!

15, 16. Нӕ нифс згъӕрходи хӕццӕ рабарӕн цӕмӕн ес?

¹⁵ Бакӕсӕ Ефесӕгтӕмӕ 6:17. Ромаг ӕфсӕддонбӕл ма адтӕй, ӕ сӕр, ӕ цӕсгон ӕма ин ӕ бӕрзӕй ка гъӕуай кодта, уӕхӕн згъӕрходӕ. Еуӕй-еу ходтӕ адтӕнцӕ хуӕцӕнти хӕццӕ, цӕмӕй ӕй ӕфсӕддони бон адтайдӕ ӕ къохи хӕссун.

¹⁶ Ӕфсӕддонӕн е згъӕрходӕ ӕ сӕр куд гъӕуай кодта, уотӕ махӕн ба нӕ гъудитӕ гъӕуай кӕнуй «ервӕзундзийнади нифс» (1 Фес. 5:8; Ӕмб. 3:21). Нифс нин ӕнхус кӕнуй фулдӕр Хуцауи зӕрдӕвӕрдтӕбӕл сагъӕс кӕнун, ци зиндзийнӕдтӕбӕл ӕмбӕлӕн, уонӕбӕл нӕ, фал (Пс. 27:1, 14; Гъуд. 24:15). Фал нӕ цӕмӕй еци нифс гъӕуай кӕна, уой туххӕй гъӕуама Йегови зӕрдӕвӕрдтӕбӕл федарӕй ӕууӕндӕн, гъома не згъӕрходӕ нӕ къохи ма хӕссӕн, фал ӕй нӕ сӕрбӕл ӕркӕнӕн.

17, 18. а) Цума Сайтан куд архайуй, цӕмӕй нин не згъӕрходӕ раласун кӕна? б) Нӕхе сайун ке нӕ уадзӕн, е цӕмӕй бӕрӕг уодзӕй?

¹⁷ Цума Сайтан куд архайуй, цӕмӕй нин не згъӕрходӕ раласун кӕна? Ӕргъуди кӕнӕн, Киристей куд фӕлвардта, уой. Сайтан ӕй зудта, Йеговӕ Йесойӕн ӕгас зӕнхӕ дӕр ӕ дӕлбарӕ ке бакӕндзӕй, ӕ рӕстӕг ку ’рцӕуа, уӕд. Фал ӕй еци рӕстӕгмӕ ӕнгъӕлмӕ  кӕсун гъудӕй. Уой размӕ ба мӕ гъӕуама гъезӕмӕрттӕ ӕма мӕлӕт дӕр бавзурастайдӕ. Фал ин Сайтан бавдиста, еци рӕстӕг фӕццубурдӕр кӕнун куд ӕнгъезуй, уой. Зӕрдӕ ин байвардта, зӕгъгӕ, мин еунӕг хатт баковӕ, ӕма дуйней цидӕриддӕр паддзахӕдтӕ ес, етӕ дӕу дӕлбарӕ уодзӕнцӕ (Лук. 4:5–7). Абони дӕр ӕй Сайтан зонуй, Йеговӕ нӕ нӕуӕг дуйней берӕ хуарздзийнӕдтӕй ке исхайгин кӕндзӕй. Фал цалинмӕ еци рӕстӕг нӕма ӕрхъӕрдтӕй, уӕдмӕти ба нӕ хезун гъӕуй, кедӕрти ба ма зиндзийнӕдти хӕццӕ тох кӕнун дӕр. Гъема Сайтан махӕн дӕр дӕттуй фадуат, цӕмӕй абони дӕр ӕнӕмӕтӕ цард кӕнӕн. Уотӕ ’й фӕндуй, цӕмӕй нин Хуцауи Паддзахади гъуддаг фиццаг бунати мабал уа, фал сагъӕс кӕнӕн, нӕ цард нур куд фӕххуӕздӕр кӕнӕн, уобӕл (Матф. 6:31–33).

¹⁸ Ӕригон киристӕнттӕй беретӕ Сайтанӕн сӕхе сайун нӕ уадзунцӕ. 20-анздзуд Кианӕ зӕгъуй: «Ӕз ӕй зонун не ’гас зиндзийнӕдтӕй нӕ ӕрмӕстдӕр Хуцауи Паддзахадӕ ке исуӕгъдӕ кӕндзӕй». Цума ин еци нифс ӕ гъудитӕ ӕма ӕ унаффитӕбӕл куд бӕрӕг кӕнуй? Уой фӕрци нӕ иронх кӕнуй, аци дуйне ци фадуӕттӕ дӕттуй, етӕ рӕстӕгмӕ ке ’нцӕ. Аци дуйней фулдӕр ӕхца бакосунбӕл нӕ архайуй, фал ӕ рӕстӕг ӕма ӕ хъауритӕ аразуй Йеговӕн лӕггадӕ кӕнунмӕ.

19, 20. Нӕ бон ци ӕй кӕнун, цӕмӕй, Хуцауи Дзурдӕй ӕнтӕстгунӕй пайда кӕнӕн?

¹⁹ Ромаг ӕфсӕддонтӕмӕ ци хъӕма адтӕй, уомӕн ӕ дӕргъӕ адтӕй 50 сантиметри. Еци хъӕматӕй тохумӕ хъӕбӕр дӕсни адтӕнцӕ, уомӕн ӕма сӕхе алли бон дӕр ахур кодтонцӕ.

²⁰ Апостол Павел Хуцауи Дзурд рабарста, Йеговӕ нин ке равардта, уӕхӕн хъӕмай хӕццӕ. Ӕма гъӕуама нӕхе ахур кӕнӕн, цӕмӕй си арӕхстгунӕй пайда кӕнун зонӕн, нӕ дини сӕрбӕл дзорун кенӕ ба нӕ нӕ зундахаст раййевун ку багъӕуа, уӕд (2 Кор. 10:4, 5; 2 Тим. 2:15). Уой туххӕй нӕ бон ци ӕй кӕнун? 21-анздзуд Себастиан зӕгъуй: «Библи ку фӕккӕсун, уӕд си алли сӕрӕй дӕр еу стих мӕхецӕн рафинсун. Уотемӕй мӕхецӕн кӕнун, мӕ зӕрдӕмӕ хъӕбӕрдӕр ка фӕццудӕй, еци стихти хигъд». Уой фӕрци Сибастианӕн ӕнцондӕр фӕууй балӕдӕрун, Йеговӕ куд гъуди кӕнуй, уой. Мӕнӕ ба раздӕр ке кой кодтан, еци ӕнсувӕр Данели дзурдтӕ: «Библи кӕсгӕй мӕхемӕ фӕббӕрӕг кӕнун, иннетӕн бакӕсун ке ӕнгъезуй, уӕхӕн стихтӕ. Адӕни зӕрдӕмӕ фӕццӕуй, зӕрдиагӕй ке фӕдздзорун ӕма мӕ банхус кӕнун ке фӕффӕндуй, е».

21. Сайтанӕй ӕма ӕ лӕгъуз изӕдтӕй тӕрсун цӕмӕннӕ гъӕуй?

²¹ Аци статьяй ци ӕригон хуӕртӕ ӕма ӕнсувӕрти кой кодтан, уони хабӕрттӕй бӕрӕг ӕй, Сайтанӕй ӕма ӕ лӕгъуз изӕдтӕй тӕрсун ке нӕ гъӕуй. Дзубанди дӕр ибӕл нӕййес, хъаурӕгин ӕнцӕ, фал Йеговӕй хъаурӕгиндӕр ба нӕ ’нцӕ. Уомӕй уӕлдай ма ӕнӕмӕлгӕ дӕр нӕ ’нцӕ. Киристей минанзон хецаудзийнади рӕстӕг ахӕст ӕрцӕудзӕнцӕ ӕма сӕ бон нецибал уодзӕй. Мин анзей фӕсте ба еугур исӕфт ӕрцӕудзӕнцӕ (Рарг. 20:1–3, 7–10). Мах хуарз зонӕн, не знаг куд архайуй ӕма ӕ нисан ци ӕй, уой. Ӕма Йегови ӕнхусӕй еци знагбӕл фӕууӕлахез уодзиан!