Йесо куд райгурдӕй ӕма куд гъомбӕл кодта, уобӕл Матфей ӕма Лука фӕйнӕхузи ниффинстонцӕ, уомӕн ӕма си алке еци еу хабӕртти кой нӕ кодта.

Матфей фулдӕр дзурдта Иосифи туххӕй. Зӕгъӕн, ниффинста, Иосиф ку базудта, Марийӕ ке бауӕззау ӕй, уой, уӕд ӕхе куд бадардта, ӕ фуни имӕ изӕд ку ӕрбацудӕй, уӕд ин хабар куд балӕдӕрун кодта ӕма имӕ Иосиф куд байгъуста, уой туххӕй (Матф. 1:19–25). Идарддӕр Матфей финсуй, Иосифмӕ ӕ фуни изӕд куд фӕззиндтӕй ӕма ин куд бафӕдзахста, Египетмӕ дӕ бийнонти хӕццӕ ледзӕ, зӕгъгӕ, уой фӕсте имӕ уоми дӕр изӕд нӕуӕгӕй ӕ фуни куд фӕззиндтӕй ӕма ’й фӕстӕмӕ Израилмӕ куд раздӕхун кодта ӕма Иосиф ӕ бийнонти хӕццӕ Назарети куд ӕрцардӕй (Матф. 2:13, 14, 19–23).

Лука ба фулдӕр финста Марийи туххӕй. Зӕгъӕн, изӕд Гавриил имӕ куд фӕззиндтӕй, ӕ хӕстӕг Елизавети куд бабӕрӕг кодта ӕма Йегови цӕхуӕн дзурдтӕй кадгин кодта (Лук. 1:26–56). Лука ма ниффинста, Симеон Марийӕн ке загъта, еци дзурдтӕ дӕр, гъома Йесо гъезӕмӕрттӕ ке бавзардзӕй. Удта 12 анздзуд Йесо ӕ бийнонти хӕццӕ ковӕндонӕмӕ куд ӕрбацудӕй, уой туххӕй дӕр ку финста, уӕддӕр ӕрхаста Марийи дзурдтӕ, Иосифи нӕ, фал. Лука ма финста, уӕд ци хабӕрттӕ ӕрцудӕй, етӕ Марийи зӕрдӕмӕ куд багъардтонцӕ, уой туххӕй дӕр (Лук. 2:19, 34, 35, 48, 51). Мадта бӕрӕг ӕй, Матфей фулдӕр финста Иосифи гъудитӕ ӕма гъуддӕгтӕбӕл, Лука ба – Марийи хӕццӕ цидӕриддӕр баст адтӕй, уобӕл.

Йесо ци хӕдзарвӕндагӕй рацудӕй, уой туххӕй дӕр Лука ӕма Матфей фӕйнӕхузи ниффинстонцӕ. Матфей ниффинста, Иосиф кӕмӕй рацудӕй, уой ӕма уотемӕй бавдиста, Йесойӕн куд Иосифи фуртӕн, уотӕ, Давиди паддзахбадӕнбӕл ӕрбадуни барӕ ке ес. Цӕмӕн? Уомӕн ӕма Иосиф адтӕй, Давиди фурт Соломони байзӕддаг (Матф. 1:6, 16). Лука ба ниффинста, Марийӕ кӕмӕй рацудӕй, уой ӕма уотемӕй бавдиста, Йесо «тог ӕма стӕгӕй» Давиди байзӕддаг ке адтӕй ӕма ин еци ӕрдигӕй дӕр ӕ паддзахбадӕнбӕл ӕрбадуни барӕ ке ес (Ром. 1:3). Цӕмӕн? Уомӕн ӕма Марийӕ Давиди фурт Нафани байзӕддаг адтӕй (Лук. 3:31). Фал Лука, ка кӕмӕй рацудӕй, уой ку финста, уӕд цӕмӕннӕ ниффинста Марийӕ Илийи кизгӕ ке адтӕй, уой? Уомӕн ӕма хӕдзарвӕндаги номхигъди арӕхдӕр финстонцӕ ӕрмӕстдӕр нӕлгоймӕгти нӕмттӕ. Ӕма Лука дӕр Иосифи Илийи фурт уой туххӕй исхудта, кӕд ӕ сиахс адтӕй, уӕддӕр (Лук. 3:23).

Йесо кӕмӕй рацудӕй, уой Матфей ӕма Лука куд дзӕбӕх ниффинстонцӕ, е уобӕл дзорӕг ӕй ӕма Йесо зӕрдӕвӕрд Мессийӕ адтӕй. Киристе Давиди байзӕддаг ке адтӕй, уой еугурӕйдӕр зудтонцӕ, сауӕнгӕ ма ибӕл саддукейтӕ ӕма фарисейтӕ дӕр нӕ гурусхӕ кодтонцӕ. Матфей ӕма Лука Йесой хӕдзарвӕндаги туххӕй ке ниффинстонцӕ, е нин не ’ууӕндундзийнадӕн устур ӕнхус ӕй, уомӕн ӕма ни никки хъӕбӕрдӕр ирагӕс кӕнуй, Хуцау ӕ зӕрдӕвӕрдтӕ ӕнӕмӕнгӕй ке исӕнхӕст кӕндзӕй, е.