1, 2. а) Ӕнӕ Библийӕй нӕ цард цӕхуӕн адтайдӕ? б) Хуцауи Дзурд нин фулдӕр пайда кӕд хӕсдзӕй?

РАСАГЪӔС КӔНӔ, нӕ цард цӕхуӕн адтайдӕ, Библи нин ку н’ адтайдӕ, уӕд? Нӕ нин адтайдӕ, царди кӕмӕй фӕппайда кӕнӕн, еци зундгин унаффитӕ. Неци зудтайанӕ Хуцауи туххӕй, удта цӕмӕн цӕрӕн ӕма федӕни ци уодзӕй, уой туххӕй дӕр. Уомӕй уӕлдай ма, рагидзаманти Йеговӕ адӕнӕн куд адтӕй, уой дӕр некӕд базудтайанӕ.

² Фал хуарз ӕма уотӕ нӕй. Йеговӕ нин равардта ӕ Дзурд Библи. Удта зӕрдӕ байвардта, ци хабар си финст ӕрцудӕй, е ке некӕд фесӕфдзӕй. Хуцауи сугъдӕг хъаури разамундӕй апостол Петур ӕ фиццаг финстӕги ниффинста Исаййи 40:8 дзурдтӕ. Кӕд аци стих комкоммӕ Библий кой нӕ кӕнуй, уӕддӕр, Библий ци финст ес, уомӕ дӕр хауй. (Бакӕсӕ 1 Петури 1:24, 25.) Библи нӕхе ӕвзагбӕл ку кӕсӕн, уӕд нин фулдӕр пайда ӕрхӕсдзӕй. Хуцауи Дзурдӕн ӕцӕгӕйдӕр ка аргъ кӕнуй, етӕ уой раги балӕдӕрдтӕнцӕ. Сӕдӕгай ӕнзти  дӕргъи растзӕрдӕ адӕн Библи ратӕлмац кӕнунбӕл архайдтонцӕ, цӕмӕй ӕй иннети бон дӕр адтайдӕ кӕсун. Е ӕнцон куст н’ адтӕй, удта сӕ уой туххӕй ӕфхуӕргӕ дӕр хъӕбӕр кодтонцӕ. Бӕрӕг ӕй, Йегови фӕндуй, «цӕмӕй аллихузи адӕн, рӕстдзийнадӕ ци ӕй, уой дзӕбӕх базононцӕ ӕма фӕййервӕзонцӕ» (1 Тим. 2:3, 4).

3. Аци статьяй цӕмӕ ӕркӕсдзиан? (Кӕсӕ хузӕмӕ статьяй райдайӕни.)

³ Аци статьяй ӕркӕсдзиан Хуцауи Дзурд цӕй фӕрци нӕ фесавдӕй, 1) ӕвзаг ӕййевгӕ ку цудӕй, уӕд, 2) дуйней уавӕр ӕййевгӕ ку цудӕй, уӕд ӕма 3) тӕлмац кӕнун ӕй ку нӕ уагътонцӕ, уӕд. Аци фарстатӕмӕ ку ’ркӕсӕн, уӕд Хуцауӕн ӕма ӕ Дзурдӕн никки фулдӕр аргъ кӕнун райдайдзиан (Мих. 4:2; Ром. 15:4).

4. а) Рӕстӕг куд цӕуй, уотӕ ӕвзӕгтӕ дӕр куд ӕййевунцӕ? б) Хуцау алли ӕвзӕгтӕбӕл дзорӕг адӕни дӕр ке уарзуй, е цӕмӕй бӕрӕг ӕй ӕма уой туххӕй ци гъуди кӕнис?

⁴ Рӕстӕг куд цӕуй, уотӕ ӕвзӕгтӕ дӕр ӕййевгӕ цӕунцӕ. Кӕцидӕр дзурдтӕ ӕма дзурдбӕститӕ раздӕр куд лӕдӕрдтӕнцӕ, нур сӕ уотӕ нӕбал лӕдӕрунцӕ. Ӕвӕдзи, уой дӕхе ӕвзаги дӕр фӕууидтай. Ӕма рагон ӕвзӕгтӕн дӕр сӕ хабар уотӕ ’й. Зӕгъӕн, абони адӕн кӕбӕл дзорунцӕ, еци дзиуиттаг ӕма грекъаг ӕвзӕгтӕ хъӕбӕр хецӕн кӕнунцӕ, Библи ци дзиуиттаг ӕма грекъаг ӕвзӕгтӕбӕл финст ӕрцудӕй, уонӕй. Адӕнӕн сӕ фулдӕр, Библи ци ӕвзӕгтӕбӕл финст ӕрцудӕй, уони нӕ лӕдӕрунцӕ, ӕма сӕ уомӕ гӕсгӕ гъӕуй тӕлмац, сауӕнгӕ ма абониккон дзиуиттаг ӕма грекъаг ӕвзаг ка зонуй, уони дӕр. Еуӕй-еуетӕмӕ уотӕ кӕсуй, ӕма рагон дзиуиттаг, удта грекъаг ӕвзаг ку исахур кӕнонцӕ, уӕд Библи хуӕздӕр балӕдӕрдзӕнцӕ ӕма син фулдӕр пайда ӕрхӕсдзӕй, фал ӕцӕгӕй уотӕ нӕй. Абони ӕнӕгъӕнӕ Библи кенӕ ӕ кӕцидӕр хӕйттӕ тӕлмацгонд ӕнцӕ еу-3 000 ӕвзагемӕ. Куд ӕй уинӕн, уотемӕй Йегови фӕндуй, цӕмӕй ӕ Дзурд пайда хӕсса «алли муггагӕн, алли ӕвзагӕн ӕма алли адӕнихаттӕн». (Бакӕсӕ Раргомадӕ 14:6.) Е нӕ разӕнгард кӕнуй, ӕгас адӕни дӕр ка уарзуй, еци Хуцаумӕ хӕстӕг кӕнун (Гъуд. 10:34).

5. «Паддзах Якови Библи»-йӕй ци ес зӕгъӕн?

⁵ Ке зӕгъун ӕй гъӕуй, ӕвзаг ӕййевгӕ ке цӕуй, е Библий тӕлмацтӕбӕл дӕр рабӕрӕг уй. Раздӕр ӕнцонкӕсӕн ӕма ӕнцонлӕдӕрӕн ци тӕлмацтӕ адтӕнцӕ, уонӕй нур уотӕ зӕгъӕн нӕбал ес. Цӕветтонӕн ӕрхӕссӕн 1611 анзи уагъд «Паддзах Якови Библи». Е иссӕй англисаг ӕвзагбӕл уагъд зундгонддӕр Библий тӕлмацтӕй сӕ еу. Фал еци тӕлмаци Хуцауи ном, Йеговӕ, ӕмбӕлуй ӕрмӕстдӕр еу къуар хатти. Дзиуиттаг Финстити Хуцауи ном кӕми ӕмбалдӕй, уоми ’й раййивтонцӕ дзурдӕй «ХЕЦАУ» ӕма ’й финстонцӕ устур дамугъатӕй. Аци тӕлмац фӕстӕдӕр мухури нӕуӕгӕй ку рацудӕй, уӕд си дзурд «ХЕЦАУ» устур дамугъатӕй финст ӕрцудӕй Киристон Грекъаг Финстити кӕцидӕр стихти дӕр (хонунцӕ ма ’й «Нӕуӕг Фӕдзӕхст»). Уотемӕй, ка ’й тӕлмац кодта, етӕ бавдистонцӕ, Хуцауи ном райдайӕни уоми дӕр ке адтӕй.

6. «Библи – Нӕуӕг дуйней тӕлмац»-и туххӕй боз цӕмӕн ан?

 ⁶ «Паддзах Якови Библи» фиццаг ку рацудӕй, уӕд финст адтӕй, адӕн дзӕбӕх ке лӕдӕрдтӕнцӕ, уӕхӕн дзурдтӕй. Фал рӕстӕг куд цудӕй, уотемӕй ба еци дзурдтӕ дӕр базӕронд ӕнцӕ ӕма абони зин балӕдӕрӕн ӕнцӕ. Ӕма ӕндӕр ӕвзӕгтӕбӕл Библий рагон тӕлмацтӕн дӕр сӕ хабар уотӕ ’й. Уомӕ гӕсгӕ мах хъӕбӕр боз ан, «Библи – Нӕуӕг дуйней тӕлмац» нин ке ес ӕма ӕнцонлӕдӕрӕн ӕвзагбӕл финст ке ӕй. Еци Библи ӕнӕгъӕнӕй кенӕ ӕ кӕцидӕр хӕйттӕ ратӕлмац кодтонцӕ 150 ӕвзагемӕй фулдӕрмӕ. Е уобӕл дзорӕг ӕй, ӕма нур зӕнхи цъарӕбӕл цӕрӕг адӕнӕй сӕ фулдӕрӕн сӕ бон ӕй «Нӕуӕг дуйней тӕлмац» сӕхе ӕвзагбӕл кӕсун. Ӕнцонлӕдӕрӕн ӕвзагӕй финст ке ӕй, уомӕ гӕсгӕ Хуцауи хабар адӕни зӕрдитӕмӕ хуӕздӕр гъаруй (Пс. 119:97). Фал «Библи – Нӕуӕг дуйней тӕлмац» иннетӕй хъӕбӕрдӕр уомӕй хецӕн кӕнуй, ӕма си Хуцауи ном финст ӕй, тӕккӕ фиццаг кӕмидӕриддӕр финст адтӕй, уоми.

7, 8. а) Нӕ эри размӕ ӕртиккаг ӕноси дзиуиттӕгтӕй беретӕ Дзиуиттаг Финститӕ цӕмӕн нӕбал лӕдӕрдтӕнцӕ? б) Грекъаг Септуагинтӕ ци ӕй?

⁷ Дуйней уавӕр куд ӕййевгӕ цудӕй, уомӕй кӕнгӕ адтӕй, фулдӕр адӕн цӕхуӕн ӕвзагбӕл дзордзӕнцӕ, е. Цума Хуцау ци бакодта, цӕмӕй уӕхӕн ӕййивддзийнӕдтӕ ӕ Дзурд лӕдӕрунмӕ къулумпий хуасӕ ма иссайуонцӕ? Зӕгъӕн, Библийӕй 39 киунуги ниффинстонцӕ дзиуиттӕгтӕ кенӕ израилӕгтӕ. Библий куд финст ӕй, уомӕ гӕсгӕ фиццагидӕр «Хуцау ӕ дзурдтӕ уонӕбӕл бафӕдзахста» (Ром. 3:1, 2). Еци киунугути фиццаг къохфинститӕ адтӕнцӕ дзиуиттаг кенӕ арамейаг ӕвзагбӕл финст. Фал нӕ эри размӕ ӕртиккаг ӕноси дзиуиттӕгтӕй беретӕ дзиуиттаг ӕвзаг нӕбал лӕдӕрдтӕнцӕ. Цума цӕмӕн? Македойнаг Александр дуйней устурдӕр хай ку байахӕста, уӕд равзурдӕй грекъаг импери. Уотемӕй грекъаг ӕвзаг иссӕй ӕхсӕнадӕмон ӕвзаг ӕма беретӕ сӕхе ӕвзӕгтӕбӕл нӕ, фал грекъагау дзорун райдӕдтонцӕ (Дан. 8:5–7, 20, 21). Ӕма дзиуиттӕгтӕй дӕр беретӕ фулдӕр грекъагау ке дзурдтонцӕ, уомӕ гӕсгӕ син Дзиуиттаг Финститӕ зин лӕдӕрӕн иссӕнцӕ. Цума уӕхӕн уавӕри ци гӕнӕн адтӕй?

⁸ Киристе ку райгурдӕй, уомӕй 250 анзи раздӕр Дзиуиттаг Финстити фиццаг фондз киунуги тӕлмацгонд ӕрцудӕнцӕ грекъаг ӕвзагмӕ, фӕстӕдӕр ба иннӕ киунугутӕ дӕр. Еци тӕлмацгонд киунугутӕ еумӕйагӕй хонун райдӕдтонцӕ грекъаг Септуагинтӕ. Е ӕй тӕккӕ фиццаг зундгонд къохӕйфинст тӕлмац.

9. а) Септуагинтӕ ӕма ӕндӕр рагон тӕлмацтӕ куд ӕнхус кодтонцӕ, Хуцауи Дзурд ка кастӕй, уонӕн? б) Дзиуиттаг Финстити дӕ зӕрдӕмӕ хъӕбӕрдӕр кӕци скъуддзӕгтӕ цӕунцӕ?

⁹ Септуагинти фӕрци, грекъагау ка дзурдта, еци дзиуиттӕгтӕн сӕ бон адтӕй Дзиуиттаг Финститӕ грекъагау кӕсун. Кунӕг ӕхцӕуӕн син н’ адтӕй, Хуцауи Дзурд, кӕбӕл дзурдтонцӕ, еци ӕвзагбӕл кӕсун ӕма игъосун! Фӕстӕдӕр Библий кӕцидӕр хӕйттӕ тӕлмацгонд ӕрцудӕнцӕ,  уӕди рӕстӕги иннӕ зундгонд ӕвзӕгтӕмӕ дӕр – сирийагмӕ, готагмӕ ӕма латинагмӕ. Уой фӕрци ӕндӕр адӕни бон дӕр иссӕй Хуцауи Дзурд кӕсун ӕма ’й лӕдӕрун, ӕма ин уотемӕй етӕ дӕр аргъ кӕнун райдӕдтонцӕ. Уонӕн дӕр, ӕвӕдзи, мах хузӕн фӕззиндтӕй, сӕ зӕрдӕмӕ хъӕбӕрдӕр ка цудӕй, уӕхӕн скъуддзӕгтӕ Библийӕй. (Бакӕсӕ Псалом 119:162–165.) Ӕцӕгӕйдӕр, Хуцауи Дзурдбӕл нӕ фӕббӕрӕг ӕнцӕ нӕдӕр дуйней уавӕртӕ нӕдӕр ӕвзаги ӕййивддзийнӕдтӕ.

10. Джон Уиклифи рӕстӕг беретӕн сӕ бон цӕмӕннӕ адтӕй Библи кӕсун?

¹⁰ Ӕности дӕргъи бартӕ ке къохти адтӕнцӕ, етӕ архайдтонцӕ, цӕмӕй адӕни бон Библи кӕсун ма адтайдӕ. Фал Хуцауӕй ка тарстӕй, уони еци гъуддаг некӕд уорӕдта, ӕма архайдтонцӕ, цӕмӕй Библи алке бон дӕр адтайдӕ кӕсун. Сӕ еу адтӕй Джон Уиклиф, цардӕй 14 ӕноси Англий. Уиклифи гъудимӕ гӕсгӕ алли адӕймаги бон дӕр гъӕуама адтайдӕ Библи кӕсун. Фал еци рӕстӕг Англий фулдӕр адӕн Библий хабар сӕхе ӕвзагбӕл некӕд фегъустонцӕ. Библий къопитӕ къохӕй финстонцӕ ӕма хъӕбӕр хъазар адтӕнцӕ. Уомӕ гӕсгӕ Библи ӕрмӕстдӕр еугай адӕнмӕ адтӕй. Удта ма беретӕ кӕсун дӕр нӕ зудтонцӕ. Аргъауӕнти ба Библи кастӕнцӕ латинаг ӕвзагбӕл, фал е рагон ӕвзаг адтӕй ӕма ’й адӕн нӕ лӕдӕрдтӕнцӕ. Цума Йеговӕ ци бакодта, цӕмӕй адӕнӕн сӕ бон адтайдӕ Библи сӕхе ӕвзагбӕл кӕсун? (Ӕмб. 2:1–5).

11. Уиклифи Библи цӕхуӕн пайда ӕрхаста?

¹¹ 1382 анзи Джон Уиклиф ӕма иннетӕ Библи англисаг ӕвзагмӕ ратӕлмац кодтонцӕ. Уиклифи Библи хъӕбӕр зундгонд иссӕй, лоллӕрдтӕ ке худтонцӕ, еци адӕни астӕу. Лоллӕрдтӕ адтӕнцӕ Уиклифи фӕдбӕлдзӕугутӕ  ӕма Библийӕн хъӕбӕр устур аргъ кодтонцӕ. Етӕ ӕгас Англибӕл гъӕуӕй-гъӕумӕ къахӕй ӕрзилдӕнцӕ ӕма адӕнӕн Библи кастӕнцӕ, удта Библий кӕцидӕр скъуддзӕгтӕ къохӕй рафинсиуонцӕ ӕма син сӕ ниууадзиуонцӕ. Еци кусти фӕрци адӕн нӕуӕгӕй Хуцауи Дзурди адӕ базудтонцӕ.

12. Дини разамонгутӕ Уиклифмӕ, удта ӕ кустмӕ цӕхуӕн цӕстӕй кастӕнцӕ?

¹² Дини разамонгутӕ Уиклифӕй, ӕ Библийӕй ӕма ӕ фӕдбӕлдзӕугутӕй се ’сӕфт уидтонцӕ. Лоллӕрдти фӕдбӕл хъӕбӕр карзӕй зилдӕнцӕ, Уиклифи Библитӕй ба ке иссериуонцӕ, уони еугурейдӕр фесафиуонцӕ. Уиклиф ку рамардӕй, уӕддӕр не ’рсабур ӕнцӕ. Уотемӕй дӕр ма ’й исхудтонцӕ еретик, гъома аргъауӕни знаг, е ’стгутӕ ин искъахтонцӕ, ба сӕ сугътонцӕ, сӕ фунук ба син цӕугӕдон Свифтмӕ ракалдтонцӕ. Фал уӕддӕр берети фӕндадтӕй Хуцауи Дзурд кӕсун ӕма ’й лӕдӕрун, ӕма сӕ дини разамонгути бон бауорамун н’ адтӕй. Ӕностӕ фӕстӕдӕр Европи ӕма ӕндӕр бӕстити дӕр Библи райдӕдтонцӕ тӕлмац ӕма мухур кӕнун, фулдӕр адӕн ке лӕдӕрунцӕ, еци ӕвзӕгтӕмӕ.

13. Федарӕй ци зонӕн ӕма нин е не ’ууӕндундзийнадӕ куд федар кӕнуй?

¹³ Библи ӕнӕгъӕнӕйдӕр финст ӕрцудӕй Хуцауи сугъдӕг хъаури разамундӕй. Фал е уобӕл дзорӕг нӕй, ӕма ӕ тӕлмацтӕ, зӕгъӕн, Септуагинтӕ, Уиклифи Библи, «Паддзах Якови Библи» кенӕ ӕндӕр тӕлмацтӕ дӕр Хуцауи сугъдӕг хъаури разамундӕй тӕлмацгонд ӕрцудӕнцӕ. Фал Библи куд тӕлмац кодтонцӕ, уобӕл ку расагъӕс кӕнӕн, уӕд ӕй фӕууиндзиан, Йеговӕ ӕцӕгӕйдӕр ӕ Дзурд ке багъӕуай кодта, зӕрдӕ куд байвардта, уотӕ. Ӕма нин е не ’ууӕндундзийнадӕ федар кӕнуй, уомӕн ӕма нин уобӕл дзорӕг ӕй, ӕма Йеговӕ ӕ иннӕ зӕрдӕвӕрдтӕ дӕр исӕнхӕст кӕндзӕй (Йес. Н. 23:14).

14. Библий туххӕй ци зонӕн, е нӕ куд разӕнгард кӕнуй Хуцауи никки фулдӕр уарзун?

¹⁴ Йеговӕ ӕ Дзурд куд багъӕуай кодта, уобӕл ку фӕссагъӕс кӕнӕн, уӕд не ’ууӕндундзийнадӕ никки федардӕр исуй, нӕ уарзондзийнадӕ ба никки арфдӕр *. Йеговӕ нин ӕ Дзурд цӕмӕн равардта ӕма зӕрдӕ цӕмӕн байвардта, алкӕддӕр ӕй ке гъӕуай кӕндзӕй? Уомӕн ӕма нӕ уарзуй ӕма ’й фӕндуй, цӕмӕй нӕ ахур кӕна, «пайда нин ци ӕй, уобӕл». (Бакӕсӕ Исай 48:17, 18.) Е нӕ разӕнгард кӕнуй Йегови уарзун ӕма ин ӕ разамундмӕ игъосун (1 Иоан. 4:19; 5:3).

15. Иннӕ статьяй цӕмӕ ӕркӕсдзиан?

¹⁵ Хуцауи Дзурдӕн ку аргъ кӕнӕн, уӕд нин руги буни некӕд лӕудзӕй. Нӕ бон ци ӕй кӕнун, цӕмӕй нин Библи кӕсун фулдӕр пайда хӕсса? Кӕмӕн игъосун кӕнӕн, еци адӕнӕн нӕ бон куд ӕй банхус кӕнун, цӕмӕй етӕ дӕр Библийӕн аргъ кӕнонцӕ? Ӕмбурди ӕнсувӕртӕн сӕ бон куд ӕй исбӕлвурд кӕнун, ци дзорунцӕ, е ӕцӕгӕйдӕр Библибӕл арӕзт ке ӕй? Аци фарстатӕбӕл дзуӕппитӕ иссердзиан иннӕ статьяй.