1, 2. Петур ци балӕдӕрдтӕй, Йесой хӕццӕ ин ци дзубанди рауадӕй, уомӕй?

ЙЕСОЙ ахуркӕнуйнӕгтӕ авдемӕй ӕгас ӕхсӕвӕ Галилейи денгизи кӕсалгдзауӕн фӕккодтонцӕ, фал неци ниййахӕстонцӕ. Йесо ба сӕмӕ билӕбӕл лӕугӕй кастӕй ӕма загъта: «Уӕ хизӕ бӕлӕгъи рахес фарс багӕлдзетӕ... Ӕма етӕ дӕр сӕ хизӕ багӕлстонцӕ, фал ӕй сӕ бон фӕстӕмӕ исласун нӕбал адтӕй, уомӕн ӕма кӕсалгӕй идзаг адтӕй» (Иоан. 21:1–6).

² Йесо ӕ ахуркӕнуйнӕгтӕн сехуар ӕрцӕттӕ кодта ӕма ку ракомидзаг кодтонцӕ, уӕд Петури бафарста: «Иоанни фурт Симон, анӕй мӕ фулдӕр уарзис?» Йесо имӕ уӕхӕн фарста цӕмӕн равардта? Цума Петурӕн хъазардӕр ци адтӕй: Йесо ӕма ӕ ахурӕдтӕ ӕви кӕсалгӕ ахӕссуни куст? Петур Йесойӕн дзуапп равардта: «Гъо, Хецау, ку ӕй зонис, ке дӕ уарзун» (Иоан. 21:15). Ӕцӕгӕйдӕр уотӕ ке адтӕй, уой Петур ӕ гъуддӕгтӕй дӕр бавдиста. Ӕ цард еугурӕйдӕр равардта ахуркӕнуйнӕгтӕ цӕттӕ кӕнуни гъуддагӕн ӕма иссӕй, фиццаг ӕноси  ӕмбурди ӕхсидзгӕ ихӕслӕвӕрдтӕ ка ӕнхӕст кодта, уӕхӕн адӕймаг.

3. Киристӕнттӕ сӕхе цӕмӕй гъӕуама гъӕуай кӕнонцӕ?

³ Йесо Петурӕн ци фарста равардта, е махӕн цӕбӕл дзорӕг ӕй? Гъӕуама лӕмбунӕг уӕн, цӕмӕй Киристей минкъийдӕр уарзун ма райдайӕн. Йесо ӕй зудта, аци царди нин ӕнцон цӕрӕн ке нӕ уодзӕй ӕма зиндзийнӕдтӕбӕл дӕр ке ӕмбӕлдзиан. Итауӕги хабарӕй куд балӕдӕрун кодта, уомӕ гӕсгӕ, «паддзахади туххӕй дзурд» ӕ зӕрдӕмӕ ка райсуй, уонӕй еуӕй-еуетӕ фиццӕгти хъӕбӕр зингзӕрдӕ фӕуунцӕ. Фал фӕстӕдӕр «царди сагъӕстӕбӕл исунцӕ, гъӕздугдзийнадӕ сӕ ӕ фӕдбӕл расайуй» ӕма еци «дзурдӕн» сӕ зӕрди бунат нӕбал фӕууй (Матф. 13:19–22; Мар. 4:19). Лӕмбунӕг ку нӕ уӕн, уӕд царди сагъӕстӕ нӕ лӕггадӕн къулумпий хуасӕ исуодзӕнцӕ. Йесо дӕр ӕ ахуркӕнуйнӕгти уомӕ гӕсгӕ фӕдзахста: «Сумах ба уӕхемӕ кӕсетӕ, цӕмӕй уӕ зӕрдитӕ фурхуӕрд, фурниуӕзт ӕма царди сагъӕстӕй ма ӕруӕззау уонцӕ» (Лук. 21:34).

4. Киристей куд хъӕбӕр уарзӕн, уой исбӕрӕг кӕнунмӕ нин ци банхус кӕндзӕй? (Кӕсӕ хузӕмӕ статьяй райдайӕни.)

⁴ Мах дӕр Петури хузӕн игъосун кӕнуни гъуддаг нӕ царди фиццаг бунати ку ӕвӕрӕн, уӕд нӕ гъуддӕгтӕй бӕрӕг уодзӕй, Йесой ке уарзӕн. Кутемӕй ӕнгъезуй исбӕрӕг кӕнун, абони дӕр ма уотӕ архайӕн ӕви нӕ, уой? Дӕхе бафӕрсӕ: Тӕккӕ хъӕбӕрдӕр цӕхуӕн гъуддӕгти уарзун архайун? Фулдӕр цийнӕдзийнадӕ мин ци хӕссуй: Йеговӕн лӕггадӕ кӕнун ӕви ӕндӕр гъуддӕгтӕ? Цӕмӕй аци фарстатӕбӕл дзуапп базонай, уой туххӕй ӕркӕсӕн, нӕ уарзондзийнадӕн цӕхуӕн ӕртӕ гъуддагемӕй тӕссаг ӕй, уомӕ. Етӕ ӕнцӕ куст, ерхӕфсӕнтӕ ӕма мулк.

5. Бийнонти хестӕртӕбӕл цӕхуӕн ихӕс ес?

⁵ Петур кӕсалгӕ зӕрдидзӕбӕхӕн нӕ ахӕста. Еци кусти фӕрци ӕ бийнонтӕ дардта. Абони дӕр бийнонтӕ даруни ихӕс Йеговӕ исӕвардта бийнонти хестӕртӕбӕл (1 Тим. 5:8). Ӕма сӕ уой туххӕй гъӕуй хъиамӕт кӕнун. Фал аци фӕстаг бӕнтти адӕн кусти фӕдбӕл берӕ мӕститӕ бавзарунцӕ.

6. Адӕн кусти цӕхуӕн зиндзийнӕдтӕбӕл исӕмбӕлунцӕ?

⁶ Куст ка агоруй, етӕ хъӕбӕр берӕ ке ’нцӕ, уомӕ гӕсгӕ куст иссерун арӕх ӕнцон нӕ фӕууй. Ӕма уой туххӕй беретӕ арази фӕуунцӕ фӕскуст косунбӕл дӕр, кӕд син уой туххӕй цӕйбӕрцӕ ӕмбӕлуй, уойбӕрцӕ нӕ бафедунцӕ, уӕддӕр. Кусти хецӕуттӕ фулдӕр ӕхца бакосуни туххӕй сӕ косгутӕбӕл нӕ фӕййауӕрдунцӕ ӕма сӕ кусти буни фӕккӕнунцӕ. Ӕма уой туххӕй адӕн кусти хъӕбӕр бафӕллайунцӕ ӕма истухсунцӕ. Беретӕ фӕттӕрсунцӕ, кустӕй сӕ ке ратӕрдзӕнцӕ, хецау си цӕйбӕрцӕ агоруй, уойбӕрцӕ ку нӕ кӕнонцӕ, уӕд.

7, 8. а) Еузӕрдон ӕрмӕстдӕр кӕбӕл гъӕуама уӕн? б) Еу ӕнсувӕр Таиландӕй кусти гъуддаги ци балӕдӕрдтӕй?

⁷ Мах куд киристӕнттӕ, уотӕ еузӕрдон ан ӕрмӕстдӕр Йеговӕбӕл, ӕндӕр нецӕбӕл, удта некӕбӕл, уомӕ хауй нӕ кусти хецау дӕр (Лук. 10:27).  Куст нӕ уой туххӕй гъӕуй, цӕмӕй нӕ бон уа нӕхе дарун ӕма лӕггадӕ кӕнун. Фал лӕмбунӕг ку нӕ уӕн, уӕд нӕ еци куст нӕ лӕггадӕй къулумпи кӕндзӕй. Таиландӕй еу ӕнсувӕр загъта: «Компьютертӕ ремонт кодтон, ӕма еци куст мӕ зӕрдӕмӕ хъӕбӕр цудӕй. Фал мин Хуцауи гъуддӕгтӕн ба рӕстӕг зин иссерӕн адтӕй. Фӕстагмӕ ’й балӕдӕрдтӕн, цӕмӕй мин Хуцауи Паддзахадӕ фиццаг бунати уа, уой туххӕй мӕ мӕ куст раййевун ке гъӕуй». Цума еци ӕнсувӕр ци бакодта?

⁸ «Мӕ гъуддӕгтӕ испълан кӕнунбӕл мин еу анз рандӕ ’й,– зӕгъуй ӕнсувӕр.– Гъема исфӕндӕ кодтон гъӕунги марожентӕ уӕйӕ кӕнун. Фиццӕгти мӕ куст размӕ нӕ цудӕй ӕма мӕ нифс басӕттидӕ. Раздӕр ке хӕццӕ кустон, етӕ мӕ ку фӕууиниуонцӕ, уӕд мӕбӕл ходун райдайиуонцӕ, зӕгъгӕ, сатӕги компьютертӕ ремонт кӕнунӕй дин аци хори тъӕппи косун ӕнцондӕр ӕй. Ӕз дӕр Йеговӕмӕ кувтон, цӕмӕй мин мӕ кусти гъуддаги банхус кодтайдӕ ӕма мӕ къохи бафтудайдӕ мӕ сӕйраг нисан – Йегови гъуддӕгти фулдӕр архайун. Уой фӕсте гъуддаг еу бунатӕй фенкъустӕй. Адӕни зӕрдӕмӕ цӕхуӕн марожентӕ хъӕбӕрдӕр цудӕй, уой хуӕздӕр лӕдӕрун райдӕдтон, ӕма еци гъуддаги хъӕбӕр дӕсни исдӕн. Гъема бонмӕ еугур марожентӕ дӕр рауӕйӕ кӕнинӕ. Компьютертӕ ремонт кӕнгӕй цӕйбӕрцӕ ӕхца кустон, уомӕй дӕр фулдӕр косун райдӕдтон. Удта берӕ амондгундӕр адтӕн, уомӕн ӕма раздӕр цӕбӕл тухстӕн, еци гъуддӕгтӕ мӕ нӕбал тухсун кодтонцӕ. Сӕйрагидӕр ба е ӕй, ӕма нур Йеговӕмӕ никки хӕстӕгдӕр исдӕн». (Бакӕсӕ Матфеййи 5:3, 6.)

9. Ци нин банхус кӕндзӕй нӕ кустмӕ раст цӕстӕй кӕсун?

⁹ Йеговӕ косагӕ адӕнӕн устур аргъ кӕнуй ӕма син сӕ хъиамӕтӕн арфӕ кӕнуй (Ӕмб. 12:14). Фал ӕй гъӕуама бӕлвурдӕй зонӕн, нӕ куст нин нӕ лӕггадӕй сӕйрагдӕр ке не ’ссӕй. Царди нӕ фиццагидӕр ци гъӕуй, уой туххӕй Йесо ку дзурдта, уӕд загъта: «Мадта фиццагидӕр агоретӕ Хуцауи паддзахадӕ ӕма ӕ рӕстдзийнадӕ, ӕма уин етӕ [царди нӕ ӕнӕмӕнгӕ ка гъӕуй, еци гъуддӕгтӕ] еугурӕйдӕр уодзӕнцӕ» (Матф. 6:33). Фал куд ӕнгъезуй базонун, кустмӕ раст цӕстӕй кӕсӕн ӕви нӕ, уой? Дӕхе бафӕрсӕ: «Цума мӕ куст ӕгӕр нӕ бауарзтон, Йеговӕн лӕггадӕ кӕнун ба мин уаргъи хузӕн не ’ссӕй?» Аци фарстабӕл ку расагъӕс кӕнӕн, уӕд ӕй балӕдӕрдзиан, сӕйраг нин ци ӕй, уой.

10. Йесо нин цӕхуӕн ӕхсидзгӕ гъуддаг балӕдӕрун кодта?

¹⁰ Йесо хуарз балӕдӕрун кодта, царди нин фиццаг бунати ци гъӕуама уа, уой. Еухатт Марфӕ ӕма Марийӕмӕ иуазӕгуати ӕрбацудӕй. Марфӕ ин уайтагъд фингӕ цӕттӕ кӕнунмӕ февналдта. Марийӕ ба Йесой рази исбадтӕй ӕма имӕ лӕмбунӕг игъуста. Ӕма уӕд Марфӕ Йесойӕн багъаст кодта, Марийӕ ин ке не ’нхус кӕнуй, уой туххӕй. Фал ин Йесо ба загъта: «Марийӕ... хуӕздӕр хай равзурста, ӕма ин ӕй неке байсдзӕй» (Лук. 10:38–42). Ами нӕ Йесо еу ӕхсидзгӕ гъуддагбӕл ахур кӕнуй. Цӕмӕй царди сагъӕсти буни ма фӕууӕн ӕма Киристей ке уарзӕн, уой идарддӕр  дӕр гъуддӕгтӕй ӕвдесӕн, уой туххӕй гъӕуама «хуӕздӕр хай» ӕвзарӕн. Е ба уобӕл дзорӕг ӕй, ӕма нин Йегови гъуддӕгтӕ алкӕддӕр гъӕуама фиццаг бунати уонцӕ.

11. Библий уолӕфуни туххӕй ци финст ес?

¹¹ Адӕймаг косгӕ ку кӕна, уӕд ӕй уолӕфун дӕр куд нӕ гъӕуй. Библий финст ес: «Адӕймагӕн уомӕй хуӕздӕр неци ес, ӕма ку хуӕра, ку ниуаза, удта ӕ хъиамӕтӕй ӕ уодӕн хуарзӕй ести ку уинун кӕна» (Еккл. 2:24). Йесо дӕр ӕй лӕдӕрдтӕй, адӕймаги уолӕфун ке гъӕуй, уой. Еухатт ӕ ахуркӕнуйнӕгтӕ игъосун кӕнуни фӕсте еу минкъий рафӕлладӕнцӕ ӕма син Йесо загъта: «Цӕуӕнти хебарӕ рауӕнмӕ, цӕмӕй уоми еу минкъий уӕ фӕллад исуадзайтӕ» (Мар. 6:31, 32).

12. Уолӕфт ӕма ерхӕфсӕнтӕмӕ раст цӕстӕй цӕмӕн гъӕуама кӕсӕн? Ӕрхӕссӕ цӕветтон.

¹² Ӕцӕгӕйдӕр, адӕймагӕн бауолӕфун ӕма ӕхе райерхӕфсун гъӕугӕ гъуддаг ӕй. Фал гъӕуама лӕмбунӕг уӕн, цӕмӕй нин еци гъуддаг царди фиццаг бунат ма ниййахӕсса. Фиццаг ӕноси беретӕ уотӕ сагъӕс кодтонцӕ: «Хуӕрӕн ӕма ниуазӕн,– уӕддӕр исон рамӕлдзиан» (1 Кор. 15:32). Абони дӕр беретӕ уӕхӕн зундбӕл хуӕст ӕнцӕ. Нигулӕн Европи еу ӕригон лӕхъуӕн ӕмбурдтӕмӕ цӕун райдӕдта. Фал ерхӕфсӕнтӕ уотӕ берӕ уарзта, ӕма Йегови Ӕвдесӕнтӕй раидард ӕй. Уой фӕсте ба ’й балӕдӕрдтӕй, уӕхӕн цард ӕй хуарзӕй ке нецӕмӕ ӕркӕндзӕй, уой. Ӕма нӕуӕгӕй Библи ахур кӕнун райдӕдта, удта игъосунгӕнӕг дӕр иссӕй. Донаргъуди фӕсте ба загъта: «Йеговӕн лӕггадӕ кӕнун цӕйбӕрцӕ цийнӕдзийнадӕ хӕссуй, уой цалинмӕ балӕдӕрдтӕн, уӕдмӕ ерхӕфсӕнтӕбӕл дуйне рӕстӕг фесафтон, ӕма уобӕл хъӕбӕр фӕсмон кӕнун».

13. а) Ерхӕфсӕнтӕбӕл ӕгӕр берӕ рӕстӕг харз кӕнун тӕссаг цӕмӕн ӕй? Ӕрхӕссӕ цӕветтон. б) Ци нин банхус кӕндзӕй еци гъуддагмӕ раст цӕстӕй кӕсун?

¹³ Адӕймаг уой туххӕй фӕууолӕфуй, цӕмӕй имӕ нӕуӕг хъауритӕ фӕззинна. Мадта нин уолӕфунбӕл цӕйбӕрцӕ рӕстӕг гъӕуама цӕуа? Расагъӕс кӕнӕн еу цӕветтонбӕл. Адгийнаг беретӕ уарзунцӕ. Фал айдагъ адгийнаг хуӕрун хуарз нӕй. Кӕд не ’нӕнездзийнадӕбӕл тухсӕн, уӕд гъӕуама хуӕрӕн, пайда нин ка уодзӕй, уӕхӕн хуӕруйнаг. Уотӕ уолӕфт ӕма ерхӕфсӕнтӕ дӕр. Ӕгӕр берӕ рӕстӕг сӕбӕл ку харз кӕнӕн, уӕд Йеговӕй раидард уодзиан. Цума куд ӕнгъезуй исбӕрӕг кӕнун, аци гъуддагмӕ раст цӕстӕй кӕсӕн ӕви нӕ, уой? Нӕ бон ӕй еу къуӕрей дӕргъи финсун, Хуцауи хӕццӕ баст гъуддӕгтӕбӕл нин цӕйбӕрцӕ рӕстӕг рандӕ уй, уой. Зӕгъӕн, игъосун кӕнунбӕл, ӕмбурдтӕбӕл ӕма Библи ахур кӕнунбӕл. Удта нӕ бон ӕй ниффинсун ерхӕфсӕнтӕбӕл нин цӕйбӕрцӕ рӕстӕг рандӕ уй, уой дӕр. Зӕгъӕн, спорт, телевизор ӕма видеогъӕститӕбӕл. Еци нимӕдзтӕ кӕрӕдзей хӕццӕ ку рабарӕн, уӕд ци фӕууиндзиан? Цума ӕгӕр берӕ «адгийнаг» нӕ хуӕрӕн? (Бакӕсӕ Ефесӕгтӕмӕ 5:15, 16.)

14. Ци нин банхус кӕндзӕй хуарз ерхӕфсӕнтӕ ӕвзарун?

 ¹⁴ Цӕхуӕн ерхӕфсӕнтӕ ӕвзардзиан, уой Йеговӕ нӕхе барӕ ниууагъта. Ӕма бийнонти хестӕртӕн сӕ бон ӕй ӕвзарун, бийнонтӕ куд уолӕфдзӕнцӕ, уой. Еци гъуддаги фӕдбӕл Йеговӕ ци гъуди кӕнуй, е бӕрӕг ӕй Библий уагӕвӕрдтӕй. Еци уагӕвӕрдти фӕрци нӕ бон ӕй раст унаффитӕ хӕссун *. Хуарз уолӕфт «Хуцауи лӕвар» ӕй (Еккл. 3:12, 13). Уой дӕр лӕдӕрӕн, ӕма алке ӕмхузӕн ерхӕфсӕнтӕ нӕ уарзуй (Гал. 6:4, 5). Фал цийфӕнди ерхӕфсӕнтӕ ма равзарӕн, уӕддӕр гъӕуама нӕ зӕрдӕбӕл дарӕн Йесой дзурдтӕ: «Дӕ хӕзна кӕми уа, уоми уодзӕй дӕ зӕрдӕ дӕр» (Матф. 6:21). Йесо Киристей ку уарзӕн, уӕд нӕ сагъӕстӕй, нӕ дзурдтӕй, удта нӕ гъуддӕгтӕй бӕрӕг уодзӕй, Хуцауи Паддзахадӕ нин фиццаг бунати ке ӕй, е (Фил. 1:9, 10).

15, 16. а) Адӕймаг мулки скъӕппӕги куд бахауй? б) Мулк ӕмбурд кӕнуни туххӕй Йесо цӕхуӕн зундгин унаффӕ равардта?

¹⁵ Абони беретӕмӕ уотӕ кӕсуй, ӕма син сӕ цард адӕ нӕбал кӕндзӕй, нӕуӕгӕй-нӕуӕгдӕр хъӕппӕлтӕ, телефонтӕ, копьютертӕ ӕма ӕндӕр уӕхӕн дзаумӕттӕ ку не ’лхӕнонцӕ, уӕд. Еци адӕн мулк ӕмбурд кӕнуни  скъӕппӕги бахаудтӕнцӕ ӕма сӕмӕ дзаумӕттӕ, удта ӕхцайӕй ӕндӕр нецӕй мӕтӕ ес. Фал дӕуӕн ба фиццаг бунати ци ӕй? Дӕхе бафӕрсӕ: «Фулдӕр рӕстӕг мин цӕбӕл рандӕ уй? Цӕхуӕн нӕуӕг машинттӕ фӕззиндтӕй кенӕ моди ци рацудӕй, уой гъӕуай кӕнунбӕл ӕви ӕмбурдтӕмӕ цӕттӕ кӕнунбӕл? Алли бони гъуддӕгтӕ мин уойбӕрцӕ не ’ссӕнцӕ, цӕмӕй мӕ Йеговӕмӕ раковунмӕ кенӕ Библи бакӕсунмӕ дӕр мабал евдӕла?» Къӕрцгъос ку нӕ уӕн, уӕд нин мулк Киристейӕй хъазардӕр исуодзӕй. Гъӕуама Йесой дзурдтӕ нӕ зӕрдӕбӕл дарӕн: «Кӕсетӕ, зудӕ мацӕмӕ кӕнтӕ» (Лук. 12:15). Цума уотӕ цӕмӕн загъта?

¹⁶ Йесо загъта, зӕгъгӕ, «еу адӕймагӕн дӕр ӕ бон нӕй, цӕмӕй дууӕ хецауей цагъар уа». Удта ма ӕ дзурдтӕбӕл бафтудта: «Уӕ бон нӕй, цӕмӕй Хуцауи цагъартӕ дӕр уайтӕ ӕма Гъӕздугдзийнади цагъартӕ дӕр». Йесой дзурдтӕмӕ гӕсгӕ, уомӕн нӕййес гӕнӕн, цӕмӕй адӕймаг Йеговӕн ӕгас зӕрдӕй лӕггадӕ кӕна ӕма еци-еу рӕстӕг мулк дӕр ӕмбурд кӕна, уомӕн ӕма уӕд «сӕ еуемӕй е ’сӕфт уиндзӕй, инней ба уарздзӕй, сӕ еуебӕл ӕновуд уодзӕй, инней ба нецӕмӕ дардзӕй» (Матф. 6:24). Ӕнӕнхӕст ке ан, уомӕ гӕсгӕ гъӕуама ӕдзох тох кӕнӕн нӕ «бауӕри монцти» хӕццӕ, уомӕ хауй мулк ӕмбурд кӕнун дӕр (Еф. 2:3).

17. а) Бауӕри монцти фӕдбӕл ка фӕццӕуй, уӕхӕн адӕймагӕн мулкмӕ раст цӕстӕй кӕсун ӕнцон цӕмӕннӕ фӕууй? б) Ци нин банхус кӕндзӕй мулкмӕ раст цӕстӕй кӕсун?

¹⁷ Бауӕри монцтӕ ӕфсадунӕй ӕндӕр ка нецӕбӕл фӕссагъӕс кӕнуй, уӕхӕн адӕймагӕн ӕнцон нӕ фӕууй мулкмӕ раст цӕстӕй кӕсун. (Бакӕсӕ 1 Коринфӕгтӕмӕ 2:14.) Цӕмӕн? Уомӕн ӕма ӕ бон нӕбал фӕууй гъуддагмӕ аллирдиги бакӕсун ӕма хуарз лӕгъузӕй рартасун (Дзиуит. 5:11–14). Куд фулдӕр имӕ уа, уотӕ ӕй фулдӕр фӕгъгъӕуй (Еккл. 5:10). Уӕхӕн фӕндтӕ ӕнцӕ марги хузӕн тӕссаг, фал син ес еу хуасӕ – Хуцауи дзурд Библи, ӕма ӕй гъӕуама алли бон дӕр кӕсӕн (1 Пет. 2:2). Киристе Хуцауи уагӕвӕрдтӕбӕл ке сагъӕс кодта, уой фӕрци Сайтани нихмӕ федар фӕллӕудтӕй. Мах дӕр уотӕ, кӕд нӕ фӕндуй, цӕмӕй мулк ӕмбурд кӕнуни скъӕппӕги ма бахауӕн, уӕд гъӕуама Хуцауи зундӕй архайӕн (Матф. 4:8–10). Уотемӕй ӕвдесдзиан Киристей ке уарзӕн, мулк ӕмбурд кӕнун нӕ, фал.

18. Уӕ федар фӕндӕ ци ӕй?

¹⁸ Йесо Петури уотӕ ку бафарста, «анӕй мӕ фулдӕр уарзис», зӕгъгӕ, уӕд ин уой зӕгъунмӕ гъавта, ӕма ин Йеговӕн лӕггадӕ кӕнун царди фиццаг бунати ке гъӕуама уа. Петурӕн ӕ ном нисан кӕнуй дор кенӕ къӕдзӕх, ӕма куд цардӕй, уомӕй бавдиста, ӕ ном ӕ уӕле ке адтӕй, уой. Петур адтӕй ӕууӕнкгун ӕма къӕдзӕхи хузӕн федар адӕймаг (Гъуд. 4:5–20). Махӕн дӕр нӕ федар фӕндӕ ӕй Киристейӕн нӕ уарзт гъуддӕгтӕй ӕвдесун. Уой туххӕй ба гъӕуама куст, уолӕфт ӕма мулкмӕ раст цӕстӕй кӕсӕн. Ӕма гъе уӕд мах бон дӕр уодзӕй Петури хузӕн зӕгъун: «Гъо, Хецау, ку ӕй зонис, ке дӕ уарзун».