1. Адам ӕма Евӕ Хуцауи нихмӕ ку рацудӕнцӕ, уӕд Хуцау адӕнӕн цӕхуӕн нифс равардта?

ЙЕГОВӔ нифсдӕттӕг Хуцау ӕй ӕма адӕнӕн нифс дӕттуй, кӕдӕй ӕнӕнхӕст иссӕнцӕ, уӕдӕй нурмӕ. Адам ӕма Евӕ ӕ нихмӕ ку рацудӕнцӕ, уой хуӕдфӕсте Йеговӕ загъта, адӕнӕн нифс ка лӕвардтайдӕ, уӕхӕн дзурдтӕ. Еци дзурдтӕ финст ӕнцӕ Райдайӕни 3:15 ӕма си дзурд цӕуй, Сайтанӕн ӕма ӕ гъуддӕгтӕн кӕрон ке ӕрцӕудзӕй (Рарг. 12:9; 1 Иоан. 3:8).

2. Йеговӕ Ноййӕн нифс куд равардта?

² Нӕ зӕрдӕбӕл ӕрлӕуун кӕнӕн, Йеговӕ Ноййи нифс куд бафедар кодта, уой. Сӕ алливарс ка цардӕй, еци адӕн хъӕбӕр ихӕлд ӕма фудзӕрдӕ адтӕнцӕ. Йеговӕн ӕрмӕстдӕр Ной ӕма ӕ бийнонтӕ ке лӕггадӕ кодтонцӕ, уомӕ гӕсгӕ, ӕвӕдзи, еуӕй-еухатт Ноййӕн ӕ нифс басӕттидӕ (Райд. 6:4, 5, 11; Иуд. 6). Фал Йеговӕ Ноййӕн нифс равардта, цӕмӕй ин ӕ бон адтайдӕ идарддӕр дӕр лӕггадӕ  кӕнун ӕма раст ци ӕй, уой кӕнун (Райд. 6:9). Йеговӕ ин загъта, еци фуддуйне исафуйнаг ке ӕй ӕма ин балӕдӕрун кодта, цӕмӕй ӕхуӕдӕг дӕр ӕма ӕ бийнонтӕ дӕр фӕййервӕзонцӕ, уой туххӕй ӕй ци кӕнун гъудӕй, уой (Райд. 6:13–18). Йеговӕ нифсдӕттӕг Хуцау ке ӕй, уой Ной ӕхебӕл бавзурста.

3. Йеговӕ Йесо Навини нифс куд бафедар кодта? (Кӕсӕ хузӕмӕ статьяй райдайӕни.)

³ Фӕстӕдӕр Йеговӕ ӕ лӕггадгӕнӕг Йесо Навинӕн дӕр ӕ нифс бафедар кодта, еу устур гъуддаг ин ку баихӕс кодта, уӕд. Гъӕуама Хуцауи адӕни зӕрдӕвӕрд зӕнхӕмӕ бакодтайдӕ, ӕма си ци хъаурӕгин адӕн цардӕй, уони нихмӕ тохунмӕ рацудайдӕ. Уӕхӕн устур ихӕс ибӕл ке адтӕй, уой туххӕй Йесо Навин тухсгӕ дӕр куд нӕ кодтайдӕ. Йеговӕ дӕр уой лӕдӕрдтӕй, ӕма уомӕ гӕсгӕ Моисеййӕн загъта: «Йесой разамонӕгӕй исӕвӕрӕ, ӕ нифсбӕл ин нифс бафтауӕ ӕма ’й бафедар кӕнӕ, уомӕн ӕма иннӕ фарсмӕ аци адӕни разӕй е рахездзӕй ӕма сӕ е бакӕндзӕй, ке фӕууиндзӕнӕ, еци зӕнхӕмӕ, цӕмӕй ӕй бунӕн райсонцӕ» (Дук. з. 3:28). Уой фӕсте ӕй Йеговӕ ӕхуӕдӕг дӕр бафедар кодта, зӕгъгӕ: «Ӕз дин загътон: „Нифсгун ӕма федар уо“. Мадта ӕппундӕр мацӕмӕй тӕрсӕ, уомӕн ӕма кумӕфӕнди ма рандӕ уай – дӕ Хуцау Йеговӕ уодзӕй дӕ хӕццӕ» (Йес. Н. 1:1, 9). Расагъӕс кӕнӕ, аци дзурдти фӕсте Йесо Навинӕн ӕ нифс куд бафедар адтайдӕ!

4, 5. а) Йеговӕ рагидзаманти ӕ адӕни нифс куд федар кодта? б) Йеговӕ ӕ Фурти нифс куд бафедар кодта?

⁴ Йеговӕ айдагъ еугай адӕни нӕ бафедар кӕнидӕ. Зӕгъӕн, Йеговӕ ’й зудта, ӕ адӕн Вавилони уацармӕ ку бахауонцӕ, уӕд хъӕбӕр нифссаст ке уодзӕнцӕ. Уомӕ гӕсгӕ рагацау ӕ пахампарӕн ниффинсун кодта, сӕ нифс син ка бафедар кодтайдӕ, уӕхӕн дзурдтӕ: «Ма тӕрсӕ, уомӕн ӕма ӕз дӕ хӕццӕ дӕн. Тарст ракӕсӕ-бакӕсӕ ма кӕнӕ, уомӕн ӕма ӕз дӕ Хуцау дӕн. Ӕз дӕ бафедар кӕндзӕн. Ӕз дин банхус кӕндзӕн. Ӕз дӕбӕл федар хуӕцдзӕн мӕ рахес къохӕй, рӕстдзийнади къохӕй» (Ис. 41:10). Еци пахампарадӕ ма фиццаг ӕноси киристӕнттӕн дӕр нифс лӕвардта ӕма абони махӕн дӕр нифс дӕттуй. (Бакӕсӕ 2 Коринфӕгтӕмӕ 1:3, 4.)

⁵ Йеговӕ ма ӕ Фурти нифс дӕр бафедар кодта. Йесо донаргъуд ку райста, уӕд Йеговӕ уӕлӕрвтӕй ӕрдзурдта: «Айӕ ӕй мӕ Фурт, берӕ ке уарзун ӕма арази кӕмӕй дӕн, еци Фурт» (Матф. 3:17). Расагъӕс кӕнӕ, цалинмӕ Йесо зӕнхӕбӕл лӕггадӕ кодта, уӕдмӕ ’й аци дзурдтӕ куд федар кодтайуонцӕ.

6. Киристе таланттити туххӕй ци таурӕхъ радзурдта, е нин нӕ нифс куд федар кӕнуй?

⁶ Йесо дӕр ӕ уӕларвон Фиди хузӕн иннети нифс федар кодта, цӕмӕй еузӕрдон адтайуонцӕ. Ӕ ахуркӕнуйнӕгтӕн аци цардӕвӕрди кӕрони туххӕй ку дзурдта, уӕд син таланттити туххӕй таурӕхъ ракодта. Еци таурӕхъи ци хецауи кой кодта, е ӕ еузӕрдон лӕггадгӕнгутӕй алкӕмӕндӕр загъта: «Хъӕбӕр хуарз, мӕ дзӕбӕх, ме ’ууӕнкгун цагъар! Минкъий гъуддаги дӕхе ӕууӕнкгунӕй бавдистай, ӕма дин дӕ барӕ устурдӕр гъуддаг бакӕндзӕн. Цийнӕ кӕнӕ дӕ хецауи хӕццӕ» (Матф. 25:21, 23). Еци дзурдтӕ ӕ ахуркӕнуйнӕгтӕн сӕ нифс бафедар кодтонцӕ ӕма сӕ баразӕнгард кодтонцӕ идарддӕр дӕр Йеговӕн еузӕрдонӕй лӕггадӕ кӕнун.

7. Йесо ӕ апостолти нифс куд федар кодта, уӕлдайдӕр ба Петури нифс?

 ⁷ Кӕд апостолтӕ кӕрӕдзей хӕццӕ арӕх буцӕу кодтонцӕ, ка си уӕлдӕр ӕй, уобӕл, уӕддӕр сӕмӕ Йесо фӕразон адтӕй. Е сӕ баразӕнгард кодта, иннетӕн сӕрниллӕгӕй лӕггадӕ кӕнунмӕ, сӕхецӕн син ке лӕггадӕ кӕндзӕнцӕ, уомӕ ӕнгъӕлмӕ кӕсун нӕ, фал (Лук. 22:24–26). Еуӕй-еухатт Петур рӕдуйгӕ дӕр фӕккӕнидӕ, ӕма уомӕй Киристей фӕффудӕнгъӕл кӕнидӕ (Матф. 16:21–23; 26:31–35, 75). Фал Йесо Петурбӕл ӕ къох некӕд ракъуӕрдта. Е ин ӕ нифс бафедар кодта ӕма ма ин иннӕ ахуркӕнуйнӕгти нифс федар кӕнун дӕр баихӕс кодта (Иоан. 21:16).

8. Езеки ӕфсади хестӕрти ӕма Йерусалими цӕргути нифс куд бафедар кодта?

⁸ Киристе зӕнхӕмӕ ку нӕма ’рцудӕй ӕма иннети федар кӕнун куд гъӕуй, уой ку нӕма бавдиста, уӕдмӕ дӕр ӕй Йегови еузӕрдон лӕггадӕгӕнгутӕ зудтонцӕ, кӕрӕдзей нифс федар кӕнун ке гъӕуй, уой. Зӕгъӕн, ассирийӕгтӕ Йерусалимбӕл ку ӕртухстӕнцӕ, уӕд Езеки ӕфсади хестӕрти ӕма Йерусалими цӕргути ӕрӕмбурд кодта, цӕмӕй син «сӕ зӕрдити нифс бауагътайдӕ». Ӕма «Езекий дзурдтӕй адӕнмӕ нифс бацудӕй». (Бакӕсӕ 2 Анзфинстити 32:6–8.)

9. Иови киунугӕй ци ес базонӕн, иннети нифс федар кӕнун куд ӕхсидзгӕ ӕй, уой туххӕй?

⁹ Иннети нифс федар кӕнун куд ӕхсидзгӕ ӕй, е ма бӕрӕг ӕй Иови хабарӕй дӕр. Нифссаст кӕд ӕхуӕдӕг адтӕй, уӕддӕр иннетӕн бавдиста, адӕймаги нифс федар кӕнун куд гъӕуй, уой. Е ’ртӕ ӕмбали ин ӕ нифс бафедар кӕнунмӕ ку ’рбацудӕнцӕ, уӕд син загъта, сӕ бунати ку адтайдӕ, уӕд куд бакодтайдӕ, уой: «Ӕз уин уӕ зӕрдитӕ дзурдӕй бафедар кодтайнӕ, рӕвдауӕн дзурдӕй ӕрсабур кодтайнӕ» (Иов 16:1–5). Фӕстагмӕ Иовӕн ӕ нифс Елиуй бафедар кодта, уой фӕсте ба Йеговӕ ӕхуӕдӕг дӕр (Иов 33:24, 25; 36:1, 11; 42:7, 10).

10, 11. а) Йеффаййи кизгӕн ӕ нифс бафедар кӕнун цӕмӕн гъудӕй? б) Абони ӕ нифс бафедар кӕнун кӕмӕн гъӕуй?

¹⁰ Йеффаййи кизгӕн дӕр гъудӕй ӕ нифс бафедар кӕнун. Ӕ фидӕ аммонӕгти нихмӕ ку рацудӕй, уӕд Йеговӕн дзурд равардта, мӕ къохмӕ мин сӕ ку радтай, уӕд мӕмӕ мӕ хӕдзарӕй фиццаг ка рацӕуа, уой дӕуӕн ратдзӕн дӕ цатури лӕггадӕ кӕнунмӕ, зӕгъгӕ. Еци тугъди израилӕгтӕ фӕууӕлахез ӕнцӕ, ӕма Йеффай хӕдзарӕмӕ ку раздахтӕй, уӕд имӕ фиццаг ка рацудӕй, е адтӕй ӕ еунӕг кизгӕ. Йеффай, раст цума ин ӕ зӕрдӕ еске кардӕй барӕхуста, уотӕ фӕцӕй. Фал уӕддӕр ӕ дзурд исӕнхӕст кодта ӕма ӕ кизги Силоммӕ рарвиста цӕрӕнбонти Хуцауи цатури лӕггадӕ кӕнунмӕ (Тӕрх. 11:30–35).

¹¹ Кӕд Йеффаййӕн е хъӕбӕр зин адтӕй, уӕд ӕ кизгӕн ба никки зиндӕр адтайдӕ. Фал уӕддӕр цӕттӕ адтӕй, ӕ фидӕ ци дзурд равардта, уой исӕнхӕст кӕнунмӕ (Тӕрх. 11:36, 37). Е уобӕл дзорӕг адтӕй, ӕма ин киндзи ӕрцӕун, цӕуӕт рауадзун ӕма ӕ фиди муггаг раидард кӕнунмӕ барӕ нӕбал адтайдӕ. Мадта кӕд ескӕмӕн ӕ нифс бафедар кӕнун гъудӕй, уӕд Йеффаййи кизгӕн. Библи зӕгъуй: «Израили ӕрфедар ӕй уӕхӕн ӕгъдау: анзӕй-анзмӕ, анзи медӕг цуппар бони, Израили кизгуттӕ цудӕнцӕ Галаади цӕрӕг Йеффаййи кизгӕмӕ, цӕмӕй ӕй фестудтайуонцӕ» (Тӕрх. 11:39, 40). Абони дӕр  киристӕнттӕй беретӕ бийнонтӕ не ’скӕнунцӕ, цӕмӕй сӕ бон уа Йеговӕн фулдӕр лӕггадӕ кӕнун. Мах бон ба нӕ адтайдӕ уӕхӕн хуӕртӕ ма ӕнсувӕрти ӕстаун ӕма син сӕ нифс федар кӕнун? (1 Кор. 7:32–35).

12, 13. Петур ӕнсувӕрти нифс куд федар кодта?

¹² Ӕ мӕлӕти разӕй, еци ӕхсӕвӕ Йесо апостол Петурӕн загъта: «Симон, Симон! Сайтан курдта, цӕмӕй мӕнӕуи хузӕн лӕуӕрст ӕрцӕуайтӕ. Фал ӕз зӕрдиагӕй кувтон дӕу туххӕй, цӕмӕй де ’ууӕндундзийнадӕ ма фесафай. Ӕма ку ’рфӕсмон кӕнай, уӕд де ’нсувӕрти бафедар кӕнӕ» (Лук. 22:31, 32).

¹³ Петур адтӕй фиццаг ӕноси «ӕмбурди цӕгиндзитӕй» сӕ еу (Гал. 2:9). Нӕ эри 33 анзи Фӕндзайӕймаг бон, удта ма уой фӕсте дӕр куд нифсгунӕй архайдта, е ӕнсувӕртӕн хъӕбӕр устур нифс лӕвардта. Йеговӕн берӕ ӕнзти дӕргъи ку фӕллӕггадӕ кодта, уӕд е ’мкиристӕнттӕмӕ ниффинста: «Аци цубур финстӕг уӕмӕ ниффинстон... цӕмӕй уин уӕ нифсбӕл нифс бафтауон ӕма уин балӕдӕрун кӕнон, Хуцау уин ци устур хуарзӕнхӕй бахай кодта, е ӕцӕг ке ӕй. Ӕма еци устур хуарзӕнхӕбӕл федар хуӕцетӕ» (1 Пет. 5:12). Петури финстӕгутӕ, еци рӕстӕги ка цардӕй, еци киристӕнтти нифс федар кодтонцӕ. Ӕма абони мах нифс дӕр федар кӕнунцӕ, уомӕн ӕма ӕнгъӕлмӕ кӕсӕн, Йеговӕ нин зӕрдӕ цӕмӕй байвардта, е кӕронмӕ кӕд исӕнхӕст уодзӕй, уомӕ (2 Пет. 3:13).

14, 15. Ӕности дӕргъи апостол Иоанни киунугутӕ киристӕнтти нифс куд федар кӕнунцӕ?

¹⁴ Апостол Иоанн дӕр фиццаг ӕноси  «ӕмбурди цӕгиндзитӕй» сӕ еу адтӕй. Иоанни евангелийӕй Йесой лӕггади туххӕй берӕ ӕхсидзгӕ хабӕрттӕ ес базонӕн. Еци киунугӕ ӕности дӕргъи киристӕнтти нифс федар кодта ӕма абони мах нифс дӕр федар кӕнуй. Зӕгъӕн, ӕрмӕстдӕр Иоанни евангелий финст ӕй, Йесо уотӕ ке загъта, ӕма ӕцӕг киристӕнтти сӕ уарзондзийнадӕй зондзӕнцӕ. (Бакӕсӕ Иоанни 13:34, 35.)

¹⁵ Е ’ртӕ финстӕгеми дӕр берӕ ӕхсидзгӕ гъудитӕ финст ес. Зӕгъӕн, хатгай нӕ рӕдудтити туххӕй нӕ нифс басӕттуй. Фал аци дзурдтӕ ку бакӕсӕн, «Йесой тог кӕдзос кӕнуй ӕгас тӕрегъӕдтӕй дӕр», зӕгъгӕ, уӕд нӕ нифс бафедар уй (1 Иоан. 1:7). Ӕма ма уой фӕсте дӕр нӕхе ку хуӕрӕн, удта нӕ бафедар кӕндзӕнцӕ дзурдтӕ, «Хуцау нӕ зӕрдитӕй устурдӕр ӕй», зӕгъгӕ (1 Иоан. 3:20). Библи финсгутӕй ӕрмӕстдӕр Иоанн ниффинста, «Хуцау ӕй уарзондзийнадӕ», зӕгъгӕ (1 Иоан. 4:8, 16). Ӕ дуккаг ӕма ӕртиккаг финстӕгути ба растудта, «рӕстдзийнадӕмӕ гӕсгӕ [ка] цӕруй», еци киристӕнтти (2 Иоан. 4; 3 Иоан. 3, 4).

16, 17. Апостол Павел фиццаг ӕноси киристӕнтти нифс куд федар кодта?

¹⁶ Апостолтӕй киристӕнтти нифс бафедар кӕнунбӕл Павел цӕйбӕрцӕ архайдта, уойбӕрцӕ ба, ӕвӕдзи, неке. Киристей мӕлӕти фӕсте апостолтӕн сӕ фулдӕр Йерусалими адтӕнцӕ, ӕма разамонӕг совет дӕр уоми адтӕй (Гъуд. 8:14; 15:2). Иудейи ка цардӕй, еци киристӕнттӕ игъосун кодтонцӕ, ӕрмӕстдӕр еунӕг Хуцау ке ес, уобӕл уотемӕй дӕр ка ӕууӕндтӕй, еци адӕнӕн. Апостол Павели ба Хуцауи сугъдӕг хъаурӕ рарвиста, берӕ хуцӕуттӕн ка кувта, еци адӕнӕн игъосун кӕнунмӕ, грекъӕгтӕмӕ, ромӕгтӕмӕ ӕма ӕндӕр уӕхӕн адӕнмӕ (Гал. 2:7–9; 1 Тим. 2:7).

 ¹⁷ Павел игъосун кӕнуни балций ку адтӕй, уӕд игъосун кодта, нур Турк кӕми ӕй, еци рауӕнти, удта Греци ӕма Италий дӕр. Уой фӕрци еци рауӕнти дӕр фӕззиндтӕй киристон ӕмбурдтӕ. Фал киристон дин ка райста, еци адӕни цард ӕнцон н’ адтӕй, уомӕн ӕма сӕхе адӕни къохӕй «ӕфхуӕрд ӕййафтонцӕ» (1 Фес. 2:14). Нӕ эри 50 анзмӕ хӕстӕг Павел Фессалоники нӕуӕг ӕмбурдмӕ ниффинста: «Хуцаумӕ ку фӕкковӕн, уӕд ин алкӕддӕр райарфӕ кӕнӕн уе ’гасей туххӕй дӕр, уомӕн ӕма... ӕдзохдӕр нӕ зӕрдӕбӕл дарӕн, уе ’ууӕндундзийнадӕй ка цӕуй, еци гъуддӕгтӕ, уӕ уарзондзийнадӕ уӕ кӕмӕ разӕнгард кӕнуй, еци хъиамӕт ӕма... куд федар айтӕ, уой» (1 Фес. 1:2, 3). Удта ма еци ӕмбурди киристӕнтти баразӕнгард кодта: «Идарддӕр дӕр уӕ кӕрӕдзей нифсбӕл нифс ӕфтауетӕ ӕма кӕрӕдзей федар кӕнтӕ» (1 Фес. 5:11).

18. Фиццаг ӕноси разамонӕг совет Филиппи нифс куд бафедар кодта?

¹⁸ Фиццаг ӕноси разамонӕг совет, ӕмубурдти разамунд ка лӕвардта, уони нифс, удта иннӕ киристӕнтти нифс дӕр федар кодта. Филипп Киристей туххӕй Самарий ку игъосун кодта, уӕд ин разамонӕг совети ӕнсувӕртӕ хъӕбӕр банхус кодтонцӕ. Петури ӕма Иоанни (етӕ дӕр разамонӕг советӕй адтӕнцӕ) уордӕмӕ рарвистонцӕ, цӕмӕй киристон ка иссӕй, уони туххӕй искувтайуонцӕ ӕма етӕ дӕр сугъдӕг хъаурӕй исхайгин адтайуонцӕ (Гъуд. 8:5, 14–17). Разамонӕг совет уотӕ ке бакодта, уой фӕрци, ӕвӕдзи, Филиппӕн дӕр ӕма нӕуӕг киристӕнттӕн дӕр сӕ нифс хъӕбӕр бафедар ӕй!

19. Фиццаг ӕноси киристӕнттӕ разамонӕг совети финстӕгмӕ цӕхуӕн цӕстӕй ракастӕнцӕ?

¹⁹ Фӕстӕдӕр разамонӕг совети гъудӕй еу ӕхсидзгӕ фарста ниллух кӕнун: дзиуиттаг ка н’ адтӕй, еци киристӕнтти Моисеййи закъонмӕ гӕсгӕ сонӕт кӕнун гъудӕй ӕви нӕ (Гъуд. 15:1, 2). Гъема Хуцауӕй сугъдӕг хъаурӕ ку ракурдтонцӕ ӕма Финстадӕ ци зӕгъуй, уомӕ ку ӕркастӕнцӕ, уӕд ниллух кодтонцӕ, еци киристӕнтти сонӕт кӕнун ке нӕ гъӕуй. Ци унаффӕ рахастонцӕ, уой туххӕй финстӕг ниффинстонцӕ ӕма ’й сӕхе номӕй ӕнсувӕртӕй рарвистонцӕ, цӕмӕй ӕй ӕмбурдти бакастайуонцӕ. Цума хуӕртӕ ӕма ӕнсувӕртӕ уомӕ цӕхуӕн цӕстӕй ракастӕнцӕ? Библи куд зӕгъуй, уомӕ гӕсгӕ «финстӕг ку бакастӕнцӕ, уӕд бафедар ӕнцӕ ӕма фӕццийнӕ кодтонцӕ» (Гъуд. 15:27–32).

20. а) Абони Разамонӕг совет зӕнхӕбӕл еугур хуӕртӕ ӕма ӕнсувӕрти нифс дӕр куд федар кӕнуй? б) Иннӕ статьяй дзурд цӕбӕл цӕудзӕй?

²⁰ Абони дӕр Йегови Ӕвдесӕнти Разамонӕг совет вефилӕгти, сӕрмагонд ӕнхӕстрӕстӕг лӕггадгӕнгути ӕма зӕнхӕбӕл еугур хуӕртӕ ӕма ӕнсувӕрти нифс дӕр федар кӕнуй. Мах дӕр фиццаг ӕноси киристӕнтти хузӕн бафедар уӕн ӕма фӕццийнӕ кӕнӕн. Уомӕй уӕлдай ма 2015 анзи Разамонӕг совет рауагъта брошюрӕ «Йегъовӕмӕ ӕрбаздӕх», цӕмӕй рӕстдзийнади надӕй ка радзӕгъӕл ӕй, уони нифс дӕр бафедар уа. Фал цума, ӕмбурдти разамунд ка дӕттуй, ӕрмӕстдӕр етӕ гъӕуама федар кӕнонцӕ иннети? Аци фарстабӕл ба дзурд цӕудзӕй иннӕ статьяй.