ДАЙАНӔБӔЛ 80 анземӕй фулдӕр цӕуй. Ӕ сӕрихецаумӕ адтӕй Альцгеймери нез ӕма цалдӕр анзей дӕргъи, ӕ мӕлӕти уӕнгӕ фӕцӕй зӕрӕндти хӕдзари. Уомӕй уӕлдай ма Дайанӕн ӕ дууӕ фурти дӕр рамардӕнцӕ ӕма ма ин ӕ реуи дӕр рак иссирдтонцӕ. Фал уӕддӕр хуӕртӕ ӕма ӕнсувӕртӕ зӕгъунцӕ, кӕмифӕнди ӕй ма фӕууинай – ӕмбурди уа ӕви игъосункӕнгӕй – алкӕддӕр фӕууй цийнӕйдзаг.

Джон цӕуӕг цӕстӕдарӕгӕй фӕллӕггадӕ кодта 43 анзей дӕргъи. Еци хузи лӕггадӕ кӕнун ӕ зӕрдӕмӕ хъӕбӕр цудӕй, зӕгъӕн ес, ӕма е адтӕй ӕ цард. Фал ӕй еу афони еци лӕггадӕ ниууадзун багъудӕй, цӕмӕй ӕ сӕйгӕ хеуонмӕ кастайдӕ. Джонбӕл ӕ рагон зонгитӕ конгресси ку рамбӕлунцӕ, уӕд ӕй фӕууинунцӕ, ӕппундӕр ке нӕ раййивта. Ӕ цӕсгон ма нур дӕр фур цийнӕй рохс кӕнуй.

Дайанӕ ӕма Джон сӕ цийнӕдзийнӕдӕ цӕй фӕрци нӕ фесафтонцӕ? Нӕ бон куд ӕй цийнӕ кӕнун, зӕрдӕрист ку уӕн кенӕ ӕнӕуой рист ку ӕвзарӕн, уӕд кенӕ ба, хъӕбӕр кӕмӕн аргъ кодтан, еци кадгин ихӕстӕ ӕнхӕст кӕнун нӕ бон ку нӕбал уа, уӕд дӕр? Библий финст ӕй дзуапп: «Рӕстгӕнӕгӕн Йеговӕ уодзӕй ӕ цийнӕ» (Пс. 64:10). Цӕмӕй нин аци дзурдтӕ ӕнцондӕр балӕдӕрӕн уонцӕ, уой туххӕй ӕркӕсӕн, ӕцӕг цийнӕдзийнадӕ цӕмӕй кӕнгӕ ’й ӕма цӕй хӕццӕ баст фӕууй, уомӕ.

Еуӕй-еу гъуддӕгтӕ адӕймагӕн алкӕддӕр цийнӕдзийнадӕ ӕрхӕссунцӕ. Зӕгъӕн, расагъӕс кӕнӕ, кӕрӕдзей ка уарзуй, уӕхӕн кизгӕ ӕма биццеу куд фӕццийнӕ кӕнунцӕ сӕ киндзӕхсӕвӕри бон. Кенӕ ба ниййергутӕ куд фӕццийнӕ кӕнунцӕ, сувӕллон син ку райгуруй, уӕд. Кенӕ, зӕгъӕн, киристонӕн ӕмбурди ести кадгин ихӕстӕ ку бабарӕ кӕнунцӕ, уӕд куд фӕууй. Етӕ еугурӕйдӕр хъӕбӕр цийни хабӕрттӕ ’нцӕ. Ӕма е дессаг дӕр нӕй, уомӕн ӕма еци лӕвӕрттӕ ӕгасӕйдӕр Йеговӕй ӕнцӕ. Бийнонти цардӕн бундор е ӕрӕвардта, сувӕллӕнттӕ дӕр уой лӕвар ӕнцӕ, удта нин ӕмбурди цидӕриддӕр ихӕстӕ ес, етӕ дӕр уомӕй ӕнцӕ (Райд. 2:18, 22; Пс. 127:3; 1 Тим. 3:1).

Фал, ке зӕгъун ӕй гъӕуй, уӕхӕн цийнӕ алкӕд берӕ нӕ рахӕссуй. Гӕнӕн ес, ӕма цардӕмбал рамӕла кенӕ ба хӕтун райдайа (Йез. 24:18; Оси 3:1). Фӕууй уотӕ, ӕма сувӕллӕнттӕ ниййергутӕмӕ ӕма Хуцаумӕ дӕр нӕ фегъосунцӕ, ӕма сӕ  ӕмбурдӕй дӕр рацох кӕнонцӕ. Зӕгъӕн, пахампар Самуили фурттӕ Йеговӕн, куд ӕмбӕлуй, уотӕ нӕбал лӕггадӕ кодтонцӕ. Паддзах Давиди бийнонтӕбӕл ба ӕ тӕрегъӕди туххӕй устур бӕллӕхтӕ ӕрцудӕй (1 Сам. 8:1–3; 2 Сам. 12:11). Уӕхӕн ести хабӕрттӕ мах царди ку ’рцӕунцӕ, уӕд нӕ цийнӕдзийнадӕ фесафӕн.

Йегови гъуддаги нин ци кадгин ихӕстӕ ес, уони алкӕд ӕнхӕст кӕнун нӕ бон нӕ уодзӕй. Ка ’й зонуй, не ’нӕнездзийнадӕ фӕллӕгъуздӕр уодзӕй, нӕ бийнонти уавӕр раййевдзӕй кенӕ ба организаций цидӕр ӕййивддзийнӕдтӕ ӕрцӕудзӕй. Уӕхӕн хабар кӕбӕл ӕрцудӕй, уонӕй беретӕ зӕгъунцӕ, сӕ раздӕри цардбӕл ӕрхун ке кӕнунцӕ.

Мадта бӕрӕг ӕй, цийнӕдзийнадӕ рӕстӕгмӕ дӕр ке фӕууй. Фал ӕй цума нӕ бон ӕй багъӕуай кӕнун, нӕ царди зин рӕстӕгутӕ ку ’рцӕуа, уӕд? Гъо, ӕма е бӕрӕг ӕй, Самуил, Давид ӕма иннӕ еузӕрдон лӕггадгӕнгути цардӕй. Етӕ зиндзийнӕдти рӕстӕг сӕ цийнӕдзийнадӕ нӕ фесафтонцӕ.

Киристе ӕй зудта, ӕцӕг цийнӕдзийнадӕ ци ӕй, уой. Уӕлӕрвти ма Йегови хӕццӕ ку цардӕй, уӕд «алкӕддӕр цийнӕ кодта ӕ рази» (Ӕмб. 8:30). Зӕнхӕбӕл ку адтӕй, уӕдта уӕззау фӕлварӕнтӕбӕл исӕмбӕлдӕй. Фал уӕддӕр цийнӕ кодта, ӕ Фиди фӕндон ке ӕнхӕст кӕнуй, уобӕл (Иоан. 4:34). Ӕ царди фӕстаг сахӕтти туххӕй ба ци ес зӕгъӕн? Библий финст ӕй: «Ци цийнӕдзийнадӕ имӕ ӕнгъӕлмӕ кастӕй, уой туххӕй ходуйнаг нецӕмӕ ӕрдардта ӕма гъезӕмӕртти гъӕдӕбӕл мӕлӕт бавзурста» (Дзиуит. 12:2). Мадта ӕцӕг цийнӕдзийнадӕ ци ӕй, уой хуӕздӕр лӕдӕрдзиан, Киристе уой туххӕй ци дзурдта, уобӕл ку расагъӕс кӕнӕн, уӕд.

Еухатт Киристе ӕ 70 ахуркӕнуйнаги игъосун кӕнунмӕ рарвиста. Ӕма фӕстӕмӕ ку ӕрӕздахтӕнцӕ, уӕд ин цийнӕгӕнгӕй дзурдтонцӕ, ци дессаги гъуддӕгтӕ сӕ бон адтӕй кӕнун, уой туххӕй ӕма ма сайтӕнтти дӕр ке фӕссориуонцӕ. Ӕма син уӕд Киристе загъта: «Сайтӕнттӕ уӕ коммӕ ке кӕсунцӕ, уобӕл ма цийнӕ кӕнтӕ – цийнӕ кӕнтӕ, уӕ нӕмттӕ уӕлӕрвти финст ке ’нцӕ, уобӕл» (Лук. 10:1–9, 17, 20). Ӕцӕгӕйдӕр, Йеговӕ ди арази уа, е берӕ ӕхсидзгӕдӕр ӕй цийфӕнди кадгин ихӕсӕй дӕр ӕма дзӕвгарӕ фулдӕр цийнӕдзийнадӕ хӕссуй.

Ӕндӕр хабар ба адтӕй, Киристе берӕ адӕнӕн ку игъосун кодта, уӕд. Куд ахур кодта, е еу иудейаг силгоймаги зӕрдӕмӕ уотӕ фӕццудӕй, ӕма рагъӕр кодта, зӕгъгӕ, уӕхӕн фурт кӕмӕн ес, еци мадӕ кунӕг амондгун нӕй. Фал ӕй Киристе бараст кодта: «Нӕ, амондгун етӕ ’нцӕ, Хуцауи дзурд ка игъосуй ӕма ’й ка ӕнхӕст кӕнуй!» (Лук. 11:27, 28). Фуртӕй кенӕ кизгӕй сӕрустур ун ӕцӕгӕйдӕр  хъӕбӕр ӕхцӕуӕн ӕй. Фал Йеговӕмӕ ке игъосис ӕма имӕ ке хӕстӕг кӕнис, е ци цийнӕдзийнадӕ хӕссуй, уой хӕццӕ ба ин ӕй рабарӕн дӕр неййес.

Мадта ни Йеговӕ арази ке ӕй, уой ку зонӕн, уӕд нин е ӕцӕг цийнӕйдзийнадӕ хӕсдзӕй, сауӕнгӕ ма фӕлварӕнтӕбӕл ку ӕмбӕлӕн, уӕддӕр. Ӕма еузӕрдонӕй ку байзайӕн, уӕд нӕ зӕрдитӕ цийнӕй байдзаг унцӕ (Ром. 5:3–5). Уомӕй уӕлдай ма Йеговӕ ӕ сугъдӕг хъаурӕ дӕттуй, ӕ зӕрдӕ ибӕл ка даруй, уонӕн, ӕма цийнӕдзийнадӕ ба ӕй, ӕ сугъдӕг хъаури рӕзӕмӕ ци менеугутӕ хауй, уонӕй сӕ еу (Гал. 5:22). Уой фӕрци хуӕздӕр лӕдӕрӕн Псалом 64:10 финст дзурдтӕ: «Рӕстгӕнӕгӕн Йеговӕ уодзӕй ӕ цийнӕ».

Нур бӕрӕг ӕй, Дайанӕ ӕма Джон зиндзийнӕдти дӕр сӕ цийнӕдзийнадӕ цӕй фӕрци нӕ фесафтонцӕ, е. Дайанӕ зӕгъуй: «Йегови хӕццӕ мин фӕууй ӕдас, раст сувӕллонӕн ӕ фиди фарсмӕ куд ӕдас фӕууй, уотӕ». Цума ’й Дайанӕ уотӕ федарӕй кӕцӕй зонуй, Йеговӕ си арази ке ӕй, уой? Е идарддӕр зӕгъуй: «Ӕз ӕй уинун, Хуцау мин куд арфӕ кӕнуй, уой. Е мин дӕттуй хъауритӕ, цӕмӕй ӕдзох цийнӕгӕнгӕй игъосун кӕнон». Цӕуӕг цӕстӕдарӕги лӕггадӕ ниууадзун ке багъудӕй, еци ӕнсувӕр Джон дӕр идарддӕр зингзӕрдӕй игъосун кӕнуй. Цума уомӕн ба ци ’нхус кӕнуй? Джон зӕгъуй: «1998 анзи мӕ „Лӕггадӕ фӕххуӕздӕр кӕнуни скъолай“ ахургӕнӕгӕй ку исӕвардтонцӕ, уӕдӕй нурмӕ Библий ахурӕн дзӕвгарӕ фулдӕр рӕстӕг рахецӕн кӕнун». Ӕхе ӕма ӕ бийнойнаги туххӕй зӕгъуй: «Йеговӕн лӕггадӕ кӕнгӕй нин цийфӕнди ма баихӕс кодтайуонцӕ, уӕддӕр архайдтан нӕ уавӕртӕмӕ раст цӕстӕй кӕсун, ӕма нин уой фӕрци нӕуӕг уавӕртӕбӕл райахур ун ӕнцон фӕууидӕ. Нур нецӕбӕл фӕсмон кӕнӕн».

Берӕ ӕндӕр хуӕртӕ ӕма ӕнсувӕртӕ дӕр, Псалом 64:10 финст дзурдтӕ раст ке ’нцӕ, уой сӕхебӕл бавзурстонцӕ. Цӕветтонӕн ӕрхӕссӕн, Еугонд Штатти Вефили 30 анземӕй фулдӕр ка фӕллӕггадӕ кодта, уой фӕсте ба сӕрмагонд пионертӕй ке иснисан кодтонцӕ, уӕхӕн лӕг ӕма уоси хабар. Етӕ зӕгъунцӕ: «Берӕ ци уарзтай, уомӕй ку фенӕхай уис, уӕд зӕрдӕ хъӕбӕр фӕрресуй, ӕма е дессаг дӕр нӕй. Фал еци рист ӕносмӕ нӕ уодзӕй». Еци бийнонтӕ се ’ргом раздахтонцӕ ӕмбурди хӕццӕ игъосун кӕнунмӕ. Уой туххӕй зӕгъунцӕ: «Мах Йеговӕмӕ кувтан ӕма нӕ кувдтитӕ адтӕнцӕ бӕлвурд. Ӕма нин сӕбӕл куд дзуапп кӕнуй, уой ку уидтан, уӕд нин е устур цийнӕдзийнадӕ хаста ӕма нӕ нифс бафедар уидӕ. Нӕ нӕуӕг бунатмӕ ку исхъӕрдтан, уобӕл берӕ нӕ рацудӕй, уотемӕй ӕмбурди хуӕртӕ ӕма ӕнсувӕртӕй еуӕй-еуетӕ райдӕдтонцӕ пионертӕй лӕггадӕ кӕнун, удта ма дууӕ заманай Библий ахури иссирдтан».

Ке зӕгъун ӕй гъӕуй, цийнӕйдзаг ун алкӕд ӕнцон нӕ фӕууй – нӕ царди берӕ мӕститӕ бавзарӕн. Фал Йеговӕ Библий ниффинсун кодта, нӕ нифс нин ка федар кӕнуй, уӕхӕн дзурдтӕ. Финст ӕнцӕ Псалом 64:10. Ӕма кӕд хатгай нӕ зӕрдӕ ӕрӕнкъард уй, уӕддӕр ӕй федарӕй зонӕн, рӕстгӕнгутӕн Йеговӕ сӕ цийнӕ ке уодзӕй, цийфӕнди уавӕрти дӕр ибӕл еузӕрдон ку уонцӕ, уӕд. Уомӕй уӕлдай ма нӕ бон ӕй сагъӕс кӕнун, Йегови зӕрдӕвӕрд «нӕуӕг арв ӕма нӕуӕг зӕнхи» туххӕй кӕд исӕнхӕст уодзӕй, еци рӕстӕгбӕл. Уӕд еугурӕйдӕр уодзӕнцӕ ӕнхӕст ӕма Хуцауи лӕггадгӕнгутӕ ӕносмӕ дӕр цийнӕ кӕндзӕнцӕ, Йеговӕ син куд арфӕ кӕнуй, уой уингӕй (Ис. 65:17, 18).

Расагъӕс кӕнӕ: незтӕн сӕ кой дӕр нӕбал уодзӕй ӕма алли сӕумӕ дӕр ку раистӕн, уӕд не уӕнгти хъаурӕ лӕдӕрдзиан. Кӕддӕр ци мӕститӕ бавзурстан, етӕ нӕ нӕбал тухсун кӕндзӕнцӕ ӕма нин нӕ зӕрдӕ нӕбал ресун кӕндзӕнцӕ. Йеговӕ нин зӕрдӕ ӕвӕруй: «Раздӕр ци адтӕй, уони гъуди дӕр некебал ӕркӕндзӕй ӕма зӕрди дӕр нӕбал байзайдзӕнцӕ». Райгасдзийнадӕ ке уодзӕй, уой фӕрци ба нӕуӕгӕй нӕ хеуӕнтти хӕццӕ фембӕлдзиан. Милиуангай адӕн сӕхебӕл бавзардзӕнцӕ, 12-анздзуд кизги ниййергутӕ ке бавзурстонцӕ, еци ӕнкъарӕнтӕ. Киристе син сӕ кизги ку райгас кодта, уӕд ма «фурцийнӕй ци ракодтайуонцӕ, уой нӕбал зудтонцӕ» (Мар. 5:42). Фӕстагмӕ ба зӕнхӕбӕл алли адӕймаг дӕр исуодзӕй ӕцӕг рӕстгӕнӕг ӕма «Йеговӕ уодзӕй ӕ цийнӕ» ӕносмӕ дӕр.