1, 2. Царди ӕхсидзгӕ унаффитӕ хӕсгӕй Хуцауи унаффитӕмӕ игъосун цӕмӕн гъӕуй? (Кӕсӕ хузӕмӕ статьяй райдайӕни.)

АМОНДГУН цард кӕнунмӕ дӕ цӕхуӕн над равзарун гъӕуй, уой фӕдбӕл, ӕвӕдзи, берӕ унаффитӕ фегъосис, уӕлдайдӕр ба, кӕд ӕригон дӕ, уӕд. Ӕвӕдзи дӕ ахургӕнгутӕ дӕр ӕма иннетӕ дӕр фӕрразӕнгард кӕнунцӕ уӕлдӕр ахурмӕ бацӕун, цӕмӕй уой фӕсте дӕ бон уа берӕ ’хца косун. Фал Йеговӕ ӕндӕрхузи унаффитӕ дӕттуй. Уой дӕр фӕндуй, цӕмӕй скъолай дзӕбӕх ахур кӕнай, ӕма уой фӕсте дӕ бон уа дӕхе дарун (Кол. 3:23). Фал уой дӕр зонуй, ӕма ӕригон адӕймаги фӕгъгъӕуй, е ’гас цардбӕл дӕр ка рабӕрӕг уодзӕй, берӕ уӕхӕн унаффитӕ хӕссун. Уомӕ гӕсгӕ нин равардта, аци фӕстаг бӕнтти нин ӕ зӕрдӕ рохс кӕнунмӕ ка банхус кӕндзӕй, уӕхӕн уагӕвӕрдтӕ (Матф. 24:14).

² Е дӕр ди иронх ма уӕд, ӕма Йеговӕ алцидӕр зонуй. Зонуй ӕй, аци дуйнемӕ ци ӕнгъӕлмӕ кӕсуй ӕма ӕ кӕрон цӕйбӕрцӕбӕл хӕстӕг ӕй, уой (Ис. 46:10; Матф. 24:3, 36). Уомӕй уӕлдай ма Йеговӕ дӕу дӕр зонуй. Зонуй ӕй, амондгун кӕд уодзӕнӕ ӕма кӕд нӕ уодзӕнӕ,  уой. Гӕнӕн ес, ӕма адӕни унаффитӕ адӕймагмӕ раст фӕккӕсонцӕ, фал Хуцауи Дзурди нихмӕ ку уонцӕ, уӕд сӕ зундгин исхонӕн нӕ уодзӕй (Ӕмб. 19:21).

3, 4. Адам ӕма Евӕ Сайтани унаффӕмӕ ке байгъустонцӕ, е сӕхецӕн дӕр, удта сӕ цӕуӕтӕн дӕр цӕхуӕн зиан ӕрхаста?

³ Адӕнӕн тӕккӕ фиццаг лӕгъуз унаффӕ лӕвӕрд ӕрцудӕй Едеми дзӕхӕрадони, ӕма син хъӕбӕр устур зиан ӕрхаста. Сайтан Евӕн загъта, уӕхе куддӕриддӕр фӕндуй, уотӕ ку цӕрайтӕ, уӕд, дан, берӕ амондгундӕр уодзиайтӕ (Райд. 3:1–6). Фал уӕд Сайтан ӕхе сагъӕс кодта. Уотӕ ’й фӕндадтӕй, цӕмӕй фиццаг дууӕ адӕймаги, уой фӕсте ба сӕ цӕуӕт дӕр, уомӕн кувтайуонцӕ, Йеговӕн нӕ, фал. Фал син цума Сайтан хуарзӕй ести искодта? Хуарзӕй сӕмӕ цидӕриддӕр адтӕй – бийнонтӕ, рӕсугъд цӕрӕн бунат, ӕнхӕст бауӕр ӕма ӕносон цард – етӕ син адтӕнцӕ Йегови лӕвар.

⁴ Гъигагӕн, Адам ӕма Евӕ Хуцауи дзурди сӕрти рахизтӕнцӕ ӕма уотемӕй сӕхе райеуварс кодтонцӕ, цард син ка равардта, уомӕй. Е сӕ хуарзӕй нецӕмӕ ӕркодта. Дидинӕг ку ’ртонай, уӕд е куд бампулуй, уотӕ Адам ӕма Евӕ дӕр сабургай зӕронд кӕнун райдӕдтонцӕ ӕма фӕстагмӕ рамардӕнцӕ. Уӕхӕн бӕллӕхи хай бакодтонцӕ сӕ цӕуӕти дӕр, удта мах дӕр (Ром. 5:12). Ӕма абони дӕр фулдӕр адӕн сӕхе куд фӕндуй, уотӕ цӕрунцӕ, Хуцау ци зӕгъуй, е ба сӕмӕ нимади дӕр нӕй (Еф. 2:1–3). Е сӕ цӕмӕ ӕркодта, уомӕй хуарз зиннуй, Йегови нихмӕ цӕун зундбӕл дзорӕг ке нӕй (Ӕмб. 21:30).

5. Йеговӕ адӕни туххӕй ци зудта ӕма цума раст разиндтӕй?

⁵ Фал ӕй Йеговӕ зудта, Хуцауи базонун ӕма ин лӕггадӕ кӕнун ке фӕнддзӕй, уӕхӕн адӕн ке уодзӕй, сӕ астӕу ба ма берӕ ӕригӕнттӕ дӕр (Пс. 103:17, 18; 110:3). Йеговӕн еци адӕн хъӕбӕр хъазар ӕнцӕ. Ду ба дӕхе еци адӕни астӕу уинис? Кӕд гъо, уӕд, ӕвӕдзи, цийнӕ кӕнис, Йеговӕй ка цӕуй ӕма дин дӕ цард амондгундӕр ка кӕнуй, еци хуарздзийнӕдтӕбӕл. (Бакӕсӕ Псалом 103:5; Ӕмб. 10:22.) Еци хуарздзийнӕдтӕмӕ хаунцӕ ӕууӕндундзийнадӕ федаргӕнӕн хуӕруйнаг, хуарз ӕмбӕлттӕ, хуарз нисӕнттӕ ӕма ӕцӕг сӕребарӕдзийнадӕ.

6. Не ’ууӕндундзийнадӕ федар кӕнун ӕма Хуцаумӕ хӕстӕг кӕнун цӕмӕн гъӕуй? Йеговӕ нин еци гъуддаги куд ӕнхус кӕнуй?

⁶ Цӕрӕгойтӕ уотӕ конд нӕ ’нцӕ, цӕмӕй Хуцауи зононцӕ ӕма имӕ хӕстӕг кӕнонцӕ. Фал мах ба уотӕ конд ан (Матф. 4:4). Хуцау нин ци зӕгъуй, уомӕ ку фегъосӕн, уӕд уотемӕй зундгиндӕр, лӕдӕргӕдӕр ӕма амондгундӕр кӕнӕн. Киристе загъта: «Амондгун ӕнцӕ, ӕнӕ Хуцауӕй цӕрӕн ке нӕййес, уой ка лӕдӕруй, етӕ» (Матф. 5:3). Йеговӕ нин равардта ӕ Дзурд Библи, удта нин «ӕууӕнкгун ӕма зундгин цагъари» фӕрци дӕттуй, не ’ууӕндундзийнадӕ нин ка федар кӕнуй ӕма Хуцаумӕ ке фӕрци хӕстӕгдӕр кӕнӕн, уӕхӕн хуӕруйнаг (Матф. 24:45). Еци хуӕруйнаг гъе уотӕ берӕ  ӕй, ӕма ин зӕгъӕн дӕр нӕййес! (Ис. 65:13, 14).

7. Хуцау нин не ’ууӕндундзийнадӕ федар кӕнунмӕ ци хуӕруйнаг дӕттуй, е нин ци пайда хӕссуй?

⁷ Ӕууӕндундзийнадӕ федаргӕнӕн хуӕруйнаг адӕймагӕн дӕттуй зунд, удта ӕ бон фӕууй раст сагъӕс кӕнун, ӕма уой фӕрци ӕхе аллихузи уавӕрти гъӕуай кӕнуй. (Бакӕсӕ Ӕмбесӕндтӕ 2:10–14.) Адӕн ци рӕдуд гъудитӕбӕл хуӕст ӕнцӕ, зӕгъӕн, Хуцау нӕййес кенӕ адӕймаги амонд ӕхцайӕй кӕнгӕ ӕй, етӕ раст ке нӕ ’нцӕ, уой лӕдӕрдзӕй. Уомӕй уӕлдай ма дӕ бон уодзӕй, зиан дин ка ӕрхӕсдзӕй, уӕхӕн фӕндтӕй ӕма миутӕй дӕхе гъӕуай кӕнун. Мадта дӕ бон цидӕриддӕр ӕй, уой кӕнӕ цӕмӕй зундгиндӕр кӕнай, удта раст сагъӕс кӕнун зонай. Гъе уӕд ӕй дӕхуӕдӕг фӕууиндзӕнӕ, Йеговӕ дӕ ке уарзуй ӕма дин ӕ зӕрдӕ, хуӕздӕр ци ӕй, уой ке зӕгъуй (Пс. 34:8; Ис. 48:17, 18).

8. Йеговӕмӕ хӕстӕг кӕнун абони цӕмӕн гъӕуй, ӕма дин е федӕни куд банхус кӕндзӕй?

⁸ Тагъд рӕстӕги Сайтани дуйней цидӕриддӕр ес, етӕ еугурӕйдӕр исӕфт ӕрцӕудзӕнцӕ. Еци рӕстӕг нӕ ӕрмӕстдӕр Йегови бон уодзӕй багъӕуай кӕнун. Ка ’й зонуй, ӕнӕ уой ӕнхусӕй нӕхецӕн хуӕруйнаг иссерун дӕр нӕ бон нӕ уодзӕй (Ав. 3:2, 12–19). Мадта нӕ уӕларвон Фидӕмӕ хӕстӕгдӕр кӕнунбӕл гъӕуама абони архайӕн ӕма ибӕл алли гъуддаги дӕр нӕ зӕрдӕ дарӕн (2 Пет. 2:9). Ӕма гъе уӕд нӕ алливарс цийфӕнди ма цӕуа, уӕддӕр нӕ бон уодзӕй Давиди хузӕн зӕгъун: «Йеговӕ алкӕддӕр ӕй мӕ цӕстити размӕ. Ӕз некӕд фӕккеудзӕн, уомӕн ӕма е ӕй мӕ рахес фарс» (Пс. 16:8).

9. а) Иоанни 6:44 куд финст ес, уомӕ гӕсгӕ Йеговӕ цӕбӕл архайуй? б) Хуӕртӕ ӕма ӕнсувӕртӕй еске хӕццӕ ку базонгӕ уӕн, уӕд уоми дессагӕй ци фӕууй?

⁹ Йеговӕн ка нӕ лӕггадӕ кӕнуй, уӕхӕн адӕймаги хӕццӕ ку базонгӕ уис, уӕд ибӕл ци фӕззонис? Ӕвӕдзи, ӕ ном ӕма е ’ндаг бакастӕй ӕндӕр неци. Хуӕртӕ ӕма ӕнсувӕртӕй еске хӕццӕ ку базонгӕ уис, уӕдта? Уӕдта ’й фӕззонис, еци адӕймаг Йегови ке уарзуй, Йеговӕ имӕ хуарзӕй цидӕр ке фӕууидта ӕма ’й ӕхемӕ ке ӕрбакодта. (Бакӕсӕ Иоанни 6:44.) Ӕма си неци уӕлдай ес, адӕймаг кӕцӕй ӕй ӕма цӕхуӕн уавӕрти исгъомбӕл ӕй. Ду уой туххӕй берӕ цидӕртӕ зонис, е ба – дӕу туххӕй.

10, 11. Йегови лӕггадгӕнгути ци еу кӕнуй, ӕма си уой туххӕй боз цӕмӕн ан?

¹⁰ Ӕвдесӕнтӕй еске хӕццӕ ку базонгӕ уис, уӕд ӕй рагацау дӕр фӕззонис, еумӕйагӕй уӕмӕ берӕ цидӕртӕ ке ес, уой. Кӕд фӕйнӕхузи ӕвзӕгтӕбӕл дзоретӕ, уӕддӕр ӕй зонис, уӕ дууӕ дӕр рӕстдзийнади «кӕдзос ӕвзагбӕл» ке дзоретӕ (Соф. 3:9). Е ба уобӕл дзорӕг ӕй, ӕма дууемӕй дӕр Йеговӕбӕл ӕууӕндетӕ, удта ин ӕ раст уагӕвӕрдтӕмӕ гӕсгӕ цӕретӕ ӕма дессаги федӕнмӕ ӕнгъӕлмӕ кӕсетӕ. Аци гъуддӕгти фӕрци уӕ бон ӕй кӕрӕдзебӕл ӕууӕндун ӕма ӕносмӕ хуарз ӕмбӕлттӕ ун.

¹¹ Мадта кӕд Йеговӕн лӕггадӕ кӕнис, уӕд федарӕй зӕгъӕн ес, ӕма дин ес тӕккӕ хуӕздӕр ӕмбӕлттӕ. Еци ӕмбӕлттӕ цӕрунцӕ ӕгас зӕнхи цъарӕбӕл, ӕма ма дӕ сӕ фулдӕри хӕццӕ базонгӕ ун гъӕуй. Хуцауи адӕнӕй уӕлдай ма уӕхӕн дессаги арфӕдзийнадӕй хайгин ка ӕй?

12. Хуцауи гъуддаги дӕ бон цӕхуӕн нисӕнттӕ ӕй ӕвӕрун?

¹² Бакӕсӕ Екклесиаст 11:9–12:1. Хуцауи гъуддаги дин нисӕнттӕ ес? Ӕвӕдзи, фӕййархайис, цӕмӕй алли бон дӕр Библи кӕсай, ӕмбурдти дзуӕппитӕ дӕттай, дӕ ихӕслӕвӕрдтӕ дзӕбӕх цӕттӕ кӕнай ӕма арӕхстгундӕрӕй игъосун кӕнай. Ӕхцӕуӕн дин нӕ фӕууй, дӕ хъиамӕттӕ ци тиллӕг хӕссунцӕ, уой дӕхуӕдӕг кенӕ иннетӕ уинун ку райдайунцӕ ӕма дӕ ку растаунцӕ, уӕд? Ӕвӕдзи, дӕ зӕрдӕ цийнӕй байдзаг уй. Цума цӕмӕн? Уомӕн ӕма ду дӕр Киристей хузӕн Хуцауи фӕндон ӕнхӕст кӕнис (Пс. 40:8; Ӕмб. 27:11).

13. Аци дуйней нисӕнттӕ ӕвӕруни бӕсти Хуцауӕн лӕггадӕ кӕнун хуӕздӕр цӕмӕн ӕй?

¹³ Де ’гас хъауритӕ дӕр Йеговӕн лӕггадӕ кӕнунмӕ ку исаразай, уӕд зӕрдӕрохс ӕма амондгун цард кӕндзӕнӕ. Апостол Павел финста: «Уотӕ федар ӕма ӕнӕфӕккеугӕ, алкӕддӕр берӕ хъиамӕт кӕнтӕ Хецауи гъуддаги, уомӕн ӕма ’й зонетӕ, Хецауӕн лӕггадӕ кӕнгӕй уӕ хъиамӕттӕ дзӕгъӕли ке нӕ ’нцӕ» (1 Кор. 15:58). Аци дуйней гъуддӕгти нисӕнттӕ ка ниввӕруй, зӕгъӕн, берӕ ӕхца бакосун кенӕ зундгонд исун, етӕ ӕцӕг амондгун некӕд фӕуунцӕ, сӕ нисӕнттӕ сӕ къохи ку бафтуйунцӕ, уӕддӕр (Лук. 9:25). Е хуарз зиннуй паддзах Соломони хабарӕй (Ром. 15:4).

14. Соломони цардӕй цӕбӕл ахур кӕнӕн?

¹⁴ Соломони гъӕздугдзийнадӕн банимайӕн дӕр н’ адтӕй, удта ӕ къохти  устур бартӕ адтӕй. Ӕма ӕхецӕн загъта: «Цӕй, бавзарон, ци ӕй цийнӕдзийнадӕ. Царди хуарздзийнӕдтӕ фӕууинон» (Еккл. 2:1–10). Гъема Соломон ӕхецӕн устур хӕдзӕрттӕ исаразта, дессаги рӕсугъд парктӕ ӕма рӕзӕдӕнттӕ искодта, ӕ зӕрдӕ цидӕриддӕр ӕрзагътайдӕ, е ин адтӕй. Цума уӕхӕн цард ке кодта, уомӕй амондгундӕр иссӕй? Соломон ӕ цардмӕ фӕстӕмӕ ку ракастӕй, уӕд загъта: «Ракастӕн, мӕ къохтӕ ци искодтонцӕ... ӕгас еци гъуддӕгтӕмӕ, ӕма балӕдӕрдтӕн: алцидӕр ӕй дзӕгъӕли... нецӕмӕй ес пайда» (Еккл. 2:11). Ду ба царди ӕхсидзгӕ унаффитӕ хӕсгӕй Соломони хабар дӕ зӕрдӕбӕл дарис?

15. Ӕууӕндундзийнадӕ цӕмӕн гъӕуй ӕма Псалом 32:8 ци финст ес, уомӕ гӕсгӕ дин куд банхус кӕндзӕй?

¹⁵ Еуӕй-еу адӕн, рӕдуд къахдзӕфтӕ ци бӕллӕхтӕмӕ ӕркӕнунцӕ, уой цалинмӕ сӕхебӕл нӕ бавзарунцӕ, уӕдмӕ нецӕбӕл фӕййахур кӕнунцӕ. Фал Йегови нӕ фӕндуй, цӕмӕй дӕубӕл дӕр уӕхӕн хабар ӕрцӕуа. Уой туххӕй ба дӕ гъӕуй федар ӕууӕндундзийнадӕ, цӕмӕй имӕ игъосай ӕма ин ӕ фӕндон ӕнхӕст кӕнай. Уӕхӕн ӕууӕндундзийнадӕн аргъ дӕр нӕййес ӕма дин дӕ царди маст некӕд ӕрхӕсдзӕй. Йеговӕ некӕд феронх кӕндзӕй, «ӕ номмӕ ци уарзондзийнадӕ бавдистай, уой» (Дзиуит. 6:10). Мадта де ’гас хъауритӕй архайа де ’ууӕндундзийнадӕ федар кӕнунбӕл, ӕма гъе уӕд дӕ царди раст унаффитӕ хӕсдзӕнӕ ӕма ’й дӕхуӕдӕг фӕууиндзӕнӕ, нӕ уӕларвон Фиди зӕрдӕ дин ӕрмӕстдӕр хуарз ке зӕгъуй, уой. (Бакӕсӕ Псалом 32:8.)

16. Нӕ сӕребарӕдзийнадӕн цӕмӕн гъӕуама аргъ кӕнӕн ӕма си раст пайда кӕнун нӕ бон куд ӕй?

¹⁶ Павел финста: «Йегови сугъдӕг хъаурӕ кӕми ес, уоми ес сӕребарӕдзийнадӕ» (2 Кор. 3:17). Йеговӕ уарзуй сӕребарӕдзийнадӕ ӕма мах дӕр уотӕ искодта. Фал ӕй уотӕ фӕндуй, цӕмӕй еци сӕребарӕдзийнадӕй раст пайда кӕнӕн, уомӕн ӕма нӕ е гъӕуай кӕнуй. Ӕвӕдзи, зонис, де ’нгӕрттӕй порнографимӕ ка фӕккӕсуй, ӕнӕгъдау цард ка кӕнуй, цардӕн тӕссаг ка ӕй, уӕхӕн спортмӕ ка цӕуй, наркотиктӕбӕл ка бадуй кенӕ ниуазгӕ ка кӕнуй, уӕхӕнтти. Ка ’й зонуй, син цубур рӕстӕгмӕ ӕцӕгӕйдӕр хуарз фӕууй, фал уой фӕсте уӕхӕн миутӕбӕл хъӕбӕр устур аргъ бафедунцӕ. Зӕгъӕн, адӕймаг си ӕхе ратонун нӕбал фӕффӕразуй, ести лӕгъуз незӕй фӕссӕйгӕ уй кенӕ сауӕнгӕ мӕлгӕ дӕр ракӕнуй (Гал. 6:7, 8). Уӕхӕн гъуддӕгтӕ кӕнгӕй ӕхе сӕребарӕ ка хонуй, е ӕхе сайуй (Тит. 3:3).

17, 18. а) Адӕймаг Хуцаумӕ ку игъоса, уӕд ӕцӕг сӕребарӕ куд уодзӕй? б) Адам ӕма Евӕн райдайӕни ци сӕребарӕдзийнадӕ адтӕй, е, абони адӕнӕн ци сӕребарӕдзийнадӕ ес, уомӕй цӕмӕй хецӕн кӕнуй?

¹⁷ Нур ба расагъӕс кӕнӕ: уӕхӕн еске зонис, Библий уагӕвӕрдтӕмӕ гӕсгӕ ка цардӕй ӕма уой туххӕй ести незӕй ка фӕссӕйгӕ ’й? Хуцаумӕ ка игъосуй, етӕ се ’нӕнездзийнадӕ дӕр багъӕуай кӕнунцӕ ӕма сӕ сӕребарӕдзийнадӕ дӕр нӕ фесафунцӕ (Пс. 19:7–11). Уомӕй уӕлдай ма дӕ сӕребарӕдзийнадӕй раст ку пайда кӕнай, гъома Хуцауи закъӕнттӕ ӕма уагӕвӕрдти сӕрти  ку нӕ хезай, уӕд Йеговӕн дӕр ӕма дӕ ниййергутӕн дӕр бавдесдзӕнӕ, ӕ къӕхдзӕфтӕбӕл сагъӕс ка кӕнуй, уӕхӕн адӕймаг ке дӕ. Дӕ ниййергутӕ ’й уиндзӕнцӕ, ӕууӕнкӕ дӕбӕл ке ес, уой ӕма дин фулдӕр сӕребарӕдзийнадӕ дӕтдзӕнцӕ. Федӕни ба Йеговӕ ӕ еузӕрдон лӕггадгӕнгутӕн балӕвар кӕндзӕй, «Хуцауи сувӕллӕнттӕн ци дессаги сӕребарӕдзийнадӕ ес, уӕхӕн сӕребарӕдзийнадӕ» (Ром. 8:21).

¹⁸ Адам ӕма Евӕн адтӕй уӕхӕн сӕребарӕдзийнадӕ. Едеми дзӕхӕрадони сӕ ӕрмӕстдӕр еунӕг гъуддагӕй бафӕдзахста – еу бӕласи рӕзӕй син хуӕрӕн н’ адтӕй (Райд. 2:9, 17). Куд дӕмӕ кӕсуй, еци фӕдзӕхст хъӕбӕр зин ӕнхӕстгӕнӕн адтӕй? Ке зӕгъун ӕй гъӕуй, нӕ! Абони адӕни берӕ фулдӕр закъӕнттӕ зонун ӕма ӕнхӕст кӕнун гъӕуй.

19. Йеговӕ ӕма нӕ Киристе сӕребарӕдзийнадӕбӕл куд ахур кӕнунцӕ?

¹⁹ Нӕуӕг закъӕнттӕ гъуди кӕнуни бӕсти нӕ Йеговӕ фӕразонӕй ахур кӕнуй уарзондзийнади закъон ӕнхӕст кӕнунбӕл. Уой фӕндуй, цӕмӕй ӕ уагӕвӕрдтӕмӕ гӕсгӕ цӕрӕн ӕма фуддзийнадӕй не ’сӕфт уинӕн (Ром. 12:9). Киристе дӕр адӕни хонхбӕл ку ахур кодта, уӕд син лӕдӕрун кодта, адӕймаги тӕрегъӕдмӕ ци ’ркӕнуй, уой (Матф. 5:27, 28). Хуцауи Паддзахади Паддзах Киристе нӕ нӕуӕг дуйней дӕр ахур кӕндзӕй, ӕма мах дӕр раст ӕма хӕран ци ӕй, уомӕ уой цӕстӕй кӕсун райдайдзиан (Дзиуит. 1:9). Уомӕй уӕлдай ма нин уодзӕй ӕнхӕст бауӕр ӕма ӕнхӕст зунд. Расагъӕс кӕнӕ, тагъд рӕстӕги тӕрегъӕд ӕма ӕ лӕгъуз фӕстеугути цагъартӕ нӕбал уодзиан. Гъе уӕд ӕй ӕнхӕстӕй балӕдӕрдзиан, Йеговӕ ке дӕттуй, еци сӕребарӕдзийнадӕ ци ӕй, уой.

20. а) Йеговӕ ӕ сӕребарӕдзийнадӕй куд пайда кӕнуй? б) Нӕ бон куд ӕй Йегови фӕнзун?

²⁰ Ке зӕгъун ӕй гъӕуй, цийфӕнди кӕнуни барӕ нин некӕд уодзӕй. Нӕ сӕребарӕдзийнадӕн алкӕддӕр уодзӕй арӕнтӕ, ӕма Хуцауи, удта иннети ку уарзӕн, уӕд нӕ некӕд ӕрфӕнддзӕй еци арӕнти сӕрти рахезун. Зӕгъӕн ес, ӕма нин Йеговӕ лигъстӕ кӕнуй, цӕмӕй е куд архайуй, мах дӕр уотӕ архайӕн. Хуцауӕн ӕнӕкӕрон сӕребарӕдзийнадӕ ес, фал ӕхецӕн ниллух кодта, адӕни ке уарздзӕй ӕма е ӕ алли гъуддагӕй дӕр бӕрӕг ке уодзӕй, уой (1 Иоан. 4:7, 8). Мадта ӕцӕг сӕребарӕ уодзӕнцӕ, ӕрмӕстдӕр Хуцауи ка фӕнзуй, еци адӕн.

21. а) Давид Йегови туххӕй ци гъуди кодта? б) Иннӕ статьяй цӕмӕ ӕркӕсдзиан?

²¹ Аргъ кӕнис, Йеговӕй ци берӕ хуарздзийнӕдтӕ цӕуй, уонӕн? Зӕгъӕн, ӕууӕндундзийнадӕ федаргӕнӕн хуӕруйнаг, ӕцӕг ӕмбӕлттӕ, хуарз нисӕнттӕ ӕма ци дессаги сӕребарӕдзийнадӕмӕ ӕнгъӕлмӕ кӕсӕн, е (Пс. 103:5). Ду дӕр, ӕвӕдзи, арази дӕ Давиди дзурдти хӕццӕ: «Ду мин байамондзӕнӕ царди над. Хуарз цӕстӕй мӕмӕ кӕсис ӕма мӕ зӕрдӕ цийнӕй ӕфсес ӕй. Адӕймаг дӕ рахес фарс ку лӕууа, уӕд е цийнӕдзийнадӕ хӕссуй ӕносмӕ» (Пс. 16:11). Иннӕ статьяй ӕркӕсдзиан, 16 псаломи ма никкидӕр ци дессаги гъудитӕ ес, уонӕмӕ. Уони фӕрци никки хуӕздӕр балӕдӕрдзӕнӕ, ӕцӕг амондгун цард цӕмӕй кӕнгӕ ’й, уой.