1, 2. Тоний хабарӕй куд зиннуй, адӕймагӕн ӕ бон раййевун ке ӕй, е?

ТОНИ ӕнӕ фидӕй гъомбӕл кодта. Хестӕр кълӕсти ку ахур кодта, уӕд ӕй фӕндадтӕй скъолайӕй рандӕ ун, уомӕн ӕма имӕ ахури сагъӕс ӕппундӕр н’ адтӕй. Ӕ уолӕфгӕ бӕнттӕ кинотӕбӕл кенӕ е ’мбӕлтти хӕццӕ рарветидӕ. Ӕной Тони фудаг биццеу н’ адтӕй ӕма наркотиктӕй дӕр ӕхе еуварс дардта, фал ин царди нецӕхӕуӕн нисӕнттӕ адтӕй, удта Хуцау ке ес, уобӕл дӕр гурусхӕ кодта. Еухатт базонгӕ ’й еу бийнонти хӕццӕ, адтӕнцӕ Йегови Ӕвдесӕнтӕ. Тони син радзурдта, цӕбӕл гурусхӕ кодта, уой, удта сӕмӕ цалдӕр фарстай равардта. Ӕвдесӕнтӕ ин равардтонцӕ дууӕ брошюри – «У истоков жизни. Пять вопросов, которые требуют ответа» ӕма «Была ли жизнь создана?».

² Еци Ӕвдесӕнтӕ нӕуӕгӕй Тонимӕ ку ӕрбацудӕнцӕ, уӕд ӕй фӕууидтонцӕ, ӕндӕрхузи сагъӕс кӕнун ке райдӕдта. Ци брошюритӕ ин ниууагътонцӕ, етӕ куд ӕнхъирдтӕ адтӕнцӕ, уомӕй дӕр бӕрӕг адтӕй, лӕмбунӕг сӕ ке ӕртаста. «Уӕлӕрвти Хуцауӕн ӕнӕуӕн нӕййес!» – загъта Тони. Уой фӕсте Библи ахур кӕнун дӕр райдӕдта  ӕма сабургай цардмӕ ӕ цӕстингас раййивта. Уомӕй уӕлдай ма скъолай дӕр дзӕбӕх ахур кӕнун райдӕдта ӕма иссӕй хуӕздӕр ахурдзаутӕй сӕ еу. Скъолай директор дӕр ма ибӕл дес кодта. Еухатт ба ин загъта: «Дӕхе дарун, удта ахур кӕнун дӕр дзӕвгарӕ хуӕздӕр райдӕдтай. Е Йегови Ӕвдесӕнти хӕццӕ ке фӕууис, уой туххӕй ӕй?» Тони ин загъта, уотӕ ке ӕй, ӕма ин радзурдта, Библийӕй ци базудта, уой. Тони скъола хуарз бӕрӕггӕнӕнти хӕццӕ фӕцӕй ӕма ӕмбурди лӕггадӕ кӕнуй пионерӕй, удта кӕстӕреуӕггӕнӕг ӕнсувӕрӕй. Нур хъӕбӕр амондгун ӕй, уомӕн ӕма ин фӕззиндтӕй уӕларвон Фидӕ, Йеговӕ (Пс. 68:5).

3. Йеговӕ ӕригӕнттӕн ци зӕгъуй?

³ Тоний хабарӕй бӕрӕг ӕй, Йеговӕ ӕригӕнттӕбӕл ке тухсуй, е. Уотӕ ’й фӕндуй, цӕмӕй амондгун ӕма цардӕй зӕрдӕрохс уонцӕ, ӕма син уомӕ гӕсгӕ зӕгъуй: «Дӕ зӕрдӕбӕл дарӕ де Сфӕлдесӕг Устур Хуцауи де ’ригон бонти» (Еккл. 12:1). Абониккон царди е уотӕ ӕнцон нӕй, фал уӕддӕр уомӕн ес гӕнӕн. Хуцауи фӕрци дӕ бон уодзӕй амондгун цард кӕнун, айдагъ ӕригон бонти нӕ, фал алкӕддӕр. Цӕмӕй уой хуӕздӕр балӕдӕрӕн, уой туххӕй ӕркӕсӕн, израилӕгтӕн Зӕрдӕвӕрд зӕнхӕ байахӕссунмӕ ци банхус кодта, удта Давид Голиафбӕл цӕй фӕрци фӕууӕлахез ӕй, уомӕ.

4, 5. Израилӕгтӕ ханаайнӕгти зӕнхитӕ куд байахӕстонцӕ ӕма Давид Голиафбӕл куд фӕууӕлахез ӕй, уомӕй цӕбӕл ахур кӕнӕн? (Кӕсӕ хузӕмӕ статьяй райдайӕни.)

⁴ Израилӕгтӕ Зӕрдӕвӕрд зӕнхи рази ку ’рлӕудтӕнцӕ, уӕд син Хуцау цӕхуӕн амундтӕ равардта? Сӕхе тохунбӕл ахур кӕнун ӕви тугъдмӕ цӕттӕ кӕнун? Нӕъ (Дук. з. 28:1, 2). Йеговӕ син загъта, цӕмӕй имӕ игъустайуонцӕ ӕма ибӕл сӕ зӕрдӕ дардтайуонцӕ (Йес. Н. 1:7–9). Адӕймаги цӕстӕй кӕсгӕй аци унаффӕ фиццаг, ӕвӕдзи, ӕнахур фӕккӕсдзӕй. Фал Хуцаумӕ ке игъустонцӕ, уой фӕрци ханаайнӕгтӕбӕл фӕууӕлахез ӕнцӕ, уой ба ма цалдӕр хатти (Йес. Н. 24:11–13). Цӕмӕй дин Хуцау ци зӕгъуй, уой ӕнхӕст кӕнай, уой туххӕй ибӕл гъӕуама федарӕй ӕууӕндай. Уой фӕрци алкӕддӕр уодзӕнцӕ ӕнтӕстгун. Уотӕ адтӕй рагидзаманти, уотӕ ӕй абони дӕр.

⁵ Голиаф хъӕбӕр хъаурӕгин ӕфсӕддон адтӕй. 3 метри бӕрзӕндӕ лӕг тохӕндзаумӕутти айдагъ ӕ бакастӕй дӕр тӕрсун кодта (1 Сам. 17:4–7). Давид ба ӕ зӕрдӕ Хуцаубӕл дардта, ӕма ’й дорӕхсӕнӕй ӕндӕр неци багъудӕй. Ӕууӕндундзийнадӕ кӕмӕн нӕ фагӕ кодта, уонӕмӕ Давид ӕнӕзунд кастӕй, фал хъӕбӕр рӕдудӕнцӕ! Ӕнӕзунд Голиаф разиндтӕй (1 Сам. 17:48–51).

6. Аци статьяй цӕбӕл радзордзиан?

⁶ Айразиккон статьяй ӕркастан, зӕрдӕрохс ӕма амондгун цард кӕнунмӕ нин ка банхус кӕндзӕй, цуппар уӕхӕн гъуддагемӕ. Е адтӕй ӕууӕндундзийнадӕ федаргӕнӕн хуӕруйнаг, Хуцауи фӕрци ке иссирдтан, уӕхӕн ӕмбӕлттӕ, хуарз нисӕнттӕ ӕма, Йегови адӕн хайгин кӕмӕй ӕнцӕ, еци сӕребарӕдзийнадӕ. Гъӕйдӕ 16 псаломи фӕрци ӕркӕсӕн, аци гъуддӕгтӕ нин никки фулдӕр пайда кӕд ӕрхӕсдзӕнцӕ, уомӕ.

7. а) Хуцаумӕ хӕстӕг кӕнун ке фӕндуй, уӕхӕн адӕймаг цӕхуӕн фӕууй? б) Давидӕн ӕ «хай» ци адтӕй, ӕма е ӕ цардбӕл куд фӕббӕрӕг ӕй?

⁷ Хуцаумӕ хӕстӕгдӕр кӕнун ке фӕндуй, уӕхӕн адӕймаг Хуцаубӕл ӕууӕндуй ӕма архайуй, цӕмӕй алцӕмӕдӕр уой цӕстӕй кӕса. Удта ма ӕ цард Йегови барӕ кӕнуй ӕма имӕ алкӕддӕр игъосуй (1 Кор. 2:12, 13). Еци гъуддаги нин хуарз цӕветтон ниууагъта Давид. Ӕ зартӕй еуеми уотӕ финст ӕй: «Царди медӕг Йеговӕ ӕй мӕ хай» (Пс. 16:5). Цума Давид уотӕ цӕмӕн загъта? Еу гъуддаг уой медӕг ӕй, ӕма ӕхе Йегови иуазӕг бакодта (Пс. 16:1). Цума ин е ци ’рхаста? «Уой туххӕй цийнӕ кӕнун»,– финста Давид. Хуцауи иуазӕг, гъома Хуцауи лимӕн ке адтӕй, уомӕй фулдӕр цийнӕдзийнадӕ ин неци хаста. (Бакӕсӕ Псалом 16:9, 11.)

8. Адӕймаг ӕцӕг амондгун уодзӕй ӕви нӕ, е цӕмӕй кӕнгӕ ’й?

⁸ Сӕ царди ӕхца ӕма ерхӕфсӕнтӕ сӕйраг кӕмӕн ӕнцӕ, етӕ Давиди хузӕн амондгун некӕд уодзӕнцӕ (1 Тим. 6:9, 10). Канадӕй еу ӕнсувӕр зӕгъуй: «Ӕцӕг амонд, цардӕй ци райсай, уомӕй кӕнгӕ нӕй, фал Сфӕлдесӕгӕн нӕ бон раттун ци ӕй, уомӕй, е ба хуарзӕй цидӕриддӕр ес, уой махӕн дӕттуй» (Иак. 1:17). Мадта Йеговӕбӕл ку ’ууӕндай ӕма ин ку лӕггадӕ кӕнай, уӕд амондгун ӕма зӕрдӕрохс цард кӕндзӕнӕ. Цума дӕ бон куд ӕй де ’ууӕндундзийнадӕ фӕффедардӕр кӕнун? Гъӕуй рӕстӕг хецӕн кӕнун, цӕмӕй Хуцауи Дзурд кӕсӕн ӕма сагъӕс кӕнӕн е сфӕлдистадӕбӕл, удта ӕ менеугутӕбӕл, зӕгъӕн, ӕ уарзондзийнадӕбӕл (Ром. 1:20; 5:8).

9. Дӕ бон куд ӕй Хуцауӕн барӕ дӕттун, цӕмӕй дӕ хуӕздӕрӕрдӕмӕ ӕййева?

⁹ Еуӕй-еухатт нӕмӕ Йеговӕ ӕ уарзондзийнадӕ бавдесуй, ку нӕ бараст кӕнуй, уӕд, уарзӕгой фидӕ ӕ бӕдоли фӕлмӕнӕй куд бараст кӕнуй, уотӕ. Давид уомӕн устур аргъ кодта, ӕма е бӕрӕг ӕй ӕ дзурдтӕй: «Ӕз арфӕ кӕндзӕн Йеговӕн, мӕнӕн унаффӕ ка дӕттуй, уомӕн. Сауӕнгӕ мин ӕхсӕвӕ дӕр мӕ арф римӕхст гъудитӕ фӕййамонунцӕ зунд» (Пс. 16:7). Давид, Хуцау куд гъуди кӕнуй, уобӕл сагъӕс кодта ӕма архайдта, цӕмӕй е дӕр уотӕ гъуди кӕнун райдӕдтайдӕ. Е Хуцауӕн барӕ лӕвардта, цӕмӕй ӕй раст кодтайдӕ ӕма си хуӕздӕр адӕймаг рауадайдӕ. Ду дӕр уотӕ ку кӕнай, уӕд Хуцауи никки хъӕбӕрдӕр уарздзӕнӕ, ӕма дӕ никки хъӕбӕрдӕр фӕнддзӕй ӕ зӕрдӕ рохс кӕнун. Уотемӕй фӕлтӕрдгун адӕймаг исуодзӕнӕ. Еу хуӕрӕ Кристинӕ зӕгъуй: «Ести фарста ку фертасун ӕма, ци бакастӕн, уобӕл ку фӕссагъӕс кӕнун, уӕд мӕмӕ уотӕ фӕккӕсуй, цума ’й Йеговӕ мӕнӕн ниффинста!»

10. Исаййи 26:3 ци финст ес, уомӕ гӕсгӕ Хуцаумӕ ку хӕстӕг кӕнай, уӕд дин е куд банхус кӕндзӕй?

¹⁰ Хуцаумӕ ку хӕстӕг кӕнай, уӕд аци дуйнемӕ уой цӕстӕй кӕсдзӕнӕ ӕма ’й зондзӕнӕ, ци имӕ ӕнгъӕлмӕ кӕсуй, уой. Цума дин Йеговӕ уӕхӕн хабӕрттӕ цӕмӕн ӕргом кӕнуй? Уомӕн ӕма ’й фӕндуй, цӕмӕй, царди сӕйрагдӕр ци ӕй, уой лӕдӕрай, раст унаффитӕ хӕссай ӕма федӕнӕй ма тӕрсай. (Бакӕсӕ Исаййи 26:3.) Еугонд Штатти ка цӕруй, еци ӕнсувӕр Джошуа куд зӕгъуй, уомӕ гӕсгӕ Йеговӕмӕ ку хӕстӕг кӕнай, уӕд дӕ бон уодзӕй, ӕхсидзгӕ ци ӕй ӕма ци нӕй, уой ӕртасун.

11. Давид ӕхецӕн цӕхуӕн ӕмбӕлттӕ ӕвзурста?

¹¹ Бакӕсӕ Псалом 16:3. Давид ӕй зудта, хуарз ӕмбал ин ка уодзӕй, уой. Е сӕ ӕвзурста, Йегови ка уарзта, уони астӕу, ӕма ин е устур цийнӕ хаста. Давид сӕ худта сугъдӕгутӕ, уомӕн ӕма Йегови кӕдзос уагӕвӕрдтӕмӕ гӕсгӕ цардӕнцӕ. Хуарз ӕмбӕлттӕ иссерун куд ӕнгъезуй, уой туххӕй ӕндӕр псаломзаргӕнӕг дӕр финста: «Ӕз дӕн, ка ди тӕрсуй ӕма дин дӕ бардзурдтӕ ка ӕнхӕст кӕнуй, уони ӕмбал» (Пс. 119:63). Айразиккон статьяй куд базудтан, уомӕ гӕсгӕ дӕ бон ӕй хуарз ӕмбӕлттӕ иссерун, Йегови ка уарзуй ӕма имӕ ка игъосуй, уони астӕу. Гӕнӕн ес, ӕма де ’нгӕрттӕ дӕр ма уонцӕ.

12. Давид ӕма Ионафан хуарз ӕмбӕлттӕ цӕй фӕрци адтӕнцӕ?

¹² Давид айдагъ е ’нгӕртти хӕццӕ нӕ лимӕн кодта. Ӕ хуӕздӕр ӕмбӕлттӕй сӕ еу ка адтӕй, уой гъуди кӕнис? Ионафан. Айӕ ӕй, Библий ӕцӕг ӕмбӕлтти туххӕй ци хуарз цӕветтонтӕ ес, уонӕй сӕ еу. Фал Ионафан Давидӕй 30 анзи хестӕр ке адтӕй, уой зудтай? Цума уӕхӕн хуарз ӕмбӕлттӕ цӕй фӕрци иссӕнцӕ? Сӕ дууӕ дӕр Хуцаубӕл ке ӕууӕндтӕнцӕ, удта кӕрӕдзей ке нимадтонцӕ, уой фӕрци. Уомӕй уӕлдай ма кӕрӕдзей хуарз менеугутӕн аргъ кодтонцӕ, зӕгъӕн, сӕ дууӕ дӕр Хуцауи знӕгти нихмӕ нифсгунӕй тухтонцӕ (1 Сам. 13:3; 14:13; 17:48–50; 18:1).

13. Дӕ бон куд ӕй никки фулдӕр ӕмбӕлттӕ иссерун? Ӕрхӕссӕ цӕветтон.

¹³ Давид ӕма Ионафани хузӕн, мах бон дӕр ӕй цийнӕ кӕнун, Йегови ка уарзуй ӕма ибӕл федарӕй ка ӕууӕндуй, уони хӕццӕ лимӕн кӕнгӕй. Кирӕ Хуцауӕн берӕ ӕнзти лӕггадӕ кӕнуй ӕма зӕгъуй: «Хъӕбӕр берӕ ӕмбӕлттӕ мин ес ӕгас зӕнхӕбӕл дӕр. Еци хуӕртӕ ӕма ӕнсувӕртӕ аллихузи адӕнихӕттитӕй ӕнцӕ». Ду дӕр аллихузи хуӕртӕ ӕма ӕнсувӕрти хӕццӕ ку лимӕн кӕнай, уӕд ӕй дӕхе цӕститӕй уиндзӕнӕ,  Хуцау ӕ Дзурд ӕма ӕ сугъдӕг хъаури фӕрци ӕ адӕни еу бийнонти хузӕн куд еу кӕнуй, уой.

14. а) Хуарз нисӕнттӕ ӕвӕрунмӕ дин ци банхус кӕндзӕй? б) Еуӕй-еу ӕригӕнттӕ сӕ нисӕнтти туххӕй ци зӕгъунцӕ?

¹⁴ Бакӕсӕ Псалом 16:8. Давидӕн ӕ царди Хуцауӕн лӕггадӕ кӕнунӕй уӕлдӕр неци адтӕй. Дӕуӕн дӕр фиццаг бунати Хуцауӕн лӕггадӕ кӕнун ку уа ӕма дӕ рази хуарз нисӕнттӕ ку ӕвӕрай, уӕд дӕ цардӕй ӕцӕгӕйдӕр зӕрдӕрохс уодзӕнӕ. Еу ӕнсувӕр Стивен зӕгъуй: «Мӕ рази ци нисан исӕвӕрун, уомӕ ку фӕттундзун, ӕма мӕ къохи ку бафтуйуй, уӕд мӕ цийнӕн кӕрон дӕр нӕ фӕууй». Германийӕй еу ӕригон ӕнсувӕр нур ӕндӕр бӕсти лӕггадӕ кӕнуй ӕма е дӕр загъта: «Ку базӕронд уон ӕма мӕ цардмӕ фӕстӕмӕ ку ракӕсон, уӕд мӕ нӕ фӕндадтайдӕ, айдагъ мӕхецӕн ке цардтӕн, уой фӕууинун». Арази дӕ аци ӕнсувӕри хӕццӕ? Кӕд гъо, уӕд дӕ бон цидӕриддӕр ӕй, уой кӕнӕ ӕма хуӕздӕр цӕмӕ арӕхсис, уомӕй дӕр пайда кӕнӕ, цӕмӕй Хуцауӕн кадӕ хӕссай ӕма иннӕ адӕнӕн ӕнхус кӕнай (Гал. 6:10). Йегови гъуддӕгти нисӕнттӕ ӕвӕрӕ ӕма имӕ ковӕ, цӕмӕй еци нисӕнттӕ дӕ къохи бафтуйонцӕ. Ӕма ибӕл ӕппундӕр ма дузӕрдуг кӕнӕ, еци кувдтитӕ ӕнӕ дзуаппӕй ке нӕ байзайдзӕнцӕ! (1 Иоан. 3:22; 5:14, 15).

15. Цӕхуӕн нисӕнттӕ дӕ бон ӕй дӕхецӕн исӕвӕрун? (Кӕсӕ рамкӕ « Цӕхуӕн нисӕнттӕ дӕ бон ӕй дӕ рази исӕвӕрун».)

¹⁵ Цӕхуӕн нисӕнттӕ дӕ бон ӕй дӕ рази исӕвӕрун? Зӕгъӕн, ӕмбурдти дзуӕппитӕ дӕхе дзурдтӕй дӕттун, пионерӕй лӕггадӕ кӕнун, Вефили лӕггадӕ кӕнун кенӕ ӕндӕр ӕвзаг исахур кӕнун ӕма еци ӕвзагбӕл ка дзоруй, уонӕн игъосун кӕнун. Ӕнхӕстрӕстӕг ка лӕггадӕ кӕнуй, еу уӕхӕн ӕнсувӕр Барак зӕгъуй: «Де ’гас хъауритӕ дӕр Йеговӕн ке дӕттис, еци гъудий хӕццӕ игъал кӕнунӕй хуӕздӕр неци ес!»

16. Давид Хуцауи раст уагӕвӕрдтӕмӕ цӕхуӕн цӕстӕй кастӕй ӕма цӕмӕн?

¹⁶ Бакӕсӕ Псалом 16:2, 4. Ай размӕ, еци статьяй куд базудтан, уомӕ гӕсгӕ ӕцӕгӕй сӕребарӕ уодзиан, Хуцауи закъӕнттӕ ӕма уагӕвӕрдтӕмӕ гӕсгӕ ку цӕрӕн, уӕд. Уони фӕрци хуарздзийнадӕ уарзӕн, фуддзийнадӕй ба не ’сӕфт уинӕн (Амос 5:15). Давид ӕй зудта, Йеговӕмӕ фау ӕрхӕссӕн ке нецӕмӕй ес, удта хӕларзӕрдӕ ке ӕй, ӕма е бӕрӕг ӕй е ’гас гъуддӕгтӕй дӕр. Хуарзӕй цидӕриддӕр ес, етӕ Хуцауӕй ӕнцӕ. Давиди фӕндадтӕй Йегови фӕнзун, удта е ци уарзуй, уой уарзун ӕма уобӕл е ’гас хъауритӕй архайдта. Уомӕй уӕлдай ма архайдта, цӕмӕй е ’сӕфт уидтайдӕ, Йеговӕ е ’сӕфт цӕмӕй уинуй, уомӕй. Зӕгъӕн, мӕнгӕ хуцӕуттӕн ковунӕй. Мӕнгӕ хуцӕуттӕн ка ковуй, уӕхӕн адӕймаг ӕхе ӕгадӕ кӕнуй, Хуцауӕн ка ӕмбӕлуй, еци кадӕ ба ӕндӕр ескӕмӕн кенӕ ӕндӕр естӕмӕн фӕккӕнуй (Ис. 2:8, 9; Рарг. 4:11).

17, 18. а) Мӕнгӕ хуцӕуттӕн ковун цӕмӕ ӕркӕнуй, уой туххӕй Давид ци загъта? б) Адӕнӕн сӕ мӕститӕ цӕй туххӕй фулдӕр кӕнунцӕ?

¹⁷ Рагидзаманти ӕнӕгъдаудзийнадӕ хаудтӕй мӕнгӕ дини ӕгъдӕуттӕмӕ дӕр (Оси 4:13, 14). Ӕма е берети зӕрдӕмӕ  цудӕй, уомӕн ӕма сӕ бон адтӕй се ’нӕгъдау фӕндтӕ ӕнхӕст кӕнун. Фал цума уомӕй амондгундӕр адтӕнцӕ? Нӕъ. Давид загъта, «ӕндӕр хуцауи фӕдбӕл ка раледзуй, уонӕн сӕ мӕститӕ фулдӕр кӕнунцӕ», зӕгъгӕ. Еци адӕн ма сӕ сувӕллӕнтти дӕр мӕнгӕ хуцӕуттӕн нивонди ӕрхӕссиуонцӕ! (Ис. 57:5). Уӕхӕн ӕнӕхатир миутӕй Йеговӕ е ’сӕфт уидта (Йер. 7:31). Еци рӕстӕги ку цардайсӕ, уӕд, ӕвӕдзи, загътайсӕ: «Хуарз ӕма мӕ ниййергутӕ Йеговӕн лӕггадӕ кӕнунцӕ!»

¹⁸ Абони мӕнгӕ динтӕ ӕнӕгъдау миутӕмӕ цийфӕнди цӕстӕй кӕсунцӕ, сауӕнгӕ ма дууӕ нӕлгоймаги кенӕ дууӕ силгоймаги цард байеу кӕнунбӕл дӕр арази фӕуунцӕ. Фал уӕхӕн сӕребарӕдзийнадӕмӕ ка тундзуй, «уонӕн сӕ мӕститӕ фулдӕр кӕнунцӕ» (1 Кор. 6:18, 19). Ӕма уой дӕхуӕдӕг дӕр, ӕвӕдзи, уинис. Мадта, ӕригӕнттӕ, уӕ уӕларвон Фидӕмӕ игъосетӕ, е уӕхе пайдайӕн ӕй. Сагъӕс кӕнтӕ, тӕрегъӕд цӕмӕти ӕркӕнуй, уобӕл. Тӕрегъӕд нӕмӕ цийфӕнди хуарз ма фӕккӕса, уӕддӕр еу афони ба нӕ фӕрстӕй фӕуудзӕй (Гал. 6:8). Уӕлдӕр ке кой кодтан, еци Джошуа ма загъта: «Нӕ бон ӕй нӕ сӕребарӕдзийнадӕй нӕхе куд фӕндуй, уотӕ пайда кӕнун, фал уомӕй амондгундӕр нӕ уодзиан».

19, 20. Йеговӕбӕл ка ӕууӕндуй ӕма имӕ ка игъосуй, еци ӕригӕнттӕмӕ цӕхуӕн ӕрфӕдзийнӕдтӕ ӕнгъӕлмӕ кӕсуй?

¹⁹ Йесо ӕ фӕдбӕлдзӕугутӕн загъта: «Кӕд мӕ дзурдмӕ гӕсгӕ цӕрайтӕ, уӕд ӕцӕгӕйдӕр мӕ ахуркӕнуйнӕгтӕ уодзиайтӕ, ӕма базондзиайтӕ рӕстдзийнадӕ, ӕма уӕ рӕстдзийнадӕ иссӕребарӕ кӕндзӕй» (Иоан. 8:31, 32). Йегови фӕрци мӕнгӕ динӕй, ӕнӕзунд миутӕй ӕма мӕнгӕ ӕгъдӕуттӕй исуӕгъдӕ ан. Федӕни ба нин ратдзӕй «Хуцауи сувӕллӕнттӕн ци дессаги сӕребарӕдзийнадӕ ес, уӕхӕн сӕребарӕдзийнадӕ» (Ром. 8:21). Еци сӕребарӕдзийнадӕй абони дӕр хайгин уодзиан, Киристе нӕ куд ахур кӕнуй, уотӕ ку кӕнӕн, уӕд. Гъе уӕд рӕстдзийнадӕ айдагъ зонгӕ нӕ кӕндзиан, фал ма цӕргӕ дӕр уомӕ гӕсгӕ кӕндзиан.

²⁰ Ӕригӕнттӕ, Йеговӕ уин ци сӕребарӕдзийнадӕ балӕвар кодта, уомӕн аргъ кӕнтӕ. Раст си пайда кӕнтӕ. Уотемӕй уӕ бон уодзӕй, амондгун федӕнмӕ уӕ ка ӕркӕндзӕй, уӕхӕн унаффитӕ хӕссун. Еу ӕригон ӕнсувӕр загъта: «Ӕригонӕй дӕ сӕребарӕдзийнадӕй раст ку пайда кӕнай, уӕд дин уой фӕсте ӕхсидзгӕ унаффитӕ хӕссун ӕнцондӕр уодзӕй, зӕгъӕн, цӕхуӕн кустмӕ рацӕуай кенӕ бийнонтӕ искӕнай ӕви бал бангъӕлмӕ кӕсай».

21. Ӕцӕг цардӕй цӕй фӕрци исхайгин уодзӕнӕ?

²¹ Аци царди ’й еунӕг адӕймаг дӕр нӕ зонуй, исонбон имӕ ци ӕнгъӕлмӕ кӕсуй, уой, цийфӕнди ӕнтӕстгун ма уа, уӕддӕр. Уой хӕццӕ ба ма цард дӕр хъӕбӕр цубур ӕй (Иак. 4:13, 14). Мадта «ӕцӕг царди» надбӕл ка цӕуй, еци адӕймаг зундӕй архайуй, уомӕн ӕма еци над кӕнуй ӕносон цардмӕ Хуцауи нӕуӕг дуйней (1 Тим. 6:19). Ке зӕгъун ӕй, гъӕуй, Йеговӕ нӕ еци надбӕл тухӕй нӕ цӕун кӕнуй. Еци унаффӕ нӕхуӕдтӕ рахастан. Мадта Йеговӕ уӕд дӕ «хай». Аргъ кӕнӕ ци хуарздзийнӕдтӕ дин искодта, уонӕн (Пс. 103:5). Йегови фӕрци ӕности дӕргъи амондгун цард ке кӕндзӕнӕ, уобӕл федарӕй ӕууӕндӕ! (Пс. 16:11).