1, 2. Йеговӕмӕ куд хӕстӕгдӕр кодтан, уотӕ хуӕздӕр лӕдӕрун ци райдӕдтан? Ӕрхӕссӕ цӕветтон.

ЗӔГЪӔН, кадӕр минкъий биццеуӕн цидӕр балӕвар кодта, ӕма ниййергутӕ сувӕллонӕн зӕгъунцӕ, цӕмӕй ин райарфӕ кӕна. Ӕма е дӕр бакодта, ӕ ниййергутӕ ин куд загътонцӕ, уотӕ. Фал ку фӕуустурдӕр ӕй, уӕдта ’й ӕхуӕдӕг лӕдӕрун райдӕдта, ӕ ниййергутӕ ’й уотӕ цӕмӕн ахур кодтонцӕ ӕма иннетӕн сӕ хуарздзийнади туххӕй арфӕ кӕнун цӕмӕн гъӕуй, уой. Ӕма нур иссӕй боззӕрдӕ адӕймаг, уомӕн ӕма еци менеуӕг ӕ зӕрди ниффедар ӕй.

² Махӕн дӕр нӕ гъуддаг уотӕ ’й. Рӕстдзийнадӕ ку базудтан, уӕд ӕй балӕдӕрдтан, Йегови сӕйраг фӕдзӕхститӕ ӕнхӕст кӕнун куд ӕхсидзгӕ ’й, уой. Уой фӕсте Йеговӕмӕ куд хӕстӕгдӕр кодтан, уотӕ ’й хуӕздӕр лӕдӕрун райдӕдтан, куд сагъӕс кӕнуй ӕма аллихузи гъуддӕгтӕмӕ цӕхуӕн цӕстӕй кӕсуй, уой. Йегови зӕрдӕмӕ ка цӕуй, уӕхӕн гъуддӕгтӕ ку кӕнӕн ӕма уӕхӕн унаффитӕ ку хӕссӕн, уӕд уомӕй ӕвдесдзиан, е куд сагъӕс кӕнуй мах дӕр уотӕ ке сагъӕс кӕнӕн.

3. Еуӕй-еухатт гъуддагмӕ Йегови цӕстӕй кӕсун зин цӕмӕн фӕууй?

 ³ Йегови хузӕн ке сагъӕс кӕнӕн, е нин хуарздзийнадӕй ӕндӕр неци хӕссуй, фал хатгай гъуддагмӕ Йегови цӕстӕй кӕсун ӕнцон нӕ фӕууй, уомӕн ӕма ӕнӕнхӕст ан. Зӕгъӕн, мах ӕй зонӕн, Йеговӕ хӕтундзийнадӕмӕ, ӕхца уарзунмӕ, игъосун кӕнуни гъуддагмӕ, тог уадзунмӕ ӕма ӕндӕр уӕхӕн гъуддӕгтӕмӕ ци цӕстӕй кӕсуй, уой, фал нин, ка ’й зонуй, зин балӕдӕрӕн фӕууй, уӕхӕн цӕстӕй сӕмӕ цӕмӕн кӕсуй, уой. Ци нин банхус кӕндзӕй, цӕмӕй Йегови хузӕн сагъӕс кӕнӕн? Удта Йегови хузӕн ку сагъӕс кӕнӕн, уӕд нин е куд банхус кӕндзӕй абони дӕр ӕма федӕни дӕр зундгин унаффитӕ хӕссунмӕ?

4. Павели дзурдтӕ, «уӕ зунд нӕуӕг кӕнтӕ», зӕгъгӕ, куд лӕдӕргӕ ’нцӕ?

⁴ Бакӕсӕ Ромӕгтӕмӕ 12:2. Аци стихи апостол Павел лӕдӕрун кӕнуй, нӕ бон ци ӕй кӕнун, цӕмӕй алли гъуддагмӕ дӕр Йегови цӕстӕй кӕсӕн. Гъӕуама «аци дуйне мабал фӕнзӕн». Ай размӕ, еци статьяй куд базудтан, уомӕ гӕсгӕ е нисан кӕнуй, нӕ зунд аци дуйней гъудитӕй гъӕуай кӕнун. Фал ма Павел уотӕ дӕр загъта, «уӕ зунд нӕуӕг кӕнтӕ», зӕгъгӕ. Гъома гъӕуама Библи ӕртасӕн, Хуцауи гъудитӕ балӕдӕрунбӕл архайӕн, сагъӕс сӕбӕл кӕнӕн ӕма архайӕн алцӕмӕдӕр уой цӕстӕй кӕсун.

5. Ӕртасунмӕ ци хауй?

⁵ Ӕртасунмӕ айдагъ кӕсун кенӕ дзуӕппитӕ баханхӕ кӕнун нӕ хауй. Ӕртасгӕ ку фӕккӕнӕн, уӕд фӕссагъӕс кӕнӕн, Йегови туххӕй си ци базудтан, уобӕл, зӕгъӕн, цӕхуӕндӕр гъуддӕгтӕмӕ ци цӕстӕй кӕсуй ӕма куд сагъӕс кӕнуй, уой. Уомӕй уӕлдай ма фӕййархайӕн, цӕмӕй ӕй балӕдӕрӕн, Йеговӕ нин цидӕр цӕмӕн кӕнун кӕнуй, цӕмӕйдӕр ба нӕ цӕмӕн фӕдзӕхсуй, уой. Удта ма фӕссагъӕс кӕнӕн, нӕ гъудити ӕма нӕ гъуддӕгти раййевун нӕ ци гъӕуй, уобӕл дӕр. Ке зӕгъун ӕй гъӕуй, алли хатт нин алцӕбӕл расагъӕс кӕнун нӕ уайдзӕй. Фал нӕ бон ӕй, ӕртасунмӕ ци рӕстӕг рахецӕн кодтан, уомӕн е ’мбеси бӕрцӕ, расагъӕс кӕнунмӕ рахецӕн кӕнун (Пс. 119:97; 1 Тим. 4:15).

6. Хуцауи Дзурдбӕл ку фӕссагъӕс кӕнӕн, уӕд нин е ци пайда ӕрхӕссуй?

⁶ Хуцауи Дзурдбӕл ку фӕссагъӕс кӕнӕн, уӕд е ӕркӕнуй еу хуарз гъуддагмӕ. Фиццагидӕр ӕй нӕхецӕн балӕдӕрӕн, Йегови цӕстингасмӕ фау ӕрхӕссӕн ке нӕййес. Мах алцӕмӕдӕр Йегови цӕстӕй кӕсун райдайӕн ӕма ’й балӕдӕрӕн, уотӕ раст ке ӕй. Уотемӕй нӕ зунд нӕуӕг кӕнун райдайуй, ӕма ӕндӕрхузи сагъӕс кӕнун райдайӕн – Йеговӕ куд сагъӕс кӕнуй, уотӕ.

7, 8. а) Йеговӕ гъӕздугдзийнадӕмӕ цӕхуӕн цӕстӕй кӕсуй? (Кӕсӕ хузӕмӕ статьяй райдайӕни.) б) Мах дӕр гъӕздугдзийнадӕмӕ Йегови цӕстӕй ку кӕсӕн, уӕд нин алцӕмӕйдӕр ӕхсидзгӕдӕр ци уодзӕй?

⁷ Цӕбӕл фӕссагъӕс кӕнӕн, е нӕ гъуддӕгтӕбӕл дӕр рабӕрӕг уй (Мар. 7:21–23; Иак. 2:17). Цӕмӕй уой хуӕздӕр балӕдӕрӕн, уой туххӕй ӕркӕсӕн цалдӕр хабаремӕ. Фиццаг ӕй Киристей  райгурци хабар. Йесо кӕми райгурдӕй, уомӕй хуарз зиннуй, Йеговӕ гъӕздугдзийнадӕмӕ цӕхуӕн цӕстӕй кӕсуй, е. Иосиф ӕма Марийӕ хумӕтӕг цард кодтонцӕ, фал уӕддӕр Йеговӕ ӕ Фурти исгъомбӕл кӕнунмӕ уони равзурста (Лев. 12:8; Лук. 2:24). Йесо ку райгурдӕй, уӕд ӕй Марийӕ ниввардта «кӕвдӕси, уомӕн ӕма, ӕхсӕвӕ кӕми ӕрлӕудтайуонцӕ, уӕхӕн бунат не ’ссирдтонцӕ» (Лук. 2:7). Йегови ку бафӕндадтайдӕ, уӕд Йесо хуӕздӕр уавӕрти райгурдайдӕ. Фал Йеговӕ фиццагидӕр кастӕй, ӕ Фурти ин ка гъомбӕл кодтайдӕ, уонӕн Хуцауӕн лӕггадӕ кӕнун цӕхуӕн бунати адтӕй, уомӕ.

⁸ Мадта Йесо цӕхуӕн уавӕрти райгурдӕй, уомӕй хуарз зиннуй, Йеговӕ гъӕздугдзийнадӕмӕ цӕхуӕн цӕстӕй кӕсуй, е. Еуӕй-еу ниййергути фӕффӕндуй, цӕмӕй сӕ сувӕллӕнттӕн хуӕздӕрӕй ци ес, е уа, кӕд уой туххӕй Йеговӕй раидард уодзӕнцӕ, уӕддӕр. Фал бӕрӕг ӕй, Йеговӕн алцӕмӕй ӕхсидзгӕдӕр ӕй, ӕ хӕццӕ син ци лимӕндзийнадӕ ес, е. Ду дӕр еци гъуддагмӕ Йегови цӕстӕй кӕсис? Дӕ гъуддӕгтӕ цӕбӕл дзорӕг ӕнцӕ? (Бакӕсӕ Дзиуиттӕгтӕмӕ 13:5.)

9, 10. Нӕ бон куд ӕй бавдесун, мах дӕр Йегови цӕстӕй ке кӕсӕн, къахкъуӕрӕн ка исуй, уӕхӕн гъуддӕгтӕмӕ?

⁹ Дуккаг гъуддаг ба ӕвдесуй, иннетӕн къахкъуӕрӕн ка исуй, уонӕмӕ Йеговӕ цӕхуӕн цӕстӕй кӕсуй, уой. Йесо загъта: «Фал, мӕнбӕл ка ӕууӕндуй, еци минкъийтӕй еуей дӕр ка фӕррӕдуйун кӕна, уомӕн ба хуӕздӕр уайдӕ, ӕ хъурбӕл ин куройни дор ку бакӕниуонцӕ ӕма ’й денгизи ку ниггӕлдзиуонцӕ» (Мар. 9:42). Аци дзурдтӕй бӕрӕг ӕй, Киристе уӕхӕн адӕнмӕ цӕхуӕн цӕстӕй кӕсуй, е. Алцӕмӕйдӕр ӕ Фиди хузӕн ке ӕй, уомӕ гӕсгӕ ба федарӕй зӕгъӕн ес, ӕма Йеговӕ дӕр уӕхӕн цӕстӕй кӕсуй, Киристей фӕдбӕлдзӕугутӕн къахкъуӕрӕн ка исуй, уонӕмӕ (Иоан. 14:9).

¹⁰ Ду дӕр еци гъуддагмӕ Йеговӕ ӕма Киристей хузӕн кӕсис? Дӕ гъуддӕгтӕ ба цӕбӕл дзорӕг ӕнцӕ? Зӕгъӕн, дӕ зӕрдӕмӕ цӕхуӕндӕр хъӕппӕликонд цӕуй. Фал ӕй ку зонай, ӕма ӕмбурди е кӕмӕндӕр къахкъуӕрӕн исуодзӕй кенӕ имӕ ӕнӕгъдау гъудитӕ фӕззиндзӕй, уӕд куд бакӕндзӕнӕ? Дӕ уарзондзийнадӕ дӕ баразӕнгард кӕндзӕй, хуӕртӕ ӕма ӕнсувӕрти сагъӕс бакӕнунмӕ? (1 Тим. 2:9, 10).

11, 12. Цъумурдзийнадӕмӕ Йегови цӕстӕй ку кӕсӕн ӕма хебӕл хуӕцун ку зонӕн, уӕд нӕ е тӕрегъӕдӕй куд багъӕуай кӕндзӕй?

¹¹ Ӕртиккаг гъуддаг ба ӕй, Йеговӕ фуддзийнадӕй е ’сӕфт ке уинуй, е (Ис. 61:8). Ке зӕгъун ӕй гъӕуй, Йеговӕ ’й зонуй, еуӕй-еухатт нин зин ке фӕууй, раст куд ӕй, уотӕ бакӕнун, уомӕн ӕма ӕнӕнхӕст ан. Фал ӕй уӕддӕр фӕндуй, цӕмӕй мах дӕр уой хузӕн фуддзийнадӕй не ’сӕфт уинӕн. (Бакӕсӕ Псалом 97:10.) Еци гъуддӕгтӕй Йеговӕ е ’сӕфт цӕмӕн уинуй, уобӕл ку сагъӕс кӕнӕн, уӕд сӕмӕ мах дӕр уой цӕстӕй кӕсун райдайдзиан, ӕма нин е хъауритӕ дӕтдзӕй, цӕмӕй си нӕхе гъӕуай кӕнӕн.

¹² Йегови хузӕн сагъӕс кӕнун ку исахур уӕн, уӕд ӕй лӕдӕрдзиан, цӕхуӕндӕр гъуддӕгтӕ лӕгъуз ке ’нцӕ, кӕд уони туххӕй Библий комкоммӕ неци финст ес, уӕддӕр. Зӕгъӕн, нӕ рӕстӕги хъӕбӕр парахат иссӕй, уӕргутӕбӕл  кафт ке хонунцӕ, уӕхӕн ӕнӕгъдау кафт. Кедӕрти гъудимӕ гӕсгӕ уӕхӕн кафт тӕрегъӕдбӕл нимад нӕй, уомӕн ӕма си хӕтгӕ нӕ фӕккӕнунцӕ *. Фал цума Йеговӕ ба ци гъуди кӕнуй? Йеговӕ аллихузи цъумурдзийнадӕй дӕр е ’сӕфт уинуй. Гъӕйдӕ мадта уӕхӕн гъуддӕгтӕй нӕхе хезӕн, хебӕл хуӕцун зонӕн ӕма, Хуцау е ’сӕфт цӕмӕйдӕриддӕр уинуй, уомӕй мах дӕр не ’сӕфт уинӕн (Ром. 12:9).

13. Цӕмӕй зундгин унаффӕ рахӕссӕн, уой туххӕй, Йеговӕ куд гъуди кӕнуй, уобӕл рагацау расагъӕс кӕнун цӕмӕн гъӕуй?

¹³ Библи ӕртасгӕй нӕ бон ӕй сагъӕс кӕнун, цӕхуӕндӕр уавӕри ку бахауӕн, уӕд куд кӕндзиан, уобӕл ӕма Йеговӕ уомӕ цӕхуӕн цӕстӕй ракӕсдзӕй, уобӕл дӕр. Уотемӕй дӕ унаффӕ уайтагъд рахӕссун ку багъӕуа, уӕд уодзӕнӕ цӕттӕ (Ӕмб. 22:3). Ӕркӕсӕн цалдӕр цӕветтонмӕ Библийӕй.

14. Иосиф Потифари уосӕн ци загъта, уомӕй ци ес базонӕн?

¹⁴ Потифари уосӕ Иосифи ӕрсайунмӕ ку гъавта, уӕд ин Иосиф не ’сарази ӕй. Ӕвӕдзи, раздӕр дӕр сагъӕс кӕнидӕ, Йеговӕ лӕг ӕма уоси цардмӕ цӕхуӕн цӕстӕй кӕсуй, уобӕл. (Бакӕсӕ Райдайӕн 39:8, 9.) Иосиф Потифари уосӕн загъта: «Куд гъӕуама бакӕнон уӕхӕн фуддзийнадӕ ӕма Хуцауи рази тӕрегъӕд куд гъӕуама искӕнон?» Бӕрӕг ӕй, Иосиф дӕр Хуцауи хузӕн ке сагъӕс кодта. Дӕуӕй ба ци ес зӕгъӕн? Зӕгъӕн, кусти кадӕр дӕ хӕццӕ гъазӕн дзубандитӕ кӕнуй. Кенӕ ба дин дӕ телефонмӕ кадӕр ӕнӕгъдау финститӕ кенӕ хузтӕ ӕрветуй *. Рагацау ку расагъӕс кӕнай, уӕхӕн уавӕрмӕ Йеговӕ ци цӕстӕй кӕсуй, уобӕл ӕма е раст цӕмӕн ӕй, уой ку балӕдӕрай, уӕд дин дзӕвгарӕ ӕнцондӕр уодзӕй дӕхе раст бадарун.

15. Махӕн дӕр Седрах, Мисах ӕма Авденагой хузӕн ци банхус кӕндзӕй Йеговӕбӕл еузӕрдонӕй байзайун?

¹⁵ Нур ба ӕркӕсӕн ӕртӕ дзиуиттаг биццеуи Седрах, Мисах ӕма Авденагой хабармӕ. Паддзах Навуходоносор бардзурд ку равардта, цӕмӕй алкедӕр сугъзӕрийнӕ гумерийӕн бакова, уӕд аци ӕртӕ биццеуи ба лӕугӕ байзадӕнцӕ. Паддзахӕн ци дзуапп равардтонцӕ, уомӕй бӕрӕг ӕй, рагацау ке расагъӕс кодтонцӕ, ести уӕд Йеговӕбӕл еузӕрдонӕй куд байзайдзӕнцӕ, уобӕл (Рац. 20:4, 5; Дан. 3:4–6, 12, 16–18). Абони махӕй ба ци ес зӕгъӕн? Зӕгъӕн, де ’мкосгутӕ сӕхе цӕттӕ кӕнунцӕ, мӕнгӕ дини хӕццӕ баст бӕрӕгбонмӕ, ӕма дин дӕ хецау зӕгъуй, цӕмӕй ду дӕр ӕхца раттай. Куд бакӕндзӕнӕ? Уӕхӕн уавӕрбӕл кӕд исӕмбӕлдзӕнӕ, уомӕ  ӕнгъӕлмӕ кӕсуни бӕсти хуӕздӕр адтайдӕ рагацау расагъӕс кӕнун, Йеговӕ уой туххӕй ци гъуди кӕнуй, уобӕл. Уотемӕй дин ӕнцондӕр уодзӕй еци ӕртӕ дзиуиттаг биццеуи хузӕн дӕ гъуди балӕдӕрун кӕнун ӕма раст куд ӕй, уотӕ бакӕнун.

16. Цалинмӕ нӕ дохтирти ӕнхус нӕ багъудӕй, уӕдмӕти Йегови цӕстингас балӕдӕрун ӕхсидзгӕ цӕмӕн ӕй?

¹⁶ Гъӕуй ма рагацау расагъӕс кӕнун, ӕвваст дӕ дохтирти ӕнхус ку багъӕуа, уӕд дин Йеговӕбӕл еузӕрдонӕй байзайунмӕ ци банхус кӕндзӕй, уобӕл. Ке зӕгъун ӕй гъӕуй, мах нӕхемӕ нӕдӕр тог уадзӕн, нӕдӕр ӕ цуппар сӕйраг хаййи. Фал ма ес, тоги хӕццӕ баст ка ӕй, ӕндӕр уӕхӕн мадзӕлттӕ дӕр, ӕма алли киристон дӕр гъӕуама ӕхуӕдӕг рахӕсса унаффӕ, испайда си кӕндзӕй ӕви нӕ. Еци гъуддаг лух кӕнгӕй гъӕуй лӕмбунӕг ӕркӕсун, Йегови цӕстингас бӕрӕг кӕми ӕй, уӕхӕн стихтӕмӕ Библийӕй (Гъуд. 15:28, 29). Еци фарста хуӕздӕр ӕй рагацау ниллух кӕнун, сӕйгӕдонӕмӕ ку бахауай, фур ристӕй ку гъезӕмарӕ кӕнай ӕма дӕ дохтиртӕ ку тагъд кӕнонцӕ, уӕд нӕ, фал. Гъуддаг лӕмбунӕг рартасун, гъӕугӕ гӕгъӕдитӕ байдзаг кӕнун ӕма дохтири хӕццӕ радзубанди кӕнун нур гъӕуй *.

17–19. Йеговӕ куд гъуди кӕнуй, уой рагацау базонун хуарз цӕмӕн ӕй? Нӕхе нӕ рагацау цӕхуӕн уавӕртӕмӕ гъӕуй бацӕттӕ кӕнун?

¹⁷ Нур ба нӕ зӕрдӕбӕл ӕрлӕуун кӕнӕн, Йесо Петури ӕнӕргъуди дзурдтӕбӕл, дӕхецӕн фӕттӕрегъӕд кӕнӕ, зӕгъгӕ, ци дзуапп равардта, уой. Киристе, ӕвӕдзи, берӕ сагъӕс кодта, Хуцау ин ци баихӕс кодта, удта ӕ цард ӕма мӕлӕти туххӕй ци пахампарӕдтӕ гъӕуама исӕнхӕст адтайуонцӕ, уонӕбӕл. Ӕма ин е хъаурӕ лӕвардта, цӕмӕй идарддӕр дӕр Йеговӕбӕл еузӕрдон адтайдӕ ӕма уой фӕсте ба ӕ цард мах туххӕй нивондӕн ӕрхастайдӕ. (Бакӕсӕ Матфеййи 16:21–23.)

 ¹⁸ Абони дӕр Йегови фӕндуй, цӕмӕй е ’мбӕлттӕ уӕн ӕма хуарз хабар игъосун кӕнуни гъуддаги нӕ бон цидӕриддӕр ӕй, уой кӕнӕн (Матф. 6:33; 28:19, 20; Иак. 4:8). Фал нин еуӕй-еуетӕ ба сӕ зӕрдтӕй Петури хузӕн хуарз фӕккӕнунцӕ. Зӕгъӕн, дӕ кусти хецау дин зӕгъуй, дӕуӕн ӕй уӕлдӕр бунат раттун ке фӕндуй ӕма дин федгӕ дӕр фулдӕр ке кӕндзӕй. Фал ӕй лӕдӕрис, уой фӕсте дин Хуцауи гъуддӕгтӕн минкъийдӕр рӕстӕг ке изайдзӕй. Кенӕ ба дин, зӕгъӕн, фадуат фӕззиндтӕй хуӕздӕр скъолай ахур кӕнунмӕ, ӕрмӕст дӕ уой туххӕй дӕ ниййергутӕй идард цӕрун гъӕудзӕй. Уӕхӕн уавӕрти ку бахауай, уӕд бал, ӕвӕдзи, Йеговӕмӕ раковдзӕнӕ, нӕ публикацити ци финст ес, уомӕ ӕркӕсдзӕнӕ ӕма дӕ бийнонти кенӕ хестӕр нӕлгоймӕгти хӕццӕ радзордзӕнӕ. Фал цалинмӕ уӕхӕн уавӕрти нӕ бахаудтӕ, уӕдмӕ хуарз уайдӕ рагацау базонун, уӕхӕн гъуддӕгтӕмӕ Йеговӕ цӕхуӕн цӕстӕй кӕсуй, уой. Ӕма дин ести уӕд, уӕхӕн уавӕртӕ фӕлварӕн нӕ исуодзӕнцӕ. Зондзӕнӕ ’й, ци дин кӕнгӕ ’й, уой, уомӕн ӕма дӕхецӕн рагацау ниллух кодтай, Йеговӕн лӕггадӕ кӕнун дин фиццаг бунати ке уодзӕй.

¹⁹ Ӕнгъезуй ма расагъӕс кӕнун, цӕхуӕн уавӕрти ма нӕ бон ӕй бахаун, уобӕл. Ке зӕгъун ӕй гъӕуй, алцӕмӕ нӕхе нӕ бацӕттӕ кӕндзиан. Фал Библи ӕртасунмӕ рӕстӕг ку хецӕн кӕнӕн, ӕма Йегови цӕстингасбӕл ку сагъӕс кӕнӕн, уӕд багъӕуаги ӕнӕмӕнгӕй ӕргъуди кӕндзиан, ци бакастан, уой, ӕма раст унаффӕ рахӕсдзиан. Гъӕйдӕ мадта Библи ӕртасгӕй архайӕн, Йеговӕ куд сагъӕс кӕнуй, уой балӕдӕрунбӕл, цӕмӕй гъуддагмӕ уой цӕстӕй кӕсӕн. Уотемӕй зундгин унаффитӕ хӕсдзиан нур дӕр ӕма федӕни дӕр.

20, 21. а) Нӕуӕг дуйней нин цӕхуӕн сӕребарӕдзийнадӕ уодзӕй? б) Нӕ бон ци ӕй кӕнун, цӕмӕй абони дӕр амондгун цард кӕнӕн?

²⁰ Мах зӕрдиагӕй ӕнгъӕлмӕ кӕсӕн нӕуӕг дуйнемӕ. Нӕ фулдӕрӕн нифс ес ӕносон цардӕй зӕнхӕбӕл. Хуцауи Паддзахади дӕлбарӕ адӕн сӕ гъезӕмӕрттӕй исуӕгъдӕ уодзӕнцӕ. Алкӕмӕндӕр уодзӕй сӕребарӕдзийнадӕ ӕма нӕ бон уодзӕй унаффитӕ хӕссун, нӕ зӕрдӕмӕ ци цӕуй ӕма нӕ ци фӕндуй, уомӕ гӕсгӕ.

²¹ Ке зӕгъун ӕй гъӕуй, еци сӕребарӕдзийнадӕн арӕнтӕ дӕр уодзӕй. Унаффитӕ хӕсгӕй сӕрниллӕг адӕн архайдзӕнцӕ Йегови закъӕнттӕмӕ гӕсгӕ ӕма ин ӕ гъуди нимайдзӕнцӕ. Ӕма е дӕр дессаг ӕй, уомӕн ӕма уой фӕрци адӕн цийнӕй ӕма фарнӕй бафсӕддзӕнцӕ (Пс. 37:11). Цалинмӕ еци рӕстӕг нӕма ӕрхъӕрдтӕй, уӕдмӕ ба нӕ бон ӕй архайун, цӕмӕй алцӕмӕдӕр Хуцауи цӕстӕй кӕсӕн ӕма абони дӕр амондгун цард кӕнӕн.