1, 2. а) Йесо Петурӕн цӕхуӕн дзуапп равардта? (Кӕсӕ хузӕмӕ статьяй райдайӕни.) б) Йесо ин уӕхӕн дзуапп цӕмӕн равардта?

КИРИСТЕЙ ахуркӕнуйнӕгтӕ сагъӕсти бафтудӕнцӕ! Етӕ уотӕ ӕнгъалдтонцӕ, ӕма Йесо Израили паддзахадӕ нӕуӕгӕй исфедар кӕндзӕй. Фал син нур ба зӕгъуй, тагъд рӕстӕги гъезӕмӕрттӕ ке бавзардзӕй ӕма ке рамӕлдзӕй. Уобӕл ин апостол Петур загъта: «Дӕхецӕн фӕттӕрегъӕд кӕнӕ, Хецау. Уӕхӕн хабар дӕбӕл макӕд ӕрцӕуӕд». Фал ин Йесо ба уотӕ: «Рандӕ мӕ разӕй, Сайтан! Ду мин мӕ рази цӕлхдор ӕвӕрис, уомӕн ӕма дӕ гъудитӕ Хуцауи гъудитӕ нӕ ’нцӕ, фал адӕймаги» (Матф. 16:21–23; Гъуд. 1:6).

² Аци дзурдтӕй Йесо бавдиста, Йегови зунд Сайтани дуйней зундӕй куд хъӕбӕр хецӕн кӕнуй, уой (1 Иоан. 5:19). Петур Йесой разӕнгард кодта, цӕмӕй ӕхе сагъӕс бакодтайдӕ, аци дуйней адӕн куд фӕккӕнунцӕ, уотӕ. Фал ӕй Йесо зудта, Йегови уотӕ ке фӕндадтӕй, цӕмӕй ӕхе бацӕттӕ кодтайдӕ, тагъд рӕстӕги имӕ ци гъезӕмӕрттӕ ӕма мӕлӕт ӕнгъӕлмӕ кастӕй, уомӕ. Йесо Петурӕн ци дзуапп равардта, уомӕй бӕрӕг адтӕй, е дӕр  Йегови хузӕн ке сагъӕс кӕнуй ӕма дуйней цӕстингасӕй хъӕбӕр идард ке ӕй.

3. Алцӕмӕдӕр Йегови цӕстӕй кӕсун зин цӕмӕн ӕй?

³ Махӕй ба ци ес зӕгъӕн? Йегови зундӕй архайӕн ӕви аци дуйней зундӕй? Ке зӕгъун ӕй гъӕуй, мах Хуцауи зӕрдӕ рохс кӕнун фӕндуй. Фал куд сагъӕс кӕнӕн, уомӕй ба ци ес зӕгъӕн? Архайӕн, цӕмӕй алцӕмӕдӕр Йегови цӕстӕй кӕсӕн? Ке зӕгъун ӕй гъӕуй, е ӕнцон нӕй. Аци дуйней зундӕй фегъӕстӕ унмӕ ба берӕ нӕ гъӕуй. Цӕмӕн? Уомӕн ӕма аци дуйней зундахаст алкӕмидӕр рагъардта (Еф. 2:2). Фулдӕр адӕн ӕрмӕстдӕр сӕхе сагъӕс кӕнунцӕ ӕма тӕссаг ӕй, еци зундахаст махмӕ дӕр ку багъара. Мадта аци дуйней адӕни хузӕн сагъӕс кӕнун ӕнцон ӕй, Йегови хузӕн сагъӕс кӕнунбӕл ба архайун гъӕуй.

4. а) Аци дуйнейӕн уӕхӕн барӕ ку раттӕн, цӕмӕй нӕ ӕ зундбӕл араза, уӕд нӕ е цӕмӕ ӕркӕндзӕй? б) Аци статьяй ци базондзиан?

⁴ Аци дуйнейӕн уӕхӕн барӕ ку раттӕн, цӕмӕй нӕ ӕ зундбӕл араза, уӕд мах дӕр исуодзиан хеуарзон ӕма нӕ фӕнддзӕй, цӕмӕй, раст ци ӕй ӕма ци нӕй, уой нӕхуӕдтӕ лух кӕнӕн (Мар. 7:21, 22). Уомӕ гӕсгӕ ӕхсидзгӕ ӕй, цӕмӕй нӕ гъудитӕ уонцӕ «Хуцауи гъудитӕ», адӕймаги гъудитӕ нӕ, фал. Ӕма нин аци статья еци гъуддаги банхус кӕндзӕй. Мах базондзиан, алцӕмӕдӕр Йегови цӕстӕй кӕсун хуарз цӕмӕн ӕй, уой. Уотӕ ку архайӕн, уӕд нин е пайдайӕй ӕндӕр неци ӕрхӕсдзӕй, удта нин нӕ сӕребарӕдзийнадӕн дӕр хъори хуасӕ нӕ уодзӕй. Уомӕй уӕлдай ма ӕркӕсдзиан, нӕ бон куд ӕй нӕхе аци дуйней зундӕй багъӕуай кӕнун. Иннӕ статьяй ба базондзиан, аллихузи гъуддӕгтӕмӕ нӕ бон Йегови цӕстӕй кӕсун куд ӕй, уой.

5. Еуӕй-еуети еске зундамундмӕ игъосун цӕмӕннӕ фӕффӕндуй?

⁵ Еуӕй-еуети нӕ фӕффӕндуй, цӕмӕй син еске амона, цӕхуӕн зундбӕл гъӕуама хуӕст уонцӕ, уой. Уӕхӕн адӕн уотӕ фӕззӕгъунцӕ: «Ӕз мӕхе сӕрӕй сагъӕс кӕнун». Уомӕй сӕ уотӕ зӕгъун фӕффӕндуй, ӕма сӕхе бон дӕр ӕй унаффитӕ хӕссун, удта син еци барӕ дӕр ес. Еске зундамундмӕ нӕ фегъосунцӕ, уомӕн ӕма, иннети хузӕн ку исуонцӕ, уомӕй фӕттӕрсунцӕ *.

6. а) Йеговӕ нин цӕхуӕн сӕребарӕдзийнадӕ дӕттуй? б) Еци сӕребарӕдзийнадӕн арӕнтӕ ес?

⁶ Фал уотӕ зӕгъӕн нӕййес, ӕма Хуцауи хузӕн сагъӕс кӕнун ку райдайӕн, уӕд нин нӕхе гъуди нӕбал уодзӕй. 2 Коринфӕгтӕмӕ 3:17 финст ӕй: «Йегови сугъдӕг хъаурӕ кӕми ес, уоми ес сӕребарӕдзийнадӕ». Фал ни алкедӕр цӕхуӕн адӕймаг уодзӕй, е ба нӕхецӕй кӕнгӕ ’й. Нӕ бон ӕй ӕвзарун, нӕ зӕрдӕмӕ ци цӕуй, уой. Уӕхӕн сӕребарӕдзийнадӕ нин Йеговӕ равардта. Фал е уобӕл дзорӕг нӕй, ӕма  нӕ сӕребарӕдзийнадӕн арӕнтӕ нӕййес. (Бакӕсӕ 1 Петури 2:16.) Йегови фӕндуй, цӕмӕй, хуарз ӕма лӕгъуз ци ӕй, уой ниллух кӕнун нӕ ку гъӕуа, уӕд Библийӕй пайда кӕнӕн. Цума уотӕ зӕгъӕн ес, ӕма уотемӕй ӕцӕг сӕребарӕ нӕбал уодзиан?

7, 8. Алли гъуддагмӕ дӕр Йегови цӕстӕй ке кӕсӕн, е уобӕл дзорӕг цӕмӕн нӕй, ӕма нин сӕребарӕдзийнадӕ ӕппундӕр нӕбал ес? Ӕрхӕссӕ цӕветтон.

⁷ Ӕркӕсӕн еу цӕветтонмӕ. Ниййергутӕ фӕййархайунцӕ, цӕмӕй сӕ сувӕллӕнтти хуӕрзӕгъдаудзийнадӕбӕл исахур кӕнонцӕ. Зӕгъӕн, цӕмӕй сайгӕ ма кӕнонцӕ, зийнадӕгӕнагӕ ма уонцӕ ӕма иннети сагъӕс кӕнонцӕ. Ӕма уой туххӕй уотӕ зӕгъӕн нӕййес, ӕма син исуолӕфуни барӕ нӕ дӕттунцӕ. Уотемӕй ниййергутӕ сӕ сувӕллӕнттӕн ӕнхус кӕнунцӕ, цӕмӕй уой фӕсте сӕ царди ӕнтӕстгун уонцӕ. Сувӕллон ку исустур уй ӕма ниййергути хӕдзарӕ ку ниууадзуй, уӕд ӕ цард аразун ӕхуӕдӕг райдайуй. Ӕма ’й ӕ ниййергутӕ куд ахур кодтонцӕ, уотӕ ку кӕна, уӕд ӕхе багъӕуай кӕндзӕй аллихузи зиндзийнӕдтӕй ӕма уӕлдай сӕринезӕй.

⁸ Хуарз ниййерӕги хузӕн Йегови дӕр фӕндуй, цӕмӕй ӕ сувӕллӕнттӕ амондгун цард кӕнонцӕ (Исай 48:17, 18). Уомӕ гӕсгӕ исфедар кодта, иннети хӕццӕ федаунмӕ ӕма кӕдзос цард кӕнунмӕ нин ка ӕнхус кӕнуй, уӕхӕн уагӕвӕрдтӕ. Йегови фӕндуй, цӕмӕй алли гъуддагмӕ дӕр уой цӕстӕй кӕсӕн ӕма, е цӕмӕн аргъ кӕнуй, уомӕн аргъ кӕнӕн. Е уобӕл дзорӕг нӕй, ӕма нин сӕребарӕдзийнадӕ ӕппундӕр нӕбал уодзӕй. Уой фӕрци ма никки арфдӕр сагъӕс кӕнун дӕр исахур уодзиан (Пс. 92:5; Ӕмб. 2:1–5; Ис. 55:9). Удта нӕ бон уодзӕй амондгундӕр нӕ ка кӕндзӕй, уӕхӕн унаффитӕ хӕссун, ӕма нӕ уой туххӕй нӕхецӕй ӕндӕр адӕймаг уайун кӕнун нӕ гъӕудзӕй (Пс. 1:2, 3). Алцӕмӕдӕр Йегови цӕстӕй ку кӕсӕн, уӕд нин е берӕ пайда ӕрхӕсдзӕй.

9, 10. Цӕмӕй бӕрӕг ӕй, Йегови гъудитӕ аци дуйней гъудитӕй берӕ уӕлдӕр ке ’нцӕ?

⁹ Йегови хузӕн сагъӕс кӕнун ма нӕ фӕндуй, ӕ сагъӕстӕ аци дуйней сагъӕстӕй уӕлдӕр ке ’нцӕ, уой туххӕй дӕр. Аци дуйне берӕ унаффитӕ дӕттуй ӕгъдауи, бийнонти царди, кусти ӕма ӕндӕр уӕхӕн гъуддӕгти фӕдбӕл. Фал еци унаффитӕ хецӕн кӕнунцӕ, Йеговӕ еци гъуддӕгтӕмӕ цӕхуӕн цӕстӕй кӕсуй, уомӕй. Зӕгъӕн, аци дуйне адӕни уӕхӕн зундбӕл аразуй, цӕмӕй ӕрмӕстдӕр сӕхе сагъӕс кӕнонцӕ, удта ӕнӕгъдаудзийнади дӕр лӕгъузӕй маци уинонцӕ. Бийнонти царди амондгун ка нӕй, уони ба разӕнгард кӕнунцӕ рахецӕн унмӕ, уомӕн син ӕфсонӕ ку нӕ уа, уӕддӕр. Фал Библимӕ гӕсгӕ еци унаффитӕ раст нӕ ’нцӕ. Цума уотӕ зӕгъӕн ес, ӕма дуйней унаффитӕ Библий унаффитӕй хуӕздӕр ӕнцӕ?

¹⁰ Киристе загъта: «Зунд бӕрӕг фӕууй раст гъуддӕгтӕй» (Матф. 11:19). Адӕнӕн наукӕ ӕма технологий берӕ бантӕстӕй, фал адӕн ке туххӕй гъезӕмарӕ кӕнунцӕ, еци гъуддӕгтӕн ба сӕ бон кӕрон искӕнун не ’ссӕй, зӕгъӕн, тугъдтитӕн, расизмӕн ӕма фудгъуддӕгтӕн. Уой хӕццӕ ба ма сӕмӕ  ӕнӕгъдау цард кӕнун дӕр лӕгъуз нӕбал кӕсуй. Фал берӕ адӕн арази кӕнунцӕ, ӕнӕгъдау цардӕн берӕ лӕгъуз фӕстеугутӕ ке ес, уой хӕццӕ. Зӕгъӕн, бийнонтӕ фехӕлунцӕ, незтӕ берӕ кӕнунцӕ ӕма ма берӕ ӕндӕр фӕстеугутӕ дӕр. Мадта Йегови унаффитӕй ба ци ес зӕгъӕн? Еци унаффитӕмӕ гӕсгӕ ка цӕруй, уонӕн ба сӕ бийнонтӕ ӕнцӕ амондгун, удта ӕнӕгъдау цард ци незтӕмӕ ӕркӕнуй, уонӕй хизт ӕнцӕ ӕма фӕрнӕй цӕрунцӕ ӕгас зӕнхӕбӕл дӕр син ци хуӕртӕ ӕма ӕнсувӕртӕ ес, уони хӕццӕ (Ис. 2:4; Гъуд. 10:34, 35; 1 Кор. 6:9–11). Куд ӕй уинӕн, уотемӕй Йегови гъудитӕ аци дуйней гъудитӕй берӕ уӕлдӕр ӕнцӕ.

11. Моисей ке зундӕй архайдта ӕма ин е ци пайда ӕрхаста?

¹¹ Рагидзаманти ка цардӕй, еци еузӕрдон лӕггадгӕнгутӕ дӕр ӕй зудтонцӕ, Йегови сагъӕстӕ уӕлдӕр ке ’нцӕ. Зӕгъӕн, Моисеййӕн «ӕгас Египети зунд» байамудтонцӕ, фал уӕддӕр зунд Хуцауӕй агурдта (Гъуд. 7:22; Пс. 90:12). Йеговӕмӕ кувта: «Байамонӕ мин дӕ нӕдтӕ» (Рац. 33:13). Моисей Йеговӕн барӕ равардта, цӕмӕй ӕй ӕ зундбӕл аразтайдӕ, ӕма си Йеговӕ ӕ фӕндон исӕнхӕст кӕнунмӕ испайда кодта, федар ӕууӕндундзийнади хецау дӕр ма ӕй, исхудта (Дзиуит. 11:24–27).

12. Павел унаффӕ хӕсгӕй куд архайдта?

¹² Апостол Павел адтӕй зундгин ӕма ахургонд лӕг, удта тӕккӕ минкъийдӕр дууӕ ӕвзагебӕл дзурдта (Гъуд. 5:34; 21:37, 39; 22:2, 3). Фал ӕй унаффӕ хӕссун ку гъӕуидӕ, уӕд аци дуйней зундӕй нӕ пайда кодта, фал Хуцауи Дзурди унаффитӕй. (Бакӕсӕ Гъуддӕгтӕ 17:2; 1 Коринфӕгтӕмӕ 2:6, 7, 13.) Уой фӕрци ӕ лӕггади ӕнтӕстгун адтӕй ӕма исхайгин ӕй устур хуӕрзеуӕгӕй – ӕносон царди нифсӕй (2 Тим. 4:8).

13. Алцӕмӕдӕр Хуцауи цӕстӕй кӕсдзиан ӕви нӕ, е кӕмӕй кӕнгӕ ’й?

¹³ Мадта бӕрӕг ӕй, Хуцауи зунд аци дуйней зундӕй уӕлдӕр ке ӕй, е. Ӕма Хуцауи уагӕвӕрдтӕмӕ гӕсгӕ ку архайӕн, уӕд уодзиан ӕцӕг амондгун ӕма ӕнтӕстгун. Фал Йеговӕ ӕ зундбӕл тухӕй неке аразуй. Цӕбӕл нин сагъӕс кӕнгӕ ’й, уой нин нӕдӕр «зундгин ӕма ӕууӕнкгун цагъар» амондзӕй, нӕдӕр хестӕр нӕлгоймӕгтӕ (Матф. 24:45; 2 Кор. 1:24). Алкедӕр ни ӕхуӕдӕг гъӕуама архайа, цӕмӕй алцӕмӕдӕр Хуцауи цӕстӕй кӕса. Цума нин еци гъуддаги ци банхус кӕндзӕй?

14, 15. а) Цӕмӕй алцӕмӕдӕр Йегови цӕстӕй кӕсӕн, уой туххӕй нӕ сагъӕстӕ цӕбӕл гъӕуама уонцӕ? б) Аци дуйней зундахастӕй нӕхе цӕмӕн гъӕуама гъӕуай кӕнӕн? Ӕрхӕссӕ цӕветтон.

¹⁴ Ромӕгтӕмӕ 12:2 финст ӕй: «Аци дуйне мабал фӕнзетӕ, фал уӕ зунд нӕуӕг кӕнтӕ ӕма уӕ уодигъӕдӕ ӕййеветӕ, цӕмӕй лӕдӕрайтӕ, ци ӕй Хуцауи фӕндон: ци имӕ кӕсуй хуарз, ци ин ӕй ӕхцӕуӕн ӕма ци ӕй ӕ цӕсти ӕнхӕст». Аци стихӕй куд зиннуй, уомӕ гӕсгӕ, рӕстдзийнадӕ базонуни размӕ кудфӕндий ма сагъӕс кодтайанӕ, уӕддӕр нӕ бон ӕй раййевун, ӕма Хуцау куд сагъӕс кӕнуй, уотӕ сагъӕс кӕнун. Алкӕбӕлдӕр ни бӕрӕг  кӕнуй, раздӕр цӕхуӕн цард кодтан ӕма нӕ тоги ци рахастан, е. Фал е уобӕл дзорӕг нӕй, ӕма зундахастӕн раййевӕн нӕййес. Е кӕнгӕ ’й, фулдӕр цӕбӕл сагъӕс кӕнӕн, уомӕй. Йеговӕ цӕхуӕндӕр гъуддагмӕ цӕхуӕн цӕстӕй кӕсуй, уобӕл ку сагъӕс кӕнӕн, уӕд ӕй хуӕздӕр балӕдӕрдзиан, уой цӕстингас алкӕддӕр раст ке фӕууй. Ӕма нӕ уӕд фӕнддзӕй алцӕмӕдӕр уой цӕстӕй кӕсун.

¹⁵ Фал уой туххӕй гъӕуама аци дуйней зундахастӕй нӕхе гъӕуай кӕнӕн. Цума уомӕ ци хауй? Гъӕуама Йегови уагӕвӕрдти нихмӕ ка цӕуй, уӕхӕнӕй мацӕмӕ кӕсӕн ӕма мацӕмӕ игъосӕн. Е ӕхсидзгӕ цӕмӕн ӕй, уой балӕдӕрунмӕ ӕрхӕссӕн еу цӕветтон. Зӕгъӕн, кадӕр исфӕндӕ кодта е ’нӕнездзийнадӕ фӕххуӕздӕр кӕнун, ӕма райдӕдта пайда хуӕруйнӕгтӕ хуӕрун. Фал ин е ести пайда ӕрхӕсдзӕй, лӕгъуз хуӕруйнӕгтӕ дӕр ма ку хуӕра, уӕд? Уотӕ махӕн дӕр нӕ хъиамӕтӕй неци пайда уодзӕй, Хуцауи сагъӕстӕй уӕлдай ма нӕ зунд аци дуйней сагъӕстӕй дӕр ку ’фсадӕн, уӕд.

16. Нӕхе цӕмӕй гъӕуама гъӕуай кӕнӕн?

¹⁶ Фал уомӕн гӕнӕн ес, цӕмӕй аци дуйней зундахастбӕл ӕппундӕр макӕми ӕмбӕлӕн? Нӕййес, уомӕн ӕма нӕ уӕд «аци дуйнейӕй ӕндӕр ескумӕ раледзун багъудайдӕ» (1 Кор. 5:9, 10). Игъосун кӕнгӕй дӕр нӕбӕл рамбӕлуй, цидӕр рӕдуд гъудитӕбӕл хуӕст ка ӕй, уӕхӕн адӕн. Фал уӕхӕн гъудитӕ фегъосгӕй сӕбӕл гъӕуама сагъӕс кӕнун ма райдайӕн кенӕ сӕ нӕ зӕрдӕмӕ ма райсӕн. Мадта Киристей фӕнзӕн ӕма Сайтан аци дуйне ци зундбӕл аразуй, уой нӕ зӕрдӕмӕ хӕстӕг макӕд уадзӕн, удта гӕнӕн ӕма амалӕй нӕхе аци дуйнейӕй еуварс дарӕн. (Бакӕсӕ Ӕмбесӕндтӕ 4:23.)

17. Цӕхуӕн гъуддӕгти нӕ бон ӕй нӕхе аци дуйней зундахастӕй багъӕуай кӕнун?

¹⁷ Зӕгъӕн, ӕмбӕлттӕ ӕвзаргӕй гъӕуама лӕмбунӕг уӕн. Библи куд  зӕгъуй, уомӕ гӕсгӕ, Йеговӕн ка нӕ лӕггадӕ кӕнуй, уӕхӕн ӕмбӕлттӕ нин ку уа, уӕд мах дӕр уони хузӕн сагъӕс кӕнун райдайдзиан (Ӕмб. 13:20; 1 Кор. 15:12, 32, 33). Уомӕй уӕлдай ма гъӕуама лӕмбунӕг уӕн ерхӕфсӕнтӕ ӕвзаргӕй дӕр. Эволюци, фудгъуддӕгтӕ ӕма ӕнӕгъдаудзийнадӕ кӕми ес, уӕхӕн ерхӕфсӕнтӕй еуварс ку уӕн, уӕд нӕхе багъӕуай кӕндзиан, «Хуцауи туххӕй ци зонӕн, уой нихмӕ цидӕриддӕр» ӕй, уомӕй (2 Кор. 10:5).

18, 19. а) Аци дуйней зунд ӕргом бӕрӕг ку нӕ фӕууй, уӕд уӕлдай лӕмбунӕг цӕмӕн гъӕуама уӕн? б) Нӕхемӕ цӕхуӕн фарстатӕ гъӕуама раттӕн ӕма цӕмӕн?

¹⁸ Фал еуӕй-еухатт аци дуйней зундахаст ӕргом бӕрӕг нӕ фӕууй. Зӕгъӕн, арӕх нӕуӕг хабӕрттӕ уотӕ радзорунцӕ, цӕмӕй адӕн цӕхуӕндӕр политикон гъуддӕгти фарс ислӕууонцӕ. Кенӕ ба зундгонд адӕни кой кӕнгӕй фӕдздзорунцӕ, аци дуйней ӕнтӕстдзийнадӕбӕл нимад ци ӕй, уой туххӕй. Кӕцидӕр кинотӕ ӕма киунугутӕн ба сӕ гъуди ӕй, цӕмӕй дин дӕхецӕй ӕма дӕ бийнонтӕй уӕлдӕр маке уа. Ӕма нӕмӕ, ка ’й зонуй, уӕхӕн гъуди раст дӕр фӕккӕсдзӕй. Фал Библи куд зӕгъуй, уомӕ гӕсгӕ адӕймаг ӕцӕг амондгун уодзӕй, ӕ царди фиццаг бунати Йегови ку ӕвӕра, ӕрмӕстдӕр уӕд (Матф. 22:36–39). Уомӕй уӕлдай ма кӕд еуӕй-еу аргъӕуттӕ ӕма мультфильмти дӕр фиццаг бакастӕй лӕгъузӕй неци фӕууй, уӕддӕр си ӕнӕгъдаудзийнадӕ уотӕ равдесунцӕ, цума си лӕгъузӕй неци ес.

¹⁹ Ке зӕгъун ӕй гъӕуй, еугур ерхӕфсӕнтӕ лӕгъуз нӕ ’нцӕ. Фал уӕддӕр гъӕуама нӕхе бафӕрсӕн: «Ӕргом бӕрӕг ку нӕ фӕууй, уӕддӕр ӕй балӕдӕрун, кӕцидӕр фӕззелӕнтӕ си Библий уагӕвӕрдти нихмӕ ке ’нцӕ? Мӕ сувӕллӕнттӕ ци кӕсунцӕ ӕма цӕмӕ кӕсунцӕ, удта мӕхуӕдӕг ци кӕсун ӕма цӕмӕ кӕсун, уомӕ мӕ гъос дарун? Мӕ сувӕллӕнттӕн ӕнхус кӕнун алцӕмӕдӕр Йегови цӕстӕй кӕсун, цӕмӕй сӕбӕл, аци дуйней ци фегъосунцӕ ӕма ци фӕууинунцӕ, е лӕгъузӕрдӕмӕ ма рабӕрӕг уа?» Хуцауи сагъӕстӕ аци дуйней сагъӕстӕй куд хецӕн кӕнунцӕ, уой ку лӕдӕрӕн, уӕд нин ӕнцондӕр уодзӕй нӕхе аци дуйней зундӕй багъӕуай кӕнун.

20. Нӕ зунд нин Хуцау араздзӕй ӕви аци дуйне, е цӕмӕй кӕнгӕ ’й?

²⁰ Иронх ди ма уӕд, нӕ зунд нин кенӕ Йеговӕ араздзӕй кенӕ ба Сайтани дуйне. Дӕу зунд ба ка аразуй? Ке гъудитӕй ӕй идзаг кӕнис, е. Нӕ зунд аци дуйней гъудитӕй ку идзаг кӕнӕн, уӕд мах дӕр аци дуйней зундбӕл цӕудзиан – фулдӕр адӕн ци зундбӕл цӕунцӕ, уобӕл. Мадта гъӕуама лӕмбунӕг ӕвзарӕн, цӕмӕ кӕсӕн, ци кӕсӕн, цӕмӕ игъосӕн ӕма цӕбӕл сагъӕс кӕнӕн, уой.

21. Иннӕ статьяй дзурд цӕбӕл цӕудзӕй?

²¹ Аци статьяй куд базудтан, уотемӕй, цӕмӕй алцӕмӕдӕр Йегови цӕстӕй кӕсӕн, уой туххӕй аци дуйней зундахастӕй нӕхе гъӕуай кӕнун фагӕ нӕй. Гъӕуама Хуцауи гъудитӕбӕл арф сагъӕс кӕнӕн, цӕмӕй ӕй нӕ бон уа фӕнзун. Ӕма нин еци гъуддаги ци банхус кӕндзӕй, уобӕл ба дзурд цӕудзӕй иннӕ статьяй.