1. Алкедӕр ни ци фӕндуй?

«РӔСТДЗИЙНАДӔ куддӕр базудтон, гъе уотӕ мӕ бафӕндадтӕй, цӕмӕй ме ’гас хеуӕнттӕ дӕр мӕ хӕццӕ дзенети цӕронцӕ,– зӕгъуй хуӕрӕ Полинӕ *.– Фал мӕ хъӕбӕрдӕр ба фӕндадтӕй мӕ сӕрихецау Уэйн ӕма мӕ биццеуи хӕццӕ еумӕ Йеговӕн лӕггадӕ кӕнун». Дӕуӕн ба ес, Йеговӕн ка нӕма лӕггадӕ кӕнуй, уӕхӕн хеуӕнттӕ *? Кӕд гъо, уӕд, ӕвӕдзи, Полини хуарз лӕдӕрис.

2. Аци статьяй цӕхуӕн фарстатӕмӕ ӕркӕсдзиан?

² Нӕ бон нӕй нӕ хеуӕнтти тухӕй дӕр рӕстдзийнадӕмӕ ӕрбакӕнун, фал син нӕ бон ӕй банхус кӕнун, цӕмӕй Библий хабарбӕл ӕрсагъӕс кӕнонцӕ ӕма сӕ зӕрдитӕ рӕстдзийнадӕн райгон кӕнонцӕ (2 Тим. 3:14, 15). Хеуӕнттӕн игъосун кӕнун цӕмӕн гъӕуй? Куд сагъӕс кӕнунцӕ, уой лӕдӕрун цӕмӕн гъӕуй? Нӕ бон син куд ӕй банхус кӕнун, цӕмӕй етӕ дӕр Йегови бауарзонцӕ? Удта нин ӕмбурди хуӕртӕ ӕма ӕнсувӕрти бон дӕр куд ӕй банхус кӕнун?

3. 2 Петури 3:9 куд финст ӕй, уомӕ гӕсгӕ нӕ хеуӕнттӕн цӕмӕн гъӕуама игъосун кӕнӕн?

³ Тагъд рӕстӕги Йеговӕ аци цардӕвӕрдӕн кӕрон искӕндзӕй, ӕма фӕййервӕздзӕнцӕ ӕрмӕстдӕр, «ӕносон царди надбӕл цӕун ке фӕндуй, етӕ» (Гъуд. 13:48). Ӕнӕзонгӕ адӕнӕн игъосун кӕнунбӕл уойбӕрцӕ рӕстӕг ӕма хъауритӕ кӕми харз кӕнӕн, уоми дессаг нӕй, нӕ хеуӕнтти ӕрбакӕнун дӕр нӕ ке фӕндуй, е. Нӕ уарзӕгой Фидӕ Йегови «нӕ фӕндуй, цӕмӕй  еске фесӕфа, фал ӕй фӕндуй, цӕмӕй алкӕмӕндӕр уа ӕрфӕсмон кӕнуни фадуат». (Бакӕсӕ 2 Петури 3:9.)

4. Хеуӕнтти хӕццӕ дзоргӕй хатгай нӕ рӕдуд ци фӕууй?

⁴ Гъӕуама ма иронх кӕнӕн, ервӕзундзийнади хабар куд гъӕуй ӕма куд нӕ гъӕуй игъосун кӕнун, уой. Ӕнӕзонгӕ адӕнӕн игъосун кӕнгӕй нӕхе уӕзданӕй фӕддарӕн, фал гъуддаг нӕ хеуӕнттӕмӕ ку ’рхъӕртуй, уӕдта нӕ уӕздандзийнадӕ фӕццидӕр уй.

5. Хеуӕнттӕн игъосун кӕнгӕй ци гъӕуама ма иронх кӕнӕн?

⁵ Фиццаг рӕстӕг нӕ хеуӕнтти хӕццӕ рӕстдзийнади туххӕй куд дзурдтан, уобӕл, ӕвӕдзи, хъӕбӕр фӕффӕсмон кӕнӕн. Рӕстӕг ма раздахӕн ку адтайдӕ, уӕд сӕ хӕццӕ ӕндӕрхузи бӕргӕ радзурдтайанӕ. Апостол Павел киристӕнттӕмӕ финста: «Уӕ дзурд алкӕддӕр уӕд фӕлмӕн ӕма зӕрдӕмӕдзӕугӕ, цӕмӕй зонайтӕ, кӕмӕн цӕхуӕн дзуапп раттун гъӕуй, уой» (Кол. 4:5, 6). Хеуӕнттӕн игъосун кӕнгӕй аци дзурдтӕ иронх кӕнун нӕ гъӕуй, кенӕ ба син ӕнхус нӕ бакӕндзиан, фал сӕ нӕхемӕ ниффуд кӕндзиан.

6, 7. Йеговӕн ка нӕ лӕггадӕ кӕнуй, уони лӕдӕрун ке гъӕуй, е цӕхуӕн хабарӕй зиннуй?

⁶ Лӕдӕрӕ сӕ. Уӕлдӕр ке кой кодтан, еци хуӕрӕ Полинӕ зӕгъуй: «Фиццаг рӕстӕг мӕ сӕрихецауи хӕццӕ ӕрмӕстдӕр Хуцауи ӕма Библий туххӕй дзурдтон. Аллибони хабӕрттӕбӕл ба некӕд дзурдтан». Фал ӕ сӕрихецау Уэйн Библи хуарз нӕ зудта, ӕма ӕ бийнойнаги дзубандитӕ нӕ лӕдӕрдтӕй. Уотӕ имӕ кастӕй ӕма ’й ӕ динӕй ӕндӕр нецибал гъӕуй. Удта ин тӕрсгӕ дӕр кодта, кӕд ести тӕссаг сектӕмӕ бахаудтӕй ӕма ’й сайунцӕ, зӕгъгӕ.

⁷ Полинӕ ӕхуӕдӕг дӕр зӕгъуй, изӕригӕнтти дӕр ӕма уолӕфгӕ бӕнтти дӕр ӕ рӕстӕг хуӕртӕ ӕма ӕнсувӕрти хӕццӕ ке ӕрвиста. Ӕмбурдти дӕр ӕма, дан, игъосун кӕнгӕй  дӕр уони хӕццӕ уинӕ, удта ма, дан, сӕмӕ иуазӕгуати дӕр цудтӕн. «Хатгай Уэйн хӕдзарӕмӕ ӕрбацӕуидӕ, уоми ба ’й неке хезидӕ, ӕма уой туххӕй ӕрӕнкъард уидӕ»,– зӕгъуй Полинӕ. Уэйни фӕндадтӕй, цӕмӕй ӕ бийнойнаг ӕма ӕ фурт ӕ фарсмӕ адтайуонцӕ. Е ӕй нӕ зудта, сӕ рӕстӕг ке хӕццӕ ӕрветунцӕ, уой, ӕма имӕ уотӕ кастӕй, цума ӕ бийнойнагӕн ӕ нӕуӕг ӕмбӕлттӕ уомӕй хъазардӕр иссӕнцӕ. Уэйн ӕй тӕрсун кодта, ӕ хӕццӕ ке рахецӕн уодзӕй, уомӕй. Куд дӕмӕ кӕсуй, Полинӕн ӕ бон куд адтайдӕ лӕдӕргӕй архайун?

8. 1 Петури 3:1, 2 куд финст ӕй, уомӕ гӕсгӕ хеуӕнттӕ фиццагидӕр цӕмӕ фӕккӕсунцӕ?

⁸ Дӕ гъуддӕгтӕ дӕ бӕсти дзорӕнтӕ. Нӕ хеуӕнттӕ нин фулдӕр нӕ гъуддӕгтӕмӕ фӕккӕсунцӕ, ци дзорӕн, уомӕ нӕ фал. (Бакӕсӕ 1 Петури 3:1, 2.) Полинӕ дӕр уой фӕстагмӕ балӕдӕрдтӕй. Е зӕгъуй: «Ӕз ӕй зудтон, Уэйн нӕ берӕ ке уарзуй ӕма ’й ӕцӕгӕй хецӕн кӕнун ке нӕ фӕндуй, уой. Фал хецӕн кӕнуни кой ку искодта, уӕд нӕ бийнонти цардбӕл ӕрсагъӕс кодтон. Ӕма ’й балӕдӕрдтӕн, Йегови куд фӕндуй, уотӕ архайун мӕ ке гъӕуй. Мӕ сӕрихецауӕн рӕстдзийнади туххӕй дзорунӕй сӕйрагдӕр адтӕй мӕхе раст дарун». Уой фӕсте Полинӕ Уэйни хӕццӕ айдагъ Библибӕл нӕбал дзоридӕ, фал ӕнӕуой естӕбӕлти дӕр. Уэйн ӕй уайтагъддӕр балӕдӕрдтӕй, ӕ бийнойнаг ке фӕссабурдӕр ӕй, ӕ фурт ба коммӕгӕсдӕр ке иссӕй, уой (Ӕмб. 31:18, 27, 28). Библий фӕрци ӕ бийнонтӕ хуӕздӕрӕрдӕмӕ куд ӕййевунцӕ, уой ку фӕууидта, уӕд ӕхуӕдӕг дӕр Хуцауи Дзурдӕн ӕ зӕрдӕ райгон кодта (1 Кор. 7:12–14, 16).

9. Нӕ къохтӕ цӕмӕн гъӕуама ма уадзӕн?

⁹ Дӕ къохтӕ ма уадзӕ. Еци гъуддаги нин Йеговӕ ӕхуӕдӕг фӕнзуйнаг ӕй. Адӕнӕн «алли бон дӕр» фадуат дӕттуй, цӕмӕй хуарз  хабар сӕ зӕрдӕмӕ райсонцӕ ӕма ӕносон царди нифсӕй исхайгин уонцӕ (Йер. 7:25). Апостол Павел дӕр Тимофеййи разӕнгард кодта, цӕмӕй адӕнӕн ӕнхус кӕнгӕй ӕ къохтӕ ма уагътайдӕ. Цӕмӕн? Уомӕн ӕма уой фӕрци Тимофеййи бон адтӕй ӕхе дӕр фӕййервӕзун кӕнун, удта имӕ ка игъуста, уони дӕр (1 Тим. 4:16). Мах фӕндуй, цӕмӕй нӕ хеуӕнттӕ рӕстдзийнадӕ базононцӕ, уомӕн ӕма сӕ уарзӕн. Полинӕн дӕр цӕйбӕрцӕдӕр рӕстӕги фӕсте ӕ дзурдтӕ ӕма ӕ гъуддӕгтӕ хуарз тиллӕг ӕрхастонцӕ. Нур ӕ сӕрихецауи хӕццӕ Йеговӕн еумӕ лӕггадӕ кӕнунцӕ. Сӕ дууӕ дӕр ӕнцӕ пионертӕ, Уэйн ба ма хестӕр нӕлгоймаг дӕр ӕй.

10. Фӕразон цӕмӕн гъӕуама уӕн?

¹⁰ Фӕразон уо. Йегови уагӕвӕрдтӕмӕ гӕсгӕ цӕрун ку райдайӕн, уӕд нӕ хеуӕнттӕн ӕнцон нӕ фӕууй исарази ун, нӕ цард ӕма нӕ дин ке раййивтан, уобӕл. Уайтагъддӕр ӕй балӕдӕрунцӕ, сӕ хӕццӕ дини бӕрӕгбӕнттӕ ке нӕбал фӕккӕнӕн, удта политики хӕццӕ баст гъуддӕгтӕй дӕр нӕхе еуварс ке фӕддарӕн. Еуей-еу хеуӕнттӕ нӕмӕ уой туххӕй фиццаг рӕстӕг мӕстгун фӕккӕнунцӕ (Матф. 10:35, 36). Фал уӕддӕр дӕ нифс ма сӕттӕд. Дӕ къох сӕбӕл ку ракъуӕрай, ӕма син, цӕбӕл ӕууӕндис, уой ку нӕбал дзорай, уӕд уотӕ уайдзӕй, ӕма син дӕхуӕдӕг тӕрхон рахастай, ӕносон царди аккаг нӕ ’нцӕ, зӕгъгӕ. Фал Йеговӕ тӕрхон кӕнуни барӕ махӕн нӕ равардта. Еци барӕ Киристейӕн лӕвӕрд ӕй (Иоан. 5:22). Фӕразон ку уӕн, уӕд нӕмӕ, ка ’й зонуй, нӕ хеуӕнттӕ еу афони байгъосдзӕнцӕ. (Кӕсӕ рамкӕ « Пайда кӕнӕ нӕ сайтӕй».)

11–13. Алиси хабарӕй цӕбӕл ахур кӕнӕн?

¹¹ Уо уӕздан, фал федар (Ӕмб. 15:2). Ӕркӕсӕн Алиси хабармӕ. Алисӕ рӕстдзийнадӕ ку базудта, уӕд ӕ ниййергутӕй идард цардӕй. Етӕ ба Хуцаубӕл не ’ууӕндтӕнцӕ, удта политики гъуддӕгти архайдтонцӕ. Алисӕ ’й лӕдӕрдтӕй, рӕстдзийнадӕ ке базудта, уой туххӕй ӕй ӕ ниййергутӕн дӕр радзорун ке гъӕуй, ӕма куд тагъддӕр, уотӕ хуӕздӕр. «Афойнадӕбӕл син ӕй ку нӕ радзорай ӕма еци гъуддаг ку ниддаргъ кӕнай,– зӕгъуй Алисӕ,– уӕд, син уой фӕсте никки зиндӕр искӕндзӕнӕ». Алисӕ ӕ ниййергутӕмӕ цалдӕр финстӕги рарвиста ӕма си ниффинста, дзуапп базонун сӕ кӕбӕл бафӕндадтайдӕ, цалдӕр уӕхӕн фарстай, зӕгъӕн, «Ци ӕй уарзондзийнадӕ?» (1 Кор. 13:1–13). Алисӕ ма син райарфӕ кодта, уотӕ хуарз ӕй ке исгъомбӕл кодтонцӕ ӕма ибӕл ке тухстӕнцӕ, уой туххӕй, удта син лӕвӕрттӕ рарвиста. Рабӕрӕг кӕнунмӕ сӕмӕ ку иссудӕй, уӕдта ӕ мадӕн хӕдзари куститӕ кӕнунмӕ ӕнхус кодта. Фиццаг рӕстӕг ӕ ниййергути зӕрдӕмӕ неци уотӕ цудӕй, цӕбӕл ӕууӕндуй, уой син ке дзоридӕ, е.

¹² Алисӕ алли бон дӕр Библи кастӕй, ӕ ниййергутӕмӕ ку уидӕ, уӕд дӕр. «Уой фӕрци ӕй мӕ мадӕ уидта, Библи мин куд ӕхсидзгӕ ӕй, уой»,– зӕгъуй Алисӕ. Еци рӕстӕг ӕ фиди дӕр бафӕндадтӕй Библий туххӕй фулдӕр базонун, цӕмӕй ӕй балӕдӕрдтайдӕ, ӕ кизгӕ уотӕ цӕмӕн раййивта, уой. Удта ма ’й фӕндадтӕй Библий рӕдудтитӕ дӕр иссерун. Алисӕ ин Библи балӕвар кодта ӕма ин си цалдӕр фӕлмӕн дзурди ниффинста. Цума е цӕмӕ ӕркодта? Фидӕ Библий рӕдудтитӕ не ’ссирдта, ци си бакастӕй, е ба ӕ зӕрдӕмӕ хъӕбӕр фӕццудӕй.

¹³ Уӕздан, фал федар гъӕуама уӕн фӕлварӕнтӕбӕл ку ӕмбӕлӕн, уӕддӕр (1 Кор. 4:12). Зӕгъӕн, Алисӕн ӕ мадӕ ӕ нихмӕ адтӕй. «Донаргъуд ку райстон, уӕд мин загъта, лӕгъуз кизгӕ, дан, мин дӕ»,– зӕгъуй Алисӕ. Цума Алисӕ куд бакодта? Ӕхуӕдӕг зӕгъуй: «Мӕхе нигъгъос кӕнуни бӕсти ин уӕзданӕй балӕдӕрун кодтон, Йегови Ӕвдесӕн ке исдӕн, е мӕ федар фӕндӕ ке ӕй ӕма еци фӕндӕ ке нӕ раййевдзӕн. Мӕ бон куд адтӕй, уотӕ ин балӕдӕрун кодтон, берӕ ’й ке уарзун, уой, ӕма нӕ дууӕ дӕр кӕун райдӕдтан. Уой фӕсте ба ин хуӕрзадӕ рӕфтад ӕрцӕттӕ  кодтон. Уӕдӕй фӕстӕмӕ мӕ мадӕ арази кӕнун райдӕдта, Библий фӕрци хуӕздӕрӕрдӕмӕ ӕййевун ке райдӕдтон, уобӕл».

14. Нӕ хеуӕнттӕн нӕ унаффитӕ ӕййевуни барӕ цӕмӕн гъӕуама ма дӕттӕн?

¹⁴ Ка ’й зонуй, цалинмӕ дӕ хеуӕнттӕ балӕдӕронцӕ, Йеговӕн лӕггадӕ кӕнун дин куд ӕхсидзгӕ ӕй, уой, уӕдмӕ цӕйбӕрцӕдӕр рӕстӕг рацӕудзӕй. Зӕгъӕн, Алисӕ пионерӕй лӕггадӕ кӕнун ку исфӕндӕ кодта ӕма ин ӕ ниййергутӕ ци куст равзурстонцӕ, уобӕл ку не ’сарази ӕй, уӕд бабӕй ӕ мадӕ кӕун райдӕдта. Фал Алисӕ ӕ унаффӕ нӕ раййивта. Е зӕгъуй: «Еунӕг гъуддаги дӕ ку басӕттонцӕ, уӕд дӕ иннӕ гъуддӕгти дӕр нӕбал ниууадздзӕнцӕ. Фал дӕ унаффӕ ку нӕ раййевай, ӕма сӕ хӕццӕ уӕзданӕй ку дзорай, уӕд дӕмӕ си, ка ’й зонуй, еске игъосгӕ дӕр бакӕндзӕй». Алисӕн дӕр ӕ хабар уотӕ рауадӕй. Ӕ ниййергутӕ абони пионертӕй лӕггадӕ кӕнунцӕ, ӕ фидӕ ба ма хестӕр нӕлгоймаг дӕр иссӕй.

15. Матфеййи 5:14–16 ӕма 1 Петури 2:12 куд финст ӕй, уомӕ гӕсгӕ нӕ хеуӕнттӕн куд банхус кӕндзӕнцӕ ӕмбурди хуӕртӕ ӕма ӕнсувӕрти «хуарз гъуддӕгтӕ»?

¹⁵ Йеговӕ адӕни ӕхемӕ кӕнуй ӕмбурди хуӕртӕ ӕма ӕнсувӕрти «хуарз гъуддӕгти» фӕрци дӕр. (Бакӕсӕ Матфеййи 5:14–16; 1 Петури 2:12.) Кӕд дӕ цардӕмбал Йегови Ӕвдесӕн нӕй, уӕд ӕмбурди хуӕртӕ ӕма ӕнсувӕрти фӕсмӕруй? Уӕлдӕр ке кой кодтан, еци хуӕрӕ Полинӕ хуӕртӕ ӕма ӕнсувӕрти сӕхемӕ ӕрбахонидӕ, цӕмӕй сӕ Уэйни хӕццӕ базонгӕ кодтайдӕ. Еу ӕнсувӕри фӕрци Уэйн балӕдӕрдтӕй, Йегови Ӕвдесӕнтӕ дӕр ӕнӕуой адӕн ке ’нцӕ, уой. Уэйн радзурдта: «Ӕнсувӕр ӕ кустӕй еу бон отпуск райста, цӕмӕй мӕ хӕццӕ футболмӕ бакастайдӕ. Ӕма  уӕд расагъӕс кодтон: „Айӕ ба нӕхе хузӕн лӕг ку ӕй!“»

16. Нӕ хеуӕнтти ӕмбурдтӕмӕ цӕмӕн гъӕуама хонӕн?

¹⁶ Нӕ бон ма ӕй нӕ хеуӕнтти ӕмбурдмӕ дӕр ӕрбахонун (1 Кор. 14:24, 25). Уэйн фиццаг хатт ци ӕмбурдмӕ ӕрбацудӕй, е адтӕй Имисӕн изӕр. Уэйн еци фембӕлдмӕ ӕрбацӕунбӕл исарази ӕй, ӕ кусти фӕсте ке адтӕй ӕма цубур ке адтӕй, уой туххӕй. Уэйн зӕгъуй: «Цӕбӕл си дзурдтонцӕ, уой нӕбал гъуди кӕнун, фал адӕн ба мӕ зӕрдӕмӕ фӕццудӕнцӕ. Мӕ къох райсунмӕ мӕмӕ сӕхуӕдтӕ цудӕнцӕ ӕма мӕ хӕццӕ зонгӕ кодтонцӕ. Бӕрӕг адтӕй, хуарззӕрдӕ адӕн ке адтӕнцӕ, е». Еу лӕг ӕма уосӕ ба Полинӕмӕ ӕма ӕ биццеумӕ уӕлдай хӕларзӕрдӕ адтӕнцӕ. Ӕмбурдти дӕр, удта син игъосун кӕнгӕй дӕр ӕнхус кодтонцӕ. Уомӕ гӕсгӕ Уэйни фулдӕр базонун ку бафӕндадтӕй, уӕд еци ӕнсувӕрӕн загъта, цӕмӕй ӕ хӕццӕ Библи ахур кӕнун райдӕдтайдӕ.

17. Нӕхе цӕй туххӕй гъӕуама ма фудгин кӕнӕн ӕма нӕ къохтӕ цӕмӕн гъӕуама ма уадзӕн?

¹⁷ Нифс нӕмӕ ес, нӕ хеуӕнттӕ дӕр Йеговӕн лӕггадӕ кӕнун ке райдайдзӕнцӕ. Фал гӕнӕн ес, ӕма рӕстдзийнадӕ сӕ зӕрдӕмӕ ма райсонцӕ, кудфӕнди ма архайӕн, уӕддӕр. Дӕу хабар дӕр уотӕ ку уа, уӕд дӕхе ма фудгин кӕнӕ. Адӕймаги, мах цӕбӕл ӕууӕндӕн, уобӕл тухӕй нӕ баууӕндун кӕндзиан. Фал уотӕ зӕгъӕн дӕр нӕййес, ӕма нӕ хеуӕнтти гъуди нӕ бон некуд ӕй раййевун, уомӕн ӕма ’й уинунцӕ, нӕ лӕггадӕ нин цӕйбӕрцӕ цийнӕдзийнадӕ хӕссуй, уой. Дӕ хеуӕнтти туххӕй Йеговӕмӕ ковӕ. Сӕ хӕццӕ уӕзданӕй дзорӕ. Дӕ къохтӕ ма уадзӕ! (Гъуд. 20:20). Йеговӕ дин дӕ хъиамӕттӕн ӕнӕмӕнгӕй райарфӕ кӕндзӕй! Ӕма дӕмӕ дӕ хеуӕнттӕ ку байгъосонцӕ, уӕд сӕ Йеговӕ фӕййервӕзун кӕндзӕй!