1. Цӕмӕй Филиппти ӕмбурд фӕззиндтайдӕ, уобӕл ка архайдта?

АПОСТОЛ Павел, Силӕ, Лука ӕма Тимофей, Роми дӕлбарӕ ка адтӕй, еци горӕт Филипптӕмӕ ку ’рцудӕнцӕ, уӕд ӕй фӕууидтонцӕ, Паддзахади хабармӕ байгъосун ке фӕндадтӕй, берӕ уӕхӕн адӕн си ке цӕруй. Еци цуппар зингзӕрдӕ ӕнсувӕри байархайдтонцӕ, цӕмӕй си ӕмбурд фӕззиндтайдӕ. Уотемӕй бунӕттон хуӕртӕ ӕма ӕнсувӕртӕ еумӕ ӕмбурд кӕнун райдӕдтонцӕ. Ӕмбурд ба, ӕвӕдзи, кодтонцӕ иуазӕгуарзон хуӕрӕ Лидий хӕдзари (Гъуд. 16:40).

2. Филиппти ӕмбурд цӕхуӕн зиндзийнӕдти бахаудтӕй?

² Фал тагъд рӕстӕги нӕуӕг ӕмбурд зиндзийнӕдтӕбӕл ӕмбӕлун райдӕдта. Сайтан, рӕстдзийнадӕй е сӕфт ка уидта, уони исахъилдта Павели ӕма ӕ хӕццӕ ка адтӕй, уони нихмӕ. Павел ӕма Сили ниййахӕстонцӕ, ехсӕй сӕ фӕннадтонцӕ ӕма сӕ ахӕстдонӕмӕ багӕлстонцӕ. Ку сӕ исуӕгъдӕ кодтонцӕ, удта нӕуӕг хуӕртӕ ӕма ӕнсувӕртӕмӕ ӕрбацудӕнцӕ ӕма сӕ бафедар кодтонцӕ. Уой фӕсте Павел, Силӕ ӕма Тимофей Филипптӕй рандӕ ’нцӕ, Лука ба, ӕвӕдзи, уоми байзадӕй. Еци ӕмбурд идарддӕр ци бацӕй? Йегови сугъдӕг хъаури фӕрци хуӕртӕ ӕма ӕнсувӕртӕ идарддӕр дӕр зингзӕрдӕй лӕггадӕ кодтонцӕ (Фил. 2:12). Павел си кунӕг сӕрустур н’ адтӕй!

3. Филиппӕгтӕмӕ 1:9–11 куд финст ӕй, уомӕ гӕсгӕ Павел цӕй туххӕй кувта?

³ Еу дӕс анзей фӕсте Павел Филиппти ӕмбурдмӕ финстӕг ниффинста. Еци финстӕгӕй бӕрӕг ӕй, Павел хуӕртӕ ӕма ӕнсувӕрти куд берӕ уарзта, е. Е сӕмӕ финста: «Йесо Киристей хузӕн уӕ фӕлмӕн уарзтӕй... уарзун ӕма уӕ фӕууинунмӕ... хъӕбӕр бӕллун» (Фил. 1:8). Павел ма загъта, уони туххӕй Йеговӕмӕ ке фӕкковуй, цӕмӕй сӕ уарзондзийнадӕ фулдӕрӕй-фулдӕр кӕна, сӕйрагдӕр ци ӕй, уой лӕдӕронцӕ,  фау ӕрхӕссӕн сӕмӕ ма уа, иннетӕн къахкъуӕрӕн ма уонцӕ ӕма хуарз тиллӕг дӕттонцӕ. Ӕвӕдзи, исарази уодзӕнӕ, Павели дзурдтӕй берӕ цӕбӕлдӕрти ке ахур кӕнӕн. (Бакӕсӕ Филиппӕгтӕмӕ 1:9–11.) Аци статьяй Павели дзурдтӕмӕ лӕмбунӕгдӕр ӕркӕсдзиан ӕма расагъӕс кӕндзиан, махмӕ куд хаунцӕ, уобӕл.

4. а) 1 Иоанни 4:9, 10 куд финст ӕй, уомӕ гӕсгӕ Йеговӕ куд бавдиста, берӕ нӕ ке уарзуй, уой? б) Хуцауи куд гъӕуама уарзӕн?

⁴ Йеговӕ нӕ куд берӕ уарзуй, уой бавдиста, ӕ Фурти зӕнхӕмӕ ке рарвиста ӕма ’й нӕ тӕрегъӕдти туххӕй нивонди ке ’рхаста, уомӕй. (Бакӕсӕ 1 Иоанни 4:9, 10.) Хуцау нӕ уотӕ ке уарзуй, е нӕ разӕнгард кӕнуй, цӕмӕй ӕй мах дӕр уарзӕн (Ром. 5:8). Фал Хуцауи куд гъӕуама уарзӕн? Цӕмӕй уой хуӕздӕр балӕдӕрӕн, уой туххӕй ӕркӕсӕн, Йесо еу фарисеййӕн ци загъта, уомӕ: «Дӕ Хуцау Йегови уарзӕ ӕгас зӕрдӕй, ӕгас уодӕй ӕма ӕгас зундӕй» (Матф. 22:36, 37). Мах фӕндуй, цӕмӕй Йегови ӕгас зӕрдӕй уарзӕн ӕма еци уарзондзийнадӕ бонӕй-бонмӕ федардӕр кӕна. Павел филиппӕгтӕмӕ финста, сӕ уарзондзийнадӕ «фулдӕрӕй-фулдӕр» ке гъӕуама кӕна. Цума махӕн ба еци гъуддаги ци банхус кӕндзӕй?

5. Ци нин банхус кӕндзӕй, цӕмӕй Хуцауи никки фулдӕр уарзӕн?

⁵ Цӕмӕй Хуцауи бауарзӕн, уой туххӕй ӕй гъӕуама хуӕздӕр базонӕн. Библий финст ӕй: «Ка нӕ уарзуй, е ба Хуцауи нӕ базудта, уомӕн ӕма Хуцау ӕй уарзондзийнадӕ» (1 Иоан. 4:8). Апостол Павел балӕдӕрун кодта, Йегови куд хуӕздӕр зонгӕ цӕуӕн ӕма, аллихузи гъуддӕгтӕмӕ цӕхуӕн цӕстӕй кӕсуй, уой куд хуӕздӕр лӕдӕрӕн, уотӕ ’й никки фулдӕр ке уарздзиан (Фил. 1:9). Библи ахур кӕнун ку райдӕдтан, уӕд Хуцауи туххӕй берӕ нӕма зудтан, фал ӕй уӕддӕр бауарзтан. Ӕма Йегови куд хуӕздӕр зонгӕ цудан, уотӕ ’й уарзгӕ дӕр фулдӕр кодтан. Мадта хъӕбӕр ӕхсидзгӕ ’й Библи ӕдзох ахур кӕнун ӕма, ци бакастан, уобӕл лӕмбунӕг сагъӕс кӕнун (Фил. 2:16).

6. 1 Иоанни 4:11, 20, 21 куд финст ӕй, уомӕ гӕсгӕ нӕ ци кӕнун гъӕуй, цӕмӕй нӕ уарзондзийнадӕ фулдӕрӕй-фулдӕр кӕна?

⁶ Хуцау нӕ ке уарзуй, е нӕ разӕнгард кӕнуй не ’нсувӕрти уарзунмӕ. (Бакӕсӕ 1 Иоанни 4:11, 20, 21.) Ка ’й зонуй нӕмӕ хуӕртӕ ӕма ӕнсувӕрти уарзун ӕнцон кӕсуй, уомӕн ӕма не ’гасдӕр Йеговӕн лӕггадӕ кӕнӕн ӕма уой менеугутӕ ӕвдесӕн. Уомӕй уӕлдай ма Йесо Киристей уарзондзийнадӕ дӕр фӕнзӕн, Йесо ба мах туххӕй ӕ цард равардта. Фал уӕддӕр, фӕдзӕхст, кӕрӕдзей уарзетӕ, зӕгъгӕ, ӕнцон ӕнхӕстгӕнӕн нӕй. Нӕ зӕрдӕбӕл ӕрлӕуун кӕнӕн, Филиппти ӕмбурди ци хабар ӕрцудӕй, уой.

7. Павел Еводи ӕма Синтихийӕн ци унаффӕ равардта, уомӕй цӕбӕл ахур кӕнӕн?

⁷ Еводи ӕма Синтихи зингзӕрдӕ хуӕртӕ адтӕнцӕ. Етӕ апостол Павели хӕццӕ фӕрсӕй-фарсмӕ лӕггадӕ кодтонцӕ. Фал фӕххилӕ ’нцӕ, ӕвӕдзи, цӕхуӕндӕр гъуддӕгтӕмӕ фӕйнӕхузи цӕстӕй ке кастӕнцӕ, уой туххӕй. Еводи ӕма Синтихи ци ӕмбурди лӕггадӕ кодтонцӕ, еци ӕмбурдмӕ Павел финстӕг ку финста, уӕд еци хуӕрти кой дӕр искодта ӕма син унаффӕ равардта, цӕмӕй «ӕмхузӕн сагъӕс кодтайуонцӕ» (Фил. 4:2, 3). Удта ма Павел ӕгас ӕмбурдмӕ дӕр ниффинста, «алцидӕр кӕнтӕ ӕнӕ хъур-хъурӕй ӕма ӕнӕ буцӕутӕй», зӕгъгӕ (Фил. 2:14). Зӕгъӕн ес, ӕма еци унаффитӕ айдагъ Еводи ӕма Синтихийӕн пайда н’ адтӕнцӕ, фал Филиппти ӕгас хуӕртӕ ӕма ӕнсувӕртӕн дӕр, цӕмӕй сӕ уарзондзийнадӕ федардӕр кодтайдӕ.

8. Хатгай ӕнсувӕрти уарзун ӕнцон цӕмӕннӕ фӕууй, фал нин ци банхус кӕндзӕй?

 ⁸ Ӕвӕдзи, махӕн дӕр Еводи ӕма Синтихий хузӕн нӕ хуӕртӕ ӕма ӕнсувӕрти уарзун ӕнцон нӕ фӕууй, уомӕн ӕма син фиццагидӕр сӕ рӕдудтитӕмӕ фӕккӕсӕн. Рӕдуйгӕ ба ни алкедӕр кӕнуй. Ӕма иннетӕн сӕ рӕдудтитӕй ӕндӕр ку неци уинӕн, уӕд нӕ уарзондзийнадӕ ӕруазал уодзӕй. Зӕгъӕн, цӕхуӕндӕр ӕнсувӕрӕй феронх ӕй зали рафснайунмӕ фӕккӕсун, ӕма имӕ рамӕстгун дӕ. Е ’гас рӕдудтитӕ дӕр ин ку ’ргъуди кӕнай, уӕд дӕ маст фулдӕр кӕндзӕй, дӕ уарзондзийнадӕй ба нецибал байзайдзӕй. Кӕд ду дӕр ӕмбурди ескӕмӕ уотӕ фӕммӕстгун кӕнис, уӕд расагъӕс кӕнӕ еу гъуддагбӕл: Йеговӕ не ’гасей рӕдудтитӕ дӕр уинуй, фал нӕ уӕддӕр уарзуй. Уомӕ гӕсгӕ мах дӕр гъӕуама Йегови фӕнзӕн ӕма иннетӕн сӕ хуарз менеугутӕ уинӕн. Не ’нсувӕрти уарзунбӕл куд хъӕбӕрдӕр архайӕн, уотӕ нӕ еудзийнадӕ дӕр федардӕр кӕндзӕй (Фил. 2:1, 2).

9. «Ӕхсидзгӕдӕр ци ӕй», уомӕ ци хауй?

⁹ Хуцауи сугъдӕг хъаури разамундӕй Павел Филиппти хуӕртӕ ӕма ӕнсувӕрти, удта еугур киристӕнтти дӕр, разӕнгард кодта, «ӕхсидзгӕдӕр ци ӕй, уой исбӕрӕг кӕнтӕ», зӕгъгӕ (Фил. 1:10). «Ӕхсидзгӕдӕр ци ӕй», уомӕ хауй Хуцауи ном рохс кӕнун, ӕ фӕндон ӕнхӕст кӕнун ӕма ӕмбурди еудзийнадӕ гъӕуай кӕнун (Матф. 6:9, 10; Иоан. 13:35). Царди нин аци гъуддӕгтӕ фиццаг бунати ку уонцӕ, уӕд уомӕй бӕрӕг уодзӕй, Йегови ӕцӕгӕйдӕр ке уарзӕн, е.

10. Цӕмӕй Йегови цӕсти ӕнӕфау уӕн, уой туххӕй нӕ ци кӕнун гъӕуй?

¹⁰ Павел ма фӕдзахста, цӕмӕй нӕмӕ «фау ӕрхӕссӕн» мацӕмӕй уа. Е уобӕл дзорӕг нӕй, ӕма гъӕуама ӕнхӕст уӕн. Мах бон нӕй Йегови хузӕн ӕнӕфау ун. Фал нӕ уарзондзийнадӕ федар кӕнунбӕл ку архайӕн, удта, «ӕхсидзгӕдӕр ци ӕй, уой» ку лӕдӕрӕн, уӕд Йегови цӕсти уодзиан ӕнӕфау. Ӕнсувӕрти ке уарзӕн, е ба бӕрӕг уодзӕй, къахкъуӕрӕн син ку нӕ уӕн, уӕд.

11. Ескӕмӕн къахкъуӕрӕн исун тӕссаг цӕмӕн ӕй?

¹¹ Иннетӕн гъӕуама къахкъуӕрӕн ма уӕн. Еци гъуддагмӕ уӕлӕнгай цӕстӕй кӕсӕн нӕййес. Адӕймаг иннетӕн къахкъуӕрӕн куд исуй? Гӕнӕн ес, ӕма ескӕмӕн къахкъуӕрӕн исуӕн, ци ерхӕфсӕн, ци куст кенӕ ци хъӕппӕл равзурстан, уомӕй. Ка ’й зонуй, ци равзурстан, уоми лӕгъузӕй дӕр неци ес. Фал еци гъуддаг ескӕмӕн къахкъуӕрӕн ку исуа, уӕд е ба хуарз нӕбал уодзӕй. Киристе загъта, ӕ фустӕй ин еуей дӕр ка фӕррӕдуйун кӕна, уӕхӕн адӕймагӕн хуӕздӕр ке уодзӕй, ӕ хъурбӕл ин куройни дор ку арауиндзонцӕ ӕма ’й денгизмӕ ку ниггӕлдзонцӕ (Матф. 18:6).

12. Пионертӕй ка лӕггадӕ кӕнунцӕ, еци лӕг ӕма уоси хабарӕй цӕбӕл ахур кӕнӕн?

¹² Ӕркӕсӕн, пионертӕй ка лӕггадӕ кӕнунцӕ, уӕхӕн лӕг ӕма уосӕ Киристей фӕдзӕхстмӕ ке игъосунцӕ, уой куд бавдистонцӕ, уомӕ. Ци ӕмбурди лӕггадӕ кодтонцӕ, уоми адтӕй, ӕрӕги донаргъуд ка райста, уӕхӕн лӕг ӕма уосӕ. Етӕ ци бийнонти исирӕзтӕнцӕ, уоми син берӕ цидӕртӕ нӕ уагътонцӕ кӕнун ӕма киристӕнттӕ ку иссӕнцӕ, уӕд дӕр ма сӕмӕ уотӕ кастӕй, ӕма киномӕ цӕун не ’нгъезуй, лӕгъузӕй си ку неци ӕвдесонцӕ, уӕддӕр. Ӕма пионер бийнонтӕ киномӕ ке фӕццудӕнцӕ, уой ку базудтонцӕ, уӕд ракуддӕр ӕнцӕ. Пионер бийнонтӕ уой ку балӕдӕрдтӕнцӕ, уӕ сӕхецӕн унаффӕ рахастонцӕ, киномӕ ке нӕбал фӕццӕудзӕнцӕ, цалинмӕ еци лӕг ӕма уосӕ, хуарз ӕма лӕгъуз ци ӕй, уой хуӕздӕр ӕртасун не ’сахур уонцӕ, уӕдмӕ (Дзиуит. 5:14). Уотемӕй  пионертӕ гъуддагӕй бавдистонцӕ, ӕрӕги донаргъуд ка райста, еци бийнонти ке уарзунцӕ, уой (Ром. 14:19–21; 1 Иоан. 3:18).

13. Уомӕн куд ес гӕнӕн, цӕмӕй адӕймаги ӕнӕбари тӕрегъӕд искӕнунмӕ баразӕнгард кӕнӕн?

¹³ Иннетӕн ма къахкъуӕрӕн исуодзиан, ӕнӕбари сӕ тӕрегъӕд искӕнунмӕ ку баразӕнгард кӕнӕн, уӕд. Цума уотӕ куд рауайуй? Зӕгъӕн, ниуазагӕ адӕймаг Библи ахур кӕнун райдӕдта ӕма кӕддӕр-некӕд ӕ ниуӕзтӕ ниууадзун ӕ бон иссӕй. Лӕдӕруй ӕй, еунӕг хупп дӕр ма си ку искӕна, уӕд ӕй е хуарзӕй ке нецӕмӕ ӕркӕндзӕй. Еци адӕймаг ӕ царди берӕ ӕййивддзийнӕдтӕ искодта ӕма донаргъуд райста. Рӕстӕг рацудӕй ӕма ’й еу ӕнсувӕр сӕхемӕ рабадунмӕ ӕрбахудта ӕма ин тухӕй дӕр ниуазун кодта, зӕгъгӕ: «Ду нур киристон дӕ ӕма дин Йеговӕ ӕ сугъдӕг хъаурӕй ӕнхус кӕнуй. Сугъдӕг хъаури менеугутӕй ба сӕ еу ӕй хебӕл хуӕцун. Дӕхебӕл хуӕцун ку зонай, уӕдта еу минкъий раниуазун дӕр неци хилӕ кӕнуй, ӕрмӕстдӕр дӕ бӕрцӕ зонӕ». Расагъӕс кӕнӕ, нӕуӕг ӕнсувӕр еци унаффӕмӕ ку байгъустайдӕ, уӕд ӕй е цӕмӕ ӕркодтайдӕ!

14. Филиппӕгтӕмӕ 1:10 финст унаффӕй пайда кӕнунбӕл ӕмбурдти куд ахур кӕнӕн?

¹⁴ Филиппӕгтӕмӕ 1:10 финст унаффӕй пайда кӕнунбӕл ахур кӕнӕн ӕмбурдти дӕр. Кутемӕй? Фиццаг: ӕмбурдти цӕбӕл фӕдздзорӕн, уой фӕрци нӕ бон фӕууй, Йегови цӕсти ӕхсидзгӕдӕр ци ӕй, уой балӕдӕрун. Дуккаг: ӕмбурдти ахур кӕнӕн, ци базудтан, уомӕй пайда кӕнунбӕл, цӕмӕй нӕмӕ фау ӕрхӕссӕн мацӕмӕй уа. Ӕма ӕртиккаг: ӕмбурдти нӕ разӕнгард кӕнунцӕ  «уарзондзийнадӕмӕ ӕма хуарз гъуддӕгтӕмӕ» (Дзиуит. 10:24, 25). Ӕнсувӕртӕ нӕ ке бафедар кӕнунцӕ, уой фӕрци нӕ Хуцауи дӕр ӕма не ’нсувӕрти дӕр никки фулдӕр уарзун райдайӕн. Ӕма нӕ зӕрдӕ еци уарзондзийнадӕй идзаг ку уа, уӕд не ’гас хъауритӕй архайдзиан, цӕмӕй ескӕмӕн къахкъуӕрӕн ма исуӕн.

15. «Рӕстдзийнади гъӕздуг тиллӕг» дӕттунмӕ ци хауй?

¹⁵ Павел Филиппти хуӕртӕ ӕма ӕнсувӕрти туххӕй кувта, цӕмӕй сӕ бон адтайдӕ «рӕстдзийнади гъӕздуг тиллӕг дӕттун» (Фил. 1:11). Еци тиллӕгмӕ хаудтӕй, Йегови ӕма ӕ адӕни ке уарзтонцӕ е, удта цӕбӕл ӕууӕндтӕнцӕ ӕма син ци нифс адтӕй, уой иннетӕн ке дзурдтонцӕ, е дӕр. Филиппӕгтӕмӕ 2:15 ба финст ӕй: «Сумах аци дуйней ӕрттеветӕ рохсгӕнӕнти хузӕн». Аци дзурдтӕ нин нӕ зӕрдӕбӕл лӕуун кӕнунцӕ, Киристе ӕ ахуркӕнуйнӕгтӕн ци загъта, уой: «Сумах айтӕ аци дуйнейӕн рохс» (Матф. 5:14–16). Йесо ма ӕ фӕдбӕлдзӕугутӕн бафӕдзахста, цӕмӕй ин ахуркӕнуйнӕгтӕ цӕттӕ кодтайуонцӕ ӕма ин ӕвдесӕнтӕ адтайуонцӕ «сауӕнгӕ зӕнхи кӕрӕнттӕмӕ дӕр» (Матф. 28:18–20; Гъуд. 1:8). Ӕма мах дӕр еци гъуддаги зингзӕрдӕй ку архайӕн, уӕд «рӕстдзийнади гъӕздуг тиллӕг» дӕтдзиан.

16. Филиппӕгтӕмӕ 1:12–14 финст дзурдтӕ нин куд ӕвдесунцӕ, зин уавӕрти дӕр нӕ бон «рохсгӕнӕнти хузӕн» ӕрттевун ке ӕй? (Кӕсӕ хузӕмӕ ӕндаг цъарӕбӕл.)

¹⁶ Цийфӕнди уавӕрти дӕр нӕ бон ӕй «рохсгӕнӕнти хузӕн» ӕрттевун. Хатгай нӕ хуарз хабар радзорунмӕ ка фӕхъхъор кӕнуй, еци гъуддаг уотӕ разелуй, ӕма нин игъосун кӕнунмӕ фадуӕттӕ райгон унцӕ. Нӕ зӕрдӕбӕл ӕрлӕуун кӕнӕн апостол Павели хабар. Филиппӕгтӕмӕ финстӕг ку финста,  уӕд, ӕвӕдзи, Роми хӕдзари ахӕстӕй бадтӕй. Фал уӕхӕн уавӕри дӕр гъӕуайгӕнгутӕн ӕма имӕ ка ӕрбацӕуидӕ, уонӕн игъосун кодта. Павел уӕхӕн зингзӕрдӕ ке адтӕй, е ӕнсувӕрти дӕр разӕнгард кодта, Хуцауи Дзурд нифсгунӕй игъосун кӕнунмӕ. (Бакӕсӕ Филиппӕгтӕмӕ 1:12–14; 4:22.)

17. Хуӕртӕ ӕма ӕнсувӕртӕ зин уавӕрти дӕр хуарз хабар куд игъосун кӕнунцӕ, уомӕн цӕветтон ӕрхӕссӕ?

¹⁷ Берӕ хуӕртӕ ӕма ӕнсувӕртӕ дӕр Павели хузӕн нифсгун ӕнцӕ. Кадӕртӕ си цӕрунцӕ хӕдзарӕй-хӕдзарӕмӕ, удта ӕргом игъосун кӕнӕн кӕми нӕййес, уӕхӕн бӕсти. Фал сӕ е нӕ уорамуй ӕма хуарз хабар игъосун кӕнунмӕ ӕндӕр мадзӕлттӕ дӕр иссерунцӕ (Матф. 10:16–20). Зӕгъӕн, еци бӕститӕй еуеми цӕуӕг цӕстӕдарӕг игъосунгӕнгути баразӕнгард кодта, цӕмӕй хеуӕнттӕй, синхӕнттӕй, ӕмкъласонтӕй ӕма зонгитӕй сӕхецӕн «участоктӕ» искодтайуонцӕ ӕма уонӕн игъосун кодтайуонцӕ. Дууӕ анземӕ еци райони ӕмбурдти нимӕдзӕ дзӕвгарӕ фӕффулдӕр ӕй. Ка ’й зонуй, ду кӕми цӕрис, уоми дӕр нӕ гъуддаг ӕхгӕд ӕй. Фал мах бон дӕр ӕй еци сӕрӕн хуӕртӕ ӕма ӕнсувӕрти фӕнзун. Гъӕуама хуарз хабар игъосун кӕнунмӕ алли фадуатӕй дӕр пайда кӕнӕн ӕма ӕппундӕр ма гурусхӕ кӕнӕн, Йеговӕ нин хъауритӕ ке ратдзӕй, уобӕл, цийфӕнди уавӕрти ма уӕн, уӕддӕр (Фил. 2:13).

18. Идарддӕр дӕр цӕбӕл гъӕуама архайӕн?

¹⁸ Павел филиппӕгтӕмӕ финстӕги ци дзурдтӕ ниффинста, уонӕмӕ нӕ гъос ӕрдарун абони уӕлдай ӕхсидзгӕдӕр ӕй. Мадта идарддӕр дӕр архайӕн, цӕмӕй ӕхсидзгӕдӕр ци ӕй, уой лӕдӕрӕн, фау ӕрхӕссӕн нӕмӕ ма уа, иннетӕн къахкъуӕрӕн ма исуӕн ӕма рӕстдзийнади гъӕздуг тиллӕг дӕттӕн. Уӕд нӕ уарзондзийнадӕ фулдӕрӕй-фулдӕр кӕндзӕй ӕма нӕ уарзӕгой Фидӕ Йеговӕн кадӕ кӕндзиан.