1. Хуцауи лӕггадгӕнгути ци фӕндуй ӕма цӕмӕн? (Кӕсӕ хузӕмӕ ӕндаг цъарӕбӕл.)

ЙЕСО КИРИСТЕ ӕ фӕдбӕлдзӕугутӕн баихӕс кодта: «Цотӕ ӕма мин ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ» (Матф. 28:19). Хуцауи еузӕрдон лӕггадгӕнгутӕй алкедӕр фӕндуй еци ихӕс ӕнхӕст кӕнгӕй «иронхуати маци уадзун» (2 Тим. 4:5). Мах ӕй лӕдӕрӕн, уомӕй ӕхсидзгӕдӕр гъуддаг ке нӕййес, уой. Фал нин алкӕд нӕ фӕууайуй, цӕйбӕрцӕ нӕ фӕндадтайдӕ, уойбӕрцӕ лӕггадӕ кӕнун.

2. Беретӕ ни цӕхуӕн зиндзийнӕдтӕбӕл ӕмбӕлунцӕ?

² Царди медӕги ма нӕ рӕстӕг ӕма нӕ хъауритӕ кӕбӕл фӕххарз кӕнӕн, берӕ уӕхӕн гъуддӕгтӕ ес. Зӕгъӕн, кедӕрти ни берӕ косун гъӕуй, цӕмӕй нӕ бон уа нӕхе дӕр ӕма нӕ бийнонти дӕр дарун. Кӕбӕлдӕр бийнонти ӕндӕр ихӕстӕ фӕууй, кадӕр ба нези хӕццӕ тох кӕнуй, кӕмӕдӕр депресси ес кенӕ ба ӕ кари бацудӕй ӕма ӕ бон берӕ нӕбал ӕй. Цума нин ци банхус кӕндзӕй, уӕхӕн уавӕрти дӕр нӕ лӕггади «иронхуати маци уадзун»?

3. Киристе Матфеййи 13:23 ци дзурдтӕ загъта, етӕ махӕн цӕбӕл дзорӕг ӕнцӕ?

³ Кӕд нӕ уавӕртӕмӕ гӕсгӕ, цӕйбӕрцӕ нӕ фӕндадтайдӕ, уойбӕрцӕ лӕггадӕ кӕнун нӕ бон нӕй, уӕддӕр гъӕуама нӕ нифс ма сӕтта. Йесо ӕй зудта, алке ӕмхузӕн тиллӕг ке нӕ дӕтдзӕй. (Бакӕсӕ Матфеййи 13:23.) Йеговӕ устур аргъ кӕнуй, нӕ лӕггади нӕ бон цидӕриддӕр ӕй, уой ке кӕнӕн, уомӕн (Дзиуит. 6:10–12). Фал фӕууй уотӕ, ӕма ’й фӕллӕдӕрӕн, нӕ уавӕрти нӕ бон фулдӕр кӕнун ке ӕй, уой. Аци статьяй базондзиан, нӕ бон ци ӕй кӕнун, цӕмӕй нӕ лӕггадӕ фиццаг бунати ӕвӕрӕн, хумӕтӕг цард кӕнӕн, никки арӕхстгундӕрӕй игъосун кӕнӕн ӕма адӕнӕн рӕстдзийнадӕ амонӕн. Фал бал фиццаг базонӕн, нӕ лӕггади «иронхуати маци уадзун», куд лӕдӕргӕ ’й, уой.

4. Нӕ лӕггади иронхуати маци уадзӕн, зӕгъгӕ, куд лӕдӕргӕ ’й?

 ⁴ Цӕмӕй нӕ лӕггади иронхуати маци уадзӕн, уой туххӕй гъӕуама нӕ бон цидӕриддӕр ӕй, уой кӕнӕн, цӕмӕй адӕнӕн хуарз хабар игъосун кӕнӕн ӕма син рӕстдзийнадӕ амонӕн. Еци гъуддагӕн цӕйбӕрцӕ рӕстӕг дӕттӕн, Йеговӕ уомӕ нӕ кӕсуй, фал ӕй ци зӕрдӕй кӕнӕн, уомӕ. Мах ӕгас зӕрдӕй фӕндуй игъосун кӕнуни гъуддаги архайун, уомӕн ӕма Хуцауи ӕма адӕни уарзӕн (Мар. 12:30, 31; Кол. 3:23) *. Ӕгас зӕрдӕй игъосун кӕнун нисан кӕнуй не ’гас хъауритӕ дӕр еци гъуддагмӕ исаразун, цӕмӕй ӕй никки хуӕздӕр ӕнхӕст кӕнӕн. Ци кадӕ нӕмӕ ӕрхаудтӕй, уой ку лӕдӕрӕн, уӕд сагъӕс кӕндзиан, хуарз хабар куд фулдӕр адӕнӕн фегъосун кӕнӕн, уобӕл.

5, 6. Берӕ рӕстӕг кӕмӕн нӕййес, уӕхӕн адӕймагӕн дӕр ӕ лӕггадӕ фиццаг бунати ӕвӕрун ӕ бон ке ӕй, уомӕн цӕветтон ӕрхӕссӕ.

⁵ Дӕ цӕститӕбӕл рауайун кӕнӕ, гитарӕбӕл цӕгъдун берӕ ка уарзуй, уӕхӕн адӕймаги. Уадзӕ ’й, ӕма ибӕл сӕумӕй изӕрмӕ дӕр цӕгъддзӕй. Гъема алли сабат ӕма хуцаубони дӕр кафей гитарӕбӕл цӕгъдӕгӕй косун райдӕдта. Фал ин уоми минкъий ке федунцӕ, уомӕ гӕсгӕ ба авдисӕрӕй майрӕнбонмӕ тукани кассирӕй косуй. Кӕд ӕ фулдӕр рӕстӕг тукани ӕрветуй, уӕддӕр ӕ сагъӕстӕ музыкӕбӕл ӕнцӕ ӕма ӕ бон куд ӕй, уотӕ архайуй, цӕмӕй еци гъуддаги дӕснидӕр кӕна. Гъема ин рӕстӕг куддӕр фӕззиннуй, къуар минуттемӕй фулдӕр ку нӕ фӕууй, уӕддӕр ӕ гитарӕ райсуй ӕма цӕгъдун райдайуй.

⁶ Уоййау, ка ’й зонуй, дӕуӕн дӕр дӕ уавӕртӕмӕ гӕсгӕ берӕ лӕггадӕ кӕнун дӕ бон нӕй. Фал дин уомӕй фулдӕр цийнӕдзийнадӕ неци хӕссуй. Ӕма архайис, цӕмӕй еци гъуддаги никки арӕхстгундӕр исуай ӕма, ци хабар хӕссис, е адӕни зӕрдитӕмӕ никки хъӕбӕрдӕр гъара. Фал дӕ уӕддӕр цӕхуӕндӕр ӕнӕмӕнгӕ гъуддӕгтӕбӕл берӕ рӕстӕг харз кӕнун гъӕуй, ӕма, ӕвӕдзи, сагъӕс кӕнис, дӕ бон куд ӕй дӕ лӕггадӕ фиццаг бунати ӕвӕрун, уобӕл.

7, 8. Игъосун кӕнуни гъуддаги нӕ бон куд ӕй Киристей фӕнзун?

⁷ Игъосун кӕнуни гъуддагмӕ цӕхуӕн цӕстӕй гъӕуама кӕсӕн, уой Йесо Киристейӕй хуӕздӕр неке бавдиста. Уомӕн ӕ царди фиццаг бунати адтӕй Паддзахади хабар игъосун кӕнун (Иоан. 4:34, 35). Йесо еу ӕма дууӕ сӕдӕ километри нӕ рацудӕй, цӕмӕй хуарз хабар фулдӕр адӕнӕн фегъосун кодтайдӕ. Адӕни хӕццӕ радзорунмӕ алли фадуатӕй дӕр пайда кодта. Еу загъдӕй, Киристейӕн ӕ лӕггадӕй ӕхсидзгӕдӕр неци адтӕй.

⁸ Мах дӕр адӕни хӕццӕ радзорунмӕ алли фадуатӕй дӕр ку пайда кӕнӕн, уӕд уотемӕй Йесой фӕнздзиан. Мах цӕттӕ фӕууӕн нӕ лӕггади туххӕй нӕхе цӕмӕйдӕрти фӕццох кӕнунмӕ дӕр (Мар. 6:31–34; 1 Пет. 2:21). Еуӕй-еу хуӕртӕ ӕма ӕнсувӕртӕ лӕггадӕ кӕнунцӕ сӕрмагонд пионертӕй, пионертӕй ӕма ӕнхусгӕнӕг пионертӕй. Кадӕртӕ ба ӕндӕр ӕвзаг исахур кодтонцӕ ӕма, игъосунгӕнгутӕ кӕми нӕ фагӕ кӕнуй, уордӕмӕ рандӕ ’нцӕ. Фал игъосун кӕнуни гъуддагӕн ӕ фулдӕр хай ба кӕнунцӕ иннӕ игъосунгӕнгутӕ, еци гъуддаги сӕ бон цидӕриддӕр ӕй, уой ка кӕнуй, етӕ. Цийфӕнди хузи ма лӕггадӕ кӕнӕн, уӕддӕр ни Йеговӕ, нӕ бон ци ӕй, уомӕй фулдӕр нӕ агоруй. Уой фӕндуй, цӕмӕй «дессаги хуарз хабар» игъосун кӕнгӕй цийнӕ кӕнӕн (1 Тим. 1:11; Дук. з. 30:11).

9. а) Цӕмӕн ес зӕгъӕн, ӕма Павелӕн ӕ лӕггадӕ ӕ кустӕй сӕйрагдӕр адтӕй? б) Гъуддӕгти 28:16, 30, 31 куд финст ӕй, уомӕ гӕсгӕ Павел ӕ лӕггадӕмӕ цӕхуӕн цӕстӕй кастӕй?

⁹ Апостол Павел дӕр хуарз цӕветтон ниууагъта, нӕ лӕггадӕ нин цӕхуӕн бунати гъӕуама уа, уомӕн. Ӕ дуккаг игъосун кӕнуни балций Павел Коринфи цардӕй. Еци рӕстӕги имӕ ӕхца нӕбал адтӕй ӕма цатуртӕ хуйун райдӕдта. Фал ин еци куст фиццаг бунати н ’адтӕй. Павел куста, цӕмӕй маке батухсун кодтайдӕ ӕма ӕ бон коринфӕгтӕн игъосун кӕнун адтайдӕ (2 Кор. 11:7). Кӕд ӕй косун гъудӕй, уӕддӕр ин ӕ куст ӕ лӕггадӕй сӕйрагдӕр не ’ссӕй, ӕма алли сабати дӕр игъосун кодта. Уой фӕсте ба ӕ уавӕртӕ раййивтонцӕ, ӕма «е ’гас хъауритӕ дӕр исаразта Хуцауи дзурд игъосун кӕнунмӕ – дзиуиттӕгтӕн игъосун кодта ӕма син бӕлвурдгӕнӕнтӕ хаста, Йесо ӕцӕгӕйдӕр Киристе ке ӕй, уомӕн» (Гъуд. 18:3–5; 2 Кор. 11:9). Цӕйбӕрцӕдӕр рӕстӕги фӕсте ба ’й Роми ӕ хӕдзари ахӕстӕй ку дардтонцӕ, уӕдта игъосун кодта, ка имӕ ’рбацӕуидӕ, уонӕн, ӕма финстӕгутӕ финста. (Бакӕсӕ Гъуддӕгтӕ 28:16, 30, 31.) Павел нӕ бауагъта, цӕмӕй ӕй ӕ лӕггади ести бакъулумпи кодтайдӕ. Е финста: «Хуцау [нин] уӕхӕн куст... ке баихӕс кодта, уомӕ гӕсгӕ нӕ нифс нӕ сӕттуй» (2 Кор. 4:1). Кӕд мах дӕр берӕ косун гъӕуй, кӕддӕр Павели куд гъудӕй, уотӕ, уӕддӕр нӕ бон ӕй Хуцауи Паддзахади гъуддаг царди фиццаг бунати ӕвӕрун.

10, 11. Не ’нӕнездзийнадӕ хуӕздӕр гъӕуагӕ ку уа, уӕд дӕр нӕ бон куд ӕй, уотӕ архайун, цӕмӕй нӕ лӕггади иронхуати маци уадзӕн?

¹⁰ Кӕд де ’нӕнездзийнадӕ хуӕздӕр гъӕуагӕ ’й, кенӕ дӕбӕл ӕнзтӕ сӕ уӕзӕ ӕруагътонцӕ, ӕма уой туххӕй дӕ бон нӕй хӕдзарӕй-хӕдзарӕмӕ игъосун кӕнун, уӕддӕр дӕ бон ӕй ӕндӕрхузи лӕггадӕ кӕнун. Фиццаг ӕноси киристӕнттӕ игъосун кодтонцӕ, адӕн кӕмидӕриддӕр адтӕй, уоми. Етӕ Паддзахади хабар дзурдтонцӕ «адӕни рази дӕр ӕма хӕдзарӕй-хӕдзарӕмӕ дӕр», удта син радзорунмӕ фадуат кӕми фӕззиннидӕ, уоми (Гъуд. 17:17; 20:20). Кӕд берӕ цӕун нӕ фӕразис, уӕд дӕ бон ӕй, берӕ адӕн кӕми фӕууй, уоми исбадун ӕма дӕ рӕзти ка цӕуа, уони хӕццӕ дзубанди кӕнун. Уомӕй уӕлдай ма игъосун кӕнун ӕнгъезуй финстӕгути фӕрци, телефонӕй кенӕ ба дин радзорунмӕ фадуат кӕми фӕззиннуй, уоми. Хуӕртӕ ӕма ӕнсувӕртӕй, беретӕн сӕ бон нӕй хӕдзарӕй-хӕдзарӕмӕ берӕ игъосун кӕнун, фал син уӕддӕр  хъӕбӕр ӕхцӕуӕн ӕй, игъосун кӕнуни гъуддаги архайун сӕ бон ке ӕй, е.

¹¹ Сӕйгӕ ку уӕн, уӕддӕр нӕ бон ӕй уотӕ архайун, цӕмӕй нӕ лӕггади иронхуати маци уадзӕн. Еу хатт дӕр ма ӕркӕсӕн апостол Павели хабармӕ. Е финста: «Алцидӕр мӕ бон ӕй, хъаурӕ мин ка дӕттуй, уой фӕрци» (Фил. 4:13). Еци хъаурӕ ’й багъудӕй, игъосун кӕнуни балций ку фӕссӕйгӕ ’й, уӕд. Галатӕгтӕмӕ финста: «Фиццаг хатт уин хуарз хабар сӕйгӕй... игъосун кодтон» (Гал. 4:13). Нӕ бон куд ӕй Павели фӕнзун? Зӕгъӕн, сӕйгӕ ку уӕн, уӕд нӕ бон ӕй дохтиртӕн игъосун кӕнун, уӕддӕр сӕ хӕдзари зин баййафӕн фӕууй.

12. Нӕ цӕстӕ еу цӕмӕдӕр арӕзт куд гъӕуама уа?

¹² Киристе дзурдта: «Бауӕрӕн ӕ цирагъ цӕстӕ ӕй. Ӕма дӕ цӕстӕ еу цӕмӕдӕр арӕзт ку уа [кенӕ хумӕтӕг, феп.], уӕд дӕ бауӕр ӕгасӕйдӕр уодзӕй рохс» (Матф. 6:22). Цума ’й уомӕй ци зӕгъун фӕндадтӕй? Хумӕтӕг цард ку кӕнӕн, уӕд нӕ сагъӕстӕ ӕма нӕ хъауритӕ еу цӕмӕдӕр арӕзт уодзӕнцӕ ӕма нин хъори хуасӕ неци исуодзӕй. Еци гъуддаги нин Йесо ӕхуӕдӕг фӕнзуйнаг ӕй. Уомӕн ӕ лӕггадӕй сӕйрагдӕр неци адтӕй, удта ӕ фӕдбӕлдзӕугути дӕр ахур кодта, цӕмӕй царди фиццаг бунати ӕвардтайуонцӕ Йегови ӕма ӕ Паддзахади гъуддаг. Мах дӕр Йесой ку фӕнзӕн, уӕд фиццагидӕр агордзиан Хуцауи Паддзахадӕ, гъома нӕ хъауритӕ хуарз хабар игъосун кӕнуни гъуддагмӕ исараздзиан (Матф. 6:33).

13. Нӕ бон ци ӕй кӕнун, цӕмӕй нин игъосун кӕнунмӕ фулдӕр рӕстӕг уа?

¹³ Цӕмӕй игъосун кӕнуни гъуддаг фиццаг бунати ӕвӕрӕн, уой туххӕй нӕ бон ӕй нӕ  цард фӕххумӕтӕгдӕр кӕнун *. Уотемӕй нин фулдӕр рӕстӕг уодзӕй адӕнӕн банхус кӕнунмӕ, цӕмӕй Йегови базононцӕ ӕма ’й бауарзонцӕ. Зӕгъӕн, ӕнгъезуй, кустбӕл нин ци рӕстӕг цӕуй, уоми ести раййевун, цӕмӕй нин косгӕ бӕнтти фулдӕр игъосун кӕнун ӕнтӕса. Кенӕ ба нӕ бон ӕй расагъӕс кӕнун, уолӕфт ӕма ерхӕфсӕнтӕбӕл цӕйбӕрцӕ рӕстӕг харз кӕнӕн, уобӕл.

14. Еу бийнонтӕ ци бакодтонцӕ, цӕмӕй син игъосун кӕнунмӕ фулдӕр рӕстӕг адтайдӕ?

¹⁴ Ӕркӕсӕн, хестӕр нӕлгоймаг Элайас ӕма ӕ бийнойнаг куд бакодтонцӕ, уомӕ. Элайас зӕгъуй: «Кӕд пионертӕй лӕггадӕ кӕнун нӕ бон н’ адтӕй, уӕддӕр ӕй лӕдӕрдтан, ести раййевун нӕ ке гъӕуй, уой. Уомӕ гӕсгӕ нӕхецӕн нисан исӕвардтан, игъосун кӕнуни гъуддаги фулдӕр ке архайдзиан, ӕма сабургай еци нисанбӕл архайун райдӕдтан. Нӕ хӕрзтӕ фӕмминкъийдӕр кодтан, удта нин ерхӕфсӕнтӕ ӕма уолӕфтбӕл ци рӕстӕг цудӕй, уой дӕр. Уомӕй уӕлдай ма ни алкедӕр ӕ кусти хецауи хӕццӕ бадзубанди кодта, цӕмӕй нӕ графиктӕ еу минкъий феййивтайанӕ. Уотемӕй нин рӕстӕг фӕззиндтӕй изӕригӕнтти игъосун кӕнунмӕ, удта фулдӕр Библий ахуртӕ уадзун райдӕдтан, мӕйӕмӕ дууӕ бони ба косгӕ бӕнтти дӕр игъосун кодтан. Нӕ цийнӕн кӕрон дӕр н’ адтӕй!»

15, 16. 1 Тимофеймӕ 4:13, 15 куд финст ӕй, уомӕ гӕсгӕ никки дӕснидӕр игъосунгӕнгутӕ цӕй фӕрци исуодзиан? (Кӕсӕ ма рамкӕ « Цӕхуӕн нисӕнттӕ мин банхус кӕндзӕнцӕ, цӕмӕй мӕ лӕггади иронхуати маци уадзон».)

¹⁵ Нӕ бон ма ци ӕй кӕнун, цӕмӕй нин нӕ лӕггади иронхуати маци изайа? Зӕгъӕн, игъосун кӕнуни гъуддаги никки дӕснидӕр кӕнун. Ес уӕхӕн куститӕ, ӕма си рӕстӕгӕй-рӕстӕгмӕ  нӕуӕг естӕбӕлти ахур кӕнун фӕгъгъӕуй. Уотӕ зӕгъӕн ес нӕ игъосун кӕнуни гъуддагӕй дӕр. Гъӕуама алкӕддӕр архайӕн, цӕмӕй никки дӕснидӕр игъосунгӕнгутӕ исуӕн (Ӕмб. 1:5; бакӕсӕ 1 Тимофеймӕ 4:13, 15).

¹⁶ Цума нин еци гъуддаги ци банхус кӕндзӕй? Гъӕуама пайда кӕнӕн, «Нӕ цард ӕма лӕггадӕ» фембӕлди ци унаффитӕ фегъосӕн, уонӕй. Еци фембӕлдти ахур кӕнӕн, никки дӕснидӕр игъосунгӕнгутӕ цӕй фӕрци уодзиан, уобӕл. Зӕгъӕн, нӕ бон ӕй лӕмбунӕг игъосун, ӕмбурд ка уадзуй, еци ӕнсувӕр, ихӕслӕвӕрд кӕмӕн адтӕй, уомӕн ци дзоруй, уомӕ ӕма нӕхецӕн фӕббӕрӕг кӕнун, иннӕ хатт игъосун кӕнгӕй цӕмӕй испайда кӕндзиан, уой. Уомӕй уӕлдай ма нӕ бон ӕй ӕнхус ракорун нӕ игъосун кӕнуни къуари цӕстӕдарӕгӕй кенӕ ӕ хӕццӕ игъосун кӕнунмӕ фӕццӕун, кенӕ ба ӕндӕр фӕлтӕрдгун игъосунгӕнӕги, пионери кенӕ районон цӕстӕдарӕги хӕццӕ балӕггадӕ кӕнун. Игъосун кӕнунмӕ нин ци мадзӕлттӕ ес, уонӕй пайда кӕнунмӕ куд хуӕздӕр арӕхсӕн, уотӕ нин нӕ лӕггадӕ дӕр фулдӕр цийнӕдзийнадӕ хӕсдзӕй.

17. Нӕ лӕггади иронхуати ку неци уадзӕн, уӕд нӕмӕ цӕхуӕн арфӕдзийнӕдтӕ ӕнгъӕлмӕ кӕсуй?

¹⁷ «Мах ан Хуцауи ӕмкосгутӕ», ӕма нин е устур кадӕ ӕй! (1 Кор. 3:9). «Ӕхсидзгӕдӕр ци ӕй, уой» исбӕрӕг кӕнунбӕл ку архайӕн, ӕма нин нӕ лӕггадӕ сӕйраг ку уа, уӕд Йеговӕн цийнӕгӕнгӕй лӕггадӕ кӕндзиан (Фил. 1:10; Пс. 100:2). Йегови лӕггадгӕнгутӕ ке ан, уомӕ гӕсгӕ гъӕуама ӕппундӕр ма гурусхӕ кӕнӕн, зиндзийнӕдти рӕстӕг дӕр нин ӕ фӕндон ӕнхӕст кӕнунмӕ хъауритӕ ке дӕтдзӕй (2 Кор. 4:1, 7; 6:4). Йеговӕн ӕгас зӕрдӕй ку лӕггадӕ кӕнӕн, уӕд нин нӕ лӕггадӕ цийнӕдзийнадӕ хӕсдзӕй, цӕйбӕрцӕ нӕ фӕндуй, уойбӕрцӕ архайун нӕ бон ку нӕ уа, уӕддӕр (Гал. 6:4). Дӕ лӕггади иронхуати ку неци уадзай, уӕд уотемӕй ӕвдесдзӕнӕ, Йегови ӕма адӕни ке уарзис, уой. «Уотемӕй дӕхе дӕр фӕййервӕзун кӕндзӕнӕ ӕма дӕмӕ ка игъосуй, уони дӕр» (1 Тим. 4:16).