1. Беретӕмӕ Библи ахур кӕнун цӕмӕннӕ фӕццӕуй?

АБОНИ адӕнӕн цардамӕлттӕ кӕнун ӕнцон нӕй. Берӕ хуӕртӕ ӕма ӕнсувӕрти берӕ косун гъӕуй, цӕмӕй сӕ бон уа сӕ бийнонтӕ дарун. Кӕмӕндӕрти кустмӕ ӕма фӕстӕмӕ цӕунбӕл цалдӕргай сахӕттӕ рандӕ уй. Кадӕр ба уӕззау куст кӕнуй. Уӕхӕн хуӕртӕ ӕма ӕнсувӕртӕмӕ изӕрмӕ хъауритӕ нӕбал байзайуй ӕма сӕ тӕккӕ минкъийдӕр ци фӕффӕндуй, е – ӕрбадун ӕма ести ахур кӕнун.

2. Библи ӕртасунмӕ цӕхуӕн рӕстӕг равзарис?

² Фал ни уӕддӕр алкедӕр гъӕуй рӕстӕг хецӕн кӕнун, цӕмӕй Библи ӕма Библибӕл арӕзт публикацитӕ арф ӕртасӕн. Уомӕй кӕнгӕ ’й, Йеговӕмӕ хӕстӕг кӕндзиан ӕви нӕ, е, удта не ’носон цард дӕр (1 Тим. 4:15). Уомӕ гӕсгӕ беретӕ сӕумӕй раздӕр исистунцӕ, ӕма, цалинмӕ хӕдзари сабур фӕууй ӕма сӕ сӕр дзӕбӕх фӕккосуй, уӕдмӕ Библи фертасунцӕ. Кадӕртӕ ба уомӕн рӕстӕг рахецӕн кӕнунцӕ изӕрӕй.

3, 4. Нӕ организаци ци ӕрмӕг рауадзуй, е куд фӕмминкъийдӕр ӕй ӕма цӕмӕн?

³ Ӕвӕдзи, исарази уодзӕнӕ, ӕртасунмӕ рӕстӕг хецӕн кӕнун ке гъӕуй, уобӕл. Фал ци ӕнгъезуй ӕртасун? Ка ’й зонуй, зӕгъис: «Нӕ мин ӕнтӕсуй, цидӕриддӕр ӕрмӕг рацӕуй, уой еугурӕйдӕр кӕсун». Алке бон нӕй еугур публикацитӕ дӕр кӕсун, удта интернет-телеуинунади цидӕриддӕр видеоӕрмӕг рацӕуй, уомӕ кӕсун. Разамонӕг совет дӕр уой лӕдӕруй, ӕма уомӕ гӕсгӕ унаффӕ рахаста, мухури ке рауадзунцӕ ӕма интернети ке ниввӕрунцӕ, еци ӕрмӕг фӕмминкъийдӕр кӕнун.

⁴ Зӕгъӕн, «Йегови Ӕвдесӕнти ӕрвиланзон киунугӕ» уагъд нӕбал цӕуй, уомӕн ӕма берӕ дзӕбӕх цаутӕ иссерӕн ес сайти jw.org^® ӕма нӕ интернет-телеуинунади алли мӕйӕ дӕр ци программитӕ рацӕуй, уонӕми. Журналтӕ «Гъӕуайгӕнӕн  мӕсуг» иуарунмӕ ӕма «Ӕригъал уотӕ!» ба анзмӕ рацӕунцӕ ӕрмӕстдӕр ӕртӕ хатти. Еци ӕййивддзийнӕдтӕ уой туххӕй не ’скодтонцӕ, цӕмӕй нин ӕндӕр гъуддӕгтӕн фулдӕр рӕстӕг фӕззинна, фал цӕмӕй нӕ бон уа, «ӕхсидзгӕдӕр ци ӕй», уомӕ не ’ргом раздахун (Фил. 1:10). Ӕркӕсӕн, нӕ бон куд ӕй, ӕхсидзгӕдӕр ци ӕй, уой исбӕрӕг кӕнун ӕма нӕ бон ци ӕй кӕнун, цӕмӕй нин нӕ Библий ахур фулдӕр пайда хӕсса.

5, 6. Фиццагидӕр нӕ ахур кӕнун ци гъӕуй?

⁵ Фиццагидӕр ци гъӕуй ахур кӕнун? Алли бон дӕр нӕ ӕнӕмӕнгӕй гъӕуй ахур кӕнун Хуцауи Дзурд. Къуӕрей астӕу фембӕлди Библийӕй ци скъуддзаг фертасӕн, е нур фӕмминкъийдӕр ӕй. Уой фӕрци нин фулдӕр рӕстӕг ес, ци бакӕсӕн, уобӕл расагъӕс кӕнунмӕ ӕма фулдӕр ӕрмӕг иссерунмӕ. Нӕ нисан е нӕй, цӕмӕй еци сӕргӕндтӕ уӕлӕнгай каст ракӕнӕн, фал цӕмӕй Библий рӕстдзийнадӕ нӕ зӕрдӕбӕл бамбӕла ӕма Йеговӕмӕ хӕстӕгдӕр кӕнӕн (Пс. 19:14).

⁶ Уомӕй уӕлдай ма рӕстӕг гъӕуй «Гъӕуайгӕнӕн мӕсуги» ахурмӕ ӕма, къуӕрей астӕу ка фӕууй, еци фембӕлдмӕ бацӕттӕ кӕнунмӕ. Удта ма «Гъӕуайгӕнӕн мӕсуг» ӕма «Ӕригъал уотӕ!» журналтӕн ци нӕуӕг номертӕ рацӕуй, уони дӕр иронх кӕнун нӕ гъӕуй.

7. Нӕ нифс цӕмӕн гъӕуама ма сӕтта, нӕ сайти ӕма интернет-телеуинунади цидӕриддӕр рацӕуй, уони кӕсун нин ку нӕ уайа, уӕд?

⁷ Фал, ка ’й зонуй, зӕгъдзӕнӕ: «Нӕ сайти, удта интернет-телеуинунади ци берӕ нӕуӕг цидӕртӕ рацӕуй, уонӕн ба ци кӕнгӕ ’й?» Ӕркӕсӕн еу цӕветтонмӕ. Зӕгъӕн, ресторанмӕ ӕрбацудтӕ ӕма си фингӕбӕл дуйне аллихузи хуӕруйнӕгтӕ. Ӕма ’й лӕдӕрис, алцӕмӕй равзарун дин ке нӕ рауайдзӕй, уой. Уомӕ гӕсгӕ, ӕвӕдзи, ӕрмӕстдӕр цалдӕр хуӕруйнаги равзардзӕнӕ. Уотӕ нӕ сайти ӕма интернет-телеуинунади дӕр берӕ цидӕртӕ рацӕуй, ӕма дин алци кӕсун ку нӕ уайа, уӕд дӕ нифс ма сӕттӕд. Дӕ бон цӕйбӕрцӕ ӕй, уойбӕрцӕ кӕсӕ. Мадта ӕркӕсӕн, Библи ӕртасунмӕ ци хауй ӕма нин е фулдӕр пайда цӕй фӕрци ӕрхӕсдзӕй, уомӕ.

8. «Гъӕуайгӕнӕн мӕсуги» ахурмӕ дӕ бон куд ӕй дӕхе цӕттӕ кӕнун ӕма уотӕ ку кӕнай, уӕд дин е ци пайда ӕрхӕсдзӕй?

⁸ Библи ӕртасгӕй дӕ нисан гъӕуама уа уотӕ кӕсун, цӕмӕй ӕхсидзгӕ ести базонай. Уой туххӕй ӕрмӕг тагъд-тагъдӕй ракӕсун ӕма дзуӕппитӕ баханхӕ кӕнун фагӕ нӕй. Зӕгъӕн, «Гъӕуайгӕнӕн мӕсуги» статья цӕттӕ кӕнгӕй бал фиццаг ӕркӕсӕ раздзурдмӕ, уой фӕсте статьяй сӕргондмӕ ӕма дӕлсӕргӕндтӕмӕ, удта, статьяй кӕрон ци фарстатӕ фӕууй, уонӕмӕ. Уой фӕсте лӕмбунӕг ӕма ӕнӕ хӕлӕфӕй статья бакӕсӕ. Кӕсгӕ-кӕсгӕй дӕ гъос дарӕ сӕйраг гъудитӕмӕ. Етӕ арӕхдӕр фӕуунцӕ абзацтӕн сӕ фиццаг гъудиӕдти, ӕма ӕнхус кӕнунцӕ, абзаци дзурд цӕбӕл цӕудзӕй, уой балӕдӕрунмӕ. Статья кӕсгӕй, расагъӕс кӕнисӕ, алли абзац дӕр дӕлсӕргонди хӕццӕ кенӕ статьяй сӕйраг гъудий хӕццӕ куд куд баст ӕй, уобӕл. Ӕнӕзонгӕ дзурдтӕ ӕма дӕ лӕмбунӕгдӕр рартасун ке фӕндадтайдӕ еци гъудитӕ дӕхемӕ фӕббӕрӕг кӕнӕ.

9. а) «Гъӕуайгӕнӕн мӕсуги» ахурмӕ цӕттӕ кӕнгӕй Библий стихтӕмӕ не ’ргом ’здахун уӕлдай ӕхсидзгӕ цӕмӕн ӕй? б) Йесо Навин 1:8 куд финст ӕй, уомӕ гӕсгӕ ма нӕ стихтӕ бакӕсунӕй уӕлдай ци гъӕуй?

⁹ «Гъӕуайгӕнӕн мӕсуги» ахур ӕй Библий ахур. Ӕма статьяй ци стихтӕ фӕууй, уонӕмӕ дӕ гъос ӕрдарисӕ, уӕлдайдӕр ба, кӕсгӕ ке кӕндзӕнцӕ, уонӕмӕ. Расагъӕс кӕнӕ, стихти сӕйраг дзурдтӕ ӕма дзурдбӕститӕ  абзаци сӕйраг гъуди куд ӕргом кӕнунцӕ. Уомӕй уӕлдай ма рӕстӕг рахецӕн кӕнӕ, цӕмӕй расагъӕс кӕнай, еци стихтӕй дӕ царди куд испайда кӕндзӕнӕ, уобӕл. (Бакӕсӕ Йесо Навин 1:8.)

10. Дзиуиттӕгтӕмӕ 5:14 куд финст ӕй, уомӕ гӕсгӕ бийнонти ахури рӕстӕг ниййергутӕ сӕ сувӕллӕнтти, Библи ӕртасун куд гъӕуй, уобӕл цӕмӕн гъӕуама ахур кӕнонцӕ?

¹⁰ Ӕгас ниййергути дӕр фӕндуй, цӕмӕй бийнонти ахур сӕ сувӕллӕнтти зӕрдӕмӕ цӕуа. Ӕма уой туххӕй рагацау фӕссагъӕс кӕнунцӕ, куд ӕй рауадздзӕнцӕ, уобӕл. Фал е уобӕл дзорӕг нӕй, ӕма гъӕуама алли хатт дӕр дессаг еститӕ ӕргъуди кӕнонцӕ. Ке зӕгъун ӕй гъӕуй, бийнонти ахури рӕстӕг ӕнгъезуй интернет-телеуинунади нӕуӕг программӕмӕ бакӕсун кенӕ ба сувӕллӕнтти хӕццӕ ести исаразун, зӕгъӕн, Ной ке искодта, еци науи макет. Фал ма ӕхсидзгӕ ӕй сувӕллӕнттӕн амонун, Библи ахур кӕнун куд гъӕуй, уой дӕр. Гъӕуй син амонун, ӕмбурдтӕмӕ куд цӕттӕ кӕнгӕ ’й ӕма ӕрмӕг куд агоргӕ ’й, уой, зӕгъӕн, скъолай сӕ сӕ дини туххӕй дзорун ку гъӕуа, уӕд. (Бакӕсӕ Дзиуиттӕгтӕмӕ 5:14.) Сувӕллӕнттӕ Библийӕй цӕхуӕндӕр фарста ӕртасунмӕ рӕстӕг ку хецӕн кӕнонцӕ, уӕд син ӕмбурди кенӕ конгрессти программӕмӕ игъосун ӕнцондӕр уодзӕй. Уоми син алкӕд видеороликтӕ нӕ уодзӕй. Бийнонти ахур цӕйбӕрцӕ рӕстӕг гъӕуама цӕуа, е ба кӕнгӕ ’й, сувӕллӕнттӕ ци кари ’нцӕ ӕма цӕйбӕрцӕ лӕдӕрунцӕ, уомӕй.

11. Библи ке хӕццӕ ахур кӕнӕн, уони Библи арф ӕртасунбӕл цӕмӕн гъӕуама ахур кӕнӕн?

¹¹ Библи ӕртасун куд гъӕуй, уобӕл ма никкидӕр ке гъӕуама ахур кӕнӕн? Библи ке хӕццӕ ахур кӕнӕн, уони. Библий ахурмӕ кенӕ ӕмбурдмӕ сӕхе ку бацӕттӕ кӕнунцӕ ӕма дзуӕппитӕ ку баханхӕ кӕнунцӕ, уӕд нин е ӕхцӕуӕн куд нӕ фӕууй. Фал сӕ уӕддӕр гъӕуама уобӕл ахур кӕнӕн, цӕмӕй сӕхе бон уа Библи лӕмбунӕг ӕртасун. Гъе уӕд сӕ ести ӕхсидзгӕ унаффӕ рахӕссун ку багъӕуа, уӕд уайтагъд ӕмбурди иннети фӕрсун нӕ райдайдзӕнцӕ, куд бакӕнон, зӕгъгӕ, фал бал сӕ фарстабӕл нӕ публикацити ӕрмӕг сӕхуӕдтӕ байагордзӕнцӕ.

12. Библи ахур кӕнгӕй нӕ нисан ци фӕууй?

¹² Фал, ка ’й зонуй, Библи ахур кӕнун дӕ зӕрдӕмӕ неци уотӕ цӕуй. Цума дӕ бон ци ӕй раййевун? Фиццӕгти дӕ бон ӕй ахурӕн минкъийдӕр рӕстӕг хецӕн кӕнун, уой фӕсте ба ибӕл сабургай ӕфтаун. Дӕ гъудий дарӕ, Библи ахур кӕнгӕй дӕ нисан ци ӕй, уой – Йеговӕмӕ никки хӕстӕгдӕр кӕнун. Фал ма фӕууй ӕндӕр нисӕнттӕ дӕр, зӕгъӕн,  ци фарста нӕмӕ равардтонцӕ, уобӕл дзуапп иссерун кенӕ ба, цӕхуӕндӕр уавӕри хуӕздӕр куд адтайдӕ бакӕнун, уой базонун.

13. а) Скъоладзауи бон куд ӕй ӕхе бацӕттӕ кӕнун, цӕбӕл ӕууӕндуй, уой е ’мкъласонтӕн радзорунмӕ? б) Дӕ бон куд ӕй Колоссӕгтӕмӕ 4:6 финст дзурдтӕй испайда кӕнун?

¹³ Зӕгъӕн, скъолай де ’мкъласонтӕ еугурӕйдӕр эволюций теорибӕл ӕууӕндунцӕ, ӕма дӕ фӕндуй, цӕмӕй син, Библи уой туххӕй ци зӕгъуй, уой радзорай. Фал дӕмӕ, ка ’й зонуй, уотӕ кӕсуй, ӕма дӕмӕ фагӕ зонундзийнӕдтӕ нӕййес. Уӕхӕн уавӕри хуарз адтайдӕ Библи лӕмбунӕгдӕр рартасун. Дӕ бон ӕй дууӕ нисани исӕвӕрун. Фиццагидӕр бал ӕй дӕхуӕдӕг никки хуӕздӕр балӕдӕрӕ, алцидӕр Хуцау ке сфӕлдиста, уобӕл ӕууӕндӕн цӕмӕн ес, уой. Дуккаги ба рӕстдзийнади сӕрбӕл дзорун исахур уо (Ром. 1:20; 1 Пет. 3:15). Расагъӕс кӕнӕ, де ’мкъласонтӕ эволюций теорийӕн цӕхуӕн бӕлвурдгӕнӕнтӕ фӕххӕссунцӕ, уобӕл. Уой фӕсте ба ӕркӕсӕ, уой туххӕй нӕ публикацити ци финст ес, уомӕ. Цӕбӕл ӕууӕндис, уой иннетӕн лӕдӕрун кӕнун, куд ӕнгъӕл дӕ, уотӕ зин нӕй. Беретӕ эволюций теорибӕл ӕрмӕстдӕр уомӕн ӕууӕндунцӕ, ӕма ибӕл, сӕ цӕсти кадгин ка ӕй, уӕхӕн адӕймаг ӕууӕндуй. Библи уой туххӕй ци зӕгъуй, уомӕн еу кенӕ дууӕ бӕлвурдгӕнӕни ку ’рхӕссай, уӕд етӕ дӕр фагӕ уодзӕнцӕ, еци фарстабӕл ӕцӕгӕйдӕр дзуапп базонун ке фӕндуй, уомӕн. (Бакӕсӕ Колоссӕгтӕмӕ 4:6.)

14–16. а) Библий киунугутӕй уотӕ хуарз ке нӕ зонис, уони хуӕздӕр базонунмӕ дин ци банхус кӕндзӕй? б) 16 абзаци кӕрон ци стихтӕ ес, етӕ Амоси киунуги туххӕй фулдӕр базонунмӕ куд ӕнхус кӕнунцӕ? (Кӕсӕ ма рамкӕ « Библий хабӕрттӕ дӕ цӕститӕбӕл уайун кӕнӕ».)

¹⁴ Зӕгъӕн, иннӕ фембӕлди дзурд цӕудзӕй, «минкъий пахампартӕ» ке хонунцӕ, еци киунугутӕй еуебӕл, ӕма ибӕл уотӕ берӕ нӕ зонис. Байархайӕ, цӕмӕй еци пахампар ци ниффинста, уой туххӕй дӕ фулдӕр базонун бафӕндӕуа. Кутемӕй?

¹⁵ Фиццагидӕр бал расагъӕс кӕнӕ: «Аци киунугӕ ка ниффинста, еци адӕймаги туххӕй ци зонун? Ка адтӕй, кӕми цардӕй ӕма ци куст кодта?» Еци пахампари туххӕй фулдӕр ку базонай, уӕд ӕй балӕдӕрдзӕнӕ, цидӕр бӕлвурд дзурдтӕй кенӕ цӕветтонтӕй цӕмӕн пайда кодта, уой. Ӕ киунугӕ ин ку кӕсай, уӕд дӕ гъос ӕрдарӕ, цӕхуӕн адӕймаг адтӕй, уой ка ӕвдесуй, еци дзурдбӕститӕмӕ.

¹⁶ Уомӕй уӕлдай ма хуарз уайдӕ, еци киунугӕ финст кӕд ӕрцудӕй, уой базонун. Е зин нӕй. Ӕрмӕстдӕр дӕ гъӕуй райгон кӕнун, «Нӕуӕг дуйней тӕлмаци» фӕстаг фӕрстӕбӕл ци уӕлӕнхасӕн ес, «Библий киунугутӕ», зӕгъгӕ, уой (bi12-OSS). Уомӕй уӕлдай ма дӕ бон ӕй ӕркӕсун схемӕмӕ «Иуди ӕма Израили пахампартӕ ӕма паддзӕхтӕ» (1 ӕма 2 хай) брошюри «Ӕрмӕг Библи ӕртасунмӕ» (sgd-OSS). Ӕмбурди ци киунугӕбӕл дзордзӕнцӕ, е пахампарӕдти киунугӕ ку уа, уӕд хуарз уайдӕ базонун, уӕди рӕстӕги цӕхуӕн уавӕртӕ адтӕй, уой. Пахампар адӕни цӕхуӕн гъуддӕгтӕ ниууадзунмӕ разӕнгард кодта? Ӕ рӕстӕги ма ка цардӕй? Никки фулдӕр хабӕрттӕ базонунмӕ ма дӕ, ка ’й зонуй, Библий иннӕ киунугутӕмӕ ӕркӕсун дӕр багъӕудзӕй. Зӕгъӕн, пахампар Амоси рӕстӕги цӕхуӕн уавӕртӕ адтӕй, уой базонунмӕ дӕ бон ӕй ӕркӕсун, Амос 1:1 стихи 2 Паддзӕхти ӕма 2 Анзфинстити киунугутӕй ци уӕлӕнхасӕн стихтӕ амунд ӕнцӕ, уонӕмӕ. Уомӕй уӕлдай ма дӕ бон ӕй Осий пахампарадӕ ӕргъуди кӕнун, уомӕн ӕма е дӕр Амоси рӕстӕги цардайдӕ. Уой фӕрци никки хуӕздӕр базондзӕнӕ, Амос цӕхуӕн уавӕрти цардӕй, уой (2 Пад. 14:25–28; 2 Анз. 26:1–15; Оси 1:1–11; Амос 1:1).

17, 18. Листӕг хабӕрттӕмӕ де ’ргом ку ’здахай, уӕд Библи ӕртасун дӕ зӕрдӕмӕ никки фулдӕр цӕмӕн цӕудзӕй? Ӕрхӕссӕ, абзаци ци цӕветтонтӕ ес, уони кенӕ дӕхуӕдӕг ке рартастай, уонӕй ести.

¹⁷ Хуарз уайдӕ, Библи кӕсгӕй не ’ргом листӕг хабӕрттӕмӕ дӕр ӕздахун. Зӕгъӕн, кӕсӕн Захарий 12 сӕри пахампарадӕ Мессийи мӕлӕти туххӕй (Зах. 12:10). 12 стихи финст ӕй, «Нафани хӕдзарвӕндаг» ибӕл ке кӕудзӕй. Дӕ бон ӕй аци дзурдтӕбӕл райевгъуйун, фал хуӕздӕр уодзӕй, ку ӕрлӕууай ӕма ку расагъӕс кӕнай: «„Нафани хӕдзарвӕндагӕн“ ӕма Мессийӕн еумӕйагӕй ци ес? Уой туххӕй фулдӕр базонун кӕми ӕнгъезуй?» Аци фарста лӕмбунӕгдӕр рартасӕн. Стихи дзурд «Нафанмӕ» ес дууӕ уӕлӕнхасӕни. Сӕ еу ӕй 2 Самуили 5:14 стихмӕ, ӕма си финст ес, Нафан паддзах Давиди фурттӕй сӕ еу ке адтӕй. Иннӕ ба ӕй Лукай 3:31 стихмӕ, ӕма си базонӕн ес, Йесо ӕ мадӕ Марийи ’рдигӕй Нафани байзӕддаг ке адтӕй *. Е дин еу гъуддаг. Идарддӕр, мах зонӕн, Мессийӕ пахампарадӕмӕ гӕсгӕ Давиди байзӕддаг ке гъӕуама адтайдӕ (Матф. 22:42). Фал Давидӕн 20 фуртемӕй фулдӕр адтӕй. Мадта дӕмӕ дессаг нӕ кӕсуй, Захари, Йесой мӕлӕтбӕл ка кӕудзӕй, уони кой кӕнгӕй Нафани хӕдзарвӕндаги туххӕй ке ниффинста?

¹⁸ Ӕркӕсӕн ма еу хабармӕ дӕр. Лукай Евангелий 1 сӕри финст ӕй, изӕд Гавриил Марийӕн, ка ин райгурдзӕй, еци фурти туххӕй уотӕ ке загъта: «Е уодзӕй номдзуд адӕймаг ӕма ’й хондзӕнцӕ Еунӕг Устур Хуцауи Фурт. Уомӕн Йеговӕ Хуцау ратдзӕй ӕ фидӕ Давиди паддзахбадӕн. Ӕма Иакови хӕдзарвӕндагӕн ӕносмӕ уодзӕй паддзах» (Лук. 1:32, 33). Ӕвӕдзи, фиццагидӕр не ’ргом раздахдзиан стихи фиццаг хаймӕ,  гъома Киристей «Еунӕг Устур Хуцауи Фурт» ке хондзӕнцӕ. Фал ма Гавриил уотӕ дӕр загъта, «уодзӕй паддзах», зӕгъгӕ. Нӕ бон ӕй расагъӕс кӕнун, Марийӕ еци дзурдти фӕсте цӕбӕл рагъуди кодтайдӕ. Цума имӕ уотӕ нӕ факкастайдӕ, ӕма Киристе паддзах Ироди кенӕ ӕ фӕсте ка уодзӕй, уой бунӕт гъӕуама ниййахӕсса? Ӕ бон адтӕй расагъӕс кӕнун: «Кӕд Йесо ӕцӕгӕйдӕр паддзах исуодзӕй, уӕд ӕз уодзӕн паддзахи мадӕ, ӕма ме ’гас бийнонтӕ дӕр галауани цӕрдзӕнцӕ». Фал Библий некӕми финст ес, Марийӕ Гавриилӕн уӕхӕн цӕбӕлдӕрти ке дзурдта. Удта ма Марийӕ, Иаков ӕма Иоаннӕй уӕлдай, Паддзахади ӕхецӕн кадгин бунат нӕ агурдта (Матф. 20:20–23). Аци хабар ма уӕлдай хатт ӕвдесуй, Марийӕ дессаги сӕрниллӕг силгоймаг ке адтӕй.

19, 20. Иакови 1:22–25 ӕма 4:8 куд финст ӕй, уомӕ гӕсгӕ Библи ӕртасгӕй нӕ нисан ци гъӕуама уа?

¹⁹ Иронх ди ма уӕд, Библи ӕма публикацитӕ ӕртасгӕй нӕ сӕйраг нисан ци ӕй, уой – Йеговӕмӕ никки хӕстӕгдӕр исун. Удта ма нӕ фӕндуй хуӕздӕр балӕдӕрун, ӕцӕгӕй цӕхуӕн ан, уой ӕма нӕ раййевун ци гъӕуй, уой дӕр, цӕмӕй нӕ бон уа Хуцауи зӕрдӕ рохс кӕнун. (Бакӕсӕ Иакови 1:22–25; 4:8.) Библи ӕртасуни размӕ бал гъӕуама Йеговӕмӕ раковӕн ӕма си сугъдӕг хъаурӕ ракорӕн, цӕмӕй ӕрмӕгӕй фулдӕр пайда исесӕн ӕма нӕхемӕ уой цӕстӕй ракӕсӕн.

²⁰ Псаломзаргӕнӕг Йегови еузӕрдон лӕггадгӕнӕги туххӕй финста: «Еци адӕймагӕн цийнӕдзийнадӕ хӕссуй Йегови закъон. [...] Цийфӕнди ма кӕна – алцидӕр ин бантӕсдзӕй» (Пс. 1:2, 3). Алкедӕр ни фӕндуй, цӕмӕй мах туххӕй дӕр уотӕ зӕгъӕн уа!