1, 2. 1 Петури 4:7, 8 куд финст ӕй, уомӕ гӕсгӕ нин фӕлварӕнти рӕстӕг ци банхус кӕндзӕй?

АЦИ фуддуйней кӕрон куд хӕстӕгдӕр кӕнуй, уотӕ, гӕнӕн ес, ӕма уӕззау фӕлварӕнтӕбӕл исӕмбӕлӕн (2 Тим. 3:1). Зӕгъӕн, Нигулӕн Африки бӕститӕй еуеми ӕвзурстити фӕсте змӕнститӕ райдӕдтонцӕ. Анзи ’рдӕгӕй фулдӕр хуӕртӕ ӕма ӕнсувӕртӕн гъӕунгӕмӕ рацӕун дӕр тӕссаг адтӕй, уомӕн ӕма адӕн исагъуд ӕнцӕ ӕма некӕбӕл аурстонцӕ. Цума син еци зин рӕстӕг ци банхус кодта? Еуӕй-еуети сӕхемӕ баиуазӕг кодтонцӕ, ӕдасдӕр рауӕнти ка цардӕй, еци хуӕртӕ ӕма ӕнсувӕртӕ. Еу ӕнсувӕр загъта: «Ме ’мбӕлттӕ мӕ фарсмӕ ке адтӕнцӕ, уобӕл хъӕбӕр цийнӕ кодтон! Нӕ бон адтӕй кӕрӕдзей федар кӕнун».

² «Устур бӕллӕх» ку райдайа, уӕд нӕ нӕ еузӕрдон ӕмбӕлтти ӕнхус хъӕбӕр гъӕудзӕй (Рарг. 7:14). Уомӕ гӕсгӕ нин абони хъӕбӕр ӕхсидзгӕ ӕй архайун, цӕмӕй нӕ хуӕртӕ ӕма не ’нсувӕрти хӕццӕ хуарз ӕмбӕлттӕ исуӕн. (Бакӕсӕ 1 Петури 4:7, 8.) Берӕ цӕбӕлдӕрти ахур кӕнӕн Йеремий хабарӕй. Йереми е ’мбӕлтти фӕрци фӕййервазтӕй, Йерусалим пурхӕгонд ку ’рцудӕй, уӕд *. Мадта ӕркӕсӕн, Йеремий хабарӕй цӕбӕл ахур кӕнӕн, уомӕ.

3. а) Йеремий цӕмӕн фӕндадтайдӕ ӕхе иннетӕй райеуварс кӕнун? б) Йереми ӕ финсӕг Варухӕн ци дзурдта ӕма е сӕ дууемӕн дӕр ци пайда ӕрхаста?

³ Тӕккӕ минкъийдӕр 40 анзей дӕргъи Йереми мӕнгард адӕни астӕу фӕццардӕй, кадӕртӕ си адтӕнцӕ ӕ синхонтӕ,  кадӕртӕ ба – ӕ хеуӕнттӕ, ӕ райгурӕн горӕт Анафофӕй (Йер. 11:21; 12:6). Фал Йереми ӕхе иннетӕй нӕ еуварс кодта. Зӕгъӕн, ӕ тухст сагъӕстӕ ӕ еузӕрдон финсӕг Варухӕн радзурдта. Цӕбӕл тухстӕй, уой абони мах дӕр зонӕн, уомӕн ӕма уой туххӕй ӕ киунуги ниффинста (Йер. 8:21; 9:1; 20:14–18; 45:1). Расагъӕс кӕнӕ, цалинмӕ Варух Йеремий царди хабӕрттӕ финста, уӕдмӕ кӕрӕдзей хӕццӕ куд балимӕн адтайуонцӕ! (Йер. 20:1, 2; 26:7–11).

4. Йеговӕ Йеремийӕн ци баихӕс кодта ӕма е Йереми ӕма Варухи лимӕндзийнадӕбӕл куд рабӕрӕг ӕй?

⁴ Йереми берӕ ӕнзти дӕргъи израилӕгтӕн нифсгунӕй дзурдта, Йерусалимбӕл ци ’рцӕудзӕй, уой (Йер. 25:3). Йегови фӕндадтӕй, цӕмӕй адӕн ӕрфӕсмон кодтайуонцӕ, ӕма Йеремийӕн еци хабар тухтони ниффинсун кодта (Йер. 36:1–4). Йереми ӕма Варух еци гъуддагбӕл еумӕ фӕййархайдтонцӕ, ӕвӕдзи, еу цалдӕр мӕйи, ӕма еци рӕстӕгмӕ ӕнӕмӕнгӕй лимӕн дӕр бацӕнцӕ, удта кӕрӕдзей ӕууӕндундзийнадӕ дӕр федар кодтонцӕ.

5. Варух ӕй куд бавдиста, Йеремийӕн хуарз ӕмбал ке адтӕй, уой?

⁵ Тухтонӕ цӕттӕ ку адтӕй, уӕд Йереми е ’мбал Варухи рарвиста, цӕмӕй ӕй адӕнӕн бакастайдӕ (Йер. 36:5, 6). Варух еци гъуддаг нифсгунӕй бакодта, кӕд е ӕ цардӕн тӕссаг адтӕй, уӕддӕр. Йеремийӕн кунӕг ӕхцӕуӕн н’ адтӕй, Варух ковӕндони тургъӕмӕ ку бацудӕй ӕма ин куддӕриддӕр загъта, уотӕ ку бакодта, уӕд (Йер. 36:8–10). Варух ци бакодта, уой Иуди къниӕзтӕ дӕр фегъустонцӕ ӕма ин загътонцӕ, цӕмӕй син еци тухтонӕ гъӕрӕй бакастайтӕ (Йер. 36:14, 15). Къниӕзтӕ исфӕндӕ кодтонцӕ, еци тухтони ци хабар адтӕй, уой паддзах Иоакимӕн радзорун, фал бал Варухӕн загътонцӕ: «Цо, ӕма уӕ дууӕ дӕр уӕхе баримӕхсетӕ, ду дӕр ӕма Йереми дӕр, цӕмӕй маке зона, кӕми айтӕ, уой» (Йер. 36:16–19). Ӕма ин уотӕ дзӕгъӕли нӕ загътонцӕ!

6. Йереми ӕма Варух сӕхе куд бадардтонцӕ, сӕ нихмӕ ку рацудӕнцӕ, уӕд?

 ⁶ Паддзах Иоаким ку фегъуста, тухтони ци финст адтӕй, уой, уӕд рамӕстгун ӕй ӕма тухтонӕ басугъта, удта бардзурд равардта, цӕмӕй Йереми ӕма Варухи ниййахӕстайуонцӕ. Фал Йереми нӕ фӕттарстӕй. Е ӕндӕр тухтонӕ райста ӕма Варухӕн нӕуӕгӕй ниффинсун кодта, Йеговӕ ин ци загъта, уой. Гъема Варух, «Иуди паддзах Иоаким ке басугъта, еци тухтони цидӕриддӕр финст адтӕй, уой» нӕуӕгӕй ниффинста (Йер. 36:26–28, 32).

7. Йереми ӕма Варух ӕмгуст ке кодтонцӕ, е сӕбӕл куд рабӕрӕг адтайдӕ?

⁷ Арӕх фӕлварӕнти адӕн кӕрӕдземӕ фенгомдӕр унцӕ. Цалинмӕ Йереми ӕма Варух, фудзӕрдӕ паддзах Иоаким ке басугъта, еци тухтонӕ нӕуӕгӕй финстонцӕ, уӕдмӕ кӕрӕдзей никки хуӕздӕр базудтонцӕ ӕма хъӕбӕрдӕр балимӕн ӕнцӕ. Аци дууӕ еузӕрдон лӕггадгӕнӕги хабарӕй цӕбӕл ахур кӕнӕн?

8. Ӕцӕг ӕмбӕлттӕ иссерунмӕ нӕ ци фӕкъкъулумпи кӕнуй?

⁸ Ӕвӕдзи нин ӕнцон нӕй нӕ сагъӕстӕ ӕма нӕ тухститӕ ескӕмӕн дзорун, уомӕн ӕма нин кадӕр кӕддӕр нӕ зӕрдӕ фӕрресун кодта (Ӕмб. 18:19, 24). Кенӕ ба нӕмӕ уотӕ кӕсуй, ӕма нин рӕстӕг ӕма хъауритӕ нӕййес, цӕмӕй еске хӕццӕ балимӕн уӕн. Фал гъӕуама нӕ къохтӕ ма уадзӕн. Кӕд нӕ фӕндуй, цӕмӕй нӕ зиндзийнӕдти рӕстӕг хуӕртӕ ӕма ӕнсувӕртӕ бафедар кӕнонцӕ, уӕд сӕбӕл гъӕуама абони исахур уӕн нӕ зӕрдӕ дарун ӕма син нӕ зӕрди сагъӕстӕ дзорун. Е ӕхсидзгӕ къахдзӕф ӕй, цӕмӕй хуарз ӕмбӕлттӕ исуӕн (1 Пет. 1:22).

9. а) Йесо ӕй куд бавдиста, е ’мбӕлттӕбӕл ке ӕууӕндтӕй, уой? б) Зӕрдиаг дзубандий фӕрци лимӕндзийнадӕ куд федар кӕнуй? Ӕрхӕссӕ цӕветтон.

⁹ Йесо е ’мбӕлттӕбӕл ӕууӕндтӕй. Е бӕрӕг ӕй, ке си неци римахста, уомӕй (Иоан. 15:15). Мах бон дӕр ӕй Киристей фӕнзун ӕма иннетӕн дзорун, нӕ цийни хабӕрттӕ ӕма цӕбӕл тухсӕн, уой. Дӕ хӕццӕ ка дзора, уомӕ лӕмбунӕг игъосӕ, ӕма ’й фӕууиндзӕнӕ, еумӕйагӕй уӕмӕ берӕ цидӕртӕ ке ес. Зӕгъӕн, ӕмхузӕн сагъӕстӕ, ӕнкъарӕнтӕ ӕма нисӕнттӕ. Цӕветтонӕн ӕрхӕссӕн 29-анздзуд Синдий. Ӕ хуӕздӕр ӕмбал Мари-Луизӕбӕл цӕуй 67 анзи ӕма лӕггадӕ кӕнуй пионерӕй. Синди ӕма Мари-Луизӕ алли цуппӕрӕни дӕр сӕумӕй еумӕ фӕллӕггадӕ кӕнунцӕ ӕма кӕрӕдзей хӕццӕ аллихузи темитӕбӕл фӕдздзорунцӕ. Синди зӕгъуй: «Мӕ зӕрдӕмӕ хъӕбӕр цӕуй ме ’мбӕлтти хӕццӕ зӕрдиагӕй дзубандитӕ кӕнун. Уотемӕй сӕ мӕ бон ӕй хуӕздӕр базонун ӕма хуӕздӕр лӕдӕрун». Ду дӕр де ’мбалӕн дӕ зӕрди сагъӕстӕ ку дзорай, удта  е ци дзоруй, уомӕ дӕр лӕмбунӕг ку игъосай, уӕд уӕ лимӕндзийнадӕ федардӕр кӕндзӕй (Ӕмб. 27:9).

10. Ӕмбесӕндти 27:17 куд финст ӕй, уомӕ гӕсгӕ нӕ хуӕртӕ ӕма ӕнсувӕрти хӕццӕ ӕмгуст ку кӕнӕн, уӕд е ци пайда ӕрхӕсдзӕй?

¹⁰ Мах дӕр Варух ӕма Йеремий хузӕн нӕ хуӕртӕ ӕма ӕнсувӕрти хӕццӕ ӕмгуст ку кӕнӕн, уӕд син сӕ хуарз менеугутӕ уиндзиан, цӕбӕлдӕрти си ахур кӕндзиан ӕма сӕмӕ хӕстӕгдӕр кӕндзиан. (Бакӕсӕ Ӕмбесӕндтӕ 27:17.) Ӕхцӕуӕн дин нӕ фӕууй, хуӕрӕ кенӕ ӕнсувӕр иннетӕн ӕ дини туххӕй куд нифсгунӕй дзоруй, кенӕ Йегови ӕма ӕ фӕндти туххӕй куд зӕрдиагӕй фӕдздзоруй, уой уинун? Ӕвӕдзи дин уӕд де ’мбал никки хъазардӕр исуй.

11, 12. Еумӕ лӕггадӕ кӕнгӕй нин ӕмбӕлттӕ куд фӕззиннуй, уомӕн цӕветтон ӕрхӕссӕ.

¹¹ Ӕркӕсӕн, ӕмгуст ке кӕнӕн, е нӕ кӕрӕдзебӕл куд бӕттуй, уомӕ. 23-анздзуд хуӕрӕ, Аделинӕ иннӕ хуӕрӕ Кандиси хӕццӕ бадзубанди кодта, цӕмӕй еумӕ фӕццудайуонцӕ, хуарз хабар рагӕй кӕми нӕбал игъосун кодтонцӕ, уӕхӕн территоримӕ. «Фӕндадтӕй нӕ, уӕхӕн лӕггадӕ ци цийнӕдзийнадӕ хӕссуй, уой нӕхебӕл бавзарун ӕма фулдӕр балӕггадӕ кӕнун,– зӕгъуй Аделинӕ.– Нӕ дууей дӕр фӕндадтӕй бафедар ун ӕма нӕмӕ хуӕздӕрӕй ци ес, уой Йеговӕн дӕттун». Цума син е ци пайда ӕрхаста? Аделинӕ зӕгъуй: «Алли изӕр дӕр зӕрдиагӕй дзубандитӕ кӕнианӕ, бони дӕргъи цӕхуӕн адӕнбӕл ӕмбалдан ӕма нӕбӕл ци цаутӕ ӕрцӕуидӕ, уобӕл. Дзорианӕ ма, Йегови ӕнхус нӕхебӕл куд балӕдӕрдтан, уобӕл дӕр. Нӕ дууей зӕрдӕмӕ дӕр хъӕбӕр цудӕй рӕстӕг уотӕ ӕрветун, удта уой фӕрци кӕрӕдзей дӕр никки хуӕздӕр базудтан».

¹² Францийӕй дууӕ ӕнӕцуд хуӕри, Лайлӕ ӕма Марианнӕ фондз къуӕремӕ игъосун кӕнунмӕ рандӕ ’нцӕ Астӕу-Африкаг Республики сӕйраг горӕт Бангимӕ. Лайлӕ зӕгъуй: «Бере зиндзийнӕдтӕбӕл исӕмбалдан, фал кӕрӕдзей хӕццӕ ӕргом ке дзурдтан ӕма уарзондзийнадӕ гъуддӕгтӕй ке ӕвдистан, уой фӕрци никки хуӕздӕр ӕмбӕлттӕ иссан.  Марианнӕ нӕуӕг уавӕртӕбӕл куд ахур кодта, бунӕттон адӕнмӕ куд хӕларзӕрдӕ адтӕй ӕма куд зингзӕрдӕй игъосун кодта, уомӕ кӕсгӕй ин никки хъӕбӕрдӕр аргъ кӕнун райдӕдтон». Цӕмӕй дин еске хуарз ӕмбал исуа, уой туххӕй дӕ ӕ хӕццӕ ӕндӕр бӕстӕмӕ цӕун нӕ гъӕуй. Де ’мбурди территорий дӕр хуӕртӕ ӕма ӕнсувӕрти хӕццӕ ку лӕггадӕ кӕнай, уӕд сӕ хуӕздӕр базондзӕнӕ ӕма дин хуарз ӕмбӕлттӕ фӕззиндзӕй.

13. Хуӕртӕ ӕма ӕнсувӕрти хӕццӕ лӕггадӕ кӕнгӕй хатгай ци фӕууинӕн?

¹³ Хатгай еумӕ лӕггадӕ кӕнгӕй хуӕртӕ ӕма ӕнсувӕртӕн айдагъ сӕ хуарз менеугутӕ нӕ фӕууинӕн, фал сӕ рӕдудтитӕ дӕр. Цума нин ци банхус кӕндзӕй, уотемӕй дӕр сӕ хӕццӕ лимӕн кӕнун? Нӕуӕгӕй бабӕй ӕркӕсӕн Йеремий хабармӕ. Цума уомӕн ба ци ӕнхус кодта, иннетӕн сӕ хуарз менеугутӕ уинун ӕма син сӕ рӕдудтитӕ хатир кӕнун?

14. Йереми Йегови туххӕй ци базудта ӕма цӕбӕл исахур адтайдӕ?

¹⁴ Йереми ниффинста, ӕ ном ин ка хӕссуй, еци киунугӕ, удта ма, ӕвӕдзи, 1 Паддзӕхти ӕма 2 Паддзӕхти киунугутӕ дӕр. Уонӕбӕл косгӕй ӕй никки хъӕбӕрдӕр балӕдӕрдтӕй, Йеговӕ ӕнӕнхӕст адӕнмӕ куд фӕлмӕнзӕрдӕ ӕй ӕма куд хатиргӕнагӕ ӕй, уой. Зӕгъӕн, Йереми базудта, Паддзах Ахав ӕ фудгъуддӕгтӕбӕл ку ӕрфӕсмон кодта, уӕд имӕ Йеговӕ ци цӕстӕй ракастӕй, уой. Йеговӕ ин загъта, ӕ бийнонти исӕфт ӕхе цӕститӕй ке нӕ фӕууиндзӕй (1 Пад. 21:27–29). Удта ма Йереми базудта, Манасси Йегови рази Ахавӕй уӕззаудӕр тӕрегъӕдтӕ ке кодта. Фал Йеговӕ Манассийӕн ниххатир кодта, уомӕн ӕма ӕрфӕсмон кодта (2 Пад. 21:16, 17; 2 Анз. 33:10–13). Аци хабӕртти фӕрци Йереми, ӕвӕдзи, Йеговӕй ахур кодта фӕразондзийнадӕбӕл ӕма иннетӕн тӕрегъӕд кӕнунбӕл ӕма еци менеугутӕ е ’мбӕлттӕмӕ дӕр ӕвдиста (Пс. 103:8, 9).

15. Йереми Йегови куд бафӕнзта ӕма Варухмӕ фӕразондзийнадӕ куд бавдиста?

¹⁵ Ӕркӕсӕн, Йереми Варухмӕ цӕхуӕн цӕстӕй ракастӕй, Хуцау ин ци баихӕс кодта, уомӕй еу минкъий ку фӕййеуварс ӕй, уӕд. Йереми Варухӕй нӕ фӕффудӕнгъӕл ӕй, фал ин банхус кодта ӕма ин Йеговӕ ци фӕлмӕн ӕма комкоммӕ унаффӕ равардта, уой ин фегъосун кодта (Йер. 45:1–5). Цума е махӕн цӕбӕл дзорӕг ӕй?

16. Ӕмбесӕндти 17:9 куд финст ӕй, уомӕ гӕсгӕ нин ци банхус кӕндзӕй нӕ хуарз ӕмбӕлтти хӕццӕ нӕ лимӕндзийнадӕ федардӕр кӕнун?

¹⁶ Ӕнӕрӕдуйгӕ неке ӕй. Мадта дин кӕд хуӕртӕ ӕма ӕнсувӕрти астӕу хуарз ӕмбал ес, уӕд де ’гас хъауритӕй архайӕ, цӕмӕй идарддӕр дӕр лимӕн кӕнайтӕ. Де ’мбал ку фӕррӕдуйа, уӕд дӕ гӕнӕн ес, ӕма багъӕуа Библий фӕрци ин фӕлмӕнӕй ӕма ӕргом балӕдӕрун кӕнун, ӕ рӕдуд цӕй медӕги ӕй, уой (Пс. 141:5). Кӕд дин дӕ зӕрдихудти бацудӕй, удта ин гъӕуама ниххатир кӕнай. Ӕма ин ку ниххатир кӕнай, уӕд еци гъуддагбӕл мабал исдзорӕ. (Бакӕсӕ Ӕмбесӕндтӕ 17:9.) Аци зин рӕстӕги хъӕбӕр ӕхсидзгӕ ӕй, хуӕртӕ ӕма ӕнсувӕртӕн сӕ хуарз менеугутӕмӕ кӕсун, сӕ рӕдудтитӕмӕ нӕ, фал. Уой фӕрци нӕ лимӕндзийнадӕ федардӕр кӕндзӕй. Устур бӕллӕхи рӕстӕг ба нӕ нӕ хуарз ӕмбӕлтти ӕнхус хъӕбӕр гъӕудзӕй.

17. Йереми ӕцӕг ӕмбал ке адтӕй, е цӕхуӕн хабарӕй бӕрӕг ӕй?

¹⁷ Пахампар Йереми ӕ гъуддӕгтӕй алкӕддӕр ӕвдиста, ӕцӕг ӕмбал ке адтӕй, уой, сауӕнгӕ ма тухст рӕстӕгути дӕр. Еухатт паддзахади устур бунат ка ахӕста, еу уӕхӕн лӕг Авдемелех Йеремий лӕкъӕрдӕ къагъдӕй исесун кодта ӕма ’й уотемӕй мӕлӕтӕй фӕййервӕзун кодта. Авдемелех тарстӕй, къниӕзтӕ  си сӕ маст ке есдзӕнцӕ, уомӕй. Йереми уой ку базудта, уӕд уотӕ нӕ расагъӕс кодта, ӕ тухст сагъӕстӕн ӕхуӕдӕг ести кӕндзӕй, зӕгъгӕ. Фал фадуат иссирдта, цӕмӕй Авдемелехӕн фегъосун кодтайдӕ, Йеговӕ ин зӕрдӕ цӕмӕй байвардта, уой (Йер. 38:7–13; 39:15–18).

18. Ӕмбесӕндти 17:17 куд финст ӕй, уомӕ гӕсгӕ нӕ хуӕртӕ ӕма ӕнсувӕртӕй еске бӕллӕхи ку бахауа, уӕд куд гъӕуама архайӕн?

¹⁸ Абони нӕ хуӕртӕ ӕма не ’нсувӕртӕ берӕ аллихузи зиндзийнӕдтӕбӕл ӕмбӕлунцӕ. Беретӕ си бахаунцӕ ӕрдзон бӕллӕхи кенӕ сӕмӕ тугъд райдайуй. Уӕхӕн хабар ку ’рцӕуй, уӕд ни еуӕй-еуетӕн фӕззиннуй фадуат, цӕмӕй бал хуӕртӕ ӕма ӕнсувӕрти нӕхемӕ баиуазӕг кӕнӕн. Кедӕр бон ба фӕууй ӕхцайӕй банхус кӕнун. Кудфӕнди ма уа, уӕддӕр ни алке бон дӕр ӕй, уӕхӕн хуӕртӕ ӕма ӕнсувӕрти туххӕй ковун. Хатгай нифссаст адӕймагӕн ци зӕгъӕн кенӕ ин куд банхус кӕнӕн, уой дӕр нӕ фӕззонӕн. Фал ни алке бон дӕр ӕй хуӕрӕ кенӕ ӕнсувӕрӕн нӕ рӕстӕгӕй рахецӕн кӕнун. Зӕгъӕн, нӕ бон имӕ ӕй лӕмбунӕг байгъосун. Кенӕ еумӕ бакӕсун, нӕхецӕн дӕр нӕ нифс кӕмӕй бафедар ӕй, уӕхӕн стихтӕ Библийӕй (Ис. 50:4). Уомӕй сӕйрагдӕр ба ӕй багъӕуагӕ сахат сӕ фарсмӕ балӕуун. (Бакӕсӕ Ӕмбесӕндтӕ 17:17.)

19. Хуӕртӕ ӕма ӕнсувӕрти хӕццӕ лимӕн кӕнунбӕл нур архайун цӕмӕн гъӕуй?

¹⁹ Мадта гъӕуама нур архайӕн, цӕмӕй нӕ хуӕртӕ ӕма ӕнсувӕрти хӕццӕ хуарз ӕмбӕлттӕ исуӕн ӕма еци лимӕндзийнадӕ гъӕуай кӕнӕн. Е ӕхсидзгӕ цӕмӕн ӕй? Уомӕн ӕма не знӕгтӕ аллихузи мӕнгӕтти фӕрци архайдзӕнцӕ, цӕмӕй кӕрӕдзебӕл мабал ӕууӕндӕн ӕма кӕрӕдзей нихмӕ исуӕн. Фал е сӕ къохи нӕ бафтуйдзӕй. Уонӕн сӕ бон не ’суодзӕй уотӕ бакӕнун, цӕмӕй нӕ хуӕртӕ ӕма ӕнсувӕрти мабал уарзӕн ӕма, нӕ астӕу ци лимӕндзийнадӕ ес, е фехӕла. Мах нӕ хуӕртӕ ӕма ӕнсувӕрти хӕццӕ хуарз ӕмбӕлттӕ айдагъ аци дуйней кӕронмӕ нӕ уодзиан, фал ӕносмӕ дӕр!