1. Цӕмӕй Йеговӕ ӕ фӕндон исӕнхӕст кӕна, уой туххӕй ӕ бон ци ӕй бакӕнун?

ЙЕГОВӔ ӕ фӕндон исӕнхӕст кӕнунмӕ кафӕнди дӕр исуодзӕй. Зӕгъӕн, ӕ бон ӕй исун Ахургӕнӕг, Уодӕнцойнӕдӕттӕг, Хуарз хабар хӕссӕг ӕма уотӕ идарддӕр (Ис. 48:17; 2 Кор. 7:6; Гал. 3:8). Фал ӕ фӕндон исӕнхӕст кӕнуни туххӕй Йеговӕ адӕнӕн дӕр цӕхуӕндӕр гъуддӕгтӕ баихӕс кӕнуй (Матф. 24:14; 28:19, 20; 2 Кор. 1:3, 4). Ку багъӕуа, уӕд ни Йеговӕ алкӕмӕндӕр ратдзӕй фагӕ хъаурӕ ӕма зунд, цӕмӕй исуӕн, ӕ фӕндон исӕнхӕст кӕнунмӕ ка гъӕуама уӕн, уӕхӕн адӕймӕгтӕ. Ӕма е раст ӕй, Хуцауи ном, ци нисан кӕнуй, уой туххӕй берӕ ахургӕндтӕ ци гъуди кӕнунцӕ, уомӕ гӕсгӕ.

2. а) Беретӕмӕ уотӕ цӕмӕн фӕккӕсуй, ӕма си Йеговӕ некуд испайда кӕндзӕй? б) Аци статьяй дзурд цӕбӕл цӕудзӕй?

² Алкедӕр ни фӕндуй, цӕмӕй ни Йеговӕ ӕ фӕндон исӕнхӕст кӕнунмӕ испайда кӕна, фал беретӕмӕ уотӕ фӕккӕсуй, ӕма си Йеговӕ некуд испайда кӕндзӕй. Цума сӕмӕ уотӕ цӕмӕн фӕккӕсуй? Кӕбӕлдӕр ӕнзтӕ сӕ уӕзӕ ӕруагъонцӕ, кӕмӕндӕр ӕ уавӕртӕ берӕ нӕ амонунцӕ, кадӕр ба ӕхемӕ ӕнарӕхст кӕсуй. Иннетӕмӕ ба уотӕ кӕсуй, ӕма нур цӕйбӕрцӕ кӕнунцӕ, е фагӕ ’й ӕма сӕ фулдӕр цӕмӕдӕр тундзун нӕ гъӕуй. Аци статьяй радзубанди кӕндзиан, Йегови бон куд ӕй ӕ фӕндон исӕнхӕст кӕнунмӕ махӕй алкӕмӕйдӕр испайда кӕнун. Удта ма ӕркӕсдзиан, Йеговӕ рагидзаманти ӕ лӕггадгӕнгутӕн,– нӕлгоймӕгтӕн дӕр ӕма силгоймӕгтӕн дӕр,– хъауритӕ куд лӕвардта ӕма сӕ архайунмӕ куд разӕнгард кодта, уомӕ. Фӕстагмӕ ба радзубанди кӕндзиан, нӕ бон куд ӕй Йеговӕн барӕ дӕттун, цӕмӕй ни испайда кӕна.

3. Филиппӕгтӕмӕ 2:13 куд финст ӕй, уомӕ гӕсгӕ Йегови бон куд ӕй уотӕ бакӕнун, цӕмӕй нӕ архайун фӕндӕуа?

³ Бакӕсӕ Филиппӕгтӕмӕ 2:13 *. Йегови бон ӕй уотӕ бакӕнун, цӕмӕй нӕ фӕндгӕ дӕр кӕна ӕма архайгӕ дӕр кӕнӕн. Цума кутемӕй? Зӕгъӕн, базудтан не ’мбурди ӕнхус ке гъӕуй. Кенӕ хестӕр нӕлгоймӕгтӕ филиалӕй финстӕг ку бакастӕнцӕ, уӕд ӕй базудтан ӕнхус ӕндӕр кӕмидӕр ке гъӕуй. Ӕма уӕд расагъӕс кӕндзиан: «Мӕн бон ба куд ӕй банхус кӕнун?» Кенӕ ба нин цӕхуӕндӕр зин куст баихӕс кӕнунмӕ гъавунцӕ, фал мах ба сагъӕс кӕнӕн, исарӕхсдзиан имӕ ӕви нӕ, уобӕл. Кенӕ ба, ка ’й зонуй, Библийӕй цӕхуӕндӕр скъуддзаг кӕсӕн ӕма сагъӕс кӕнӕн: «Аци стихтӕй мӕ бон куд ӕй иннетӕн банхус кӕнун?» Йеговӕ нин тухӕй неци кӕнун кӕнуй. Фал нӕ бон банхус кӕнун куд ӕй, уобӕл ке сагъӕс кӕнӕн, уой ку фӕууина, уӕд уотӕ бакӕндзӕй, цӕмӕй нӕ фӕндгӕ дӕр кӕна, ӕма архайгӕ дӕр кӕнӕн.

4. Йеговӕ нин архайунмӕ хъаурӕ куд ратдзӕй?

⁴ Йеговӕ ма нин хъаурӕ дӕр ратдзӕй, цӕмӕй архайӕн (Ис. 40:29). Зӕгъӕн, ӕ сугъдӕг хъаури фӕрци ӕ бон ӕй, ци искурдиӕдтӕ нӕмӕ ес, уони фӕххуӕздӕр кӕнун (Рац. 35:30–35). Йеговӕ нӕ ӕ организаций фӕрци ахур кӕнуй цӕхуӕндӕр гъуддӕгтӕ ӕнхӕст кӕнунбӕл. Ӕма сӕмӕ дӕ нифс ку нӕ хӕссай, уӕд ӕнхус байагорӕ. Удта нӕ уӕларвон Фидӕмӕ ковӕ, цӕмӕй дӕ исхайгин кӕна, «адӕймагмӕ ка нӕййес, уӕхӕн хъаурӕй» (2 Кор. 4:7; Лук. 11:13). Библий берӕ хабӕрттӕ финст ес, рагидзаманти ка цардӕй, еци нӕлгоймӕгтӕ ӕма силгоймӕгтӕн Йеговӕ куд ӕнхус кодта, цӕмӕй сӕмӕ архайунмӕ хъаурӕ дӕр адтайдӕ, удта сӕ фӕндгӕ дӕр кодтайдӕ. Гъӕйдӕ еци хабӕрттӕй цалдӕремӕ ӕркӕсӕн ӕма расагъӕс кӕнӕн, Йегови бон куд ӕй махӕй дӕр уотӕ испайда кӕнун.

5. Йеговӕ Моисеййӕн ӕ адӕни исуӕгъдӕ кӕнун кӕд баихӕс кодта ӕма уомӕй цӕбӕл ахур кӕнӕн?

⁵ Йеговӕ уотӕ бакодта, ӕма Моисей иссӕй израилӕгти ервӕзунгӕнӕг. Фал ин цума Йеговӕ еци гъуддаг кӕд баихӕс кодта? «Ӕгас Египети зунд» ин ку байамудтонцӕ ӕма ку ислӕг ӕй, уӕд? (Гъуд. 7:22–25). Нӕъ. Йеговӕ бал ин фиццаг банхус кодта, цӕмӕй сабур ӕма сӕрниллӕг адӕймаг иссайдӕ (Гъуд. 7:30, 34–36). Уой фӕсте ба ин ӕ нифс уотӕ бафедар кодта, ӕма ӕ бон иссӕй зӕнхӕбӕл тӕккӕ хъаурӕгиндӕр паддзахмӕ бацӕун ӕма ӕ хӕццӕ радзорун (Рац. 9:13–19). Йеговӕ ӕ фӕндтӕ исӕнхӕст кӕнунмӕ равзаруй, ӕ хуарз менеугутӕ ин ка фӕнзуй ӕма си хъаурӕ ка фӕккоруй, ӕрмӕстдӕр уони (Фил. 4:13).

6. Йеговӕ Верзелиййи фӕрци Давидӕн ке банхус кодта, уомӕй цӕбӕл ахур кӕнӕн?

⁶ Цалдӕр ӕноси фӕстӕдӕр ба Йеговӕ испайда кодта Верзелийӕй, цӕмӕй паддзах Давидӕн банхус кодтайдӕ. Давид ӕ адӕни хӕццӕ ӕ фурт Авессаломӕй ӕхе ку римахста, уӕд еу афони хъӕбӕр исӕдонуг ӕнцӕ, удта стонг дӕр адтӕнцӕ. Ӕма син Йеговӕ Верзелиййи фӕрци банхус кодта. Кӕд каргун лӕг адтӕй, уӕддӕр иннети хузӕн ӕхе тӕссаг уавӕри гӕлста, цӕмӕй Давидӕн ӕма ӕ адӕнӕн, ци гъӕуагӕ адтӕнцӕ, уомӕй ӕнхус кодтайдӕ. Верзелий уотӕ нӕ сагъӕс кодта, ӕгӕр зӕронд дӕн ӕма Йеговӕн неци пайда дӕн, зӕгъгӕ, фал Хуцауи лӕггадгӕнгутӕн, ци имӕ адтӕй, уомӕй рӕдауӕй хай кодта (2 Сам. 17:27–29). Аци хабарӕй цӕбӕл ахур кӕнӕн? Цӕйбӕрцӕфӕнди нӕбӕл ма цӕуа, уӕддӕр Йегови бон ӕй махӕй испайда кӕнун ӕма, кӕми цӕрӕн, уоми кенӕ ӕндӕр ескӕми гъӕуагӕ ка ӕййафуй, еци хуӕртӕ ӕма ӕнсувӕртӕн банхус кӕнун (Ӕмб. 3:27, 28; 19:17). Сӕхецӕн банхус кӕнун нӕ бон ку нӕ уа, уӕддӕр нӕ бон ӕй  ӕгасдуйнеуон гъуддагӕн нисайнаг дӕттун. Уой фӕрци нӕ организаций бон уодзӕй багъӕуагӕ рӕстӕг хуӕртӕ ӕма ӕнсувӕртӕн банхус кӕнун, кӕмифӕнди ма цӕронцӕ, уӕддӕр (2 Кор. 8:14, 15; 9:11).

7. Йеговӕ Симеонӕй куд испайда кодта ӕма нӕ е куд федар кӕнуй?

⁷ Йеговӕ ӕ еузӕрдон лӕггадгӕнӕг Симеонӕн зӕрдӕ байвардта, цалинмӕ Мессийи нӕ фӕууина, уӕдмӕ ке нӕ рамӕлдзӕй. Симеон Йерусалими цардӕй ӕма каргун лӕг адтӕй. Еци зӕрдӕвӕрд ӕй, ӕвӕдзи, хъӕбӕр бафедар кодта, уомӕн ӕма Мессийи ӕрцудмӕ берӕ ӕнзти дӕргъи ӕнгъӕлмӕ кастӕй. Ӕма ин Йеговӕ е ’ууӕндундзийнади ӕма ӕ фӕразондзийнади туххӕй райарфӕ кодта. Еухатт ӕй Хуцауи «сугъдӕг хъаурӕ ӕрбакодта ковӕндонӕмӕ» ӕма уоми минкъий Йесой фӕууидта. Гъема Йеговӕ уотӕ бакодта, цӕмӕй Симеон, Киристе ка гъӕуама иссайдӕ, еци минкъий сувӕллони туххӕй пахампарадӕ загътайдӕ (Лук. 2:25–35). Йесо ӕ лӕггадӕ ку райдӕдта, уӕди рӕстӕгмӕ Симеон нӕбал фӕццардӕй, фал уӕддӕр Йеговӕй хъӕбӕр боз адтӕй, уӕхӕн кади аккаг ӕй ке искодта, уой туххӕй. Федӕни ба ма имӕ никки устурдӕр хуӕрзеуӕг ӕнгъӕлмӕ кӕсуй! Нӕуӕг дуйней ӕй Симеон фӕууиндзӕй, Киристей хецаудзийнадӕ зӕнхӕбӕл ӕгас адӕнӕн дӕр цӕйбӕрцӕ арфӕдзийнӕдтӕ ӕрхаста, уой (Райд. 22:18). Мах дӕр гъӕуама Йеговӕй боз уӕн, ӕма нин цийфӕнди гъуддаг ма баихӕс кӕна, уӕддӕр ӕй нӕхецӕн кадӕбӕл нимайӕн.

8. Йегови бон куд ӕй, махӕй дӕр, Варнавӕй куд пайда кодта, уотӕ пайда кӕнун?

⁸ Нӕ эри фиццаг ӕноси ка цардӕй, еу уӕхӕн нӕлгоймаг Иосиф, зӕгъгӕ, цӕттӕ адтӕй, цӕмӕй си Йеговӕ испайда кодтайдӕ (Гъуд. 4:36, 37). Иннетӕн уодӕнцойнӕ хӕссун ке зудта, уой туххӕй ӕй апостолтӕ исхудтонцӕ Варнавӕ, гъома «рӕвдуддзийнади фурт». Зӕгъӕн, Савл киристон ку иссӕй, уӕд имӕ ӕнсувӕртӕ не ’ндиудтонцӕ, уомӕн ӕма ’й зудтонцӕ, раздӕр киристӕнтти куд карзӕй ӕфхуардта, уой. Фал имӕ Варнавӕ ба хӕларзӕрдӕдзийнадӕ бавдиста ӕма ин банхус кодта. Ӕма си Савл уой туххӕй хъӕбӕр боз адтӕй (Гъуд. 9:21, 26–28). Фӕстӕдӕр Йерусалими хестӕр нӕлгоймӕгтӕ исфӕндӕ кодтонцӕ, Сирий Антиохий ка цардӕй, еци ӕнсувӕрти бафедар кӕнун. Цума сӕмӕ ке рарвистонцӕ? Варнави! Ӕма нӕ фӕррӕдудӕнцӕ. Библий финст ӕй, зӕгъгӕ, Варнавӕ «се ’гасей дӕр разӕнгард кодта, цӕмӕй идарддӕр дӕр Хецаубӕл еузӕрдон уонцӕ ӕма ибӕл федар хуӕцонцӕ» (Гъуд. 11:22–24). Уотӕ нин абони дӕр Йегови бон ӕй банхус кӕнун, цӕмӕй нӕ хуӕртӕ ӕма ӕнсувӕртӕн уӕн «рӕвдуддзийнади фурттӕ». Зӕгъӕн, ӕ бон ӕй, мах фӕрци зиан кӕбӕл ӕрцудӕй, уӕхӕн адӕймаги бафедар кӕнун. Кенӕ ба нӕ ӕ бон ӕй баразӕнгард кӕнун, цӕмӕй сӕйгӕ ка кӕнуй кенӕ зӕрдӕрист ка ӕй, уой бабӕрӕг кӕнӕн ӕма ’й фӕлмӕн дзурдтӕй бафедар кӕнӕн, кенӕ ба имӕ телефонӕй бадзорӕн. Ду ба Йеговӕн барӕ дӕттис, цӕмӕй дӕуӕй дӕр Варнави хузӕн, иннети бафедар кӕнунмӕ пайда кӕна? (1 Фес. 5:14).

9. Йеговӕ ӕнсувӕр Василийӕн хуарз фиййау исунмӕ куд банхус кодта?

⁹ Йеговӕ ӕнсувӕр Василийӕн банхус кодта, цӕмӕй хуарз хестӕр нӕлгоймаг иссайдӕ. Василий хестӕр нӕлгоймаг ку иссӕй, уӕд ибӕл цудӕй 26 анзи. Ӕма тӕрсгӕ кодта, хуӕртӕ ӕма ӕнсувӕрти федар кӕнун ку нӕ базона, уӕлдайдӕр ба зиндзийнӕдтӕ ка ӕвзаруй, уони. Фал фӕлтӕрдгун хестӕр нӕлгоймӕгти хӕццӕ лӕггадӕ кӕнгӕй, удта Бӕрнон ӕнсувӕрти скъолай ахур кӕнгӕй Василий берӕ цӕбӕлдӕрти исахур ӕй. Е ӕхебӕл хъӕбӕр архайдта. Зӕгъӕн, ӕхецӕн гӕгъӕдибӕл рафинста, цӕхуӕн минкъий нисӕнттӕмӕ ӕ бон ӕй тундзун, уой. Еци нисӕнттӕ ӕ къохи куд ӕфтуйгӕ цудӕнцӕ, уотӕ тӕрсгӕ дӕр минкъийдӕр кодта. Ӕма нур зӕгъуй: «Раздӕр тӕрсгӕ цӕмӕй кодтон, е мин нур устур цийнӕдзийнадӕ хӕссуй. Хуӕрӕ кенӕ ӕнсувӕри ка бафедар кӕндзӕй,  уӕхӕн стих иссерунмӕ мин Йеговӕ ку банхус кӕнуй, уӕд мӕ зӕрдӕ цийнӕй байдзаг уй». Ӕнсувӕртӕ, уӕхе Йегови бӕрагӕ ку бакӕнайтӕ, уӕд уин ратдзӕй ӕмбурди фулдӕр ихӕстӕ ӕнхӕст кӕнунмӕ уӕ ка багъӕуа, уӕхӕн искурдиӕдтӕ.

10. Авигейӕ ци бакодта ӕма си цӕбӕл ахур кӕнӕн?

¹⁰ Давид ӕма ӕ адӕн паддзах Саулӕй сӕхе римахстонцӕ ӕма сӕ ӕнхус гъудӕй. Уӕд Давиди хӕццӕ ка адтӕй, еци нӕлгоймӕгтӕ еу гъӕздуг израилаг лӕг Навалмӕ къӕбӕр ракорунмӕ бацудӕнцӕ. Ӕдзӕрӕг будури ин ӕ фонс ке гъӕуай кодтонцӕ, уомӕ гӕсгӕ имӕ нӕ бафсӕрми кодтонцӕ бацӕун. Фал Навал лӕгъуз лӕг адтӕй ӕма сӕмӕ нецӕмӕй фӕккастӕй. Давид имӕ уотӕ рамӕстгун ӕй, ӕма ин ӕхе дӕр ӕма ӕ хӕдзари еугур нӕлгоймӕгти дӕр рамарунмӕ гъавта (1 Сам. 25:3–13, 22). Навали бийнойнаг Авигейӕ рӕсугъд ке адтӕй, уомӕй уӕлдай ма зундгин силгоймаг дӕр адтӕй. Авигейӕ еци нифсгунӕй Давиди размӕ рацудӕй, ӕ уӕргутӕбӕл ӕрхаудтӕй ӕма ин балигъстӕ кодта, цӕмӕй ӕ маст ма истайдӕ ӕма маке тог никкалдтайдӕ. Е ин уӕзданӕй загъта, цӕмӕй гъуддаг Йегови бӕрагӕ ниууагътайдӕ. Авигейи лӕдӕргӕдзийнадӕ ӕма уӕздан дзурди фӕрци Давид ӕ фӕндӕ раййивта. Давид ӕй балӕдӕрдтӕй Йеговӕ имӕ ’й ке рарвиста (1 Сам. 25:23–28, 32–34). Авигейӕмӕ берӕ хуарз менеугутӕ адтӕй ӕма си Йеговӕ испайда кодта. Абони дӕр уӕздандзийнадӕ ӕма лӕдӕргӕдзийнадӕбӕл ка архайуй, еци хуӕрти фӕрци Йеговӕ бафедар кӕнуй ӕмбурди хуӕртӕ ӕма ӕнсувӕрти, удта бийнонти дӕр (Ӕмб. 24:3; Тит. 2:3–5).

11. Шаллуми кизгуттӕ цӕхуӕн гъуддаги архайдтонцӕ ӕма абони уони хузӕн ка ӕй?

¹¹ Берӕ ӕностӕ фӕстӕдӕр Йеговӕ ӕ адӕни баразӕнгард кодта Йерусалими фӕрстӕ нӕуӕгӕй исаразунмӕ. Ӕма еци гъуддаги Шаллуми кизгуттӕ дӕр архайдонцӕ (Неем. 2:20; 3:12). Ӕма кӕд сӕ фидӕ къниаз адтӕй, уӕддӕр еци зин ӕма тӕссаг куст зӕрдиагӕй кодтонцӕ (Неем. 4:15–18). Фал алке уотӕ нӕ архайдта. Зӕгъӕн, Фекойи кадгинтӕ «не ’ргубур кодтонцӕ», гъома еци куст сӕ сӕрмӕ не ’рхастонцӕ (Неем. 3:5). Расагъӕс кӕнӕ, Шаллуми кизгуттӕ куд цийнӕ кодтайуонцӕ, фӕрстӕ 52 бонемӕ конд ку ’рцудӕнцӕ, уӕд! (Неем. 6:15). Мах рӕстӕги дӕр уодуӕлдай хуӕртӕ цийнӕгӕнгӕй фӕййархайунцӕ, Йеговӕн кӕми фӕкковӕн, еци бунӕттӕ ку фӕккӕнӕн кенӕ сӕмӕ ку фӕззелӕн, уӕд. Еци арӕхстгун, зингзӕрдӕ ӕма еузӕрдон хуӕрти хъиамӕтӕн устур аргъ ес.

12. Тавифи хабарӕй куд зиннуй, уомӕ гӕсгӕ Йегови бон куд ӕй махӕй испайда кӕнун?

¹² Йеговӕ Тавифи баразӕнгард кодта, цӕмӕй мӕгуртӕн ӕнхус кодтайдӕ. Идӕдзӕ силгоймӕгтӕ си «берӕ хуарздзийнӕдтӕ зудтонцӕ» (Гъуд. 9:36). Тавифӕ хъӕбӕр хӕларзӕрдӕ силгоймаг адтӕй ӕма ку рамардӕй, уӕд ибӕл беретӕ маст кодтонцӕ. Ӕма ’й Петур ку райгас кодта, уӕд сӕ цийнӕн кӕрон дӕр н’ адтӕй (Гъуд. 9:39–41). Тавифи хабарӕй цӕбӕл ахур кӕнӕн? Нӕлгоймӕгтӕ, силгоймӕгтӕ, зӕрӕндтӕ, ӕригӕнттӕ – алке бон дӕр ни ӕй хуӕртӕ ӕма ӕнсувӕртӕн ӕнхус кӕнун (Дзиуит. 13:16).

13. Йеговӕ ӕфсӕрмигӕнагӕ хуӕрӕ Руфӕй куд испайда кодта ӕма Руфь ци загъта?

¹³ Еу ӕфсӕрмигӕнагӕ хуӕрӕ Руфи фӕндадтӕй миссионерӕй лӕггадӕ кӕнун. Минкъий ку адтӕй, уӕд хӕдзарӕй-хӕдзарӕмӕ тъӕбӕрттӕй уайидӕ ӕма буклеттӕ иурста. Руфи зӕрдӕмӕ уӕхӕн лӕггадӕ хъӕбӕр цудӕй, фал ӕфсӕрмигӕнагӕ ке адтӕй, уомӕ гӕсгӕ ба ин адӕнӕн Паддзахади хабар дзорун зинтӕй уадӕй. Фал уотемӕй дӕр, 18 анзи ибӕл ку цудӕй, уӕд пионерӕй лӕггадӕ кӕнун райдӕдта. 1946 анзи ба Галаади скъола каст фӕцӕй ӕма фӕстӕдӕр лӕггадӕ кодта Гаваййи сакъадӕхтӕбӕл ӕма Японий. Йеговӕ уотӕ бакодта, цӕмӕй еци хуӕри фӕрци еци бӕстити берӕ адӕн  хуарз хабар фегъустайуонцӕ. Руфь Йеговӕн еу 80 анзи фӕллӕггадӕ кодта, ӕма зӕгъуй: «Йеговӕ мӕ алкӕддӕр федар кодта. Е мин банхус кодта, цӕмӕй фурӕфсӕрмигӕнагӕ мабал адтайнӕ. Ӕз ӕй федарӕй зонун, Йегови бон ке ӕй испайда кӕнун, е ’гас зӕрдӕ дӕр ибӕл ка даруй, уонӕй».

14. Колоссӕгтӕмӕ 1:29 куд финст ӕй, уомӕ гӕсгӕ нӕ ци кӕнун гъӕуй, цӕмӕй ни Йеговӕ испайда кӕна?

¹⁴ Рагидзамантӕй нурмӕ Йеговӕ ӕ лӕггадгӕнгутӕн берӕ аллихузи гъуддӕгтӕ баихӕс кӕнидӕ. Дӕуӕй ба ӕ бон куд ӕй испайда кӕнун? Е кӕнгӕ ’й, ци дин баихӕс кӕна, уой зӕрдиагӕй ӕнхӕст кӕнунмӕ цӕттӕ дӕ ӕви нӕ, уомӕй. (Бакӕсӕ Колоссӕгтӕмӕ 1:29.) Архайунмӕ цӕттӕ ку уай, уӕд дин Йеговӕ банхус кӕндзӕй, цӕмӕй исуай, ӕ фӕндон исӕнхӕст кӕнунмӕ ’й ка гъӕуй, уӕхӕн адӕймаг, зӕгъӕн, зингзӕрдӕ игъосунгӕнӕг, дӕсни ахургӕнӕг, уодӕнцойнӕхӕссӕг, фӕлтӕрдгун косӕг кенӕ хуарз ӕмбал.

15. 1 Тимофеймӕ 4:12, 15 куд финст ӕй, уомӕ гӕсгӕ ӕригон ӕнсувӕртӕ Йеговӕмӕ цӕй туххӕй гъӕуама ковонцӕ?

¹⁵ Ӕригон ӕнсувӕрти туххӕй ба ци ес зӕгъӕн? Нур нӕ хъӕбӕр гъӕунцӕ кӕстӕреуӕггӕнӕг ӕнсувӕртӕй лӕггадӕ кӕнун ӕма ӕхемӕ фулдӕр ихӕстӕ райсун ке бон иссайдӕ, уӕхӕн цӕрдӕг лӕгтӕ. Берӕ ӕмбурдти хестӕр нӕлгоймӕгтӕ кӕстӕреуӕггӕнӕг ӕнсувӕртӕй фулдӕр ӕнцӕ. Кӕд ӕригон ӕнсувӕр дӕ, уӕд архайӕ, цӕмӕй дӕ ӕмбурди фулдӕр ӕнхус кӕнун фӕндӕуа. Хатгай еуӕй-еу ӕнсувӕртӕ уотӕ фӕззӕгъунцӕ: «Ӕнӕуой игъосунгӕнӕг ке дӕн, е дӕр мӕ фагӕ ’й». Кӕд ду дӕр уотӕ сагъӕс кӕнис, уӕд Йеговӕмӕ ковӕ, цӕмӕй дӕ бафӕндӕуа дӕ уодигъӕди федар кӕнун, кӕстӕреуӕггӕнӕг ӕнсувӕри ка гъӕуй, уӕхӕн менеугутӕ. Удта имӕ ковӕ, цӕмӕй дин хъауритӕ ратта ӕма ин ӕгас зӕрдӕй лӕггадӕ кӕнай (Еккл. 12:1). Де ’нхус нӕ хъӕбӕр гъӕуй! (Бакӕсӕ 1 Тимофеймӕ 4:12, 15.)

16. Йеговӕй ци гъӕуама корӕн ӕма цӕмӕн?

¹⁶ Йегови фӕрци ӕ фӕндон исӕнхӕст кӕнунмӕ кафӕнди дӕр исуодзӕнӕ. Мадта имӕ ковӕ, цӕмӕй дӕ ӕ фӕндон исӕнхӕст кӕнун фӕндгӕ дӕр кӕна ӕма дӕмӕ хъауритӕ дӕр уа. Цийфӕнди кари ма уай, уӕддӕр дӕ рӕстӕгӕй, дӕ хъауритӕй, дӕ искурдиӕдтӕй ӕма дӕ фӕрӕзтӕй уотӕ пайда кӕнӕ, цӕмӕй абони Йеговӕн кадӕ хӕссай! (Еккл. 9:10). Йеговӕн фулдӕр лӕггадӕ кӕнунмӕ дин фадуат ку фӕззинна, уӕд уайтагъд уотӕ ма расагъӕс кӕнӕ, зӕгъгӕ, мӕ бон не ’суодзӕй кенӕ мӕ нифс нӕ хӕссун. Махӕн хъӕбӕр ӕхцӕуӕн ӕй нӕ уарзӕгой Фидӕ Йегови гъуддаги архайун, уомӕн ӕма ин уотемӕй кадӕ хӕссӕн. Йеговӕ ба уой аккаг ӕй!