СИНОПТИК кӕсуй радарти хузтӕмӕ ӕма уинуй, берӕ адӕн кӕми цӕруй, уордӕмӕ тухдунгӕ ке ’рбацӕуй. Адӕн тӕссаг уавӕри ке ’нцӕ, уой лӕдӕруй ӕма ӕ бон цидӕриддӕр ӕй, уой кӕнуй, цӕмӕй син фегъосун кӕна, цалинмӕ ма рӕстӕг ес, уӕдмӕ.

Уотӕ абони дӕр Йеговӕ адӕни рагацау фӕдзӕхсуй «тухдунгӕ» ке ӕрбацӕуй. Ӕма еци «тухдунги» рази, мах ци тухдунгити туххӕй фегъосӕн, етӕ неци ’нцӕ. Йеговӕ адӕни куд фӕдзӕхсуй? Удта уотӕ зӕгъӕн цӕмӕн ес, ӕма син фагӕ рӕстӕг равардта, цӕмӕй ести бакӕнонцӕ ӕма фӕййервӕзонцӕ? Цӕмӕй аци фарстатӕбӕл дзуапп базонӕн, уой туххӕй бал ӕркӕсӕн, Йеговӕ рагидзаманти адӕни куд фӕдзахста, уомӕ.

Рагидзаманти Йеговӕ, ӕ фӕдзӕхститӕ ин ка нецӕмӕ дардта, уонӕн рагацау зӕгъидӕ, тӕрхон сӕмӕ ке ӕнгъӕлмӕ кӕсуй ӕма еци тӕрхон рабарӕн адтӕй тухдунги хӕццӕ (Ӕмб. 10:25; Йер. 30:23). Йеговӕ алли хатт дӕр афойнадӕбӕл бафӕдзӕхсидӕ, цӕмӕй сӕ лӕгъуз гъуддӕгтӕ ниууагътайуонцӕ ӕма ин ӕ дзурдмӕ игъустайуонцӕ (2 Пад. 17:12–15; Неем. 9:29, 30). Цӕмӕй син сӕ цард раййевунмӕ банхсус кодтайдӕ, уой туххӕй ба сӕмӕ ӕ еузӕрдон лӕггадгӕнгути рарветидӕ. Етӕ син ӕ тӕрхӕнттӕ фегъосун кӕниуонцӕ ӕма син балӕдӕрун кӕниуонцӕ, ӕнӕ ракӕнӕ-бакӕнӕй сӕ ке гъудӕй архайун, уой (Амос 3:7).

Уӕхӕн лӕггадгӕнгутӕй сӕ еу адтӕй Ной. Ӕ рӕстӕги ци ӕнӕгъдау ӕма ӕнӕхатир адӕн цардӕй, уонӕн берӕ ӕнзти дӕргъи нифсгунӕй дзурдта, Хуцау зӕнхӕбӕл Дони хъиамӕт ке ӕруадздзӕй, уой (Райд. 6:9–13, 17). Удта ма син дзурдта, цӕмӕй уодӕгасӕй байзайонцӕ, уой туххӕй сӕ ци кӕнун гъудӕй, уой дӕр. Ной уотӕ берӕ рӕстӕг ке игъосун кодта, уомӕ гӕсгӕ ’й Библи хонуй «рӕстдзийнадӕ игъосунгӕнӕг» (2 Пет. 2:5).

Ной адӕни, ӕ бон куд адтӕй, уотӕ фӕдзахста, фал етӕ ба уӕддӕр Хуцауи дзурдтӕ нецӕмӕ ӕрдардтонцӕ. Сӕ гъуддӕгтӕй бавдистонцӕ, ӕууӕндундзийнадӕ сӕмӕ ӕгириддӕр ке н’ адтӕй, уой. Ӕма Дони хъиамӕт ку райдӕдта, уӕд «се ’гасей дӕр... фӕлласта» (Матф. 24:39; Дзиуит. 11:7). Се ’сӕфт ке ӕрцудӕй, уой ку балӕдӕрдтӕнцӕ, уӕд сӕ бон уотӕ зӕгъун н’ адтӕй, ӕма сӕ Хуцау нӕ бафӕдзахста.

Еуӕй-еухатт ба Йеговӕ адӕни бафӕдзӕхсидӕ, ӕ тӕрхон исӕнхӕст кӕнунмӕ берӕ рӕстӕг ку нӕбал гъӕуидӕ, уӕд. Фал син уӕддӕр фагӕ рӕстӕг раттитӕ, цӕмӕй ести бакодтайуонцӕ ӕма сӕ ӕ тӕрхон ма баййафтайдӕ. Уотӕ адтӕй, Йеговӕ Египетбӕл дӕс бӕллӕхи ӕруадзунмӕ ку гъавта, уӕд дӕр – алли бӕллӕхи разӕй дӕр адӕнӕн рагацау зӕгъидӕ, ци сӕмӕ ӕнгъӕлмӕ кастӕй, уой. Зӕгъӕн, ӕвдӕймаг бӕллӕхи разӕй Мойсей ӕма Аарони фараонмӕ рарвиста, цӕмӕй ин рагацау загътайуонцӕ, иннӕ бон ех ке ниууардзӕй, уой. Цума син Хуцау фагӕ рӕстӕг равардта, цӕмӕй сӕхе баримахстайуонцӕ ӕма сӕ ех ма ниххуастайдӕ? Библий финст ӕй: «Фараони лӕггадгӕнгутӕй Йегови дзурд тас ке зӕрди бауагъта, етӕ сӕ лӕггадгӕнгути ӕма сӕ фонс тагъд-тагъдӕй медӕмӕ бакодтонцӕ. Йегови дзурд ӕ зӕрдӕмӕ ка нӕ райста, ка ӕй нецӕмӕ ӕрдардта, етӕ ба сӕ лӕггадгӕнгутӕ ӕма сӕ фонс будури ниууагътонцӕ» (Рац. 9:18–21). Бӕрӕг ӕй, фагӕ рӕстӕг син ке адтӕй, цӕмӕй ести бакодтайуонцӕ. Ӕма еци фӕдбӕл, Йеговӕ куд загъта, уотӕ ка бакодта, уонӕн еци бӕллӕх уӕхӕн устур зиан не ’рхаста.

Йеговӕ Египетбӕл дӕсӕймаг бӕллӕх ӕруадзуйнаг ку адтӕй, уӕд дӕр фараони ӕма ӕ лӕггадгӕнгути рагацау бафӕдзахста. Фал етӕ ӕнӕзунд миуӕ бакодтонцӕ ӕма ин ӕ дзурдтӕ нецӕмӕ ӕрдардтонцӕ (Рац. 4:22, 23). Ӕма уой туххӕй сӕ фиццагигурд фурттӕ рамардӕнцӕ. Гъе уӕхӕн саубон сӕбӕл никкодта! (Рац. 11:4–10; 12:29). Цума син фагӕ рӕстӕг адтӕй, цӕмӕй Хуцауи дзурдтӕмӕ байгъустайуонцӕ? Гъо. Моисей дӕсӕймаг бӕллӕхи туххӕй куддӕр базудта, уотӕ ’й израилӕгтӕн фегъосун кодта ӕма син балӕдӕрун кодта, сӕ бийнонти фӕййервӕзун кӕнунмӕ сӕ ци кӕнун гъудӕй,  уой (Рац. 12:21–28). Цума имӕ цӕйбӕрцӕ адӕн байгъустонцӕ? Еуӕй-еу бӕрӕггӕнӕнтӕмӕ гӕсгӕ, Египетӕй рацудӕй ӕртӕ милиуан адӕймагей бӕрцӕ, ӕма сӕ астӕу адтӕй израилӕгтӕ, удта «берӕ адӕн алли адӕнихӕттитӕй», уой хӕццӕ ба ма египеттӕгтӕ дӕр (Рац. 12:38).

Аци хабӕрттӕй бӕрӕг ӕй, Йеговӕ ӕ адӕнӕн аллихатт дӕр фагӕ рӕстӕг ке раттуй, цӕмӕй ин ӕ дзурдмӕ байгъосонцӕ (Дук. з. 32:4). Цума цӕмӕн? Апостол Павел загъта: «[Йегови] нӕ фӕндуй, цӕмӕй еске фесӕфа, фал ӕй фӕндуй, цӕмӕй алкӕмӕндӕр уа ӕрфӕсмон кӕнуни фадуат» (2 Пет. 3:9). Хуцау адӕнбӕл алкӕддӕр тухстӕй ӕма ’й фӕндадтӕй, цӕмӕй ӕрфӕсмон кодтайуонцӕ ӕма ин ӕ амундтӕмӕ гӕсгӕ архайдтайуонцӕ, цалинмӕ ӕ тӕрхон ӕнхӕст кӕнун нӕ райдӕдта, уӕдмӕ (Ис. 48:17, 18; Ром. 2:4).

Абони дӕр адӕни гъӕуй, ӕгас зӕнхӕбӕл ци ӕхсидзгӕ хабар игъустгонд цӕуй, уомӕ байгъосун. Йесо зӕнхӕбӕл ку адтӕй, уӕд загъта, федӕни аци цардӕвӕрд «устур бӕллӕхи» исӕфт ке ӕрцӕудзӕй (Матф. 24:21). Ӕма листӕг хабӕртти уӕнгӕ дӕр радзурдта, еци тӕрхони разӕй цӕхуӕн пахампарӕдтӕ ӕнхӕст кӕндзӕнцӕ, уой. Уомӕй уӕлдай ма радзурдта, ӕ фӕдбӕлдзӕугутӕ ци фӕууиндзӕнцӕ ӕма сӕбӕл цӕхуӕн хабӕрттӕ цӕудзӕй, уой. Йесо балӕдӕрун кодта, еци хабӕрттӕ ӕгас зӕнхӕбӕл дӕр ке цӕудзӕнцӕ. Ӕма сӕ абони мах нӕхе цӕститӕй уинӕн (Матф. 24:3–12; Лук. 21:10–13).

Еци пахампарӕдтӕ ке ӕнхӕст кӕнунцӕ, уомӕ гӕсгӕ Йеговӕ абони ӕгасемӕндӕр дзоруй, цӕмӕй сӕхе ӕ дӕлбарӕ бакӕнонцӕ. Уой фӕндуй, цӕмӕй коммӕгӕс адӕн абони дӕр амондгун цард кӕнонцӕ ӕма федӕни дӕр, нӕуӕг дуйней ӕ арфӕдзийнӕдтӕй исхайгин уонцӕ (2 Пет. 3:13). Удта ’й фӕндуй адӕнӕн банхус кӕнун, цӕмӕй ин ӕ зӕрдӕвӕрдтӕбӕл баууӕндонцӕ. Уой туххӕй син игъосун кӕнуй, сӕ цард кӕмӕй кӕнгӕ ’й, уӕхӕн хабар – «Хуцауи паддзахади туххӕй... хуарз хабар». Йесо загъта, еци хабар «игъустгонд [ке] ӕрцӕудзӕй ӕгас зӕнхи цъарӕбӕл дӕр, цӕмӕй ӕй еугур адӕнихӕттитӕ дӕр фегъосонцӕ» (Матф. 24:14). Хуцау ӕ лӕггадгӕнгутӕн разамунд дӕттуй, цӕмӕй еци хабар игъосун кӕнонцӕ. Ӕма ’й абони игъосун кӕнунцӕ еу 240 бӕстеми. Йегови фӕндуй, цӕмӕй ин ӕ дзурдтӕмӕ, гӕнӕн ӕма амалӕй фулдӕр адӕн байгъосонцӕ ӕма ци «тухдунгӕ» ӕрбахӕстӕг кӕнуй, уомӕй сӕхе багъӕуай кӕнонцӕ, гъома сӕ ӕ тӕрхон ма баййафа (Соф. 1:14, 15; 2:2, 3).

Мадта куд фӕууидтан, уотемӕй Йеговӕ алкӕддӕр фагӕ рӕстӕг раттуй, цӕмӕй ин ӕ дзурдтӕмӕ байгъосонцӕ. Ӕхсидзгӕдӕр ӕй ӕндӕр фарста: цалинмӕ рӕстӕг ес, уӕдмӕ адӕн Хуцауи дзурдтӕмӕ байгъосдзӕнцӕ? Гъӕйдӕ мадта, Хуцауӕй ӕрвист хабархӕсгутӕ ке ан, уомӕ гӕсгӕ идарддӕр дӕр адӕнӕн ӕнхус кӕнӕн, цӕмӕй сӕ бон уа фӕййервӕзун, аци дуйнейӕн ӕ кӕрон ку ’рцӕуа, уӕд.