1. Йеговӕмӕ цӕмӕн гъӕуама игъосӕн?

МАХ гъӕуама Йеговӕмӕ игъосӕн, уомӕн ӕма не Сфӕлдесӕг ӕй. Сфӕлдесӕг ке ӕй, уомӕ гӕсгӕ ин ес уӕхӕн барӕ, цӕмӕй нин амона, куд нин архайгӕ ’й, уой (Рарг. 4:11). Уомӕй уӕлдай ма Йеговӕ тӕккӕ хуӕздӕр Хецау ӕй, ӕма имӕ уой туххӕй дӕр игъосӕн. Кӕдӕй адӕн цӕрунцӕ, уӕдӕй берӕ хецӕуттӕ адтӕй. Фал си Йегови хузӕн зундгин, уарзӕгой, фӕлмӕнзӕрдӕ ӕма тӕрегъӕдгӕнагӕ ба еу дӕр н’ адтӕй (Рац. 34:6; Ром. 16:27; 1 Иоан. 4:8).

2. Дзиуиттӕгтӕмӕ 12:9–11 куд финст ӕй, уомӕ гӕсгӕ, Йеговӕмӕ цӕмӕн гъӕуама игъосӕн?

² Йегови фӕндуй, цӕмӕй имӕ игъосӕн, берӕ ’й ке уарзӕн ӕма ’й нӕ Фидӕбӕл ке нимайӕн, уой туххӕй, тӕрсгӕ си ке кӕнӕн, уой туххӕй нӕ, фал. Апостол Павел дзиуиттӕгтӕмӕ финста, нӕ уӕларвон Фидӕмӕ «куд гъӕуама ма игъосӕн», зӕгъгӕ, кӕд ӕма, дан, нӕ цӕбӕл ахур кӕнуй, е нӕхе пайдайӕн ӕй. (Бакӕсӕ Дзиуиттӕгтӕмӕ 12:9–11.)

3. а) Йеговӕмӕ ке игъосӕн, е цӕмӕй бӕрӕг уодзӕй? б) Цӕхуӕн фарстатӕбӕл базондзиан дзуапп?

³ Нӕхе зундӕй нифсгун ку нӕ уӕн ӕма ӕгас хъауритӕй ку архайӕн, цӕмӕй алли гъуддаги дӕр Йеговӕн коммӕгӕс уӕн, уӕд, ӕвдесдзиан, уомӕ игъосун нӕ ке фӕндуй, уой (Ӕмб. 3:5). Йеговӕмӕ игъосун нин ӕнцондӕр уодзӕй, ӕ менеугути туххӕй фулдӕр ку базонӕн, уӕд. Цӕмӕн ес уотӕ зӕгъӕн? Уомӕн ӕма цидӕриддӕр кӕнуй, уомӕ ӕй ӕ хуарз менеугутӕ разӕнгард кӕнунцӕ (Пс. 145:9). Йегови туххӕй куд фулдӕр базонӕн, уотӕ ’й фулдӕр уарзун райдайдзиан. Ӕма нӕ уӕд даргъ списоктӕ кӕнун нӕ гъӕудзӕй, ци ’нгъезуй ӕма ци не ’нгъезуй, уой фӕдбӕл. Мах архайдзиан, цӕмӕй нӕ сагъӕстӕ ӕма не ’нкъарӕнтӕ, Йегови куд фӕндуй, уотӕ уонцӕ (Пс. 97:10). Фал Йеговӕмӕ игъосун алкӕд ӕнцон нӕ фӕууй. Цума цӕмӕн? Хестӕр нӕлгоймӕгтӕ, удта фидтӕлтӕ  ӕма мадтӕлтӕ цӕбӕл ахур кӕнунцӕ Неемий, паддзах Давиди ӕма Йесой мадӕ Марии хабарӕй? Аци фарстатӕбӕл дзуапп иссердзиан аци статьяй.

4, 5. Ромӕгтӕмӕ 7:21–23 куд финст ӕй, уомӕ гӕсгӕ нин Йеговӕмӕ игъосун алкӕд ӕнцон цӕмӕннӕ фӕууй?

⁴ Йеговӕмӕ игъосун алкӕд ӕнцон цӕмӕннӕ фӕууй? Еу гъуддаг уой медӕги ӕй, ӕма нӕ тоги тӕрегъӕд рахастан ӕма еугурӕйдӕр ӕнӕнхӕст ан. Уой туххӕй нӕ алкӕд нӕ фӕффӕндуй Йеговӕмӕ игъосун. Адам ӕма Евӕ Хуцауи нихмӕ ку рацудӕнцӕ ӕма еци бӕласи рӕзӕй ку бахуардтонцӕ, уӕд сӕхе бафӕндадтӕй, раст ци ӕй ӕма ци нӕй, уой ӕвзарун (Райд. 3:22). Ӕма абони дӕр фулдӕр адӕн Йегови дзурд нецӕмӕ дарунцӕ ӕма сӕхе куд фӕндуй, уотӕ цӕрунцӕ.

⁵ Йегови ка зонуй ӕма ’й ка уарзуй, уонӕн дӕр алкӕд ӕнцон нӕ фӕууй Йеговӕмӕ игъосун. Апостол Павел дӕр уӕхӕн уавӕри адтӕй. (Бакӕсӕ Ромӕгтӕмӕ 7:21–23.) Павели хузӕн мах дӕр фӕффӕндуй, Йегови цӕсти раст куд ӕй уотӕ архайун. Фал ӕнӕнхӕст ке ан, уомӕ гӕсгӕ ба нӕ алкӕддӕр лӕгъуз фӕндти хӕццӕ тох кӕнун фӕгъгъӕуй.

6, 7. Йеговӕмӕ игъосун ма нин ӕнцон цӕмӕннӕ фӕууй? Ӕрхӕссӕ цӕветтон.

⁶ Йеговӕмӕ игъосун ма нин зин фӕууй, ци адӕни астӕу исирӕзтан ӕма ци ӕгъдӕуттӕбӕл исахур ан, уой туххӕй дӕр. Фулдӕр адӕн, Йегови цӕсти раст ка нӕй, уӕхӕн гъудитӕбӕл хуӕст ӕнцӕ, ӕма нӕ ӕгас хъауритӕй фӕгъгъӕуй архайун, цӕмӕй уони хузӕн сагъӕс кӕнун ма райдайӕн. Ӕркӕсӕн еу хабармӕ.

⁷ Еуӕй-еу бӕстити ӕригӕнтти фӕрразӕнгард кӕнунцӕ, фулдӕр ӕхца косунмӕ, е, дан, царди сӕйрагдӕр ӕй. Уӕхӕн уавӕри адтӕй еу хуӕрӕ Марийӕ *. Рӕстдзийнадӕ ку нӕма базудта, уӕд ахур кодта сӕ бӕсти хуӕздӕр университеттӕй еуеми. Ӕ хеуӕнтти фӕндадтӕй, цӕмӕй берӕ ’хца кӕми федунцӕ ӕма кадгинбӕл нимад ка цӕуй, уӕхӕн куст иссирдтайдӕ. Удта ӕхе дӕр уотӕ фӕндадтӕй. Фал Йегови ку базудта ӕма ’й ку бауарзта, уӕд ӕ нисӕнттӕ раййивта. Ӕма ин нур дӕр ӕнцон нӕй. Марийӕ зӕгъуй: «Рӕстӕгӕй-рӕстӕгмӕ мин фӕззиннуй фадуат берӕ ӕхца бакосунмӕ. Фал еци фадуӕттӕй ку пайда кодтайнӕ, уӕд Йеговӕн, нур куд лӕггадӕ кӕнун, уотӕ нӕ лӕггадӕ кодтайдӕ. „Нӕъ“ дзорун мин зин ӕй, уомӕн ӕма мӕ уотӕ исахур кодтонцӕ. Ӕма уомӕ гӕсгӕ алли хатт дӕр нӕуӕг ести куст ку фӕззиннуй, уӕд Йеговӕмӕ хъӕбӕр фӕкковун, цӕмӕй мин банхус кӕна ӕма мӕ лӕггадӕн къулумпий хуасӕ маци исуа» (Матф. 6:24).

8. Идарддӕр цӕмӕ ӕркӕсдзиан?

⁸ Куд ӕй зонӕн уотемӕй, Йеговӕмӕ ку игъосӕн, уӕд е нӕхецӕн уодзӕй пайда. Фал бартӕ ке къохти ’нцӕ, зӕгъӕн, хестӕр нӕлгоймӕгтӕ, фидтӕлтӕ ӕма мадтӕлтӕ Йеговӕмӕ ку игъосонцӕ, уӕд е ба пайда ӕрхӕсдзӕй иннетӕн дӕр. Мадта ӕркӕсӕн Библийӕй цалдӕр хабаремӕ ӕма базонӕн, нӕ бон куд ӕй нӕ бартӕй уотӕ пайда кӕнун, цӕмӕй Йегови зӕрдӕ рохс кӕнӕн.

9. Нееми цӕхуӕн зиндзийнӕдтӕбӕл исӕмбалдӕй?

⁹ Йеговӕ хестӕр нӕлгоймӕгти уой туххӕй исӕвардта, цӕмӕй ин ӕ адӕнбӕл тухсонцӕ (1 Пет. 5:2). Ӕма сӕ бон ӕй берӕ цидӕртӕ базонун, Нееми Йегови адӕнӕн куд адтӕй, уомӕй. Нееми адтӕй Иуди хецау ӕма ин устур бартӕ адтӕй (Неем. 1:11; 2:7, 8; 5:14). Ӕркӕсӕн, цӕхуӕн зиндзийнӕдтӕбӕл  ӕмбалдӕй, уомӕ. Неемий рӕстӕги адӕн Хуцауи ковӕндонӕ фегадӕ кодтонцӕ, удта Закъони куд финст адтӕй, уотӕ Левиттӕн ӕхцайӕй нӕбал ӕнхус кодтонцӕ ӕма сабати туххӕй закъон дӕр не ’нхӕст кодтонцӕ. Сӕ лӕгтӕй ба кадӕртӕ, Йеговӕн ка нӕ лӕггадӕ кодта, уӕхӕн ӕндӕрбӕстаг силгоймӕгти курдтонцӕ. Цума Нееми еци уавӕр исраст кӕнунбӕл куд байархайдта? (Неем. 13:4–30).

10. Зиндзийнӕдти рӕстӕг Нееми куд архайдта?

¹⁰ Нееми ӕ бартӕй раст пайда кодта ӕма Хуцауи адӕни астӕу ӕхе закъӕнттӕ нӕ ӕвардта. Е зӕрдиагӕй Йеговӕмӕ кувта ӕма си ӕнхус курдта, удта адӕнӕн Хуцауи Закъон амудта (Неем. 1:4–10; 13:1–3). Уомӕй уӕлдай ма дзиуиттӕгтӕ Йерусалими фӕрстӕ нӕуӕгӕй ку амадтонцӕ, уӕд Нееми ӕхуӕдӕг дӕр сӕ хӕццӕ куста (Неем. 4:15).

11. 1 Фессалоникӕгтӕмӕ 2:7, 8 куд финст ӕй, уомӕ гӕсгӕ хестӕр нӕлгоймӕгтӕ ӕмбурди хуӕртӕ ӕма ӕнсувӕртӕн куд гъӕуама уонцӕ?

¹¹ Хестӕр нӕлгоймӕгтӕ, Нееми кӕбӕл ӕмбалдӕй, уӕхӕн зиндзийнӕдтӕбӕл не ’мбӕлунцӕ, фал ӕй уӕддӕр берӕ гъуддӕгти сӕ бон ӕй фӕнзун. Зӕгъӕн, хуӕртӕ ӕма ӕнсувӕртӕн зӕрдиагӕй ӕнхус кӕнун, удта сӕхе иннетӕй уӕлдӕр ма кӕнун, фал ӕмбурди алкӕмӕдӕр хӕларзӕрдӕ ун. (Бакӕсӕ 1 Фессалоникӕгтӕмӕ 2:7, 8.) Сӕ уарзондзийнадӕ ӕма сӕ сӕрниллӕгдзийнадӕ бӕрӕг фӕууй, иннети хӕццӕ куд фӕдздзорунцӕ, уомӕй. Берӕ ӕнзтӕ хестӕр нӕлгоймагӕй ка лӕггадӕ кӕнуй, еу уӕхӕн ӕнсувӕр Эндрю зӕгъуй: «Еу гъуддаг балӕдӕрдтӕн: хестӕр нӕлгоймӕгти хӕларзӕрдӕдзийнадӕ ӕма фӕлмӕн дзурд хуӕртӕ ӕма ӕнсувӕртӕн ӕхцӕуӕн фӕууй ӕмӕ сӕ е фӕрразӕнгард кӕнуй сӕ хӕццӕ ӕмгуст кӕнунмӕ». Ӕндӕр хестӕр нӕлгоймаг Тони ба зӕгъуй: «Ӕз архайун Филиппӕгтӕмӕ 2:3 финст унаффӕмӕ гӕсгӕ. Ӕма мӕ зӕрдӕбӕл дарун иннети мӕхецӕй уӕлдӕр ке гъӕуама ӕвӕрон, уой. Уой фӕрци мӕхе хецауи дард нӕ кӕнун».

12. Хестӕр нӕлгоймӕгтӕ сӕрниллӕг цӕмӕн гъӕуама уонцӕ?

¹² Хестӕр нӕлгоймӕгтӕ дӕр гъӕуама Йегови  хузӕн сӕрниллӕг уонцӕ. Йеговӕ Дун-дуйней Хецау ӕй, фал уӕддӕр «ӕргубур кӕнуй» ӕма «мӕгури исесуй фунукӕй», зӕгъуй Библи (Пс. 18:35; 113:6, 7). Сӕрбӕрзонд адӕнӕй ба Йеговӕ е сӕфт уинуй (Ӕмб. 16:5).

13. Хестӕр нӕлгоймӕгтӕ ци дзорунцӕ ӕма куд дзорунцӕ, уомӕ лӕмбунӕг цӕмӕн гъӕуама кӕсонцӕ?

¹³ Йеговӕмӕ игъосун ке фӕндуй, еци хестӕр нӕлгоймӕгтӕ гъӕуама ци ӕма куд дзорунцӕ, уомӕ лӕмбунӕг кӕсонцӕ. Уотӕ ку нӕ архайонцӕ, уӕд гӕнӕн ес, ӕма сӕхебӕл ма фӕххуӕцонцӕ, ӕмбурди син еске, сӕ зӕрдӕмӕ ка нӕ фӕццӕудзӕй, уӕхӕн ести ку зӕгъа, уӕд (Иак. 1:26; Гал. 5:14, 15). Уӕлдӕр ке кой кодтан, еци ӕнсувӕр Эндрю зӕгъуй: «Уотӕ мӕмӕ ку фӕккӕсуй, ӕма мӕ хуӕрӕ кенӕ ӕнсувӕр нӕ банимадта, уӕд мӕ еуӕй-еухатт хъӕбӕр фӕффӕндуй ӕ бунати ӕй райвӕрун. Фал рагидзаманти ка цардӕй, еци еузӕрдон лӕггадгӕнгути хабӕрттӕбӕл сагъӕс кӕнун райдайун ӕма нӕуӕгӕй мӕ зӕрдӕбӕл ӕрлӕуун кӕнун, сӕрниллӕг ӕма фӕлмӕн ун куд ӕхсидзгӕ ӕй, уой». Хестӕр нӕлгоймӕгтӕ Йеговӕмӕ фегъосунцӕ, ӕмбурди хуӕртӕ ӕма ӕнсувӕрти, удта иннӕ хестӕр нӕлгоймӕгти хӕццӕ дӕр фӕлмӕнӕй ку фӕдздзорунцӕ, уӕд (Кол. 4:6).

14. Йеговӕ фидтӕлтӕн цӕхуӕн бартӕ равардта ӕма сӕмӕ цӕмӕ ӕнгъӕлмӕ кӕсуй?

¹⁴ Йеговӕ бийнонти хестӕри бартӕ фидӕн равардта ӕма ӕнгъӕлмӕ кӕсуй, ӕ сувӕллӕнтти ке ахур кӕндзӕй, уомӕ (1 Кор. 11:3; Еф. 6:4). Фал е уобӕл дзорӕг нӕй, ӕма фидӕн ӕ бон ӕй ӕ бартӕй кудфӕнди дӕр пайда кӕнун. Бийнонти хестӕр дзуапп ратдзӕй Йегови рази, бийнонти цардӕн бундор ка ӕрӕвардта, еци Хуцауи рази (Еф. 3:14, 15). Фидтӕлтӕ Йеговӕмӕ игъосдзӕнцӕ, сӕ бартӕй раст ку пайда кӕнонцӕ, уӕд. Ӕма еци гъуддаги берӕ цӕбӕлдӕрти исахур уодзӕнцӕ, паддзах Давиди царди хабӕрттӕ ку ’ртасонцӕ, уӕд.

15. Паддзах Давид фиддӕлтӕн фӕнзуйнаг цӕмӕй ӕй?

¹⁵ Йеговӕ Давидӕн айдагъ бийнонти хестӕри бартӕ нӕ равардта, фал ӕй ӕгас Израили сӕргълӕууӕгӕй исӕвардта. Паддзах Давидмӕ адтӕй устур бартӕ. Хатгай еци бартӕй раст нӕ пайда кодта ӕма уӕззау тӕрегъӕдтӕ бакӕнидӕ (2 Сам. 11:14, 15). Фал ӕй Йеговӕ ку бараст кӕнидӕ, уӕд имӕ Давид байгъосидӕ. Давид Йеговӕмӕ ковгӕй ӕргом дзурдта, ӕ зӕрдӕ цӕмӕйдӕриддӕр идзаг адтӕй, уой. Удта ӕ бон ци адтӕй, уой кодта, цӕмӕй Йегови унаффӕмӕ гӕсгӕ архайдтайдӕ (Пс. 51:1–4). Уомӕй уӕлдай ма Давид иннети унаффитӕмӕ дӕр сӕрниллӕгӕй байгъосидӕ, сауӕнгӕ ма силгоймаги  унаффӕмӕ дӕр (1 Сам. 19:11, 12; 25:32, 33). Давид ӕ рӕдудтитӕбӕл ахур кодта. Уомӕн ӕ царди Йеговӕн лӕггадӕ кӕнунӕй сӕйрагдӕр неци адтӕй.

16. Фиддӕлтӕ паддзах Давиди хабарӕй цӕбӕл ахур кӕнунцӕ?

¹⁶ Фиддӕлтӕ, паддзах Давиди хабарӕй цӕбӕл ахур кӕнтӕ? Ӕркӕсӕн цалдӕр гъуддагемӕ: Йеговӕ уин ци бартӕ равардта, уонӕй раст пайда кӕнтӕ. Уӕ рӕдудтитӕбӕл сӕттетӕ ӕма уин Библийӕй унаффӕ ку дӕттонцӕ, уӕд имӕ байгъосетӕ. Сӕрниллӕг ку уайтӕ, уӕд уӕ уӕ бийнонтӕ дӕр нимайдзӕнцӕ. Уӕ бийнонти хӕццӕ Йеговӕмӕ ковгӕй ӕргом дзоретӕ, цидӕриддӕр уӕ тухсун кӕнуй, уой, цӕмӕй ӕй етӕ дӕр уинонцӕ уӕ зӕрдӕ Йегови ӕнхусбӕл ке даретӕ. Фиццагидӕр ба уӕ бийнонтӕ гъӕуама уинонцӕ, Йеговӕн лӕггадӕ кӕнунӕй сӕйрагдӕр уин ке неци ес, уой (Дук. з. 6:6–9). Уӕ бийнонтӕн фӕнзуйнаг ку уайтӕ, уӕд син уомӕй хуӕздӕр лӕвар неци уодзӕй.

17. Йеговӕ мадӕбӕл цӕхуӕн ихӕс исӕвардта?

¹⁷ Йеговӕ мадӕбӕл дӕр кадгин ихӕс исӕвардта ӕма уомӕн дӕр сувӕллӕнттӕбӕл ӕ барӕ цӕуй (Ӕмб. 6:20). Мадӕ ӕ сувӕллони цӕбӕл исахур кӕна, уой гӕнӕн ес, ӕма цӕрӕнбонти дӕр ма байронх уа ӕма е ’гас цардбӕл дӕр рабӕрӕг уа (Ӕмб. 22:6). Ӕркӕсӕн, мадтӕлтӕ Йесой мадӕ Марийи цӕветтонӕй цӕбӕл ахур кӕнунцӕ, уомӕ.

18, 19. Мадтӕлтӕ Марийи цӕветтонӕй цӕбӕл ахур кӕнунцӕ?

¹⁸ Марийӕ Финстадӕ хуарз зудта. Е Йеговӕн устур кадӕ кодта ӕма ин ӕ хӕццӕ федар лимӕндзийнадӕ адтӕй. Марийӕ цӕттӕ адтӕй Йегови фӕндон исӕнхӕст кӕнунмӕ, кӕд ӕ цард цӕхгӕрмӕ ке раййевдзӕй, уой зудта, уӕддӕр (Лук. 1:35–38, 46–55).

¹⁹ Мадӕн дӕр ӕ бон ӕй Марийи фӕнзун. Цӕхуӕн гъуддӕгти? Фиццаг: гъӕуама алкӕддӕр Йеговӕмӕ хӕстӕг уа. Уой туххӕй ба гъӕуама Библи ӕртаса ӕма ӕдзох Йеговӕмӕ кова. Дуккаг: Йегови зӕрдӕ барохс кӕнуни туххӕй гъӕуама ӕ царди ести раййевунмӕ дӕр цӕттӕ уа. Ка ’й зонуй, ӕхе ниййергутӕй зуст дзурд ӕма фӕдесӕй ӕндӕр неци игъуста. Уомӕ гӕсгӕ ба имӕ, ӕвӕдзи, уотӕ кастӕй, ӕма сувӕллони уотӕ ку гъомбӕл кӕнай, уӕд уоми лӕгъузӕй неци ес. Ӕма ’й кӕд базудта, Йеговӕ ниййергутӕн ци бафӕдзахста, уой, уӕддӕр ин, ка ’й зонуй, зин ӕй ӕ сувӕллӕнттӕмӕ фӕлмӕнӕй дзорун ӕма ӕхебӕл хуӕцун, уӕлдайдӕр ба ма фӕллад ку уа ӕма имӕ етӕ ба ку нӕ игъосонцӕ, уӕд (Еф. 4:31). Уӕхӕн рӕстӕгути ’й уӕлдай хъӕбӕрдӕр фӕгъгъӕуй Йеговӕй ӕнхус корун. Еу хуӕрӕ Лидийӕ зӕгъуй: «Еуӕй-еухатт  мӕмӕ мӕ фурт ку нӕ фегъосуй, уӕд Йеговӕн хъӕбӕр фӕллигъстӕ кӕнун, цӕмӕй мин банхус кӕна ӕма имӕ ма ратонон. Мӕ дзурд ӕрдӕгбӕл дӕр ӕркъуӕрун ӕма мӕхенимӕр раковун. Ӕма уой фӕрци ӕрсабур ун» (Пс. 37:5).

20. Еуӕй-еу мадтӕлтӕн зин ци фӕууй ӕма син ци банхус кӕндзӕй?

²⁰ Еуӕй-еу мадтӕлтӕн зин фӕууй, сӕ сувӕллӕнттӕбӕл цийнӕ кӕнун (Тит. 2:3, 4). Ӕвӕдзи ма сӕхуӕдтӕ сувӕллӕнттӕ ку адтӕнцӕ, уӕд сӕбӕл сӕ ниийргутӕ некӕд цийнӕ кодтонцӕ. Кӕд ду дӕр уӕхӕн бийнонти исирӕзтӕ, уӕд дӕ ниййергути ма бафӕнзӕ. Йеговӕмӕ игъосун ке фӕндуй, уӕхӕн мадӕ архайдзӕй, цӕмӕй, ӕ сувӕллӕнттӕн ӕвдеса, ке сӕ уарзуй, уой. Ӕ уодигъӕдӕ раййевун ин ӕнцон нӕ уодзӕй. Фал уомӕн ес гӕнӕн! Уой фӕрци ӕхуӕдӕг дӕр ӕма ӕ бийнонтӕ дӕр амондгундӕр уодзӕнцӕ.

21, 22. Исаййи 65:13, 14 куд финст ӕй, уомӕ гӕсгӕ Йеговӕмӕ игъосун ци пайда хӕссуй?

²¹ Паддзах Давид ӕй зудта, Йеговӕмӕ игъосун ци пайда хӕссуй, уой ӕма финста: «Йегови уагӕвӕрдтӕ ӕнцӕ раст – зӕрдӕ цийнӕй идзаг кӕнунцӕ. Йегови фӕдзӕхст ӕй ирд – цӕститӕн дӕттуй рохс. Етӕ гъӕуай кӕнунцӕ дӕ лӕггадгӕнгути. Ка сӕ ӕнхӕст кӕнуй, е иссеруй устур хуарзӕнхӕ» (Пс. 19:8, 11). Абони ’й нӕхе цӕститӕй уинӕн, Йеговӕмӕ ка игъосуй, етӕ, ӕ унаффитӕ ин ка нецӕмӕ даруй, уонӕй цӕмӕй хецӕн кӕнунцӕ, уой. Йеговӕмӕ ка игъосуй, етӕ «цийни гъӕр кӕнунцӕ, сӕ зӕрдӕ ке ирайуй, уой туххӕй». (Бакӕсӕ Исай 65:13, 14.)

²² Хестӕр нӕлгоймӕгтӕ, удта фидтӕлтӕ ӕма мадтӕлтӕ Йеговӕмӕ ку фегъосунцӕ, уӕд сӕхе цард дӕр хуӕздӕр фӕууй, сӕ бийнонтӕ дӕр амондгундӕр фӕуунцӕ, удта ӕмбурди дӕр еудзийнадӕ фӕууй. Фал сӕйрагдӕр ба е ӕй, ӕма уотемӕй Йегови зӕрдӕ фӕррохс кӕнунцӕ (Ӕмб. 27:11). Уомӕй устурдӕр цийнӕдзийнадӕ ба неци хӕссуй!