1, 2. а) Армагеддон хуарз хабар цӕмӕн ӕй? б) Аци статьяй цӕхуӕн фарстатӕ равзардзиан?

БЕРЕТӔМӔ уотӕ кӕсуй, ӕма Армагеддон ӕй, зӕнхӕ кӕми бабун уодзӕй, уӕхӕн ядерон тугъд кенӕ устур ӕрдзон бӕллӕх. Фал Библи куд зӕгъуй, уомӕ гӕсгӕ Армагеддон цийни хабар ӕй (Рарг. 1:3). Еци тугъди адӕн исӕфгӕ нӕ, фал ервӕзгӕ фӕккӕндзӕнцӕ! Кутемӕй?

² Библи куд зӕгъуй, уомӕ гӕсгӕ Армагеддони ӕрцӕудзӕй кӕрон адӕни хецаудзийнадӕн. Еци тугъди зӕнхӕ лӕгъуз адӕнӕй искӕдзос уодзӕй ӕма ибӕл цӕргӕ байзайдзӕнцӕ ӕрмӕстдӕр рӕстгӕнгутӕ. Уомӕй уӕлдай ма нӕ зӕнхӕ дӕр фӕййервӕздзӕй ӕма ӕй адӕн ке фесафдзӕнцӕ, уомӕй ин тӕссаг нӕбал уодзӕй (Рарг. 11:18). Цӕмӕй аци гъуддаг хуӕздӕр балӕдӕрӕн, уой туххӕй равзарӕн цуппар фарстай: Армагеддон ци ӕй? Ӕ хуӕдразӕй цӕхуӕн хабӕрттӕ цӕудзӕй? Цӕмӕй еци тугъди фӕййервӕзӕн, уой туххӕй нӕ ци кӕнун гъӕуй? Аци дуйней фӕстаг бонти Хуцаубӕл еузӕрдонӕй цӕй фӕрци байзайдзиан?

3. а) Дзурд «Армагеддон» ци нисан кӕнуй? б) Раргомади 16:14, 16 финст дзурдтӕй куд зиннуй, Армагеддон цӕхуӕндӕр бӕлвурд бунат ке нӕй?

³ Бакӕсӕ Раргомадӕ 16:14, 16. Дзурд «Армагеддон» Библий ӕрмӕстдӕр еунӕг хатт ӕмбӕлуй ӕма рацудӕй дзиуиттаг дзурдбастӕй «Мегиддой хонх», зӕгъгӕ (Рарг. 16:16; феп.). Мегиддо адтӕй рагон Израили горӕттӕй сӕ еу (Йес. Н. 17:11). Фал дзурд «Армагеддон» зӕнхӕбӕл цӕхуӕндӕр бӕлвурд бунатмӕ нӕ амонуй. Е амонуй, «ӕгас дуйней паддзӕхтӕ» Йегови нихмӕ ку рацӕуонцӕ, еци рӕстӕгмӕ (Рарг. 16:14). Аци статьяй ба ма дзурд «Армагеддон» хауй «ӕгас дуйней паддзӕхтӕ» ку ӕрӕмбурд уонцӕ, уой хуӕдфӕсте ци хабӕрттӕ райдайдзӕнцӕ, уонӕмӕ дӕр. Армагеддон цӕхуӕндӕр бӕлвурд бунат ке нӕй, е цӕмӕй бӕрӕг ӕй? Фиццаг: Мегиддой хонх уогӕ дӕр нӕййес.  Дуккаг: горӕт Мегиддо кӕми адтӕй, еци бунат ӕгӕр минкъий ӕй, цӕмӕй си «ӕгас дуйней паддзӕхтӕ» се ’фсӕдтӕ ӕма сӕ тохӕндзаумӕутти хӕццӕ бацӕуонцӕ. Ӕма ӕртиккаг: аци статьяй куд базондзиан, уомӕ гӕсгӕ Армагеддон райдайдзӕй, зӕнхон «паддзӕхтӕ» сӕхе Йегови адӕнбӕл ку ниццӕвонцӕ, уӕд. Етӕ ба зӕнхӕбӕл алли рауӕнти цӕрунцӕ.

4. Йеговӕ тӕккӕ фӕстаг ӕма тӕккӕ устурдӕр тугъд Армагеддон цӕмӕн исхудта?

⁴ Цума Йеговӕ тӕккӕ фӕстаг ӕма тӕккӕ устурдӕр тугъд Мегиддомӕ гӕсгӕ цӕмӕн исхудта? Рагидзаманти Мегиддо ӕма уомӕ хӕстӕг Изреели дӕлфӕзи берӕ тугъдтитӕ цудӕй. Еци тугъдтитӕй цалдӕреми Йеговӕ ӕхуӕдӕг архайдта. Зӕгъӕн, Мегиддой цӕугӕдӕнтти рази Йеговӕ Израили тӕрхонгӕнӕг Варакӕн банхус кодта ханаайнаг ӕфсадбӕл фӕууӕлахез ун. Еци ӕфсади сӕргълӕууӕг адтӕй Сисарӕ. Варак ӕма Деворӕ Йеговӕн арфӕ кодтонцӕ, ци дессаги уӕлахездзийнадӕ син равардта, уой туххӕй. Етӕ зардтонцӕ: «Арвӕй стъалутӕ тухтонцӕ... Сисари нихмӕ. Киссони цӕугӕдон сӕ фӕлласта» (Тӕрх. 5:19–21).

5. Армагеддони тугъд, Вараки рӕстӕги ци тугъд адтӕй, уомӕй цӕмӕй хецӕн кӕндзӕй?

⁵ Варак ӕма Деворӕн сӕ зари кӕрон ес уӕхӕн дзурдтӕ: «Уотӕ фесӕфӕнтӕ де знӕгтӕ еугурӕйдӕр, о Йеговӕ, ка дӕ уарзуй, етӕ ба хорау ӕрттевӕнтӕ!» (Тӕрх. 5:31). Армагеддони дӕр Йегови знӕгтӕ фесӕфдзӕнцӕ, Хуцауи ка уарзуй, етӕ ба фӕййервӕздзӕнцӕ. Фал Армагеддони тугъд, Вараки рӕстӕг ци тугъд адтӕй, уомӕй хецӕн кӕнуй. Армагеддон ку райдайа, уӕд Хуцауи лӕггадгӕнгути тохун нӕ гъӕудзӕй. Тохӕндзаума дӕр сӕмӕ нӕ уодзӕй. Тухсгӕ ке нӕ кӕндзӕнцӕ, удта сӕ зӕрдӕ Йеговӕбӕл ӕма ӕ уӕларвон ӕфсӕдтӕбӕл ке дардзӕнцӕ, гъе уой медӕг уодзӕй сӕ хъаурӕ (Ис. 30:15; Рарг. 19:11–15).

6. Йеговӕ Армагеддони е знӕгти куд фесафдзӕй?

⁶ Хуцау Армагеддони е знӕгти куд фесафдзӕй? Ӕ бон ӕй аллихузи мадзӕлттӕй испайда кӕнун. Зӕгъӕн, зӕнхӕ базмӕлун кӕнун, ех ӕркалун кенӕ сӕбӕл арвицӕфтӕ ӕруадзун (Иов 38:22, 23; Йез. 38:19–22). Уомӕй уӕлдай ма ӕ бон ӕй е знӕгти фӕккӕрӕдземӕ кӕнун (2 Анз. 20:17, 22, 23). Лӕгъуз адӕни ниццӕгъдунмӕ ма ӕ бон ӕй изӕдти рарветун дӕр (Ис. 37:36). Хуцау цийфӕнди мадзалӕй ма испайда кӕна, уӕддӕр ӕнӕмӕнгӕй фӕууӕлахез уодзӕй. Е знӕгтӕ еугурӕйдӕр исӕфт ӕрцӕудзӕнцӕ, рӕстгӕнӕг адӕн ба фӕййервӕздзӕнцӕ (Ӕмб. 3:25, 26).

7, 8. а) 1 Фессалоникӕгтӕмӕ 5:1–6 куд финст ӕй, уомӕ гӕсгӕ дуйней хецӕуттӕ цӕхуӕн хабар фегъосун кӕндзӕнцӕ? б) Еци хабар, уӕлдай тӕссаг цӕмӕн уодзӕй?

⁷ «Йегови бон» ку райдайа, уой хуӕдразмӕ ӕгас дуйнебӕл дӕр раседдзӕнцӕ: «Сабурдзийнадӕ ӕма ӕдасдзийнадӕ!» (Бакӕсӕ 1 Фессалоникӕгтӕмӕ 5:1–6.) 1 Фессалоникӕгтӕмӕ 5:2 финст ка ӕй, еци дзурдбаст «Йегови бон» хауй устур бӕллӕхмӕ (Рарг. 7:14). Устур бӕллӕх къӕсӕрбӕл ке ӕй, уой кӕцӕй базондзиан? Библий финст ӕй, уой хуӕдразӕй еу ӕнахур хабар ке райгъусдзӕй. Е уодзӕй нисан, устур бӕллӕх ацибон-исон ке райдайдзӕй, уомӕн.

⁸ Библий пахампаради куд финст ӕй, уомӕ гӕсгӕ ӕгас зӕнхӕбӕл раседдзӕнцӕ «сабурдзийнадӕ ӕма ӕдасдзийнадӕ». Цума дуйней хецӕуттӕ уӕхӕн хабар цӕмӕн фегъосун кӕндзӕнцӕ? Дини разамонгутӕ ба цума сӕ хӕццӕ арази уодзӕнцӕ? Бӕрӕг нӕй. Кудфӕнди ма уа, уӕддӕр, еци «сабурдзийнадӕ ӕма ӕдасдзийнади» хабар сайдӕй ӕндӕр неци уодзӕй ӕма уодзӕй сайтӕнтти куст. Еци сайд уӕлдай тӕссаг уодзӕй, уомӕн ӕма ка некӕдма адтӕй, уӕхӕн бӕллӕхи къӕсӕрбӕл лӕугӕй адӕнмӕ уотӕ кӕсдзӕй, цума син тӕссаг нецӕмӕй ӕй. Библий куд финст ӕй, уомӕ гӕсгӕ «уӕд ӕнӕнгъӕлти ӕрцӕудзӕй сӕ исӕфт,  еруни афони силгоймагӕн ӕ риститӕ ӕвваст куд райдайунцӕ, уотӕ». Йегови еузӕрдон лӕггадгӕнгутӕ ба ци бауодзӕнцӕ? Ӕвӕдзи сӕмӕ дессаг фӕккӕсдзӕй, Йегови бон куд ӕвваст райдӕдта, е, фал син ӕнӕнгъӕлти ба нӕ уодзӕй.

9. Сайтани дуйне исӕфт куд ӕрцӕудзӕй?

⁹ Йеговӕ аци дуйне еунӕг хаттӕн нӕ фесафдзӕй, Ноййи рӕстӕги дуйне куд фесафта, уотӕ. Аци хатт Йеговӕ Сайтани дуйнейӕн фиццаг ӕ еу хай фесафдзӕй, удта инней. Фиццаг бал исӕфтмӕ цӕуй Устур Вавилон, гъома ӕгас дуйней мӕнгӕ динтӕ. Уой фӕсте ба Армагеддони рӕстӕг исӕфт ӕрцӕудзӕй, Сайтани дуйнейӕй ма ци байзайа, е – хецауӕдтӕ, ӕфсӕдтӕ ӕма коммерци. Мадта лӕмбунӕгдӕр ӕркӕсӕн аци дууӕ хабари куд ӕрцӕудзӕнцӕ, уомӕ.

10. Раргомади 17:1, 6 ӕма 18:24 куд финст ӕй, уомӕ гӕсгӕ Йеговӕ Устур Вавилон цӕмӕн фесафдзӕй?

¹⁰ «Ӕ ном игъустгонд кӕмӕн ӕй, еци хӕтагӕ силгоймаги... тӕрхон баййафдзӕй». (Бакӕсӕ Раргомадӕ 17:1, 6; 18:24.) Устур Вавилон Хуцауи ном ӕгадӕ кӕнуй. Мӕнгӕ динтӕ адӕнӕн Хуцауи туххӕй мӕнгӕттӕ дзорунцӕ. Етӕ Йегови ниууагътонцӕ ӕма хӕтагӕ силгоймаги хузӕн зӕнхон хецӕутти хӕццӕ ӕмгуст кӕнунцӕ ӕма син сӕ къох аразунцӕ. Уомӕй уӕлдай ма сӕ бартӕй уотӕ пайда кӕнунцӕ, цӕмӕй сӕ адӕни ’стъегъонцӕ. Мадта уони туххӕй цӕйбӕрцӕ тог никкалдӕй, уомӕн ба зӕгъӕн дӕр нӕййес, уой хӕццӕ ба ма Хуцауи лӕггадгӕнгути тог дӕр (Рарг. 19:2). Цума Йеговӕ устур Вавилон куд фесафдзӕй?

11. «Сурх-сурхид сирд» кӕмӕ амонуй, ӕма си Йеговӕ Устур Вавилони нихмӕ куд испайда кӕндзӕй?

¹¹ Устур Вавилон фесафунмӕ Йеговӕ испайда кӕндзӕй «сурх-сурхид сирди» «дӕс сикъайемӕй». Еци сирд ӕй Еугонд Нацити Организаци, дӕс сикъай ба – ӕ къох ин ка аразуй, еци хецауӕдтӕ. Еци хецауӕдтӕ, Хуцау ци рӕстӕг иснисан кодта, еци рӕстӕг Устур Вавилонбӕл сӕхе ниццӕвдзӕнцӕ ӕма ин «нецибал... ниууадздзӕнцӕ, исбӕгънӕг ӕй кӕндзӕнцӕ», гъома ин ӕ гъӕздугдзийнӕдтӕ байсдзӕнцӕ, ӕ цъамар гъуддӕгтӕ ба ин хормӕ искалдзӕнцӕ (Рарг. 17:3, 16). Ӕ исӕфт хъӕбӕр тагъд ӕрцӕудзӕй, цума еу бонмӕ ӕрцудӕй, уотӕ. Ӕма  ӕ фарс ка лӕууй, уонӕн дӕр е хъӕбӕр ӕнӕнгъӕл хабар уодзӕй, уомӕн ӕма ӕхе берӕ рӕстӕг ӕстудта, зӕгъгӕ, «ӕз паддзахи бад кӕнун, идӕдзӕ нӕ дӕн ӕма маст некӕд фӕууиндзӕн» (Рарг. 18:7, 8).

12. Йеговӕ ци нӕ бауадздзӕй ӕма цӕмӕн?

¹² Хуцау нӕ бауадздзӕй, цӕмӕй ин хецауӕдтӕ ӕ адӕни фесафонцӕ. Етӕ ин ӕ ном сӕрустурӕй хӕссунцӕ ӕма син куд бафӕдзахста, уотӕ Устур Вавилонӕй рацудӕнцӕ (Гъуд. 15:16, 17; Рарг. 18:4). Уомӕй уӕлдай ма иннетӕн дӕр ӕгас хъауритӕй ӕнхус кӕнунцӕ уордигӕй рацӕунмӕ. Уой фӕрци Йегови лӕггадгӕнгутӕ, мӕнгӕ динтӕбӕл ци бӕллӕхтӕ цӕудзӕй, уонӕй хизт ӕнцӕ. Фал се ’ууӕндундзийнадӕ ба уӕддӕр фӕлвӕрд ӕрцӕудзӕй.

13. а) Гог ка ӕй? б) Йезекили 38:2, 8, 9 куд финст ӕй, уомӕ гӕсгӕ Гог, «Армагеддон ка хуннуй, еци бунатмӕ» куд ӕрбацӕудзӕй?

¹³ Гог Хуцауи адӕнбӕл ӕхе ниццӕвдзӕй. (Бакӕсӕ Йезекил 38:2, 8, 9.) Мӕнгӕ динтӕ исӕфт ку ’рцӕуонцӕ, уӕд Йегови адӕн уодзӕнцӕ, тухдунги фӕсте ӕнӕгъӕнӕ гъӕдӕй еунӕг бӕласӕ куд байзайа, уой хузӕн. Сайтан фурмӕстӕй тондзӕй. Ӕма уӕд «илгъаг пахампар-дзурдти» фӕрци, гъома, сайтӕнттӕй ка цӕуй, еци дзурдти фӕрци, уотӕ бакӕндзӕй, цӕмӕй зӕнхон хецауӕдти цӕдес Йегови адӕни нихмӕ рацӕуонцӕ (Рарг. 16:13, 14). Еци цӕдес хуннуй, «Магоги зӕнхӕй ка ӕй, еци Гог». Ӕма хецауӕдтӕ Хуцауи адӕни нихмӕ ку рацӕуонцӕ, уӕд, зӕгъӕн ес, ӕма ӕрӕмбурд уодзӕнцӕ, «Армагеддон ка хуннуй, еци бунатмӕ» (Рарг. 16:16).

14. Гог ци балӕдӕрдзӕй?

¹⁴ Гог ӕ зӕрдӕ дардзӕй «адӕймаги хъаурӕбӕл», гъома ’е фсӕдтӕ ӕма ӕ тохӕндзаумӕуттӕбӕл (2 Анз. 32:8). Мах ба нӕ зӕрдӕ дардзиан нӕ Хуцау Йеговӕбӕл. Ӕма е хецауӕдтӕмӕ ӕнӕзунд миуӕ фӕккӕсдзӕй. Цума цӕмӕн? Уомӕн ӕма Устур Вавилони дӕр ӕ хуцӕуттӕ нӕ фӕййервӕзун кодтонцӕ «сирдӕй» ӕма «дӕс сикъайемӕй» (Рарг. 17:16). Уомӕ гӕсгӕ хецауӕдтӕмӕ уотӕ кӕсдзӕй, ӕма нин ӕнцонтӕй ракӕрон кӕндзӕнцӕ. Етӕ нӕ нихмӕ рацӕудзӕнцӕ «зӕнхӕ ка ӕмбӕрзуй, уӕхӕн мегъти хузӕн» (Йез. 38:16). Фал ӕй Гог балӕдӕрдзӕй скъӕппӕги ке бахаудтӕй,  уой. Сурх денгизи рази фараони хабар куд рауадӕй, уотӕ ’й Гог дӕр фӕууиндзӕй Йегови нихмӕ ке тохуй (Рац. 14:1–4; Йез. 38:3, 4, 18, 21–23).

15. Йесо Армагеддони тугъди куд фӕууӕлахез уодзӕй?

¹⁵ Киристе ӕма ӕ уӕларвон ӕфсӕдтӕ Хуцауи адӕни фӕййергъӕв кӕнуни туххӕй Гоги нихмӕ истохдзӕнцӕ ӕма ин ӕхе дӕр, удта е ’фсӕдти дӕр ниццӕгъддзӕнцӕ (Рарг. 19:11, 14, 15). Йегови адӕни нихмӕ хецауӕдти ка исахъилдта ӕма сӕ Армагеддонмӕ ка ӕрӕмбурд кодта, еци сӕйраг знаг, Сайтан ба ци бауодзӕй? Йесо Сайтани дӕр ӕма ӕ лӕгъуз изӕдти дӕр мин анземӕ дӕлзӕнхӕмӕ ниггӕлдздзӕй (Рарг. 20:1–3).

16. а) Хуцауи ке зонӕн, уой нӕ бон куд ӕй ӕвдесун? б) Йегови ка зонуй, етӕ Армагеддони ци бауодзӕнцӕ?

¹⁶ Алкедӕр ни гъӕуама гъуддӕгтӕй ӕвдеса, Хуцауи ке зонуй «ӕма нӕ Хецау Йесой туххӕй хуарз хабари коммӕ» ке кӕсуй, уой, ӕма уӕлдай нӕй, рӕстдзийнади рагӕй ӕй ӕви нӕ, е (2 Фес. 1:7–9). Хуцауи ка зонуй, уӕхӕн адӕймаг ӕй лӕдӕруй, Хуцау ци уарзуй ӕма е сӕфт цӕмӕй уинуй, уой, удта ин ӕ уагӕвӕрдтӕ дӕр зонуй. Уомӕй уӕлдай ма Хуцауи уарзуй, игъосуй имӕ ӕма ӕрмӕстдӕр уобӕл ӕй еузӕрдон (1 Иоан. 2:3–5; 5:3). Хуцауи ӕцӕгӕй ку зонӕн, уӕд нӕ бон уодзӕй федарӕй ӕууӕндун, е дӕр нӕ ке зонуй, ӕма ни арази ке ӕй, уобӕл (1 Кор. 8:3). Ӕма уой фӕрци Армагеддони фӕййервӕздзиан.

17. «Нӕ Хецау Йесой туххӕй хуарз хабарӕн» коммӕгӕс ке ан, е цӕмӕй бӕрӕг уодзӕй?

¹⁷ «Нӕ Хецау Йесой туххӕй хуарз хабармӕ» хаунцӕ, Йесо ци гъуддӕгтӕбӕл ахур кодта, етӕ еугурӕйдӕр. Финст ӕнцӕ Хуцауи Дзурди. Еци хуарз хабарӕн коммӕгӕс уодзиан, цӕбӕл ахур кодта, уомӕ гӕсгӕ нӕ цард ку аразӕн, уӕд. Нӕ коммӕгӕсдзийнадӕ бӕрӕг уодзӕй, Йегови гъуддӕгтӕ царди фиццаг бунати ку ӕвӕрӕн, ӕ раст уагӕвӕрдтӕмӕ гӕсгӕ ку цӕрӕн ӕма хуарз хабар ку игъосун кӕнӕн, уӕд (Матф. 6:33; 24:14). Уомӕй уӕлдай ма гъӕуама Киристей исӕрст ӕнсувӕртӕ ци гъуддаг хӕссунцӕ, еци гъуддаги син ӕнхус кӕнӕн (Матф. 25:31–40).

18. Киристей исӕрст ӕнсувӕртӕ «ӕндӕр фустӕн» сӕ хуарздзийнадӕ куд бафеддзӕнцӕ?

 ¹⁸ Тагъд рӕстӕги Хуцауи исӕрст лӕггадгӕнгутӕн сӕ бон уодзӕй «ӕндӕр фустӕн» сӕ хуарздзийнӕдтӕ бафедун (Иоан. 10:16). Кутемӕй? Армагеддон ку райдайа, уой хуӕдразӕй, 144 минемӕй ма ка байзайа, етӕ уӕлӕрвтӕмӕ ист ӕрцӕудзӕнцӕ ӕма исуодзӕнцӕ Хуцауи ӕнӕмӕлгӕ уӕларвон фурттӕ. Ӕгас исӕрститӕ дӕр уодзӕнцӕ, Гоги ка ниццӕгъддзӕй ӕма «хъӕбӕр берӕ адӕни» ка фӕййервӕзун кӕндзӕй, еци уӕларвон ӕфсӕдти астӕу (Рарг. 2:26, 27; 7:9, 10). Расагъӕс кӕнӕ, «хъӕбӕр берӕ адӕн» куд цийнӕ кӕндзӕнцӕ, Йегови исӕрст лӕггадгӕнгутӕ ма зӕнхӕбӕл ку адтӕнцӕ, уӕд син ке ӕнхус кодтонцӕ, уобӕл!

19, 20. Цалинмӕ Армагеддон нӕма райдӕдта, уӕдмӕ нин ци банхус кӕндзӕй, фӕлварӕнти дӕр Йеговӕбӕл еузӕрдонӕй байзайун?

¹⁹ Аци уӕззау фӕстаг бӕнтти Йегови лӕггадгӕнгутӕй фӕлварӕнтӕбӕл беретӕ ӕмбӕлунцӕ. Фал уӕхӕн уавӕрти дӕр нӕ бон ӕй цийнӕ кӕнун (Иак. 1:2–4). Уой туххӕй ба гъӕуй Йеговӕмӕ зӕрдиагӕй ковун (Лук. 21:36). Удта ма гъӕуй алли бон дӕр Библи кӕсун ӕма ибӕл сагъӕс кӕнун, уӕлдайдӕр ба федӕни ка исӕнхӕст уодзӕй, еци пахампарӕдтӕбӕл (Пс. 77:12). Аци гъуддӕгтӕ ку кӕнӕн, удта игъосун кӕнуни гъуддаги зингзӕрдӕй ку архайӕн, уӕд не ’ууӕндундзийнадӕ нӕ фесафдзиан, нӕ нифс ба федардӕр кӕндзӕй.

²⁰ Расагъӕс кӕнӕ, Устур Вавилон исӕфт ку ’рцӕуа, ӕма Армагеддон ку райевгъуйа, уӕд куд цийнӕ кӕндзиан! Удта ма расагъӕс кӕнӕ, Хуцауи ном ку искӕдзос уа ӕма ӕ хецаудзийнадӕ ку ӕрфедар уа, уӕд куд амондгун уодзиан, уобӕл! (Йез. 38:23). Куд ӕй фӕууидтан, уотемӕй Армагеддон хуарз хабар ӕй, Хуцауи ка зонуй, ӕ Фуртмӕ ин ка игъосуй ӕма кӕронмӕ дӕр федарӕй ка байзайдзӕй, уонӕн (Матф. 24:13).