1, 2. а) Алли адӕймаги дӕр ци фӕндуй? б) Цӕбӕл гъӕуама ма гурусхӕ кӕнӕн?

АЛКЕДӔР фӕндуй, цӕмӕй ӕй уарзонцӕ ӕма ибӕл хӕранӕй ма цӕуонцӕ. Уотӕ ку нӕ фӕууй, уӕд адӕймаг ӕхемӕ нецӕййаг ӕркӕсуй ӕма ӕ нифс басӕттуй.

² Йеговӕ дӕр ӕй зонуй, нӕ зӕрдӕ уарзондзийнадӕ ӕма рӕстдзийнадӕ ке агоруй, уой (Пс. 33:5). Гъӕуама ӕппундӕр ма гурусхӕ кӕнӕн, Хуцау нӕ ке уарзуй ӕма ’й уотӕ ке фӕндуй, цӕмӕй нӕбӕл хӕранӕй маке цӕуа. Уой никки хуӕздӕр балӕдӕрдзиан, израилӕгтӕн Моисеййи фӕрци ци закъон равардта, уомӕй. Кӕд уӕмӕ уотӕ кӕсуй, ӕма уӕ неке уарзуй кенӕ хӕрандзийнадӕбӕл ӕмбӕлетӕ, уӕд уӕ бон ӕй лӕмбунӕгдӕр ӕркӕсун, Йеговӕ ӕ адӕни ке уарзта, е Моисеййи закъонӕй * куд зиннуй, уомӕ.

3. а) Ромӕгтӕмӕ 13:8–10 куд финст ӕй, уомӕ гӕсгӕ Моисеййи закъон ӕртасгӕй нӕ бон ци ӕй базонун? б) Аци статьяй цӕхуӕн фарстатӕбӕл дзурд цӕудзӕй?

³ Моисеййи закъон ӕртасгӕй нӕ бон ӕй фӕууинун, нӕ уӕларвон Фидӕ Йеговӕ нӕ куд фӕлмӕн уарзтӕй уарзуй, уой. (Бакӕсӕ Ромӕгтӕмӕ 13:8–10.) Аци статьяй ӕркӕсдзиан ӕрмӕстдӕр цалдӕр закъонемӕ ӕма радзубанди кӕндзиан  уӕхӕн фарстатӕбӕл: цӕмӕн ес зӕгъӕн, ӕма Хуцауи закъонӕн ӕ бундор уарзондзийнадӕ ӕй? Закъон адӕни иннети хӕццӕ ӕнӕхӕранӕй архайунмӕ ке разӕнгард кодта, е цӕмӕй бӕрӕг ӕй? Бартӕ ке къохти адтӕнцӕ, етӕ си куд гъӕуама пайда кодтайуонцӕ? Закъон уӕлдай хъӕбӕрдӕр ке гъӕуай кодта? Аци фарстатӕбӕл дзуӕппитӕ нин уодӕнцойнӕ ратдзӕнцӕ, нӕ нифс нин бафедар кӕндзӕнцӕ ӕма нӕ уӕларвон Фидӕмӕ бахӕстӕгдӕр уодзиан (Гъуд. 17:27; Ром. 15:4).

4. а) Цӕмӕн ес зӕгъӕн, ӕма Моисеййи закъон уарзондзийнадӕбӕл лӕууй? б) Матфеййи 22:36–40 куд финст ӕй, уомӕ гӕсгӕ Йесо сӕйраг цӕхуӕн фӕдзӕхститӕ исхудта?

⁴ Федарӕй зӕгъӕн ес, ӕма Моисеййи закъон уарзондзийнадӕбӕл лӕууй, уомӕн ӕма Йегови цийфӕнди гъуддагмӕ дӕр уарзондзийнадӕ фӕрразӕнгард кӕнуй (1 Иоан. 4:8). Закъони цидӕриддӕр финст ӕй, е арӕзт ӕй дууӕ сӕйраг фӕдзӕхстебӕл: Хуцауи уарзӕ, удта иннети уарзӕ (Лев. 19:18; Дук. з. 6:5; бакӕсӕ Матфеййи 22:36–40). Еци 600 фӕдзӕхстемӕй алкӕцимӕйдӕр Йегови уарзондзийнадӕ зиннуй. Ӕркӕсӕн цалдӕр цӕветтонемӕ.

5, 6. Йеговӕ лӕг ӕма уосӕмӕ цӕмӕ ӕнгъӕлмӕ кӕсуй ӕма хуарз ци уинуй? Ӕрхӕссӕ цӕветтон.

⁵ Дӕ цардӕмбалбӕл еузӕрдон уо ӕма дӕ сувӕллӕнтти сагъӕс кӕнӕ. Йегови уотӕ фӕндуй, цӕмӕй бийнонти медӕг уарзондзийнадӕ макӕд ӕруазал уа (Райд. 2:24; Матф. 19:3–6). Дӕ цардӕмбал дӕбӕл гадзирахаттӕй рацӕуа, уомӕй зиндӕр, ӕвӕдзи, неци ес. Мадта дессаг нӕй, дӕс фӕдзӕхстемӕй ӕвдӕймаг «ма хӕтӕ», зӕгъгӕ ке адтӕй (Дук. з. 5:18). Хӕтгӕ ка кӕнуй, е Хуцауи рази тӕрегъӕд кӕнуй, удта ӕ цардӕмбали зӕрдӕ дӕр хъӕбӕр ресун кӕнуй (Райд. 39:7–9). Хатгай еци рист дӕсгай ӕнзти дӕргъи дӕр нӕ рандӕ уй.

⁶ Лӕг ӕма уосӕ кӕрӕдземӕн куд ӕнцӕ, уомӕ Йеговӕ цийфӕнди цӕстӕй нӕ кӕсуй. Рагидзаманти дӕр ин хъӕбӕр ӕхсидзгӕ адтӕй, цӕмӕй израилӕгтӕ сӕ бийнойнӕгтӕн аргъ кодтайуонцӕ. Закъон ка нимадта, еци нӕлгоймаг ӕ уоси уарзта ӕма си нецӕй туххӕй нӕ рахецӕн адтайдӕ (Дук. з. 24:1–4; Матф. 19:3, 8). Фал уӕддӕр нӕлгоймаг ӕ уосӕй ку рахецӕн уидӕ, уӕд ин гъӕуама, уой туххӕй гӕгъӕди равардтайдӕ. Еци гӕгъӕди силгоймаги гъӕуай кодта, цӕмӕй ӕй хӕтундзийнади ма фӕффудгин кодтайуонцӕ. Цӕмӕй нӕлгоймаг еци гӕгъӕди исамал кодтайдӕ, уой туххӕй ӕй гъудӕй горӕти хестӕр лӕгтӕмӕ бацӕун ӕма сӕ хӕццӕ радзорун. Уой фӕрци хестӕр лӕгтӕн фадуат фӕззиннидӕ бийнонтӕн банхус кӕнун, цӕмӕй ма рахецӕн адтайуонцӕ. Израилаг ӕ хевӕндӕ миути туххӕй ку рахецӕн уидӕ, уӕд ин Йеговӕ ӕ пахампартӕ ӕма хестӕр лӕгти фӕрци ӕ гъуддагмӕ алкӕд не ’ркӕсидӕ. Фал силгоймаги цӕстисугтӕ уидта, удта ин ӕ рист лӕдӕрдтӕй (Мал. 2:13–16).

7, 8. а) Йеговӕ ниййергутӕн ци бафӕдзахста? (Кӕсӕ хузӕмӕ ӕндаг цъарӕбӕл.) б) Уомӕй цӕбӕл ахур кӕнӕн?

⁷ Закъонӕй ма бӕрӕг ӕй, Йеговӕ сувӕллӕнттӕбӕл дӕр ке тухсуй. Хуцау ниййергутӕн ниффӕдзахста, цӕмӕй син айдагъ хуӕрдӕ ӕма уӕледарӕсбӕл ма тухсонцӕ, фал се ’ууӕндундзийнадӕбӕл дӕр. Ниййергутӕ гъӕуама алли фадуатӕй дӕр пайда кодтайуонцӕ, цӕмӕй сӕ сувӕллӕнттӕн Хуцауи закъон амудтайуонцӕ ӕма син Йегови бауарзун кодтайуонцӕ (Дук. з. 6:6–9; 7:13). Еу рӕстӕги Йеговӕ ӕ адӕни ку бафхуардта, уӕд еу гъуддаг уой медӕги адтӕй, ӕма израилӕгтӕ сӕ сувӕллӕнттӕн фудмиутӕ кодтонцӕ (Йер. 7:31, 33). Ниййергутӕ сӕ сувӕллӕнттӕмӕ цагъари цӕстӕй гъӕуама ма кастайуонцӕ, фал сӕ гъӕуама Йегови лӕварбӕл нимадтайуонцӕ (Пс. 127:3).

⁸ Цӕбӕл ахур кӕнӕн. Лӕг ӕма уосӕ кӕрӕдземӕн куд ӕнцӕ, уой Йеговӕ хуарз уинуй.  Уомӕй уӕлдай ма ’й фӕндуй, цӕмӕй ниййергутӕ сӕ сувӕллӕнтти уарзонцӕ. Фудмиутӕ син ку кӕнонцӕ, уӕдта си дзуапп байагордзӕй.

9–11. Йеговӕ зудӕ кӕнуни туххӕй закъон цӕмӕн равардта?

⁹ Дӕу ка нӕй, уомӕ ма бабӕллӕ. Дӕс фӕдзӕхстемӕй фӕстаг адтӕй зудӕ кӕнуни туххӕй, гъома, дӕу ка нӕй, уӕхӕн естӕмӕ дӕ зӕрдӕ дзорун ма райдайӕд (Дук. з. 5:21; Ром. 7:7). Йеговӕ еци закъон равардта, цӕмӕй ӕ адӕни еу ӕхсидзгӕ гъуддагбӕл исахур кодтайдӕ: гъудӕй сӕ сӕ зӕрдӕ гъӕуай кӕнун, гъома сӕ гъудитӕ ӕма сӕ фӕндтӕмӕ сӕ гъос дарун. Йеговӕ ’й зонуй, хӕран гъуддӕгтӕмӕ лӕгъуз сагъӕстӕ ӕма фӕндтӕ ке ’ркӕнунцӕ (Ӕмб. 4:23). Израилаг ӕ зӕрди лӕгъуз фӕндтӕн бунат искӕнун ку бауагътайдӕ, уӕд ин иннети уарзун зиндӕр адтайдӕ. Уӕхӕн хабар ӕрцудӕй паддзах Давидбӕл. Ӕной Давид хуарз адӕймаг адтӕй, фал еухатт ӕ зӕрдӕ кедӕр уосӕмӕ дзорун райдӕдта. Ӕма ’й еци фӕндӕ тӕрегъӕдмӕ ӕркодта (Иак. 1:14, 15). Давид еци силгоймаги хӕццӕ фӕррӕдудӕй, ӕ лӕги ба ин басайунмӕ гъавта. Фал си ку неци рауадӕй, уӕдта уотӕ бакодта, цӕмӕй еци лӕг тугъди будури ӕ мӕлӕт иссирдтайдӕ (2 Сам. 11:2–4; 12:7–11).

¹⁰ Йеговӕ ’й зудта, адӕймаг еци фӕдзӕхст ӕнхӕст кодта ӕви нӕ, уой, уомӕн ӕма алке зӕрдӕ дӕр уинуй (1 Анз. 28:9). Зудӕ кӕнуни туххӕй закъон сӕ разӕнгард кодта, лӕгъуз гъуддӕгтӕмӕ ка ’ркӕндзӕй, уӕхӕн гъудитӕ сорун. Ӕма еци закъонӕй бӕрӕг ӕй, нӕ уӕларвон Фиди зунд ӕма уарзондзийнадӕ.

¹¹ Цӕбӕл ахур кӕнӕн. Йеговӕ адӕймагӕн ӕ бакастмӕ нӕ кӕсуй, фал ӕ зӕрдӕмӕ – медӕгӕй цӕхуӕн ӕй, уомӕ (1 Сам. 16:7). Йеговӕй нӕ гъудитӕ ӕма нӕ гъуддӕгтӕ нӕ баримӕхсдзиан. Е нин нӕ хуарз менеугутӕ уинуй ӕма ’й фӕндуй, цӕмӕй сӕбӕл идарддӕр дӕр архайӕн. Фал ма ’й фӕндуй, цӕмӕй рӕдуд гъудитӕ дӕр афойнадӕбӕл исбӕрӕг кӕнӕн ӕма ма бауадзӕн, цӕмӕй нӕ тӕрегъӕдмӕ ӕркӕнонцӕ (2 Анз. 16:9; Матф. 5:27–30).

12. Моисеййи закъонӕй ма никкидӕр ци базудтан?

¹² Моисеййи закъонӕй ма бӕрӕг ӕй, Йеговӕ рӕстдзийнадӕ ке уарзуй (Пс. 37:28; Ис. 61:8). Иннети хӕццӕ рӕстӕй архайун куд гъӕуй, уой нин уомӕй хуӕздӕр неке ’вдесуй. Израилӕгтӕ Йегови закъӕнттӕ ку ӕнхӕст кодтонцӕ, уӕд син арфӕ кодта. Ӕ раст уагӕвӕрдтӕ ин ку нецӕмӕ дариуонцӕ, уӕдта сӕхе фидбилизи хай бакӕниуонцӕ. Гъӕйдӕ ма ӕркӕсӕн дӕс фӕдзӕхстемӕй никкидӕр дууемӕ.

13, 14. Дӕс фӕдзӕхстемӕй фиццаг дууӕ цӕй туххӕй адтӕнцӕ ӕма израилӕгтӕн ци пайда хастонцӕ?

¹³ Ӕрмӕстдӕр Йеговӕн лӕггадӕ кӕнтӕ. Дӕс фӕдзӕхстемӕй фиццаг дууеми загъд адтӕй, израилӕгтӕ ӕрмӕстдӕр Йеговӕбӕл еузӕрдон ке гъӕуама адтайуонцӕ ӕма мӕнгӕ хуцӕуттӕн ке гъӕуама ма кувтайуонцӕ (Рац. 20:3–6). Еци фӕдзӕхст ку ӕнхӕст кодтонцӕ, уӕд е пайда сӕхецӕн адтӕй, Йеговӕн нӕ, фал. Адӕн Йеговӕбӕл еузӕрдон ку адтӕнцӕ, уӕд хуарз цардӕнцӕ. Мӕнгӕ хуцӕуттӕмӕ се ’ргом ку раздахиуонцӕ, уӕдта сӕбӕл еу бӕллӕх инней фӕсте ӕрцӕуидӕ.

¹⁴ Цӕветтонӕн райсӕн, ханаайнӕгтӕ куд цардӕнцӕ, уой. Етӕ уодӕгас Хуцауӕн ковуни бӕсти мард гумеритӕн кувтонцӕ. Уой туххӕй хъӕбӕр фехалдӕнцӕ (Пс. 115:4–8). Расагъӕс кӕнӕ, сӕ дини ӕгъдӕуттӕ баст адтӕнцӕ хӕтундзийнадӕ ӕма аллихузи ихӕлд миути хӕццӕ, удта ма сӕ сувӕллӕнтти дӕр нивонди ӕрхӕссиуонцӕ! Израилӕгтӕ Йегови ку ниууадзиуонцӕ ӕма гумеритӕн ковун ку райдайиуонцӕ, уӕд уонӕй дӕр ханаайнӕгти хузӕн ихӕлд адӕн рауаидӕ ӕма сӕ бийнонтӕн гъезӕмӕрттӕ бавзарун кӕниуонцӕ (2 Анз. 28:1–4). Уомӕй уӕлдай ма, бартӕ ке къохти адтӕнцӕ, етӕ дӕр Хуцауи закъӕнттӕ нецӕмӕ дардтонцӕ, раст нӕ тӕрхон кодтонцӕ  ӕма, сӕрбӕлдзорӕг кӕмӕн н’ адтӕй, уони ӕфхуардтонцӕ (Йез. 34:1–4). Йеговӕ ӕ адӕни фӕдзахста, ӕнӕ фӕккӕсӕг силгоймӕгти ӕма сувӕллӕнтти ка ӕфхуардта, уонӕн тӕрхон ке кӕндзӕй (Дук. з. 10:17, 18; 27:19). Фал израилӕгтӕ Йеговӕбӕл еузӕрдон ку уайуонцӕ ӕма кӕрӕдзей хӕццӕ рӕстӕй ку архаиуонцӕ, уӕдта син арфӕ кодта (1 Пад. 10:4–9).

15. Йегови туххӕй ци базудтан?

¹⁵ Цӕбӕл ахур кӕнӕн. Ӕхе Йегови лӕггадгӕнӕг ка фӕххонуй, етӕ ин ӕ уагӕвӕрдтӕ ку нецӕмӕ фӕддарунцӕ ӕма ӕ адӕнӕн маст ку февзарун кӕнунцӕ, уӕд уоми Йегови фудгин кӕнун нӕ гъӕуй. Йеговӕ нӕ уарзуй ӕма ’й уинуй, хӕранӕй нӕбӕл куд цӕунцӕ, уой. Е нин нӕ рист лӕдӕруй, мадӕ ӕ бӕдоли рист куд фӕллӕдӕруй, уомӕй дӕр хъӕбӕрдӕр (Ис. 49:15). Ӕма кӕд тӕрхон уайтагъ не ’скӕнуй, уӕддӕр, иннети ка ӕфхуӕруй ӕма ӕ гъуддӕгтӕбӕл ка нӕ фӕсмон кӕнуй, уонӕй ӕ рӕстӕги дзуапп байагордзӕй.

16–18. Моисеййи закъон царди кӕци фӕззелӕнтӕмӕ хаудтӕй ӕма нин е цӕбӕл дзорӕг ӕй?

¹⁶ Моисеййи закъон израилӕгтӕн сӕ царди алли фӕззелӕнтӕмӕ дӕр хаудтӕй. Уомӕ гӕсгӕ Израили хестӕр лӕгти гъудӕй Хуцауи адӕнӕн раст тӕрхон кӕнун. Йеговӕн ковуни хӕццӕ баст гъуддӕгтӕй уӕлдай ма сӕ гъудӕй буцӕутӕ ӕма фудракӕндтӕ дӕр ӕвзарун. Ӕркӕсӕн цалдӕр цӕветтонемӕ.

¹⁷ Израилаг еске ку рамардтайдӕ, уӕд ин мӕлӕти тӕрхон уайтагъд нӕ рахӕссиуонцӕ. Фиццаг бал гъӕуама горӕти хестӕр лӕгтӕ гъуддагмӕ аллирдиги дӕр ӕркастайуонцӕ, ӕма уой фӕсте ба фегъосун кодтайуонцӕ, мӕлӕти тӕрхон ин хӕсгӕ ’й ӕви нӕ, уой (Дук. з. 19:2–7, 11–13). Уомӕй уӕлдай ма ӕнӕуой гъуддӕгтӕ дӕр ӕвзурстонцӕ, зӕгъӕн, кадӕртӕ естӕй туххӕй ку нӕ бафедауиуонцӕ кенӕ бийнонти медӕг хӕлхъойтӕ ку рауаидӕ (Рац. 21:35; Дук. з. 22:13–19). Хестӕр лӕгтӕ раст ку тӕрхон кӕниуонцӕ, израилӕгтӕ ба закъон ку ӕнхӕст кӕниуонцӕ, уӕд алкӕмӕндӕр хуарз уидӕ, ӕма уотемӕй Йегови ном кадгин кодта (Лев. 20:7, 8; Ис. 48:17, 18).

¹⁸ Цӕбӕл ахур кӕнӕн. Йеговӕн ӕхсидзгӕ ’й, нӕ царди алли уавӕрти дӕр нӕхе куд фӕддарӕн, е. Фӕндуй ӕй, цӕмӕй иннети уарзӕн ӕма сӕ хӕццӕ рӕстӕй архайӕн. Йеговӕ уинуй, цидӕриддӕр кӕнӕн ӕма дзорӕн, уой, еунӕгӕй ку фӕууӕн, уӕд дӕр (Дзиуит. 4:13).

19–21. а) Хестӕр нӕлгоймӕгтӕ адӕнӕн куд гъӕуама тӕрхон кодтайуонцӕ? б) Йеговӕ куд батухстӕй, цӕмӕй ӕ адӕни хӕрандзийнадӕй багъӕуай кодтайдӕ ӕма уомӕй цӕбӕл ахур кӕнӕн?

¹⁹ Йегови фӕндадтӕй ӕ адӕни синхаг адӕнихӕттити ӕгъдӕуттӕй багъӕуай кӕнун. Уомӕ гӕсгӕ хестӕр лӕгтӕй ӕма тӕрхонгӕнгутӕй агурдта, цӕмӕй Закъонӕй раст пайда кодтайуонцӕ. Етӕ гъӕуама карз кенӕ хевӕндӕ ма адтайуонцӕ, фал гъӕуама адӕни уарзтайуонцӕ ӕма син раст тӕрхон кодтайуонцӕ (Дук. з. 1:13–17; 16:18–20).

²⁰ Йеговӕ ӕ лӕггадгӕнгутӕн тӕрегъӕд кодта ӕма батухстӕй, цӕмӕй сӕ хӕрандзийнадӕй багъӕуай кодтайдӕ. Зӕгъӕн, закъони  фӕрци, уотӕ ӕнцон н’ адтӕй ӕнӕфуд адӕймаги фӕффудгин кӕнун. Удта адӕймагӕн адтӕй, ка ’й фудгин кӕнуй, уой базонуни барӕ (Дук. з. 19:16–19; 25:1). Кедӕр фӕффудгин кӕнунмӕ тӕккӕ минкъийдӕр дууӕ ӕвдесӕни гъудӕй (Дук. з. 17:6; 19:15). Ӕрмӕстдӕр еунӕг ӕвдесӕн ку адтайдӕ, уӕдта? Фудгин адӕймагӕн ӕ бон уотӕ сагъӕс кӕнун н’ адтӕй, ӕма тӕрхонӕй фӕййервазтӕй, уомӕн ӕма ’й Йеговӕ уидта. Бийнонти хестӕртӕн сӕ бартӕ ӕнӕкӕрон н’ адтӕнцӕ. Еуӕй-еухатт бийнонти медӕг хӕлхъойтӕ ку рауаидӕ, уӕд еци гъуддагмӕ горӕти хестӕр лӕгтӕ ӕркӕсиуонцӕ ӕма фӕстаг унаффӕ етӕ рахӕссиуонцӕ (Дук. з. 21:18–21).

²¹ Цӕбӕл ахур кӕнӕн. Йеговӕ алкӕддӕр рӕстӕй фӕййархайуй, ӕма нин уомӕй фӕнзуйнаг ӕй (Пс. 9:7). Ӕ уагӕвӕрдтӕмӕ гӕсгӕ ка цӕруй, уонӕн арфӕ кӕнуй, ӕ бартӕй раст ка нӕ пайда кӕнуй, уони ба бафхуӕруй (2 Сам. 22:21–23; Йез. 9:9, 10). Еуӕй-еухатт нӕмӕ уотӕ фӕккӕсуй ӕма фудгӕнгутӕ ӕнӕфхуӕрдӕй байзайунцӕ, фал си Йеговӕ ӕ рӕстӕги дзуапп байагордзӕй (Ӕмб. 28:13). Ӕма ку не ’рфӕсмон кӕнонцӕ, уӕд ӕй тагъд балӕдӕрдзӕнцӕ, «уодӕгас Хуцауи къохмӕ бахаунӕй тӕссагдӕр [ке] неци ес» (Дзиуит. 10:30, 31).

22–24. а) Закъон уӕлдайдӕр ке гъӕуай кодта ӕма нин е цӕбӕл дзорӕг ӕй? б) Рацуди 22:22–24 цӕхуӕн фӕдзӕхст ес?

²² Закъон уӕлдайдӕр гъӕуай кодта, ӕхе сӕрбӕл исдзорун ке бон н’ адтӕй, уӕхӕн адӕни – седзӕрти, идӕдзӕ силгоймӕгти ӕма ӕрцӕуӕггӕгти. Израили тӕрхонгӕнгутӕн загъд  адтӕй: «Ӕрцӕуӕггаги кенӕ седзӕри гъуддаг ку ’взарай, уӕд хӕран тӕрхон ма рахӕссӕ. Ӕма идӕдзӕн ӕ дарӕс нӕхсти ма райсӕ» (Дук. з. 24:17). Йеговӕ зӕрдиагӕй тухстӕй, ӕ адӕни астӕу сӕрбӕлдзорӕг кӕмӕн н’ адтӕй, уонӕбӕл, ӕма сӕ ка ӕфхуардта, уонӕн ба сӕхе бафхуӕридӕ. (Бакӕсӕ Дуккаг закъон 24:17.)

²³ Закъон ма бийнонти гъӕуай кодта ихӕлд миутӕй дӕр. Закъонмӕ гӕсгӕ тогхӕстӕги хӕццӕ ӕмуат ӕрцӕун тӕрегъӕдбӕл нимад адтӕй (Лев. 18:6–30). Израилӕгти алливарс ка цардӕй, еци адӕнихӕттитӕмӕ уӕхӕн гъуддӕгтӕ ӕнӕгъдаубӕл нимад н’ адтӕнцӕ. Фал Йегови цӕсти ба адтӕнцӕ илгъаг, ӕма ӕ адӕнӕн дӕр гъӕуама илгъаг адтайуонцӕ.

²⁴ Цӕбӕл ахур кӕнӕн. Йегови фӕндуй, цӕмӕй, бартӕ ке къохти бакодта, етӕ иннети сагъӕс кӕнонцӕ. Йеговӕ тухмиуӕй е ’сӕфт уинуй, ӕма ’й фӕндуй, цӕмӕй алкедӕр, уӕлдайдӕр ба ӕхе сӕрбӕл исдзорун ӕ бон кӕмӕн нӕй, етӕ мацӕмӕй тӕрсонцӕ ӕма хӕрандзийнадӕй хизт уонцӕ.

25, 26. а) Уарзондзийнадӕ ӕма рӕстдзийнадӕ цард ӕма уолӕфти хӕццӕ рабарӕн цӕмӕн ес? б) Аци статьятӕй дуккаги дзурд цӕбӕл цӕудзӕй?

²⁵ Уарзондзийнадӕ ӕма рӕстдзийнадӕ ӕнцӕ цард ӕма уолӕфти хузӕн: ӕнӕ цардӕй уолӕфт нӕййес, ӕнӕ уолӕфтӕй ба – цард. Йеговӕ нӕ хӕццӕ рӕстӕй ке архайуй, уой федарӕй ку зонӕн, уӕд ӕй никки хъӕбӕрдӕр уарздзиан. Хуцауи ӕма ӕ уагӕвӕрдтӕ ку уарзӕн, уӕд иннети дӕр уарздзиан ӕма сӕ хӕццӕ рӕстӕй архайдзиан.

²⁶ Моисеййи закъон израилӕгтӕн банхус кодта Йеговӕмӕ бахӕстӕг ун. Фал Киристе Закъон ку исӕнхӕст кодта, уӕд ӕй хуӕздӕр цӕбӕлдӕр баййивта (Ром. 10:4). Апостол Павел ба загъта, «Закъон федӕни хуарздзийнӕдтӕн ӕрмӕстдӕр сӕ аууон» ке адтӕй (Дзиуит. 10:1). Аци статьятӕй дуккаги базондзиан, еци хуарздзийнӕдтӕмӕ ци хаудтӕй, ӕма радзубанди кӕндзиан, уарзондзийнадӕ ӕма рӕстдзийнадӕ киристон ӕмбурди куд ӕхсидзгӕ ’нцӕ, уобӕл.