1, 2. а) Исаййи 41:10 финст дзурдтӕ Йошикойӕн куд банхус кодтонцӕ? б) Еци стихи дзурдтӕ финст кӕмӕн ӕрцудӕнцӕ?

ЕУЗӔРДОН хуӕрӕ Йошико фегъуста еу лӕгъуз хабар. Дохтир ин загъта, цалдӕр мӕйемӕй ӕндӕр ке нӕбал рацӕрдзӕй. Цума Йошико ӕхе куд бадардта? Ӕ зӕрдӕбӕл ӕрлӕудтӕнцӕ Исаййи 41:10 финст дзурдтӕ. (Ба ’й кӕсӕ.) Ӕма уой фӕсте еци сабурӕй дохтирӕн загъта, ке нецӕмӕй тӕрсуй, уомӕн ӕма ин Йеговӕ ӕ къохбӕл хуӕцуй *. Аци стихи дзурдтӕ еци еузӕрдон хуӕрӕн банхус кодтонцӕ ӕ зӕрдӕ ӕнӕгъӕнӕй дӕр Йеговӕбӕл дарун, ӕма махӕн дӕр уӕззау фӕлварӕнти рӕстӕг банхус кӕндзӕнцӕ. Цума куд? Фиццаг бал базонӕн, Йеговӕ сӕ Исаййӕн цӕмӕн ниффинсун кодта, уой.

² Йеговӕ еци дзурдтӕ Исайӕн баихӕс кодта ниффинсун, цӕмӕй нифс лӕвардтайуонцӕ, фӕстӕдӕр Вавилони уацармӕ ка бахаудтайдӕ, еци дзиуиттӕгтӕн. Еци дзурдтӕ айдагъ уонӕн финст не ’рцудӕнцӕ, фал Йегови лӕггадгӕнгутӕн ӕгасемӕндӕр (Ис. 40:8; Ром. 15:4). Мах цӕрӕн «хъӕбӕр уӕззау рӕстӕг», ӕма нӕ уодӕнцойнӕ абони куд гъӕуй, уотӕ некӕдма. Еци уодӕнцойнӕ ба иссерӕн ес Исаййи киунуги (2 Тим. 3:1).

3. а) 2019 анзӕн ӕвзурст ка ’рцудӕй, еци стихи цӕхуӕн зӕрдӕвӕрдтӕ ес? б) Еци зӕрдӕвӕрдтӕ нин ӕхсидзгӕ цӕмӕн ӕнцӕ?

³ Аци статьяй ӕркӕсдзиан, Исаййи 41:10 финст ка ’нцӕ ӕма нин не ’ууӕндундзийнадӕ ка федар кӕнуй, уӕхӕн ӕртӕ зӕрдӕвӕрдемӕ Йеговӕй: 1) алкӕддӕр уодзӕй нӕ фарсмӕ, 2) Йеговӕ нӕ Хуцау ӕй, 3) ӕнхус нин кӕндзӕй. Аци зӕрдӕвӕрдтӕ * нин хъӕбӕр ӕхсидзгӕ ’нцӕ, уомӕн ӕма Йошикой  хузӕн мах дӕр зиндзийнӕдтӕбӕл ӕмбӕлӕн. Уомӕй уӕлдай ма дуйней уавӕртӕ ци зиндзийнӕдтӕмӕ ӕркӕнунцӕ, уони хӕццӕ дӕр нин тохгӕ ’й. Кадӕртӕ ба ни хецауӕдтӕй дӕр ӕфхуӕрд ӕййафунцӕ. Мадта аци зӕрдӕвӕрдтӕмӕ фӕд-фӕди ӕркӕсӕн.

4. а) Фиццаг бал цӕхуӕн зӕрдӕвӕрдмӕ ӕркӕсдзиан? (Кӕсӕ ма феппайуйнаг.) б) Йеговӕ нин ӕй куд лӕдӕрун кӕнуй, цӕхуӕн зӕрдӕ нӕмӕ даруй, уой? в) Хуцау дӕмӕ цӕхуӕн зӕрдӕ даруй, уой ке зонис, е дин куд ӕнхус кӕнуй?

⁴ Фиццагидӕр нин Йеговӕ зӕгъуй: «Ма тӕрсӕ, уомӕн ӕма ӕз дӕ хӕццӕ дӕн» *. Йеговӕ нӕ хӕццӕ ке ӕй, уой нин ӕвдесуй, ке нӕбӕл тухсуй ӕма нӕ ке уарзуй, уомӕй. Цӕхуӕн зӕрдӕ нӕмӕ даруй, уой туххӕй Исаййи 43:4 финст ӕй: «Хъазар мин ке дӕ, уой туххӕй кадгин дӕ мӕ цӕсти, ӕма дӕ хъӕбӕр уарзун». Дун-дуйней некӕд неке бон исуодзӕй уотӕ бакӕнун, цӕмӕй Йеговӕ, ка ин лӕггадӕ кӕнуй, уони мабал уарза. Ӕ еузӕрдондзийнадӕн басӕттӕн нӕййес (Ис. 54:10). Ке нӕ уарзуй ӕма нӕ е ’мбӕлттӕбӕл ке нимайуй, уой фӕрци нифсгундӕр кӕнӕн. Рагидзаманти ӕ еузӕрдон ӕмбал Авраами куд гъӕуай кодта, абони мах дӕр уотӕ гъӕуай кӕнуй. Йеговӕ ин загъта: «Мацӕмӕй тӕрсӕ. Ӕз дӕ уарти хузӕн гъӕуай кӕндзӕн» (Райд. 15:1).

5, 6. а) Кӕцӕй ӕй зонӕн, Йегови уотӕ ке фӕндуй, цӕмӕй нин нӕ зиндзийнӕдти банхус кӕна? б) Йошикой хабарӕй цӕбӕл ахур кӕнӕн?

⁵ Мах ӕй зонӕн, Йегови уотӕ ке фӕндуй, цӕмӕй нин зиндзийнӕдти банхус кӕна. Ӕ адӕнӕн зӕрдӕ байвардта: «Дӕнттӕбӕл ку цӕуай, уӕд ӕз уодзӕн дӕ хӕццӕ. Цӕугӕдӕнтти сӕрти ку хезай, уӕд дӕ дон нӕ фӕлласдзӕй. Арти астӕути ку цӕуай, уӕд нӕ басодздзӕнӕ, арти ӕвзӕгтӕ дӕбӕл ӕмбӕлгӕ дӕр нӕ бакӕндзӕнцӕ» (Ис. 43:2). Цума нин аци дзурдтӕ цӕбӕл дзорӕг ӕнцӕ?

⁶ Йеговӕ уотӕ нӕ зӕгъуй, ӕма нӕ не ’гас зиндзийнӕдтӕй дӕр исуӕгъдӕ кӕндзӕй, фал уой дӕр нӕ бауадздзӕй, цӕмӕй нӕ еци зиндзийнӕдтӕ цӕугӕдони хузӕн фӕлласонцӕ кенӕ ба нин арти хузӕн фӕлварӕнтӕ, исраст кӕнӕн кӕмӕн нӕбал уа, уӕхӕн зиан ӕрхӕссонцӕ. Йеговӕ нин зӕгъуй, нӕ фарсмӕ ке уодзӕй. Е нин банхус кӕндзӕй, цӕмӕй мацӕмӕй тӕрсӕн ӕма ибӕл еузӕрдонӕй  байзайӕн, сауӕнгӕ, мӕлӕти къахбӕл ку лӕууӕн, уӕддӕр (Ис. 41:13). Йошико уой ӕхебӕл бавзурста. Ӕ кизгуттӕй сӕ еу радзурдта: «Нӕ мадӕ куд сабур адтӕй ӕма куд нецӕмӕй тарстӕй, уобӕл десӕй мардан. Бӕрӕг адтӕй, Йеговӕ ин зӕрди фарнӕ ке лӕвардта. Ӕ мӕлӕти бон дӕр ма дохтиртӕн ӕма иннӕ сӕйгитӕн дзурдта Йегови ӕма ӕ зӕрдӕвӕрдти туххӕй». Йошикой хабарӕй цӕбӕл ахур кӕнӕн? Йеговӕ нӕ хӕццӕ ке ӕй, уобӕл федарӕй ку ’ууӕндӕн, уӕд мах бон дӕр уодзӕй федарӕй ӕма нифсгунӕй фӕлварӕнти сӕрти хезун.

7, 8. а) Дуккаг зӕрдӕвӕрд цӕхуӕн ӕй ӕма ци нисан кӕнуй? б) Йеговӕ дзиуиттӕгтӕн, тухсгӕ ма кӕнтӕ, зӕгъгӕ, цӕмӕн загъта? в) Исаййи 46:3, 4 финст дзурдтӕ израилӕгтӕн куд банхус кодтонцӕ сабурӕй ӕнгъӕлмӕ кӕсун?

⁷ Нур ба ӕркӕсӕн, Исай ке ниффинста, еци зӕрдӕвӕрдтӕй дуккагмӕ: «Тухсгӕ ма кӕнӕ, уомӕн ӕма ӕз дӕ Хуцау дӕн». Дзурдбаст «тухсгӕ ма кӕнӕ» ци дзурдӕй ратӕлмац кодтонцӕ, е ма нисан кӕнуй, ести дӕбӕл ке ’рцӕудзӕй, уобӕл тухсун кенӕ тӕссаг уавӕри дӕ алливарс тарст гъӕуӕйттӕ кӕнун. 2013 анзи англисаг ӕвзагбӕл уагъд «Нӕуӕг дуйней тӕлмац»-и аци дзурдтӕ уотӕ финст ӕнцӕ: «Тухсгӕ ма кӕнӕ, уомӕн ӕма ӕз дӕ Хуцау дӕн».

⁸ Йеговӕ дзиуиттӕгтӕн, тухсгӕ ма кӕнтӕ, зӕгъгӕ, цӕмӕн загъта, кӕд ӕма сӕмӕ Вавилони уацар ӕнгъӕлмӕ кастӕй, уӕд? Уомӕн ӕма ’й зудта, вавилойнӕгтӕ ӕ рӕстӕги хъӕбӕр ке фӕттӕрсдзӕнцӕ. Цума цӕмӕй? Дзиуиттӕгтӕбӕл Вавилони 70 анзи ку рацудайдӕ, уӕд вавилойнӕгти хӕццӕ гъӕуама истухтайдӕ Мидо-персий устур ӕфсад. Ӕма Йеговӕ еци ӕфсадӕй испайда кодта, цӕмӕй ӕ адӕни уацарӕй исуӕгъдӕ кодтайдӕ (Ис. 41:2–4). Вавилойнӕгтӕ, удта иннӕ адӕн дӕр ӕй ку базудтонцӕ, се знӕгтӕ сӕмӕ ке ӕрбахӕстӕг ӕнцӕ, уой, уӕд кӕрӕдземӕн дзурдтонцӕ, «федар уо», зӕгъгӕ. Удта никки фулдӕр мӕнгӕ хуцӕуттӕ кӕнунмӕ фӕййагайдтонцӕ, кӕд нӕ фӕййервӕзун кӕниуонцӕ, зӕгъгӕ (Ис. 41:5–7). Дзиуиттӕгтӕ ба еци рӕстӕг сабур адтӕнцӕ, уомӕн ӕма сӕ зӕрдӕбӕл дардтонцӕ Йегови дзурдтӕ: «Ду ба, Израил, ду дӕ мӕ лӕггадгӕнӕг... [...] Тухсгӕ ма кӕнӕ, уомӕн ӕма ӕз дӕ Хуцау дӕн» (Ис. 41:8–10). Йегови дзурдтӕ, «ӕз дӕ Хуцау дӕн», зӕгъгӕ, ӕ еузӕрдон лӕггадгӕнгутӕн уобӕл дзорӕг адтӕнцӕ, ӕма сӕ нӕ байронх ӕй. Йеговӕ ма сӕ Хуцау адтӕй, етӕ ба – ӕ адӕн. Удта ма син уотӕ дӕр загъта: «Ӕз... уӕ хӕсдзӕн, ӕнхус уин кӕндзӕн ӕма уӕ ервӕзун кӕндзӕн». Аци дзурдтӕ израилӕгти, ӕвӕдзи, хъӕбӕр бафедар кодтонцӕ. (Бакӕсӕ Исаййи 46:3, 4.)

9, 10. Тухсгӕ цӕмӕннӕ гъӕуама кӕнӕн? Ӕрхӕссӕ цӕветтон.

⁹ Абони дуйней уавӕр адӕни куд тухсун кӕнуй, уотӕ некӕдма. Ке зӕгъун ӕй гъӕуй, мах дӕр зиндзийнӕдтӕй хизт нӕ ан. Фал гъӕуама тӕрсгӕ ма кӕнӕн, уомӕн ӕма нин Йеговӕ зӕгъуй: «Ӕз дӕ Хуцау дӕн». Аци дзурдтӕ нин, нӕ зӕрди фарнӕ багъӕуай кӕнунмӕ устур ӕнхус ӕнцӕ. Цума цӕмӕн?

¹⁰ Ӕрхӕссӕн цӕветтон. Дууӕ биццеуи, Давид ӕма Артур, цудӕнцӕ устур науӕбӕл. Еу афони устур уолӕнти бахаудтӕнцӕ ӕма науӕ рагӕлдзӕ-багӕлдзӕ кӕнун райдӕдта. Адӕн фӕттарстӕнцӕ, фал наутӕрӕг рагъӕр кодта: «Берӕ ’й нӕбал телдзӕй ӕма федар хуӕцетӕ». Давид хъӕбӕр истухстӕй. Фал наутӕрӕг нӕуӕгӕй радзурдта: «Тухсгӕ маке кӕнӕд, алцидӕр хуарз уодзӕй». Давид уӕддӕр нӕ сабур кодта ӕма загъта: «Кӕцӕй ӕй зонуй, ке нӕбӕл неци ’рцӕудзӕй, уой?» Артур ба ӕппундӕр нӕ тухстӕй ӕма ’й Давид бафарста: «Ду ба нӕ тӕрсис?» Артур бахудтӕй  ӕма загъта: «Нӕ тӕрсун, уомӕн ӕма аци наутӕрӕги зонун. Мӕ фидӕ ӕй!» Удта ма ӕ дзурдтӕбӕл бафтудта: «Мӕ фидӕ цӕхуӕн адӕймаг ӕй, удта куд дӕсни наутӕрӕг ӕй, уой дин ку радзорон, уӕд ду дӕр нӕбал тухсдзӕнӕ».

11. Ци цӕветтон ӕрхастан, уомӕй цӕбӕл ахур кӕнӕн?

¹¹ Аци цӕветтонӕй цӕбӕл ахур кӕнӕн? Артури хузӕн мах дӕр нӕ тӕрсӕн, уомӕн ӕма нӕ уӕларвон фидӕ Йегови хуарз зонӕн. Мах ӕй зонӕн, аци фӕстаг бӕнтти цӕргӕй цийфӕнди фӕлварӕнти ма бахауӕн, уӕддӕр нин Йеговӕ федар фӕллӕуунмӕ ке банхус кӕндзӕй (Ис. 35:4). Йеговӕбӕл нӕ зӕрдӕ ке дарӕн, уой фӕрци, Хуцауи ка нӕ зонуй, еци адӕни хузӕн нӕ тӕрсӕн (Ис. 30:15). Артури хузӕн ма цӕмӕй ан? Мах иннетӕн лӕдӕрун кӕнӕн, Хуцаубӕл нӕ зӕрдӕ дарун нӕ бон цӕмӕн ӕй, уой. Ӕма, ка ’й зонуй, етӕ дӕр ӕууӕндун райдайдзӕнцӕ, Йеговӕ син цийфӕнди зиндзийнӕдти дӕр ке банхус кӕндзӕй.

12. а) Цӕхуӕн ӕртиккаг зӕрдӕвӕрдбӕл дзордзиан? б) Дзурдбаст «Йегови цонг» махӕн цӕбӕл дзорӕг ӕй?

¹² Нур ба ӕркӕсӕн, Исай ке ниффинста, еци зӕрдӕвӕрдтӕй ӕртиккагмӕ: «Ӕз дӕ бафедар кӕндзӕн. Ӕз дин банхус кӕндзӕн». Минкъий раздӕр Исай ӕ киунуги ниффинста, Йеговӕ ӕ адӕни куд бафедар кӕндзӕй, уой: «Йеговӕ хъаурӕгин ӕфсӕддони хузӕн ӕрцӕудзӕй ӕма ӕ цонг разамунд дӕтдзӕй» (Ис. 40:10). Библий дзурд цонг арӕх хъаурӕмӕ фӕййамонуй. Мадта дзурдтӕ, «ӕ цонг разамунд дӕтдзӕй», зӕгъгӕ, Йеговӕ хъаурӕгин Паддзах ке ӕй, уомӕ амонунцӕ. Йеговӕ рагидзаманти е ’нӕкӕрон хъаурӕй пайда кодта, цӕмӕй ӕ лӕггадгӕнгутӕн ӕнхус кодтайдӕ, ӕма абони дӕр, ӕ зӕрдӕ ибӕл ка даруй, уони федар кӕнуй ӕма сӕ гъӕуай кӕнуй (Дук. з. 1:30, 31; Ис. 43:10).

13. а) Йеговӕ нин нӕ нифс уӕлдай хъӕбӕрдӕр кӕд бафедар кӕнуй? б) Йегови дзурдтӕй нин нӕ нифс кӕцитӕ федар кӕнунцӕ?

 ¹³ Йеговӕ нӕ алкӕддӕр бафедар кӕнуй, уӕлдайдӕр ба ӕфхуӕрд ку феййафӕн, уӕд. Еуӕй-еу бӕстити не знӕгтӕ аллихузи мадзӕлттӕй архайунцӕ, цӕмӕй игъосун кӕнуни гъуддаг ӕрлӕуун кӕнонцӕ ӕма нин нӕ организаци нихгӕнонцӕ. Фал мах нӕ тӕрсӕн, уомӕн ӕма Йеговӕ ӕхуӕдӕг загъта: «Дӕ нихмӕ ци тохӕндзауматӕ арӕзт ӕрцӕуа, уонӕй еу дӕр нӕ фӕррӕстмӕ уодзӕй» (Ис. 54:17). Аци дзурдтӕ нин нӕ зӕрдӕбӕл лӕуун кӕнунцӕ ӕртӕ ӕхсидзгӕ гъуддаги.

14. Хуцауи знӕгтӕ нӕ нихмӕ ке цӕунцӕ, е нӕмӕ дессаг цӕмӕннӕ кӕсуй?

¹⁴ Фиццаг: Киристей фӕдбӕлдзӕугутӕ ке ан, уомӕ гӕсгӕ ’й лӕдӕрӕн, адӕн ни се ’сӕфт ке уиндзӕнцӕ (Матф. 10:22). Йесо дзурдта, фӕстаг бӕнтти ӕ фӕдбӕлдзӕугути хъӕбӕр ке ӕфхуӕрдзӕнцӕ (Матф. 24:9; Иоан. 15:20). Дуккаг: Исаййи пахампарадӕмӕ гӕсгӕ ни не знӕгтӕ айдагъ се ’сӕфт нӕ уиндзӕнцӕ, фал ма нин нӕ нихмӕ аллихузи «тохӕндзауматӕй» пайда кӕндзӕнцӕ. Зӕгъӕн, ӕргом мӕнгӕттӕ нӕбӕл дзорунцӕ кенӕ нӕбӕл уӕхӕн цидӕртӕ ӕримисунцӕ, ӕма сӕбӕл адӕймаг ӕнцонтӕй баууӕндуй, удта нӕ фӕдбӕл зелунцӕ ӕма нӕ карзӕй ӕфхуӕрунцӕ (Матф. 5:11). Йеговӕ син сӕ «тохӕндзауматӕ» нӕ байсдзӕй (Еф. 6:12; Рарг. 12:17). Фал нӕ уой туххӕй тӕрсун нӕ гъӕуй. Цума цӕмӕн?

15, 16. а) Нӕ зӕрдӕбӕл ма никкидӕр ци гъӕуама дарӕн ӕма Исаййи 25:4, 5 уой туххӕй ци финст ес? б) Исаййи 41:11, 12 куд финст ӕй, уомӕ гӕсгӕ, нӕ нихмӕ ка цӕуй, уонӕмӕ ци ӕнгъӕлмӕ кӕсуй?

¹⁵ Ӕртиккаг: Йеговӕ куд загъта, уомӕ гӕсгӕ не знӕгтӕ нӕ нихмӕ ци «тохӕндзауматӕй» пайда кӕнунцӕ, «уонӕй еу дӕр нӕ фӕррӕстмӕ уодзӕй». Йеговӕ нӕ не знӕгтӕй гъӕуай кӕнуй, «римӕхсӕн бунат сӕх-сӕх уаруни» куд фӕгъгъӕуай кӕнуй, уотӕ. (Бакӕсӕ Исаййи 25:4, 5.) Не знӕгтӕ нин, исраст кӕнӕн кӕмӕн нӕбал уа, уӕхӕн зиан некӕд ӕрхӕсдзӕнцӕ (Ис. 65:17).

 ¹⁶ Нӕ уӕларвон Фидӕ Йеговӕ ма нин нӕ нифс федар кӕнуй, нӕ нихмӕ ка цӕуй, уонӕмӕ ци ӕнгъӕлмӕ кӕсуй, уой нин бӕлвурдӕй ке лӕдӕрун кӕнуй, уомӕй. (Бакӕсӕ Исаййи 41:11, 12.) Не знӕгтӕ нӕ нихмӕ кудфӕнди ма цӕуонцӕ ӕма цийфӕнди ма кӕнонцӕ, уӕддӕр сӕ гъуддаг кумӕ цӕуй, е бӕрӕг ӕй. Хуцауи адӕни нихмӕ кадӕриддӕр цӕуй, етӕ «ӕрбайсӕфдзӕнцӕ, цума сӕ кой дӕр некӕд адтӕй, уотӕ».

17, 18. а) Библи ку кӕсӕн, уӕд нин е куд банхус кӕндзӕй не ’гас зӕрдӕ дӕр Йеговӕбӕл дарун? Ӕрхӕссӕ цӕветтон. б) 2019 анзи стихбӕл ку сагъӕс кӕнай, уӕд дин е ци пайда ӕрхӕсдзӕй?

¹⁷ Гъӕуама Йегови хуӕздӕр базонунбӕл архайӕн, цӕмӕй ибӕл не ’гас зӕрдӕ дӕр дарӕн. Уой туххӕй ба гъӕуй Библи лӕмбунӕг кӕсун ӕма, ци бакастан, уобӕл сагъӕс кӕнун. Библий дзурд цӕуй, Йеговӕ рагидзаманти ӕ адӕни куд гъӕуай кодта, уобӕл. Ӕма еци хабӕртти фӕрци федарӕй ӕууӕндӕн, махбӕл дӕр ке батухсдзӕй.

¹⁸ Ӕркӕсӕн, Йеговӕ нӕ куд гъӕуай кӕнуй, уой туххӕй Исай ци дессаги цӕветтон ӕрхаста, уомӕ. Йегови рабарста фиййауи хӕццӕ, ӕ лӕггадгӕнгути ба – уӕриккити хӕццӕ. Исай ниффинста: «Уӕриккити ӕрбамбурд кӕндзӕй ӕма сӕ ӕ гъӕбеси хӕсдзӕй» (Ис. 40:11). Аци дзурдтӕ нин нӕ зӕрдитӕ сабур кӕнунцӕ ӕма нин нифс дӕттунцӕ, Йеговӕ нӕ ке гъӕуай кӕнуй. Цӕмӕй цийфӕнди зиндзийнӕдти дӕр нӕ зӕрдитӕ сабур уонцӕ, уой туххӕй ӕууӕнкгун ӕма зундгин цагъар 2019 анзӕн равзурста Исаййи 41:10 стих: «Тухсгӕ ма кӕнӕ, уомӕн ӕма ӕз дӕ Хуцау дӕн. Ӕз дӕ бафедар кӕндзӕн». Аци дзурдтӕбӕл сагъӕс кӕнӕ, ӕма федӕни фӕлварӕнтӕбӕл ку исӕмбӕлай, уӕд дин федар фӕллӕуун ӕнцондӕр уодзӕй.