1. Йеговӕ ӕ еузӕрдон лӕггадгӕнгутӕй алкӕмӕндӕр ци равардта?

ЙЕГОВӔ ХУЦАУ ӕ еузӕрдон лӕггадгӕнгутӕй алкӕмӕндӕр ӕмбурди рахецӕн кодта ӕхе бунат. Ӕма ни кӕд алкедӕр фӕйнӕхузи гъуддӕгти фӕййархайуй, уӕддӕр ни Йегови цӕсти алкӕмӕндӕр ес устур аргъ, удта кӕрӕдзей дӕр гъӕугӕ кӕнӕн. Аци ӕхсидзгӕ гъуди балӕдӕрунмӕ нин ӕнхус кӕнунцӕ апостол Павели финстӕгутӕ. Кутемӕй?

2. Ефесӕгтӕмӕ 4:16 куд финст ӕй, уомӕ гӕсгӕ кӕрӕдземӕн аргъ кӕнун ӕма ӕмгуст кӕнун цӕмӕн гъӕуй?

² Статьяй сӕйраг стихи куд финст ӕй, уомӕ гӕсгӕ нӕ бон нӕй Йегови лӕггадгӕнгутӕй ескӕмӕн уотӕ дзорун, «нецӕмӕн мӕ гъӕуис», зӕгъгӕ (1 Кор. 12:21). Кӕд нӕ фӕндуй, цӕмӕй ӕмбурди фарнӕ уа, уӕд нӕ гъӕуй хуӕртӕ ӕма ӕнсувӕртӕй алкӕмӕндӕр аргъ кӕнун ӕма сӕ хӕццӕ ӕмгуст кӕнун. (Бакӕсӕ Ефесӕгтӕмӕ 4:16.) Уотӕ ку архайӕн, уӕд ӕй алкедӕр лӕдӕрдзӕй, ке ӕй уарзунцӕ, ӕма ӕмбурд уодзӕй федар.

3. Аци статьяй цӕбӕл дзордзиан?

³ Нӕ бон куд ӕй ӕвдесун, хуӕртӕ ӕма ӕнсувӕртӕн ке аргъ кӕнӕн? Аци статьяй ӕркӕсдзиан, хестӕр нӕлгоймӕгти бон куд ӕй ӕвдесун, кӕрӕдзей ке нимайунцӕ, уой. Удта ӕркӕсдзиан, алке бон дӕр ни куд ӕй ӕвдесун, цардӕмбал кӕмӕн нӕййес, еци хуӕртӕ ӕма ӕнсувӕртӕн ке аргъ кӕнӕн. Уой фӕсте ба радзубанди кӕндзиан, мах ӕвзагбӕл дзӕбӕх ка нӕ дзоруй, уони ке уарзӕн, е цӕмӕй бӕрӕг уодзӕй, уобӕл.

4. Ромӕгтӕмӕ 12:10 Павел хестӕр нӕлгоймӕгтӕн цӕхуӕн унаффӕ равардта?

⁴ Ӕгас хестӕр нӕлгоймӕгтӕ дӕр ӕмбурди нисангонд ӕрцӕунцӕ Хуцауи сугъдӕг хъаурӕй. Фал сӕ уавӕртӕ ӕма искурдиӕдтӕ алкӕмӕн ӕмхузӕн нӕ ’нцӕ (1 Кор. 12:17, 18). Еуетӕ си хестӕр нӕлгоймӕгтӕ ӕрӕги иссӕнцӕ ӕма уӕхӕн фӕлтӕрдгун нӕма ’нцӕ. Иннетӕн ба сӕ карӕмӕ гӕсгӕ кенӕ се ’нӕнездзийнадӕмӕ гӕсгӕ сӕ бон берӕ нӕй. Фал сӕ еу дӕр инней туххӕй уотӕ гъӕуама ма гъуди кӕна, «нецӕмӕн мӕ гъӕуис», зӕгъгӕ. Алкедӕр си гъӕуама архайа, Павел Ромӕгтӕмӕ 12:10 ке ниффинста, еци унаффӕмӕ гӕсгӕ. (Ба ’й кӕсӕ.)

5. Хестӕр нӕлгоймӕгтӕ кӕрӕдзей цӕмӕн гъӕуама нимайонцӕ ӕма е цӕмӕй бӕрӕг уодзӕй?

⁵ Хестӕр нӕлгоймӕгтӕ кӕрӕдзей ке нимайунцӕ, е бӕрӕг уодзӕй, кӕрӕдземӕ лӕмбунӕг ку игъосонцӕ, уӕд. Ӕма е уӕлдай ӕхсидзгӕ фӕууй, хестӕр нӕлгоймӕгти совет цӕхуӕндӕр гъуддаг ку февзаруй, уӕд. Цӕмӕн? 1988 анзи 1 октябри уагъд англисаг ӕвзагбӕл «Гъӕуайгӕнӕн мӕсуги» уӕхӕн гъуди адтӕй: «Хестӕр нӕлгоймӕгтӕ ’й гъӕуама лӕдӕронцӕ, сугъдӕг хъаури фӕрци Киристей бон ке ӕй, хестӕр нӕлгоймӕгти советӕй кӕмӕнфӕндидӕр ӕ гъудитӕ Библий уагӕвӕрдтӕмӕ исаразун, цӕмӕй сӕ бон уа цӕхуӕндӕр зин гъуддаг ниллух кӕнун кенӕ ӕхсидзгӕ унаффӕ рахӕссун (Гъуд. 15:6–15). Сугъдӕг хъаурӕ ӕнхус кӕнуй ӕгас хестӕр нӕлгоймгтӕн дӕр, еу кӕмӕндӕр нӕ, фал».

6. Хестӕр нӕлгоймӕгтӕ кӕрӕдзей хӕццӕ ӕмгуст цӕй фӕрци кӕндзӕнцӕ ӕма е ӕмбурдӕн ци пайда ӕрхӕсдзӕй?

⁶ Хестӕр нӕлгоймӕгти совети ка лӕггадӕ кӕнуй, уӕхӕн ӕнсувӕр иннӕ хестӕр нӕлгоймӕгти ку нимайа, уӕд алли хатт дӕр ӕ гъуди фиццаг зӕгъунмӕ нӕ тагъд кӕндзӕй. Удта уотӕ дӕр нӕ дзордзӕй, цума, ӕрмӕстдӕр е ци зӕгъуй, е ӕй раст. Е ӕ гъуди уӕзданӕй зӕгъдзӕй ӕма иннӕ хестӕр нӕлгоймӕгтӕ ци зӕгъунцӕ, уомӕ дӕр байгъосдзӕй. Тӕккӕ сӕйрагдӕр ба е ӕй, ӕма цӕттӕ уодзӕй Библий уагӕвӕрдтӕбӕл ӕма «зундгин ӕма ӕууӕнкгун цагъари» амундтӕбӕл радзорунмӕ (Матф. 24:45–47). Хестӕр  нӕлгоймӕгтӕ цӕхуӕндӕр фарстабӕл дзоргӕй кӕрӕдзей ку нимайонцӕ, уӕд син сугъдӕг хъаурӕ ӕнхус кӕндзӕй, ӕмбурд ке фӕрци бафедар уодзӕй, уӕхӕн унаффитӕ хӕссун (Иак. 3:17, 18).

7. Йесо, цардӕмбал кӕмӕн нӕййес, уонӕмӕ цӕхуӕн цӕстӕй кастӕй?

⁷ Не ’мбурдти ес, бийнонтӕ кӕмӕн ес, уӕхӕнттӕ, удта кӕмӕн нӕййес, уӕхӕнттӕ дӕр. Цума цардӕмбал кӕмӕн нӕййес, уонӕмӕ ци цӕстӕй гъӕуама кӕсӕн? Киристе ба сӕмӕ цӕхуӕн цӕстӕй кастӕй? Зӕнхӕбӕл ку лӕггадӕ кодта, уӕд ӕхуӕдӕг дӕр бийнонтӕ не ’скодта. Е ’гас рӕстӕг ӕма хъауритӕ равардта, Хуцау ин ке баихӕс кодта, еци гъуддагӕн. Ӕ фӕдбӕлдзӕугутӕн уотӕ некӕд дзурдта, бийнонтӕ искӕнтӕ кенӕ ма искӕнтӕ, зӕгъгӕ. Йесо ӕрмӕстдӕр загъта, кадӕртӕ бийнонтӕ барӕй ке не ’скӕнунцӕ (Матф. 19:11, 12). Киристе, цардӕмбал кӕмӕн н’ адтӕй, уони иннетӕй дӕлдӕр нӕ нимадта. Уотӕ имӕ нӕ кастӕй, ӕма сӕхе цӕмӕйдӕр цох кӕнунцӕ.

8. 1 Коринфӕгтӕмӕ 7:7–9 куд финст ӕй, уомӕ гӕсгӕ Павел цӕмӕ разӕнгард кодта?

⁸ Йесой хузӕн апостол Павел дӕр ӕ лӕггади рӕстӕг бийнонтӕ не ’скодта. Павел уотӕ некӕд дзурдта, ӕма киристон ӕнӕмӕнгӕй дӕр гъӕуама бийнонтӕ искӕна. Лӕдӕрдтӕй ӕй, е алкӕмӕндӕр ӕхе гъуддаг ке ӕй. Фал уӕддӕр киристӕнтти разӕнгард кодта, цӕмӕй расагъӕс кодтайуонцӕ, сӕ бон ӕй Йеговӕн лӕггадӕ кӕнгӕй бийнонтӕ ма искӕнун ӕви нӕ, уобӕл. (Бакӕсӕ 1 Коринфӕгтӕмӕ 7:7–9.) Бӕрӕг ӕй, бийнонтӕ кӕмӕн н’ адтӕй, уонӕмӕ сӕрӕй бунмӕ ке нӕ кастӕй. Зӕгъӕн, ӕригон Тимофеййӕн дӕр цардӕмбал н’ адтӕй, фал ин цӕхуӕндӕр ӕхсидзгӕ гъуддӕгтӕ ба уӕддӕр баихӕс кодта (Фил. 2:19–22) *. Уомӕ гӕсгӕ раст нӕ уайдӕ уотӕ гъуди кӕнун, ӕма ӕнсувӕрӕн фулдӕр ихӕстӕ бабарӕ кӕнӕн ес, ӕрмӕстдӕр ин бийнонтӕ ку уа кенӕ ку нӕ уа, уӕд (1 Кор. 7:32–35, 38).

9. Цардӕмбал кӕмӕн ес, уони туххӕй ӕма кӕмӕн нӕййес, уони туххӕй дӕр ци ес зӕгъӕн?

⁹ Мадта нӕдӕр Йесо, нӕдӕр Павел, бийнонтӕ кӕнун гъӕуй ӕви нӕ, уой туххӕй бӕлвурдӕй неци загътонцӕ. 2012 анзи 1 октябри «Гъӕуайгӕнӕн мӕсуги» финст адтӕй: «Адӕймагӕн бийнонтӕ ку уа, е дӕр ӕй Йегови лӕвар, ӕма ин ку нӕ уа – е дӕр. Йеговӕ  уотӕ нӕ гъуди кӕнуй, ӕма цардӕмбал кӕмӕн нӕййес, е гъӕуама ӕфсӕрми кенӕ ӕнкъард кӕна». Ӕма кӕд уотӕ ’й, уӕд мах дӕр гъӕуама нимайӕн, цардӕмбал кӕмӕн нӕййес, уӕхӕн хуӕртӕ ӕма ӕнсувӕрти.

10. Цардӕмбал кӕмӕн нӕййес, уони ке нимайӕн, е цӕмӕй бӕрӕг уодзӕй?

¹⁰ Цардӕмбал кӕмӕн нӕййес, уони ке нимайӕн, е цӕмӕй бӕрӕг уодзӕй? Гъӕуама нӕ зӕрдӕбӕл дарӕн, кадӕртӕ бийнонтӕ барӕй ке не ’скӕнунцӕ. Иннети ба фӕндадтайдӕ бийнонтӕ искӕнун, фал сӕ амонд нӕма иссирдтонцӕ. Ес ма ӕ цардӕмбал кӕмӕн рамардӕй, уӕхӕнттӕ дӕр. Цума раст адтайдӕ уӕхӕн хуӕртӕ ӕма ӕнсувӕрти, бийнонтӕ син цӕмӕннӕ ес, уобӕл фӕрсун кенӕ син цардӕмбал агорун? Фӕууй уотӕ, ӕма нин еуӕй-еуетӕ сӕхуӕдтӕ фӕззӕгъунцӕ, цӕмӕй сӕмӕ еци гъуддаги фӕккӕсӕн. Фал дин адӕймаг ку неци зӕгъа, ӕма ин дӕхе зӕрдтӕй цардӕмбал агорун ку райдайай, уӕд ин цума куд уодзӕй? (1 Фес. 4:11; 1 Тим. 5:13). Ӕркӕсӕн, уӕхӕн уавӕри ка бахаудтӕй, еци еузӕрдон хуӕртӕ ӕма ӕнсувӕртӕ ци зӕгъунцӕ, уомӕ.

11, 12. Нӕ бон куд ӕй, цардӕмбал кӕмӕн нӕййес, уони нифс ӕнӕбари расӕттун?

¹¹ Еу районон цӕстӕдарӕг зӕгъуй, бийнойнаг ин ке нӕййес, е берӕ цӕмӕйдӕрти хуарз ке ӕй. Фал ӕй уотӕ ку бафӕрсунцӕ, уосӕ цӕмӕннӕ корис, зӕгъгӕ, уӕд ин е ба зин фӕууй. Вефили ка лӕггадӕ кӕнуй, уӕхӕн ӕнсувӕр ба зӕгъуй: «Хатгай мӕмӕ уотӕ фӕккӕсуй, ӕма еуӕй-еу хуӕртӕ ӕма ӕнсувӕртӕ сӕ ихӕсбӕл нимайунцӕ, цардӕмбал кӕмӕн нӕййес, уонӕн батӕрегъӕд кӕнун. Уотемӕй, гӕнӕн ес, ӕма адӕймаг ӕхемӕ хъӕбӕр ӕнамонд ӕркӕса».

¹² Вефили ка лӕггадӕ кӕнуй, еу уӕхӕн ӕнӕцуд хуӕрӕ ба радзурдта: «Кӕмӕдӕрти уотӕ кӕсуй, ӕма цардӕмбал кӕмӕн нӕййес, етӕ, сӕ амонд куд иссеронцӕ, ӕрмӕстдӕр уобӕл фӕссагъӕс кӕнунцӕ, ӕма кӕмифӕнди ма уонцӕ, уӕддӕр фӕййагорунцӕ, ке хӕццӕ базонгӕ уонцӕ, уой. Еухатт мӕ Вефили гъуддӕгти фӕдбӕл гъудӕй нӕ бӕсти иннӕ хаймӕ рандӕ ун. Ци бон исхъӕрдтӕн, еци бон си ӕмбурд адтӕй. Кӕмӕ ӕрлӕудтӕн, еци хуӕрӕ ба мин загъта, не ’мбурди, дан, дууӕ ӕнсувӕри ес еу дӕу карӕн. Амонгӕ, дан, дин сӕ нӕ кӕнун, фал залмӕ куддӕр бахизтан, уотӕ ба мӕ еци ӕнсувӕрти рази ӕрбалӕуун кодта. Ӕз дӕр ӕма еци дууӕ ӕнсувӕри дӕр куд фефсӕрми ан, уой ма дзорун гъӕуй?»

13. Еу ӕнӕцуд хуӕри ци федар кӕнуй?

¹³ Вефили ка лӕггадӕ кӕнуй, ӕндӕр уӕхӕн хуӕрӕ ба зӕгъуй: «Цардӕмбал кӕмӕн нӕййес ӕма берӕ рӕстӕг пионерӕй ка лӕггадӕ кӕнуй, уӕхӕн хуӕртӕ ӕма ӕнсувӕртӕй берети зонун. Етӕ ӕнцӕ лӕдӕргӕ, зингзӕрдӕ ӕма уодуӕлдай лӕггадгӕнгутӕ, ӕма ӕмбурдӕн дӕр устур ӕнхус ӕнцӕ. Етӕ сӕхемӕ раст цӕстӕй кӕсунцӕ. Еуӕрдиги, бийнонтӕ кӕмӕн ес, еци хуӕртӕ ӕма ӕнсувӕртӕмӕ сӕрӕй бунмӕ нӕ кӕсунцӕ, иннердиги ба сӕмӕ уотӕ нӕ кӕсуй ӕма сӕхуӕдтӕ цӕмӕй дӕр цох ӕнцӕ». Алкӕмӕндӕр ӕхцӕуӕн фӕууй, ке ӕй нимайунцӕ ӕма ин аргъ ке кӕнунцӕ, уой лӕдӕрун. Ӕмбурди ӕхемӕ нецӕййаг гъӕуама маке кӕса, еуети иннетӕй уӕлдӕр маке ӕвӕра, удта макӕмӕ соцъа кӕна. Гъӕуама ’й алкедӕр лӕдӕра, уарзгӕ ’й ке кӕнунцӕ.

14. Цардӕмбал кӕмӕн нӕййес, уони ке нимайӕн, уой нӕ бон куд ӕй ӕвдесун?

¹⁴ Бийнонтӕ кӕмӕн нӕййес, еци киристӕнттӕн ӕхцӕуӕн уодзӕй, фиццагидӕр син сӕ хуарз менеугутӕмӕ ку кӕсӕн, уӕд, цардӕмбал син ес ӕви нӕ, уомӕ нӕ, фал. Уӕд сӕмӕ уотӕ нӕ фӕккӕсдзӕй, ӕма син ӕмбурди кадӕр уотӕ зӕгъуй, «нецӕмӕн мӕ гъӕуис», зӕгъгӕ (1 Кор. 12:21). Етӕ ’й лӕдӕрдзӕнцӕ, ӕмбурди сӕ ке нимайунцӕ ӕма син устур аргъ ке кӕнунцӕ.

15. Еуӕй-еу хуӕртӕ ӕма ӕнсувӕртӕ цӕмӕй фулдӕр лӕггадӕ кӕнонцӕ, уой туххӕй сӕ царди ци раййивтонцӕ?

¹⁵ Фӕстаг ӕнзти игъосунгӕнгутӕй беретӕ сӕхецӕн нисан исӕвардтонцӕ ӕндӕр ӕвзаг исахур кӕнун, цӕмӕй фулдӕр игъосун кӕнонцӕ. Уой туххӕй сӕ багъудӕй сӕ царди берӕ цидӕртӕ раййевун. Еци хуӕртӕ ӕма ӕнсувӕртӕ, ӕндӕр ӕвзагбӕл кӕми дзорунцӕ ӕма ӕнхус кӕми гъӕуй, уӕхӕн ӕмбурдтӕмӕ рахизтӕнцӕ (Гъуд. 16:9). Уӕхӕн унаффӕ сӕхуӕдтӕ рахастонцӕ, ӕма уомӕй бӕрӕг ӕй, Йегови гъуддаги сӕ фулдӕр архайун ке фӕндуй. Цалинмӕ нӕуӕг ӕвзагбӕл дзӕбӕх дзорун райдайонцӕ, уӕдмӕ цалдӕр анзи дӕр рацӕудзӕй, фал уӕддӕр ӕмбурдӕн устур ӕнхус ӕнцӕ. Сӕ хуарз менеугутӕй ӕма сӕ фӕлтӕрддзийнадӕй ӕмбурд федар кӕнунцӕ. Уӕхӕн уодуӕлдай хуӕртӕ ӕма ӕнсувӕртӕн мах хъӕбӕр аргъ кӕнӕн!

16. Ӕнсувӕри хестӕр нӕлгоймагӕй кенӕ кӕстӕреуӕггӕнӕг ӕнсувӕрӕй иснисан кӕндзӕнцӕ ӕви нӕ, е цӕмӕй кӕнгӕ ’й?

¹⁶ Хестӕр нӕлгоймӕгти советмӕ уотӕ гъӕуама ма кӕса, ӕма ӕнсувӕри нӕййес хестӕр нӕлгоймагӕй кенӕ кӕстӕреуӕггӕнӕг ӕнсувӕрӕй иснисан кӕнӕн, цалинмӕ ӕмбурди ӕвзагбӕл дзӕбӕх дзорун нӕ райдайа, уӕдмӕ. Ӕнсувӕр нӕуӕг ихӕстӕ райсунмӕ цӕттӕ ӕй ӕви нӕ, уой лух кӕнгӕй хестӕр нӕлгоймӕгтӕ гъӕуама кӕсонцӕ, Библи ци зӕгъуй, уомӕ, ӕнсувӕр ӕмбурди ӕвзаг куд хуарз зонуй, уомӕ нӕ фал (1 Тим. 3:1–10, 12, 13; Тит. 1:5–9).

17. Ӕндӕр бӕстӕмӕ ка ралигъдӕй, уони цӕхуӕн унаффӕ фӕгъгъӕуй рахӕссун?

¹⁷ Еуей-еу киристон бийнонтӕ ӕндӕр бӕстӕмӕ ралигъдӕнцӕ, кенӕ куст агорӕг кенӕ сӕ сӕхе бӕстӕй ледзун ке багъудӕй, уой туххӕй. Кӕд сӕ сувӕллӕнттӕ скъоламӕ цӕунцӕ, уӕд си, ӕвӕдзи, ахур бунӕттон ӕвзагбӕл цӕуй. Удта ниййергути сӕхе дӕр ӕвзаг ахур кӕнун багъӕуй, цӕмӕй сӕ бон уа куст иссерун. Фал кӕми цӕрунцӕ, уордӕмӕ хӕстӕг сӕхе ӕвзагбӕл ӕмбурд кенӕ къуар ку уа, уӕдта? Цӕхуӕн ӕмбурд гъӕуама равзаронцӕ, сӕхе ӕвзагбӕл кӕми дзорунцӕ, уӕхӕн ӕви – бунӕттон?

18. Галатӕгтӕмӕ 6:5 ци финст ес, уомӕ гӕсгӕ бийнонти хестӕри унаффӕ ке нимайӕн, е цӕмӕй бӕрӕг уодзӕй?

¹⁸ Бийнонти хестӕр ӕй гъӕуама ниллух кӕна, цӕхуӕн ӕмбурдмӕ цӕудзӕнцӕ, уой. Ӕма ’й гъӕуй дзӕбӕх расагъӕс кӕнун, ӕ бийнонтӕн хуӕздӕр ци уодзӕй, уобӕл. (Бакӕсӕ Галатӕгтӕмӕ 6:5.) Бийнонти хестӕр цийфӕнди унаффӕ ма рахӕсса, уӕддӕр ӕй гъӕуама нимайӕн, ӕма уӕхӕн бийнонтӕ мах ӕмбурдмӕ ку рахезонцӕ, уӕд сӕбӕл гъӕуама зӕрдиагӕй бацийнӕ кӕнӕн (Ром. 15:7).

19. Бийнонти хестӕр Йеговӕмӕ цӕй туххӕй гъӕуама искова ӕма лӕмбунӕг цӕбӕл гъӕуама расагъӕс кӕна?

¹⁹ Еуӕй-еу бийнонтӕ лӕггадӕ кӕнунцӕ, ниййергути ӕвзагбӕл кӕми дзорунцӕ, уӕхӕн  ӕмбурдти. Фал сӕ сувӕллӕнттӕ еци ӕвзаг дзӕбӕх нӕбал фӕллӕдӕрунцӕ. Кӕд уӕхӕн бийнонтӕ, бунӕттон ӕвзагбӕл кӕми дзорунцӕ, уӕхӕн адӕни астӕу цӕрунцӕ, уӕд, ӕвӕдзи, сувӕллӕнттӕн зин уодзӕй, се ’мбурди цӕбӕл дзордзӕнцӕ, уой лӕдӕрун ӕма Хуцаумӕ хӕстӕг кӕнун. Цӕмӕн? Уомӕн ӕма скъолай сӕ ахур бунӕттон ӕвзагбӕл фӕццӕуй, сӕ ниййергути ӕвзагбӕл нӕ, фал. Уӕхӕн уавӕри бийнонти хестӕр гъӕуама алцӕбӕлдӕр дзӕбӕх расагъӕс кӕна ӕма кова, цӕмӕй, ӕ сувӕллӕнттӕ Йеговӕмӕ дӕр ӕма ӕ адӕнмӕ дӕр ке фӕрци бахӕстӕг уодзӕнцӕ, уӕхӕн унаффӕ рахӕсса. Ниййергути гъӕудзӕй кенӕ сӕ сувӕллӕнттӕн сӕ мадӕлон ӕвзаг хуӕздӕр лӕдӕрунмӕ банхус кӕнун, кенӕ ба, сувӕллӕнттӕ хуӕздӕр ке лӕдӕрунцӕ, еци ӕвзагбӕл ӕмбурдмӕ рахезун. Бийнонти хестӕр цийфӕнди унаффӕ ма рахӕсса, уӕддӕр ци ӕмбурдмӕ рахезонцӕ, еци ӕмбурди хуӕртӕ ӕма ӕнсувӕртӕ гъӕуама еци унаффӕ нимайонцӕ.

20. Не ’взаг нин ка ахур кӕнуй, еци хуӕртӕ ӕма ӕнсувӕрти ке нимайӕн, е цӕмӕй бӕрӕг уодзӕй?

²⁰ Уӕлдӕр ке ранимадтан, еци гъуддӕгтӕмӕ гӕсгӕ еуӕй-еу хуӕртӕ ӕма ӕнсувӕртӕн зин фӕууй нӕуӕг ӕвзаг исахур кӕнун. Сӕ гъуди балӕдӕрун кӕнун дӕр син ӕнцон нӕ фӕууй. Фал нин не ’взагбӕл куд дзорунцӕ, уобӕл ӕгӕр ку нӕ сагъӕс кӕнӕн, уӕд ӕй фӕууиндзиан, Йегови ӕцӕгӕйдӕр ке уарзунцӕ ӕма сӕ зӕрдиагӕй лӕггадӕ кӕнун ке фӕндуй. Ӕма сӕмӕ еци хуарз менеугутӕ ку уинӕн, уӕд сӕ нимайдзиан ӕма син аргъ кӕндзиан. Не ’взагбӕл нин хуарз ке нӕ дзорунцӕ, уой туххӕй син уотӕ нӕ зӕгъдзиан, «нецӕмӕн нӕ гъӕуетӕ», зӕгъгӕ.

21, 22. Йеговӕй боз цӕй туххӕй ан?

²¹ Мах Йеговӕй хъӕбӕр боз ан, алкӕмӕндӕр ни е ’мбурди бунат ке искодта, уой туххӕй. Ӕма уӕлдай нӕй, нӕлгоймаг дӕ ӕви силгоймаг, бийнонтӕ дин ес ӕви нӕ, ци кари дӕ ӕма цӕхуӕн ӕвзагбӕл дзорис, е. Йеговӕ нин алкӕмӕндӕр устур аргъ кӕнуй, ӕма кӕрӕдземӕн дӕр гъе уотӕ аргъ кӕнӕн (Ром. 12:4, 5; Кол. 3:10, 11).

²² Гъӕйдӕ мадта, апостол Павел адӕймаги бауӕри туххӕй ци цӕветтон ӕрхаста, уой ма иронх кӕнӕн ӕма аци статьяй цӕбӕл радзурдтан, уомӕ гӕсгӕ архайӕн. Уой фӕрци нин никки фулдӕр фадуӕттӕ фӕззиндзӕй, цӕмӕй хуӕртӕ ӕма ӕнсувӕрти нифс федар кӕнӕн, удта сӕ ке уарзӕн ӕма син ке аргъ кӕнӕн, уой ӕвдесӕн.