1. Давид Йегови сӕрниллӕг цӕмӕн исхудта?

ЦУМА Йегови сӕрниллӕг исхонӕн ес? Гъо. Давид еухатт загъта: «Ду мин ратдзӕнӕ дӕ ервӕзундзийнади уарт, дӕ сӕрниллӕгдзийнадӕ мӕ бӕрзонд кӕнуй» (2 Сам. 22:36; Пс. 18:35). Ӕвӕдзи, Давидӕн ӕ зӕрдӕбӕл ӕрлӕудтӕй, пахампар Самуил ин ӕ фиди хӕдзарӕмӕ куд ӕрбацудӕй ӕма ’й Израили паддзахӕй куд байсарста, е. Давид аст ӕнсувӕрей кӕстӕр адтӕй, фал Йеговӕ Саули бӕсти паддзахӕн уой равзурста (1 Сам. 16:1, 10–13).

2. Аци статьяй цӕбӕл радзубанди кӕндзиан?

² Давид, ӕвӕдзи, исарази адтайдӕ псаломзаргӕнӕг Йегови туххӕй ци загъта, уой хӕццӕ: «Е ӕргубур кӕнуй, цӕмӕй ӕркӕса арв ӕма зӕнхӕмӕ. Ӕма... мӕгури исесуй фунукӕй, цӕмӕй ӕй ӕрбадун кӕна кадгинти хӕццӕ» (Пс. 113:6–8). Аци статьяй радзубанди кӕндзиан, Йеговӕ сӕрниллӕгдзийнадӕ куд ӕвдиста ӕма си цӕбӕл ахур кӕнӕн, уобӕл. Уомӕй уӕлдай ма ӕркӕсдзиан, паддзах Саул, пахампар Данел ӕма Йесо Киристей хабӕрттӕй бонзонгӕдзийнади туххӕй ци ес базонӕн, уомӕ.

3. Йеговӕ ӕ лӕггадгӕнгутӕмӕ цӕхуӕн цӕстӕй кӕсуй ӕма е цӕбӕл дзорӕг ӕй?

³ Йеговӕ сӕрниллӕг ке ӕй, е бӕрӕг ӕй, е ’нӕнхӕст лӕггадгӕнгутӕмӕ цӕхуӕн зӕрдӕ даруй, уомӕй. Нӕ лӕггадӕй нин арази ке ӕй, уомӕй уӕлдай ма ’й уотӕ дӕр фӕндуй, цӕмӕй  е ’мбӕлттӕ уӕн (Пс. 25:14). Ӕма нӕмӕ фиццаг къахдзӕф дӕр ӕхуӕдӕг искодта, нӕ тӕрегъӕдтӕбӕл бафедуни туххӕй ӕ Фурти ку равардта, уӕд. Расагъӕс кӕнӕ, цӕхуӕн фӕлмӕнзӕрдӕ ӕма тӕрегъӕдгӕнагӕ Хуцау ӕй!

4. Йеговӕ нин ци равардта ӕма цӕмӕн?

⁴ Еу гъуддагмӕ дӕр ма ӕркӕсӕн. Йеговӕ адӕймаги ку сфӕлдиста, уӕд ӕ бон адтӕй уотӕ бакӕнун, цӕмӕй ӕ цард ӕхе бӕрагӕ ма уа. Фал уотӕ нӕ бакодта. Е нӕ ӕхемӕ гӕсгӕ сфӕлдиста ӕма нин равардта сӕребарӕдзийнадӕ. Кӕд Йеговӕ махӕй берӕ уӕлдӕр ӕй, уӕддӕр царди ци унаффитӕ фӕххӕссӕн, уонӕмӕ цийфӕнди цӕстӕй нӕ кӕсуй. Уотӕ ’й фӕндуй, цӕмӕй ин лӕггадӕ кӕнӕн, уарзгӕ ’й ке кӕнӕн, уой туххӕй, удта ин цӕмӕй коммӕгӕс уӕн, е нин пайда ке хӕссуй, уой ке лӕдӕрӕн, уой туххӕй (Дук. з. 10:12; Ис. 48:17, 18). Мах Йеговӕй ӕ сӕрниллӕгдзийнади туххӕй хъӕбӕр боз ан!

5. Йеговӕ нӕ сӕрниллӕгдзийнадӕбӕл куд ахур кӕнуй? (Кӕсӕ хузӕмӕ ӕндаг цъарӕбӕл.)

⁵ Йеговӕ нин ӕхуӕдӕг дӕр фӕнзуйнаг ӕй ӕ сӕрниллӕгдзийнадӕй. Дун-дуйней уомӕй зундгиндӕр ӕма курухондӕр неке ӕй, фал уӕддӕр иннети гъудимӕ байгъосунмӕ ӕма сӕ хӕццӕ ӕмгуст кӕнунмӕ алкӕддӕр цӕттӕ ӕй. Зӕгъӕн, алцидӕр ку кодта, уӕд ин ӕ Фурт ӕнхус кодта (Ӕмб. 8:27–30; Кол. 1:15, 16). Ӕма кӕд Йегови бон алцидӕр ӕй, уӕддӕр цӕхуӕндӕр гъуддӕгтӕ иннетӕн дӕр баихӕс кӕнуй. Зӕгъӕн, Йесой ӕ Паддзахади Паддзахӕй исӕвардта, 144 000 адӕймаги ба ин ӕмпаддзӕхтӕй равзурста (Лук. 12:32). Йеговӕ Йесой, ӕвӕдзи, рагацау бацӕттӕ кодта Паддзахи ӕма Хестӕр саугини ихӕстӕ ӕнхӕст кӕнунмӕ (Дзиуит. 5:8, 9). Удта ӕ хӕццӕ паддзӕхтӕ ка уодзӕй, уони дӕр ахур кӕнуй. Фал син сӕ алли къахдзӕфмӕ дӕр ӕ цӕстӕ нӕ даруй. Йеговӕ ’й зонуй, алцидӕр куд ӕмбӕлуй, уотӕ ке искӕндзӕнцӕ (Рарг. 5:10).

6, 7. Йеговӕ цӕхуӕндӕр гъуддӕгтӕ иннетӕн дӕр ке баихӕс кӕнуй, уомӕй цӕбӕл ахур кӕнӕн?

 ⁶ Нӕ уӕларвон Фидӕ дӕр ма цӕхуӕндӕр гъуддӕгтӕ ескӕмӕн кӕми баихӕс кӕнуй, уоми ба махӕн цӕйбӕрцӕбӕл ӕхсидзгӕдӕр ӕй, уотӕ архайун. Зӕгъӕн, бийнонти хестӕрти ӕма хестӕр нӕлгоймӕгти бон куд ӕй Йегови фӕнзун? Сӕ бон ӕй цӕхуӕндӕр гъуддӕгтӕ иннетӕн дӕр баихӕс кӕнун, ӕма сӕ куд ӕнхӕст кӕндзӕнцӕ, уобӕл ӕгӕр ма тухсун. Уой фӕрци гъуддӕгтӕ дӕр конд ӕрцӕудзӕнцӕ, удта иннетӕ дӕр естӕбӕлти исахур уодзӕнцӕ ӕма фӕннифсгундӕр уодзӕнцӕ (Ис. 41:10). Цӕхуӕндӕр бартӕ кӕмӕ ес, етӕ ма Йеговӕй цӕбӕл ахур кӕнунцӕ?

⁷ Библийӕй бӕрӕг ӕй, Йеговӕ изӕдти дӕр сӕ гъудибӕл ке бафӕрсуй (1 Пад. 22:19–22). Ниййергутӕ, сумах бон дӕр ӕй уотӕ архайун. Зӕгъӕн, кӕцидӕр гъуддӕгтбӕл уӕ бон ӕй уӕ сувӕллони дӕр бафӕрсун ӕма гӕнӕн ку уа, уӕдта куд загъта, уотӕ бакӕнун.

8. Йеговӕ Авраам ӕма Саррӕмӕ фӕразондзийнадӕ куд бавдиста?

⁸ Йегови сӕрниллӕгдзийнадӕ ма бӕрӕг ӕй ӕ фӕразондзийнадӕй. Йеговӕ ӕ лӕггадгӕнгутӕмӕ фӕразонӕй байгъосуй, сауӕнгӕ ма ин ӕ унаффитӕбӕл гурусхӕ ку фӕккӕнунцӕ, уӕддӕр. Зӕгъӕн, Йеговӕ Содом ӕма Гоморри туххӕй ци унаффӕ рахаста, уобӕл Авраам ку истухстӕй, уӕд имӕ лӕмбунӕг байгъуста (Райд. 18:22–33). Кенӕ ба ӕргъуди кӕнӕн, Йеговӕ Авраами бийнойнаг Саррӕн зӕрдӕ ку байвардта, еци кари ма ин сувӕллон ке райгурдзӕй. Саррӕ еци зӕрдӕвӕрдбӕл бахудтӕй, фал имӕ Йеговӕ не ’смӕстгун ӕй (Райд. 18:10–14). Йегови цӕсти ин уӕддӕр устур кадӕ адтӕй.

9. Ниййергутӕ ӕма хестӕр нӕлгоймӕгтӕ Йеговӕй цӕбӕл ахур кӕнунцӕ?

⁹ Ниййергутӕ ӕма хестӕр нӕлгоймӕгтӕ, сумах бон ба куд ӕй Йегови хузӕн архайун? Зӕгъӕн, уӕ сувӕллӕнттӕй кенӕ ӕмбурди хуӕртӕ ӕма ӕнсувӕртӕй еске уӕ унаффӕбӕл ку нӕ фӕййарази кӕнуй, уӕд уӕхе куд фӕддаретӕ? Раст ке нӕ ’нцӕ, уой дзорунбӕл фӕууотӕ ӕви син сӕ гъуди балӕдӕрунбӕл байархайетӕ? Бартӕ ке къохти ’нцӕ, етӕ Йегови ку фӕнзонцӕ, уӕд е бийнонтӕн дӕр ӕма ӕмбурдӕн дӕр пайда хӕсдзӕй. Мах ӕркастан, Йеговӕ нӕ сӕрниллӕгдзийнадӕбӕл куд ахур кӕнуй, уомӕ. Нур ба ӕркӕсӕн, Библий ма ци хабӕрттӕ финст ес, уонӕй бонзонгӕдзийнадӕбӕл куд ахур кӕнӕн, уомӕ.

10. Йеговӕ ма нӕ куд ахур кӕнуй?

¹⁰ Нӕ «Кадгин Зундамонӕг» Хуцау ма нӕ Библий ӕндӕр хабӕрттӕй дӕр ахур кӕнуй (Ис. 30:20, 21). Библий ес, бонзонгӕ ка адтӕй ӕма ма ӕндӕр хуарз менеугутӕ кӕмӕ адтӕй, уӕхӕн адӕни хабӕрттӕ. Удта ма си ес, еци менеугутӕ кӕмӕн нӕ хъӕрдтӕй, уони хабӕрттӕ дӕр (Пс. 37:37; 1 Кор. 10:11).

11. Саули хабарӕй цӕбӕл ахур кӕнӕн?

¹¹ Расагъӕс кӕнӕн паддзах Саули хабарбӕл. Ӕригонӕй бонзонгӕ адӕймаг адтӕй. Ӕ бон цӕйбӕрцӕ ӕй, уой лӕдӕрдтӕй ӕма фулдӕр ихӕстӕ райсунмӕ ӕ нифс дӕр нӕ хаста (1 Сам. 9:21; 10:20–22). Фал паддзах ку иссӕй, уӕд берӕ рӕстӕг нӕ рацудӕй ӕма ӕ зӕрдӕ ӕхебӕл дарун райдӕдта. Еухатт пахампар Самуилмӕ нӕ бангъӕлмӕ кастӕй. Гъудӕй ӕй бонзонгӕ ун ӕма, Йеговӕ ӕ адӕни ке фӕййервӕзун кӕндзӕй, уобӕл ӕууӕндун. Фал Саул ба нивонд ӕхуӕдӕг ӕрхаста, кӕд ин уӕхӕн барӕ н’ адтӕй, уӕддӕр. Гъема Йегови хуарзӕнхӕй фенӕхай ӕй, уой фӕсте ба – ӕ паддзахи бартӕй дӕр (1 Сам. 13:8–14). Аци хабарӕй бӕрӕг ӕй, нӕ зӕрдӕ нӕхебӕл дарун куд тӕссаг ӕй, е.

12. Данел бонзонгӕ ке адтӕй, е цӕмӕй бӕрӕг ӕй?

¹² Пахампар Данел ба Саули хузӕн н’ адтӕй. Е алкӕддӕр сӕрниллӕг ӕма бонзонгӕ  адӕймаг адтӕй, удта алли гъуддаги дӕр Йеговӕй зунд курдта. Еухатт ин Йеговӕ Навуходоносори фун райхалунмӕ ку банхус кодта, уӕд еци кадӕ ӕхе нӕ бакодта, фал Йегови искадгин кодта (Дан. 2:26–28). Данели хабарӕй цӕбӕл ахур кӕнӕн? Кӕд нӕ радзубандитӕ хуӕртӕ ӕма ӕнсувӕрти зӕрдӕмӕ фӕццӕунцӕ кенӕ ба нӕбӕл кӕд игъосун кӕнгӕй берӕ хуарз цаутӕ ӕрцудӕй, уӕд ӕй гъӕуама лӕдӕрӕн, еци гъуддӕгтӕ нин еугурӕйдӕр Йегови фӕрци ке ӕнтӕсунцӕ ӕма ӕнӕ уомӕй нӕ бон ке неци адтайдӕ (Фил. 4:13). Бонзонгӕ ку уӕн, уӕд уомӕй Йесой дӕр фӕнздзиан. Кутемӕй?

13. Иоанни 5:19, 30 Йесо ци дзурдтӕ загъта, уонӕй цӕбӕл ахур кӕнӕн?

¹³ Йесо Йегови ӕнхӕст Фурт адтӕй, фал алкӕддӕр ӕ зӕрдӕ ӕ Фидӕбӕл дардта. (Бакӕсӕ Иоанни 5:19, 30.) Ӕ Фиди бартӕмӕ некӕд рахицӕ кодта. Филиппӕгтӕмӕ 2:6 финст ӕй: «Уӕхӕн гъуди [имӕ] некӕд фӕззиндтӕй, цӕмӕй Хуцаумӕ ци бартӕ ес, уомӕ дӕр уӕхӕн бартӕ уа». Йесо коммӕгӕс Фурт адтӕй. Е ӕй лӕдӕрдтӕй, ӕ бартӕ ӕнӕкӕрон ке нӕ ’нцӕ, ӕма ӕ Фиди бартӕ нимадта.

14. Йесо ци загъта, ӕ барӕ кӕбӕл нӕ цудӕй, уӕхӕн гъуддаг ин ку кӕнун кодтонцӕ, уӕд?

¹⁴ Еухатт Иаков ӕма Иоанни мадӕ Йесомӕ бацудӕй ӕма си курдта, цӕмӕй ин ӕ фуртти ӕ галеу ӕма ӕ рахес фарс исбадун кодтайдӕ. Фал син Йесо еци фӕдбӕл балӕдӕрун кодта, уӕхӕн бартӕ ин ке нӕййес, ӕма еци гъуддаг ӕ уӕларвон Фидӕ ке лух кӕндзӕй (Матф. 20:20–23). Уотемӕй ӕй бавдиста, бонзонгӕ ке адтӕй ӕма ӕ барӕ алцӕбӕл ке нӕ цудӕй, уой. Йесо некӕд бакодтайдӕ, Йеговӕ ин барӕ кӕмӕй нӕ равардта, уӕхӕн гъуддаг (Иоан. 12:49). Нӕ бон куд ӕй Йесой хузӕн архайун?

15, 16. 1 Коринфӕгтӕмӕ 4:6 финст унаффӕмӕ гӕсгӕ нӕ бон куд ӕй архайун?

¹⁵ Мах дӕр Киристей хузӕн бонзонгӕ уодзиан, 1 Коринфӕгтӕмӕ 4:6 финст унаффӕмӕ гӕсгӕ ку архайӕн, уӕд: «Финст ци ӕй, уой сӕрти ма хезетӕ». Мадта ни унаффӕ ку фӕккорунцӕ, уӕд гъӕуама нӕхе дзурдбӕл ма ниллӕууӕн кенӕ ба нӕ сӕри фиццаг ци фӕммедӕг уй, уой ма дзорӕн. Хуӕздӕр уодзӕй адӕймагӕн е ’ргом, Библий ӕма нӕ литератури ци финст ес, уомӕ раздахун. Е, бонзонгӕ ке ан, уобӕл дзорӕг уодзӕй, уомӕн ӕма ’й бавдесдзиан, мах алци ке нӕ зонӕн ӕма Хуцауи унаффитӕ алкӕддӕр хуӕздӕр ке фӕуунцӕ, уой (Рарг. 15:3, 4).

 ¹⁶ Бонзонгӕ ку уӕн, уӕд кадӕ Йеговӕн кӕндзиан. Фал нӕ еци менеуӕг айдагъ уой туххӕй нӕ гъӕуй. Гъӕйдӕ базонӕн, сӕрниллӕг ӕма бонзонгӕ ку уӕн, уӕд нин е цийнӕ куд хӕсдзӕй ӕма нин иннети хӕццӕ федаунмӕ куд банхус кӕндзӕй.

17. Сӕрниллӕг ӕма бонзонгӕ адӕймаг цийнӕ фулдӕр цӕмӕн фӕккӕнуй?

¹⁷ Сӕрниллӕг ӕма бонзонгӕ адӕймаг цийнӕ фулдӕр фӕккӕнуй. Цӕмӕн? Уомӕн ӕма ’й фӕллӕдӕруй, ӕхе бон алци ке нӕй, ӕма ин еске ку банхус кӕнуй, уӕд си хъӕбӕр боз фӕууй. Ӕргъуди кӕнӕн, Киристе дӕс хъотургини ку исдзӕбӕх кодта, еци хабар. Ӕрмӕстдӕр си сӕ еу раздахтӕй Йесойӕн райарфӕ кӕнунмӕ, уомӕн ӕма ’й лӕдӕрдтӕй, еци незӕй ӕхуӕдӕг ке некӕд исдзӕбӕх адтайдӕ, уой. Еци сӕрниллӕг ӕма бонзонгӕ адӕймаг Йесойӕй хъӕбӕр боз адтӕй ӕма Хуцауи искадгин кодта (Лук. 17:11–19).

18. Сӕрниллӕг ӕма бонзонгӕ ку уӕн, уӕд нин е иннети хӕццӕ федаунмӕ куд ӕнхус кӕндзӕй? (Ромӕгтӕмӕ 12:10).

¹⁸ Сӕрниллӕг ӕма бонзонгӕ адӕнӕн ӕнцондӕр фӕууй иннети хӕццӕ федаун ӕма хуарз ӕмбӕлттӕ ерун. Цӕмӕн ес уотӕ зӕгъӕн? Уомӕн ӕма ’й фӕллӕдӕрунцӕ, иннетӕмӕ дӕр берӕ хуарз менеугутӕ ке ес ӕма сӕбӕл сӕ зӕрдӕ фӕддарунцӕ. Етӕ хуӕртӕ ӕма ӕнсувӕрти нимайунцӕ ӕма син сӕ лӕггади ести ку бантӕсуй, уӕд син е ӕхцӕуӕн фӕууй ӕма сӕ зӕрдиагӕй растаунцӕ. (Бакӕсӕ Ромӕгтӕмӕ 12:10.)

19. Сӕрбӕрзонддзийнадӕй нӕхе цӕмӕн гъӕуама гъӕуай кӕнӕн?

¹⁹ Сӕрбӕрзонд адӕнӕн ба зин фӕууй иннети ӕстаун, уомӕн син сӕхе ку фестаунцӕ, уӕд е сӕ зӕрдӕмӕ фулдӕр фӕццӕуй. Етӕ фулдӕр сӕхе иннети хӕццӕ фӕббарунцӕ ӕма сӕ хӕццӕ ерис фӕккӕнунцӕ. Иннетӕн  ести байамонуни ӕма син ести баихӕс кӕнуни бӕсти зӕгъдзӕнцӕ: «Кӕд дӕ фӕндуй, цӕмӕй гъуддаг куд ӕмбӕлуй уотӕ конд ӕрцӕуа, уӕд ӕй дӕхуӕдӕг бакӕнӕ». Сӕрбӕрзонд адӕймаг кадӕуарзагӕ ӕма соцъагӕнагӕ фӕууй (Гал. 5:26). Уӕхӕн адӕнӕй се ’мбӕлттӕ дӕр райеуварс унцӕ. Мадта нӕхемӕ сӕрбӕрзонддзийнади муггӕгтӕ ку иссерӕн, уӕд гъӕуама Йеговӕмӕ ковӕн, цӕмӕй нин нӕ зунд нӕуӕг кӕнунмӕ банхус кӕна. Уой фӕрци еци лӕгъуз менеуӕг нӕ зӕрди едӕгтӕ нӕ рауадздзӕй (Ром. 12:2).

20. Сӕрниллӕг ӕма бонзонгӕ цӕмӕн гъӕуама уӕн?

²⁰ Нӕ Хуцау Йеговӕй хъӕбӕр боз ан, ӕцӕг сӕрниллӕгдзийнадӕ ци ӕй, уой нин ӕхуӕдӕг ке ӕвдесуй! Мах ӕй уинӕн, ӕ лӕггадгӕнгути хӕццӕ куд сӕрниллӕгӕй фӕййархайуй, уой, ӕма мах дӕр фӕндуй, цӕмӕй ӕй фӕнзӕн. Уомӕй уӕлдай ма нӕ фӕндуй, рагидзаманти Хуцауи хӕццӕ бонзонгӕй ка цудӕй, уони дӕр фӕнзун. Гъӕйдӕ мадта Йеговӕн ци кадӕ ӕмбӕлуй, еци кадӕ ин кӕнӕн (Рарг. 4:11). Гъе уӕд ӕносмӕ дӕр уодзиан Йегови ӕмбӕлттӕ, уомӕн ӕма е уарзуй сӕрниллӕг ӕма бонзонгӕ адӕни.