1. Йеговӕ цард цӕмӕн сфӕлдиста?

АДТӔЙ уӕхӕн рӕстӕг, ӕма Дун-дуйней Йеговӕй ӕндӕр неке адтӕй. Ӕма уой туххӕй ӕнкъард нӕ кодта, уомӕн ӕма ӕ амонд иннетӕй кӕнгӕ н’ адтӕй. Фал ӕй уӕддӕр бафӕндадтӕй иннетӕн дӕр цард раттун, цӕмӕй етӕ дӕр цийнӕ кӕнонцӕ. Ӕма ’й уомӕ уарзондзийнадӕ баразӕнгард кодта (Пс. 36:9; 1 Иоан. 4:19).

2. Йесо ӕма изӕдтӕ, Йеговӕ ци сфӕлдиста, уомӕ цӕхуӕн цӕстӕй ракастӕнцӕ?

² Фиццаг бал Йеговӕ ӕхецӕн сфӕлдиста ӕнхусгӕнӕги, ӕ фиццаг Фурти. Уой фӕсте ба алцидӕр «сфӕлдиста уой ӕнхусӕй». Милиуангай изӕдти дӕр еумӕ сфӕлдистонцӕ (Кол. 1:16). Йесо цийнӕ кодта, ӕ Фидӕн ӕнхус кӕнун ӕ бон ке адтӕй, уобӕл (Ӕмб. 8:30). Хуцауи иннӕ фурттӕ, изӕдтӕ, дӕр цийнӕ кодтонцӕ. Зӕгъӕн ес, ӕма етӕ фиццаг рӕнгъӕбӕл бадтӕнцӕ ӕма кастӕнцӕ, Йеговӕ ӕма ӕ «дӕсни косӕг» уӕлӕрвтӕ ӕма зӕнхӕ куд кодтонцӕ, уомӕ. Цума изӕдтӕ сӕ цийнӕ куд ӕвдистонцӕ? Хуцау зӕнхӕ ӕма ибӕл цидӕриддӕр ес, уой ку искодта, уӕд «еугурӕйдӕр фур цийнӕй... гъӕр кодтонцӕ». Уӕлдай хъӕбӕрдӕр ба цийнӕ кодтонцӕ, адӕймаги ку сфӕлдиста, уӕд (Иов 38:7; Ӕмб. 8:31). Йеговӕ цидӕриддӕр сфӕлдиста, уомӕй бӕрӕг ӕй ӕ уарзондзийнадӕ ӕма ӕ зунд (Пс. 104:24; Ром. 1:20).

3. 1 Коринфӕгтӕмӕ 15:21, 22 куд финст ӕй, уомӕ гӕсгӕ нин Киристей нивонди фӕрци цӕхуӕн фадуат фӕззиндтӕй?

³ Йегови фӕндонмӕ гӕсгӕ адӕн гъӕуама ӕносмӕ цардайуонцӕ,  ке сфӕлдиста, еци рӕсугъд зӕнхӕбӕл. Фал Адам ӕма Евӕ сӕ уарзӕгой Фиди нихмӕ ку рацудӕнцӕ, уӕд сӕхуӕдтӕ дӕр ӕма сӕ байзӕддӕгтӕ дӕр тӕрегъӕд ӕма мӕлӕти амӕттаг фӕцӕнцӕ (Ром. 5:12). Цума Йеговӕ куд бакодта? Йеговӕ еци фӕдбӕл фегъосун кодта, адӕни куд фӕййервӕзун кӕндзӕй, уой (Райд. 3:15). Йеговӕ ӕ Фурти нивондӕн равардта, цӕмӕй Адам ӕма Еви байзӕддӕгтӕ тӕрегъӕд ӕма мӕлӕтӕй иссӕребарӕ адтайуонцӕ. Уой фӕрци алке бон дӕр ӕй Хуцауӕн лӕггадӕ кӕнун ӕма ӕносон цард фӕууинун (Иоан. 3:16; Ром. 6:23; бакӕсӕ 1 Коринфӕгтӕмӕ 15:21, 22).

4. Аци статьяй цӕхуӕн фарстатӕбӕл радзубанди кӕндзиан?

⁴ Хуцау зӕрдӕ байвардта, ка рамардӕй, уони ке райгас кӕндзӕй. Ӕма нӕмӕ уой фӕдбӕл цӕхуӕндӕр фарстатӕ фӕззиннуй. Зӕгъӕн: адӕн куд игас кӕндзӕнцӕ? Нӕ хеуӕнттӕ ку райгас уонцӕ, уӕд сӕ бафӕсмӕрдзиан? Еци хабар нин цӕйбӕрцӕ цийнӕ ӕрхӕсдзӕй? Йегови адӕни райгас кӕнун ке фӕндуй, уомӕй ци ес базонӕн ӕ уарзондзийнадӕ, зунд ӕма фӕразондзийнади туххӕй? Гъӕйдӕ аци фарстатӕбӕл радзубанди кӕнӕн.

5. Цӕмӕн ес зӕгъӕн, ӕма, ка рамардӕй, етӕ еугурӕйдӕр еци еу рӕстӕг нӕ райгас уодзӕнцӕ?

⁵ Йеговӕ ӕ Фурт Киристей фӕрци милиуангай адӕни цардмӕ ку ӕздаха, уӕд еугурӕйдӕр еци еу рӕстӕг нӕ райгас уодзӕнцӕ. Цӕмӕн ес уотӕ зӕгъӕн? Уомӕн ӕма зӕнхӕбӕл адӕн ӕвваст ку раберӕ уонцӕ, уӕд е хӕлхъоймӕ ӕркӕндзӕй. Йеговӕ ба уой нӕ бауадздзӕй. Е ӕй зонуй, сабур цард кӕнунмӕ алцидӕр бӕлвурд ӕгъдаумӕ гӕсгӕ ке гъӕуама уа (1 Кор. 14:33). Йеговӕ Хуцау зундӕй архайдта ӕма фӕразон адтӕй, Киристей хӕццӕ зӕнхӕ адӕнӕн ку цӕттӕ кодта, уӕд. Ӕма Киристе дӕр ӕ Минанзон хецаудзийнади рӕстӕг гъе уотӕ архайдзӕй. Армагеддони  ка фӕййервӕза, уони хӕццӕ зӕнхӕ цӕттӕ кӕндзӕй, ка райгас уа, уонӕн.

6. Гъуддӕгтӕ 24:15 куд финст ӕй, уомӕ гӕсгӕ Йеговӕ ке райгас кӕна, уони астӕу цӕхуӕн адӕн уодзӕй?

⁶ Фал тӕккӕ ӕхсидзгӕдӕр ба е ӕй, ӕма ка райгас уа, уони гъӕудзӕй ахур кӕнун Хуцауи закъӕнттӕбӕл ӕма син гъӕудзӕй амонун рӕстдзийнадӕ ӕ Паддзахади туххӕй. Цӕмӕн? Уомӕн ӕма ка райгас уа, уонӕн сӕ фулдӕр уодзӕнцӕ «фудгӕнгутӕй». (Бакӕсӕ Гъуддӕгтӕ 24:15.) Киристей нивонд ци арфӕдзийнӕдтӕ хӕссуй, уонӕй цӕмӕй исхайгин уонцӕ, уой туххӕй сӕ сӕ царди берӕ цидӕртӕ гъӕудзӕй раййевун. Расагъӕс кӕнӕ, цӕйбӕрцӕ бахъиамӕт кӕнун гъӕудзӕй, цӕмӕй, Йегови туххӕй игъосгӕ дӕр ка некӕд фӕккодта, еци милиуангай адӕнӕн рӕстдзийнадӕ байамонӕн. Цума си алке хӕццӕ дӕр хецӕнтӕй ахур кӕндзиан, абони Библи куд фӕййахур кӕнӕн, уотӕ? Цӕхуӕндӕр ӕмбурдтӕмӕ сӕ иснисан кӕндзӕнцӕ? Сӕ фӕсте ка райгас уа, уони хӕццӕ сӕ бон уодзӕй ахур кӕнун? Е ба бӕрӕг уодзӕй. Фал ӕй федарӕй зонӕн, Киристей минанзон хецаудзийнади кӕронмӕ «зӕнхӕ [ке] байдзаг уодзӕй зонундзийнӕдтӕй Йегови туххӕй» (Ис. 11:9). Расагъӕс кӕнӕ, еци мин анзей дӕргъи нӕмӕ цӕйбӕрцӕ дессаги куст ӕнгъӕлмӕ кӕсуй!

7. Ка райгас уа ӕма ахур кӕнун ке гъӕудзӕй, еци адӕнмӕ Йегови лӕггадгӕнгути раст цӕстӕй кӕсун цӕмӕн гъӕудзӕй?

⁷ Киристей минанзон хецаудзийнади рӕстӕг Йегови лӕггадгӕнгутӕн идарддӕр дӕр гъӕудзӕй сӕ уодигъӕдӕ ӕййевун, цӕмӕй сӕ уӕларвон Фиди зӕрдӕ рохс кӕнонцӕ. Уомӕ гӕсгӕ сӕ гъӕудзӕй, ка райгас уа, еци адӕнмӕ раст цӕстӕй кӕсун ӕма син ӕнхус кӕнун, цӕмӕй сӕ бон уа сӕ тӕрегъӕдгун фӕндти хӕццӕ тох кӕнун ӕма Йегови уагӕвӕрдтӕмӕ гӕсгӕ цӕрун (1 Пет. 3:8). Етӕ ’й уиндзӕнцӕ, Йегови лӕггадгӕнгутӕ куд сӕрниллӕг ӕнцӕ, сӕ уодигъӕдӕ идарддӕр дӕр куд ӕййевунцӕ ӕма уони дӕр бафӕнддзӕй нӕ хӕццӕ Хуцауӕн лӕггадӕ кӕнун ӕма сӕ ервӕзундзийнадӕбӕл ӕгас хъауритӕй архайун (Фил. 2:12).

8. Цӕмӕн ес зӕгъӕн, ӕма ка райгас уа, уони сӕ хеуӕнттӕ бафӕсмӕрдзӕнцӕ?

⁸ Цӕмӕн ес зӕгъӕн, ӕма ка райгас уа, уони нӕ бон уодзӕй бафӕсмӕрун? Йеговӕ рагидзаманти адӕни куд райгас кӕнидӕ, уомӕ гӕсгӕ зӕгъӕн ес, ӕма сӕ райгас кӕндзӕй сӕ мӕлӕти размӕ цӕхуӕн адтӕнцӕ, уӕхӕнттӕй. Йесо мӕлӕт рабарста, адӕймаг фунӕй куд фӕккӕнуй, уой хӕццӕ, райгасдзийнадӕ ба – куд райгъал уй, уой хӕццӕ (Матф. 9:18, 24; Иоан. 11:11–13). Адӕймаг ку райгъал уй, уӕд ӕ бакаст ӕ дзурдигъӕдӕ ӕма ӕ сагъӕстӕ куд адтӕнцӕ, уотӕ байзайунцӕ. Ӕргъуди кӕнӕн Лазӕри хабар. Цуппар бони мард адтӕй, ӕ бауӕр ма лӕгъуз кӕнун дӕр райдӕдта. Фал ӕй Йесо ку райгас кодта, уӕд ӕй ӕ хуӕртӕ уайтагъддӕр рафӕсмардтонцӕ, удта сӕ Лазӕр дӕр нӕ байронх ӕй (Иоан. 11:38–44; 12:1, 2).

9. Цардмӕ ка раздӕха, етӕ еци фӕдбӕл ӕнхӕст зунд ӕма ӕнхӕст бауӕри цӕмӕннӕ райгас уодзӕнцӕ?

⁹ Йеговӕ зӕрдӕ ӕвӕруй, Киристей хецаудзийнади рӕстӕг еунӕг адӕймаг дӕр уотӕ ке нӕбал зӕгъдзӕй, «ӕз сӕйгӕ дӕн», зӕгъгӕ (Ис. 33:24; Ром. 6:7). Ӕма ка райгас уа, етӕ еугурӕйдӕр ӕнӕнез уодзӕнцӕ. Фал е уобӕл дзорӕг нӕй, ӕма еци фӕдбӕл ӕнхӕст исуодзӕнцӕ, уомӕн ӕма сӕ уӕд сӕ хеуӕнттӕ нӕ бафӕсмӕрдзӕнцӕ. Киристей минанзон хецаудзийнади рӕстӕг адӕн, ӕвӕдзи, сабургай исуодзӕнцӕ ӕнхӕст. Еци мин анзей фӕсте Киристе Паддзахадӕ фӕстӕмӕ ӕ Фиди къохмӕ ратдзӕй. Уӕдмӕти ба еци Паддзахадӕ ӕ нисан кӕронмӕ исӕнхӕст кӕндзӕй, ӕма  ӕгас адӕн дӕр исуодзӕнцӕ ӕнхӕст (1 Кор. 15:24–28; Рарг. 20:1–3).

10. Дӕ хеуӕнттӕ ку райгас уонцӕ, уӕд куд цийнӕ кӕндзӕнӕ?

¹⁰ Расагъӕс кӕнӕ, дӕ хеуӕнттӕй ка рамардӕй, уони нӕуӕгӕй ку фӕууинай, уӕд фур цийнӕй цитӕ кӕндзӕнӕ. Ӕвӕдзи, ходдзӕнӕ кенӕ кӕудзӕнӕ. Кенӕ ба Йеговӕн кади зартӕ кӕндзӕнӕ. Фал нӕ уарзӕгой Фидӕй ӕма ӕ Фуртӕй хъӕбӕр боз ке уодзиан, уобӕл ба дзурд дӕр нӕ цӕуй, уомӕн ӕма нин еци дессаги лӕвар етӕ искӕндзӕнцӕ.

11. Иоанни 5:28, 29 куд финст ӕй, уомӕ гӕсгӕ, Хуцауи раст уагӕвӕрдтӕмӕ гӕсгӕ ка цӕра, уонӕмӕ ци ӕнгъӕлмӕ кӕсуй?

¹¹ Нур ба расагъӕс кӕнӕ, ка райгас уа, етӕ куд цийнӕ кӕндзӕнцӕ, сӕ цард Хуцауи раст уагӕвӕрдтӕмӕ гӕсгӕ ку ӕййевонцӕ, уӕд. Уӕхӕн адӕнӕн Йеговӕ балӕвар кӕндзӕй ӕносон цард дзенети зӕнхӕбӕл. Ӕййевун ке нӕ фӕндӕуа, етӕ ба уӕхӕн цардӕй сӕхе фенӕхай кӕндзӕнцӕ. Йеговӕ сӕ нӕ бауадздзӕй дзенети фарнӕ фехалун (Ис. 65:20; бакӕсӕ Иоанни 5:28, 29).

12. Йеговӕ зӕнхӕбӕл цӕрӕг адӕнӕн куд райарфӕ кӕндзӕй?

¹² Паддзахади дӕлбарӕ ка уа, етӕ еугурӕйдӕр сӕхебӕл бавзардзӕнцӕ Ӕмбесӕндти 10:22 финст дзурдтӕ: «Йегови арфӕдзийнадӕ адӕймаги кӕнуй гъӕздуг ӕма ӕ хӕццӕ маст нӕ хӕссуй». Хуцауи сугъдӕг хъаури фӕрци ӕ лӕггадгӕнгутӕ Киристей никки хъӕбӕрдӕр фӕнздзӕнцӕ ӕма ӕнхӕстдзийнадӕмӕ хӕстӕгӕй-хӕстӕгдӕр кӕндзӕнцӕ (Иоан. 13:15–17; Еф. 4:23, 24). Бонӕй-бонмӕ сӕбӕл фулдӕр хъауритӕ ӕфтуйдзӕй сӕ уодигъӕдӕ ба хуӕздӕр кӕндзӕй. Расагъӕс кӕнӕ, адӕн уӕхӕн цардбӕл куд цийнӕ кӕндзӕнцӕ! (Иов 33:25). Фал нин райгасдзийнади хабар абони ба куд ӕнхус кӕнуй?

13. Псаломи 139:1–4 финст дзурдтӕй куд зиннуй, Йеговӕ нӕ хуарз ке зонуй ӕма е, адӕни ку игас кӕна, уӕд куд рабӕрӕг уодзӕй?

¹³ Раздӕр куд загътан, уотемӕй Йеговӕ адӕни игас кӕндзӕй сӕ зӕронд сагъӕстӕ ӕма сӕ зӕронд уодигъӕди хӕццӕ. Цума нин е цӕбӕл дзорӕг ӕй? Расагъӕс кӕнӕ, Йеговӕ уӕ уотӕ берӕ уарзуй, ӕма сумах туххӕй алцидӕр нигъгъуди кӕнуй – уӕ сагъӕстӕ, уе ’нкъарӕнтӕ, уӕ дзурдтӕ ӕма уӕ гъуддӕгтӕ. Уомӕ гӕсгӕ ’й еске райгас кӕнун ку багъӕуа, уӕд ин зин нӕ уодзӕй еци адӕймаги ӕ гъудитӕ ӕ зундахаст ӕма ӕ менеугути хӕццӕ раздахун. Паддзах Давид ӕй зудта, Йеговӕ ни алкедӕр хъӕбӕр хуарз ке зонуй. (Бакӕсӕ Псалом 139:1–4.) Йеговӕ нӕ уотӕ хуарз ке зонуй, е нин цӕбӕл дзорӕг ӕй?

14. Йеговӕ мах туххӕй алцидӕр ке зонуй, уомӕ ци цӕстӕй гъӕуама кӕсӕн?

¹⁴ Йеговӕ нӕ уотӕ дзӕбӕх ке зонуй, уобӕл тухсун нӕ гъӕуй. Цӕмӕннӕ? Уомӕн ӕма нӕ хъӕбӕр берӕ уарзуй ӕма ни алкедӕр ӕ цӕсти хъазар ӕй. Йеговӕ ’й зонуй, нӕ царди нӕбӕл цӕхуӕн хабӕрттӕ ӕрцудӕй ӕма нӕхе уотӕ цӕмӕн дарӕн, уой. Е нин уодӕнцойнӕ куд нӕй! Расагъӕс кӕнӕ, дӕ царди алли минут дӕр Йеговӕ дӕ фарсмӕ ӕй ӕма цӕттӕ ӕй банхус кӕнунмӕ. Еунӕгӕй дӕ некӕд ниууаддзӕй (2 Анз. 16:9).

15. Йеговӕ нин райгасдзийнади нифс ке равардта, е е ’нӕкӕрон зундбӕл дзорӕг цӕмӕн ӕй?

¹⁵ Рамӕлуни тӕссӕй адӕймаг бакӕнуй, ӕнӕуой ке некӕд бакодтайдӕ, уӕхӕн гъуддаг. Ӕма Сайтани дӕлбарӕ ка ӕй, еци адӕн арӕх уомӕй испайда кӕнунцӕ, цӕмӕй адӕймагӕн е ’мбӕлтти рауӕйӕ кӕнун кӕнонцӕ кенӕ ’й, цӕбӕл ӕууӕндуй, уой сӕрти рахезун кӕнонцӕ. Фал мах ба уотӕ ӕнцонтӕй нӕ фӕттӕрсун кӕндзӕнцӕ, уомӕн ӕма ӕппундӕр  нӕ гурусхӕ кӕнӕн, не знӕгтӕ нӕ маргӕ ку ракӕнонцӕ, уӕддӕр нӕ Йеговӕ фӕстӕмӕ цардмӕ ке раздахдзӕй (Рарг. 2:10). Мах ӕй федарӕй зонӕн: Йеговӕй нӕ неке ӕма неци райеуварс кӕндзӕй (Ром. 8:35–39). Йеговӕ нин райгасдзийнади нифс ке балӕвар кодта, уомӕй бӕрӕг ӕй е ’нӕкӕрон зунд. Еци нифси фӕрци федар фӕллӕудзиан, Сайтани фарс ка ӕй, етӕ нин туххӕй ести ку кӕнун кӕнонцӕ ӕма нӕ ке рамардзӕнцӕ, уомӕй ку тӕрсун кӕнонцӕ, уӕд дӕр.

16. Дӕхемӕ цӕхуӕн фарстатӕ гъӕуама раттай ӕма дин етӕ, Йеговӕбӕл дӕ зӕрдӕ куд дарис, уой балӕдӕрунмӕ куд банхус кӕндзӕнцӕ?

¹⁶ Йегови знӕгтӕ дӕ мӕлӕтӕй ку тӕрсун кӕнонцӕ, уӕд куд бакӕндзӕнӕ? Дӕ цард Йегови барӕ бакӕндзӕнӕ? Цума уӕхӕн фӕлварӕнмӕ цӕттӕ дӕ? Дӕхе бафӕрсӕ: «Алли бон дӕр ци унаффитӕ рахӕссун, уонӕй бӕрӕг ӕй, мӕ зӕрдӕ Йеговӕбӕл ке дарун?» (Лук. 16:10). «Мӕ рӕстӕгӕй ӕма ме ’хцатӕй куд пайда кӕнун, уомӕй бӕрӕг ӕй, фиццаг бунати мин Хуцауи Паддзахадӕ ке ӕй ӕма Йегови фӕрци ке неци гъӕуагӕ уодзӕн, уобӕл ке ӕууӕндун?» (Матф. 6:31–33). Кӕд аци фарстатӕбӕл «гъо» загътай, уӕд зӕгъӕн ес, ӕма дӕ зӕрдӕ Йеговӕбӕл дарис ӕма цийфӕнди фӕлварӕнмӕ дӕр цӕттӕ дӕ (Ӕмб. 3:5, 6).

17. а) Райгасдзийнадӕ Йегови фӕразондзийнади хӕццӕ куд баст ӕй? б) Йегови фӕразондзийнадӕн ке аргъ кӕнӕн, е цӕмӕй бӕрӕг уодзӕй?

¹⁷ Йеговӕ Сайтани дуйне кӕд фесафдзӕй, еци бон ӕма сахат исбӕрӕг кодта (Матф. 24:36). Хъӕбӕр ӕй фӕндуй, ка рамардӕй, уони фӕстӕмӕ цардмӕ раздахун, фал афонӕй раздӕр архайун нӕ райдайдзӕй (Иов 14:14, 15). Е ӕнгъӕлмӕ кӕсуй, тӕккӕ хуӕздӕр рӕстӕг ку ралӕууа, уомӕ (Иоан. 5:28). Йегови фӕразондзийнадӕн цӕмӕн гъӕуама аргъ кӕнӕн? Расагъӕс кӕнӕ: Йеговӕ уӕхӕн фӕразон ке ӕй, уой фӕрци ма хъӕбӕр берӕ адӕнӕн, удта нӕхецӕн дӕр, фӕззиндтӕй «ӕрфӕсмон кӕнуни фадуат» (2 Пет. 3:9). Куд фулдӕр адӕн исхайгин уонцӕ, ӕносон цардӕй, уотӕ ’й фӕндуй. Мадта ин ӕ фӕразондзийнадӕн алкӕддӕр аргъ кӕнӕн. Е бӕрӕг уодзӕй, «ӕносон царди надбӕл цӕун ке фӕндуй», уони ку агорӕн ӕма син Йегови бауарзунмӕ ӕма ин лӕггадӕ кӕнунмӕ ку ӕнхус кӕнӕн (Гъуд. 13:48). Гъе уӕд ӕй иннетӕ дӕр мах хузӕн сӕхебӕл балӕдӕрдзӕнцӕ, Хуцауи фӕразондзийнадӕн куд устур аргъ ес, уой.

18. Иннетӕмӕ фӕразон цӕмӕн гъӕуама уӕн?

¹⁸ Йеговӕ фӕразонӕй ӕнгъӕлмӕ кӕсдзӕй  Киристей минанзон хецаудзийнади кӕронмӕ – ӕнхӕст ку исуӕн, еци рӕстӕгмӕ. Уӕдмӕти ба бал нин нӕ тӕрегъӕдтӕ хатир кӕндзӕй. Гъӕйдӕ мадта мах дӕр Йегови хузӕн, иннетӕмӕ хуарзӕй ци ес, уой уинӕн ӕма сӕмӕ уӕн фӕразон. Ӕркӕсӕн, ӕ сӕрихецау нервити незӕй кӕмӕн фӕссӕйгӕ ’й, уӕхӕн хуӕри хабармӕ. Еци нези туххӕй лӕг ӕмбурдтӕмӕ дӕр нӕбӕл цудӕй. Хуӕрӕ зӕгъуй: «Еци рӕстӕг мин гъе уотӕ зин адтӕй, ӕма ин зӕгъӕн дӕр нӕййес. Цидӕриддӕр пълӕнттӕ нӕмӕ адтӕй, етӕ ругӕ фестадӕнцӕ». Фал уӕддӕр еци хуӕрӕ ӕ сӕрихецауӕн адтӕй фӕлмӕн ӕма фӕразон. Йеговӕбӕл ӕ зӕрдӕ дардта ӕма ӕ къохтӕ нӕ уагъта. Йегови хузӕн фулдӕр сагъӕс кодта ӕ лӕги хуарз менеугутӕбӕл. «Хуарзӕй имӕ берӕ цидӕртӕ ес,– зӕгъуй хуӕрӕ,– ӕма ӕ бон ци ӕй, уой кӕнуй, цӕмӕй сабургай ӕ незбӕл уӕлахез кӕна». Мадта хъӕбӕр ӕхсидзгӕ ’й, цӕмӕй нӕ бийнонти кенӕ ӕмбурди цӕхуӕндӕр зиндзийнӕдти хӕццӕ ка тох кӕнуй, уонӕмӕ фӕразон уӕн.

19. Идарддӕр нӕ ци фӕндуй кӕнун?

¹⁹ Зӕнхӕ ку фӕззиндтӕй, уӕд Йесо ӕма изӕдтӕ хъӕбӕр цийнӕ кодтонцӕ. Фал расагъӕс кӕнӕ, куд цийнӕ кӕндзӕнцӕ, ӕгас зӕнхӕ дӕр, Йегови ка уарзуй ӕма ин ка лӕггадӕ кӕнуй, уӕхӕн ӕнхӕст адӕнӕй ку байдзаг уа, уӕд. Киристей хӕццӕ паддзӕхтӕ ка уодзӕй, етӕ дӕр куд цийнӕ кӕндзӕнцӕ, сӕ хъиамӕттӕ адӕнӕн цӕйбӕрцӕ арфӕдзийнӕдтӕ хӕссунцӕ, уой ку уинонцӕ, уӕд (Рарг. 4:4, 9–11; 5:9, 10). Е дессаги цард уодзӕй! Адӕнӕн сӕ маст цийнӕй раййевдзӕй, незтӕ, бӕллӕхтӕ ӕма мӕлӕтӕн ба сӕ кой дӕр нӕбал уодзӕй (Рарг. 21:4). Уӕдмӕти ба бал нӕ гъӕуй нӕ уарзӕгой, зундгин ӕма фӕразон Фиди фӕнзун. Ӕма гъе уӕд цийфӕнди фӕлварӕнтӕбӕл ма исӕмбӕлӕн, уӕддӕр нӕ цийнӕдзийнадӕ нӕ фесафдзиан (Иак. 1:2–4). Йеговӕй куд хъӕбӕр боз ан, райгасдзийнади нифс нин ке балӕвар кодта, уой туххӕй! (Гъуд. 24:15).