1. 3 Иоанни 3, 4 куд финст ӕй, уомӕ гӕсгӕ Йегови лӕггадгӕнгутӕн устур цийнӕ ци ’рхӕссуй?

РАСАГЪӔС кӕнӕ, апостол Иоанн куд цийнӕ кодта, рӕстдзийнадӕ базонунмӕ кӕмӕн банхус кодта, етӕ идарддӕр дӕр Йеговӕн еузӕрдонӕй ке лӕггадӕ кӕнунцӕ, уой ку фегъуста, уӕд. Еци киристӕнттӕ берӕ зиндзийнӕдтӕбӕл исӕмбалдӕнцӕ, ӕма Иоанн алцидӕр бакодта, цӕмӕй син се ’ууӕндундзийнадӕ бафедар кодтайдӕ. Е сӕ нимадта ӕ сувӕллӕнттӕбӕл. Мах дӕр абони хъӕбӕр фӕццийнӕ кӕнӕн, нӕ сувӕллӕнттӕ кенӕ, Библи ке хӕццӕ ахур кодтан, етӕ сӕхе Йеговӕн ку иснивонд кӕнунцӕ ӕма ин еузӕрдонӕй лӕггадӕ кӕнун ку райдайунцӕ, уӕд. (Бакӕсӕ 3 Иоанни 3, 4.)

2. Апостол Иоанн е ’ртӕ финстӕги цӕмӕн ниффинста?

² Нӕ эри 98 анзи апостол Иоанн сакъадах Патмоси ахӕстдонӕй ку исуӕгъдӕ ’й, уӕд, ӕвӕдзи, Ефеси кенӕ Ефесмӕ хӕстӕг кӕмидӕр ӕрцардӕй. Ӕма еци рӕстӕг Йегови сугъдӕг хъаури разамундӕй ниффинста ӕртӕ финстӕги, цӕмӕй еузӕрдон киристӕнтти баразӕнгард кодтайдӕ рӕстдзийнади надбӕл идарддӕр дӕр цӕун ӕма Киристебӕл ӕууӕндун.

3. Аци статьяй цӕхуӕн фарстатӕмӕ ӕркӕсдзиан?

³ Киристей апостолтӕй ма фӕстаг Иоанн байзадӕй, ӕма еци рӕстӕг хъӕбӕр тухстӕй, ӕмбурди, рӕстдзийнади нихмӕ ка дзурдта, уӕхӕнттӕ ке фӕззиндтӕй, уобӕл * (1 Иоан. 2:18, 19, 26). Еци адӕн сӕхе Хуцаубӕл ӕууӕндӕг худтонцӕ, фал ин ӕ закъӕнттӕ ба нецӕмӕ дардтонцӕ. Мадта ӕркӕсӕн, Иоанн сугъдӕг хъаури разамундӕй цӕхуӕн унаффитӕ равардта, уонӕмӕ, удта базонӕн дзуапп аци ӕртӕ фарстайебӕл:  рӕстдзийнади надбӕл цӕун ци нисан кӕнуй? Рӕстдзийнади надбӕл цӕугӕй цӕхуӕн фӕлварӕнтӕбӕл исӕмбӕлӕн? Ӕма нӕ бон куд ӕй кӕрӕдземӕн ӕнхус кӕнун, цӕмӕй рӕстдзийнади надӕй ма райеуварс уӕн?

4. 1 Иоанни 2:3–6 ӕма 2 Иоанни 4, 6 куд финст ӕй, уомӕ гӕсгӕ нӕ ци кӕнун гъӕуй, цӕмӕй нӕ бон уа рӕстдзийнади надбӕл цӕун?

⁴ Цӕмӕй нӕ бон уа рӕстдзийнади надбӕл цӕун, уой туххӕй еци рӕстдзийнадӕ зонун гъӕуй. Финст ба ӕй Хуцауи Дзурд Библий. Уомӕй уӕлдай ба ма гъӕуама Йеговӕмӕ игъосӕн ӕма ин ӕ фӕдзӕхститӕ ӕнхӕст кӕнӕн. (Бакӕсӕ 1 Иоанни 2:3–6; 2 Иоанни 4, 6.) Еци гъуддаги нин Киристе хуарз цӕветтон ниууагъта. Мадта Йеговӕмӕ игъосун ке фӕндуй, етӕ гъӕуама се ’гас хъауритӕй архайонцӕ, цӕмӕй Киристей къахвӕдтӕбӕл цӕуонцӕ (Иоан. 8:29; 1 Пет. 2:21).

5. Федарӕй ци гъӕуама зонӕн?

⁵ Цӕмӕй идарддӕр дӕр рӕстдзийнади надбӕл цӕуӕн, уой туххӕй гъӕуама федарӕй зонӕн, Йеговӕ рӕстдзийнади Хуцау ке ӕй, удта Библий цидӕриддӕр финст ӕй, е дӕр раст ке ӕй. Йесо зӕрдӕвӕрд Мессийӕ ке ӕй, уобӕл дӕр гъӕуама ма дузӕрдуг кӕнӕн. Абони беретӕ не ’ууӕндунцӕ, Йесо Хуцауи Паддзахади Паддзах ке ӕй, уобӕл. Иоанн киристӕнтти фӕдзахста, «берӕ сайгутӕ» ке фӕззиндзӕй ӕма Йеговӕ ӕма Йесобӕл федарӕй ка нӕма ӕууӕндуй, уони ке сайдзӕнцӕ (2 Иоан. 7–11). Иоанн финста: «Уотӕ ка зӕгъуй, Йесо, дан, Киристе нӕй, е кӕд нӕ сайуй, уӕд ма ка сайуй?» (1 Иоан. 2:22). Цӕмӕй нӕбӕл уӕхӕн сайт ма рауайа, уой туххӕй гъӕуама Хуцауи Дзурд лӕмбунӕг ӕртасӕн. Гъе уотемӕй ӕцӕгӕйдӕр базондзиан Йегови ӕма Йесой (Иоан. 17:3). Ӕма ’й уӕд федарӕй зондзиан, рӕстдзийнади надбӕл ке ан.

6. Ӕригон киристӕнттӕ цӕхуӕн фӕлварӕнти бахаунцӕ?

⁶ Ӕгас киристӕнтти дӕр гъӕуй сӕхе еуварс дарун аци дуйней адӕн ци рӕдуд гъудитӕбӕл хуӕст ӕнцӕ, уонӕй (1 Иоан. 2:26). Еци гъудитӕ уӕлдай тӕссаг ӕнцӕ ӕригон киристӕнттӕн. Францийӕй еу 25-анздзуд хуӕрӕ Алексийӕ * загъта: «Скъолай нӕ ахур кодтонцӕ эволюций теорибӕл ӕма аллихузи философитӕбӕл. Хатгай мӕмӕ кӕмидӕр раст фӕккӕсиуонцӕ ӕма ’й нӕбал лӕдӕрдтӕн, рӕстдзийнадӕ кӕми ӕй, уой. Фал ӕй зудтон, раст ке нӕ уайдӕ, айдагъ ахургӕнгутӕ ци дзорунцӕ, уомӕ игъосун, Йеговӕн  ба дзурди барӕ ма дӕттун». Алексийӕ лӕмбунӕг бакастӕй киунугӕ «Жизнь – как она возникла? Путем эволюции или путем сотворения?». Гъема цалдӕр къуӕрей фӕсте нецӕбӕлбал гурусхӕ кодта. Алексийӕ зӕгъуй: «Нур ӕй федарӕй зонун, Библий ци финст ес, е раст ке ӕй ӕма ӕ уагӕвӕрдтӕмӕ гӕсгӕ ку цӕрон, уӕд амондгун ке уодзӕн ӕма мӕ зӕрди фарнӕ ке уодзӕй».

7. Нӕхе цӕмӕй гъӕуама хезӕн ӕма цӕмӕн?

⁷ Каргунтӕ дӕр ӕма ӕригӕнттӕ дӕр, гъӕуама лӕмбунӕг уонцӕ, цӕмӕй дууӕ цардемӕй цӕрун ма райдайонцӕ. Апостол Иоанн дӕр нӕ фӕдзахста, цӕмӕй уотӕ ма рауайа, ӕма Йеговӕн дӕр лӕггадӕ кӕнӕн ӕма, ӕ зӕрдӕмӕ ка нӕ цӕуй, уӕхӕн гъуддӕгтӕ дӕр кӕнӕн (1 Иоан. 1:6). Кӕд нӕ фӕндуй, цӕмӕй ни Хуцау арази уа, уӕд гъӕуама макӕд иронх кӕнӕн, алцидӕр ке уинуй, уой. Цӕхуӕндӕр гъуддӕгтӕ адӕнӕй баримӕхсдзӕнӕ, фал Хуцауӕй ба баримӕхсӕн неци ес (Дзиуит. 4:13).

8. Нӕхе цӕхуӕн цӕстингасӕй гъӕуама хезӕн?

⁸ Гъӕуама нӕхе гъӕуай кӕнӕн, цӕмӕй аци дуйней адӕн тӕрегъӕдмӕ ци цӕстӕй кӕсунцӕ, е махбӕл дӕр ма рабӕрӕг уа. Апостол Иоанн финста: «Кӕд уотӕ дзорӕн, тӕрегъӕдгун нӕ ан, зӕгъгӕ, уӕд нӕхе сайӕн» (1 Иоан. 1:8). Иоанни рӕстӕги, раст дин ка ниууагъта, етӕ уотӕ дзурдтонцӕ, ӕма адӕймаги бон ӕй тӕрегъӕдгун гъуддӕгтӕ дӕр кӕнун ӕма Хуцаумӕ дӕр хӕстӕг кӕнун. Абони дӕр беретӕ уӕхӕн гъудибӕл хуӕст ӕнцӕ. Сӕхе Хуцаубӕл ӕууӕндӕг адӕн фӕххонунцӕ, фал Йеговӕ тӕрегъӕдмӕ ци цӕстӕй кӕсуй, е ба сӕ зӕрдӕмӕ нӕ фӕццӕуй, уӕлдайдӕр ба, хӕтундзийнадӕ ӕма гомосексуализми туххӕй ци гъуди кӕнуй, е. Етӕ арӕх фӕззӕгъунцӕ: «Адӕймагӕн уӕхӕн цард ӕ зӕрдӕмӕ ку цӕуа, уӕд уоми лӕгъузӕй ци ес?»

9. Ӕригӕнттӕ Библий уагӕвӕрдтӕбӕл федар ку хуӕцонцӕ, уӕд син е ци пайда ӕрхӕсдзӕй?

⁹ Ӕригон киристӕнттӕн хӕтундзийнадӕмӕ  раст цӕстӕй кӕсун уӕлдай зин фӕууй, се ’мкъласонтӕ кенӕ се ’мкосгути туххӕй, уомӕн ӕма си етӕ лӕгъузӕй неци уинунцӕ. Еу ӕнсувӕр Александр радзурдта: «Скъолай мӕ кизгуттӕ сӕхуӕдтӕ сӕ разӕй искӕниуонцӕ, гъӕйдӕ неци дӕ фӕндуй, зӕгъгӕ. Кӕд, дан, кизгуттӕ дӕ зӕрдӕмӕ нӕ цӕунцӕ, уӕд, дан, ӕвӕдзи, „иннетӕй“ дӕ». Кӕд ду дӕр уӕхӕн уавӕрти бахауис, уӕд ма иронх кӕнӕ, Библий уагӕвӕрдтӕмӕ гӕсгӕ ку архайай, уӕд дӕхецӕн дӕр фулдӕр аргъ кӕндзӕнӕ, де ’нӕнездзийнадӕ дӕр багъӕуай кӕндзӕнӕ, дӕ зӕрдӕ дӕр сабур уодзӕй ӕма Йегови хӕццӕ дӕр дӕ лимӕндзийнадӕ нӕ фесафдзӕнӕ. Еци гъуддаги федар ку фӕллӕууай, уӕд дин еу хаттӕй иннӕ хатмӕ раст куд ӕй, уотӕ архайун ӕнцондӕр уодзӕй. Аци дуйне хӕтундзийнадӕмӕ уӕхӕн цӕстӕй ке кӕсуй, е Сайтани куст ӕй. Мадта ци уагӕвӕрдтӕмӕ гӕсгӕ цӕрис, уонӕбӕл федар ку хуӕцай, уӕд зӕгъӕн уодзӕй, ӕма Сайтанбӕл «фӕууӕлахез» дӕ (1 Иоан. 2:14).

10. 1 Иоанни 1:9 финст дзурдтӕ нин куд ӕнхус кӕнунцӕ Йеговӕн кӕдзос цӕсгонӕй лӕггадӕ кӕнун?

¹⁰ Мах ӕй лӕдӕрӕн, тӕрегъдбӕл нимайгӕ ци ӕй, уой Йеговӕ хуӕздӕр ке зонуй. Ӕма ӕгас хъауритӕй архайӕн, цӕмӕй тӕрегъӕд ма кӕнӕн. Фал тӕрегъӕд ку искӕнӕн, уӕддӕр нӕ бон ӕй Йеговӕн кувди медӕг алцидӕр радзорун. (Бакӕсӕ 1 Иоанни 1:9.) Уӕззау тӕрегъӕд ку искӕнӕн, уӕдта гъӕуама хестӕр нӕлгоймӕгтӕмӕ бацӕуӕн, уомӕн ӕма Йеговӕ уони исӕвардта махӕн ӕнхус кӕнунмӕ (Иак. 5:14–16). Фал кӕддӕр ке искодтан, еци тӕрегъӕдти туххӕй ба гъӕуама нӕхе ма хуӕрӕн. Цӕмӕн? Уомӕн ӕма нӕ уарзӕгой Фидӕ ӕ Фурти равардта, цӕмӕй нӕ тӕрегъӕдтӕ хатиргонд цӕуонцӕ. Кӕд нӕ раздӕриккон тӕрегъӕдтӕбӕл ӕрфӕсмон кодтан, уӕд нин Йеговӕ ӕхуӕдӕг зӕгъуй, хатир нин сӕ ке кӕнуй, ӕма ӕ дзурдӕн хецау ӕй. Йеговӕ нин ӕхуӕдӕг равардта фадуат, цӕмӕй ин нӕ бон уа кӕдзос цӕсгонӕй лӕггадӕ кӕнун (1 Иоан. 2:1, 2, 12; 3:19, 20).

11. Нӕ бон куд ӕй, не ’ууӕндундзийнадӕн нин зиан ка ӕрхӕсса, уӕхӕн цӕмӕйдӕрти нӕхе багъӕуай кӕнун?

 ¹¹ Гъӕуама нӕхе еуварс дарӕн, раст дин ка ниууагъта, уонӕй. Кӕдӕй киристон ӕмбурд фӕззиндтӕй, уӕдӕй Сайтан уобӕл архайуй, цӕмӕй Хуцауи еузӕрдон лӕггадгӕнгути ӕууӕндундзийнадӕ фӕккеун кӕна. Уомӕ гӕсгӕ гъӕуама рӕстдзийнадӕ мӕнгӕттӕй ӕртасун зонӕн *. Се ’сӕфт ни ка уинуй, етӕ нӕбӕл аллихузи мӕнгӕттӕ имисунцӕ ӕма сӕ интернети парахат кӕнунцӕ, цӕмӕй Йеговӕбӕл, удта нӕ хуӕртӕ ӕма ӕнсувӕртӕбӕл гурусхӕ кӕнун райдайӕн. Еци гъуддӕгтӕ кӕмӕй цӕунцӕ, уой макӕд иронх кӕнӕ ӕма дӕбӕл сайд ма рауайӕд! (1 Иоан. 4:1, 6; Рарг. 12:9).

12. Ци рӕстдзийнадӕ базудтан, уобӕл никки федардӕр ӕууӕндун ӕхсидзгӕ цӕмӕн ӕй?

¹² Цӕмӕй нӕ бон уа Сайтани нихмӕ федар фӕллӕуун, уой туххӕй гъӕуама байархайӕн, цӕмӕй Йесобӕл никки федардӕр ӕууӕндӕн, удта Йеговӕ уой фӕрци ӕ фӕндон куд исӕнхӕст кӕндзӕй, уой никки хуӕздӕр лӕдӕрӕн. Уомӕй уӕлдай ма гъӕуама ӕууӕндӕн, Йеговӕ ӕ организацийӕн разамунд ӕрмӕстдӕр ӕууӕнкгун ӕма зундгин цагъари фӕрци ке дӕттуй (Матф. 24:45–47). Не ’ууӕндундзийнадӕ фӕффедардӕр уодзӕй, Хуцауи Дзурд ӕдзох ку ’ртасӕн уӕд. Гъе уӕд не ’ууӕндундзийнадӕ уодзӕй, ӕ едӕгтӕ арф кӕмӕн ниццудӕнцӕ, уӕхӕн бӕласи хузӕн. Павел дӕр колоссӕгтӕмӕ финстӕги уӕхӕн гъуди загъта: «Нӕ Хецау Йесо Киристебӕл куд баууӕндтайтӕ, уотӕ имӕ идарддӕр дӕр игъосетӕ. Удта уӕ куд исахур кодтонцӕ, уотӕ ӕ медӕг едӕгтӕ рауадзетӕ, уобӕл ирӕзетӕ ӕма ӕууӕндундзийнади ӕрфедар уотӕ» (Кол. 2:6, 7). Киристон е ’ууӕндундзийнадӕ ку федар кӕна, уӕд ин ӕй Сайтан ӕма ӕ фӕдбӕлдзӕугутӕ нӕ фӕккеун кӕндзӕнцӕ (2 Иоан. 8, 9).

13. Дес кӕнун цӕбӕл нӕ гъӕуй ӕма цӕмӕн?

¹³ Аци дуйне ни е ’сӕфт ке уинуй, е нӕмӕ гъӕуама дессаг ма кӕса (1 Иоан. 3:13). Апостол Иоанн дӕр загъта: «Ӕгас дуйне ӕй Фидбилизи къохи» (1 Иоан. 5:19). Аци дуйней кӕрон куд хӕстӕгдӕр кӕнуй, уотӕ Сайтанӕн дӕр ӕ маст фулдӕрӕй-фулдӕр кӕнуй (Рарг. 12:12). Сайтан алкӕд хийнӕй нӕ фӕййархайуй. Аллихатт нӕ нӕ бауӕри монцтӕй нӕ фӕссайуй кенӕ, раст дин ка ниууагъта, уони зундбӕл нӕ фӕййаразуй. Сайтан ӕхе ӕргом дӕр ниццӕвуй Хуцауи адӕнбӕл. Зонуй ӕй, берӕ рӕстӕг ке нӕбал байзадӕй, цӕмӕй игъосун кӕнуни гъуддаг ӕрлӕуун кӕна ӕма нин не ’ууӕндундзийнадӕ басӕтта. Мадта нӕмӕ дессаг гъӕуама ма кӕса, кӕцидӕр бӕстити нин нӕ гъуддаг ке нихгӕнунцӕ, е. Уӕхӕн бӕстити дӕр нӕ хуӕртӕ ӕма ӕнсувӕртӕ идарддӕр дӕр Йеговӕн нифсгунӕй лӕггадӕ кӕнунцӕ. Сӕ цардӕй бӕрӕг ӕй, Сайтан кудфӕнди ма архайа, уӕддӕр ибӕл ке фӕууӕлахез уодзиан!

14. Нӕ бон куд ӕй хуӕртӕ ӕма ӕнсувӕртӕн рӕстдзийнади надбӕл цӕунмӕ ӕнхус кӕнун?

¹⁴ Цӕмӕй нӕ хуӕртӕ ӕма ӕнсувӕртӕн рӕстдзийнади надӕбӕл цӕунмӕ ӕнхус кӕнӕн, уой туххӕй гъӕуама кӕрӕдземӕн тӕрегъӕд кӕнун зонӕн (1 Иоан. 3:10, 11, 16–18). Алцидӕр хуарз ку уа, айдагъ уӕд гъӕуама ма ’вдесӕн нӕ уарзондзийнадӕ, фал зин сахат дӕр. Зӕгъӕн, ӕмбурди ескӕмӕн ӕ хеуӕнттӕй кадӕр ке рамардӕй, уой ку базонай, уӕд дӕ бон н’ адтайдӕ ӕ фарсмӕ балӕуун кенӕ ин ӕндӕр ескуд банхус кӕнун? Кенӕ ба дӕ бон н’ адтайдӕ, ӕрдзон бӕллӕхи ка бахаудтӕй, еци хуӕртӕ ӕма ӕнсувӕртӕн банхус кӕнун сӕ хӕдзӕрттӕ кенӕ Паддзахади  залтӕ барӕвдзӕ кӕнунмӕ? Нӕ уарзондзийнадӕ ӕма тӕрегъӕд кӕнун ке зонӕн, е айдагъ дзурдтӕй гъӕуама бӕрӕг ма уа, фал гъуддӕгтӕй дӕр.

15. 1 Иоанни 4:7, 8 куд финст ӕй, уомӕ гӕсгӕ куд гъӕуама архайӕн?

¹⁵ Хуӕртӕ ӕма ӕнсувӕрти ку уарзӕн, уӕд уомӕй нӕ уӕларвон Фиди фӕнздзиан. (Бакӕсӕ 1 Иоанни 4:7, 8.) Ке сӕ уарзӕн, е ба бӕрӕг уодзӕй, кӕрӕдземӕн ку хатир кӕнӕн, уӕд. Еске нин нӕ зӕрдихудти ку бацӕуа, уӕд ин гъӕуама ниххатир кӕнӕн ӕма ин ӕ рӕдуд ӕ цӕстӕмӕ макӕдбал бадарӕн (Кол. 3:13). Еухатт еу ӕнсувӕр Альдомӕ гъулӕг фӕккастӕй, иннӕ ӕнсувӕр ин ӕ адӕнихатти туххӕй цидӕр ке загъта, е. Альдо зӕгъуй: «Алли бон дӕр Йеговӕмӕ кувтон, цӕмӕй еци ӕнсувӕрмӕ лӕгъуз цӕстӕй кӕсун ма райдӕдтайнӕ». Фал ма уомӕй уӕлдай Альдо еци ӕнсувӕри хӕццӕ игъосун кӕнунмӕ дӕр фӕццудӕй. Уотемӕй ин фадуат фӕцӕй ӕма ӕ хӕццӕ радзурдта. Альдо зӕгъуй: «Ӕнсувӕр ӕй ку балӕдӕрдтӕй, мӕ зӕрдӕ мин куд фӕрресун кодта, уой, уӕд ми хатир ракурдта. Бӕрӕг ибӕл адтӕй, зӕрдиагӕй ке дзурдта. Гъе уоййадӕбӕл еци хабар нӕ дууӕ дӕр феронх ан, ӕма абони уӕнгӕ дӕр хуарз ӕмбӕлттӕ ан».

16, 17. Идарддӕр дӕр куд гъӕуама архайӕн?

¹⁶ Иоанн Хуцауи сугъдӕг хъаури разамундӕй ци финстӕгутӕ ниффинста, уонӕй бӕрӕг ӕй, хуӕртӕ ӕма ӕнсувӕрти куд уарзта ӕма син се ’ууӕндундзийнадӕбӕл куд тухстӕй, е. Иоанни хузӕн лӕггадгӕнгутӕ Киристей хӕццӕ паддзӕхтӕ ке уодзӕнцӕ, е нин хъӕбӕр ӕхцӕуӕн ӕй! (1 Иоан. 2:27).

¹⁷ Гъӕйдӕ мадта макӕд иронх кӕнӕн, аци статьяй цӕбӕл дзурдтан, уой ӕма идарддӕр дӕр рӕстдзийнади надбӕл цӕуӕн, удта алли гъуддаги дӕр Йеговӕмӕ игъосӕн. Идарддӕр дӕр Хуцауи Дзурд ахур кӕнӕ ӕма си ци финст ес, уобӕл ма дузӕрдуг кӕнӕ. Архайӕ, цӕмӕй Киристебӕл никки хъӕбӕрдӕр ӕууӕндай. Аци дуйней зундӕй, удта рӕстдзийнадӕ ка ниууагъта, уонӕй дӕхе еуварс дарӕ. Иронх ди ма уӕд, уомӕн гӕнӕн ке нӕййес, цӕмӕй Йеговӕн дӕр лӕггадӕ кӕнай ӕма тӕрегъӕди надбӕл дӕр цӕуай. Дӕ цард Йегови раст уагӕвӕрдтӕмӕ гӕсгӕ аразӕ. Удта хуӕртӕ ӕма ӕнсувӕртӕн дӕр ӕнхус кӕнӕ, цӕмӕй федар уонцӕ – сӕ рӕдудтитӕ син хатир кӕнӕ, удта ӕнхус ке гъӕуй, уони фарсмӕ балӕуунмӕ цӕттӕ уо. Ӕма гъе уӕд, цийфӕнди фӕлварӕнти ма бахауӕн, уӕддӕр нӕ бон уодзӕй рӕстдзийнади надбӕл цӕун.