1. Филиппӕгтӕмӕ 2:3 куд финст ӕй, уомӕ гӕсгӕ нин иннети хӕццӕ лимӕнӕй цӕрунмӕ сӕрниллӕгдзийнадӕ куд ӕнхус кӕнуй?

МАХ сӕрниллӕгӕй Хуцауи уагӕвӕрдтӕ нӕ царди ӕнхӕст кӕнӕн, уомӕн ӕма ’й лӕдӕрӕн, уомӕй хуӕздӕр ӕй ке неке зонуй, пайда нин ци ӕй, уой (Еф. 4:22–24). Сӕрниллӕг ку уӕн, уӕд фиццагидӕр, Хуцауи ци фӕндуй, уобӕл сагъӕс кӕндзиан, удта нӕхемӕ иннетӕй хуӕздӕр некӕд кӕсдзиан. Еци менеуӕги фӕрци Йегови хӕццӕ дӕр ӕма нӕ хуӕртӕ ӕма ӕнсувӕрти хӕццӕ дӕр лимӕнӕй цӕрӕн. (Бакӕсӕ Филиппӕгтӕмӕ 2:3.)

2. Апостол Павел ци лӕдӕрдтӕй? Аци статьяй цӕмӕ ӕркӕсдзиан?

² Лӕмбунӕг ку нӕ уӕн, уӕд мах дӕр аци дуйней адӕни хузӕн сӕрбӕрзонд ӕма хеуарзагӕ исуодзиан *. Ӕвӕдзи, фиццаг ӕноси киристӕнттӕбӕл дӕр уӕхӕн хабар ӕрцудӕй, уомӕн ӕма апостол Павел Роми киристӕнттӕмӕ ниффинста: «Алкӕмӕндӕр дзорун: ци айтӕ, уӕхецӕй уомӕй фулдӕр ӕнгъӕл ма уотӕ, фал уи алкедӕр сагъӕс кӕнӕд... цӕмӕй лӕдӕргӕ уайтӕ» (Ром. 12:3). Павел ӕй лӕдӕрдтӕй, нӕхебӕл дӕр нӕ ке гъӕуй сагъӕс кӕнун. Фал сӕрниллӕг ку уӕн, уӕд нӕ бон уодзӕй нӕхемӕ раст цӕстӕй кӕсун. Аци статьяй ӕркӕсдзиан, цӕхуӕн уавӕрти нӕ фӕгъгъӕуй лӕмбунӕг ун, цӕмӕй, ци ан, уомӕй фулдӕр нӕхецӕй ӕнгъӕл ма уӕн: 1) бийнонти медӕг, 2) Йегови организаций кадгин ихӕстӕ ӕнхӕст кӕнгӕй ӕма 3) социалон сетьтӕй пайда кӕнгӕй.

3. Бийнонти медӕг хӕлхъойтӕ цӕмӕн рауайуй ӕма еуӕй-еуетӕ уӕхӕн уавӕрти куд фӕссагъӕс кӕнунцӕ?

³ Йегови уотӕ фӕндуй, цӕмӕй лӕг ӕма уосӕн бийнонти цард цийнӕ хӕсса. Фал ӕнӕнхӕст ке ан, уомӕ гӕсгӕ ба хатгай хӕлхъойтӕ дӕр рауайуй. Павел дӕр финста, бийнонтӕ ка искӕнуй, уонӕн нӕуӕг зиндзийнӕдтӕ ке фӕззиндзӕй (1 Кор. 7:28). Лӕг ӕма уосӕ арӕх ку фӕххилӕ кӕнунцӕ, уӕд сӕмӕ уотӕ кӕсун райдайуй, ӕма сӕ цард дзӕгъӕли байеу кодтонцӕ. Уӕхӕн уавӕри, аци дуйней адӕн куд фӕккӕнунцӕ, уомӕ ку кӕсонцӕ, уӕд сӕмӕ тӕккӕ растдӕр фӕккӕсдзӕй рахецӕн ун ӕма алкӕмӕндӕр ӕхе царди сагъӕс кӕнун.

4. Нӕхе цӕхуӕн сагъӕстӕй гъӕуама хезӕн?

⁴ Уотӕ гъӕуама макӕд сагъӕс кӕнӕн, ӕма нӕ бийнонти цардӕй неци рауадӕй. Мах ӕй лӕдӕрӕн, Библи куд зӕгъуй, уомӕ гӕсгӕ ӕрмӕстдӕр еунӕг гъуддаги туххӕй ке ес хецӕн кӕнӕн – цардӕмбал дӕбӕл гадзирахаттӕй ку рацӕуа, уӕд (Матф. 5:32). Мадта Павел ке кой кодта, уӕхӕн зиндзийнӕдтӕбӕл ку исӕмбӕлӕн, уӕд гъӕуама сӕрбӕрзонд ма исуӕн ӕма уотӕ сагъӕс кӕнун ма райдайӕн: «Мӕ цардӕмбалмӕ мӕн сагъӕс ӕппундӕр нӕййес. Гӕрр, уой аккаг нӕ дӕн, цӕмӕй мин хуӕздӕр цард уа? Ӕвӕдзи мин ӕндӕр еске хӕццӕ хуӕздӕр адтайдӕ». Уотӕ ка фӕгъгъуди кӕнуй, уӕхӕн адӕймаг ӕрмӕстдӕр ӕхе сагъӕс фӕккӕнуй. Аци дуйней адӕн уотӕ фӕззӕгъунцӕ, дӕ зӕрдӕмӕ, дан, игъосӕ, цӕмӕй амондгун уай, уой туххӕй дӕ хецӕн кӕнун дӕ ку багъӕуа, уӕддӕр. Фал нин Йеговӕ ба уотӕ зӕгъуй: «Уӕхецӕн куд хуӕздӕр уа, айдагъ уобӕл ма сагъӕс кӕнтӕ, фал, иннетӕн куд хуӕздӕр уа, уобӕл дӕр» (Фил. 2:4). Уотӕ ’й фӕндуй, цӕмӕй нӕ бийнонти цард ма бабун кӕнӕн, фал ӕй багъӕуай кӕнӕн (Матф. 19:6). Йегови фӕндуй, цӕмӕй унаффитӕ хӕсгӕй ӕ уагӕвӕрдтӕмӕ гӕсгӕ архайӕн, нӕхе зундӕй нӕ, фал.

5. Ефесӕгтӕмӕ 5:33 куд финст ӕй, уомӕ гӕсгӕ лӕг ӕма уосӕ кӕрӕдземӕн куд гъӕуама уонцӕ?

 ⁵ Лӕг ӕма уосӕ гъӕуама кӕрӕдзей уарзонцӕ ӕма нимайонцӕ. (Бакӕсӕ Ефесӕгтӕмӕ 5:33.) Библи зӕгъуй: «Райсунӕй раттун амондгундӕр гъуддаг ӕй» (Гъуд. 20:35). Цӕмӕй лӕг ӕма уосӕ кӕрӕдзей уарзонцӕ ӕма нимайонцӕ, уой туххӕй сӕ ци гъӕуй? Сӕрниллӕгдзийнадӕ. Еци менеуӕг сӕмӕ ку уа, уӕд си алке ӕхе сагъӕс нӕ кӕндзӕй, фал кӕрӕдзей сагъӕс кӕндзӕнцӕ (1 Кор. 10:24).

6. Стивен ӕма Стефӕний дзурдтӕй ци ес базонӕн?

⁶ Сӕрниллӕгдзийнади фӕрци берӕ бийнонтӕ амондгун цард кӕнун райдӕдтонцӕ. Еу ӕнсувӕр Стивен зӕгъуй: «Еу бийнонтӕ ку уайтӕ, уӕд еумӕ архайдзиайтӕ, уӕлдайдӕр ба зиндзийнӕдти рӕстӕг. Мӕнӕн куд хуӕздӕр уодзӕй, уобӕл сагъӕс кӕнгӕ нӕй, фал, махӕн куд хуӕздӕр уодзӕй, уобӕл». Ӕ бийнойнаг Стефӕни дӕр уотӕ гъуди кӕнуй ӕма зӕгъуй: «Неке ни фӕндадтайдӕ, дӕ гъуди дин ка некӕд нимадтайдӕ, уӕхӕн адӕймаги хӕццӕ фӕццӕрун. Нӕ гъуддаг хилӕмӕ ку фӕццӕуй, уӕд байархайӕн, цӕмӕй балӕдӕрӕн, гъуддаг цӕй медӕги ӕй, уой. Удта раковӕн, ӕрмӕг байагорӕн ӕма радзубанди кӕнӕн. Кӕрӕдзей ӕфхуӕруни бӕсти гъуддаг ниллух кӕнунбӕл байархайӕн». Лӕг ӕма уосӕ амондгун уодзӕнцӕ, алке си ӕхе сагъӕс ӕгӕр ку нӕ кӕна, уӕд.

7. Ӕнсувӕрӕн Йегови организаций кадгин ихӕстӕ ку фӕззинна, уӕд куд гъӕуама архайа?

⁷ Йеговӕн цийфӕнди гъуддаги балӕггадӕ кӕнун дӕр махӕн устур кадӕ ӕй (Пс. 27:4; 84:10). Зӕгъӕн, ӕнсувӕр Йегови организаций фулдӕр ихӕстӕ ӕнхӕст кӕнунмӕ цӕттӕ ку уа, уӕд е хуарз ӕй. Библи дӕр зӕгъуй: «Цӕстӕдарӕг исун ке фӕндуй, е хуарз гъуддагмӕ бӕллуй» (1 Тим. 3:1). Фал ӕнсувӕрӕн ести ку баихӕс кӕнунцӕ, уӕд гъӕуама ӕхемӕ ма ниууа (Лук. 17:7–10). Ӕ нисан гъӕуама уа иннетӕн сӕрниллӕгӕй лӕггадӕ кӕнун (2 Кор. 12:15).

8. Диотреф, Ози ӕма Авессаломи хабӕрттӕй цӕбӕл ахур кӕнӕн?

⁸ Библий ес, ӕ сӕр бӕрзӕндти ка хаста уӕхӕн адӕни хабӕрттӕ. Зӕгъӕн, Диотрефӕн бонзонгӕдзийнадӕ нӕ хъӕрдтӕй ӕма ’й ӕмбурди алкӕддӕр фиццаг ун фӕндадтӕй (3 Иоан. 9). Ози ӕхебӕл ӕгӕр банвӕрстӕй ӕма, Йеговӕ уомӕн ке нӕ баихӕс кодта, еци гъуддагмӕ бавналдта (2 Анз. 26:16–21). Авессаломи ба фӕндадтӕй паддзахи бунат байахӕссун, ӕма уой туххӕй адӕни зӕрдитӕ ӕлхӕдта (2 Сам. 15:2–6). Аци хабӕрттӕй хуарз зиннуй, уӕхӕн адӕнӕй Йеговӕ арази ке некӕд уодзӕй (Ӕмб. 25:27). Адӕймаг сӕрбӕрзонд ку уа ӕма ӕхецӕн кадӕ ку агора, уӕд ӕй е хуарзӕй нецӕмӕ ӕркӕндзӕй (Ӕмб. 16:18).

9. Йесо нин цӕхуӕн цӕветтон ниууагъта?

⁹ Нур ба расагъӕс кӕнӕн Йесо Киристей цӕветтонбӕл. Йесо еци ӕртӕ адӕймагей хузӕн н’ адтӕй. «Кӕд Хуцауи хузӕн адтӕй, уӕддӕр имӕ уӕхӕн гъуди некӕд фӕззиндтӕй, цӕмӕй Хуцаумӕ ци бартӕ ес, уомӕ дӕр уӕхӕн бартӕ уа» (Фил. 2:6). Йегови фӕсте Йесойӕй фулдӕр хъаурӕ ӕма бартӕ некӕмӕ ес, фал уой туххӕй ӕ сӕр бӕрзӕндти некӕд хаста. Е ӕ фӕдбӕлдзӕугутӕн загъта: «Сумахӕй ӕхе иннетӕй дӕлдӕрбӕл ка нимайуй, уӕлдӕр е ӕй» (Лук. 9:48). Махӕн хъӕбӕр ӕхцӕуӕн ӕй, Киристей ка фӕнзуй, ӕма сӕрниллӕгӕй ка лӕггадӕ кӕнуй, еци пионерти, кӕстӕреуӕггӕнӕг ӕнсувӕрти, хестӕр нӕлгоймӕгти ӕма районон цӕстӕдаргути хӕццӕ ӕмгуст кӕнун. Сӕрниллӕг ку уӕн, уӕд хуӕртӕ ӕма ӕнсувӕрти уарздзиан. Киристе ба загъта, Хуцауи адӕн сӕ уарзондзийнадӕй бӕрӕг ке уодзӕнцӕ (Иоан. 13:35).

10. Уотӕ нӕмӕ ку кӕса, ӕма ӕмбурди кадӕр цидӕр раст нӕ кӕнуй, хестӕр нӕлгоймӕгтӕ ба ’й нӕ уинунцӕ, уӕд нин ци кӕнгӕ ’й?

 ¹⁰ Зӕгъӕн, уотӕ нӕмӕ ку кӕса, ӕма ӕмбурди кадӕр цидӕр раст нӕ кӕнуй, хестӕр нӕлгоймӕгтӕ ба ’й нӕ уинунцӕ, уӕд нин ци кӕнгӕ ’й? Хъур-хъур кӕнуни бӕсти хуӕздӕр уодзӕй, ӕмбурди разамунд ка дӕттуй, уонӕн сӕрниллӕгӕй ӕнхус кӕнун (Дзиуит. 13:17). Ести исдзоруни размӕ бал дӕхе бафӕрсӕ: «Аци гъуддаг гъе уойбӕрцӕбӕл ӕхсидзгӕ ӕй, цӕмӕй ибӕл дзорун багъӕуа? Нур уобӕл дзоруни афонӕ ӕй? Еци гъуддаг мӕнмӕ хауй? Ӕмбурди еудзийнадӕбӕл тухсун ӕви мӕ мӕхе бавдесун фӕндуй?»

11. Ефесӕгтӕмӕ 4:2, 3 куд финст ӕй, уомӕ гӕсгӕ Йеговӕн сӕрниллӕгӕй ку лӕггадӕ кӕнӕн, уӕд нин ци бантӕсдзӕй?

¹¹ Йеговӕ фулдӕр аргъ кӕнуй нӕ сӕрниллӕгдзийнадӕн ӕма ӕмбурди еудзийнадӕн, ци нин ӕнтӕсуй кенӕ цӕмӕ арӕхсӕн, уомӕн нӕ, фал. Мадта дӕ бон ци ӕй, уой кӕнӕ, цӕмӕй Йеговӕн сӕрниллӕгӕй лӕггадӕ кӕнай, ӕма гъе уӕд ӕмбурди еудзийнадӕ уодзӕй. (Бакӕсӕ Ефесӕгтӕмӕ 4:2, 3.) Игъосун кӕнуни гъуддаги зӕрдиагӕй архайӕ. Иннетӕн ести хуарздзийнадӕ ракӕнунмӕ фадуӕттӕ агорӕ. Хуӕртӕ ӕма ӕнсувӕрти баиуазӕг кӕнисӕ, ӕмбурди цӕхуӕндӕр ӕхсидзгӕ ихӕстӕ ка не ’нхӕст кӕнуй, уони дӕр (Матф. 6:1–4; Лук. 14:12–14). Идарддӕр дӕр хуӕртӕ ӕма ӕнсувӕрти хӕццӕ сӕрниллӕгӕй ӕмгуст ку кӕнай, уӕд дин айдагъ де ’нтӕстдзийнӕдтӕ нӕ уиндзӕнцӕ, фал, цӕхуӕн сӕрниллӕг адӕймаг дӕ, уой дӕр.

12. Библий ӕмбӕлтти туххӕй ци финст ес?

¹² Йегови фӕндуй, цӕмӕй нӕ бийнонти ӕма не ’мбӕлтти хӕццӕ рӕстӕг игъӕлдзӕгӕй ӕрветӕн (Пс. 133:1). Йесойӕн дӕр  адтӕй хуарз ӕмбӕлттӕ (Иоан. 15:15). Библий дӕр финст ӕй, ӕцӕг ӕмбӕлттӕ дин ку уа, уӕд е хуарз ке ӕй (Ӕмб. 17:17; 18:24). Удта ма нӕ разӕнгард кӕнуй, цӕмӕй нӕхе иннетӕй ма еуварс кӕнӕн (Ӕмб. 18:1). Беретӕ фӕззӕгъунцӕ, социалон сетьти фӕрци адӕймаг фулдӕр ӕмбӕлттӕ ке иссеруй, удта ӕнкъард дӕр ке нӕ фӕккӕнуй. Фал уонӕй пайда кӕнгӕй гъӕуама лӕмбунӕг уӕн.

13. Соцсетьтӕй ка фӕппайда кӕнуй, уонӕй еуӕй-еуетӕ нифссаст ӕма ӕнкъард цӕмӕн фӕуунцӕ?

¹³ Ӕртасгути гъудимӕ гӕсгӕ соцсетьти берӕ ка фӕббадуй, етӕ арӕх нифссаст ӕма ӕнкъард фӕуунцӕ. Цума цӕмӕн? Еу гъуддаг, ӕвӕдзи, уой медӕги ӕй, ӕма си адӕн сӕхе, се ’мбӕлтти кенӕ кӕмити адтӕнцӕ, уӕхӕн хузтӕ ниввӕрунцӕ, удта хузтӕй дӕр тӕккӕ хуӕздӕртӕ равзарунцӕ. Фал етӕ сӕ царди ӕрмӕстдӕр кӕцидӕр бӕнттӕ фӕуунцӕ. Уӕхӕн хузтӕмӕ кӕсгӕй ба ӕндӕр адӕймаг расагъӕс кӕндзӕй, ӕз ба мӕ царди ӕппундӕр ку неци уинун, зӕгъгӕ. Еу 19-анздзуд хуӕрӕ загъта: «Соцсетьти кастӕн, иннетӕ уолӕфгӕ бӕнтти сӕ рӕстӕг куд игъӕлдзӕгӕй ӕрвистонцӕ, уомӕ. Ӕз ба хӕдзари бадтӕн ӕма сӕмӕ хицӕ кодтон».

14. 1 Петури 3:8 финст унаффӕ нин куд ӕнхус кӕнуй соцсетьтӕй ӕма мессенджертӕй раст пайда кӕнун?

¹⁴ Соцсетьтӕ ӕма мессенджертӕ пайда дӕр куд нӕ ’нцӕ. Зӕгъӕн, уони фӕрци нӕ бон ӕй нӕ хеуӕнтти ӕма не ’мбӕлтти хӕццӕ дзорун. Фал ӕй, ӕвӕдзи, ду дӕр арӕх фӕууинис, еуӕй-еуетӕ сӕхе соцсетьти куд фестаунцӕ, уой. Раст цума уотӕ фӕдздзорунцӕ: «Мӕнӕ дӕн, ӕр мӕмӕ кӕсетӕ!» Еуӕй-еуетӕ ба, сӕхуӕдтӕ ке ниввардтонцӕ кенӕ иннетӕ ке ниввӕрунцӕ, еци хузтӕмӕ аллихузи лӕгъуз комментаритӕ ниууадзунцӕ. Уӕхӕн миутӕн ба уарзондзийнадӕ ӕма сӕрниллӕгдзийнади хӕццӕ еумӕйагӕй неци ес. (Бакӕсӕ 1 Петури 3:8.)

15. Библи нин куд ӕнхус кӕнуй, цӕмӕй иннети цӕсти нӕхе ма уӕлдӕр кӕнӕн?

¹⁵ Кӕд соцсетьтӕй кенӕ мессенджертӕй пайда кӕнис, уӕд дӕхе бафӕрсӕ: «Ци видеотӕ, хузтӕ ӕма комментаритӕ си ниввӕрун, уонӕмӕ кӕсгӕй уотӕ неке бангъӕлдзӕй, ӕма мӕхе ’стаун? Хицӕ кӕнун мӕмӕ неке райдайдзӕй?» Библий финст ӕй: «Дуйней цидӕриддӕр ес: тӕрегъӕдгун бауӕри монцтӕ, цӕстити монцтӕ ӕма мулкӕй хе ’стаун,– етӕ Фидӕй не ’нцӕ, фал ӕнцӕ аци дунейӕй»  (1 Иоан. 2:16). Еу библиртасӕг куд загъта, уомӕ гӕсгӕ дзурдтӕ «мулкӕй хе ’стаун» хаунцӕ, ӕхе, иннети цӕсти ци ӕй, уомӕй уӕлдӕр ка ӕвӕруй, уӕхӕн адӕймагмӕ. Киристӕнттӕ, иннети цӕсти син ци кадӕ уодзӕй, уобӕл нӕ мӕтӕ кӕнунцӕ, фал архайунцӕ Библий унаффӕмӕ гӕсгӕ: «Ма исуӕн кадӕуарзагӕ ӕма кӕрӕдзей, ка хуӕздӕр ӕй, зӕгъгӕ, уобӕл ма ардауӕн, удта кӕрӕдземӕ соцъа ма кӕнӕн» (Гал. 5:26). Сӕрниллӕг ку уӕн, уӕд аци дуйней сӕрбӕрзонд ӕма хестауагӕ адӕни хузӕн не ’суодзиан.

16. Сӕрбӕрзонддзийнадӕй нӕхе цӕмӕн гъӕуама хезӕн?

¹⁶ Гъӕуама сӕрниллӕг уӕн, уомӕн ӕма сӕрбӕрзонд адӕймаги лӕдӕргӕ исхонӕн нӕййес (Ром. 12:3). Сӕрбӕрзонд адӕймаг буцӕу кӕнун фӕууарзуй, удта ӕрмӕстдӕр ӕхе сагъӕс фӕккӕнуй. Ӕ сагъӕстӕ ӕма ӕ гъуддӕгтӕ ӕхецӕн дӕр ӕма иннетӕн дӕр зӕранӕй ӕндӕр неци фӕххӕссунцӕ. Цалинмӕ уӕхӕн адӕймаг ӕ зундахаст нӕ раййева, уӕдмӕ ин Сайтан ӕ зунд ихалдзӕй ӕма ин ӕй хъӕрӕу кӕндзӕй (2 Кор. 4:4; 11:3). Сӕрниллӕг адӕймаг ба лӕдӕргӕ фӕууй, ӕхемӕ раст цӕстӕй фӕккӕсуй ӕма ’й фӕллӕдӕруй, алли адӕймаг дӕр си цӕмӕйдӕр хуӕздӕр ке ӕй (Фил. 2:3). Удта ’й фӕззонуй, «Хуцау сӕрбӕрзонд адӕнӕн сӕ нихмӕ [ке] ӕй», сӕрниллӕгтӕн ба е ’стур хуарзӕнхӕй ке хай кӕнуй (1 Пет. 5:5). Лӕдӕргӕ адӕймаги нӕ фӕффӕндуй, цӕмӕй Йеговӕ ӕ нихмӕ исуа.

17. Цӕмӕй алкӕддӕр сӕрниллӕг уӕн, уой туххӕй ци гъӕуй кӕнун?

¹⁷ Цӕмӕй алкӕддӕр сӕрниллӕг уӕн, уой туххӕй гъӕуама архайӕн Библий унаффӕмӕ гӕсгӕ: «Зӕронд уодигъӕдӕ ӕ миути хӕццӕ ниууадзетӕ ӕма уӕ уодигъӕдӕ нӕуӕгмӕ раййеветӕ» (Кол. 3:9, 10). Гъӕуй нӕ Йесой хуӕздӕр базонун ӕма ӕгас хъауритӕй архайун, цӕмӕй ӕй фӕнзӕн (1 Пет. 2:21). Е ӕнцон нӕй, фал нӕ хъиамӕттӕ уой аргъ ӕнцӕ. Нӕ уодигъӕди сӕрниллӕгдзийнадӕ ку федар кӕнӕн, уӕд нӕ бийнонти цард амондгундӕр уодзӕй, не ’мбурди фулдӕр еудзийнадӕ уодзӕй ӕма социалон сетьтӕй лӕдӕргӕй пайда кӕндзиан. Фал сӕйрагдӕр ба е ӕй, ӕма ни Йеговӕ арази уодзӕй, удта нин арфӕ кӕндзӕй.