МАХ ӕй федарӕй зонӕн, аци «фӕстаг бӕнтти» Йеговӕ ӕ адӕнӕн разамунд ке дӕттуй ӕма син ке ӕнхус кӕнуй, цӕмӕй имӕ хӕстӕг кӕнонцӕ (2 Тим. 3:1). Ӕной ни алкедӕр гъӕуама игъоса Йеговӕмӕ. Нӕ уавӕр ӕнгъезуй рабарун, израилӕгтӕ ӕдзӕрӕг будури ку адтӕнцӕ, уӕд сӕ уадиндзи гъӕрмӕ игъосун куд гъудӕй, уой хӕццӕ.

Йеговӕ Моисеййӕн дууӕ ӕвзестӕ уадиндзи искӕнун кодта ӕма ин загъта: «Еци уадиндзитӕ дин уодзӕнцӕ, цӕмӕй сӕ уастӕй адӕнӕн фегъосун кӕнай, еугурӕйдӕр ке гъӕуама ӕрӕмбурд уонцӕ кенӕ сӕ цатуртӕ ке гъӕуама исесонцӕ» (Ним. 10:2). Еци уадиндзи фӕрци саугинтӕ адӕнӕн игъосун кодтонцӕ, ци сӕ кӕнун гъудӕй, уой (Ним. 10:3–8). Уотӕ абони дӕр Хуцауи адӕнӕн аллихузи амундтӕ фӕууй лӕвӕрд. Еци амундтӕ фегъосӕн, устур ӕмбурдтӕмӕ нӕ ку фӕххонунцӕ, уӕд, хестӕр нӕлгоймӕгти ахурмӕ ку рарветунцӕ, уӕд, удта ӕмбурдтӕн цӕхуӕндӕр ӕййивддзийнӕдти туххӕй ку фегъосун кӕнунцӕ, уӕд.

Йегови уотӕ ку фӕндӕуидӕ, цӕмӕй ӕгас адӕн дӕр, еци сугъдӕг цатури искӕсӕн фарс бахезӕни рази ӕрӕмбурд адтайуонцӕ, уӕд саугинтӕ дууӕ уадиндземӕй дӕр ниууасиуонцӕ (Ним. 10:3). Еци уаст ӕгас муггӕгтӕмӕ дӕр игъустӕй. Цатури бахезӕнмӕ хӕстӕгдӕр ка уидӕ, еци муггӕгти бон адтӕй цалдӕр минуттемӕ дӕр ӕрбацӕун. Идарддӕр ка адтӕй, уони ба фулдӕр рӕстӕг ӕма хъауритӕ гъӕуидӕ. Фал Йегови фӕндадтӕй, цӕмӕй израилӕгтӕ ӕгасӕйдӕр ӕрӕмбурд адтайуонцӕ ӕма ин ӕ амундтӕмӕ байгъустайуонцӕ.

Мах абони сугъдӕг цатури рази ӕмбурд кӕнун нӕ гъӕуй, фал уӕддӕр хунд цӕуӕн Хуцауи адӕни фембӕлдтӕмӕ. Уонӕмӕ хаунцӕ регионалон конгресстӕ, удта ӕхсидзгӕ хабӕрттӕ ӕма амундтӕ кӕми фегъосӕн, ӕндӕр уӕхӕн фембӕлдтӕ. Еци фембӕлдти программӕ ӕгас бӕстити дӕр ӕмхузӕн фӕууй. Ӕма сӕмӕ ка ’рбацӕуй, уонӕн хъӕбӕр ӕхцӕуӕн фӕууй уойбӕрцӕ Йегови лӕггадгӕнгути фӕууинун. Еуӕй-еуетӕ уӕхӕн фембӕлдтӕмӕ идард рауӕнтӕй ӕрбацӕунцӕ. Фал си фӕсмон неке ракӕнуй.

Идард рауӕнти минкъий къуӕрттӕй ка ӕмбурд кӕнуй, уони туххӕй ба ци ес зӕгъӕн? Нӕуӕг технологити фӕрци уони бон дӕр ӕй устур фембӕлдти программӕмӕ игъосун. Зӕгъӕн, еухатт сӕйраг хайади минӕвар Бенинмӕ ку ӕрбацудӕй, уӕд бунӕттон филиал видеотрансляци искодтонцӕ шахтерти горӕт Арлимӕ. Еци горӕт ӕй Нигери, ӕдзӕрӕг будур Сахари. Еци трансляцимӕ бакастӕй 21 адӕймаги, уонӕй 5 нӕ хуӕртӕ ӕма ӕнсувӕртӕ, 16 ба – фулдӕр базонун ке фӕндадтӕй, етӕ. Ӕма кӕд идард адтӕнцӕ, уӕддӕр син хъӕбӕр ӕхцӕуӕн адтӕй, еци программӕмӕ байгъосун, раст цума сӕхуӕдтӕ дӕр еци 44 131 адӕймагей астӕу адтӕнцӕ, уотӕ. Еу ӕнсувӕр  ниффинста: «Аци трансляций туххӕй уин ӕгас зӕрдӕй арфӕ кӕнӕн! Нӕуӕгӕй бабӕй ӕй фӕууидтан, куд хъӕбӕр нӕ уарзетӕ, уой».

Еу уадиндзи гъӕр ку райгъусидӕ, уӕд ӕмбурди цатурмӕ гъӕуама ӕрбацудайуонцӕ «хестӕртӕ, минти сӕргъи ка лӕууй, етӕ» (Ним. 10:4). Моисей сӕ ахур кодта ӕма син нӕуӕг амундтӕ лӕвардта, ӕма уой фӕрци сӕ бон адтӕй сӕ ихӕстӕ ӕнхӕст кӕнун. Ду ба еци хецӕуттӕй сӕ еу ку адтайсӕ, уӕд нӕ байархайдтайсӕ, цӕмӕй еци фембӕлдмӕ ӕрбацӕуай ӕма Моисеймӕ лӕмбунӕг байгъосай?

Хестӕр нӕлгоймӕгтӕ Хуцауи дзогӕн сӕхе хецӕуттӕ нӕ кӕнунцӕ (1 Пет. 5:1–3). Фал ӕгас хъауритӕй архайунцӕ, цӕмӕй Йегови уӕриккитӕн ӕнхус кӕнонцӕ. Уомӕ гӕсгӕ син ӕхцӕуӕн фӕууй, еци гъуддаги дӕснидӕр ке фӕрци фӕууодзӕнцӕ, уӕхӕн скъолатӕ рацӕун, зӕгъӕн, Бӕрнон ӕнсувӕрти скъола. Уоми ахур кӕнгӕй хестӕр нӕлгоймӕгтӕ базонунцӕ, ӕмбурди сӕ ихӕстӕ хуӕздӕр ӕнхӕст кӕнун сӕ бон куд ӕй, уой. Уой фӕрци хестӕр нӕлгоймӕгтӕ дӕр ӕма ӕмбурди иннетӕ дӕр Йеговӕмӕ хӕстӕгдӕр исунцӕ. Мадта зӕгъӕн ес, ӕма еци скъолатӕ дӕуӕн дӕр пайда хӕссунцӕ, кӕд си ахур нӕ кодтай, уӕддӕр.

Еуӕй-еухатт израилаг саугинтӕ уадиндзӕй цалдӕр цубур уасти никкӕниуонцӕ. Е син уобӕл дзорӕг адтӕй, ӕма Йегови фӕндуй, цӕмӕй исистонцӕ ӕма идарддӕр цӕуонцӕ (Ним. 10:5, 6). Еци хабар гъӕуама бӕлвурд ӕгъдаумӕ гӕсгӕ цудайдӕ, ӕма уой туххӕй алли израилаги дӕр архайун гъудӕй. Е, ӕвӕдзи, алкӕмӕн ӕнцон н’ адтӕй. Цума цӕмӕн?

Ӕвӕдзи си кӕмӕдӕрти уотӕ кастӕй, ӕма уадиндзи уаст ӕгӕр арӕх кенӕ ӕнӕнгъӕлти райгъусуй. Библий финст ӕй, сугъдӕг цатури сӕрмӕ мегъӕ ку исистидӕ, уӕд израилӕгтӕ ке ранӕхстӕр уиуонцӕ. Цума е куд арӕх фӕууидӕ? «Еуӕй-еухатт мегъӕ лӕудтӕй изӕрӕй сӕумӕмӕ», иннӕ хатт ба – «дууӕ бони, мӕйӕ кенӕ уомӕй дӕр фулдӕр» (Ним. 9:21, 22). Ӕма сӕ сӕ бунат ӕййевун ба цал хатти багъудӕй? Нимӕдзти 33-аг сӕри финст ӕй еу 40 бунатей туххӕй.

Израилӕгтӕй ескӕмӕн ку бантӕсидӕ, «адӕймагбӕл тас ка ’фтауй, еци ӕдзӕрӕг будури» сӕ цатур кӕми ӕрӕвардтайуонцӕ, уӕхӕн аууон иссерун, уӕд хъӕбӕр цийнӕ кӕниуонцӕ (Дук. з. 1:19). Ӕма сӕ ӕндӕр бунатмӕ цӕун ку багъӕуидӕ, уӕд сӕмӕ, ӕвӕдзи, уотӕ кӕсидӕ, ӕма нӕуӕг бунат фуддӕр уодзӕй.

Израили муггӕгтӕ ку ранӕхстӕр уиуонцӕ, уӕд си, ӕвӕдзи, кӕмӕндӕрти ӕнцон н’ адтӕй сӕ кезумӕ бангъӕлмӕ кӕсун. Уадиндзи уаст еугурӕйдӕр фегъосиуонцӕ, фал син ӕмбурдемӕй рахуӕцӕн ба н’ адтӕй. Фиццаг цалдӕр цубур уасти ку райгъусидӕ, уӕд бал рахуӕциуонцӕ, искӕсӕн ӕрдиги ка адтӕй, еци ӕртӕ муггаги – Иуди, Иссахари ӕма Завулони муггӕгтӕ (Ним. 2:3–7; 10:5, 6). Етӕ ку рахуӕциуонцӕ, уӕдта саугинтӕ дуккаг хатт уадиндзӕй цалдӕр цубур уасти никкӕниуонцӕ, ӕма хонсар ӕрдиги ци ӕртӕ муггаги адтӕй, етӕ рацӕуиуонцӕ. Ӕма уотӕ адтӕй, цалинмӕ 12 муггаги дӕр нӕ исистиуонцӕ, уӕдмӕ.

Нӕ организаций ци ӕййивддзийнӕдтӕ ӕрцӕуй, уонӕй нӕмӕ кӕцидӕртӕ ӕнахур фӕккӕсунцӕ. Кенӕ нӕмӕ уотӕ фӕккӕсуй, ӕма ӕгӕр берӕ ӕййивддзийнӕдтӕ цӕуй. Кенӕ ба, ӕвӕдзи, расагъӕс кӕнӕн, ӕнойдӕр алцидӕр хуарз ку адтӕй, зӕгъгӕ. Кудфӕнди ма уа, уӕддӕр ӕййивддзийнӕдтӕбӕл исахур ун алкӕд ӕнцон нӕ фӕууй, ӕма нӕ уой туххӕй рӕстӕг фӕгъгъӕуй. Фал уӕддӕр ку байархайӕн, уӕд ӕй фӕууиндзиан, еци ӕййивддзийнӕдтӕ нин пайда ке ’нцӕ ӕма ни Йеговӕ дӕр арази ке ӕй.

Моисеййи рӕстӕги Йеговӕ ӕдзӕрӕг будурбӕл милиуангай адӕни рахудта, нӕлгоймӕгти, силгоймӕгти ӕма сувӕллӕнтти. Ӕнӕ уой ӕнхусӕй си нӕ фӕййервазтайуонцӕ. Абони дӕр нин Йеговӕ ке ӕнхус кӕнуй, уой фӕрци не ’ууӕндундзийнадӕ федарӕй-федардӕр кӕнуй. Гъӕйдӕ мадта мах дӕр Йеговӕмӕ алкӕддӕр игъосӕн, еузӕрдон израилӕгтӕ уадиндзи гъӕрмӕ куд игъустонцӕ, уотӕ!