1. Хуцауӕй тӕрсун ци нисан кӕнуй, ӕма е, Хуцауи ка уарзуй, уонӕн ӕхсидзгӕ цӕмӕн ӕй?

КИРИСТӔНТТӔ Хуцауи уарзунцӕ ӕма си тӕрсунцӕ. Кадӕр зӕгъдзӕй, уарзгӕ ке кӕнис, уомӕй ба тӕрсгӕ куд гъӕуама кӕнай, зӕгъгӕ. Фал ами уӕхӕн тарстбӕл нӕ цӕуй дзурд. Хуцауӕй ка тӕрсуй, еци адӕн ӕй нимайгӕ дӕр кӕнунцӕ. Етӕ тӕрсунцӕ, сӕ уӕларвон Фиди зӕрдихудти ку бацӕуонцӕ ӕма си ку раидард уонцӕ, уомӕй (Пс. 111:10; Ӕмб. 8:13).

2. Псаломи 86:11 финст дзурдтӕмӕ гӕсгӕ цӕхуӕн дууӕ фарстайемӕ ӕркӕсдзиан?

² Бакӕсӕ Псалом 86:11. Паддзах Давиди дзурдтӕй бӕрӕг ӕй, Хуцауӕй тӕрсун куд ӕхсидзгӕ ӕй, уой ке лӕдӕрдтӕй. Ӕркӕсӕн, еци кувди дзурдтӕй цӕбӕл ахур кӕнӕн, уомӕ. Фиццаг бал базондзиан, Хуцауи номӕй тӕрсун цӕмӕн гъӕуй, уой. Уой фӕсте ба радзордзиан, Хуцауи ном ке нимайӕн, уой нӕ царди ӕвдесун нӕ бон куд ӕй, уобӕл.

3. Моисеййӕн цӕхуӕн хабар банхус кодтайдӕ Йегови номӕй тӕрсун?

³ Расагъӕс кӕнӕ, Моисей цӕхуӕн деси бафтудайдӕ, Йеговӕ ин цӕстӕбӕлуайӕни ӕ кадӕ ку бавдиста, уӕд. Еци хабари туххӕй энциклопедий «Понимание Писания» финст ӕй: «Уӕхӕн дессаги хабар, Киристей размӕ ка цардӕй, уонӕй еунӕг адӕймаг дӕр, ӕвӕдзи, нӕ фӕууидта». Моисей фегъуста изӕди дзурдтӕ: «Йеговӕ, Йеговӕ ӕй фӕлмӕнзӕрдӕ ӕма тӕрегъӕдгӕнагӕ Хуцау, мӕстгун кӕнунмӕ тагъд ка  нӕ кӕнуй, ӕнӕкӕрон ӕй е ’новуд уарзт ӕма алли гъуддаги дӕр ӕй раст» (Рац. 33:17–23; 34:5–7). Моисей дзубандий медӕг Йегови ном ку исдзоридӕ, уӕд, ӕвӕдзи, аци цӕстӕбӕлуайӕн ӕ зӕрди ӕрӕфтуидӕ. Мадта дессаг нӕй, фӕстӕдӕр Израили адӕнӕн уотӕ ке ниффӕдзахста, «адӕймагбӕл тас ка ’фтауй, еци номӕй, дӕ Хуцау Йегови номӕй» тӕрсӕ, зӕгъгӕ (Дук. з. 28:58).

4. Цӕмӕй Йегови никки хъӕбӕрдӕр нимайӕн, уой туххӕй нӕ ци кӕнун гъӕуй?

⁴ Йегови номбӕл сагъӕс кӕнгӕй хуарз уайдӕ, уӕхӕн ном ка хӕссуй, уой менеугутӕбӕл сагъӕс кӕнун, зӕгъӕн, ӕ хъаурӕ, зунд, рӕстдзийнадӕ ӕма уарзондзийнадӕбӕл. Еци, удта ма ӕндӕр менеугутӕбӕл дӕр ку сагъӕс кӕнӕн, уӕд Йегови никки хъӕбӕрдӕр нимайдзиан (Пс. 77:11–15).

5, 6. а) Йегови ном ци нисан кӕнуй? б) Рацуди 3:13, 14 ӕма Исаййи 64:8 куд финст ӕй, уомӕ гӕсгӕ Йеговӕ ӕ фӕндон куд ӕнхӕст кӕнуй?

⁵ Хуцауи ном ци нисан кӕнуй, уой туххӕй ци зонӕн? Берӕ ахургӕндтӕ куд зӕгъунцӕ, уомӕ гӕсгӕ еци ном нисан кӕнуй, «Е уотӕ бакӕнуй, ӕма исуй». Е нин нӕ зӕрдӕбӕл лӕуун кӕнуй, Йеговӕ ци исфӕндӕ кӕнуй, уой алкӕддӕр ке исӕнхӕст кӕнуй. Цума куд?

⁶ Йеговӕ исуй, ӕ фӕндон исӕнхӕст кӕнунмӕ ка гъӕуама исуа, е. (Бакӕсӕ Рацуд 3:13, 14.) Нӕ публикацити нӕ арӕх фӕрразӕнгард кӕнунцӕ еци гъудибӕл сагъӕс кӕнунмӕ. Уомӕй уӕлдай ма Йеговӕ е ’нӕнхӕст лӕггадгӕнгутӕн ӕнхус кӕнуй, цӕмӕй ӕ фӕндон ӕнхӕст кӕнунмӕ цӕхуӕнттӕ гъӕуама уонцӕ, уӕхӕнттӕ исуонцӕ. (Бакӕсӕ Исаййи 64:8.) Бӕрӕг ӕй, Йегови ӕ фӕндон исӕнхӕст кӕнунмӕ ке неци бахъор кӕндзӕй (Ис. 46:10, 11).

7. Цӕмӕй нӕ уӕларвон Фидӕй никки хъӕбӕрдӕр боз уӕн, уой туххӕй нӕ бон ци ӕй кӕнун?

⁷ Нӕ уӕларвон Фиди гъуддӕгтӕбӕл, удта махӕн дӕр уой фӕрци цитӕ бантӕстӕй, уобӕл ку сагъӕс кӕнӕн, уӕд си никки хъӕбӕрдӕр боз уодзиан. Зӕгъӕн, цитӕ сфӕлдиста, уобӕл ку фӕссагъӕс кӕнӕн, уӕд нӕ десӕн кӕрон нӕбал фӕууй (Пс. 8:3, 4).  Ӕ фӕндон исӕнхӕст кӕнунмӕ нин куд банхус кодта, уобӕл ку фӕссагъӕс кӕнӕн, уӕдта ӕй никки хъӕбӕрдӕр нимайун райдайӕн. Йегови ном ӕцӕгӕйдӕр дессаг ӕй! Ӕ ном ӕвдесуй, цӕхуӕн Хуцау ӕй, нурмӕ ци искодта ӕма ма никкидӕр ци искӕндзӕй, уой (Пс. 89:7, 8).

8. Дуккаг закъони 32:2, 3 куд финст ӕй, уомӕ гӕсгӕ Йегови номмӕ цӕхуӕн цӕстӕй гъӕуама кӕсӕн?

⁸ Израилӕгтӕ Зӕрдӕвӕрд зӕнхи къӕсӕрмӕ ку лӕудтӕнцӕ, уӕд Йеговӕ Моисеййӕн байамудта еу зар (Дук. з. 31:19). Моисей ба еци зар адӕнӕн байамудта. (Бакӕсӕ Дуккаг закъон 32:2, 3.) 2-аг ӕма 3-аг стихтӕй хуарз зиннуй, Йеговӕ ӕ номи туххӕй ци гъуди кӕнуй, е: нӕ ’й фӕндуй, цӕмӕй ин ӕ ном римӕхсонцӕ ӕма ’й табуйагбӕл ке нимайунцӕ, уой туххӕй ин ӕй дзорун дӕр ма ’ндеуонцӕ. Йегови фӕндуй, цӕмӕй ӕй алкедӕр ӕ номӕй зона! Израилӕгтӕ еци зари фӕрци Йегови ӕма ӕ номи туххӕй фулдӕр ке базудтонцӕ, е син устур кадӕ адтӕй. Моисеййи дзурдтӕ син адтӕнцӕ, кӕрдӕгӕн фӕлмӕн уарун куд фӕууй, уотӕ, ӕма си нифс бауагътонцӕ. Цума мах дзурдтӕ ба, кӕмӕн игъосун кӕнӕн кенӕ Библи ке хӕццӕ ахур кӕнӕн, уонӕн сӕ нифс бафедар кӕнунцӕ?

9. Нӕ бон куд ӕй Йегови ном рохс кӕнун?

⁹ Хӕдзарӕй-хӕдзарӕмӕ кенӕ, берӕ адӕн кӕми фӕууй, уоми ку фегъосун кӕнӕн, уӕд нӕ бон ӕй адӕнӕн Библий ӕвдесун, Хуцауи ном Йеговӕ ке ӕй. Нӕ бон син ӕй нӕ публикацитӕ дӕттун, видеороликтӕ ӕвдесун кенӕ син, нӕ сайти ци ӕрмӕг ес, уой бавдесун. Уотӕ ку архайӕн, уӕд Йегови ном рохс кӕндзиан. Уомӕй уӕлдай ма нин, гӕнӕн ес, ӕма кусти, скъолай кенӕ, ескӕми ку уолӕфӕн, уӕд фадуат фӕззинна, цӕхуӕн Хуцау нин ес, уой ескӕмӕн радзорунмӕ. Йеговӕмӕ адӕни ӕма зӕнхи туххӕй ци фӕндӕ ес, уой иннетӕн ку дзорӕн, уӕд, ка ’й зонуй, фиццаг хатт ӕрсагъӕс кӕндзӕнцӕ, Йеговӕ нӕ куд берӕ уарзуй, уобӕл. Адӕнӕн нӕ уарзӕгой Фиди туххӕй ке дзорӕн, уомӕй ин ӕ ном рохс кӕнӕн. Мах син лӕдӕрун кӕнӕн, фулдӕр адӕн Хуцауи туххӕй ци фӕдздзорунцӕ, е раст ке нӕй. Библийӕй син ци рӕстдзийнадӕ амонӕн, е ба син ӕцӕг уодӕнцойнӕ хӕссуй (Ис. 65:13, 14).

10. Библи ке хӕццӕ ахур кӕнӕн, уонӕн Хуцауи раст уагӕвӕрдтӕ ӕма закъӕнттӕ байамонун фагӕ цӕмӕннӕ ’й?

¹⁰ Мах фӕндуй, Библи ке хӕццӕ ахур кӕнӕн, уонӕн банхус кӕнун, цӕмӕй Хуцауи ном базононцӕ ӕма имӕ ӕ номӕй ковонцӕ. Уомӕй уӕлдай ма нӕ фӕндуй, цӕмӕй уӕхӕн ном ка хӕссуй, еци Хуцауи хуӕздӕр базононцӕ. Цума е нӕ къохи бафтуйдзӕй, адӕймагӕн ӕрмӕстдӕр, Хуцауи зӕрдӕмӕ ци цӕуй ӕма ци нӕ цӕуй, уой ку дзорӕн, уӕд? Ка ’й зонуй, Хуцауи закъӕнттӕ зонуй ӕма ӕ зӕрдӕмӕ дӕр цӕунцӕ. Фал ӕй цума еци закъӕнттӕ ӕнхӕст кӕнунмӕ уарзондзийнадӕ разӕнгард кӕнуй? Ӕргъуди кӕнӕн Еви хабар. Евӕ Хуцауи закъӕнттӕ зудта, фал Хуцауи ба нӕ уарзта. Адам дӕр гъе уотӕ (Райд. 3:1–6). Мадта адӕймагӕн Хуцауи раст уагӕвӕрдтӕ ӕма закъӕнттӕ байамонун фагӕ нӕй.

11. Библи ке хӕццӕ ахур кӕнӕн, уонӕн нӕ бон куд ӕй банхус кӕнун, цӕмӕй Хуцауӕн айдагъ ӕ закъӕнттӕ нӕ, фал ӕхе дӕр бауарзонцӕ?

¹¹ Йегови закъӕнттӕ ӕма уагӕвӕрдтӕ ӕгасӕйдӕр хӕссунцӕ пайда (Пс. 119:97, 111, 112). Фал уой, Библи ке хӕццӕ фӕййахур кӕнӕн, етӕ алкӕд нӕ фӕллӕдӕрунцӕ. Хатгай син ӕй балӕдӕрун кӕнун фӕгъгъӕуй, Йеговӕ нин еци закъӕнттӕ, уарзгӕ нӕ ке кӕнуй, уой туххӕй ке равардта. Мадта ахуркӕнуйнагмӕ нӕ бон ӕй уӕхӕн фарста раттун: «Хуцау нин уотӕ цӕмӕн зӕгъуй, атӕ  кӕнтӕ, атӕ ба ма кӕнтӕ, зӕгъгӕ? Е нин Хуцауи туххӕй цӕбӕл дзорӕг ӕй?» Адӕймаги зӕрдӕмӕ над иссердзиан, Йеговӕбӕл сагъӕс кӕнун ӕй ку исахур кӕнӕн ӕма ин ӕ кадгин ном ку бауарзун кӕнӕн, уӕд. Ӕма уӕд Хуцауӕн айдагъ ӕ закъӕнттӕ нӕ бауарздзӕй, фал ӕхе дӕр (Пс. 119:68). Се ’ууӕндундзийнадӕ федардӕр кӕндзӕй ӕма цийфӕнди зиндзийнӕдти дӕр бафӕраздзӕнцӕ (1 Кор. 3:12–15).

12. Давидӕн ӕ зӕрдӕ дууӕ дехи куд фӕцӕй ӕма е цӕмӕ ӕркодта?

¹² Псаломи 86:11 сӕйраг дзурдтӕ ӕнцӕ, «ӕрбангом мин кӕнӕ мӕ зӕрдӕ», зӕгъгӕ. Аци дзурдтӕ паддзах Давид ниффинста Хуцауи сугъдӕг хъаури разамундӕй. Ӕвӕдзи ’й уомӕй хуӕздӕр неке зудта, зӕрдӕ куд ӕнцонтӕй фӕггалеуӕрдӕмӕ уй, уой. Еухатт ӕ хӕдзари сӕрӕй фӕууидта, еу лӕгмӕцуд силгоймаг ӕхе куд ӕртадта, уой. Цума еци рӕстӕг Давидӕн ӕ зӕрдӕ цӕхуӕн уавӕри адтӕй? Давид Йегови закъон, «ма бабӕллӕ еске уосӕмӕ», зӕгъгӕ, хуарз зудта (Рац. 20:17). Фал имӕ уӕддӕр кӕсгӕ байзадӕй. Давидӕн ӕ зӕрдӕ дууӕ дехи фӕцӕй: еуӕрдиги Вирсавимӕ дӕр ӕ зӕрдӕ дзурдта, иннердиги ба Йегови зӕрдихудтӕй дӕр тарстӕй. Кӕд Давид берӕ ӕнзти дӕргъи Йегови уарзта, уӕддӕр ин ӕ закъони сӕрти рахизтӕй. Ӕма ’й е хуарзӕй нецӕмӕ ӕркодта. Йегови ном дӕр фегадӕ кодта, удта ка неци фудгин адтӕй, уӕхӕн адӕни дӕр фидбилизи хай бакодта, сауӕнгӕ ма ӕхе бийнонти дӕр (2 Сам. 11:1–5, 14–17; 12:7–12).

13. Кӕцӕй ӕй зонӕн, Давидӕн ӕ зӕрдӕ нӕуӕгӕй ке ӕрбангом ӕй?

¹³ Йеговӕ Давидӕн зунд байамудта, ӕма ин уой фӕрци Давид нӕуӕгӕй ӕ хуарзӕнхӕ иссирдта (2 Сам. 12:13; Пс. 51:2–4, 17). Ӕ зӕрдӕ дууӕ дехи ке фӕцӕй, е ӕй цӕмӕ ӕркодта, уой хуарз гъуди кодта. Псаломи 86:11 Давид ци дзурдтӕ ниффинста, уони ӕндӕрхузи уотӕ зӕгъун ӕнгъезуй: «Раттӕ мин, дууӕ дехи ка нӕй, уӕхӕн зӕрдӕ». Цума Йеговӕ Давидӕн уӕхӕн зӕрдӕ равардта? Гъо, уомӕн ӕма Библий куд финст ӕй, уомӕ гӕсгӕ фӕстӕдӕр Давидӕн ӕ зӕрдӕ ӕнӕгъӕнӕйдӕр Йегови хӕццӕ адтӕй (1 Пад. 11:4; 15:3).

14. Нӕхемӕ цӕхуӕн фарста гъӕуама раттӕн ӕма цӕмӕн?

¹⁴ Давиди хабар нин нӕ нифс федар кӕнуй, удта нӕ разӕнгард кӕнуй расагъӕс кӕнунмӕ. Ци уӕззау тӕрегъӕд искодта, уой абони Хуцауи лӕггадгӕнгутӕ сӕ зӕрдӕбӕл дарунцӕ ӕма уӕхӕн тӕрегъӕдӕй сӕхе хезунцӕ. Йеговӕн берӕ ӕнзти дӕргъи  лӕггадӕ кӕнӕн ӕви ӕрӕги райдӕдтан, уӕддӕр ни алкедӕр гъӕуама ӕхе бафӕрса: «Мӕ зӕрдӕ гъӕуай кӕнун, цӕмӕй мин ӕй Сайтан дууӕ дехи ма фӕккӕна?»

15. Хуцауӕй ке тӕрсӕн, е нӕ куд гъӕуай кӕндзӕй, ӕнӕгъдау ести ку рауинӕн, уӕд?

¹⁵ Зӕгъӕн, телевизори кенӕ интернети, бауӕри монцтӕ ка исцирен кӕнуй, уӕхӕн ести ку рауинис, уӕд ци фӕккӕнис? Ка ’й зонуй, дӕхецӕн фӕззӕгъис, айӕ порнографи нӕй, зӕгъгӕ. Фал си Сайтан испайда кӕндзӕй, цӕмӕй дин дӕ зӕрдӕ дууӕ дехи фӕккӕна (2 Кор. 2:11). Уӕхӕн хузӕ кенӕ видео ӕнгъезуй рабарун, устур гъӕдӕ рафадунмӕ ци минкъий ӕфсӕйнаг къӕбӕлтӕй фӕппайда кӕнунцӕ, уони хӕццӕ. Фиццаг бал къӕбӕлӕн ӕ циргъ кӕрон гъӕди ниссадзунцӕ ӕма ’й хуайун райдайунцӕ, цӕмӕй арфдӕр ниххеза. Ӕма гъе уотемӕй гъӕдӕ дӕргъӕмӕ фӕсхъӕ раттуй ӕма дууӕ дехи фӕууй. Цума уомӕн гӕнӕн ес, цӕмӕй ести ӕнӕгъдау хузӕ дӕр адӕймаги зӕрди уӕхӕн къӕбӕли хузӕн исуа? Адӕймагмӕ фиццаг тӕссаг ка нӕ фӕккӕсуй, е ӕй уой фӕсте тӕрегъӕдмӕ дӕр ӕркӕнуй ӕма Хуцаубӕл ӕ зӕрдӕ исӕййевуй. Мадта дӕ зӕрдӕмӕ цъумурӕй маци уадзӕ! Идарддӕр дӕр дӕ зӕрдӕ ӕнгом уӕд ӕма Хуцауи номӕй тӕрсӕ!

16. Ести нин фӕлварӕн ку исуа, уӕд цӕбӕл гъӕуй расагъӕс кӕнун?

¹⁶ Ӕнӕгъдау хузтӕй уӕлдай ма Сайтан ӕндӕр скъӕппӕгутӕй дӕр пайда кӕнуй. Фал мах ба нӕхе куд гъӕуама дарӕн? Ка ’й зонуй нӕмӕ фиццаг уотӕ фӕккӕсдзӕй, ӕма е тӕссаг нӕй. Зӕгъӕн, кадӕр расагъӕс кӕндзӕй: «Кӕд мӕ уой туххӕй ӕмбурдӕй нӕ рацох кӕндзӕнцӕ, уӕд си уӕхӕн лӕгъузӕй дӕр неци ес». Уотӕ сагъӕс кӕнун хъӕбӕр тӕссаг ӕй. Хуӕздӕр уайдӕ нӕхе бафӕрсун: «Майдима е Сайтани куст ӕй, ӕма архайуй, цӕмӕй мин мӕ зӕрдӕ дууӕ дехи фӕккӕна? Бауӕри монцти фӕдбӕл  ку рацӕуон, уӕд Хуцауи ном нӕ фегадӕ кӕндзӕн? Йеговӕмӕ хӕстӕгдӕр фӕууодзӕн ӕви си раидард уодзӕн?» Аци фарстатӕбӕл дзӕбӕх расагъӕс кӕнӕ. Хуцауӕй зунд корӕ, цӕмӕй дӕхе ма сайай (Иак. 1:5). Е дӕ багъӕуай кӕндзӕй ӕма дин банхус кӕндзӕй Йесой хузӕн архайун. Сайтан ӕй ку фӕлвардта, уӕд ин Йесо федарӕй загъта: «Рандӕ мӕ разӕй, Сайтан!» (Матф. 4:10).

17. Зӕрдӕ дууӕ дехи ку фӕууа, уӕд е хуарз цӕмӕннӕ уодзӕй? Ӕрхӕссӕ цӕветтон.

¹⁷ Зӕрдӕ дууӕ дехи ку фӕууа, уӕд е хуарз нӕ уодзӕй. Зӕгъӕн, спортивон команди ка ӕй, уонӕй еуетӕ сӕхе бавдесунбӕл ку архайонцӕ, иннетӕ гъазти уагӕвӕрдтӕ ку ихалонцӕ, кадӕртӕ ба, тренер ци дзоруй, уой ку нецӕмӕ даронцӕ, уӕд син ести бантӕсдзӕй? Зинтӕй. Фал еумӕйагӕй ку архайонцӕ, уӕд берӕ ӕнтӕстгундӕр уодзӕнцӕ. Мадта дӕ кӕд фӕндуй, цӕмӕй дӕ зӕрдӕ, еумӕйагӕй ка архайуй, уӕхӕн команди хузӕн уа, уӕд дӕ сагъӕстӕ ӕма дӕ фӕндтӕ гъӕуама уонцӕ Йеговӕн лӕггадӕ кӕнуни хӕццӕ баст. Сайтан дин дӕ зӕрдӕ дууӕ дехи фӕккӕнунмӕ ӕ билицъӕрттӕ хуӕруй. Уой фӕндуй, цӕмӕй дӕ сагъӕстӕ ӕма дӕ фӕндтӕ Йегови уагӕвӕрдти нихмӕ уонцӕ. Фал дӕу ба гъӕуй Йеговӕн ӕгас зӕрдӕй лӕггадӕ кӕнун (Матф. 22:36–38). Мадта Сайтанӕн барӕ макӕд дӕттӕ, цӕмӕй дин ӕй дууӕ дехи фӕккӕна!

18. Михеййи 4:5 финст дзурдтӕ дӕ цӕмӕ разӕнгард кӕнунцӕ?

¹⁸ Давиди хузӕн ду дӕр Йеговӕмӕ ковӕ: «Ӕрбангом мин кӕнӕ мӕ зӕрдӕ». Удта имӕ цӕй туххӕй ковис, уомӕ гӕсгӕ архайгӕ дӕр кӕнӕ. Алли бон дӕр ци унаффитӕ фӕххӕссис – уӕлдай нӕй ӕхсидзгӕ унаффитӕ уонцӕ ӕви нӕ – уонӕй бӕрӕг уӕд, Хуцауи ном ке нимайис. Уотемӕй кадгин кӕндзиан, ке Ӕвдесӕнтӕ ан, еци Хуцау Йегови ном (Ӕмб. 27:11). Удта ни алке бон дӕр уодзӕй пахампар Михеййи хузӕн зӕгъун: «Мах ба цӕудзиан нӕ Хуцау Йегови номӕй ӕносӕй-ӕносмӕ, муггагмӕ» (Мих. 4:5).